في بيت مايد
مايد وبدرية كانوا يالسين في غرفتهم يسولفون وشوي وسمعوا جرس البيت يرن
مايد : منو هذا ياي الحين
بدرية : ما ادري روح طالع
مايد : نزلت وحصلت اخوي العزيز عوض قلت له نعم خير عاد خلاص قلتوا خلصنا شهر العسل ما نبي نيلس مع بعض .
عوض : لا حول ولا قوة إلا بالله بلاك تتحرطم ياخي صج ما تستحي وخر ودخلت يلست في الصالة وقلت له باسلوب يقهر روح هات لي كوب ماي وازجر حرمتك
مايد : نعم؟؟
عوض : اللي سمعته
بدرية : يوم حسيت ان مايد تأخر تحت نزلت وحصلت عوض يالس في الصالة ومايد واقف سلمت ويت ايلس
عوض : زين انج يتي بروحج بلا المذله لها واشرت على مايد باسلوب بعد يقهر (يا جماعة متعمد اقهر اخوي)
مايد : يت ويلست عدال حرمتي
عوض : اقولك ما بتطير حرمتك حشا
مايد : بسم الله من عيونك كيفي ما ارتاح غير يوم اكون يالس يم حرمتي عندك مانع ؟
عوض : كان عندي دواس بس الحين خلاص ما عندي حد هههه المهم لا تنسيني بدرية تفضلي
بدرية : نشيت اخذ من ايده الهدية اللي كانت ملفوفة بورق بطريقة حلوه وايد وقلت له حقي انا من عند منو
عوض : هيه لج انتي هاي هدية البشارة الحلوه بعدين لولا الحدث انا ما بعرف ثريا
مايد : ياخي الملافظ سعد
عوض : شو قلت انا نزين الحين
بدرية : فتحت الهدية بصراحة الاسورة كشخة وقلت له مشكور وايد عوض
مايد : طالعت الاسوارة شكلها وايد حلو وشكلها غالية ونشيت وحبيت عوض بصراحة اهتمامه في حرمتي حسسني جي باحساس حلو
عوض : اخيرا خذينا بوسة المهم يالله من رخصتكم وانتي بدرية اتصلي بماية وشوفيها ترانا ها الاسبوع نبي نزور اهل ثريا ونخطبها
بدرية : خلاص بشوف عموه وبعد بشوف ثريا
عوض : ما تقصرين يالله في امان الله
في بيت ابو مازن
ابو علي : طلبت علي وقلت له بسير معاك مشوار مهم
علي : في صباح اليوم الثاني سرت لابوي بيت عموه وخذيته وانا مب عارف وين بنسير
في سيارة علي
أبو علي : انت يا ولدي عارف حقيقة ابوك اللي ادري انها مخزية لكن يا ولدي انا غلطت وربك كريم ويسامح وابيكم انتو بعد تسامحوني يا ولدي انا جمعت وايد فلوس ومن فترة كبيرة تبت لرب العالمين وطبعا جمعت فلوسي بطريقة حرام عشان جي ما اقدر اعطيكم منها ولا درهم عشان جي انا بسير اتبرع فيهم كلهم للهلال الاحمر وانتو حالكم مستور امكم ما راح تقصر معاكم ..
