.::: العنـــود
لا شموخ وكبرياء وأنـف يرقـى للسنـود
والقضيه أكبر أكبر من شموخـي وإدِبـي
للجهاله إيه والله فـزت فـي كـل البنـود
والغباء لكل شخـص ٍ مايقّـر إنـي غبـي
أستبّد وكني اللـي ماخلـق مثلـه إسـود
لين داور هالزمان وقص خشمـي وشنبـي
إيه راحت وتركتني ويمكـن إنـه ماتعـود
وداست برجله لعانه وجـه قلبـي وأهبـي
وكرّمتني فوق نزفـي وشكرتنـي للجهـود
وقالت إنت وبإحتقـار ودق كفّـه منكبـي
من تكون ومن أكون وطول عمرك لو تسود
ماربطني مـع شتاتـك إلا يمكـن مذهبـي
حمّلتني فوق وسعي وأكبر حلولي صمـود
والصمود لغير موقف مثـل هـذا مطلبـي
وطحت كني في مكاني شي تافـه مايكـود
حتى أرض ٍ إحتوتنـي ماتحفّـت بركبـي
كني اللي حاصل ٍ له دعوة ٍ من قلب عـود
وافقت له إستجابه وإستـوى لـه مايبـي
وش عليها يوم راحت وتركتنـي للشـرود
وشبّت النار بيدينـي وإستعانـت بحطبـي
وش عليها يوم سوّت إحتفـالات الهنـود
ورسمت رمز الضحيه فوق عيني وهدبـي
وشكّلت قلبـي طبـول وقدّمتهـا للحشـود
وإستعانت في حلاها وإستقالـت منصبـي
وإستلذّت صوت قلبي لا تعلاّ صوت عـود
وإستغلّت كـل درب ٍ يـم رومـا وتعبـي
ليت وقت ٍ قد مضى لي قبل حرمان الصدود
يغدي الدرب ويجيني أو أجي له لـو حبـي
يوم فوحي من غلاها ريح مسك وريح عود
وإن سكت لغير قصدي قالت آمر وش تبي
تنقهر عبله عليها وسـط طيّـات العقـود
وأقهر العبسي بحب ٍ دون سيف ومشعبـي
لامشتني مع دروبي وأصعب دروبي حسود
كن قلبه قلب ذيب ٍ وسط جوف ٍ في ضبـي
ترسم بريده بكفـي مالهـا حكـم وحـدود
وأنثر الطايف عليهـا بالقصيـد المغربـي
كرّهتني فـي حياتـي وأنكرتنـي للجحـود
يوم فازت في ضياعي وإستملّـت ملعبـي
إرجعي لي لو سمحتي إرجعي لي يالعنـود
دام قلبي يوم رحتي في ضلوعـي مختبـي
مايفيد الحـال بعـدك لانيـاف ولا خلـود
وش يسوّي كل مكسب دامك أنتي مكسبـي
إذبحيني لو بغيتي وإلغي إسمـي بالوجـود
وإكتبيني تحت عطفـك دام بيـدك مخلبـي
وكان خفتي من خيانـه قيّدينـي بالقيـود
وعقّدي لي تحت نمله وسط غار ٍ مرعبـي
ماعليّ من الملامـه والاهانـه لـو تـزود
والرجولـه مانبيهـا لا نويتـي تقـربـي
واجد اللي يحسبون الحب تفتيـل الزنـود
ظافرين وكل واحـد بنـت قلبـه تنسبـي
الدعايه دبلجتهم من شموخ وبيـت جـود
في بحور ٍ لو تبعته كـان يغـرق مركبـي
ماعلينا إرجعي لي لـو سمحتـي يالعنـود
دامك أنتي أكبر أكبر من شموخـي وإدِبـي
وصدّقيني لو يحول الوقت دونك بالسـدود
ما أنكر إنك يوم رحتي طحت واثق بركبـي
|