الحلقه السابعه عشر ..
معني أتمنى اني أمسك ايديه طول عمري ,, وصلنا تحت .. قال : يلا نواري اركبي ,,
قعدت فالسياره حسيت روحي يوم أرمس دخان يطلع من حلجي .. حلاته هههه ..
يوسف ركب .. وشغل السياره ,, بند الدرايش ,, السياره مخفي ما يبين شي .. حتى أنا يمكن ما أقدر أشوف برا من الظلمه ,,
طالعت يوسف .. طالعني ,, وقال : هـــا تجهزتي .. حق باجر ,,؟؟
قلت له : لأأ بس أغراضي هب وايد ,,
قال : أغراض الذكيه اللي وياج بتعبي السياره ,,
قلت له وأنا أضحك : ههههه حرام عليك عاد هب جذا ..
بس ضحكتي وقفت يوم يوسف تم يطالعني مبحلق مستغرب والله مدري عنّه ,,
لفيت ويهي مستحيه ,, ما رمت أحط عيني بـ عينه ,,
يوسف ياب ايده ع ويهي ولف ويهي وخلا عيني تيي بعينه ..
قال لي : فديت هـ الضحكه والله .. دوووم انشالله ..
نزلت راسي مستحيه .. بديت أفرك ادي في بعض ,, رفعت راسي قلت ,, : يـــوسف ..
قال : لــــــــبـــــــيـــــــــه ..
قلت : لبيت حاي انشالله .. ,, باجر الساعه كم بنطلع ,,؟؟
يوسف دقني ع راسي بالخفيف وقال : ويا راسج أفهم أنا انج تبين تغيرين السالفه .. ههههه
قلت لها : هههه عاد غيرها أحسن لك ..
يوسف : نواري تعالي نروح مشي عند محل هالآيس كريم ,,
قلت لها برعب : آيــــــــــس كريم مره وحده في هالبرد ..
يوسف : حلاته انزين ,, يلا ننزل ..
نزلت وياه .. تمشينا ونحن طول الوقت نمشي ..
فجأه يوسف بدا يكح ,, قلت له : صحه .. ليكون مرضت من الجو .. ؟؟
يوسف طلع بخاخ من جيبه وبخه في فمّه .. طالعته مستغربه ,,
يوسف : دوا الربو ,,
قلت له وأنا أشهق ومتخرعه : ايييييييييه .. عندك ربو ..؟؟
يوسف طالعني : جيييه ما تعرفين ,,
هزيت راسي بالنفي ,,, وقلت : عاد يلا نرد قبل لا يزيد عليك ,,
يوسف يود ايدي وقال : فديت اللي يخافون عليه والله ..
قلت له بالغلط : يفداك كلّي وربي ..
يوسف قرب راسه عني وقال : عيدي عيدي ما سمعت ,,,
قلت له : سلامات ما تشوف شر ,,
يوسف : هههه يالمكاره ,,
رحنا محل الآيس كريم .. خذينا لنا آيس كريم ,, ما خليت يسوف ياكل ماله الا يوم يذوب هع أحسن ,, وعقب ردينا السويت مشي .. كان الجو روعه وبرد نفس الوقت .. لكنني مع يوسف أحس بالدفا ..
دخلت الحجره شفت جواهر راقده ,, رحت غيّرت .. ورقدت .. من التعب ما حسيت الا بمرت عمي توعينا ,, طالعت الساعه .. شفت الساعه ثمان ,, رحت بسرعه تسبحت ولبست ، .. لبست عبايتي ,, وطلعت الصاله عسب أتريق .. أنا وجواهر تريقنا ,, وعقب رحنا حطينا شنطنا في صوب ,,
طلعت من الحجره .. شفت يوسف داخل ,, ولابس وكاشخ ,,
جان ييي يسلم على أمه ويبوس راسها ,, وطالع صوبي ..
قال : ها جاهزين ,,؟؟
قلت : هيييه ,,
مرت عمي : تريق انزين ولدي ..
يوسف : مابا بس صبي لي جاي ,,
قلت : هاااه جاي ع الريق ,, عمووه صبي له حليب أحسن ,,
مرت عمي : هههه فديتج .,. يسوف شكلها يت اللي بتعلمك النظام ,,
جواهر طلعت : هذا اذا هو ما خربها وعلمها الكسل هههه
يوسف : صخي ولا تراني بودرج في صلاله ..
جواهر : لا لا .. أبا أرد دبي ربيعاتي هنااااك ,,
يوسف : ترد حق ربيعاتها هب لأنه هلها اهناك ..
مرت عمي : الله يهديكم ,, حبيبي يوسف تامر بحايه ثانيه ,,
يوسف : لا الغاليه .. بنطلع الحين ..
مرت عمي : في أمان الله ..
يوسف راح باس راسها : في أمان الكريم .. وين الوالد
مرت عمي : راقد حليله متزجم ..
يوسف : هيييه سلامات ما يشوف شر تبيني أوديه العياده ..
مرت عمي : لا حبيبي انتو سيرو ياسر عندنا
يوسف : زين يصير أي شي اتصلو بي .... يلا بنات ,,
نزلنا أنا وجواهر مع يوسف ويوم وصلنا البنايه تحت يوسف تم يمبي وقال بصوت واطي ,,
يوسف : تغشي ,,
طالعته استغربت .. بس بعد تغشيت مدري ليش .. معني ولا مره في حياتي تغشيت ,, بس يوسف لو طلب عنيه أفر روحي في البحر بفر روحي .. علني أفدااااه ,,
تجدمنا .. ركبنا السياره ,, هالمره ركبت يدااام .. مع يسوووف ..
يوسف على طول لبس النظاره ,,
جواهر : زين يبتها وياااك ..
طالعتهم مستغربه ,, جواهر قالت : ترا ريلج نظره هب أوكي ,,
هاي أول مره أسمع هالشي عن يوسف ,, أول مره أعرف انه نظره خفيف ,, وغير جذا عنده ربو .. صج الزمن فرق بينا ,, بس يالله الحمدلله انه رد جمعنا مره ثانيه ,,
لو أردى صفات العالم فيك يا يوسف جان خذيتك .. بس الحمدلله انك سيد الرجاااال كلهم ..
شفت جواهر راقده .. على طول رقدت ماشالله عليها ,, أنا ما ياني رقاد .. غير انه يوسف ساكت من ظهرنا ما قال ولا ربع كلمه ,, يمكن هذي بعد من عاداته ,,
حاولت ارقد ما ياني رقاد .. تميت أطالع صوب الشارع .. سرحت شوي ,,
حسيت بالسياره قاعده توقف بمكان صديت شفت يوسف وقّف السياره عند محطة بترول ..
