الحلقه الخامسه ..
ابويه : انزين انتي شو اللي تعرفينه ..؟
نوره : انا ما صدقت حد .. أنا بس صدقت أذوني يوم سمعتك تطلق ماما وهي طلعت تصيح من الميلس كان عمري وقتها ما يتعدى تسع عشر سنوات يمكن وعدول كان توّه رضيع
ابويه بحزن : هي صدق طلقتها
نوره : ليش بابا ليش لو ما كنت بتطلقها يمكن كنّا بنعيش حياتنا عاديه ليش ابوي ..؟
ابويه : بنتي هذا كان يومها لو هي قاعده يمبي بعد كانت بتموت
نوره : الله يرحمها ..
ابويه سرح حسيت بالحزن اللي يشيله بقلبه حسيت فيه هذي المعاناه الصدقيه .. مب نحن مجرد فقدنا حنان وأم ,, أبوي فقد شريكة حياته أم عياله عشرة عمر كانت بينهم تعب وهو يربينا هذي حقارة الدنيا والله ..
نوره : ابوي أبا أعرف السالفه الحقيقية اللي بينكم ..؟
ابويه : نوره تلبسي بنطلع
نوره : لا ابويه اش دراك يمكن بموت اليوم ما بيرتاح لي بال الا يوم تقول لي ..
ابويه : نوره شو هالكلام
نوره : ابوي تعبت من كلام الناس .. ابا اسمع منّك انت ابا اسمع السالفه من صاحبها مو كلام الناس اللي يزيدون ملح وبهارات دخيلك ابوي
أبوي والعبره خانقته ..: الله يطول بعمرج أمج يوم خذيتها خوالج ما كانو راضين لأنهم من عايله غنيه وأنا من عايله متوسطه وعادييه بس يدج ابو أمج كان فيه الخير ما خلّا خوالج يتدخلون بالسالفه وصار وتزوجت أمج عقب سبع سنوات من زواجنا كنتي انتي صغيره وامج كانت حامل فـ عمور أخوج عايشين حياتنا عاديه بس فـ يوم يدج توفّى .. وقالو لازم يوزعون الورث ويدج كان كاتب نص ورثه يي لأمج ونصه الثاني يوزعونه على خوالج
نوره : امممم مو جنه ظلم مهما كان خوالي لهم حق
ابويه : أمج كانت من حرمته الأولانيه وخوالج من حرمته الثانيه وحده متجنسه
نوره : هي عسب جذا ما يحبون أمايه
ابويه : يمكن .. وعقب ما وزعو الورث أمج كتبت نصيبها باسمج انتي وما تقدرين تحركين شي من البيزات الا لــ سن معين
اهني انصدمت أنا أنا لي ورث وأنا ما ادري
نوره : هااااااااه أمي كتبت بيزاتها باسمي ..
ابويه : هي كانت خايفه عليكم من خوالكم
نوره : بس انت حي ابويه وينك عنها
ابويه : آآآه شو أقول لج خوالج ما يفرقون بين الانسان والحيوان
نوره : انزين
ابويه : ويوم ربّت بعمور خوالج تدخلو بينا وهم ماشالله ببيزاتهم يجتلون بها ارواح وسوو سالفه لبسوني تهمه مب لازم تعرفينها وانسجنت
نوره : هاااااااه ابويه انت انسجنت ..؟
ابويه : هي لو تذكرين فتره قالو عنّي مسافر ادرس
نوره : انزين وكيف وليش
ابويه : السالفه أكبر عنّج وايد خلينا فـ سالفتنا عقب ما ظهرت من السجن حوالي سنه وشي تميت مسجون ويوم ظهرت رديت شفت البيت مثل ما هو وأمج بعدها صابره على خوالج واستقبلتني وزادت علاقتنا وقوت أكثر عن أول وخوالج كل أسبوع يهددون بنا ما كنّا عايشين بأمان
نوره : لهالدرجه ما اهتمو للدم اللي بينهم ولا فكرو عندكم عيال
ابويه : عسب تعرفين انّه في ناس فالدنيا جذا
نوره : اوكي
ابويه : عشنا فتره اوكي امج حملت ويابت عدّول كان وقتها عمره كم من يوم وخوالج درو انّه الورث هب باسمج طلعت مسمتنه باسم وحده ثانيه
