الجزء الثاني والعشرون ..
رنا
اول مافتحت قفل الباب رجعت للسرير انسدحت غطيت راسي بالغطاء لكني اقدر اناظره اذا دخل ..
انفتح الباب ودخل ..
وقف عند الباب فترة وهو يناظر السرير ..
وانا اناظره من دون مايدري ..
شفته يدخل ويآخذ ثوبه من معلاق الملابس ويطلع ..
انتظرت خمس دقايق بعدين قمت ..
طلعت للصالة ..
لقيت سدومه على الكنبه ..
شلتها وحطيتها على السرير ..
رحت للحمام وانتوا بكرامه عشان اتوضى ..
لما دخلت لقيت بجامته معلقه ..
ضحكت بداخلي وانا مبسوطه .. قدرت اقهره ..
صليت ورجعت للسرير لكني هالمرة ضميت بنتي لجنبي وغمضت عيوني وانا مستعده للنوم .. واتمنى انام قبل لايجي ..
أحمد
رجعت من الصلاة وانا احس نفسيتي تعدلت شوي ..
احس اني احسن من قبل ..
دخلت البيت ولما مريت على الصالة .. لقيت نورة طالعه من المطبخ ..
أحمد : سلامات نورة .. وش فيك ؟؟
نورة وهي تمسك بطنها : ابد الله يسلمك .. حسيت بوجع وتوقعتها الولده ..
أحمد : اذا ميب ولده .. اجل وش صارت ؟؟
نورة : مدري عنهم .. سوو اشعه قالوا كل شي طبيعي ..
أحمد : الحمد لله على كل حال .. الله يقومك بالسلامه وتجيبين ولي العهد ..
نورة وباين عليها التعب : الله يسلمك ياخوي .. وانت بعد الله يرزقك بالعيال ..
أحمد : اللهم آمين .. تبين شي قبل لا أرقى ..
نورة وهي تروح للصالة وتجلس : لا .. روح نم .. تصبح على خير ..
احمد : وانتي من اهله ..
رقيت الدرج وانا اضحك على نورة يوم تقول : وانت بعد الله يرزقك بالعيال ..
ضحكتني بجد .. ان شاء الله .. الله بيرزقني بس عندي وحده عنيده قال ايش قالت ماتبي عيال مني ..
مالت على وجهها فيه احد مايتمنى يجيب عيال مني ..او اكون زوج لها ..
شكلها ماتستاهل هالنعمه اللي رزقها ربي ..
مصيرها تعرف بس بعد فوات الآوان ..
فتحت باب الشقه ودخلت بعد ماقفلتها ..
وقفت عند باب الجناح اللي كان مسكر .. التفت بشوف سدوم .. مالقيتها اكيد شالتها ..
فتحت الباب ودخلت .. لقيت باب الغرفة مفتوح وقبل لا أدخل تذكرت ان بجامتي بالحمام وانتوا بكرامه ..
بدلت على السريع .. ودخلت الغرفة وبيدي ثوبي ..
علقته على المعلاق وانسدحت على السرير ..
في البداية ماكانت نيتي انام جنبها عقب الكلام اللي قالته ..
بس بعدين قلت وش اللي يخليني احرم نفسي من النومه المريحه على السرير واروح انام على كنبه تكسر ظهري ..؟؟؟
فققرت انام على السرير .. واذا هي بنت امها تتكلم وتقول قم مابي انام جنبك ..
اذا ماتبيني جنبها تقوم هي .. مو انا ..
نمت على جنبي اليمين مقابل وجهها ..
كانت مغمضة عيونها بس ماادري هي نايمه او لا ..
جلست اتأمل في ملامحها ..
اناظر سدوم بعدين اناظرها ..
عرفت سر جاذبية سدوم .. كله من امها ..
مآخذه من امها كثيـــــــــــر ..
والله أكثر شي ماخذته .. البياض والشعر الطويل ..
على اني منقهر منها الا اني مامنعت نفسي اني اتأمل براءتها وهي نايمه ..
بدون شعور قمت وبستها مع خدها ..
وكان ودي اقرط فيه لكني خفت تحس فيني وتقوم تعطيني محاضره ..