علي : طالعت على ابوي بطريقة وكأني افتخر فيه صج قرارة صائب وفي مكانه وانا دائما كنت افكر في نفس الموضوع وكنت حاب افاتحة في الموضوع لكن الحمد لله يات منه وقلت له عين العقل يا ابوي
ابو علي : بعد ما سرت فعلا الهلال الاحمر وتبرعت بكل ما املك من فلوس حتى اللي كانت عندي من قبل تبرعت فيها لانها اختلطت بالحرام وما تتخيلون اشكثر الحين انا مرتاح نفسيا واكيد اني بدعي ربي يغفر لي
علي : الحين ابوي صار ما عنده أي شئ وانا بعد فكرت في فكره وقلت لأبوي انا بعد ابيك تسير معاي مشوار
ابو علي : وين يا ولدي
علي : طلعنا على مصرف ابوظبي الاسلامي وفتحت لابوي حساب وقلت بودع له كل شهر مبلغ 3000 درهم يصرف منهم
ابو علي : اشكثر تصرف علي خلاني استحي من نفسي وفكرت ارفض لكن خفت اكسر له خاطره وابتسمت له وعيوني فاضت الدموع فيها
علي : يا بوي انت ابوي ولا تحسب انك عاله علينا انت ابونا ومن واجبنا برك يا بوي رضاك من رضى المولي
ابو علي : الحمد لله انه رزقني عيال مثلك ومثل اختك الريم
في دوام مازن
مازن : كنت يالس وسرحان وقدامي مليون ورقة لازم اخلصهم لكن احس اني طفران
سلطان : ابو الشباب بلاك ؟؟(طبعا سلطان زميل مازن في الدوام)
مازن : احس اني طفران وملان ومب عارف شو اسوي؟؟
سلطان : تسمع راي؟؟
مازن : قول ومنكم نستفيد
سلطان : خلص موضوع زواجك واطلع اجازه
مازن : حليتها حضرتك ولد عمتي توه متوفي وتقولي خلص موضوع عرسك
سلطان : الحى ابقي من الميت
مازن : تبي عمتي تاكلنا بلسانها لا ما فينا
سلطان : نزين خلك مقابل شغلك عيل يالله اشتغل وشليت كومة اوراق من على مكتبي وقلت له بو الشباب كملهم عني انا بطلع يالله من رخصتك ههههههههه
مازن : ويا ويهك اقولك ملان وتشوف اني مب مخلص شغلي تقولي اكمل شغلك بعد ؟؟
سلطان : شو اسوي فيك
مازن : نشيت وقلت له نزين لحظة سلطان عندي انا فكره احلى من فكرتك
سلطان : شو ؟؟
مازن : لحظة بس بطلع خاري المكتب خمس دقايق وبرجع نزين ترياني
سلطان : اوكى بترياك وانتظرت لحد ما مرن خمس دقايق يالله ما اصعب الانتظار
مازن : يت وفتحت السدة في مكتبي وظهرت مبايلي وسويج سيارتي وقلت لسلطان الغالي انا ترخصت من المدير يالله الشيخ كمل شغلي وشغلك هههههههههه هاي الفكرة احلى صح؟؟
سلطان : غربلات العدو يعني سويتها فيني
مازن : وانت الصادق تغديت فيك قبل لا تتعشى فيني يالله تشاو ظهرت من الدوام وسرت بيت خالتي ام علي
في بيت ام علي
الريم : اليوم ما سرت الجامعة احس اني تعبانة ونزلت وقلت للخدامة تسوي لي نسكفيه وظهرت يلست على بركة السباحة (لا تقولون خبلة الصبح وبركة سباحة بس بركة السباحة في بيتنا مكيفة)
ام علي : صباح الخير بنتي هاه اليوم ما سرت الجامعة؟؟
الريم : احس اني مرهقة شوي خاصة البارحة ما رقدت (كنت طول الليل ارمس ثريا وعرفت منها ان عوض واهله بيزورهم ها الاسبوع بصراحة استانست لها وايد)
ام علي : المهم يا بنتي انا بوصل اخلص كم مشوار تبين اسوي لج أي شئ قبل لا اسير؟؟
الريم : سلمتي اماية بس لو رجع علي من وقت بسير اشوف مزنوه من يومين ما سرت لها ويمكن اتغدى معاهم
ام علي : خير يا بنتي يالله في امان الله
الريم : يحفظج ربي اماية
تميت اطالع الماي في بركة السباحة بصراحة انا اموت في البحر وايد وخاطري اسير البحر عشان جي خطرت في بالي فكره مزنوه بعد تحب البحر وهي من توفي حسين ما ظهرت من البيت بقول لها نسير السارجة هناك البحر هادي والناس شوي مب وايد والمكان مريح .
مريانا : مدام فيه نفرات برع .