استغربت وحده ثانيه منو هالوحده يا ربيييييييييه
نوره : من العايله
ابويه : لا لا وحده غريبه والحين مب محصلينها
نوره : يعني سرقت بيزات ماما
ابويه : لا لا محد يدري عنها
نوره : وبعدين
ابويه : ووصتها عليكم بس الحين هذي ضايعه ما ندري متى ترد
حسيت ابوي فـ هالنقطه جذب علي يمكن سجلت الورث باسم أسيل أو اسمه هو ومب راضي يقول لي
ابويه : الله يسلمج خوالج يو صوبنا البيت وتحلفو لو أمج ما طلعت من البيت يجتلون عادل أخوج
نوره : لهالدرجه .. هالسوالف تصير فالأفلام ما توقعت حياتنا بعد جذا
ابويه : شفتي حقارة الدنيا
ابويه : وبعدين غصبوها تطلع يودوها من شعرها ويروها كنت بأقوى ما عندي أحاول اردها بس للأسف واحد يدام جيش
هالحزه أمج تمّت تقول لخالج / انت قاسي قاسي كلكم قاسيين الله ياخذكم واحد واحد وياخذني معاكم /
وخالج ولا أثر فيه دعائها عليه
نوره : لهالدرجه الفلوس لاعبه بعقولهم يشترون بها ارواح بعد
ابويه : هيه .. وعقب أمج ما رضت تطلع وأنا بعد بس آخر شي خالج توعد ان ما ابتعدت عنها بيفرني فالسجن سنين
نوره : هيه
ابويه : جان أمج تقول اذا فروني فالسجن انتو بتروحون وياها عند خوالكم وبيعذبونكم وهاييل عادي عندهم يبيعون عرضهم للفلوس بس اذا طلقتها الحضانه بتكون لي
نوره : بس نحن كنّا صغار مفروض لها
ابويه : هي مخططه انها تعترف بانها تعذبكم
نوره : يعني جذا بتكون الحضانه لك
ابويه : هي .. جان أمج تتحلف ان ما طلقتها هالحزة بتذبح روحها
نوره : فديتها امايه لهالدرجه خايفه علينا
ابويه : وأكثر ،، جان أطلقها ... وكنت على أمل انّي أردها بعد ما تهدا الأمور
نوره : اوكي
ابويه : وصار اللي صار ياني خبر وفاتها بعد كم من يوم وخوالج طلبو حضانتكم بس القانون كان وياي
نوره : لهالدرجه خوالي جذا
ابويه : ما بغيت اخرب صورتهم فـ نظرج بس انتي اصريتي
نوره : وخوالي الحين ليش يبونا
ابويه : عبالهم تدرين منو هاي اللي الورث باسمها
نوره : شي غريب الصراحه
ابويه : نوره احذرج من خوالج بس ها اللي اقدر عليه تدرين الاعمار بيد الله
نوره : لا ابوي لاتقول جيه يعل عمرك طويل
نوره : انزين قوم عمي وين كانو حزتها ..؟
ابويه : عمّج دوام ومرت عمج وعيالها راحو بيت اهلها
نوره : ماشالله مخططين هاييل عديمين الشرف
ابويه : مهما كان خوالج
نوره : لو كانو خواني ما كنت بسامحهم
ابويه : مكتوب وصار وعقب فتره عشنا فبيت عمّج اللي هو كان بيت ابوي وعقب فترا انتي وايد تعبتي كنتي صغيره اضطريت نغير سكننا وعمّج شرا حصتي وحصة عمتج حفصه من البيت
نوره : أهـــاا بس الحمدلله غيرنا سكننا بعدني أتذكر هاك اليوم يوم اروح بيتهم
ابويه ابتسم : عشان خاطرج ويا شكلج عمّج غيّر كل شي فالبيت
نوره : هههه جيه ما استاهل
ابويه : بس الحين خلاص ما تحسين روحج نسيتي
نوره : هيه وايـــــــــــد والله بس جوجو مادري شو بها
ابويه : الله يساعدها حاولي تطلعينها من حالتها اللي هي فيها
نوره : انشالله كثر ما اقدر .. تدري بابا من بعد ما عرفت سالفتك ويا ماما أحس روحي مرتاحه
ابويه : لو ادري جان من زمان قلت لج
نوره : بابا ممكن أقول لك عن شي فـ خاطري
