قلبي الوافي زرع اجمل زهـوره
في ثرى دفتـر بأقـلام السوايـل
في ادفيتر وحدتـي خبـأ شعـوره
مخلص الدفتر لحمل القلب شايـل
كل ما ضاق الفضا بعينـي ازوره
واكتب الاحلام مع عطر الرسايـل
واتصفح دفتري وابكـي سطـوره
ذي اماني العمرفي الصفحه تمايل
ذكريات ٍ صارت بأرض امهجوره
والعزى دمع ٍ على الوجنات سايل
أذكر اني كل مـا اكتـب اشـوره
لو كتبت ابويت سويـت الهوايـل
واذكر اني كنت في دربي صبوره
كل ما اكتب يقـول الخـط مايـل
واذكر انه مرني وكنت امأسـوره
فـي متاهاتـي وانـواع النكايـل
قال لي وش بك حزينه ومكسـوره
قلت له للحزن شديـت الرحايـل
قال وش لك بالحزن هذي مشـوره
انسي الاحزان هذا الكـون زايـل
المهم... اخر قصيدك وش بحوره
قلت لـه ممكـن تمعـن بالدلايـل
قـال اشعـارك تذكرنـي بنـوره
نوره اللي ساكنه بأرض الخمايـل
نوره اللي ماخذه من البدر نـوره
بنت كانت غير عن كل الأصايـل
قلت له اسمع.... ترى ماني غيوره
لي وليف ٍ مالـك ٍ قلبـي وطايـل
انحبس قلبي في بستانـه وسـوره
وانحبس مابين روحـي والنحايـل
قال شاعر ؟؟؟ قلت يطربني شعوره
شاعر ٍ ماقال لـي غيـر المثايـل
كل هذا الكون غايب في حضـوره
في عيوني شاعري يسـوى قبايـل
قمت امثل والبطـل اتقنـت دوره
لين شاف انجـوم ليلـه بالقوايـل
قلت اسمع ياولد بعطيـك صـوره
شاعري يشبهك في كل الخصايـل
قـال لـي يابنـت والله امعـذوره
كان يشبهني اجـل للطيـب نايـل
قلت له الله على قلبـك وجـوره-
ما فهمت اللغـزولا ماانـت قايـل
|