في السوق
مزنه : سرت محل الورد وخذيت لهم الهدايا اللي ماخذتنهم حج حريم اخواني خلود وثريا وقلت لهم يغلفوهم لي بطريقة حلوه في صناديق انا اخترتها وطبعا بيجهزون قبل العرس بيوم قلت بخذهم وبحطهم لكل وحدة في غرفتها كهدية من اخت المعرس ...
في بيت أم علي
الريم : بعد ما رجعت من الجامعة قلت لعلي اني اريده يوديني عند ربيعتي
علي : منو من ربيعاتج يعني اقصد حلوه مثلج يالله عاد شوفوا لي عروس
الريم : فديتك اكيد بدور لك عروس بس هاي اللي بسير عندها مالجة على ولد عمتك
علي : منو ؟؟
الريم : مازن (قلتها بغصة)
علي : نزين غناتي شوفي لنا وحده ثانية من ربيعاتج تكون حلوه مثلج
الريم : ما راح تحصل ههههههههه
علي : حاولي بس انتي
الريم : نزين يالله خليني اتجهز عشان عقب بعد بسير بيت عموه عشان اشوف ابويه فديته تولهت عليه
علي : صح ابوية اتصل علي قالي انه يباني انا وياج واماية باجر
الريم : نزين خير لين باجر بس اليوم بسير اشوفه تولهت عليه
علي : نزين يالله خلصي اترياج انا في السيارة
الريم : تجهزت وخذيت لثريا الهدية اللي اشتريتها لها لعرسها كانت عبارة عن طقم ذهب ابيض اماية عطتني بيزاته عشان اشتري لثريا ولخلود واحد مثله بالضبط .
في بيت ابو طارق
ثريا : طبعا اتصالي كان مب لمازن مثل ما كانت بدرية تعتقد كنت متصلة على الريم ما ادري ليش حابة اشوفها ويوم يات رحبت فيها وايد طبعا انتو تعرفون اني اول شخص تعرفت عليه من بيتهم اهل مازن غير خالتي ام مازن هي الريم وحسيت انها قريبة من القلب حسيت ان داخلها حزن كبير وكنت مقررة اني اهتم فيها واعرف سبب الحزن اللي في عيونها دائما باين لكن الفلوبي شرح كل شئ طبعا مازن تكلم عن قضية ابو الريم وانها عايشة معاهم من وهي صغيرة حتى يوم رجعت امها وسارت تعيش معاها كل هذا نحن ما كنا نعرفة لا انا ولا اهلى
الريم : يلست معاها واكيد بداية السيرة اسئله عادية عن الحال والاحوال وعقب عطيتها الهدية اللي شتريتها لها
ثريا : شو هاي؟
الريم : هدية عرسج اعرف انها مب من مقامج لكن اتمني تقبليها مني
ثريا : عرسي؟؟
الريم : هيه عرسج بلاج ثريا شو فيج
ثريا : انا ما اريد اتزوج مازن
الريم : شو تقولين انتي
ثريا : ما اريد اتزوج مازن وابيج تساعديني
الريم : كيف اساعدج ما اقدر اقصد ما اعرف بعدين ليش ما تبين مازن
ثريا : لان مازن ما يحبني وما خطبني إلا ليسعد امه عشان ينسيها وفاه هاني
الريم : شو تقولين انتي (صح يمكن انا احب مازن وكنت مقهوره من زواجه من ثريا لكن بعد اللى تقوله ثريا ما يدخل العقل وتكنسل الزواج اللي ما باقي عليه غير كم يوم؟؟ لا وتباني اساعدها )
ثريا : يعني ما سألتيني مازن يحب منو
الريم : لانه ما يهمني يحب منو اللي يهمني اللي تقوليه وان مب باقي على زواجكم إلا ايام والاهم من جي انتي سألي نفسج انتي خذيتي مازن عن اقتناع وحب وله بس جي ؟؟؟
ثريا : حطيت راسي على حضن الريم سبحان الله هي اللي يحبها مازن وهي اللى مرتاحة على حضنها قلت لها انا حبيت مازن ما ادري هل هو حب وله اعجاب بس اكيد اني كنت مقتنعة فيه بس صدقيني اللي يحب شخص يتمني له الخير وعشان انا احب مازن لازم انسحب من حياته
الريم : هذا ضعف اللي يحب لازم يدافع عن حبه .