الريم : منو؟؟
مريانا : ما اعرف
الريم : حطيت شيلتيه على راسي وظهرت وابدا ما توقعت اني بشوف مازن عشان جي يوم شفته نزلت راسي بسرعة
مازن : السلام عليكم
الريم : وعليكم السلام (عاد ما اقول لكم شكلي كيف كان لابسة جلابية بيت بس هاي المره ممشطة شعري والشيلة فوق راسي لكن حتى ولو شكلي مبهدله )
مازن : ابتسمت للريم وقلت لها ما حد هنا؟؟
الريم : لا كلهم ظاهرين علي سار مع ابوي واماية توها ظاهره
مازن : نزين بتم جي واقف على الباب؟؟
الريم : لا تفضل
مازن : دخلت ويلست ويلست الريم في كرسي شوي بعيد عني بس قدامي
الريم : ويل قلبي احسه الحين بينط قدامي ما ادري شو ها الاحساس المينون اللي فيني
مازن : احم
الريم : رفعت راسي وطالعت عليه
مازن : ما ادري ليش شكل الريم وهي تطالعني نظراتها خوف على خجل على قلقل خلاني اضحك بقوه
الريم : طالعته اكثر عقب رديت اطالع على ملابسي يمكن فيني شئ غلط .لكن ما فيني شئ غلط بلاه هذا يضحك جي بصراحة حسيت اني غيضت وشوي وبنش
مازن : الريم ما تلاحضين ان موضوعنا طول ؟؟
الريم : لا ها الريايل ناوي بموتي اليوم خلاص بموت من الخجل شو فيه هذا الحين يرمسني جي
مازن : ريموه
الريم : خيبة يدلعني بعد لا احس ان حمى ياتني
مازن : حسيت ان ها البنت ما راح تقدر تقول أي شئ عشان جي نشيت وقلت لها برمسج نزين ؟
الريم : شو يرمسني بعد تراه يالس يرمس الحين بس يترخص مني انه بيرمس؟؟
مازن : نشيت وقلت لها باي
الريم : اثاري مب انا بس خبله حتى هو خبل اوني انتظره يرمس لو ان كل كلمة احس بخجل منه لكن صج اثاريني كنت مشتاقة له وما كتشفت ها الشئ غير يوم شفته قدامي
مازن : طلعت من بيتهم واتصلت على مزنه اختي وخذيت منها رقم الريم منها خلاص الحين عادي اطلب رقمها هي خطيبتي .
مزنه : عطيت مازن الرقم وقلت له سلم عليها
مازن : يوصل واتصلت على الريم بس ما ترد غربلاتها هاي البنت بتخبلني لا اكيد متعمدة انها تخبلني عقب فكرت وقلت بسير ازور عموه انا من أيام العزاء ما سرت لها وقلت عقب يوم ارجع بتصل على الريم
في بيت ابو حسين
ابو حسين : مب كان موجود في البيت كان ساير السوق
ام حسين : من يوم وفاة حسين وهي ما تظهر من البيت واربعة وعشرين ساعة ماسكة المصحف وتقرأ وتدعي لولدها بالرحمة والمغفرة .
مازن : وصلت وظهر لي هيثم ولد بنتها عمتي وقلت له وين يدك قالي انه ظاهر وعقب قلت له يدتك هنا؟؟ قالي هيه وقلت له خبرها اني ياي
هيثم : سرت وقلت ليدوه عمي مازن خاري (هيثم عمره خمس سنوات ونص)
ام حسين : خليت المصحف ونشيت اقرب بمازن ودخلته الميلس
مازن : شحالج عموه ؟
ام حسين : بخير ربي يسلمك انت اشحالك وشحال هلك؟؟
مازن : كلهم بخير وسهالة وعقب قلت لها اسمحي لي عموه بس صج مقصرين ما نسأل عنج
ام حسين : لا يا ولدي لا تقول جي .
خيم السكوت على المكان ولكن يوم دخل هيثم تميت ارمسة عقب قلت لعموه يالله من رخصتج عموه بسير انا بس مريت اشوفكم واتخبر عنكم
ام حسين : ما تقصر يا ولدي لكن بغيتك قبل لا تسير .
