كيبورديه مع التحيه للسكب على العزيمه
-----------

يا اهل الرياض الصبح باكر على خير
على الوعـد ميعادنا للعــزيمه

تولم جوكم ضيوف ومسايير
سلم العرب للضيف قدر وحشيمه

قالو نوينا با السفر والمشاوير
يم السكب راع الوفا والعزيمه

في ضفكم للضيف حشمه وتقدير
يا اهل المكارم واليدين الكريمه

عن واجب الخطار مابه معاذير
سيمة عرب على العصور القديمه

نعمين يامنصى الوجيه المسافير
ياذابحين الحيل يا اهل الوليمه

للطيبه ماتحسبون المخاسير
يوم ان بعض الناس همه حريمه

مال المدايح غير ناس مشاهير
اللي لهم ثوب المراجل وسيمه

تحياتي للمتابعه
منادي

هذي القصيده وجهها لي الشاعر منادي
كنت امزح معاه وقلت له تراك معزوم ورد عليه بهذي القصيده
بعض الناس لزقه لاتعزمه يلزق في حلقك مثل الزرار بلشه
ورديت عليه بالتالي



يامرحبا ترحيب أسرع من الطير
واسرع من الطير بالبخور والوليمه

شرفتني في حضرتك حضرة أمير
شرف حضورك والصداقه غنيمه

لضيف واجب نحسبه حسبة أوزير
شد الرحال على الرياض الوسيمه

الحيل فالك مير عجل على السير
في مجلس الضيفان ولمه حميمه

مجلس يرحب بالرجال المناعير
أرحب على سمن حيل ورز الوليمه

يشهد بقولي صرف قافي وتسطير
عسى حبل الصداقه بيننا مستديمه

حاتم يعد مضرب مثل بالمعايير
قدم لضيفه خيل وجبه دسيمه

جود السكب مشهود عبر الاساطير
يكرم ضيوف الدار وبالراس شيمه

أشهر من المشهور بين الهوامير
عبر العصور . ماهي بتكه قديمه

المعذره أن شفت بالحفل تقصير
الجود من الله والسحب هل ديمه


السكب 1

شكرا جزيلا لمن سوى التوقيع والرمزيه دخلت وتفاجأت بها وحتى لم أعرف من قام بهذا العمل اقول شكرا وجزاه الله خير الجزاء وشكر جزيلا لجميع أعضاء وزوار منتدى قصائد ليل جميعهم بيضان وجيه واعذروني في القصور الواضح مني تجاهكم فأنتم خير من يقبل العذر قبل أن اعتذر