11-02-2015
|
#7
|
الجزء السابع
سبق سعود خويه أنس بالصحيان والاستعداد للدوام والنزول لقاع الفندق كله لأن خاطره يشوف وعد ويحاول يتبين شالي فيها وكيف أحوالها ..
نزل وعيونه تدور بين المظيفات وسحب أحد الكراسي وجلس عليها .. وبعد دقايق اتقدمت مظيفة جديدة عليه حاملة صينية القهوة .. وخفق قلبه !! ليه هالمظيفة الي جاتني وينها وعد ماجت !!
أخذ القهوة منها بضيق وهو متمني يعرف شالي صاير بوعد !! وماقدر يمنع نفسه من السؤال وسأل المظيفة قبل ماتروح :
Excuse me
لو سمحتِ
المظيفة بابتسامة :
Yes
نعم
سعود :
didn,t Waad com today??
ماجت وعد اليوم ؟؟
المظيفة بأسف :
No.. she didn't com
لا .. ماجت !!
سعود بقلق واضح :
Ok Thank you
أوكي شكرا
المظيفة :
No PROBLEM
مافي مشكلة
وراحت عنه وهو عصفت فيه الأفكار والهواجس .. أمس طلعت قدامي تبكي وكان حالها مايسر !! واليوم ماداومت ومو من عادتها تتغيب !! شالي صار فيها !! حس بقلق عاصف تجاهها وعيونه كل شوي تطالع الباب الرئيسي يمكن تجي وتدخل ..
نزل أنس ومشى بخطوات سريعة نوعاما لين وصل لسعود : صباح الخير
سعود بنبرة ماخلى منها الضيق : صباح النور
أنس : شفيك قاعد قوم يالله ورانا اجتماع
اتأفف سعود ورجع الكوب الي ماشرب منه الا كم رشفة بسيطة .. ووقف ومشى وأنس بجمبه ماخفى عليه ضيق سعود وقال : شفيك وجهك مو طبيعي
سعود : مايهمك
أنس : شلون مايهمني قولي شفيك ؟
سعود : ولو قلتلك بتقول وانت شدخلك وليه تفكر وليه وماليه ..
أنس : أجل دام كذا عرفت انه شي يتعلق بوعد !
هز سعود راسه وهو يفتح باب الفندق ويطلع منه وأنس من وراه يقول : قولي شصاير ومو قايلك وشدخلك ولا شي
سعود : ماصار شي
أنس : بس ياسعود عاد لاتصير زي الأطفال اتكلم وقول شصاير؟؟؟
سعود : والله ماصار شي انت ليه مو مصدق ؟؟؟
أنس : اجل شفيك متضايق ؟؟
سعود : لأنها ماداومت اليوم من الأساس وهالشي حسسني ان فيها شي
وركب السيارة وسكر الباب
ركب أنس وسكر الباب وقال واهو يشغل المفتاح : طيب يمكن عندها ظروف صعبة شوي
سعود بهمس : ممكن
أنس : ويمكن اذا رجعنا من الدوام نلقاها جت
سعود: ممكن
أنس : وانت ماعندك غير هالكلمة ؟؟
سعود : وش تبيني أقول ؟؟؟
أنس : سعود باسألك سؤال وعاد لاتزعل
سعود بضيق : أدري وش بتسأل !
أنس : تدري ولا ماتدري المهم انا أبي أعرف وش سر اهتمامك الكبييييييير بهالوعد ؟؟؟
سعود : تصدق اني انا نفسي ما ادري !!!
أنس : شلون ماتدري ؟؟؟
سعود : والله مادري حاس اني مهتم فيها بشكل كبير وانها ماتروح عن بالي أبد ليه وكيف وشالي صار مادري !!
كان سعود متضايق اول شي من غياب وعد ثاني شي من تحقيق أنس .. لذلك ماحب أنس يزيد عليه الكلام واكتفي بانه يقول : سعود مادري وش اقولك بس انتبه على نفسك !!
سعود بسخرية : الحمدلله والشكر .. أنتبه على نفسي من ايش ؟؟
أنس : من كل شي تفكر فيه !!
سعود بلامبالاة : طيب طيب !
ودار وجهـه للشباك واهو يحاول يطرد من باله أي أفكار وهواجس تلعب فيه !
*****
في بيت أبو سعود
نزل أبو سعود الصالة واهو يكلم بالجوال ومو منتبه للي حوله .. وجلس على أول شي صادفه وهو مندمج بالكلام ..
طلعت عبير من المطبخ وشافت ابوها وين قاعد وضحكت ورجعت المطبخ بسرعه واهي تقول : فتون فتووووووون تعالي شوفي ابوي وين قاعد
فتون مندمجة بتوزيع الكاسات بالصينية أول مره تشتغل بالمطبخ وحلتلها الشغلة وقالت واهي حايسة : وين جالس يعني ؟؟
عبير : تعالي شوفي بنفسك بسرررررررعه
تركت فتون الي بايدها وطلعت من المطبخ ومعها عبير وشافت ابوها واهو توه منهي المكالمة وماسك الجوال بإيده
فتون شافته وطارت عيونها وهي تضحك وقالت : يبه انت وين قاعد الله يهدييييييك ؟؟
ابو سعود مو مستوعب للحين : قاعد ببيتي وش الي وين قاعد !
عبير وهي تضحك : طيب شوف انت وش قاعد عليه
طالع ابو سعود حوله لقى انه قاعد على طاولة الشاهي الجانبية ! صح هو وش جابه على هالطاولة بين الكنب !! وقف وطالع خلفه لقى صحن بلاستك فيه حلويات كريمة قعد عليها وعدمت ثوبه من ورا وانعدمت الحلويات بعد !!
شهق أبو سعود وقال : أفااااااا وش جاب هالصحن بهالمكان !!!!!
فتون ماقاومت شكله :هههههههههههههههههههههههههههههههههههههههههههه عيب يابابا الحمامات مليانة بالبيت هههههههههههههههههههههههههه
عبير :هههههههههههههههههههههههههههههههههه ياعمري يابوي شلون مانتبهت للصحن قبل ماتقعد ؟؟
أبو سعود وهو رافع ثوبه : والله كنت أكلم ومانتبهت وبعدين غلطتكم ليه تحطون الصحن على الطاولة !!
فتون بس تضحك : ههههههههههههههههههههههههههههههههه انت يبه حبيبي شلون تقعد بدون ماتحس فيه ههههههههههههههههههههههههههههههههههههههه << تقصد صحته المليانة ماشاء الله
عبير : ههههههههههههههههههههه بس يافتون لاتفشلين ابوووووي ياحمارة
أبو سعود يكتم الضحكه ويصطنع العصبية عشان يبرّر : أقول اهجدي الحين هذي غلطتي ولا غلطتكم انتم الي حاطين الصحن بهالمكان بدون ماتعلمون
فتون : هههههههههههه أنا حطيته مستعجله ابيكم تذوقون منه شوي والباقي اشوني حطيته بالثلاجة لا يروح علينا الحلى كله مره وحده هههههههههههههههههههههههههههههههههههههههههههههه
" السلام عليكم "
التفتوا كلهم لخالد الي توه داخل من برا وردوا عليه السلام
خالد : شفيكم تضحكون ؟؟؟
فتون تطالع أبوها : ههههههههههههههههههههههههههههههههههههههههههههه
أبو سعود ضحك بخفة وهو يهز راسه من هالبنت وطلع الدرج يبدل ملابسه .. وطبعا يوم دار شاف خالد شكل ثوبه من الخلف وشهق وهو يقول : وش سويت بنفسك يبه ؟؟؟
ابو سعود : اسأل المهابيل خواتك
خالد وهو يضحك : هههههههههههههههههه خواتي منعوك تروح الحمام !!