يوسف : تبين شي ..؟
قلت له : لا .. يمكن جواهر تبا .. بس جواهر راقده ..
يوسف : أوكي ..
نزل يوسف دخل المحطه ,, وظهر معاه أجياس ,, ركب عطاني اياهم ,, حطيتهم ,,
يوسف حرك السياره ,,
قال : طلعي البيبسي ,, وافتحي لي اياه ,,
قلت له : بيبسي ,, !! هب أوكي يسوف انت روحك مريض ,,
يوسف طالعني ابتسم .. : خلاااص انزين هههه ... عطيني سفن آب ,,
قلت له : لا والله شو الفرق ,,
يوسف : نورو أنا متعود .. يلا افتحي لي اياه ,,
طلعت البيبسي من الجيسه ,, وفتحته حطيته مكان المشروبات اللي فالنص ,, ابتسمت ,, خلاااص حياتي صارت مثل حياة أي وحدة متزوجه .. وعايشه بسعاده الحمدلله ,,
يوسف : كلي شاري أكل بعد ,,
قلت له : مب مشتهيه ,,
يوسف : يا ربيييييييه من هـ البنيه عنيده ,,
قلت له : هههه حرام عليك ,,
يوسف بدا يسولف سوالف عاديه .. مواقف طريفه في حياته وأنا بعد قلت له بعض الأشيا ,, الين تعبت من الدرب ورقدت .. بس كان يقطع علينا وقت الصلاه نصلي ونرد نقبض الخط ..
ما حسيت بـ روحي الا ويوسف يهزني ع الخفيف وبصوت واطي ..
يوسف : نواري حبيبي قومي وصلنا الحدود ,,
فتحت عيوني وشفته ابتسمت .. عدلت شيلتي .. طالعت جواهر راقده وعيتها ..
خطفنا الحدود ..
جواهر : بــــــــل كل هذا أنا راقده ,,
قلت : صكّت روحها بعين هههه ..
جواهر : هممم يعت شي أكل ,,
عطيتها جيسة الأكل معنه البارد سخن والساخن برد ... يلا يمشي الحال ..
وكنا في دربنا لدبي ,, جواهر كانت مشغوله .. تطرش مسجات حق ربيعاتها .. أنا تميت قاعده .. ساكته مدري شو اللي خلاني أسكت .. عقب بدت جواهر تسولف معاي عن الطلعات .. وكيف عشنا هـالـ كم من يوم .. بصراحه كانت سفره ولا أروع .. لأنه يوسف معاي ,, فديته ,,
جربنا عن دار الحي ,, يوسف فتح جامته ,,
جواهر : فديته جو داريه محلاه ..
قلت : الشارجه أحلى ,,
جواهر : يلا مناك .. دبي أحلى ,,
يوسف : صخي انتي وياها لأفلعكن وأطلعكن من السياره ,,
أنا وجواهر ضحكنا مع بعض ,,قربنا عن منطقتنا أو بالأحرى فريجنا ..
بدينا نرتب أغراضنا .. و وصلنا البيت ,..
جواهر نزلت أول وحده .. عقب أنا نزلت .. يوسف تم في السياره ,,
جواهر فتحت الباب .. دخلنا .. كل واحد راااح حجرته ,, رحت على طول طيحت عباتي ,, ورحت صوب الحمام .. رحت تسبحت وغيرت .. طلعت مشطت شعري .. كانت الساعه 2 بليل .. لأنه صلاله بعيده وايد ..
طالعين من الصبح وتونا وصلنا بدون ما نوقف الا للصلوات ..
طلعت من الحجره .. شفت يوسف توه قاعد يصعد ..
طالعني وقال : تصبحين على خير ,,
قلت له : وانت من أهله ,,
دش حجرته .. غمضني شكله .. حليله من الصبح قاعد يسوق حراااام أكيد تعبان ومنهد حيله ,,
رحت صوب حجرة جواهر .. شفتها راقده .. رجعت الحجره .. ما ياني رقااد في البدايه .. كنت راقده طول الوقت ..بس عقب يوم بديت أنعس حطيت راسي ,,
ما حسيت بـ روحي الا و يد تلعب بـ شعري .. بديت أشل الايد .. وتجلبت أتأفف ,, ..
مره ثانيه الايد بدت تلعب بشعري ,, قلت : أوووووف جواهر متفيجه انتي ..
............: حياتي نشي أنا هب جواهر ...
تخرعت نقزت من الرقاد .. وقلت : حيــــــــــــــاتي ,,!!
...........: ههههه هي حياتج ,,
قلت : متى ييتي ..؟؟
الجوهره : هههه فديتج أنا أمس بليل وصلنا ,.
طالعتها وارتميت في حضنها ,, قلت : فديتج والله مشتاقه لج موووووت ..
قالت : وأنا أكثر هههه ... مبرووووك ..
طالعتها وقلت : الله يبارك في حياتج ,, ( ابتعدت عن حضنها ) مو جنكم ييتو قبل الموعد .. ؟؟
الجوهره : هي ... هههه حبينا نسويها مفاجأة ..
قلت لها : وأحلى مفاجأه ,,
الجوهره : نشي يلا ميثاني معايه .. عسب نتغدى ..
قلت : دامج حميتها خلاااص بتلصق فيج ,,
الجوهره : هههه حرام بس أختها خلاااص تزوجت لازم تحس بالوحده ,,
طالعتها : صدقج ,, يلا أنا رايحه أتسبح وأتلبس وأنزل ,,
الجوهره : أوكي بسرعه لأنه الساعه قربت تستوي ثلاث ..
قلت لها : مالت علي لا فير ولا ظهر مصلتنهم ..
الجوهره : عاد يلا قومي بسرعه .. بترياج تحت ,,
طلعت الجوهره .. رحت صوب الكبت طلعت لي ملابس .. ورحت تسبحت وتجهزت و صليت ..
نزلت عسب نتغدا .. تذكرت تلفوني .. رحت صوبه .. شفت مسج .. من .. ( بلسم جروحي ) ..
( حياتي أنا بظهر وبرد المغرب ,, )
رديت عليه ( بحفظ الرحمن ,, الجوهره وحمد ردو من السفر )
ورديت طلعت من الحجره .. رحت صوب البنات
قلت : مسااا الخير ,,
ميثاني نطت صوبي : هااااه ما ييبتو لي شي ..؟؟
قلت لها : ههههه تبين نارييل شي خخخخخ ..
ميثاني : مالت عليج ,,
جواهر : سيري لاااه .. محد يسب جنتيه ,,
طالعت الجوهره والجوهره قالت : الله يكملهم بعقلهم ,,
قلت لها : هههه باجر بيكبرون هههه
ما حسيت الا وجواهر وميثاني يتحرطمن عليه ..