ابويه : ترا في حدود نحن عرب ومسلمين هب أجانب
نوره : هههه لا يروح بالك بعيد بس انت ما تبا تتزوج
ابويه : لا لا روحي مناك أنا وين والزواج وين
نوره : برايك .. بس بعد بحاول بقنعك بعدك صغير ويدامك فرصه ...أنا وعمور وعدول بنكبر باجر ونعيش حياتنا لو أنا تذكرتك هم يمكن ينشغلون مع حياتهم
ابويه : يصير خير
نوره : يلا وين بتطلعني
ابويه : بنروح عند قطوتنا ترا فارنا صوبهم
نوره : ههههه والله جوجو مب قصدها
ابويه : لا تحلفين تراني شباب وأعرف بهالسوالف
نوره : اتس أوكي يلا بتلبس وبيي
حسيت روحي مستانسه جنّه هم وانزاح بغيت اطير من الفرح أول مرّه وصدق صاحب السالفه قال لي اياها مب أي حد
تلبست ونزلت وأنا مستانسه ركبت السياره هالمره جدام عموري محد بابا يقول راحو مع ولد عمتي مادري حمد ولا فهد
رحنا صوب بيت عمّي سلّمنا بس عمّي ومرته كانو موجودين الشباب جامعه ودوام يقولون
رحت صوب حجرة الجوهره شفتها تلعب لعبة تومب رايدر حليلها ما تحب النت هاك الزود أو بالأحرة الاحتكاك بناس جدد عكس جواهر سلّمت عالجوهره وقعدت وياها عقب هي تمّت تقرا قرآن ودرتها رحت صوب حجرة جواهر باختنه الآنسه فـ سابع نومه بصراحه أنا بعد ياني رقاد جان أطلّع عباتي وأرقد يمبها
هاي أول مره أرقد بيت عمّي من سنوات
ما حسيت بـ روحي وأنا أنقز من الريغه من منبه جوجو اللي يقوم بلد كامل وياه
نوره : غربلاته منبهج بنديه صدعنا
جواهر : همممممم جوجو اطلعي لافلعج
رديت لسدحتيه القبليه كنت راقده بس هالمره انسدحت
ورقدت مره ثانيه عقب ما حسيت الا بصراخ جوجو
جواهر : نورووووووووه انتي اهني
زغت : منو شو ..؟ حشا روعتيني يالخايسه
جواهر : متى ييتي
شفت الساعه : أوييييييييه الساعه ثلاث وربع طافتنا صلاة الظهر ويا شكلج مع هالرقاد
جواهر تتراقص : طبعا كنت يالسه ع الايميل
نوره : نشّي نصلي الظهر
نشينا رحت تيددت وصليت عقب شليت مخوره عدله من مال جواهر لأنه مالي تجرفست
لبستها ولبست أوقايتي وطلعنا أنا وجوجو
شفت بابا وعيال عمّي قاعدين شكلهم يشربون جاي حمر أما عمّي ومرة عمّي جنهم راقدين حليلهم الشواب والعيايز الحمدلله بابا بعده شباب ولا نحن بعد نفس العقد
استحيت اروح صوبهم بس جواهر تقدمت منهم وسلمت وقعدت
وأنا بعد بس قلت السلام عليكم وقعدت يمب جواهر فوق ع القنفه
وهم كانو يرمسون عن الشغل
باباتيه : نواري الصبح رقدتي ماشالله
استحيت عيال عمّي اهني شو بيقولون شكلها تبا تعيش ويانا فضيحه
نوره : هي وعيت جواهر من الرقاد ما طاعت تنش جان ارقد
ياسر : هههه ذكيه بنت العم الحل الوسط
ابتسمت وما علقت لأني بعدني ما خذيت عليهم
جواهر : يالخرط .. وعيتيني ولا روحج كان فيج رقاد
باباتيه يدافع : تراني كنت اسولف وياها بعد صلاة الفير اليوم وما رقدت صح نوار
استحيت يعني شو بقول هي عيال عمي بيقولون دفشه
جواهر : لا والله عن شو تسولفون ..؟ ها
باباتيه : بنت وابوها اش لج
جواهر : هي هي بدينا الخيانه ولا تباني اقول لها دوم تيي تتغدا صوبنا هااا
يوسف طالع جواهر نظره تسكّت وجواهر سكتت
ابويه : زين تسوو فيها تستاهل هالحشكليه