التفت ابو سعود بقوة لخالد وطالعه بعصبية لكن هالنظرة خلت خالد يضحك أكثر
نزلت ام سعود هاللحظة وهي تقول : شفيكم أصواتكم واصلة لفوق ..
أبو سعود : اندري عنهم هالمراجيج بدال مايحشمون ابوهم ويعاونونه قالبين السالفة تريقة وضحك
ام سعود : خير عسى ماشر ؟؟
أبو سعود بحرج : هالخبلة فتون تركت صحن الحلى على الطاولة بدون ماتقول ومانتبهت انا وقعدت عليه
دارت ام سعود حوله وشافت ثوبه من ورى وقالت : لاحول ولاقوة وعسى هذا حلى العزيمة يابنات ؟؟؟
عبير : لا هذا زايد بغيناكم تذوقونه
ابو سعود : والحين هذا الي همك انتي الثانية لايكون حلى العزيمة ؟؟ وماهمك رجلك الي انعدم بسبة هالحلى
ام سعود : الا ياعمري على رجلي فداه الحلى والي جاب الحلى .. تعال أطلعلك ثوب بداله تعال ..
طلع ابو سعود الدرج .. وام سعود دارت تكلمهم بهمس ماخلى من العصبية : الحين انتوا صاحين ولا وشو ؟؟ تضحكون على ابوكم بهالشكل ياقليلين الحيا
خالد : ههههههههههههههههههههههههههههههههه يهبل ابوي
فتون :هههههههههههههههههههههههههههههههههه وش اسوي يمه والله يضحك
أم سعود : اقول انطمي انتي مافي شي الا تقلبينه ضحك وهبال انتي على اخوانك ! قسم بالله مافي احد راكد منكم الا سعود
عبير : وانا يمه وش سويييييييييييت الحين ؟؟
ام سعود : وانتي مشاركتهم بعد لاتقولين انك بريئة ماسويتي شي
عبير : اي والله فتون هي الي بس تضحك عليه
فتون وهي تحط إيدها على خصرها :لا والله ؟؟؟؟؟ ومين الي جاني المطبخ ميت من الضحك يقولي تعالي شوفي شكل ابووووي ؟؟؟
عبير بحرج : هاه .. اي بس عشان تشووووفينه مب تضحكين
فتون : تكفيييييين يالبريئة !
تركتهم ام سعود يتخانقون وطلعت تشوف زوجها ..
خالد : اقول اهجدي وانتي وياها وقوليلي متى بيجون صديقاتكم ؟؟؟
عبير : بعد المغرب
فتون : اي ولو سمحت لا تجي الا وحده بالليل
خالد : ومن قالك باطلع أصلا ؟؟؟
فتون : نعـــــــــم ؟؟ وش تقعد تسوي !!
خالد : باقعد معاكم واتلبس مثلكم واتمكيج ولاحد داري
عبير : هههههههههه ماأتخيلك بهالشكل ييييييييييييع
خالد :ههههههه ومين عازمين ؟؟
عبير : بنات خالتي وبنات عمي بس ..
فتون : ووجدان وبشاير .. وبس
عبير : اي صح وصديقاتي بالجامعة .. بس
فتون : وانا صديقتي عهود
خالد كمل عليها : وبس !
فتون :هههههههه اي بس !
خالد : لا طلعوا بعد كل شوي تزيودن احد وتقولون بس
عبير :ههههههههه لا صدق بس ذولا
فتون بضحك : وانت ماظنيت همك احد من ذولا إلا أول من قلنا !!
خالد باستهبال : إي والله يهموني بنات عمي
فتون : اييييييي بنات عممممممك الي يهموووووونك طيب طيب صدقتك
مسك خالد المسندة ورماها عليها وهي نطت من مكانها تضحك وتقول : ليييييييه وش سويييييت انا ؟؟؟
خالد : مابغيتي تفكينا من هالسوالف
فتون : يعني انها مب عاجبتك ؟؟؟ والله انك تموووووت فيها وأحلف بالمصحف بعد
خالد : لييييييه وش شايفتني مهرج عشان اموت بسوالفيك
فتون من بعيد : لا مو سواليفي الي تموت فيها .. تموت بمرااااااااااااااااااااام (( وركضت مبتعدة
خالد عصب و دور جمبه أي شي يرميها فيه وهي ضحكت من قلبها وطلعت الدرج
عبير وهي تضحك : صدق خالد قولي انت تحب مرام ؟؟
خالد : بس تراكم ذبحتوني بهالسالفة
عبير : زين قولي وريح نفسك
خالد اتنهد وسكت شوي بعدين قال : إنتِ شرايك طيب وش تحسين ؟؟
عبير : امممممممم .. قبل كنت أحسك تحبها بس الحين مادري
خالد : ليه شالي تغير الحين ؟
عبير : تعاملك اختلف شوي معها ألاحظ انك تتجاهلها وجاف معها شوي
خالد كان فعلا متغير مع مرام !! أكو أمور بحياته صايرة ملخبطة مشاعره ومدوشة مخه خلته يتعامل بهالشكل مع مرام لكن هالشي ما خلاه ينكر الحقيقة الي يحسها وقال : لازم أتعامل بهالطريقة ياعبير
عبير : ليش لازم ؟؟
خالد بهمس: لاني لو اتعاملت معها عادي مثلها مثل منى ضحك وسوالف أظني باصرخ بحبها قدام العالم والناس
عبير بفرح : يعني تحبها ؟؟؟؟؟؟؟؟
خالد بهيمان : مو بس أحبها ياعبير الا مجنوووووون فيها !!!!
"شفت .. والله اني قااااااااايلة "
التفتوا لفتون الي واقفة بنص الدرج والضحكة شاقة وجهها
عبير : بسم الله متى جيتي ؟؟
فتون وهي تنزل : ومن قال اني رحت اصلا .. واقفة ورى الدرج أسمعكم
خالد : أجل رحنا فييييييها
فتون وهي تنط على الكنب لتوصلهم .. ماكن في أرض تمشي عليها وبالآخر قعدت بقوة جمب خالد وهي تقول بضحك : اجل انجنيت ياخوي !!
ضرب خالد راسها من الخلف وهو يقول : انطمي !
خلود :ههههههههههههههههههههههه ياحظي باخوي مجنووووون وااااااااااو ونااااااااااااسة
عبير : ههههههههههه مب صاحية يافتون اسكتي اهلي فوووووق
خالد : مب هذا الي أنا خايف منه .. (( ويدف كتف فتون وهو يقول : هذي فضيحة ومصيبة الله يفكنا من بلاويها
فتون : حبووووووه أنا والله بريئة وبعدين انت لا تستقوي علي الحين عشان وحده ماتحبك ولا تدري عنك !!
خالد : عاد الا إنتي مو ماخذ على كلامك !!