طلعنا الغدا وتغدينا وسولفنا الجوهره تمت تسولف عن سفرتهم وكيف كانت ,,, وحمد كيف .. استانست يارب أنا ويوسف نكون جذا .. وأحسن بعد ,,
عقب جواهر راحت تراوي ميثاني الأشيا اللي شرتهم ,,
قلت : جوجو تعالي نروح الصاله اللي فوق ..
الجوهره : يلا ,,
قامت الجوهره ويايه .. قلت : هاااا ما فيه شي في الدرب ..؟؟
الجوهره : حرااااام عليج توني الا أسبوعين .,.
قلت : هههه فديتج أنا ... أتخيلج بطه ,,
الجوهره : مالت .. هههه انشالله انتي قبلي ,,
قلت لها : يااااا حــــــــــافظ جيييه تبيني أمووت ..
قعدنا عالقنفه .. الجوهره تمددت قلت : شكلج حااامل تدرين هههه
الجوهره فرت علي الفروحه : حرااام عليج ,, ها ارهاق من السفر ..
قلت : جوجو كيف كان شعورج أيام الملجه ,,؟؟
الجوهره : شرات شعورج الحين ..
قلت : لا لا .. يعني يوم حمد قال لج بنعرس .,
الجوهره : هههه أول ما رووح بديت أصييييييح أوني مابا أعرس ..
قلت : والحين ..؟؟
الجوهره : ياليته ماخذني من يوم وأنا ثلات تعش أربع تعش سنه ,, ههههه
قلت لها : لهالدرجه ههههه يالله الله يسعدج حبيبتي ,,
الجوهره : قاعد يأذن يلا نروح نصلي ,,
قلت لها : يلا ,,
رحنا نصلي وعقب نزلنا .. سوينا جاي حمر .. الجوهره طلبته شكلها تتوحم هههه لو تسمعني ,, بتذبحني ،، عقب قعدنا نسولف الين الساعه خمس العصر ,, جان حمد يتصل بالجوهره ,,
الجوهره : يلا ميثاني قمنا ,,
قلت : تو الناس حرررراااام تمو عندنا ,, شوي ..
الجوهره يت تبوسني : يلا مره ثانيه انشالله حمد مستعيل ,,
جواهر واقفه في صوب : ميثوووه أخوج سرق أختيه ,,
ميثاني : محد قال لها وافقي ,,
قلت : حرااام عليكم انتو الاثنين ،، باجر بيصيرون أم وأبو وانتو على هالطاري ..
الجوهره : عاااد مو لهالدرجه هههه
سلمنا على بعض .. لويت على الجوهره عن خاااااااااطر علني أفداها ,, والله أحبها هالانسانه واااايد ..
طلعو .. جواهر قالت : نواري تعالي نرتب الصور مال صلاله ..
قلت لها : أوكي بالمره نفضي الممري لأنه فوّل ..
جواهر : عاد يلا بسرعه عسب نلحق ,,
قلت لها : قوم عمي متى بيوصلون ..
جواهر : يمكن الفير باجر ,,
قلت لها : يوصلون بالسلامه انشالله
جواهر : آمييين ,,
رحنا نرتب الصور في اللاب ,, خذينا ساعه وشي لأنه الصور وايد ,.,. وعدلنا في حجمها .. وفي منهم لعبنا فيهم ..
الين اذن المغرب .. رحت حجرتيه عسب أصلي ,, صليت وخلصت .. رحت صوب التلفون عسب أتصل بيوسف أسأله وينه ..
توني بدق الرقم .. سمعت صوت الباب ,,
تجدمت منه مسرعه بـ فرح .. فتحته بس شهقت يوم شفت اللي يدامي .. قلبي طاااح وأنا بعد بغيت أطيح ..
ارتمت في حضني وهي تصيييح وعيونها كلها دموووع ..
سحبتها وقعدتها ع السرير رحت سكرت باب الصاله ,, يودت ويهها رفعته عسب عيونها تطيح بعيني
قلت : جواهر حبيبي شو فيج ,, ليش كل هالدموع مستوي بج شي ,,؟؟
جواهر حضنتني بقوه وتمت تصيح أكثر ..
قلت : جواهر حبيبي شو فيج ارمسي خوفتيني ,,؟؟
جواهر من بين صياحها بغت ترمس ما قدرت ,,
قلت لها : شو فيج العصر كنتي أوكي شو ياج ارمسي ,, ؟؟
شفته تعبانه شوي .. جااان أنزل عسب اييب لها ماي .. رحت صوب الثلاجه وفتحتها ,, طلعت الماي ,,
قلت حق الخدامه : سيلينا سوي عصير ليمون أوكي ,,
الخدامه : انزين نواري ,,
رحت أصعد وأنا أفكر شو فيها جواهر .. وصلت صوب الحجره شفت الباب مفتوح أنا أحيد اني ودرته مسكر ,, تجدمت منه بسرعه ,,
تخرعت يوم شفت جواهر ساكته ,, ويوسف يمبها .. شو السالفه ليكون صاير امبينهم شي ..
دخلت عطيت جواهر الماي ,, شربت شوي منه .. حطيت راسها على ريولي بديت أمسح ع شعرها ,,
يوسف ساكت ويطالع جواهر : شربتي الحين ماي .. ارمسي شو فيج ,,
جواهر تمت ساكته وما ترمس ,, ..
يوسف : نوره تدري انزين شو فيج ,,
جواهر هزت راسها بمعنى هي تدري ,,
تخرعت .. أنا شو دراني ولأا أعرف أصلا عن أي شي ,,
يوسف : نوره شو فيها جواهر ,,؟؟
قلت له : سوالف بنات ..
يوسف طالعني : مثل ..
قلت له : ماشي بس سوالف عاديه ,, هب لازم تعرف .. بناااات ..
يوسف طالعني : أكييييد ,,
قلت له و انا ابتسم : أكيد ..
طلع يوسف .. رفعت راس جواهر وطالعتها وقلت : جواهر شو فيج .. ؟؟
جواهر طالعتني وقالت وهي تصيح : نوره فهد درى باللي قاعد يصير ,,
قلت لها : جواهر بلااااج ارمسي ,,
جواهر وهي تشاهق : نوره نوره .. أنا كنت أرمس ولد ييرانا ... والحين فهد درا ,,
طالعتها وقلت : شووووووووووه .. انتي غبيه ترمسين أولاد ..
جواهر : والله كنت أرمسه تسليه وبس ,,
قلت لها : شو انتي ما تعرفين هالشي حراااااااااااام ..