ثريا : بس مازن يحب غيري وقلبه ملك لها هي وبس حتى خطوبته مني ما خلاه ينساها
الريم : نزين ممكن اسأل سؤال ؟
ثريا : تفضلى
الريم : انتي كيف عرفتي ها الكلام كله مازن قالج؟؟
ثريا : لا
الريم : نزين اللي وصلج الكلام يمكن يبي يطيح بينج وبينه
ثريا : اللي وصلي الموضوع مب الكلام غالي علي وايد وبعدين اللي وصلني اعتراف مازن بنفسة
الريم : احس ان بيغمي علي مب فاهمة شئ لدرجة اني احس نفسي في حلم صج انا الحين كل اللي افكر فيه ثريا والغريبة ان فضولي ما قتلني اني اعرف منو اللي يحبها مازن يمكن لأني كان صعب علي اني اتقبل ان مازن يعرس يمكن عشان ثريا اعرفها واحبها واني اعرف بعد انه يحب وحده ثانية مب ثريا كان وقعها علي عادي او يمكن مب عادي بس لاني الحين ما افكر في نفسي ولا في قلبي كل اللي افكر فيه ها المسكينة واللي يشغل بالي الحين كيف عرفت ثريا كل ها الامور ومنو وصله لها ؟؟ عشان جي سألتها وقلت لها ثريا ممكن تهدين وارمسج بعقل شوي اول شئ خبريني منو وصل لج ها الكلام عشان على اساسة احلل الموضوع معاج
ثريا : طلعت الفلوبي اللي كان في الكمبيوتر عندي وقلت لها هذا
الريم : هذا اللي قالج ؟؟؟
ثريا : لا هذا اللي فيه كل الحقيقة واللي يابة لي طارق من كمبيوتر مازن في اليوم اللي طلب منه قيس انه يصلح كمبيوتر مازن وهو مسافر
الريم : تذكرت هيه هذاك اليوم لقيت طارق وقيس ظاهرين من غرفة مازن اثاري قيس كان منجع في كمبيوتر مازن (طالع في شوافكر )
ثريا : خذيه وراح تعرفين الحقيقة
الريم : حسيت ان ها الفلوبي اللي في ايد ثريا مثل الجمرة اللي بتحرق قلبي واكون غبية لو شليته قلت لها ما لي دعوه يا ثريا ما اريد اعرف أي شئ يمكن هذا يكون سر من اسرار مازن وما يبي حد يعرفة وانتي عرفتيه طبيعي لانج خطيبته بس انا بأي صفة بعرف اللي فيه ؟؟
ثريا : وانا اقولج ان الفلوبي هذا يهمج انتي بعد
الريم : يهمني؟؟ ما اعتقد
ثريا : شوفي خذيه وطالعي اللي فيه وعقب بنرمس
الريم : بشله بشرط واحد انج ما تسوين أي شئ لحد ما تقولي لي اوكى؟؟
ثريا : اوعدج وابتسمت لها ونزلت
الريم : وانا نازله مع ثريا تلاقيت وللمرة الثانية مع اخوها طارق اللي نزل راسة وهو يطالع علي بصراحة ها الشاب غريب مره يطالع ولا يهمة حد ومر ينزل راسة المهم هاي المره حطيت غشواتي بسرعة ونزلت
ام طارق : وين يا بنتي ما يلستي
الريم : معليه خالوه اليايات اكثر من الرايحات (وكنت بقول خلاص نحن نسايب لكن رديتها في اللحظة الاخيرة لاني ما اعرف شو بتسوي ثريا لو كان الكلام اللي تقوله صح)
ام طارق : سلمي على هلج
الريم : يوصل يالله في امان الله وركبت السيارة مع علي اخوي اللي كان باين عليه انه مستانس وحالته حاله
علي : هاه نسير عند ابويه
الريم : ما ادري والله شو اقولك
علي : بلاج انتي
الريم : بلاك انت اكيد بسير اشوف ابويه مشتاقة له (بصراحة قررت انسى كل اللي صار بيت ثريا وافكر في ابويه وبصراحة انا قررت اني اكسر الفلوبي هاه خلاص ما اتحمل أي صدمة ثانية عن مازن) أو يمكن خايفة ان يكون كل اللي انا فيه حلم ما ابي افكر للحظة ان مازن وثريا راح ينفصلون ويكون لي هناك امل معاه لكن انه يحب وحده ثانية غير ثريا يا تري منو هاي؟؟ اه يا قلبي خلاص مب قادرة اتحمل
علي : وصلنا بيت عموه بس اشوف الريم ما نزلت وهي سرحانه وقلت لها الشيخة وصلنا وله تبيني افتح لج الباب؟
الريم : ما سمعت علي لاني كنت افكر في كل اللي صار وراح يصير واحاول اتوقع شو بيصير بس مب قادرة استوعب الموضوع
علي : الشيخة ريم نزلنا بلاج يالسة؟
الريم : بلاك حشرتنا
علي : اقولج وصلنا يالله نزلنا
الريم : نزين نزين وعدلت شيلتي ونزلنا طبعا ابوية يالس في الميلس عشان جي بغيت ادخل الميلس
علي : قال لحظة يمكن حد هناك ما فينا على فشله للمره الثانية
الريم : اوكى انا بدخل عند مزنوه داخل ولو ما حد هناك قول لقيس يزجرني
علي : ان شاء الله ودخلت الميلس واللي احصله ان مزنه يالسة عند ابوية وما فيه حد ثاني هنا تحمحمت عشان ما اخلي بنت عمتي تنحرج وتعدل شيلتها اللي كانت شبة طايحة من على راسها .
ابو علي : هلا والله بعلاوي اقرب ولدي
مزنه : عدلت شيلتية ونشيت هلا علي
علي : هلا مزنه شحالج؟
مزنه : بخير وسهالة يسرك حالي
علي : تميت واقف اتريا مزنه توخر عشان اروح ايلس يم ابوية .