مازن : خير يا عمتي امري
ام حسين : ما يامر عليك ظالم يا ولدي بس بغيتك تسوي ملجتك تراه حسين سار من الدنيا ولو عايش ما بيرضية انك تأخر ملجتك اكثر من جي
مازن : انصدمت باللي قالته عموه وحسيت بفشلة لا تحسبني اني ياي هنا عشان ها الموضوع وقلت لها عموه تراني مب ياي هنا عشان ها الموضوع
ام حسين : لا يا ولدي اعرفك انك مب ياي هنا عشان جي بس انا حاسة انك مأخر زواجك عشان ها الموضوع وانا اقولك الحي ابقي من الميت وحزنا على حسين في قلوبنا اتكل على الله وحدد موعد ملجتك وعرسك وتراني بحضر عرسك انت الغالي يا مازن
مازن : نزلت راسي علامة على ايجاب باللي تقوله ونشيت وحبيت عموه على راسها وظهرت واول شئ سويته يوم ركبت السيارة اني طالعت المبايل اللي كنت مخلنه في السيارة يمكن الانسة الريم دقت وانا نازل لكن ما فيه أي مكالمة عقب قلت معليها الدبه وسرت البيت وخبرت اماية باللي قالته عموه وانها تبانا نحدد موعد الملجة والعرس
ام مازن : بصراحة عمتك عندها حق خلاص انا اليوم بشوف خالك وان شاء الله بنفرح فيك قريب
مازن : يا رب وطلعت غرفتي ارتاح شوي وقلت لماية ما ابي غدا وانا طالع تلاقيت مع مزنه
مزنه : هاه شحالها ريموه؟؟ وكنت اضحك لان الريم اتصلت فيني وخبرتني كل السالفة وان مازن اتصل عليها بس هي ما ردت عليه وقالت لي انها ياية تتغدا معي بعد
مازن : بخير يالله من رخصتج (بصراحة شكيت ان مزنه تعرف ان الريم ما ردت علي معليها الدبه ان ما وريتها ؟ لكن شو اوريها وانا اموت فيها )
مزنه : على فكره الريم بتتغدا معانا اليوم
مازن : كنت ما اريد اتغدا لكن يوم قالت جي قلت لها عيل انا بطلع اسبح وارتاح وفي حذة الغدا زجروني
مزنه : فالك طيب (بصراحة حال ها الاثنين محير يموتون في بعض بس ما اعترفوا لبعض قاهريني الصراحة مفروض ما يضيعوا يوم من ايامهم إلا ومعبرين عن مشاعرهم ما يسون شراتي انا وحسين الله يرحمة)
مازن : دخلت غرفتي وسبحت ويت استلقيت على السرير وشكلي من التعب رقدت بدون ما احس
في بيت ام علي
ام علي : رجعت البيت ودخلت اخبر الخدامات يرتبن الاغراض اللى اشتريتها في المطبخ وعقب طلعت استريح احس دقات قلبي بسرعة تدق (خبركم عندي القلب الله يبعده عن الجميع آمين)
الريم : يوم سمعت سيارة الدريول داخلة وطالعت من الشباك وشفت اماية نزلت لكني ما حصلتها عقب سرت غرفتها اشوفها حصلتها تعبانة تخرعت الصراحة قلت لها بلاج ؟؟
ام علي : حسيت بتعب شوي بس الحين برتاح وبكون اوكى وقلت لريم تناولني حبوبي ما ابي اخرعها علي فديتها وابتسمت لها .
الريم : طالعت اماية لحد ما حسيت انها فعلا ارتاحت وقلت لها اماية مازن يا اليوم وانتي مب موجودة
ام علي : كنت راقدة بس عقب نشيت وقلت لها اها شو كان يبي؟؟
الريم : ما شئ اقصد ما اعرف ما قال بس سلم وظهر ما يلس
ام علي : زين المهم اخوج ما يا لين الحين وانتي قلتي تبي تسيري بنت عمتج قومي تجهزي وخلي الدريول يوديج بس قولي لوحده من الخدامات تسير معاج
الريم : لا بتم معاج انتي تعبانة
ام علي : انا خذيت حبوبي وبرقد بعد شوي قومي سيري شوفي بنت عمتج هي محتاجة لج اكثر
الريم : قلت لها متأكدة اماية ما تبيني ايلس معاج؟؟
ام علي : اباج بس مب الحين يوم ترجعين بنيلس مع بعض .