رجعت انسدح مرة ثانية وانا الى الآن عيوني عليها الين غفت عيني ونمت ..
بعد شهر ......
أحمد
الساعه الحين 2 وربع ..
توي راجع من الدوام .. اول دوام لي بعد اجازة الزواج ..
كنت فرحان ومبسوط على الآخير مو لأني مداوم لا .. انا مستانس لسبب ثاني بتعرفونه لما اوصل للبيت ..
اول ما دخلت البيت على طول رحت لمجلس الحريم ..
وقفت عند سرير صغير فيه اجمل طفل شافته عيني ..
هذا محمد ولد اختي نورة ..
ولدت قبل اسبوعين ..
شلته من على السرير وهو نايم ..
وقعدت ابوس فيه الين تحمرت خدوده .. والمسكين قام يصيح من قوة البوسه ..
دخلت علي نورة وهي تتأفف : أوووووووف منك أحمد ماصدقت على الله ينام عشان ارتاح وانت تقومه علي ...
أبتسمت وانا احط الولد بسريره : وش دعوى نوره ؟؟ ماتبينا نحبه وونلعبه ..
مديت بوزي يقالي زعلان : خلاص ماعادني شايله ولا حابه .. عشان ترتاحين ..
وطلعت ..
شفت الضيقه بعيونها : أحمد مو قصدي كذا .. لاتزعل يالماصخ .. تعاااااااااااااااااااااال ..
وانا ارقى الدرج : لااااااااااااااااااااااااااا .. ماني جاي .. وولدك هاذا اشبعي منه ..مانبيه ..
قلت وانا أمزح بس هي تحسب اني جاد في كلامي ..
ماتدري اني لما انزل العصر راح اسوي به اشد واشد ..
وقفت عند باب الشقه وانا متوتر وخايف ..
اليوم اول مره اغيب عنها هالكثر من الوقت ..
سميت بالرحمن وفتحت الباب ودخلت ..
تكلمت بصوت عالي : السلام عليكم ..
عشان تنتبه وتعرف اني جيت ..
طلعت لي من المطبخ وهي تبتسم ..
بدون شعور مني ضميتها بقوه وانا العب بشعرها المربوط ورى ظهرها ,,
ابعدت عنها لما حسيت انها اختنقت ..
مسكتها مع يدها وجلستها في الصالة وجلست جنبها :اخبارك حبيبتي ؟؟ عسى ماتأخرت عليك ؟؟
تكملت بدلع واضح وهي تلملم شعرها اللي حسته لها قبل شوي : اخباري بخير .. بس من ناحية انك تأخرت فتأخرت بس شوي ..
احمد : توي طالع من الدوام .. على طول من الدوام لهنا .. يعني لازم تتعودين على هالنظام ..
شكل كلامي ماعجبها لانها قامت وهي تقول : يالله بدل على ما احط الغدى ..
يالله على هالبنت ما أدري متى بأعجبها ؟؟
الحين يقال ان علاقتنا متحسنه شوي .. امحق تحسن ..
قمت وبدلت ورجعت ثانية للصالة .. جلست اقلب في التلفزيون الين جت وحطت صينية الأكل قبالي ..
جلست على الكرسي اللي جنبي ..
ناظرتها بعدين ناظرت في الأكل بعدين ناظرتها وابتسمت : شكل الأكل طعمها لذيـــــــــذ ..
مدت لي الملعقة وهي تقول : بالعافية .. اول شي ذق بعدين احكم ..
أحمد : الله يعافيك .. اصلا مايحتاج الكتاب باين من عنوانه .. تكفي الريحه ..
سكتنا بعدها وجلسنا نآكل ..
بعدين تذكرت سدوم ..: الا وين سدوم ؟؟ ماشفتها .. لاتحت ولا هنا ..
من دون ماترفع راسها : نايمه ..
يالله على هالرنا .. ابفهم ليه هي تعاملني كذا ما أدري ..؟؟
من جد احس اني تعبت معها ..
رغم اني اقولكم ان علاقتنا بدت تتحسن الا احس انها تحاول تخرب كل شي ..
سكت وكملت غداي الا من جد كان حلو مرة مرة ..
لدرجه اني لحست الصحن كله ..
احمد : الحمد لله .. الله يعطيك العافية حبيبتي ..