مزنه : انتبهت اخيرا اني لازم اوخر شو موقفني خاصة ان علي بعده واقف واكيد كان يبي ييلس يم ابوه وقلت له تفضل وكنت توني بظهر
علي : مزنه لو ما عليج امارة زجري الريم من داخل
مزنه : عيوني اللي كانت يمكن داخلة شوي على داخل في ويهي احسها انها ظهرت على خاري بلاه هذا شو ازجر الريم الريم مب هنا قلت له بكل عفوية
علي : ههههههههههه بلاج نزين ظهرتي عيونج جي لا الريم داخل ياية وياي وانا قلت لها بشوف اذا ما فيه ريايل بزجرج
مزنه : هيه (وحسيت نفسي غبية بلاني صج ان حب حسين خلاني مب بعقل) ودخلت تميت ادور على الريم وقلت اكيد انها في غرفتي طلعت ما لقيتها قلت يمكن في غرفتها لكن بعد ما لقيتها ونزلت مره ثانية تحت وسألت الخدامة عنها قالت لي انا لريم سارت صوب قسم مازن اللي مجهز لعرسة وسرت لها هناك
الريم : كنت يالسة على الشبرية وطالع المكان معقوله ها المكان بيشهد وجود مازن وثريا مع بعض؟؟ وله فيه شئ بيصير يخرب ها الجمعة ؟؟ ومنو هاي اللي يحبها مازن واللي اكيد بتكون في هالمكان معاه لو نفذت ثريا رمستها ونفصلت عن مازن اه يا قلبي لمتي راح تتحمل وغمضت عيوني وقلبي مليان غصه وحسرة
مزنه : انتي هنا وانا ادور عليج؟؟
الريم : لفيت ويهي بسرعة عشان ما تشوف تعابير ويهي اللي اكيد مبينه كل اللي في قلبي من ضيق وبسرعة ابتسمت وقلت لها هيه اطالع ذوق ولد عمتي في تجهيز قسمة خلاص ما باقي شئ وبتنوره ثريا فديتها(تعمدت اقول جي عشان اشوف مزنه عندها خبر باللى تقوله ثريا وله لا)
مزنه : اولا هذا ذوقي انا واماية ولد عمتج ما كلف نفسة في أي شئ ها الولد شكله كأن حد غاصبنه على ها الزواجه ثانيا اكيد ذوقي حلو ثالثا ربي يوفقة مع ثريا صج تستاهل
الريم : اه يا قلبي يا تري ادعي لك يا مازن تتوفق مع ثريا وله شو اسوي مب عارفة عقب قلت لها هاه ابويه حد معاه؟؟
مزنه : او كنتي بتنسيني ما فيه حد عند خالي قمي نسير هناك بس قبل تعالي ارويج قسم فيصل بصراحة عاد فيصل عليه ذوق رهيب تعالي شوفي الديكورات اللي اختارها بدون غرفة النوم لانها هي هدية من اماية
الريم : يالله وسرنا وطالعنا قسم فيصل وخلود بصراحة جنه واول ما تدخله تحس ان فعلا فيصل حط كل شئ من خاطر ربي يوفق خلود وفيصل يستاهلون
مزنه : امين ويرزقج ولد الحلال اللي يستاهلج يا الريم
الريم : طالعت عليها قلت لها مب وقته قمي سرينا نشوف ابويه وفي الطريق قلت لها عيل وين عموه؟؟
مزنه : سايرة عبدالصمد القرشي عشان العطور والدخون للعرس
الريم : هيه وصلنا الميلس ويلست يم ابوية بس عقلي ابدا مب وياه .. ويوم دخل مازن طالعت عليه وكأني اشوفه لأول مرة في حياتي يلست اطالع تقاسيم ويهه حتى اني نسيت كل الموجودين وقلت في خاطري يا تري يا الفلوبي اللي في شنطتي الحين شو يحمل في داخلة من اعترفات مازن
مازن : ما كنت منتبه لريم وهي تطالعني لاني كنت مشغول بالرمسة مع علي
علي : هاه المعرس شو مستعد للعرس ؟؟
الريم : ما انتظرت جواب مازن على علي ونشيت وقلت لعلي يالله نسير البيت
ابو علي : بلاج يا بنيتي ما شبعت منكم يلسوا معاي وعمتج بعد تأخرت وايد حشا هذا مب عطر ودخون للعرس
الريم : سامحني يا بوية بس انا تعبانه وحاسة مب قادرة افتح عيوني من التعب
مزنه : توني داخلة ويايبة معاي صنية فيها عصير بس اشوف الكل ناش وقلت لهم وين ؟؟
الريم : كنت مشغوله ألبس نقابي واشيل شنطتي واسلم على ابوية عشان جي علي هو اللى رد على مزنه
علي : بنسير البيت
مازن : طلعت انا وعلي لين السيارة .
مزنه : انا بعد سرت مع الريم لين السيارة وركبت وطبعا وصيتها تسلم على امها وقلت لها يوم يوصل قيس وبيعرف انج يتي وما شافج بيحشرنا
الريم : معليه بشوفه باجر ان شاء الله
مزنه : هيه اونه خالي يبانا باجر ما ادري شو عنده وانا باجر عندي موعد عند الصالون عشان اسوي بروفة المكياج والتسريحة
الريم : يالله سيري لها من وقت عشان تكوني موجودة في البيت يوم نحن نوصل
مزنه : وانتي وين بتسوين مكياج وتسريحتج
الريم : بعدني ما اعرف
مزنه : نزين جان تبين بحجز لج عندي في نفس الصالون
الريم : ما ادري (وقلت لعلي يالله علي تأخرنا)
علي : يالله حشرتينا تراج يالله من رخصتك مازن
مازن : الله يحفظكم
في بيت ابو مايد
عوض : ما ادري بلاني ها الايام كله يالس في البيت ومالي خلق اطلع مثل اول
رغد : هاه بو الشباب اشوفك يالس مب ظاهر شرات عوايدك
عوض : ما ادري بلاني
رغد : هاي بوادر حب يا خوي
عوض : ايه بنية شو ها الرمسة؟؟ اصطلبي احسن لج وله بصطار على ويهك اشوف عطيناج ويه شو حب ما حب انتي بعدج صغيرة على ها الرمسة
رغد : بسم الله خرعتني بلاك احتشرت حشا امزح وياك وله انت وين والحب وين اصلا الحب هايج المره يوم شفته قال انه ما بيخطف عندك
عوض : اقول رغدوه تراني ما فيني بارض لج ممكن توخرين عني
رغد : نزين بس ما قلت لي تبي احط لك ام كلثوم وله احسن عبدالكريم عبدالقادر هههههههههه
عوض : رغد لو ما وخرتني من ويهي الحين بصفعج تراه
رغد : مشيت لين وصلت اول الدرج وعقب قلت له والله العظيم انك تحب عيل ودلعت له لساني وركضت غرفتي لاني اعرفة بيصفعني من خاطره ههههههههه
عوض : بلاها هاي الحمد لله والشكر عقب قلت بلاني الحين خوفي كلامها صح هاي الخبلة احسن اني انش اظهر حشا ما فينا على حب
ام مايد : بسم الله عليك ولدي بلاك ترمس روحك؟؟
عوض : ما شئ الغالية ويلست يم اماية وقلت لها والله شكلي اصطبت ..
