لسّه فاكــر .... وشّكِ المسكون حنين
حِلمك المعجون بطين الأرض
صوت الفجر / شهد الطيبين
لسه فاكر ... مشيتنا عـ الساقية القديمة
قعْدتنا فوق جبين الغيط
نبوس خدود الأرض
ونرمى بذرة حلمنا فوق التراب
عاش حلمنا ... / بين الشواشى والذره ...
تحت العيدان المثمرة ...
وفوق كتاف كل عود
شيلة كيزان متعطّرة
تضحْك معانا ...
وتميل علينا بحملها ...
هـ تصدّقى ومن غير يمين ...
أنا لسه فاكر ...
طعم الذرة لحد النهاردة من ايديكى
كان زىّ طعم عنيكى لمّا تِطْوًل الغيبهْ
وزىّ طعم الخد لمّا تكحّله الطيبهْ
وزىْ طعم الحلم ... واحنا عنينا معصوبةْ
وزى طعم لؤاكى ... لهْ شمخه / وعذوبهْ
هـ تصدّقى ومن غير يمين ...
والشمس شايفه كل حاجه من بعيد
لكن بتبكى بالدموع معرفشى ليه ؟
كان لونها شاحب ْ / وصفارها شارد
وفـ النهاية ....
رسمتْ لنا لوحة غروب ...