الريم : ان شاء الله وظهرت وطبعا كنت متجهزة لاني انتظر علي لكن دام الدريول بيوديني خلاص وما اخبركم كشخت اخر كشخة عشان اعدل صورتي شوي قدام مازن فديته كل مره يشوفني بجلابيات البيت ونزلت وطلبت من الخدامة تسير معاي
في بيت ابو مازن
خلود : كنت اساعد عموه في المطبخ وهي تتجحطن علي مب مخلتني لكني ما اقدر اشوفها هي تشتغل وانا يالسة
مزنه : انا كنت يالسة على الكرسي واطالع اماية وخلود وقلت يا تري لو انا كنت متزوجة حسين كانت عمتي بتعاملني نفس ما اماية فديتها تعامل خلود؟؟
الريم : وصلت وسرت صوب المطابخ لاني اعرف ها الحزه عموه تكون هناك دخلت وحصلت الشلة كلهم هناك سلمت على عموه وعلى خلود ومزنه وقلت لخلود هاه شو اخبار البيبي؟؟
خلود : بخير يسلم عليج هههههههه
الريم : فديته
ام مازن : يالله عسى نفرح فيج انتي بعد ونفرح بعيالج
الريم : استحيت وقلت في خاطري يا رب عقب قلت يالله انا بسير افسخ عباتي وغشواتي وبنزل اساعدكم
ام مازن : لا تنزلي ولا عندج خبر سيري ارتاحي ونحن شوي وبنخلص ..وبعدين شلي خلود معاج
خلود : لا انا اسوي لريلى غداه ما ابيه ياكل غير من ايدي عقب ايد عموه
مزنه : عز الله راح وطي اخوي عيل
الريم : يالله بطلع وبرجع لكم الحين وطلعت سرت غرفتي السابقة وعقيت عباتي وشيلتي ويت ادور شيله بيضاء كبيرة ما حصلت في كبتي سرت غرفة مزنه وظهرت لي شيلة وانا وظاهرة شفت على شبريتها صورة حسين حسيت قلبي يعورني هاي البنت عمرها ما راح تنسى حسين جي المهم ظهرت وسرت غرفتي مره ثانية عشان احط شيلتي السوداء وظهرت بنزل لهم
مازن : فديت الذبابة اللي يات يلست على خشمي خلتني انش عشان جي نشيت مفزوع وظهرت من الغرفة وتلاقيت باحلى ويه في الكون ريموه كانت توها بتنزل من الدري وانا فتحت باب غرفتي زجرت عليها الريم
الريم : وقفت مكاني قلت له لبية؟؟
مازن : عاد يوم قالت ها الكلمة يبست مكاني فديتها ما احلا منطوقها قلت لها اتصلت عليج ليش ما رديتي
الريم : ابتسمت له وسويت حركة بأيدي ما اعرف حابة اقهرة اونه قالي اسمحي لي ارمس عقب سار عني يوم كان عندنا في البيت
مازن : قربت منها وقلت لها نزين على وين نازله
الريم : عمتي ومزنه وخلود تحت في المطبخ بسير عندهم
مازن : طالعت على الساعة حلو الساعة 12 يعني ما فيه حد في البيت واللى موجودين في المطبخ طبعا هذا قلته بصوت عالي وانا اطالع على الريم اللي كانت تطالع علي ويم شفت عيونها وهي متخرعة نجعت ضحك عليها
الريم : مشيت خطوه على اساس اني انزل
مازن : لا طبعا ما راح تروحين وقفت قدامها
الريم : بلاك ؟
مازن : بلاني ؟؟ تسألين بلاني ؟؟ بلاني اني وتميت ساكت عقب قلت لها وهي تطالع علي اموت فيج
الريم : غمضت عيوني ما اقدر اخلى عيوني مفتوحة وتطالع عيونه وهو يقول جي وخليته ونزلت بسرعة
مازن : يلست على الدرج وانا ابتسم كيف ظهرت ها الكلمة مني ما اعرف بس خلاص ما اقدرا كتمها اكثر من جي المهم دخلت غرفتي مره ثانية لاني اعرف لو الريم شافتني الحين بتستحي مني
الريم : خيبة ما مت من الخوف وهو يقولها لو انه صراحة وهو يقولها حسيت فيها فديته ..المهم احس اني ملخبطة حتى اني اوني ياية عشان اساعدهم يلست عدال مزنه ولا رمست ولا قلت شئ
مزنه : انسة اشوف الشيلة اللي فوقج كأنها مالتي
الريم : هيه تراني ما حصلت شيله كبيرة تناسب ملابسي غير من عندج
مزنه : فديتج امزح معاج المهم ونشيت وصبيت كوبين عصير لي ولريم وامي طلبت مني اصب لها ماي
وبعدشوي وصل ابوي طلعت اسلم عليه وعلي طبعا وصله وسار البيت وانا ما شفته المهم دخلت ايلس معاه وتمينا نسولف عقب يات عموه .