ام مايد : بسم الله عليك يا ولدي وتمت تقرأ عليه المعوذات
عوض : صج من خاطر مت ضحك على اماية وقلت لها مب مصطاب من جان لا تخافي مصطاب من انس
ام مايد : تميت اتهيس ولدي شو فيه محموم
عوض : بلاج الغالية مب محموم تراني انا بخير جسمي لكن قلبي صطاب من غرشوبه العين
ام مايد : ويل حالي عليك يا ولدي
عوض : لا اماية شكل ويها وهي خايفة علي يضحك قلت لها بظهر انا عند يعقوب
ام مايد : هيه ولدي سير عند يعقوب عن ها الخريط اللي تقوله
عوض : نزين الغالية تامرين علي شئ عيل؟؟
ام مايد : سلامتك يا ولدي
رغد : نزلت بعد ما تأكدت ان عوض ظهر من البيت بس حصلت اماية ترمس عمرها قلت لها بسم الله عليج اماية بلاج ترمسين عمرج؟؟
ام مايد : وحد عنده عيال شراتكم وما يتخبل ؟؟ من شوي يت على خوج لقيته يرمس عمره يوم سألته قالي مصطاب تميت اقرأ عليه قالي مب من جان من انس قالي من غرشوبه العين
رغد : هيه انا ادري فيه وقلت له بس هو بغا يضربني وله انا متأكدة ان الحالة اللي فيها عوض حالة حب
ام مايد : جب انتي شو ها الرمسة يالله سيري غرفتج لا اضربج
رغد : انا ما اعرف متي بتكونون ديمقراطين وتخلوني اعبر عن راي بحرية
ام مايد : سري عني لا اضربج
رغد : نزين سايرة تراكم ما تحبون اللي يقول الصج ومديت بوزي عشره امتار قدامي ههههه اعتقد انه وصل شاطئ الجميرا وسرت ارمس ربيعتي على الاقل اتمصخر عليها وما تزعل ولا تهاوش
في العين
في بيت ام علي
علي : اماية فديتج وحبيتها على ايدها
ام علي : هلا ولدي
علي : اماية ابويه اوين باجر يبانا نتجمع بعد صلاة العشاء في بيت عمتي
ام علي : وانا شو لي سير انت واختك
علي : لا ابويه قالي يباج انتي بعد تكوني موجودة
ام علي : يصير خير لين باجر
الريم : انا سلمت على اماية وعقب ترخصت عنهم اسير غرفتي
ام علي : بلاها اختك ضايقة لتكون هاوشتها
علي : انا اهاوش نوارة البيت لا والله بس هي ما ادري بلاها انقلب حالها
ام علي : بطلع اشوفها
علي : لا اماية خليها بروحها تعرفين انها بعد شوي بتغير مودها
ام علي : على رايك نزين احط لك عشى ؟؟
علي : يا ليت اماية احس اني يوعان بس بتتعشين معاي
ام علي : نزين يالله عيل بحط لك العشى
علي : عيل انا بفصخ كندورتي وبيج
ام علي : اوكى
في حجرة الريم
فتحت شنطتي وظهرت الفلوبي وشغلت الكمبيوتر وقبل لا افسخ عباتي ولا شيلتي يلست على الكمبيوتر يمكن قبل كنت ما ابي اعرف شو في الفلوبي بس الحين احس ان فضولي بيقتلني فتحته وأحس اني من الربكة مب عارفة اشغله شو ياني بسم الله شوي وفتح عندي الفلوبي طالعت العنوان (إليك) حسيت بغصة في قلبي وقلت بتراجع ما بطالع شو فيه ما ابي انصدم لكن ها الشور تغير بعد ما فتحت الملف وطاحت عيني على اول الكلام اللي في الصفحة الاولي وهو تقريبا رمسة عن مازن نفسه يعني تاريخ ميلادة هوايته يعني من ها الكلام اندمت في الكلام وبديت اتعرف على مازن من خلال ما كان كاتب وكأني اعرفة لأول مره طبعا في معلومات كنت اعرفها بحكم اني كنت عايشة معاهم لكن ان مازن يكتب شعر وخواطر ها الشئ ما كنت اعرفة وانا كنت أقرا قلت يا ربي أي اعترف انه يحب وحده غير ثريا الكلام ما هو إلا تعريف عن مازن وقلت اكيد مقلب ها الشئ لكن لمه اكتشفت ان الملف مب صفحة وحده اكثر نزلت لصفحة اللي عقبها واللى شدني اسمي الموجود الريم ...