هنا بس رفعت عيونها لي وقالت ..: الله يعافيك ..
ابتسمت لها وانا اقول لها : تبين شي ؟؟ بروح انسدح لي شوي قبل لا يأذن العصر ..
ابتسمت واتوقع انها ابتسامه مجامله : سلامتك .. روح ريح شوي ..
دخلت وغسلت وعلى طول على السرير .. ماصدقت اني اريح ..
انسدحت وانا احس اني متكسر ..
جلست افكر ..
رنا وش فيها اليوم ؟؟ ياربي كل ماقلت ارتحت احس اني اتعب كثير ..
من بعد ولادة نورة .. وانا احس رنا تعاملني معاملة زينه ...
رنا
دخلت المطبخ اغسل الصحون ..
وبعد ماخلصت دخلت للغرفة شفت احمد منسدح على السرير ويهوجس ويفكر ..
وقفت عند المرآية اعدل شكلي واتعطر ..
قربت من عند السرير وجلست على الطرف من الجهة الثانية ..محل نومي ..
رنا : وش فيك أحمد تهوجس ؟؟ فيه شي شاغلك ؟؟
ناظرني وهو يبتسم : سلامتك مافيه شي .. بس ..
وسكت ..
رنا : بس ايش ؟؟
أحمد : اقول وماتزعلين ..
رنا : خلاص احمد احنا اتفقنا انت ماتزعل مني وانا ما أزعل منك .. يالله قول ..
أحمد : امممممم .. مدري بس احس اول مادخلت عليك حسيتك متغيره مو مثل قبل ..
ابتسمت وكأنها تذكرت شي : أهااااااااا وهذا اللي مضايقك .. عادي احمد .. بس يمكن لأني قرفانه من المطبخ .. من قمت الصباح وانا ارتب فيه بعدين سويت الغدى .. تعرف انت عاد شغل الحريم ..
أحمد : يعني مافيك شي غير هالسبب ..؟؟
رنا : ابدا ابدا وعشان اثبت لك ..
قمت وتوجهت له وبسته مع خده : وهاذي بوسه عشان تتأكد ان مافيني شي ..
بعد البوسه تركته وطلعت ..
أحمد
فعلا ان بعض الظن أثم ..
ظلمتها المسكينه .. وهي على نياتها ..
وفوق كل هذا تعطيني بوسه .. صدق ان الدنيا الى الآن بخير ..
ورنا الى الآن على اتفاقنا وعهدنا ..
تدرون متى ارتحت معها .. لما تصارحنا انا وياها ..
شرحت لي كل شي بس هالمرة من دون دموع ..
حددت لي موقفها وانها تبغى تعيش معي بسلام .. بس لازم انا اصبر واتحمل لان صعب عليها تتقبله بسهوله ..
اتفقنا نعيش كأصدقاء .. الواحد قلبه على الثاني .. الين هي تجيني وتقول لي : انها خلاص تقبلت فكرة اني زوجها وان لي حقوق ..
وانا وافقت على كل اللي تبيه ..
على ان كل الضرر لي انا بس ميخالف موافق .. وموافق وموافق ..
خلال الاسبوعين اللي راحوا احس اني ارتحت من المشاكل والملاسن بيني وبينها ..
بدون شعور غفت عيني ونمت وانا احلم متى ست الحسن تجي وتقول : خلاص يا احمد تقبلتك كزوج ..
رنا
لما طلعت من عنده حسيت اني سخيفة وغبيه ..
بس وش اسوي لازم اسوي كذا عشان احمد مايضغط علي ولا يجبرني ..؟
صح اتفاقنا كان بايخ .. بس على الاقل راح ارتاح انا خصوصا من تلميحاته اللي توترني وتخليني عصبيه ..
امممممممممممم ..
وش اقولكم بعد ؟؟
ايه صح ..
من بعد ماولدت نورة صرت انزل تحت برضاي من دون أي اوامر من احمد ..
اجلس تقريبا ساعه وارقى فوق ..
مااقولكم تحسنت علاقتي فيهم .. بس كانوا يحترموني قدام الضيوف .. لاني ما انزل الا لما يجوهم ضيوف ..