ام مازن : إلا يا بو علي اليوم مازن سار عند عمته وقالت له لا تأجل عرسك عشان وفاه حسين الله يرحمة وياني مازن وقالي ها الكلام وبصراحة انا اشوف ان فعلا ما لازم نأخر زواج العيال
ابو علي : انا بعد راي من رايج خلاص كاهي العروس موجودة تخبروها جم تبي مده تتجهز وسوا العرس
مزنه : ابتسمت لريم اللي صار ويها احمر من الخجل وقلت يسدها شهر تتجهز فيه شو تبي بعد اكثر من شهر
ام مازن : عيل خلاص بشوف انا ام علي وبرتب الموضوع ويدفع مازن مهرها عشان تتزهب ويسون الملجة والعرس في نفس اليوم
الريم : لا ما اقدر ايلس اكثر من جي خاصة بعد ما نفتح باب الميلس ودخل الاستاذ مازن نشيت وسحبت مزنه من ايدها نسير غرفتها
مازن : ابتسمت ادري انها مستحية مني وما كنت ادري انهم يرمسون عن عرسي
في بيت ابو طارق
يا اهل عوض وخطبوا ثريا لعوض وحددوا موعد الملجة والعرس بيكون عقب الملجة بسنه لان عوض بيته بعده ما جاهر وما فيه مجال يسكن عند اهله عشان جي بيملج الحين وعقب سنه بيعرسون .
بعد شهرين واسبوع بالتمام تم الترتيب لزواج مازن والريم بعد ما دفع مازن مهر الريم وخلصت تجهيزاتها وكانت تتجنب تشوف مازن اللى خلاص شكلة مب قادر يخفي حبه لريم اكثر من جي ..كانت فرحة الكل كبيرة فيهم ..
قيس : احلى شئ ان موعد عرس مازن والريم بعد امتحانات اخر السنه يعنى لا احاتي امتحانات ولا دراسة لا وبعد جان يبوني اسافر معاهم شهر العسل ما عندي مانع هههههههه
مزنه : انشغالي مع الريم في تجهيزات عرسها خلتني شوي اتناسى حزني على حسين اللي ما نسيته لكن على الاقل اتنسى حزني عليه ..
خلود : البيبي اللي في حشاي واللي يكبر يوم عن يوم يكبر احلامي معاه باني اشوفه قدام عيني وتمنيت انه يكون ولد واسميه على اخوي .
فيصل : انتظار حدث ولادة خلود كان هو حلمي خاصة اني خلصت طبعا جامعة والحين انا متدرب في وزارة الدفاع وبديت بصراحة اجهز لها البيبي مع كل راتب اخذه ..
رغد : بعد ملجة اخوي عوض على ثريا زرتهم كم مره وهو ساير يزور خطيبته واللي ما تعرفونه اني التقيت في طارق اخو ثريا كم مره وكنت احس بشئ غريب
طارق : رغد الوحيدة اللي قدرت تشيل تفكيري عن حور ومتلكت كل تفكيري وقلبي
حور : حبي لفهد احلى شئ صار لي في حياتي وولادتي لمايد هو تتويج ها الزواج ومب معني ان فهد مات يعني قلبي توقف عن حبه بالعكس كل يوم احبه اكثر واكثر وانا اشوف مايد يكبر يوم عن يوم ومب يعني كل وحدة مات ريلها انها تفكر في الزواج لا انا بظل طول عمري وفيه لفهد وان شاء الله ربي راح يجمعني فيه في جنه الخلد وان شاء الله ما راح اقصر في تريبة مايد عشان يقولون هذا ولد فهد والنعم فيه ولانه امانة خلاها فهد عندي..
عزه : خبر ارتباط طارق برغد قهرني وخلاني شوي افكر في الحياة ان الحياة مب بس دراسة وتفوق دراسي الحياة فيها اشياء ثانية لازم الانسان يكون سلس في تعاملة مع الاخيرين يتعامل معاهم بطيب وان شاء الله انا بغير اسلوبي في الحياة كاملة ومع تفوقي الدراسي راح احاول اتفوق في اشياء ثانية اولها اني راح احاول احب الناس عشان يحبوني وما راح اطالع على الناس بعين عالية ..
بدرية : بعد انتهاء اجازه مايد وبدا الكورس اليديد سافرت معاه ومع كل اشراقة شمس كنت احس ان حبي لمايد يكبر يوم عن يوم هذا مب يعني ان انا ومايد ما نتهاوش لا والله الهواشات يا مكثرها بينا لكن الهواشات بهرات الحياة الزوجيه واحيانا دليل على غيره مايد علي وغيرتي عليه .. بالنسبة للعيال نحن مأجلينهم الحين وبيني وبينكم ما ابي انشغل باي شخص غير مايد الحين وعقب ما يخلص مايد دراستة ان شاء الله نفكر في الموضوع ..
