ليلك نثر عطره على شاطي النيـل
وأنا ضواني ليل نجد و سريتـه ..

يا مطول الغيبات ياما أطول الليـل
توي دريت إنه سـواد و جفيتـه..

أثر النجوم أكثر من الجدي و سهيل
نجم كتب همي و نجـم محيتـه ..

يا صاحبي عطشان عطشان لك حيل
مظمي و همال السهر ما قويتـه ..

رد السـلام لـمترفـات المناديـل
كحل العيون و دمعك اللي نسيته ..

الدرب ميـت و الخطـاوي مقاتيـل
وإن لاح طيفك مت فيه و حييتـه ..

الله على الضحكة نهار المواصيـل
هاك النهار اللي بـعمري فديتـه ..

قبل أتقهوى مـن كسـالا مظاليـل
قبل السلام و قبل جاني و جيتـه ..

ضم الحشا و أكسر جمود التفاصيل
ما عندي أغلى من خفوق كويتـه ..

لـمصافحك كف و قصيد و هلاهيل
إما زبنـك القلـب والا خذيتـه ..

لو يغري القمـرا ذبـول القناديـل
بعت النهار لـجيتك و إشتريتـه ..

يوم إنتثر عطرك على شاطي النيل
أنا ضواني ليل نجـد و سريتـه ..

مساعد الرشيدي