ودانا بابا وقفنا فالبدايه صوب مسيد صلينا الظهر وعقب رحنا صوب قصر الهند بابا قال لازم نتغدا فيه
عاد أنا كنت رافضه ما احب اكلهم حار بس ميثاني وجويلز قالو عادي لاااه
ورحنا كنا قاعدين نحن الأربعه يمب بعض وبابا يدامنا جنه أخونا العود فديته علني فداااااااه
وأنا بس أكل روب هع حار أكلهم
باباتيه : نورو كلي عدل
نوره : حار بابا
باباتيه شل لقمه ووكلني غصب
نوره : ههههه يسلمو
وعلى طووووووووول جركن الماي خلصته جني هع
كنا فكبينه جان جويلز تقول
جواهر بصوت مسموع : أنا أنا لازم تلقمني يلا عاد
ميثا : لا أنا قبل سيري مناك آآآآآ
نوره : ههههه لا انتي ولا هي جوجوتي
باباتيه : فضحتوني غربلاتكن الكباين اللي يمبنا بيقولون يايب حريمه الأربع
كلنا : هههههههه
نوره : صدقك بابا والله هههههه
ونحن ناكل عاد كل وحده وياها القبشه واللي شوجه واللي قلاص الماي هههه بابا صورنا
بابا دوم يصورنا ويحتفظ بالصور يحطها ذكرى
جان نوقف يمب بعض وخلينا كل وحده تصور الاربع ويا بعض طلعت الصوره طرررر
غير باباتيه حركات علني فدااااااااااه
عقب ما ظهرنا من المطعم
باباتيه : ها وين تبونا نروح
جواهر : بلا منازع أكييييييييييييييييييييد .......
ميثاني : المارينا مول
باباتيه : ها الكل موافق
هزينا روسنا بمعنى هيه ركبنا وكانت الشوارع زحمه رحنا صوب المارينا ودخلنا
بابا ودانا أول شي نشتري اللي نباه طبعاً ميثاني ما خلّت شي الا وشرته فلست أبوي هههه
عقب بابا راح حطا الأغراض فالسياره ورد لنا دشينا السينما ع الساعه 7 طلعنا من المارينا
باباتيه : ها شبعتو ..؟
نوره : هيه بسنا ياني رقاد
الجوهره : أنا بعد
جواهر وميثا : لاااااااااااااااااااااااااع ع ع
جواهر : شو بسنا انتن بعد صدق عيايز
ميثا : آخر شي الشاطي بس نتمشى شوي
باباتيه : ربع ساعه وبس ورانا خط الين دبي أول شي ،، عقب برد الشارجه
ميثا وجواهر : موافقات
نوره : تعبتو أبوي حشا
باباتيه : تبت أصلاً هاي آخر مره أطلع ميثا وجواهر ويا بعض
الكل : ههههههه
رحنا صوب الشاطي قعدنا نشوف الماي عقب تصورنا بعد بس هالمره بالكام هب الفون
وبابا جنه أخونا فديته
باباتيه : بنات لو وحده حلوه مرت صوبنا ليكون وحده تقول بابا عمي خالي لأأأأ قولن خلّوف أوكي
أدري ابوي يمزح وروحه مرحه
بابا ابد ما يكون جذا الا يوم جواهر وميثاني ويانا هاييل اللي مخربات أبويه ههههه
نوره : فديت خلّوف أنا
جواهر : خلّوف خلّوف تعرسني
ميثا : لأأأأ أنا
نوره : جب جب خلّوف مالي
جواهر : لأأأأ مالي أنا
باباتيه : لا مالج ومالها أنا مال هاجر أم نوره سمعتن
باباتيه : عاد هب جذا باحترام مب تخرطن من جيبكن مره وحده هههه
بغت دموعي تنزل على طاري أمايه بس هاي طلعة وناسه ليش أخرب علي وعلى غيري
جواهر شافت بنيه حلوه مارّه
جواهر : خلّــــــــــوف أخوي تودينا صوب المارينا فديتك
ميثا : هي خليفة فديتك ودنا المارينا
باباتيه : حاضرين للطيبين
عقب ما روحت البنيه بغينا نفطس من الضحك
نوره : هههههه بابا والله انّك فنتك
بعد نص ساعه من السوالف ظهرنا من بوظبي وقبضنا الخط نرد الدار
حلوه بوظبي .. وايد ما اييي لها الا نادر حسب مزاج باباتيه مره مرتين ثلاث اربع خمس لا أكثر فالسنه هههه بسني شو أبا بعد
وصلنا بنات عمّي وبنت عموتي بيتهن ونحن ردينا البيت رحت تسبحت وعقب قلت مب باجي عالمدرسه الا اسبوعين ويبدا الفصل الثاني والهم .. صدق صدق لازم أشد حيلي
فـ أحسن لي أقرا من الروايات اللي ابا الحين خلال هالأسبوعين لأنه يوم بتبدا المدرسه بنسى المنتديات بعد .. بس نور الامارات لأأأأأ نوووي أنساه
رحت الصاله أحدر وأقرا روايه فتحت الموقع اللي بقرا منّه
...........: نورو بعدج ما رقدتي
نوره : هههههلا خلّوف البنات بعدني مارقدت
باباتيه : استحي ع ويهج هههه
نوره : هههه خلاص بستحي على ويهي
باباتيه : رحت حجرتج ما شفتج جان اشك انج تقرين روايه
نوره : هههه هي ... خير بابا بغيتني ..؟
باباتيه : هي تعالي بعطيج شي
نوره : اوكي
باباتيه : ييبي وياج شيلة صلاه
لحقت ابوي طلع من باب الصاله وراح الحوي شفته دق على سويج السياره وفتحت جان يروح
يدق سلف
باباتيه : تعالي اقعدي
رحت قعدت يمبه
بس اللي فاجئني بابا حرّك السياره وطلعها برا البيت
نوره : بابا أنا هب لابسه عباه خل نرد ....