فتون وهي تهز كتوفها : بكيفك أنا اقولك الحين عشان لا تنصدم بعدين
عبير : خلك عنها ياخالد هذي خرابة بيوت
فتون :هههههههههههههه على الاقل يكونلي خدمة بالمجتمع
خالد : أدري أنها أكبر نصابة وبتروح الحين تقول لمرام ترا خالد يكرهك ومايطيقك
فتون :ههههههههههههههههههههههههههههااااي شلون عرفت ماشاء الله تقرا أفكاري؟؟
خالد وهو يمشي للدرج : أعوذ بالله من هالافكار بس
فتون : أعــــــــــوذ بالله منــــــــك
عبير تضربها : بس انتي أوووووص !!
فتون تفرك إيدها : آآآآآآي إيدي !!
عبير : من جد فتون اركدي خلاص وربي انتي مصدر ازعاج وخراب وبلاوي
فتون : ههههههااااااي ومصدر ضحك ومرح
عبير : اي مرررره المهم قومي الحين نرتب غرفتنا حوستك بكل مكان
فتون اتمددت على الارض ورجولها على الكنب وتقول : وليه ان شاء الله نرتب الغرفة ؟؟ مو بنقعد بالصالة ؟؟
عبير : ولو بغينا نطلع الغرفة لأي سبب لازم تكون مرتبه
فتون : رتبيها انتي عبير والله مافيني اطلع
عبير : قومي اطلعي مره وحده عشان تلبسين
فتون : خلاص انا لابسة
طالعت عبير لبس فتون الي كانت لابسة بنطلون أسود .. وتيشرت أحمر ماسك ومخصر نص كم .. ومكتوب عليها بخط انجليزي خطوط كبيرة سودا .. كان لبسها حلو بس عادي ومو مثل ملابس البنات النعومات الرايقات .. وقالت عبير : لا يافتون لاتقولين بتستقلبين صديقاتي بهاللبس !!!
فتون : الا بهاللبس شفيه ان شاء الله !
عبير : لااااااااااااا فتون صديقاتي متحمسين يشوفونك أبيك تكونين بأروع شكل
قعدت فتون وهي تقول : شقصدك يعني وانا طبيعية مو حلوة
عبير : أقول اهجدي تدرين ان اللبس والمكياج وهالحركات تحلي أكثر
فتون : وتدرين اني ماطيق المكياج ولا أحبه
عبير : بس لازم تحطين هالمرة بليييييييز فتون أمنيتي اشوفك ممكيجة وبتنورة نعومة وبلوزة كت وربي تطلعين جنااااان
فتون :ههههههههههههههههههههههههههههه أنا ألبس تنورة مستحييييييييييل !!
عبير : عشان خاطري فتون هالمرة بس !!
فتون : عبير خاطرك على عيني وراسي بس لااااااا تقوليلي ألبس تنورة وأتمكيج والله ما أسويها
عبير : فتون ترا إنتي بنت !!!
فتون : هههههههههه إحلفي بس !!!
عبير وهي توقف : انقلعي .. انا باطلع ألبس وخليك انتي بهالشكل
رجعت فتون تتمدد على الأرض إلا رن التلفون !
استثقلت تقوم وطنشته لين فصل .. وبعد مافصل ضرب عرق الفضول فيها وراحت تشوف مين المتصل ولقته بيت خالتها ..
دقت على بيت خالتها وبعد أول رنة رفع الخط : ..............
فتون : ألوووووووووو
ـ : ................
فتون : الووووو مين رافع السماعة وساكت !!
ـ : شتبين انتي ؟؟؟؟
فتون عرفت صوت فيصل وقالت : وانت ليه ساكت ليه ماترد ؟؟؟
فيصل : أولا السلك خربان وكنت أصلحه ثانيا ياماما كيفي أتكلم أو ما أتكلم ؟؟
فتون : لا مو على كيفك ماترد ! اذا دق جوالك سوي الي تبي بس تلفون البيت لازم ترد !
فيصل : لا والله بتعلميني شلون أتصرّف زين اذا رديت وش أقول ألووو ولا السلام عليكم ؟؟
فتون تجاريه : لا حبيبي انت قول ألو والمتصل يقول السلام عليكم
فيصل : اوكي ماسمعناك سلمتي وانتي المتصلة !!
فتون : لانك ماقلت ألو قلت شتبين انتي !
فيصل : أها يعني بدون ألو ماينفع نسلّم !
فتون بضيق : الحين انت وش تبي ؟؟؟؟؟؟؟
فيصل : انا الي وش أبي والا انتي الي داقة ومزعجتنا !!
فتون : لا تكذب انت الي داق وشفت رقم بيتكم واتصلت !
فيصل : لا مادقيت وشالي يخليني أدق على بيتكم وأطيح فيك اللهم ياكافي ؟؟
فتون : لا تكفى عاد أنا الي ميتة علييييييك وأبيك تكلمني !
فيصل : تتمنيني انتي أصلا يالمطفوقة
فتون بعصبية : ليه كارهة عمري عشان أتمناك ؟؟ وبعدين كم مره قلتلك لا تقولي هالكلمة انت ماتفهم ؟؟؟
فيصل متونس : والله هذي الحقيقة مطفوقة مطفوقة مطفوقة ..
فتون : فيصل أكرهـــــــك أكرهــــــــــك أكرهــــــــك
انرفعت السماعة هاللحظة وطلع صوت مرام : الوو
فيصل : جيتي بوقتك مروم فكيني من لزقة هالمطفوقة .. باي
فتون وهي شوي وتبكي : ييييييع والله مالقيت الا انت الي أتلزّق فييييك ياكريييييييه
لكن فيصل سكر وماسمعها
مرام : فتووووون أدق عليكم ماتردون أبي أعرف شالقصة ؟؟؟؟
فتون : بسم الله شوي شوي انتي الثانية سلمي أول !!
مرام بحمق : أقول فهميني شالقصة ؟؟؟؟
فتون : وشووووو .. وش قصته ؟؟؟؟
مرام بعصبية : تو أمي جتنا تقول الحييييييين تروحون بيت خالتكم لأن فيصل بيطلع اهو وخالد !! ودام فيصل رايح لخالد تبينا نروح مره وحده وبلاش السواق يودينا بعدين
فتون : غريبة تو خالد عندنا ماقال شي !
مرام : شلون ماقالكم شي ؟ هالعيال يخططون واحنا نتورط !!!
فتون : اوكي وش المشكلة لو جيتوا الحين ؟؟
مرام : توني والله ماخلصت ولا لبست ولا سويت ولااااااا شي
فتون : طيب يالذكية عادي جيبي لبسك وعفشك واجهزي عندنا
مرام : مافيني يافتون والله حوستي كثيرة وباقي آخذ شاور .. ليش مو اخوك الي يجي وياخذ فيصل ويخلينا نروح براحتنا مع السواق
فتون : وش دارني عن خالد يامرام والله مادريت عن خطتهم الا تو الحين منك
" وش السالفة ؟ "
التفتت فتون لتشوف خالد لابس وعاقد حواجبه باستفهام من الكلام الي سمعه
فتون والسماعه باذنها : خالد انت بيجيك فيصل الحين وتطلعون ؟؟؟
خالد بصوت تسمعه مرام : اي وش المشكلة ؟؟؟
فتون : هذي مرام معصبة تقول خالتي قالتلهم يروحون مع فيصل مره وحده وهي للحين ماجهزت
خالد بابتسامة : اها .. والمطلوب !