الريم : ها المره مب كلمة قريتها على الكمبيوتر في الملف اللي في الفلوبي هذا علي يزجر علي
علي : الريم ..
الريم : ما رديت عليه وحسيت ان عيوني ما تشوف أي شئ قدامها عقلي في مناداه علي علي وفي اني ابي اقرا شو اللي عقب ؟؟
علي : دقيت الباب لاني قلت في نفسي احس اقول لريم بعد تنزل تتعشى معي انا وماية وعقب ما دقيت الباب وما سمعت جواب قلت يمكن رقدت فعلا وخليتها وتوني بسير لكن ليتات الغرفة منورة يعني الريم بعدها ما راقده دقيت الباب ودخلت واستغربت اني اشوف الريم يالسة قدام الكمبيوتر قلت لها مب راقده؟؟
الريم : نشيت وقلت له لا بعدني بس اسوي شغله على الكمبيوتر وعقب برقد
علي : قلت بتتعشى معانا انا وامي
الريم : لا ما اريد اكل
علي : نزين نزلي يلسي معانا ما كنت حاب انها ترقد وهي ضايقة
الريم : لا برقد خليني علي
علي : على راحتج الغالية وظهرت وقفلت الباب وراي
الريم : رديت ايلس على الكرسي قدام الكمبيوتر وبديت اقرا الصفحة الثانية فيها تعريف عني انا وتاريخ ميلادي وهواياتي ومواقف حصلت لي في طفولتي وكلها مع مازن .. حتى اليوم اللي رسبت فيه في مادة الرياضيات وانا صف ثاني اعدادي ولمه كنت ابجي ما ابي عمي بومازن يعرف وخبرت مازن ومزنه بجيت يوم شفت ها الموقف الثاني لمه حرمتني عمتي من المصروف يوم ضربت بنت يرانا لانها قالت لي ان ابوي تاجر مخدرات وان مازن عطاني مصروفة ..
الصفحة اللي عقبها رسالة رقم 1 قريتها وقريت الثانية والعاشرة والمائة والدموع تنزل من عيوني مع كل كلمة سجلها مازن على الكمبيوتر وما قدر يقولها لي يحبني مازن يحبني ها الكلمة اللي قلتها وقدرت ارددها ودموعي بدت اكثر تنزل وبعد اكثر دموع احسها غسلت كل الحزن اللي حسيته من اول يوم لي في الحياة وانا كنت احس فيها غريبة ومنبوذة اثاري فيه قلب كان يحتضن حبي غريبة كيف ما حسيت فيه اعتقد انه كافي لي مسكت مبايلى وقفلته لاني لو خليته مفتوح بتصل ادري في نفسي ... بس ما قدرت امنع ايدي تمتد لصندوق صغير كنت محتفظة فيه بأشياء غالية علي واكيد صورة مازن من ضمنهم احضنها ابوسها شو اسوي مب عارفة احس اني ابي اطير ابي اقول للعالم ان مازن يحبني وان احساسي فيه ما كان غلط وحبي له كان في محلة
لحظة وتذكرت ثريا ودموعها مازن خطيبها وهي تبي تلغي ها الخطبة وما باقي على عرسهم غير ايام وعرس فيصل المربوط فيه احس ان دموعي هاي المره تنزل بعد بس دموع الخوف من ان القدر يرجع ويحكم بفراقنا ولحظة حسيت اني انانية وما فكرت في حد غير مازن اللي يحبني واني لازم احافظ على ها الحب والحل مب اني اضحي فيه عشان زواجه راح تفشل الحل اني احتفظ بمازن لي انا وبس عشان اسعده بوجودي في حياته .. (طبعا كل هذي افكار راودتني في حذتها)
في بيت ابو طارق
ثريا : أنتظرت اتصال من الريم اكيد بعد ما تقرأ اللي في الفلوبي لكن انتظاري طال وانا لازم احسم امري عشان جي ما تريت وايد واتصلت عليها انا بروحي لكن تلفونها المغلق هو اللي خلاني حايرة يا ربي انا شو سويت أكيد انها ما راح تعرف ترد علي والحل لازم يجي من صوبي يلست يمكن ربع ساعة وانا واقفة على البلكونه وعقب خلاص القرار في راسي ..