جواهر : نواري نشّي نتغدا أحسن
يوسف وقف : جواهر صليتي الظهر ..؟
جواهر : الحمدلله
يوسف : الساعه جم رقدتي ..؟
جواهر : سته الصبح
يوسف : على شو كنتي سهرانه
جواهر : الروايات
يوسف : بجيك الحين لو شي ثاني قسم بالله المودم بكسره حقكم
باباتيه : زين تسوو فيها
جواهر : ما شالله عمي بنيتك تسوو اللي تبا وأنا لأ
باباتيه : بنيتيه ما تسهر على ايميل تسهر على شي ثاني
طالع ابوي صوبي فهمت عليه قصده سالفة أمس هههه يتني الضحكه ونفس الوقت بغيت أصيح على سوالف ابوي اللي تقطع القلب اليوم
ورحنا صوب المطبخ أنا وجواهر
نوره : ابييييييييه صدق بيكسر المودم
جواهر : تراه كسره مرّه .. بيزاته زايده هالولد
نوره : هههه حرام عليج لمصلحتج
جواهر : أنا ما أسوي شي حرام
نوره : بعد يخاف عليج أميه .. بعدين تعالي بيجيك على اللاب وبيشوف
جواهر : مسحت كل شي
نوره : برايج .. تعالي نتغدا ميته يوع أنا
تغدينا أنا وجواهر ويوم سألنا عن الجوهره قالت الخدامه :عليا خذتها وياها السوق تروح تشتري حق زهبتها
عقب تسلينا أنا وجواهر بالسوالف مع بعض الين العصر وبابا ياه شلّاني من عندهم وردينا البيت
رحت صوب حجرتيه
هاي ملجأي وبيتي وكل شي ياااااي مستانسه اليوم عرفت شي مخباي فـ حياتي بس منو هاي اللي الورث باسمها الحين يا ربيييييييه
أمي فديتها حاربت عشانا وابوي بعد اليوم عرفت اش كثر ابوي حنون وأمي بعد حنونه بس اللي احزنني دموع ابوي ما اقدر اشوف فـ عيونه دموع ما أستحمل أشوف دموعه هاي أول مرة وانشالله آخر مرة بعد ..
ابوي وامي حاربو الكل عشانا وامي ودرت أبوي روحه رووحت عنّه وحمّلت مسؤوليتنا على أبوي فديته ما يستاهل وايد عانا فـ حياته واليوم أنا زدت عليه بس حسيته ارتاح يوم شكا لي وأنا بعد ارتحت يوم شكيت له
ويوم بكيت حسيت طلعت همومي مع ملح دموعي
آآآه اش كثر الصياح يريح الانسان وايد وايد
آآه اشتقت لشيخوه ربيعتي فديتها مادري شو اخبارها
هاذيني ارابع الكل شواخ ربيعتي فالمدرسه بس تخلص المدرسه وتيي الاجازة انساها و جواهر وميثا كتسلية وقت وتقضيته أما الجوهره نسيتها مع سوالفنا ومشاكلنا العائليه ووفاة أمي الله يغمد روحهها الينه والله باخذ لج حقج انتي وابوي من خوالي عهدٍ علي تذكرت اليوم وحده بويه كانت حاطه دوبها بدوبي دوم تقول والله لأحصلح واوصل لج عهدٍ علي أحس الكلمه مقززة عهدٍ علي بسبتها وع لوعت بجبدي مب وقتها بين سوالفي الحين
كلهم يحبوني ما دري لشكلي ولا لصفاتي أحس روحي محبوبه بين الكل مادري ها اللي اشوفه أنا ولا الصدق
بس اللي صدق اباه يحبني ما جد يوم فكر بي بعد ولا فكر انّي احبه
مرن أيام الاسبوع بسرعه وياه يوم الجمعه باباتي قال بيطلعنا اليوم نحن البنات
أنا وميثاني وجويلز وجوجوتي بنروح ويا بابا عدول وعمّور بيتمون ويا مرت عمّي
ركبنا السياره بابا ابد ما يشغل أغاني جويلز أصّرت بس ما رضا بعد ما ادري ليش معنه هاي طلعة بنات لازم يرضا بس يلا المهم طلعه
قبضنا الخط واتجهنا لدار الظبي
ما ادري ليش حسيت روحي مستانسه
نادر ما ازور العاصمه أنا ناااااااااااادر جداً
|