واذا نزلت طول الوقت اجلس ساكته ..
الحمد لله الى الآن ماحصل تلاسن بيني وبينهم ..
بعد يومين ..
رن جوالي على آذان العصر ..
كانت سارة داقه علي .. تقول اني انزل بعد الصلاة فيه ضيوف بيجون .. لاتتأخرين ..
سكرت من عندها وانا مقرره اذا خلصت شغلي راح انزل ..
قومت احمد يصلي العصر .. وبعدها دخلت المطبخ اغسل الصحون وانظفه .. بعد ماخلصت .. رحت وصليت ..
صحيت سدوم من النوم وأكلتها .. بعدين روشتها ولبستها ونزلتها تحت .. عشان تلعب مع حنين ..
بعدها دخلت تروشت ..
لما طلعت احترت وش ألبس ؟؟
امممممممم جلست افكر وانا واقفه عند الدولاب ..آخر شي لبست بلوزة سوادء سادة بأكمام قصيرة وبفتحه صدر كبيرة مستطيله .. مع تنورة سوداء ضيقة الى نهاية الركبة ..
استشورت شعري ولميته كله على جهة اليمين من دون ربطه ..
كحلت عيوني وثقلت بالحكل مع ماسكارا .. حطيت روج زهر .. وحمرة خدود .. تعطرت بعطر خفيف .. ولبست جزمة ذهبية ناعمة بلون شعري من دون كعب ..
ناظرت نفسي للمرة الأخيرة في المراية .. عشان اتأكد ان كل شيء اوكي ..
سحبت لي شيلة ملونه كبيرة شوي عشان اغطي فيها وجهي وشعري ..
لما دخلت عليهم بالمجلس .. لقيتهم حاطين الشاهي استحيت ادخل واسلم وهم على أكل .. بس خلاص انا دخلت ..
رنا : السلام عليكم ..
الجميع : وعليكم السلام ..
تقدمت لحرمة كبيرة في السن وسلمت عليها وحبيت راسها ..
وبعدها لبنتين شكلهم متزوجات وسلمت عليهم ..
وبعدها سلمت على خالتي والبنات سارة ومرام وووونورة ...
جلست جنب سارة وانا أحس بنظرات الضيوف لي ..
الحرمة الكبيرة : الحين هاذي مرة أحمد ؟؟
خالتي : ايه هاذي هي ..
الحرمة الكبيرة : ماشاء الله تبارك الله ..
وهي الى الآن تناظرني .. وانا مغير اوسع ابتسامات .. مدري وش اسوي ؟؟ او وش اقول ؟؟
قالت خالتي : هاذي مرة مشعل الله يرحمه ..
الحرمه الكبيرة وكأنها تذكرت شي : أيــــــــــه هاذي مرة مشعل .. يعني هالبنية هاللي كل شوي داخلتن علينا تصير بنتك ..
خالتي : ايه بنتها ..
الحين الحرمه تكلمني انا ليش خالتي هي اللي ترد ..؟؟
صدق لقافه ..
الحرمة الكبيرة وهي تأشر بيدها لي : تعال يابنيتي هنا عندي تعالي ..
طيرت عيوني وانا مستحيه .. وش تبي ذي ؟؟
قمت وانا احس اني بسيح من الحياء .. من جد موقف لا أحسد عليه .. ليش مانادت مرام والا سارة .. ؟؟
جلست جنبها مثل ماطلبت ..
سحبت شعري وحطته من جهتها وجلست تمسح عليه وهي تقول بصوت هادئ : يابنتي مادريت والله عنك والا كان اخذتك لولدي ... والله من شفتك تذكرت وصفه .. كأنه عارف ان فيه بنت بهالاوصاف ..
انا هنا دوروني من جد ترى ماراح تلقوني ..
من جد احرجتني .. وش يبي يقولون اهل زوجي بعد هالكلام ؟؟
صدق هالعجوز منسمه ..
حمر وجهي وحسيت بحرارة وودي اقوم واطلع ..
لما شافتني ساكته قالت وهي تمد يدها لفتحة صدري وتشد البلوزة لفوق الين وصلتها لحلقي : الحين وش هي له هالفتحه ؟؟ انتي ترضعين لك بزر يوم انك مطلعه صدرك ..