نزلت وحصلت ابوي وأمي وطارق يالسين تحت يشربون جاي ويسولفون وقفت على الدري ومن بعيد يمكن بيني وبينهم 5 متر قلت وبصوت ما اعرف كيف طلع مني ابوي انا ما اريد اتزوج
ام طارق : شو تقولين انتي ؟؟
طارق : وقفت ولا رمست باي كلمة بس تميت ساكت
ابو طارق : كنت عارف ان بنتي بتقرر ها القرار اعرف ان عزه نفسها تمنعها ترتبط بشخص قلبه ملك لوحده ثانية وطالعت بنتي بنظره فخر واعجاب من قرارها اللى ما فاجأني على كثر ما كنت متأكد من حبها لمازن إلا ان كرامتها فوق أي اعتبار وهاي بنتي اللي ربيتها سرت صوبها ولويت عليها وقلت لها تأكدي ما راح يصير إلا اللى انتي تبينه
ام طارق : انتو شو تقولون؟؟ الحين تقولين ما تبين تعرسين بعد ما صار باقي كم يوم على العرس؟؟
أبو طارق : افضل انها تقول الحين ما تبيه ولا انها تيج مطلقة
ام طارق : مطلقة ليش شو السالفة ؟؟
أبو طارق : لا سالفة ولا شئ بس بنتج ما تبي تعرس وخلاص
ثريا : ما انكر اني تفاجأت من رمسة ابوي اللي تدل على انه يعرف الموضوع عقب طالعت على طارق ويوم شفته نزل راسه عرفت انه هو اللي قال لابوي عشان جي طلعت غرفتي مره ثانية وخليت وراي اكيد مليار سؤال
ام طارق : لا ثريا مب بعقلها شو ما تبي تعرس اكيد تمزح شو نقول لام مازن ؟؟ فهموني قولوا لي شو السالفة
طارق : انا بعد ابي انسحب من المكان احس بخنقة بس مب لغرفتي شليت سويج سيارتي وظهرت
ابو طارق : فهم ام طارق الموضوع
ام طارق : شو تقول انت؟؟
ابو طارق : اللي سمعتي تبين بنتج تتزوج واحد قلبه ملك لغيرها؟؟
ام طارق : نزين الحين كيف نكنسل العرس وشو عذرنا والناس شو بتقول عن بنتنا؟؟
ابو طارق : ما شئ خليني انا ارد على اهل مازن اما عن الناس يقولوا اللي يقولوه أهم شئ بنتي تكون مرتاحة وانتي خلج يمها هاي ثريا الغالية
ام طارق : والله اني متفشلة في ام مازن
أبو طارق : لا تخافي أن شاء الله علاقتنا فيهم ما تتغير وانا بحاول احل الموضوع بشكل سهل وسلس
ام طارق : الله يقدم اللي فيه الخير بس والله غامضتني ثريا
ابو طارق : يعني انا ما غامضتني لكن ربج كاتب ان موضوعها يوصل لين هنا وينتهي
أم طارق : الله يستر
في بيت ابو حسين
خلود : خلاص جهزت كل اغراضي وفيصل يا اليوم وخذ كم شنطة من اغراضي وما باقي غير الشنطة اللي باخذها معاي الفندق يالله احس بخوف من اللي ياي بس يقولون ان ها القلق عادي ربي يوفقني مع فيصل
ام حسين : اليوم شريت هدية لبنتي لعرسها وقدمتها لها صج احس انها استانست فيها
حسين : لا تحسبون اني نسيت هدية زواج اختي بس هديتي كانت عبارة عن 10.000 درهم هدية لزواجها وقلت لها اختاري على ذوقج لانكم عارفين اني ما اقدر انش ..
خلود : يالله ربي ما يحرمني من اهلى امين يا رب عقب اتصال فيصل خلاني انش من عند اهلي هو صح مفروض اني ما ارمسة عشان يشتاق لي بس ما قدرت حرام كاسر خاطري فيصل اللي بروحة حاس بقلق من الزواج هههههههه اثاري ربي جمعنا ههههه
في دبي
بدرية : انا بعد لا تنسون اجهز لعرسي واليوم كان عندي بروفا لفستان العرس اللي صممته بروحي احم تراه عندي هواية التصميم وقررت ان فستان عرسي يكون من تصميمي ..
حور : كان خاطري اشوف فستان بدرية لكن قالت بيكون مفاجأه للكل حتى انا وما انكر اني خايفة على ثريا واحاتيها عشان جي اتصلت عليها بس ما ردت علي وبصراحة ما زعلت منها بس قلت اكيد انها تفكر في الموضوع اللي هي فيه الحين حليلها ..
عزه : يالله اشكثر فرحانه اني يوم الثلاثا العصر بنسير العين وبشوف طارق فديته تولهت عليه موت وبصراحة كشختي والحنا اللي في ايدي والفستان اللي اخترته عشان طارق اتمني يشوفهم علي يا رب وفقني مع طارق
ام فهد ": والله اني مستانسة لثريا مثل ما مستانسة لبدرية بنتي (بعدهم ما يعرفون ان العرس ثريا بتكنسله)
بدرية : انا كنت احاتي ثريا حتى الفستان اللي اشتريته لعرس ثريا احس بكتئأب لمه اشوفه احس اني ما راح البسة في عرسها وانا اتصل عليها بس هي ما ترد علي
في بيت ام علي
الساعة 8 بالليل
علي : يالله اماية جهزتي ابوي يتريانا
ام علي : هيه مخلصة سير ازجر اختك ما فيني اطلع فوق
علي : ان شاء الله وطلعت انادي الريم دقيت الباب ما فتحت دقيت ما فتحت عقب حاولت افتح الباب حصلته مفتوح دخلت وحصلت الريم على شبريتها شكلها يخرع وهي راقده جي قربت صوبها ومن خوفي عليها تميت امسك ايدها واطالع نبضات قلبها اختي حيه الحمد لله بس بلاها راقده جي الريم الريم