جواهر بدت تصيح : أنا يايه أقول لج عسب تهديني هب تزيدين عليه ,,
قلت لها : كيف درا فهد ,,
جواهر : ولد ييرانا ربيعه هو وياسر ,,, يا خوفي ياسر يدري بيذبحني ,, وبدت تصيح أكثر ..
قلت لها : انشالله ما يدري ,, انتي ودري هالسوالف الحين ,,
جواهر : خلاااص أنا حتى موبايل مابا ,,
قلت لها : زين بس فهد درا .. ع الأقل الواحد يقدر يتفاهم وياااه .. لو انه حمد و لا واحد من خوانج جان الله يعلم شو بيسوون ..
جواهر تصيح : بس أنا طحت من عين اللي كنت أحبه يا نوره تعرفين شو يعني ..
قلت لها : انتي اهدي وانشالله السالفه بتنحل ,,
جواهر تصيح : انشالله ,, بس خلاااص طحت من عين فهد ,,
قلت لها : والله أول مره أعرف وحده تحب وتتسلى مع الغير ,,
جواهر : نوره بليز لا تزيدين علي ,,
قلت لها : انتي هدّي الحين وانشالله كل شي ينحل ,,
جواهر : انشالله ,,
ياني مسكول في التلفون من بلسم جروحي .. أكيد يباني ,,
قلت : انتي ارقدي ريحي شوي حبيبتي ..وكل شي ينحل ..
جواهر حطت راسها ,, أنا قمت عسب أطلع ,, جواهر يودت ايدي وقالت : نواري تمي ,,
قلت لها : بشوووف يوسف شو يبا وبيي لج حياتي ,, أوكي ..
طلعت رحت صوب الصاله اللي تحت .. شفت يوسف طرش لي مسج ,, ( أنا في حجرتيه تعالي عندي )
رحت فوق ودقيت باب حجرة يوسف .. فتح لي الباب ابتسم لي .. رديت له الابتسامه ,,
قال : دشي ,,
دخلت .. هاي يمكن أول مره أدخل حجرة يوسف وأنا بروحي ,,
دخلت ,, بند الباب .. قلت : اممم خله مفتوح ,,
يوسف : لا تخافين حبي ,, ايلسي أبا أرمسج في سالفه ,,
يلست ياه قعد يمبي هالشي أربكني وايد .. بلعت ريجي من الربكه وقلت : نعم ,,
خفت لا سمعنا أنا وجواهر .. أول شي جواهر بتموت عقبها أنا ,, الله يستر ,,
يوسف يوّد ايدي وقال : حياتي .. أنا قررت نعرّس ,,
طالعته متخرعه : هااااه ..؟
يوسف : جيييه ما تبين ,,
قلت له بربكه : بس مب جنه بدري ع العرس ,,
يوسف : وين .. لا انتي صغيره ولا أنا ,,
قلت له : لاأأأ بس أنا أحس روحي صغيره ,.,.,
يوسف ابتسم : وأنا أبااااج وانتي صغيره ,, عسب اربيج ,, ( ومط خدودي )
طالعته ضحكت وقلت : لأأأأأ أنا يالسه أقول الصدق ..
يوسف : ما عليج حياتي ,, انشالله بسعدج ,, طالعي هكو الجوهره عرست وهي صغيره ..
قلت له : مدري والله .. ما أعرف أنا انت شو تقول .
.
يوسف : أصلا لو بيدي جان من يوم الملجه ونحن معرسين .. بس قلت أخذ رايج ,,
طالعته وقلت : شكرا ,,
يوسف : شو هاذي بعد على شو هههههه ؟؟
قلت له : مدري روحي هههه ... يمكن من الربكه ,,
يوسف : انتي فكري عدل ,, وياريت لو الحين هالساعه تعطيني الراي ..
طالعت ايدي وبديت ألعب بصبوعي .. جواهر بمصيبه كيف أتركها .. غير اني لو تزوجت بلتهي بالعرس ,,
بس اذا صار العرس هالشي يمكن ينسي جواهر اللي صار ..
طالعته وقلت : بس أنا مابا عــــــــرس ,, حفله عاديه مع الأهل ’’
يوسف : هاااه ,, لأا حبيبتي أنا بسوي عرس لا صار ولا استوى ,,
قلت له : بس أنا مابي ,,
يوسف : نواري فكري .. لو انتي ما تبين غيرج يبا ... أمي أنا بكرها ,, وخواتي أنا أخوهم العود وأبويه ,, مو بس انتي .. فكري عدل ,,
طالعته ودموعي تهل : بس أنا أبويه محد ,,
يوسف مسح دموعي وقال : والله لو بيدي يا نوره جان عطيتج فرحي وهمج أخذه عنج ,,
قلت له : سو اللي تباااه ,,
يوسف ابتسم : هي جذا أحب اللي يسمعون الكلام هههههه
طالعته : هههه يلا عاد أنا برد حجرتيه ,,
يوسف : صح بلاها جواهر ,, ..؟؟
قلت له : سوالف بنات ,, يلا عاد بودرك ,,
وأنا طالعه يوسف قال : سوي حسابج .. ترا العرس مب هالخميس لأاأأ اللي بعده ,,
لفيت طالعته .. ابتسمت له بحيا وقلت : ما يمديني ,,
يوسف : امبلى .. بضاعف مبلغ كل شي عسب يجهزون لج اياه بسرعه ههههه
ابتسمت له ,, وطلعت رديت الحجره عسب أخبر جواهر .. بس شفتها راقده .. وشكلها يكسر الخاطر ,,
مدري شاللي بيطلعج من هالمصيبه حليلج ,, بس أنا من البدايه قلت لها تبتعد عن هالسوالف الله يسامحها ما سمعت الرمسه ,, والله لو يسوف درا جان بتروح ملح ,..
قعدت أقرا في كتاب لأني ملانه ,, وعقب رحت على موقع للعرايس .. ابتسمت وأنا أطالع الفساتين ,, يااااي وأخيرا بلبس فستان أبيض بطلع ملااااك بـ هاليوم .. وبكون مع يوسف فارس أحلامي ,, متى ييي هاليوم يارب بسرعه ,,
أذن العشا .. صليت .. ما كان لي خاطر أتعشى جااان أرقد ,, رقدت وأنا مستانسه يوسف لي وأنا لـ يوسف وأخيرا ..
ما حسيت بروحي الا وصوت ياااهل جريب عني ,, فتحت عيوني طالعته ,, ابتسمت له ضميته ,,
قلت : الحمدلله ع السلامه متى وصلتو ..؟؟
عدول : قبل شويه ,,
قلت له : فديتك والله .. يلا سير ارقد وباجر الصبح تعال رمسني أوكي ..
