بدويه
قالت ترى منت بحلو قلت رجـال
والزين ماهو من شروط الرجوله
الزين يلقى عنـد لباسـه الشـال
والرجل زين ان كان زانت فعوله
قالت علامك تلبس شماغ وعقـال
انت بدوي؟ قلت بدوي ومن حموله
ما ألبس بناطيل لها الوان واشكال
وامتر الشارع بعرضـه وطولـه
قالت اجل راعـي معاميـل ودلال
شرب القهاوي تحسبونـه بطولـه
كيفي يابنت الحضر دله وفنجـال
وحليب خلفـه بالمـراح معقولـه
وحب الكرم والجود وعلوم الابطال
مغروس فينا من زمـان الطفوله
قالت ترى بنت البدو حظها مـال
قلت احذري حذرا تكوني جهولـه
بنت البدو يابنت مضرب للأمثال
فوق الجمال وطاعـة الله خجولـه
ماحطت اصباغ ولا حطت ظـلال
ولا سيرت بالسوق سيـر مهبوله
هي مهرة تصعب على كل خيـال
وانت ومثلك عسفهـن بالسهوله
قالت تغزل بي وشف حبة الخـال
ناظر عيوني والرموش الكسوله
قلت العفو مايجتمع حـب وهبـال
ولكـل ذوق فالمزاييـن جـولـه
قلتي وقلت وكلمة الصـدق تنقـال
الزين ماهو من شروط الرجوله
|