الريم : كنت اسمع علي ينادي علي بس مب قادرة انش ارد عليه
علي : قومي نشئ صارت الساعة 8 وابوي يتريانا
الريم : مب سايرة خليني راقده
علي : اقول عن الدلع قومي نشئ
الريم : اقولك مب سايرة وتغطيت وقلبت ويهي الصوب الثاني
علي : لا والله تنكتين حضرتج قومي ما شئ وما خليتها ترقد
الريم : شو بلاك اقولك مب سايرة
علي : ابوي قالي ايبج وايب اماية
الريم : (يا ربي كيف بسير واشوف مازن ما اقدر ما اقدر) وقلت لعلي تعبانة مب قادرة
علي : بتسيرين يعني بتسيرين وعن الدلع قومي نشئ بسرعة اترياج
الريم : ما شئ حل غير الخطة 515 نشيت وخليت نفسي طايحة
علي : ميت من الزيغة على الريم وتميت ازجر عليها بس ما ترد علي
الريم (اسفة بس ما عندي حل غير جي عشان ما اسير)
علي : اماية لحقي علي الريم طاحت
ام علي : بسم الله على بنتي ويت وحصلت علي شالنها وحاطنها على الشبرية بسم الله عليج يا بنيتي
علي : لا تخافي بخير يالله حطي عباتها عليها بشغل السيارة بوديها المستشفي
الريم : (لا حول ولا قوة إلا بالله هذا اللي ما احبه لازم اتصرف)
ام علي : نزين
الريم : قلت لها مب سايرة المستشفي اماية خلوني ارتاح انا بس تعبانة ابي ارقد
ام علي : يا بنتي خلينا نشلج المستشفي نطمن عليج انتي من فترة ما عايبتني صحتج
الريم : مب سايرة ابي ارتاح هنا في البيت يمه خلوني ارقد الله يخليج
علي : شغلت السيارة ولمه شفت اماية والريم ما نزلوا طلعت اشوفهم قلت يمكن الريم تعبت واماية ما عرفت تتصرف لكن لقيت ان الريم راقده في حضن اماية وامي يالسة تمسح على شعرها قلت لها يالله اماية
ام علي : اختك ما تبي تسير المستشفي تبي ترقد اوين
علي : يعني هي بخير ؟؟
ام علي : تقول هيه واللي فيها ارهاق خليها ترتاح نزين
علي : نزين وابوي اللى يتريانا
ام علي : اتصل عليه وقوله ان يونا ضيوف لا تقول له الريم تعبانة عشان ما يحاتيها
علي : ان شاء الله واتصلت على ابوي وقلت له يونا ضيوف ما نقدر ني اليوم
ابو علي : خير يا ولدي
في بيت ابو مازن
ابو مازن : كنت يالس مع ام مازن في الغرفة
قيس : دقيت الباب على غرفة ابوي وامي وقلت لابوي ان عمي بو طارق يبه .
ابو مازن : وينه ؟؟
قيس : خاري في سيارته ما رضي ينزل
ابو مازن : افا دخلة وانا بلبس كندورتي وبي الحين
قيس : نزين وسرت لعمي بو طارق حاولت فيه انه ينزل قالي لا بتريا ابوك وفعلا ما رضي ينزل وتم في السيارة
ابو مازن : افا يا بوطارق اقرب ادخل
ابو طارق : لا ما فيه داعي بغيتك في موضوع
أبو مازن : نزين اقرب الميلس
ابو طارق : لا ما فيه داعي اركب عندي السيارة وتمينا يالسين في السيارة طبعا قلت له الموضوع كامل وان مب زعلانين من مازن بالعكس نحن نحترمة ونقدرة لكن بعد بنتي ما تقدر ترتبط فيه وهو قلبه عند وحده ثانية وها الثانية مب غريبة عنهم هاي كل يوم بيشوفها يعني حبها له بيتجدد وصدقني اتمني تفهم ام مازن ها الكلام بطريقتك واتمني عرس فيصل وخلود يتم ..
بو مازن : اليوم بس احس ان شغلي خذاني من عيالي وايد احس اني مقصر فيهم وانهم مب بس محتاجين لمصاريف مادية في الحياة محتاجين لأب يكون لهم مثل الصديق انا طول عمري ما كنت افهم عيالي وكانوا حتى لمه يطلبون شئ يقولون لامهم تخبرني عنه وعلى الرغم من اني كنت فرحان بزواجه عيالي إلا اني عمري ما سألت نفسي هل عيالي كانوا مقتنعين بالعرايس اللي بياخذوهم وله بس هذا قرار امهم هزيت راسي لبوطارق وقلت له ان شاء الله خير وحاولت اطلب منه ينزل يتقهوا على الاقل لكنه رفض ونزلت انا عنه ورجعت الغرفة ..
بو طارق : احس ان حمل كبير نزل من على كتفي واكيد ان بنتي الحين محتاجة اني اكون يمها وحواليها لان الموضوع ابدا مب سهل عليها وفي نفسي قررت اني نسافر كم يوم تغير فيه جو وتبعد عن ها الاجواء ..
قيس : زجرت ابوي بعد ما نزل من عند عمي بوطارق لان خالي يبيه لكنه ما سمعني ودخل البيت .
فيصل : تلاقيت مع ابوية وقالي ازجر اخوك مازن وتعالوا غرفتي قلت له ان شاء الله
ام مازن : بلاه بو طارق شو عنده؟؟
بو مازن : لحظة الحين بقولج وسمعت دقات على الباب وكان فيصل بروحة سألته وين اخوك عيل؟؟
فيصل : يسبح الحين بينزل
ام مازن : شو فيك خير يا بومازن ؟؟
بو مازن : لحظة يا ام مازن اتريا مازن
مازن : دقيت الباب ودخلت وكنت حاس ان ابوية يبي يعطينا محاضرة عن الزواج واكيد مليون وصيه على زوجاتنا ومن ها الكلام خاصة لمه شفت فيصل يالس ولكن استغربت وجود اماية ..