عدول : انزين ,,
قمت وأنا نعسانه .. رحت تيددت عسب أصلي الفير صليت وقريت قرآن ,, عقب قومت جواهر عسب تنش وتصلي .. قامت صلّت .. وعقب حطيت راسي عسب أرقد ,,
شفت جواهر بعدها على نفس الحاله مال أمس .. صح انها غلطت .. بس غلط انه نعامل أو نعالج الغلط بغلط .. يت حطت راسها عالمخده ,,
طالعتها وقلت : حبيبتي لا تفكرين .. انشالله خير ,,
جواهر ابتسمت لي ابتسامه باهته : انشالله
قلت لها : بقول لج خبر بتفرحين وايد ,,
جواهر : شو .. يمكن نطلع من الهم والنكاده اللي نحن فيها ,,
قلت لها : عرسي عقب أسبوعين ,,
جواهر ابتسمت وقالت : صدق والله
هزيت راسي بمعنى هي : أمس يوسف رمسني ,, قلت أخبرج انتي أول وحده ..
جواهر ابتسمت : الله يهنيج ,, ماما وبابا يدرون ,,
قلت : يمكن يوسف خبرهم مدري عنه ,,
جواهر ابتسمت ودموعها نزلت : شكلي أنا بتم جذا .. وسواد ويهي بيتم يلاحقني طول عمري ,,
قلت لها : جوجو شو هالرمسه حرام عليج مب لهالدرجه ,, انتي الحمدلله غلطتج هب كبيره ,, فيه بنات خسرو شرفهم ,,
جواهر بقهر : وهذا اللي أنا سويته مب شرف يعني ,,
قلت لها : انتي غلطتج تتصحح في غيرج لأأأأ احمدي ربج ,,
جواهر : أنا مدري كيف قلبي طاوعني وسويت جذا ,,
قلت لها : انتي اذكري ربج وانسي ,, وودري الولد ... هالفتره خلينا نتجهز للعرس أوكي ..
جواهر ابتسمت : انشالله ,, يلا عاد ارقدي عشان بشرتج ,,
طالعتها : الله يعيني ع الجلسات اللي في الصالون روحي أكرهها ههههه
جواهر : عاد أنا اللي بيي وياج ..
قلت لها : طبعا تراج انتي حميتيه ,,
جواهر ابتسمت لي رديت لها الابتسامه .. تلحفت عسب ارقد غمضت عيوني وأنا أدعي لي أنا وجواهر .. بحياه أفضل ,, وربي يحل مشكلة جواهر ..
قمت من النوم على صوت عموري يقومنا ,, رحت الحمام تسبحت وغيرت ,, نزلت عسب اتريق ,,
شفت عمي ومرت عمي واليهال رحت صوبهم سلمت عليهم ,,
عمي : ها شخبارج يالعروووس ,,؟؟
طالعته ابتسمت له وقلت : الحمدلله بخير ,,, ماشالله مسرع ما انتشر الخبر ..
مرت عمي : الله يوفقكم فديتج .. ويهنيج بحياتج ,,
قلت لها : آمييين ,,
يت جواهر سلمت .. وبدينا نتريق ,, عقب مر اليوم ممل لدرجه بغيت أسوي أي شي .. حتى جواهر اللي هي جواهر ما قامت تسولف .. الله يعينها ,,
اليوم اللي بعده كنا يالسات أنا وجواهر نسولف ..
............: مرحبااااااااا ..
قلت : هلا والله هلا .. هلا بالطش والرش والماي المبرد بالغرش ..
الجوهره : هههه ماي مبرد هب ماي ورد مره وحده ,,
قلت لها وأنا أقوم أبوسها : فديتج .. لج وحشه والله ,,
ميثاني تخصرت : هي لها وحشه أما نحن لا صفررررر ع الشمال ..
قلت لها : ههههه فديتج عاد مو لهالدرجه ,, بس عاااد غلاتها غيييييررر ..
ميثاني تروح عن جواهر : نحن لنا الله ,, هيه يالزمن ..
الجوهره : تعالي تعالي ... جيه ما خبرتيني يسوف قايل لج العرس عقب أسبوعين ..
قلت لها : والله أول ما ظهرتي من عندنا .. يوسف رمسني المغرب ..
الجوهره : بس ما أظن يمديج تتجهزين أنا يالله يالله شهر وخلصت ..
قلت لها : مب أسبوعين بعد .. أقل عن أسبوعين الخميس الياي ..
ميثاني وقفت : يلا عاد نشي .. ييبي عباتج نروح ناخذ جوله في السوق ..
جواهر : يا حظي .. محد عنده الليسن فينا عسب يوديني الله يرحم أيام عليوووه ..
قلت : صح شخبارها علايه .. وين دارها ..؟؟
الجوهره : بعدها في بريطانيا مع حبيب الألب هههه
ميثاني : يلا قومو .. ما بتلحق نواري تزهب للعرس ..
الجوهره : بشوف .. بدق على حمد ... بسأله اذا بيودينا ..
الجوهره قامت وشلّت وياها فونها تمينا نحن رواحنا ,,, ميثاني كانت ترّمس جواهر .. بس مبين على جواهر اهيه ولا في الدنيا بعد .. لاهيه في عالم ثاني ,,
يت الجوهره مبتسمه ..
ميثاني : ها بشري ..؟؟
الجوهره : ههههه قال أنا ياي بس خمس دقايق يبالي أوصل .. لو ما تجهزتو بودركن وبروح ..
ميثاني قامت ومسكت ايد جواهر : يلا نشي ترا ريلها يسويها ويودرنا ,,
جواهر بتعب : مالي بارض .. مابا أيي ..
ميثاني : يلا تعالي حرااام ..
جواهر : مابا .. خلااااص سيرو رواحكن ,,
قلت وأنا أطالع جواهر : والله ان ماييتي ما بسير ..
الجوهره : خلاااص جواهر تعالي .. عروسنا حلفت ما نقدر عليها ..
قمنا نلبس عبينا .. بس قبل ما ألبس عباتي رحت صوب الفون عسب أدز مسج ليوسف أخبره اني رايحه السوق ..
وأنا قاعده ألبس عباتي ,, ياني مسج لبست عباتي .. سرت صوب الفون مسج من بلسم جروحي ,,
( ديري بالج ع روحج حبيبي ,, سيري شيلي بطاقة البنك من عند الوالده .. أنا معطنها اياها ,, المهر كله
في البطاقه .. وياليييييييييت لو تتغشين .. أوكي حبيبي ,, )
رحت لبست شيلتي ,, وأنا قاعده ألبس نعالي ,, وانتو بكرامه ..