فتون بدهاء : تقولك مرام انت تعال وخذ فيصل وخلهم يجون براحتهم مع السواق بعدين
خالد : ايييييه ! بس انا خلاص اتفقت مع فيصل ان هو يجيني !
فتون : الله وأكبر وهالاتفاق صار بالمحكمة يعني ؟؟ عادي كلم فيصل وغيـّر !
خالد : ما أغيـّر الا اذا جتني أوامر موجهة لي أنا
فتون : هههههههههه سامعة مرووووم ! حاجتك عند خالد يالله انتي قوليله
مرام وقلبها يضرب طبول : فتون يبيلك ذبح ياحماره !
فتون : هههههههه كيفك عاد ترا بيطلع
مرام : يوه وش أقوله يعني ماحب كذا يافتون من جد ماحب !
فتون : والله عاد براحتك انتي وخالد كل واحد أعند من الثاني وذي مشكلتكم
خالد ضحك ومشى للحوش واهو يقول : اذا عندها شي خليها تدق على جوالي
فتون : مراموووووه سمعتي ؟؟؟
مرام : اي سمعت الله ياخذ العدو
فتون : دقي على جواله خلاص انا وراي أشغال مرام بااااااي
مرام : باي .. وسكرت السماعه بحمق !!
مسكت جوالها وهي معصبة ومرتبكة وماتدري وش تدق تقول ! وشوي لغت الفكرة وقالت مو داقة عليه ولاشي هذا يبي يستغل وضعي بس ويذلني خليني بس كذا مو داقة لو يموت ..
وقامت لغرفتها الا شافت فيصل نازل الدرج ويقول : يالله جاهزين ؟؟؟
مرام : لااااااااا اصبر شوي ومنى نايمة اصلا ماقامت ولاجهزنا
فيصل : يعني شلون خلاص انا متواعد مع خالد الحين نطلع وينكم ماجهزتوا من أول !!
مرام برجاء : خلاص فيصل بليز انت روح واحنا نجي مع السواق بعدين !!
فيصل : أبوي لو درا اني رايح بيت خالتي الحين وبعد ساعتين انتوا رحتوا بالسواق بيوريكم الويل !! تدرين خالتي بيتها وش بعده عن بيتنا !!!
مرام : اي أدري يافيصل طيب كلم خالد هو يجيك وخلاص احنا نروح بالسواق بعدين
فيصل : لا والله مو مكلمه لأني انا الي مشتهي الروحة والمشوار الي نبيه قريب من بيته !! لا والله فشلة مو مكلمه !!
مرام وهي شوي وتبكي : حرام عليكم تربشونا بهالشكل !
فيصل : 5 دقايق يامرام لو مانزلتي انتي واختك والله لامشي
مرام : يووووووووووه !
وطلعت الدرج معصبة ودخلت غرفتها وسكرت الباب
تأففت بضيق وهي تدور بالغرفة وتطالع جوالها وحست ان خلاص لابد انها تكلم خالد وتطلبه لأنها لو ماسوت كذا معناه لازم تسحب اي لبس قدامها من الدولاب وترج أختها وتصحيها ويروحون مع فيصل لبيت خالتهم محيوسين وهم يحبون يظهرون بأبهى حلة !
قعدت على طرف السرير ودقت على جوال خالد وأول مارفعت الجوال لاذنها جاها صوت خالد : يا هــــلا
مرام بصوت فيه نبرة الضيق : هلا خالد شلونك
خالد : تمام .. انتي شلونك مرام
مرام : الحمدلله عايشين ..
خالد : شفيه صوتك ؟؟
مرام : أبد سلامتك .. ها خالد ممكن تجي انت لفيصل ؟؟؟
خالد : امممممم .. مشوار علي يا مرام !
مرام انحرجت وقالت : أجل خلاص لاتتعب نفسك لاتجي
خالد : انتي تبيني أجي ؟؟؟
مرام ماحبت يفهم انها تبيه يجي عشانها وقالت : أبيك انت تجي لفيصل عشان ترضى أمي نروح بالسواق بعدين .. ولو مابي هالشي ماطلبتك !!
خالد : انت ماتطلبين مرام .. (( وضغط على الحروف وهو يقول : انتي تامرين أمر !!
انصبغ وجه مرام بالحيا وقالت بهمس : ما .. مايامر عليـ ك عدو
خالد : تامريني بشي ثاني بعد ؟؟
مرام : لا أبد مشكور خالد
خالد : أكيد ؟؟ فكري ترا الفرصة ماتجي كل مره !
مرام بحرج : مافي شي خالد بس هذا كان أهم ماعندي
خالد : ماتبيني أكلم فيصل اقوله ينتظرني ومايجي ؟؟؟
مرام انتبهت لهالشي : إلا إلا صح كلمه !!
خالد : هههههههههههههه شفيك ماقلتي طيب ؟
مرام : راح عن بالي
خالد : الي ماخذ عقلك يتهناااااابه !
مرام : محد ماخذ عقلي لاتخاف
خالد : اوكي وقلبك أحد ماخذه ؟؟؟
تسارعت دقات قلب مرام وحست الجوال بيطيح منها .. ماتدري تقول لاء ولا ايه ولا وش تقول ! وظلت ساكته ماردت لين قال خالد : وين رحتي مرام !
مرام : هنا معاك مارحت مكان
خالد : اوكي جاوبيني طيب
مرام : ماعندي جواب مناسب لسؤالك صراحة
خالد : يعني أفهم ان في أحد ماخذ قلبك مووو ؟
مرام : مـ ....
قطعت كلامها يوم سمعت صوت فيصل يصارخ برا السيب :
" مراااااااااااااااااام ومنى أنا مااااااااااااااااشي والله مووو منتظــــــــــــــــر أحد "
خالد سمعه : ههههههههههههههههههههههههههههههههههه مهبول هالفيصل
مرام : تكفى خالد إلحق عليه بسرعه لايورطنا
خالد : ابشري حبي .. باي
مرام : ..................... باي ..
وسكرت وهي تحس انها بتدوخ منه .. وكلمته الأخيرة .. حبي .. آآآآآآه ياويل قلبي منك خالد!!
ورمت جوالها وراحت تصحي اختها منى والابتسامة شاقة وجهها من الفرحة !
خالد دق على فيصل وقاله ينتظره وانه هو الي بيجي وبرر هالشي بانه يبي يمر على محل قريب من بيتهم ومشى الموضوع بسلامة
*****
نروح لنوال الي ماهدت من بعد الخناق الي صار بينها وبين منال .. وهي درت انه فيه اليوم مناسبة بتجمع البنات !!
نوال عمرها 29 ومع صغر سنها صايرة دومها بمشاكل مع عيال زوجها !
منال ونوال متضادين .. وحده نار والثانية بانزين من يتلامسون يتم الاشتعال بينهم !!
استغلت منال غياب الكل من الصالة .. البنات بغرفهم ووائل بغرفته على البلايستيشن وتركي نايم ..
ودخلت نوال مكتب زوجها وبخاطرها غرض واحد وهي تخرب على البنات روحتهم .. وقعدت على الكرسي قبال زوجها وقالت بدلع : الله لنا يافهووودي !