بو مازن : يلست ويمكن تميت خمس دقايق ما قلت ولا كلمة لاني بصراحة مب عارف كيف ابتدي في الرمسة
ام مازن : خير يا بومازن شو فيك؟؟
بو مازن : انا يا أم مازن احس اني مقصر في عيالي يمكن حسيت بها الاحساس يوم وفاه هاني حسيت بنفس الاحساس بس عقب فتره رديت وهملت عيالي ورجعت مره ثانية اعطي وقتي لشغلي وحطيت الحمل كله على راسج انتي وما سألت عنهم حتى يوم قلتي ان مازن بيخطب ثريا سرت معاهم وخطبت وانا مب عارف ولدي يباها وله لا ونفس الشئ يوم فيصل بغا يخطب خلود سرت معاكم وخطبت وأنا ما كلفت على نفسي اسأل عيالي انتو مقتنعين بها الخطوه وله ضغط معين خلاكم تقبلون عليه
ام مازن : يا بو مازن انت عمرك ما قصرت في العيال وكاهم الحمد لله في احسن حال وعرسهم ما باقي عليه غير جم يوم .
ام مازن : لا يا ام مازن انا قصرت وعشان اثبت لج كلامي زواجه مازن تكنسلت.
ام مازن وفيصل ومازن كلنا طالعنا على ويه ابوي شو يقول ؟؟
ابو مازن : ليش تطالعوني جي ومستغربين ليش مستغرب يا مازن كنت تبي تكمل ها الزواجه اللي الهدف الرئيسي فيها انك تظهر الحزن اللي في قلب امك على اخوك؟؟
مازن : نزلت راسي وما قدرت ارفعة
بو مازن : معقوله يا مازن انت الصغير تضحي بسعادتك عشان امك ونحن ما نحس فيك؟؟ ليش ما صرحت بحبك للبنت اللي اختارها قلبك ويمكن امك كانت بتكون اكثر سعادة في ارتباطك فيها
مازن : الحين ما فيه مجال اني انزل راسي رفعته واستفهام العالم كله في خاطري شو يقول ابوي
فيصل : انا بعد مب فاهم شئ ولا عارف ابوي عن شو يرمس رغم اني اعرف ان مازن يحب الريم ويمكن ما كنت اعرف ان مازن قرر انه يعرس من ثريا عشان يسعد امي ويظهرها من حزنها على هاني بس كنت حاب اعرف بقية رمسة ابوي اللي باينه في عيونه والحزن الكبير في قلبه
ام مازن : شو بلاكم تطالعون بعض جي فهموني شو السالفة وشو يتكنسل زواج مازن وشو لو كان خذ مازن اللي يحبها بكون مستانسة ..
ابو مازن : يا ام مازن ولدج مازن كان بيضحي بسعادته عشان يسعدج لكن رحمة ربج اكبر واوسع وثريا واهلها قرروا يكنسلون زواجه مازن وثريا
ام مازن : شو يكنسلوها لا انت اكيد تمزح
ابو مازن : ما فيه مجال للمزح الحين اللي بيصير الحين بسأل فيصل انت تبي تكمل زواجتك من خلود وله لا؟؟
فيصل : هيه نعم يا بوي ابي اتمم زواجي لاني اخترت خلود بقلبي وعقلي وانا قبل ما افاتحكم تخطبوها لي كنت استخرت ربي
ابو مازن : عيل زوجتك بتم وانت يا مازن ربك كريم ويسهل لك مع الانسانة اللي اختارها قلبك لو كانت هي تباك
مازن : نشيت وظهرت من الغرفة خلاص مب عارف شو يصير احس اني كنت في كابوس زواجي وصحيت منه لكن هذا مب كان كابوس هذا كان حقيقة وثريا واهلها يا تري ليش قرروا يكنسلوا الزواجه لازم افهم الموضوع وطبعا يوم ظهرت اتصلت على ثريا بس ما ردت علي وبعدها بشوي اتصل علي طارق وقالي الموضوع كامل
ام مازن : لا انتو فهموني شو السالفة بتخبل والناس اللي عازمينهم على عرس الاثنين شو نسوي فيهم شو نقول لهم؟؟
ابو مازن : انتي فكري يهمج الناس وله عيالج؟؟
ام مازن : طبعا عيالي بس فهموني
ابو مازن : بتفهمين بس تعالي معاي الميلس الحين
ام مازن : احس ان ريولي مب قادرة تشلني وما ادري كيف وصلت لين الميلس
ابو مازن : بو علي ممكن اطلب منك طلب ؟؟
ابو علي : افا عليك اطلب .
ابو مازن : بغيت اخطب بنتك الريم لولدي مازن
ام مازن : الحين انت شو تقول أي خطبة عقب سكت تميت افكر وطبعا ذكائي ما خاني هاي المره رغم الصدمة وفهمت شو يعني مازن يحب واللي لو خذاها انا بكون مستانسة يعني مازن يحب الريم واني عرضت عليه ثريا وهو قرر يتزوجها عشان خاطري انا ..
ابو علي : شو تخطب لمازن وهو عرسة عقب كم يوم قالوا ياخذ اربع بس مب في نفس الليلة وكنت اضحك احسبه يمزح
ابومازن : زواجه مازن وثريا تكنسلت لان ولدي قلبه سبقه واختار الريم تكون حليله له لو ما عندها مانع
ابو علي : يالله يا الاحساس اللي احسه الحين الريم بنتي عمري ما تخيلت اني في يوم اوقف مثل ها الموقف ان فيه شخص يخطبها مني الحمد لله والشكر على كل حال والحمد لله خلاني اوقف ها الموقف واني اكون ولي امرها اللي يخذ رايها وقلت لهم نسأل الريم ..
|