ميثاني .. يت : اييييييه يلا بسرعه .. كل هذا تستأذنين من يوسف ... رمسيه عقب ..
قلت لها : مالج خص بيسوفي سمعتي ,,
الجوهره : مب وقت ضرابتكم .. يلا بسرعه حمد بيوصل ,,
طلعت سرت صوب مرت عمي خبرتها نحن رايحين السوق .. خذيت عنها بطاقة البنك .. باسمي البطاقه .. استغربت لهالدرجه يوسف مهتم بي ,, طلعت ..
يوم وصلت تحت ..
الجوهره : يلا هكو جنه حمد وصل ,,
سرنا صوب السياره .. ركبنا .. سلمنا على حمد .. وبعد السؤال عن الحال ..
شفت الجوهره قاعده تسولف مع حمد وتضحك ,, يارب حياتي تكون مع يوسف مثلهم ونعيش بسعاده ’’
شفت حمد أبد ما كان يكلمنا .. ولا زال ما يكلمنا .. بس مع الجوهره غييييير غير .. أكيد هي شريكة حياته ,, وصلنا المركز .. حطيت الغشوه على ويهي ..
ونحن نازلين شفت الجوهره بعد متغشيه .. استغربت بس أكيد حمد قال لها مثل ما يوسف قال لي .. شي طبيعي الريال يغار على حرمته .. وهذا ماله الا تفسير واحد أكيد يحبها ..
دخلنا المركز .. حطنا أكثر من محل وشريت أغراض أحتاجها .. حتى البنات كل وحده شرت لها شي للعرس .. خذينا أكثر من ساعه ونحن نحوط الين ما خلصنا من بعض المستلزمات .. واتصلت الجوهره على حمد وياه ردنا البيت .. مر اليوم جدا عادي غير انه يوسف محد أكيد في بوظبي .. بيتأخر لما يرد ..
رتبت أغراضي اللي شريتها ورحت عند جواهر ,,
شفتها قاعده سرحانه دخلت بندت الباب وقلت : اللي ماخذ عقلج يتهنا به ..
جواهر عدلت قعدتها ابتسمت ابتسامه باهته وقالت : محد ماخذنه غير فهد ..
قلت لها : يلا زين .. جوجو ما أعرف من وين أخذ فستان العرس ..
جواهر : لا تشترين أجري .. الشرا ما منه فايده ..
قلت : هي أأجر أحسن بس من وين وكيف ..؟؟
جواهر : فيه دار ساره للأزياء نسير له وشوفي لج ..
قلت لها : أوكي عاد باجر نروح للفستان .. واللي عقبه للمخاوير ..
جواهر : هي زين .. والميكب والذهب يوم السبت
قلت : أووووف أحس كله تعب ,,
جواهر : من يوم الأحد خلاااص يوميا بنروح الصالون ..
قلت : أوكي .. بس انتي تكونين وياي ..
جواهر : أكيييييييد كيف قلبي يطاوعني أودر جنتي العوده روحها ..
قلت : ههههه فديتج ..
اليوم اللي بعده .. عمي نزلنا صوب دار الأزياء .. دخلنا وتكلمنا مع الحرمه .. معنه المصمم ريال واماراتي بعد بس فضلت نروح صوب الحرمه ..
شفت الفساتين في البدايه ما عجبني شي بس جواهر لحّت على واحد يلق لق .. جان أقول حق الحرمه أباااه وخذت قياسي .. وراوتني الطقم اللي مع الفستان والطرحه والشال اللي ينلبس لما الرياييل يدشون .. غير الكعب ,, عيبني وايد كل مواصفات الفستان حلوه غير الاكسسوار والتاج ..
اتفقنا وياها تضيجه وتعدله .. وقبل الموعد بيومين نيي ناخذه عنها .. شليت عنها الوصل عقب لفينا المحل عسب جواهر تاخذ لها واختارت لها فستان .. وشرته عنهم .. وعقب طلعنا ..
عمي : كنتو ترقدون مب أحسن ..
جواهر : ههههه باباتيه ترا هاي جنتك اللي ما يعيبها شي ..
عمي : دام جنتي في السالفه .. عاد مسموحين ..
قلت : هههه فديتك عمي ,,
جواهر : نواري باجي وقت على أذان المغرب تعالي نروح محل المخاوير والدراعات ,, ونمر الخياط بالمره ..
قلت : هااا عمي شو الراي ..؟؟
عمي : بس تخلصون بسرعه .. مدري الحين أنا المعرس ولا يوسف ..
قلت : ههههه شكلنا متعبينك وايييد ..
وصلنا صوب الخيايط والمحلات ,, دشينا أنا وجواهر خذيت كم من مخوره جاهزه ودراعات لأنه ما يمديني أفصل ,, عقب وديناهم للخياط عسب يضيج ويقصر ويطول هههه ..
جواهر : أقول شريتي لج بدل وجينزات ونعله ..
قلت : هي خلاااص هاك اليوم يوم رحنا المول خميته هههه
جواهر : وعبي ..
قلت : أويييييييه والله راحت عن بالي ,,
جواهر : وعطورات ..
قلت : لا لا العطورات الجوهره قالت بتعطيني هدية العرس طقم كامل ,,
جواهر : أوكي الحين بعد ما الهندي يحاسبج نروح محل العبي قريب عن اهني ,,
قلت : أوكي ..
اتفقنا مع الخياط يجهز المخاوير خلال يومين الا هو تضييج .. عقب رحنا محل العبي ,, اخترت لي كم من عباه ,, جاهزات .. كل شي جاهز ما فيه شي تفصيل هههه واتفقنا يجهز العبي خلال يومين بعد ..
عقب ردينا البيت .. كنت مره هلكانه ميته من التعب شوي وأموت .. على طول تسبحت وغيرت .. نزلت أتعشى ,, عقب العشا ييت أنخمد ,,, لا كمبيوتر ولا تلفزيون لأنه عيوني روحها متكون حواليها هالات عاد اذا قعدت يدام الكمبيوتر ولا التلفزيون شو بيستوي بي ,,
ما حسيت بروحي الا وعموه توعيني حق صلاة الفير ,, نشيت صليت .. عقب رديت أرقد .. ما ياني رقاد .. الين رقدت غصب .. قمت على صوت عموتي ..
عمتي حفصه : هلا والله بعروسنا ..
طالعتها : هلا عموووه ,,
عمتي : قومي يلا تسبحي وتلبسي .. اليوم يايه مخصوص عشانج ..
قلت : هههه حلوه هاي مخصوص ..
قمت تسبحت ولبست .. قريت سورة الكهف لأنه جمعه عقب نزلت .. شفت ياسر وفهد قاعدين مع عموتي ,,
قلت : السلام عليكم ,.