رفع فهد " ابو تركي " عينه من الاوراق وقال : هلا والله متى دخلتي ؟؟
نوال : من شوي وانت ولاانت حاس فيني
ابو تركي : اعذريني حبيبتي والله هالايام حيل مضغوط
نوال : محنا عاذرينك طول الوقت بس خلاص والله ملييييييت
ابو تركي : اتحملي خلاص كلها كم يوم وتتم الصفقة مع الشركة السويدية ونرتاح !
نوال بدهاء : ولا تنسانا من نصيب الصفقة عاد لزوم التعب والسهر الي اتعبه معاك وتاركني طول الوقت لحالي وانت بهالشغل
ابو تركي : فيك الخير يانوال بس تعبك معاي شكله مو من قلبك دامك تطالبين بالتعويض !
نوال : الا من قلب قلبي حبيبي بس تعرف الجزاء لازم يكون معنوي ومادي ههههههههههههههههههه
ابتسم لها ابو تركي وقال : خير ان شاء الله (( ورجع يطالع بأوراقه
نوال : أقول حبيبي
ابو تركي وعينه على الورق : امهممم !
نوال : اليوم خميس وماعندنا شي وودي نطلع سوى احنا وبناتك طلعة حلوة من زمان ماطلعنا سوى واتمشينا
أبو تركي : مالقيتي الا اليوم نوال والله مشغول !
نوال : فرصتنا اليوم لان اختبارات البنات ووائل بتبدا الاسبوع الجاي .. والجو مغيـّم اليوم وحلوو ونفسي نطلع سوى وننبسط تكفى فهودي فضي نفسك الليلة
ابو تركي بخاطره انبسط ان نوال تبي تطلع مع بناته ! مادرا بنيتها الشينة وقال : زين شوفي خلال هالساعتين لحد يزعجني وخلوني أخلص الي بايدي وان شاء الله نطلع بعد صلاة المغرب
نوال : يسعدلي اياك يارب طيب ما تقول للبنات الحين عشان يستعدون؟
ابو تركي : انتي قوليلهم
نوال : لا صدقني حلوة منك انت .. قولهم انا اليوم مفضي نفسي عشانكم لان مافي فرصة الا هالاسبوع عشان اختباراتكم الاسبوع الجاي وأبي نطلع سوى طلعة حلوة بأي منتزه
ابو تركي :اوكي بعد شوي بقوم أصلي المغرب واقولهم ..
نجحت نوال باستغلال ابو تركي وتدري ان بناته يهابونه ويستحون منه ومايقدرون يرفضون ! باقي تصرّف السواق عشان تلغي اي وسيلة مواصلات ممكن يستفيدون منها وقالت وهي توقف : اوكي حبيبي باتركك تكمل شغلك بس انت تحتاج السواق ؟؟؟
ابو تركي : لا ليش ؟؟
نوال : اختي ياعمري عليها مزنوقة تبي تروح السوق هي وامي تعرف قاعدة تجهز لزواجها .. ومافي أحد يوصلهم قلت اذا السواق فاضي يروحلهم !
ابو تركي : انا ماحتاجه بس مادري عن البنات !
نوال : خلاص دامنا بنطلع سوى وش يبون فيه !
ابو تركي : مادري نوال خلاص دبروا اموركم الحين خليني اخلص الي بايدي
نوال : اوكي اوكي الله يعينك ..
وطلعت عنه وهي ترفع حاجب بانتصار .. وقبل ماتطلع كان تركي صاحي ونازل وجا يبي يدخل يكلم ابوه لكن سمع صوتها عنده فانسحب من البيت وطلع !
وهي دقت على اختها وقالتلها ان السواق ملكك من الحين لآخر الليل .. وطبعا اختها ماصدقت خبر واستعدت اهي وأمها للخروج .. وأرسلت نوال السواق لهم !
وقت صلاة المغرب طلع ابو تركي من مكتبه وشاف نوال قاعده لحالها بالصالة عند التلفزيون .. قال وهو يشمـّر ثوبه استعداد للوضوء : وين البنات ؟؟؟
نوال : بغرفهم ياعمري عليهم شكلهم نايمين وطفشانين !
ابو تركي : لاخلاص الحين باتوضأ وأفرحهم بالطلعة ..
ابتسمت نوال وقلبها يرقص من الفرحة وهي تشوف خطتها قربت تنجح !
وفوق بغرفة منال
دقت نهى الباب عليها وبعدها فتحت بدون ماتنتظر رد .. لقت منال قاعدة على النت فقالت وهي تمشيلها بسرعه : منالووووه وش تسوين انتي ؟؟؟؟
منال وهي تطقطق على الكيبورد : اسكتي بالله يانهى خليني ارد على هالغبية
نهى : بعدين كملي يامنال ترا فتون مكلمتني وتقول الجمعا بعد المغرب على طوووول !!
منال : قلتي لابوي ؟؟
نهى : لا ماقلتله تدرين اخاف اتكلم لحالي !
التفتت لها منال أخيرا وضحكت وهي تقول : ماشاء الله وش هالزييييييين ؟؟؟
نهى وهي تقلب عيونها : شرايك فيني ؟؟
منال : تهبلين ماشاء الله بس من وينلك هالبلوزة ماخبرتها عندك !
نهى : من زماااااان عندي بس كانت ضيقة والحين نحفت ياويل حالي وصارت تمام !
منال : حلوه والله وماشية مره مع البنطلون
نهى : زين وانتي متى بتجهزيييييييين ؟؟
منال : يالله الحين بسكر وبقوم اجهز
نهى : وابوي متى بنقوله !
منال : الحين يانهى اشفيك متصربعة !!
نهى : متحمسة ياختي من زمان على جمعات البنات والوناسة ..
" منــال الوو منال "
انتبهوا البنات لصوت ابوهم طالع من سبيكر تلفون الغرفة " سنترال " وردت منال بسرعه : هلا يبه !
ابو تركي : هلا منال نهى عندك ؟؟
منال : اي عندي !
ابو تركي : زين أجل اسمعي حبيبتي بعد صلاة المغرب باطلع انا وياكم كلنا نتمشى سوى .. من زمان ماطلعت معكم وانا الحين فضيت نفسي عشانكم .. قولي لنهى ووائل طيب ؟؟؟
منال ضاق صدرها وهي تطالع نهى وقالت : ....... طيب يبه بس ..
ابو تركي : وشو بس ! كلنا بنطلع سوى ياماما المغرب لان شكل الليل بتمطر .. وحتى تركي بدق عليه واقوله يجي معنا .. خلاص بروح اصلي وارجع القاكم جاهزين وجهزي وائل طيب ؟؟
منال : ..... طيب
ابو تركي : يالله أقامت الصلاة وانا مارحت .. وسكـّر !
سكرت منال السماعة بكل قوتها وهي تتأفف بعصبية !
نهى بقلق : شفيييييه !
منال : محنا رايحين العزيمة !
نهى : ليــــــــــــــــــــــــه ؟؟؟؟؟؟؟؟؟
منال : ابوي مادري وش طلعله فاجأة ويبي يطلع معنا يتمشى !!
نهى : بسم الله من كم يوم وهو حابس نفسه بالمكتب يشتغل وش طراله الحين فاجأة !!
منال بقهر : مادري عنه !!