مايد : وجود بدرية معاي وانا ادرس مب مثل ما توقع الكل اني ما راح اهتم بدراستي بالعكس وجودها معاي عطاني دافع اكبر اني اتفوق في دراستي واحصل على درجات اكبر واكبر
مازن : بعد زواجي من الريم اكتشفت ان سري اللي كنت اعتقد ان ما حد يعرفة اكتشفت ان الريم حتى كانت تعرفة واحلى اكتشاف عرفته ان الريم كانت تحبني موت مثل ما كنت احبها بس اللي قاهرني ان بعد زواجنا للحين الريم تستحي مني وايد
الريم : لاني اعرف مازن يموت فيني فانا مب مقصرة في الدلع عليه وبصراحة كل ما اتذكر انه كان بيكون لغيري عشان حضرته ما اعترف لي بحبه انقهر منه وحاول اعاقبة على ها الشئ بطريقتي الخاصة ..لو انه يكسر خاطري بس ريايل ما تي غير بالعين الحمراء وبصراحة اكثر انتظر اللحظة اللى ايب من مازن عيال وخاطري كل عيالي اولاد ويطلعون يشبهون مازن بعد لا واسميهم مازن 1 مازن 2 مازن 3 وهكذا ههههههههه لا تطالعون جي هذا يسمونه جنون الحب مب البقر ..
علي : راح اعترف لكم اخيرا بسر اني من اول ما شفت مزنه بنت عمتي وهي داخلة بالي ولكن انا من النوع اللي يخفي مشاعرة ومتأكد ما حد منكم توقع ان في خاطري شئ لمزنه طبعا انا اعرف ارتباط مزنه بحسين عشان جي احترمت ها الارتباط وحترمت وفائها له بعد موته لكن الحي ابقي من الميت وانا ما ابيها تظل طول عمرها جي عشان جي بديت اوضح واصرح عن ها الحب وان شاء الله في المستقبل القريب احس ان فيه تجاوب من مزنه معاي وها الشئ بعد يحسة كل شخص يحب ..
ام مازن : حياتي احسها بدت تستقر اكثر مع زواج العيال وجمعتهم حوالي تفرحني وايد
ابو مازن : يقولون راعي الطبع ما يتوب عن طبعة هذا انا كل ما اقول اني بتفرغ للعيال إلا ان احس ان الشغل ياخذني منهم اكثر ..
ابو علي : رغم انه كان حلمي اني اعيش مع عيالي في بيت واحد إلا ان هذا حكم القدر ولكن وجودي مع الريم في نفس البيت وزيارة علي اليومية لي تريحني والحمد لله على كل حال
ام علي : بعد زواج الريم حسيت بفراغ لكن بعد ما حسيت ان علي يبي يعرس وعرفت من اللي قلبه اختار استانست مزنه بنت حلال وان شاء الله انا بساعدة في الزواجه وان شاء الله اشوف عيالهم يتنططون قدامي
..........
اخيرا اسمحوا لي اقول ..
الاقدار دائما هي من تلعب دورها في حياتنا لكن الانسان ما عليه غير انه يسعى ليصل لتحقيق احلامة في هذه الحياة ويترك الباقي على المولي عز وجل خاصة ان كلنا يعرف ان الانسان مخير وليس مسير ..
وقلوبنا هي عضو صغير في اجسادنا لا نستطيع ان نتجاهلها فهو عضو مهم كالعقل فقلوبنا هذه الاعضاء الصغيرة هي ما تجعلنا نسعى في هذه الحياة مهما كان الطريق صعب
هذا ما حصل مع بطل قصتنا حاول ان يتجاهل قلبة ويحاول ان يسعد الاخرين إلا ان في النهاية انتظر قلبه وتوج فتاه احلامة في واقع الحياة واصبحت زوجته ...
اتمني لكل المحبين التوفيق والسعى لنيل مبتغاهم وان لا يضعون ايدهم على خدودهم وينتظرون من يسعى بدل عنهم ..
مع خالص شكري لكل من تابع القصة من امام وخلف الكواليس ...
اختكم طرفة
النهـــــــــــــــــــــــــــاية
منقووووووووووووووووووووووووووووووووووووووووووووووو ووووووووول
|