الكل : وعليكم السلام ,,
عموتي : ها العروس شخبارج ,,؟؟
طالعتها رحت بست راسها : تمام الغاليه ... ومن صوبج ..؟
عموتي : بخير حبيبتي ..
شفت جواهر والجوهره وميثاني قاعدات وعلايه وياهم ,,
رحت صوبهم .. سلمت على علايه ولويت عليها : اشحالج غناتي لج وحشه وربي ,,
علايه : تمام حبيبتي .. ها عروسنا خلااااص ,,
طالعتها ابتسمت لها ,, وقعدت يمب جواهر .. صح كنا بعاد عن ياسر وفهد اللي عموه طايحه فيهم محاضرات ,,
بس حسيت جواهر متوتره وايد يودت ايدها وقلت : اذكري ربج حبيبتي ,,
جواهر وقفت سحبتني وياها رحنا صوب المطبخ في زاويه ,, بدت اتصيح : نواري ما شفتيه كيف يستحقرني حتى ما يطالعني ,,
قلت لها : عادي حبيبتي انتي لا تهتمين وخير انشالله ..
جواهر : كيف ما اهتم له وهو كل حياتي ..
قلت : جواهر انسي خلااااص .. وانشالله فتره وفهد ينسى ..
جواهر : ياريت يا نوره ياريت .. أحس روحي خنته مدري ليش ..
قلت لها : جواهر تعالي نرد نقعد .. بيشكون .. عندنا الليل نتفاهم ..
جواهر راحت غسلت ويها .. تريتها لما تخلص وردينا مع بعض ,, طالعت صوب فهد .. مبين عليه مهتم لوجود جواهر بس روحه يخفي هـ الشي ..
فهد كان نادر ما يقعد ويانا .. بس هالمره مدري شاللي مقعدنه ,,
عموتي : ها نواري خلصتي الزهبه ,,؟؟
قلت لها : هي بس باجي الذهب والميكب ..
عمتي : ههههه حليلج سمعت كل شي جاهز ماشي تفصيل ,,
قلت لها : هههه هي شفتي شقايل ظالمين بنت أخوج ..
عموتي : فديتج ,, أقول جواهر بلاج ساكته ارمسي ,,
جواهر طالعتني وعقب طالعت عموتي وقالت : هههه لا ماشي .. بس أمس تعبت من دوارة السوق ,,
سولفنا نحن البنات ,, سمعت عموتي تقول : ها شكلي بزوجكم انتو الاثنين بعد ,,
كلنا صخينا هاللحظه علايه قالت : هي ماما دوري لهم على عرايس مهبل شراتهم ,,
ياسر : لا لا أنا بعدني صغير ع الزواج بعيد عني دخيلكم ,,
عموتي : هههه هي عسب التسكع في المولات صغير هاااا ..
ياسر ضحك عموتي قالت : فهود كان ناوي يخطب .. بس مدري شاللي غيّر رايه ..
فهد يمزح أونه : انسي أمايه خلااااص شكلي بتم طول عمري عزوبي ,,
عموتي : فال الله ولا فالك شو هالرمسه ..
طالعت فهد .. محط أنظاره صوب جواهر .. وجواهر متوتره وتهز ريولها ... اللي يعرف عن اللي بداخلها يقول .. بركان وبينفجر خلااااص ,, الله يعينج يا جواهر ,, الظاهر فهد اليوم قاعد ويانا عسب يفر هالرمستين ويطلع ,,
جواهر دموعها تجمعت بعيونها همست لي : أنا بقوم ..
قلت لها : جواهر تمي لا تستوين ضعيفه ,,
جواهر : ما اقدر ,,
ضميت ايدها ورصيت عليها وابتسمت لها .. عقب الأولاد روحو الميلس بعد محاضرات عموتي ,, قعدنا نحن البنات نرتب أغراض الغدا ,, وطلعناه ,, كان وياي صحن سلطه كنت قاعده ع الكرسي والصحن يدامي ع الطاوله وأكل ..
ميثاني : كلي سلطه عدل الخيار أوكي حق البشره ,,
قمت وأنا اقول : انشالله ههههه .. ها خلاااص ولا في شي ثاني ,,
جواهر : لا لا اقعدي مكانج لا تتحركين عرووووس ,,
قعدت غصب وقلت : أوووووف ذليتوني تراكم .. عروس وعروس .. جني أول وحده أعرس في هالعالم ..
الجوهره : حرمة أخوي العود يعني جنتي العوده هههههه
طالعتها ابتسمت لها ,, عقب ما تغدينا .. رحنا كلنا فوق .. في الصاله و الجوهره ركبت فيلم العرس ,, بدينا نطالع كل شي .. كنت مبينه بعض الأماكن .. كنت حلوه .. ولازلت هههه
حسيت روحي بالميكب وحده غير .. غير نوره اللي أعرفها .. بس معدني هو نفسه نو وووي يتغير ..
على آذان العصر كلنا قمنا رحنا صلينا ,, العصر و عقب البنات حطو السويت .. ما كليت ما أشتهي الحلويات وايد .. قعدت ..
ياني مسج من بلسم جروحي .. ( سمعت بتروحين سوق الذهب .. )
رديت ( هي .. اذا تسمح لي ,, )
قعدت أسولف ويا البنات أتريا يوسف يرد عليه ,, وياني مسج ... من بلسم جروحي ..
رد ( بسمح لج بس وياي .. أوكي )
طالعت الشاشه ابتسمت ,, قمت عسب أروح الحجره ارمسه ,,
ميثا : حظهم والله حظهم ..
طالعتها وقلت : اللهم لا حسد .. باجر بتعرسين وبتملين من سوالف التلفون .. هههه
رحت الحجره .. وضغطت رقم يوسف .. حافظتنه عن غييييب .. رقم حبي هذا ,, حسيت اذا بيقول ألو روحي بترد لي ,,
رد عليه : هلا والله هلا ,,
قلت : هلا ,,
يوسف : شخبارج ,,
قلت له : هب بخير ,,
يوسف : له له .. نونوتي هب بخير جيه ,,؟؟ عسى ماشر ..
قلت : حلوه هاي نونوتي .. اممم اليوم ما فكرت تمر صوبنا بعد .. معنه في نفس البيت ..
يوسف : حياتي انتي .. لو على جيه بتم وياج طول اليوم ..
قلت : ههه أتمصخر تراني ,,
يوسف : عاد يلا تجهزي بنروح سوق الذهب ..
قلت له : أوكي .. بسأل جواهر اذا بتيي ويانا ,,
يوسف : اممم ابا نكون رواحنا .. بس يلا عادي بالمره جواهر ملانه تطلع ويانا ..