نهى وهي تقعد بقوة : يووووووووووه ! مابي أطلع والله مابي
منال : عاد أنا الي أبي ! بس خلاص عاد لازم نطلع ولا بيزعل ويقول هذا انتم دايم تقولون انت متغير علينا وماتطلعنا ومادري وشو والحين يوم بغيت أطلعكم رفضتوا !!
نهى : طيب نقوله معزومين عادي شفيها !!
منال : تعرفين ابوي اصلا مايحرص اننا نروح بيت عمي كثير وبالعكس بيقول طلعتنا معه أولى !!
نهى بهمس ماخلى من القهر : كله منها هالنوال الي كرهته فيهم وحشته عليهم ولا كان يموت ببنات عمي
انفتح الباب فاجأة ودخل وائل وهو يقول : صدق بنروح البحر !!!
نهى اتأففت وماردت ومنال قالت : مين قالك ؟؟؟
وائل : خالتي نوال جت غرفتي طلعتلي لبس وقالت البس عشان نروح !
تبادلوا منال ونهى النظرات باستغراب ومنال قالت : شعندها ياحافظ اليوم حانة على وائل وقاعدة بالبيت !! كل خميس هي تروح لأهلها
سمعوا صوت باب غرفة نوال يتسكر وجتهم عند الباب وهي تقول : ترا مابقى على الصلاة شي وبيجي ابوكم وانتوا ماجهزتوا !!
منال : الحين انتي بتروحين معنا !!
نوال : قصدك انتوا الي بتروحون معانا !!!
منال بحمق : مستعدة أحلف ان كل هذا من تحت راسك !!!!!!
نوال : هههههه مسكينة انتي الله يعينك على نفسك !
نهى خافت تنشب بينهم من جديد ووقتها ابوهم بيعصب عليهم وهو الي متحمس يطلعهم ووقفت بينهم بسرعه وهي تقول : خلاص يانوال الحين نجهز وننزل ممكن تتركينا بحالنا !!!
نوال بسخرية : كل هالضيق الي فيكم عشان عزيمة اللّيه !!!
منال : يعني انتي دارية وانتي الي كلمتي ابوي يطلعنا عشان مانروح العزيمة صح ولا لاء!!
نوال : مني مضطرة أجاوبك بشي وخلي افكارك الشينة تلعب بدماغك !
منال ارتفع صوتها : والله ماهي افكاري الشينة الا اني عارفتك على حقيقتك وانا أحلف ان ابوي لو بغى اهو بنفسه يطلعنا بتسوين انتي المستحيل عشان تمنعينه !! غريبة انك الحين متونسة بهالطلعة ومتحمسة !!!
نوال وصوتها ارتفع معها : والله فكري زي ماتبين تفكرين انا متونسة عشان ابوك بعد عمري حابس نفسه بالشغل ومتعب عمره وفرحانة انه اخيرا بيطلع يشم هوى ويستانس
نهى : اوكي نوال انتوا روحوا لحالكم عشان يصفالكم الجو ليه تبونا نروح معاكم !!
وائل الي ماغير تتطاير عيونه بينهم : الا انا ابي اروح البحــــــــــر !!!
نوال : تعال البس وماعليك منهم بتروح معانا وتنبسط !
منال : تكفيييييين يالطيبة يعني صايرة الحين انتي ارحم مني على اخوي !
نوال : والله ماشفت الرحمة ظهرت فيك ولاعمرها بتظهر !
منال : مخليتها لك وباينة عليك الرحمة بزيادة اللهم لا حسد !
نهى : خلااااااص تكفوووووون خلاااااااص ماصارت طلعة هذي الي كلها نكد ومشاكل !!!
منال : وائل روح البس وسكر الباب معاك !!
طلع وائل وسكر الباب تارك نوال واقفة وراه وهي تتمنى تخترق الباب وتنتف منال تنتيف الي فاهمتها وفاهمة نواياها وكاشفتها !!
ونزلت الدرج الا شافت تركي توه داخل ويكلم بالجوال ! انتظرته يخلص عشان تقوله على الطلعة وتخرب عليه هو بعد لو كان بإيدها !!
نهى من تسكر الباب قالت : تتوقعين انها هي الي مكلمة ابوي نطلع وتبي تخرب علينا !!
منال : أقسم بالله انها هي الي مدبرة كل شي !
سالت دموع نهى بكل قهر وقالت وهي تبكي : ليه طيب تسوي فينا كذا ليييييه ماتخلينا ننبسط زي العالم والناس حرام عليها !!
منال : لانها حيوانة ومنقهرة ليش ماعلمتها أمس بالسالفة !! تبي تعرف كل صغيرة وكبيرة عننا وان خبينا عليها شوفي شلون تنتقم التبن !!
نهى صارت تناهج وتبكي .. ومنال قامت عندها وحضنتها وهي تقول : بس يانهى ماودي تبكين دايم على سواياها قسم بالله ماتستاهل هذي ولا دمعة منك !
نهى : تقهر يامنال والله تقهر !!
منال : ماعليك والله لا أردلها الصاع صاعين بس اصبري علي !
نهى : لا يامنال بالعكس انا أبيك تهدين الوضع بينك وبينها يمكن تتغير !
منال : تخسى والله ما أضعف عشان هالسوسة .. يانهى هالاشكال مايبيلك الا تتعاملين معهم بالمثل لان قلوبهم مافيها رحمة أبد !!
دق الباب هالوقت ومسحت نهى دموعها بسرعه ومنال مشت وفتحت الباب لتشوف تركي واقف وراه
منال وهي تفتح الباب ليدخل : هلا تركي
طالع تركي بوجه منال وحس انه أحمر ومبين انها معصبة حيل .. دخل وهو يقول : شفيك يامنال !
منال : مافيني شي ! وسكرت الباب وقعدت على السرير
طالع تركي بنهى ولقى آثار الدموع بوجهها وعيونها وخشمها المحمر وعقد حواجبه وهو يقول : شفييييكم ؟؟ شصاير ؟؟
نهى مسحت دموعها ولاردت ومنال اتكتفت وسرحت بالارض بدون رد !
مشى تركي لنهى وقعد جمبها وهو يقول : شصاير يانهى !!
نهى : مافي شي ياتركي لاتشيل هم !
تركي : شلون مافي شي !! وهالدموع الي بعيونك ووجيهكم المنقلبة وتقولون مافي شي!
منال : وش تبينا نقولك ياتركي ؟؟ هو الواحد يقدر يعيش مرتاح ومبسوط وهالشرانية عايشة بيننا !!
فهم تركي انها تقصد نوال وقال : ليه وش سوت بعد ؟
حكته منال بكل شي صار بالتفصيل من مكالمة عبير أمس لين الي صار هاللحظة وبالآخر قالت : بالله عليك ياتركي ابوي مشغول ولا يكلم أحد ولا يطلع وفاجأة يقول بنتمشى ! مو تحسه شي غريب وانها هي الي قايلتله عشان تنتقم !
تركي : الا الا هي الي قايلتله !
منال : وش دراك ؟؟
تركي : انا اليوم نازل بكلم أبوي إلا سمعت صوتها عنده وسمعتها تطلبه يطلع وهالكلام بس عاد ماقعدت اتسمع سحبت نفسي وطلعت !
نهى : شفتي الحقيرة !!!!