ضحكت على كلامها وانا متوهقه .. قعدت اناظر نورة وانا اضحك .. بس الغريبه ان نورة ماكانت تناظرني ولا هي مهتمه للي ينقال ..
ناظرت سارة ومرام اللي تقطعوا من الضحك .. اكيد بيضحكون .. مو جتهم الفرصه عشان يضحكون علي ..
قالت خالتي وليتها ماتكلمت ..: هذا شغلها من آخذها مشعل الله يرحمه .. بنات مالقن من يوقف بوجيهن ..
بعد كلام خالتي انسحبت من مكاني وجلست جنب سارة ..
صبت لي سارة شاهي .. مالي خلق اشرب شي بس مجبوره لان الكل يناظرني ..
رشفت لي رشفه وحده ورجعت البيالة مكانها وعلى حالها الين نغزتني سارة ..
التفت عليها وانا مطيره عيوني : خير ؟؟ وش ذا النغزه ؟؟ حفرت لي خصري ..
سارة : وش فيك مسبهه ؟؟ وش سرحانه فيه ؟؟
ميلت لها فمي : وانتي وش تبين الحين ..؟؟
سارة : حبيبتي لاتفشلينا قدام الحريم .. وبعدين مو انا قلت لا تتأخرين .. ليش توك تنزلين ؟؟
رنا : والله ياحبيبتي انزل متى ما أبي .. انتي وش دخلك ؟؟
سارة : والله اللي فشلتينا وضيعتي وجيهنا ..
قهرني كلامها .. دام انا مفشلتها ليش تناديني ؟؟
رنا : تكلمي زين لااعطيك كف على وجهك ..
سارة بعيون حمراء : انتي حمارة .. تدرين والا ماتدرين ..؟؟
مسكت اعصابي بالقوة : لا ما أدري .. بس اللي ادري عنه اني جالسه مع بقرة ..
سكتت سارة ولفت وجهها عني ..
اما انا رجعت لوضعي الطبيعي .. ولما التفت اناظر اللي قبالي .. الا اتفاجأ انها داخله معنا بالسالفة وسمعت كل شي ..
ميلت لها فمي وانا مقهوووووووورة من داخل على هالمهزلة اللي انا جالسه معهم ..
لما سمعت صوت آذان المغرب .. حسيت انه افرااااااااااااااج ..
بعد ماقاموا الحريم يصلون المغرب ..
انسحبت بهدوء من المجلس وطلعت ولما وصلت للدرج ..
خالتي : رنــــــا ؟؟!
هزيت راسي وانا ابتسم .. يعني لا مفر ..
التفت وانا الى الآن مبتسمه : سمي خاله ؟؟
خالتي : وين رايحه ؟؟
رنا : امممممممم .. بروح اصلي ..
خالتي بحزم : تصلين وترجعين .. بســـــــرعه ..
رنا : ان شاء الله ..
وعلى طول طيران لشقتي .. ماصدقت ان رقيت .. اووووووووووف من جد قرف ..
صليت ونزلت وياليتني مانزلت ..
اول مادخلت المجلس مالقيت احد من الضيوف ..
فيه خالتي ونورة بس ..
خالتي : هذا وانا اقول بسرعه .. خلاص راحوا .. وش الفايده من نزلتك ؟؟
رنا : بس انا صليت ونزلت على طول .. شكلهم هم اللي مستعجلين ..
فكرت اني اعود من حيث اتيت .. لكني خفت تناديني .. عاد انا مابي احد يغصبني اقعد وانا ما أبي ..
فقلت اجلس شوي واذا فضى المجلس انحشت ..
جلست ساكته بس اناظر في خالتي بعدين نورة بعدين سرير البيبي ..
ميته ابي اشوفه .. من كثر مايتكلم احمد عنه وعن جماله .. صار ودي اشوفه بس مابي احرج نفسي يمكن نورة ماتبيني اشوفه .. وانا مالي مشاكل ..
وكنت امني نفسي واقول : مصيري اشوفه ..
سمعت احمد ينادي بالصالة ..
خالتي : أحمــــــــد تعال هنا .. مافيه احد ..
دخل احمد : السلام عليكم ..