قلت له : أوكي ,,, يلا بلبس وبنزل ..
يوسف : أنا بكون في الصاله عند قوم أمايه وعموووه ,,
قلت له : أوكي .. يلا دقايق ونازله ,,
لبست عباتي والشيله وخذيت الجنطه ويايه ونزلت ,, طالعت ,, يوسف قاعد ,, شكله من يوم صعدت وهو قاعد .. بس كيف رمسني .. يلا ما علينا ,,
يوسف : يلا عاد أمايه ,, أنا رايح بودي نواري ويايه ..
مرت عمي : دير بالك عليها ,,
يوسف : أنا ولدج لازم تقولين لها ( وياشر عليه ) ديري بالج على ولدي هههه
طالتعه بغيض ورديت طالعت جواهر قلت : جوجو البسي انتي وميثاني تعالو ويانا ..
ميثاني : نحن المغرب بنروح بيت عمي ما اقدر ايي ,,
جواهر : وأنا مالي بارض .. ريولي تعورني ,,
قلت : يلا عاد جوجو تعالي ,,
جواهر : والله ما اقدر ,,
يوسف : خليها براحتها يمكن ما تقدر ,,
وعقب سلمت ولحقت يوسف ,, أصلا هو يباها من الله انه جوجو ماتيي ,,
ركب السياره وركبت .. عقب حرك السياره ,, وشغل أغنيه ,,
قال : سمعتيها ’’
قلت : لأأأأ أول مره أسمعها ,,
قال : يعني ما تسمعين أغاني ,,
قلت : نااااااااادر ,,
يوسف : تعالي جواهر بعدها هب طبيعيه ,,
قلت له : سوالف بنات ,, وبعدين هي هلكت أمس دورتها ويايه السوق ..
يوسف : هيه ,, انزين باجر مع منوو بتروحين الصالون ..
قلت له : هب وياك ,,
يوسف : جيه انزين ,,؟؟
قلت له : اليوم يوم سولفنا عموتي قالت أسبوع كامل لا تجوفني ,.,
يوسف : شو يصبرني أنا انزين ,,
قلت له : تحمل انت اللي قلت نتزوج الحين ,,
يوسف : بس عقب باخذ راحتي أكثر عن الحين صــــــح ..!!
طالعته استحيت قلت : في أي قاعه حجزت ,,؟؟
يوسف : في دبي اهني صوبنا ,,
قلت له : لأأأأ أنا أبا الشارجه حرااام ,,
يوسف : خلااص حجزت انا ,,
قلت : يلا زين ,,
يوسف ابتسم وقال : أشك انج بتطلعين وحشه يوم العرس وبخاف منج ,,
طالعته انقهرت وقلت : يوووووسف ..
يوسف : هههه حيااااااة يوسف ,, شو تبين أكثر غير انج ماخذه شيخ الشباب يوسف ,,
قلت له : أنا الغلطانه يايه وياك .. بس تمدح روحك وتذمني جني هب حرمتك ,,
يوسف : خلاااص يا عسل لا تزعلين ,, حقج عليه .. انتي اللي بتخافين مني يوم العرس ..
طالعت بره وطنشته ,, وصلنا سوق الذهب ,, نزلنا شريت لي ذهب بس كله يوسف اختاره ما خلاني أختار .. قال هو يشوفه عليه أحلى ,, عقب ما خلصنا ردينا ركبنا السياره ,,
يوسف : ها وين الحين ..؟؟
قلت له : باريس غاليري ...
يوسف : حق المكياج والجنط ,,
قلت له : هي ,,
يوسف : أونج ما تاخذين الا ماركات ,,
قلت له : من يومي بس مال قوم ماركات ,,
يوسف : فديت حرمتيه المتطوره ههههه
استحيت وطالعت برا يوسف قال : نواري اسمعي ها اهدااا لج ,, شغل المسجل وبدا يغير في رقم السيدي ,, اشتغلت أغنية ,,
انته ذهب من دون ما تلبس ذهب وش له تروح السوق وتدور عليه ,, .. (اغنية حسين الجسمي ..)
مديت ايدي للمسجل ,, عسب أطفيه ,, جان ما أحس الا بايد يوسف تسحب ايدي ,,
بغيت أسحب ايدي ,, ما رمت قلت : ودرني ,,
يوسف بدا يلعب بايدي وأصابعي وقال : شو كنتي تبين تسووين .. ؟؟
قلت له : كن بطفيه ,,
يوسف : جيييه ..؟؟ هذا اهداا من ريلج .. حبيبج ,,
قلت : منو قال انك حبيبي هههه
يوسف قرب ايدي عن ويهه أكثر وبدا يلعب في ايدي .. ويطالع ايدي .. سحبت ايدي ما قدرت حسيت أصابعي بتنجلع وأنا أمط في ايدي ,,
يوسف رص على ايدي .. : ريلج وحبيبج وحياتج ,,و ...............
كملت عنه : وعمري بعد بس ودّر ايدي دخيلك ,, أحس أصابعي بتنجلع ,,
يوسف : ههههه ما بودرها ,,
قلت وأنا أصارخ لأنه عضني : يسوووووووف عوووووووورتني لا تعضضضض ..
يوسف يضحك : فديت منطوقج والله .. ( يقلدني ) يسووووف عورتني ..
قلت له : ترانا بندعم بسبتك ,,
يوسف ودر ايدي .. : لا لا أنا معرس .. مالي خلق حوادث بعد ..
طالعته وقلت : مكاااااااار أعوذ بالله ,,
يوسف : فديتج والله ( يقلدني ) يسوووووووف هااا ......... بعلمج منو يسوف الخميس الياي ,,
طالعته وقلت وأنا مستحيه ومعصبه : سخيييييييف ..
ما حسيت الا يضربني بايده على جتفي بالخفيف : عيب نونوتي .. محد يقول سخيف حق ريله ..
قلت له : انت وحرمتك هاي نونو على قولتك ,,
يوسف : اذا حرمتيه نونو ويايه عادي هههههه
مضا اليوم حلو ملئ بالمغامرات مع يوسف .. الحلوه والمحرجه نوعاااااااً ما مع يسوف فديته .. ردينا البيت على طوووول رحت الحجره تسبحت ولبست بجامه ,, طليت على جواهر راقده .. غمضتني الله يعينها .. عقب حطيت راسي ع المخده أفكر في التجهيزات والفستان والميكب غير االصالون والسوالف اللي بتذبحني .. و في اني بنزف يدام هالعالم كلهم .. وحياتي مع يوسف .. أشيا كثيره لا يمكن العقل يستوعبها .. رقدت ......
شورايكم