منال : هيا وش رايك بالله ياتركي !!
تركي ثارت أعصابه وانقهر حيل عشان خواته بس هو الحين دوره انه يهديهم مو يزيد غضبهم وقال : شوفوا يابنات خلاص انتوا اتعودتوا عليها وعلى سواياها من دخلت هالبيت ! حتى انا ماسلمت منها ومن اتهاماتها بعض الاوقات ! خلاص لمتى بتقعدون تتناجرون معها وتتحدونها ! هذي انسانة مريضة اتعاملوا معها على انها مريضة وجاروا مرضها قد ماتقدرون !!
منال : لاحبيبي مستحيل اخليها تمارس مرضها فينا !!
تركي : يامنال انتوا الخسرانين ! يعني شوفي لو انك قلتيلها بسالفة العزيمة امس ماكان صار الي صار !!
منال : ياتركي مستحيل أقولها .. هذي شايفة نفسها الآمرة والناهية بالبيت وتعتبر ان واجبي اعلمها بكل شي غصب علي !! لا والله ما أجاريها معليش .. ماقدر !
التفت تركي لنهى وشاف دمعة متدحرجة على خدها مسحها بحنان وقلبه متقطع عليهم ! اهو ولد ومايثنيه شي ولاتقدر توقف بوجهه ! ووائل مصيره يكبر ويصير مثله ! لكن هالبنات الي قطعوا قلبه وكسروا خاطره ولا استحمل حالهم خصوصا نهى الضعيفة الي ماعندها غير الضحك والمرح لكن وقت الشدائد يبان ضعفها وخوفها !
مسح على شعرها واهو يقول : بس يانهى يكفي بكي
نهى : ليه هو بكيفي ؟؟ والله من القهر الي فيني
تركي : طيب وان قلتلك بتروحين العزيمة غصب عن هالبيت كله !!
وسعت نهى عيونها وهي تقول : شلووووون ؟؟؟
تركي : خلي الموضوع علي .. وابتسم وهو يقول : بس الحين امسحي دموعك ولاتبكين خلاص وان شاء الله بتروحون !
منال : ماراح يوافق ابوي ياتركي وبعدين مين بيودينا ؟؟ دقيت ابي السواق يجيبلي اغراض من السوبرماركت لقيتها مرسلته لأهلها !! عشان تشوف خطتها كيف !
تركي : وانا وين رحت يامنال !! خلاص انا باتصرف وانا الي بوديكم شتبون بعد ؟
نهى : ياليت ياتركي حاول والله ودي اقعد بالبيت ولاني اطلع معها
وقف تركي واهو يقول : ان شاء الله مو صاير خاطركم الا طيب بس اجهزوا الحين بسررررررعه اوكي ؟
منال + نهى : اوكي .
طلع تركي من عندهم وهو يتمنى يمسك نوال ويصقعها بالجدار !! واتنهد من خاطر ونزل وشاف ابوه قاعد بالصالة اهو ووائل ونوال بعبايتها
ابو تركي : وين خواتك ؟؟
تركي : هذاهم نازلين الحين .. بس بقولك يبه انا باخذهم بسيارتي وامشي وراكم
ابو تركي : ليه ماله داعي نروح بسيارتين خلنا نروح كلنا بالجيب !!
تركي : لا ابيهم يجون معاي لاننا بعد مانخلص ابي آخذهم لمحل كفي واعدهم فيه من زمان
وائل : وانا بروح معكم
تركي تورط وقال : امممم نشوف بعدين ياوائل المهم خلاص يبه انت روحوا بسيارتك واحنا بنلحقكم
وقف ابو تركي وهو يقول : زين يالله أجل .. مشينا
وطلع ونوال تلاقت عينها بتركي ورماها بنظرة شافت نوال كل الغضب فيها !! ودرات وجهها بسرعه وطلعت !
نزلوا البنات هاللحظة وشافوا تركي واقف ينتظرهم ومنال قالت : وينهم ؟؟
تركي : ابوي بياخذ نوال ووائل بسيارته وانتوا بسيارتي
نهى : وبعدين ؟؟
تركي : ولاقبلين خلاص امشوا اركبوا وتشوفون .
لفوا البنات طرحهم وطلعوا وركبوا مع تركي الي شغل السيارة وانطلق فيها خلف أبوه ..
نهى ماكلها الحماس وماقدرت تصبر وقالت : يالله ياتركي فهمني شلون بنروووووح ؟؟
تركي : نهى حبيبتي اصبري شوي ..
نهى : مافيني اصبر ابي اعرف
رفع تركي جواله ودق على خالد .. وثواني وجا رد خالد : هلا
تركي : هلا خالد
خالد : يالله وينك نستناك انا وفيصل
تركي : اصبر ياخالد انا عندي مشكلة بسيطة وابيك تساعدني فيها
خالد باهتمام : ابشر ياتركي بس عسى ماشر !
تركي : لا تخاف مافي شي كبير بس ابيك تدق علي بعد نص ساعه كذا وتسوي انك تبيني ضروري الحين ولا اتأخر عليك وهالكلام الي يرج الواحد اوكي ؟؟
خالد : وهالخدعة تبيها قدام مين بالضبط ؟؟
تركي : ابوي !
خالد : أبوك ؟؟؟ ليش طيب !
تركي : بعدين أحكيك بس الحين بليز لاتنسى خالد انا مو داق عليك بعد هالوقت لاني بكون مع أبوي وابي اتصالك يكون مفاجئ
خالد : والله احس اني مسوي فلم هندي ههههههههههههههههههههه
تركي : فلم هنديييي جبتها .. أوكي ؟
خالد وهو يضحك : اوكي حبيبي
تركي : يالله لاتنسى .. سلام
خالد : سلام
سكر تركي الجوال ونهى قالت على طول : وااااااااو يعني خالد بيتصل يرجـّك وانت بتبيّن قدام ابوي انك متورط معاه ولازم تروحله فيه مشكلة ! وطبعا مستحيل تتركنا لان سيارة ابوي أم بابا واحد ماتكفينا !!! فبتضطر مع كل أسف انك تاخذنا معك ومره وحده تحطنا ببيت عمي !
تركي : هههههههههههههههههههههههههه ذكية ماشاء الله نهى !!
نهى وهي تصفق ايدينها : يسلملي هالأخو بعد عمريييييييي
منال : بس ان شاء الله تمشي على ابوووووي
تركي : لا ابوك بتمشي عليه خاصة ان بيت عمي قريب من البحر بس نوال الي اتوقع بتفهمها
منال : خلها تفهم احسن وتنحرق واصلا ماتقدر تقول لابوي لانها اذا قالتله بيقول اجل دامك دارية عن العزيمة ليه رتبتي لهالطلعة !!!
نهى : يعني هازمينها هازمينها وناااااااااااااااااااسة
تركي : قولوا ان شاء الله .. بس الحين حطوا جوالاتكم على الصامت لايدقون عليكم البنات ويشك ابوي بهالمكالمات !
منال : أنا جوالي مفصول انتي يانهى سكري جوالك ..
نهى مستعدة تسوي أي شي عشان تتم الروحة وقالت : أوووووووكي (( وحطت جوالها على الصامت
وبعدها وصلوا البحر وكانت نهى الطيبة مفرفشة وتضحك هي ووائل ونست الي صار .. ومنال جمب تركي يسولفون ويعلقون على الرايح والجاي ..