باباتيه : عادي لابسه بجامه مستوره ووياج شيلة الصلاه
نوره : بابا حرام فضيحه وعيب خلنا نرد
باباتيه : لا تخافين السياره مخفي وما بنزل من السياره
تميت ساكته وخايفه وين بنروح بابا شو بيسوي
رحنا مكان كلّه بيوت شعبيه والفريج كان هااااادي مرررررره ما فيه قطوه بعد تدور
بابا شغّل الليت مال السياره
باباتيه طلع من السده اللي فالنص شي مغلف بطريقه وايد حلوه
نوره : شو هااا ..؟؟؟
باباتيه : هاج افتحيه
فتحته وأنا مستغربه
نوره : حق شو انزين
باباتيه : يوم ميلادج ما عطيتج شي ,,, افتحيه عدل ..
فتحت الهديه
تفاجئت من اللي داخله بصراحه تفاجئت عدل وعن خاطر
بابا هالحزة كان مركز على ملامحي ما ادري ليش وايد كان يطالع ملامحي بتمعن
نوره بفرح : شكراً بابا شكرا أحلى هديه فـ حياتي والله أحلى هديه
باباتيه : العفو فديتج
تقربت منّه بسته على راسه : الله لا يحرمني منك يالغالي فديتك
باباتيه : ولا منج يالغاليه ... الحين تأكدت انّج صدق تربيتي
نوره : ليش ..؟
باباتيه : قلت يمكن تزعلين وتبين طقم الماس وجذا
نوره : دامها منك أي شي حلو .. وبعدين والله هاي أحلى هديه فــ حياتي
باباتيه : فديتج اباج كل شهر تختمينه
نوره : انشالله من عيوووووووووني .. وبعدين المفروض كل شهر نختمه بس نحن الله يهدينا منشغلين بسوالف الدنيا .. يلا الله يستر ع الكل ويهديهم
باباتيه : آمييييين ... افتحي الطبلون
فتحت وأنا مستغربه
نوره بفرح : بابا ...
باباتيه : هي حقج خلاص كبرتي وتستاهلين
حضنت ابويه بقوه : الله لا يحرمني منك
ابويه : شوي شوي عن يتحرك الغير وتذبحينا <<< جير غير المهم هوووه
نوره : هههه فديتك الغالي
ابويه : ترا رقمج شيوخي بعد
نوره : فديتك وايد كلفت ع روحك
باباتيه : تستاهلين فديتج لا كلافه ولا شي
ابتسمت لابوي رد لي الابتسامه الله لا يحرمني منك يالغالي صدق والله ابوي ييب لنا لبن العصفور لو نبا بعد .. ملبي كل طلباتنا بس بعد موقفنا لحدودنا
تذكرت عمور وعدول أنا وايد مهملتنهم الفتره الأخيره فديتهم بس بابا مب مقصر ويانا ..