الكل ومن ضمنهم انا : وعليكم السلام ..
جلس بجنب امه ..
أحمد
لما دخلت ماكنت اشوف الا امي ونورة ..
لكني لما جلست جنب امي .. طيرت عيوني وانا اشوف رنا قبالي ..
تكلمت بصوت خفيف وانا متفاجأ من وجودها : رنا
شفتها تطير حواجبها لفوق وهي تبتسم وقالت بصوت اتوقع انا اللي سمعته بس .. لانها بس حركت شفايفها بدون صوت .. اشششششششششششششششش ..
ضحكت على حركتها وانا التفت على امي وأسولف معها ..
لكن عيوني كانت على رنا ..
مستغرب نزلتها بدون ضيوف ..
بالعاده ماتنزل الا فيه ضيوف بسسسسسسسسس ..
اكيد عندها شي .. الله يستر ..
دخلت ساره وهي تقول لأمي : مامي .. التلفون ..
قامت امي للتلفون ..
واول ماشفت امي طلعت من الغرفة ..
قمت على طول وجلست جنب رنا وانا انغزها بكوعي ..
ابتسمت لي وهي تغمز بعينها ..
اموت واعرف وش عندها الأخت مغير توزع ابتسامات ..؟؟
نورة وهي منسدحه على السرير : وش عندكم ؟؟ ناظرني واناظرك .. اذا عندكم شي .. لو سمحتوا فوق مو عندي ؟؟
طيرت عيوني على نورة وعلى كلامها : الحمد لله والشكر بس .. الحين لو زوجك قاعد يناظرك وتناظرينه .. يعني يبي شي منك ؟؟
حمر وجه نورة وصار الوااااااااااان .. نزلت عيونها وسوت نفسها لاهيه بالجوال ..
لكن المصيبه لما التفت على اللي جنبي ..
تصدقون حسيت انها ذابت وماعدت اشوفها الا بقايا زبده ..
ناظرتني رنا بعيون كلها حياء وهي تقول : استح !!
دخلت سارة علينا وجلست جنب رنا ..
جلست تناظرنا كلنا بس مافهمت ..
سارة : وش فيكم ؟؟ كل الوانكم مخطوفه ..
احمد : سلامتك بس قاعدين نقول كلام متزوجين مايصلح لك ..
سارة وهي تميل فمها : تكفى عاد يالمتزوجين ... اللي يقول الحين عايشين بكوكب المريخ بعيد عنا ..
نغزتني رنا مع خصري وهي تقول بهمس : خلاص اسكت وفضها سيرة ..
همست لها : ليش ؟؟
رنا من بين اسنانها : لانك راح تجيب العيد لو طولت بالكلام ..
ضربت كتفي على كتفها خفيف وانا اقول لها بنفس الهمس : تستحين ؟؟
ناظرتني بقوة وهي تقول : اطلب منك طلب ..؟؟
رمشت لها بعيوني وانا اقول : عيوني ..
ابتسمت على حركتي وهي تقول : ودي اشوف محمد بسسس ..
مديت يدي لفمها وسكرته وانا اقول : فاهم فاهم ..
قمت على طول وجلست على سرير نورة ..
سحبت سرير حمودي وشلته ..
احمد : وهذا اربع وعشرين ساعه نايم ..
نورة وهي معصبه : لاتكلمني تفهم ؟؟
تغيرت ملامحي وانا اشوف تعصيبتها : افاااااااااااا ليش ؟؟ تو كنا حبايب وش اللي غيرك ؟؟
نورة : تحرجني قدام زوجتك وتقول حبايب ..؟؟
ضحكت عليها من قلب وعجزت اوقف من كثر الضحك لدرجه ان حمودي اللي بحضني بغى يطيح من كثر الهز ..
احمد : ههههههههههههههههههههههههههههههههههه
نورة وهي تمد يدينها لحضني وتآخذ محمد : انطم بس ... اكيد تضحك على خبالك يالخبل ..
ضربتني على خفيف وهي تقول : قم عن السرير مابي اشوفك .. قم ..
قامت سارة اللي كانت طفشانه من الاساس لما دخلت وهي تقول : سخافة متزوجين انا اروح لمرام ازين لي ..
وطلعت ..
|