خيبت ظني
توك تجيني تعتذر تطلب رضاي
تبيني أنسى لك جروح قديمه
ماتدري انك بالعناء مصدر شقاي
والنفس من كثر الخطايا سقيمه
منهو رفع قدرك على عداك وعداي ؟
من الذي خلا حياتك كريمه؟
من الذي عزك وخلا لك الراي ؟
تامر وتنهى في حياة اليتيمه
منهو رسم حزني على وجة دنياي ؟
من الذي خلا الأماني عديمه ؟
من الذي غيرك وصلني أقصاي ؟
من الذي خلا حياتي نديمه؟
وأنامعك بالطيب مديت يمناي
مديتها يوم النوايا سليمه
كنت أحسبك ليه عضيدي ومشكاي
لاقام ويل الوقت يصلى جحيمه
ولاجارت الأيام عزي ومنصاي
لاشفت من وقتي وبال وظليمه
خيبت ظني بك وخيبت رجواي
وأخطيت في حقي خطايا جسيمه
وممشاك بالدنيا ترى غير ممشاي
ممشاك في كل الامور الذميمه
أنا الوفاء والطيب والحلم مبداي
أصبر على الشده بنفس حليمه
وأنا الأصاله والنقاء عز مجناي
وأنا الكرم والطيب جدي زعيمه
أنا الكواكب وأنت فالقاع ماطاي
وأصل المبادي لي معزة وشيمه
رح بشر اللي ينتظر يوم فرقاي
و زف الخبر اللي عليهم غنيمه
وأبعد تراني ذقت موتي بدنياي
وشلون أداوي هالجروح الأليمه
وأسمك غدالي مثل همي وبلواي
بلواي في ماض الليالي العتيمه
|