ردينا البيت وأنا مستانسه طايره من الفرح
أحس خلاااااااص هذي آخر هموومي اللي عشتها فالأيام الأخيره
من اليوم ورايح خلاص بفتح صفحه يديده تقريبا فتحتها يعل ربي يديم السعاده فـ حياتي وحياة باباتي وخواني وكل أهلي
مابا أحد فالكون يذوق الألم اللي ذقته وفراق الأم خاصتاً البنات ها سبب للوحده عندهن والضياع والشباب بعد ها سبب رئيسي ها بداية الانحراف عندهم
رقدت على أمل أقوم اليوم الثاني مستانسه وناسيه هموم الدنيا كلها أو بالأحرى فارتنها ورا ظهري
صحينا من النوم اليوم الثاني كلنا حزة صلاة الظهر وبابا كان مأجز لأنه أمس ودانا ندور
خلاص مب باقي شي عالمدارس هع الأسبوع الأول راح باجي أسبوعين بالضبط يا ربيييه كيف الأيام تمر بسرعه خاصتاً المدارس ما نحس باجازتها
تغدينا عقب الغدا كنا يالسين نسولف وسولفت ويا عمور وعدول فديتهم أنا وبابا
فجأة بابا ياه اتصال ،،، عقب ما خلص بابا اتصاله
باباتيه : نوره عمر عادل نشوبسرعه اركبو السياره ازقري أسيل بعد
بسرعه رحت لبست عباتي وزقرت أسيل ركبنا السياره
ما حاولت أسأل بابا شو السالفه ولا ليش لأنه متوتر وايد ويسوق بتوتر
وصلنا بيت عمّي دشينا ويوسف ظهر بسرعه من البيت أول ما دشينا لفيت لورا شفته يركب مع بابا .. الله يستر شو صاير
دخلنا بيت عمّي قعدت مع البنات واستانست بس بالي كان مشغول وايـد مع أبوي وشو السالفه
البنات ركبو شريط الفيديو وشغلو التلفزيون تمينا نطالع فيلم من أفلام حياتنا
نوره : يا ربيييييييه جوجو وايـــــــــد حلوه حتى جويلز
جواهر : لازم تقول ربيعتها أحلى هب نحن الفقارى .. ما قول الا مالت
نوره : لا لا انتي بعد قمر
جواهر : زقرناج ماييتي
نوره : تتدرين عاد بحالي هب لازم تسألين
جواهر : يلا عاد مناسباتنا اليايه تكونين موجوده انشالله
نوره : أكيد اذا الله عطاني عمر
جواهر : طالعي طالعي هههههههههههههههههههههههه آآآخ بطني
نوره : هههههههه ليش انزين ..؟
جواهر : هههه أصلاً يسوف عندنا متعود دوم فالحفلات يمسح كريمة الكيكه علينا ههههه
نوره : الله فديـــــــــــــــــــــتـــــــــــــــــــــه أنا
جواهر : استحي على ويهج شو فديته هاي بعد
نوره : هب أخوج باباتي
جواهر : هي ترا أبوج يويل رقم واحد
نوره : فديته أنا والله كشخه جنه شيخ وربي
جواهر : أكيد عم جواهر مو حيالله .. أحم أحم
سولفنا واستانسنا ضحكنا على السوالف اللي فالفيديو
تأخر الوقت الساعه صارت تسع ونص بليل
اتصلت على بااباتيه وأنا ميته رعب
رن ورن ورن ورن بس ما رد عليه خفت أكثر عليه
رديت اتصلت به ما رد علي والجو كان مغيم ونفاف شفت انّه جواهر والجوهره و مرت عمّي ما يدرون بالسالفه قلت ما أخبرهم عسب ما يخافون
آخر شي مليت لدرجه انّه عدول وعمور رقدو خفت أكثر كلماله الخوف يزداد بقلبي والوقت تأخر اتصلت على بابا وايــد
جواهر : شكلها البنيه مستانسه بتلفونها كل شوي تتصل هههه
جاريتها بكلامها : هههههه
آخر شي وصل لي مسج من رقم بابا فتحته بسرعه ( آسف سأتصل بك لاحقاً )
شو السالفه مشغول بس بأخر الليل مشغول غريبه هاي
تعبت وأنا اتريا ع الساعه 11 استسلمت للأمر الواقع واتصلت على يوسف قلت يمكن شي فايده
وأنا اتصل ما رد علي خوفي اهني بالفعل بالفعل زاااااااااد شكيت صار بهم شي
لأأأ لأأأأأأأأأأأأأأأ ما أستحمل أمس ودعت الهموم اليوم بترد لي لأأأ مابا
روحين مره وحده.. لأأأأأ ......... أنا أباهم أحبهم اثنينهم كل واحد أكثر عن الثاني ..
فجأه انفتح باب الصاله ويوسف كانت كندورته مبلله .........
استغربت خوفي زاااااااااااااد أكثر غير انّه شكله وايــــــــــــــد شاحب شاحــــــــــــــــب
قلت بانفعال : بابا وين .. ليش ما يرد ..؟
|