وابو تركي يسولف معهم ويضحك شوي .. وشوي ينشغل بجواله
ونوال الي ماغير عيونها تراقبهم وكنها توجس الخطر فيهم !!
وبعد النص ساعه دق خالد .. !! وكان مسوي رجـّــــــــــــــة بزياااااااااادة الله يهديه !!
حتى ان ابو تركي سمع صوته من الجوال وعقد حواجبه باستغراب !!!!
وتركي كاتم الضحكة بالقوة وهو يقول : طيب خلاص ياخالد لاتشيل هم جايك
وخالد انواع الصراخ والعصبية والحماس الزايد !!!
سكـّر تركي وقال لابوه ان خالد متورط مع واحد مع الشباب جمب بيته ويبيني ضروري وبروحله .. وبحط البنات ببيت عمي لين اخلص
ومع هالخطة المرتبه وافق ابو تركي .. وراحوا البنات
نهى اول ماركبت السيارة : هههههههههههههههههههههههههههههههه احس اني بفلم والله وناسة
تركي : يالله انبسطي ياحلوة محد قدك
وشغلهم أغنية ياتاج راسي ياقلبي وياعيني ماعاش منهو يكد خاطرك ساعه ..
وتوسعت صدور البنات واهم يحمدون الله ويشكرونه على هالاخو الي لو الله ثم هو كان للحين ضايقة صدورهم ومتكدرين !
****
ابريطانيا
مشت شهد بالسيب المودّي لغرفة أم وعد بالمستشفى وهي تقرا أرقام الغرف لين وصلت الغرفة المنشودة ودقت الباب ودخلت
شافت وعد قاعدة جمب امها تمسح على راسها وأم وعد مغطَى وجهها بالكمامة ونايمة ومنظرها قطع قلب شهد أجل شلون وعد !
شهد وهي تحط كيس فيه أغراض لوعد وأمها : قود إيفنينق
وعد بهمس : قود ايفنينق
شهد : كيفها الحين ؟
وعد : ان شاء الله أحسن فتحت عيونها قبل شوي بس ماتكلمت
شهد : يالله ان شاء الله يومين بالكثير وتتحسن زي ماقال الدكتور لا تشيلي هم
وعد ابتعدت عن أمها عشان ماتزعجها وقالت بهمس والدموع بعيونها : آي دونت نو .. كيف أشتغل وأهتم بماما بنفس الوقت ! ماما صارت تتعب كثير وتحتاجني أكون معاها دايما !!
شهد قربت منها ومسكت ايدها وهي تقول : لا تقولي كدا ياوعد تعرفي انا وأهلي مانقصر معاكم كلنا لبعض والي صار لأمك شي طبيعي لأنها ماتاخد الدوا بانتظام !
وعد : وممكن يتكرر تعبها هدا أكثر من مره لأنها دايم تنسى تاخده !
شهد : لا ان شاء الله مايتكرر .. وعد أنا وماما نفكر بجدية تجوا تعيشوا عندنا !
وعد : نو واي شهد !
شهد : عشان مامتك ياوعد !
وعد : شهد انتوا تتعبوا نفسكم كثير معانا .. من جد انا مني عارفة كيف ممكن أرد جمايلكم وبليز ياشهد ذاتز إنـَاف !!
شهد : تعرفي انه يبغالك ضرب يطيحك هنا جمب أمك !
وعد : ههههه واي !!
شهد : وتسألي وااي ؟؟؟ وعد ماحب أسمع منك هالكلام تبغي تردي الجمايل وكلام فاضي !! ترا من جد أزعل منك !
وعد بمرارة : مادري اش كنت حساوي أنا وأمي بدونكم من بعد مارمانا أبويا !
شهد : ماله داعي تفتكري شي يكدر عليك زياده دحين .. وامشي معايا ناكل انتي من الصباح ماكلتي شي
وعد : لاتجيبي سيرة الأكل بالله تراني مو مشتهييييية !
شهد : مايصير ياوعد انتي تبغي تهتمي بأمك ولا تتعبي معاها !!
وعد : ما اقدر آكل والله ماينبلع !
شهد : أوكي مو لازم ناكل تعالي نشرب أي شي ونرجع !
وعد : نو شهد جيبي شي نشربه هنا ما أبغى أسيب ماما يمكن تصحى بأي لحضة !
شهد : أوكي آز يو لايك
وطلعت لأحد المطاعم القريبة واشترت عصيرات ورجعت للغرفة عند وعد وقعدت إهي وياها على الكراسي ..
وعد وهي تاخذ العصير : ثانكيو
شهد : ولكم
وعد : بليز شهد أبغى منك خدمة
شهد : آمري وعد
وعد : أبغاكي تروحي الفندق تاخديلي إجازة لمدة اسبوع ..
شهد : أوكي وعد بس مو كثير اسبوع ؟؟
وعد : إش اسوي شهد لازم أكون جمب ماما هالفترة والله لو صار فيها شي مح اسامح نفسي !
شهد : وانتي ليه تلومي نفسك بهالشكل الي يسمع يقول شغلك بمزاجك ماكانك مضطرة تشتغلي عشان تصرفي عليها وعليك
وعد : برضو مايصير أبعد عنها كثير خلاص بليز شهد أول ماتخرجي من هنا مري على الفندق وخديلي إجازة
شهد : أوكي أجل خليني أروح الحين قبل مايتأخر الوقت
وعد : أوكي
شهد وهي توقف : توصي على شي وعد؟؟
وعد بابتسامة : ماقصرتي شهد بجد الله لايحرمني منك
شهد : آمين ههههههههههههههههه
وعد : ههههههه واثقة من نفسك روحي طيري بس
شهد : هههههههه ليتني أطير والله أمنيتي .. أوكي حبي باااااي
وعد : باي
وطلعت شهد عنها وركبت سيارتها واتجهت فورا للفندق .. دخلت وراحت للمدير بمكتبه وبعد مراجعات طويلة لعدد المظيفات المتواجدات وأوقات دوامهم أخيرا سمح بالإجازة لوعد !
طلعت شهد وهي تتنهد بارتياح وأول مامشت لفت نظرها شخص جالس على أحد الطاولات ولم قبضته أسفل دقنه وعيونه ضايعة بالرايح والجاي
راودها شعور ان يكون هذا سعود ! لأن شكله خليجي بلا شك ! بس ليه مايكون صديقه إلي معاه .. ؟؟ لابس هذا شكله متضايق وكنه يترقب أحد !! معقولة يكون اهو سعود ومنتظر طلة وعد !!
ومع هالأفكار الي سرحت فيها والي خلتها تطيل النظر فيه .. انتبهلها الشخص وانبته لنظراتها واتغيرت ملامحه بشكل مفاجئ وكنه يعرفها واتفاجأ بتواجدها !!!
وبلا تردد قام من مكانه واتوجه ناحية ما شهد واقفة
شهد خفق قلبها بكل عنف يوم شافت الشخص مقبل عليها بخطوات واثقة ونظرات ثابتة عليها .. وهيأة عمرها ماشافتها قبل .. هيـــأة جذابة لرجل أسر كل حواسها بلحظـة وحده !!
|
|
|
ٳل̨هي جملني بحلتين قلب رحيم وعقل حكيم ...
|
|