ابوه ببتسامه: يعله مبروك يا الغالي
هزاع يقعد ع الكرسي : الله يبارك فيك يا الغالي
شوي ودخل عوض ومكتوم ونهيان باركوا له وقعدوا يسولفون.
نطق مكتوم بعد مده وقال: مستانس هزاع
هزاع والفرحه باينه في عيونه: الحمدلله
مكتوم بفضول: مقتنع من اختيارك!
عقد حاجبينه وقال بحده: امرًا ما يعنيك رجاءً لا تتدخل فيه .
مكتوم باستهزاء: والله مارضى بمطلقه ان ما كانت لي بنت شو اباها عقب الغير ! ورفع حواجبه له بنرفزه.
هزاع ببرود عكس نيران القهر اللي في قلبه جاوب: ومنو قالك انها مب بنت كشفتوا عليها.
انصدم مكتوم وقال : شو يعني !
تدخلت حمده اللي تنرفرت من مكتوم وغباءه وبحده قالت : مكتوم ما تستحي انته ؟! تراها بنت ! بس كانت مالجه وتطلقت ! لكنها ما زالت بنت.
انصدم مكتوم وقال : حلفييييي قولي والله.
حمده بقهر: هذا اللي بيينني والله انها بنت ما صار بينهم شي الا ملجة بينهم بس .
مكتوم يطالع امه بقهر وقال: ليش جذبتي عليه وقلتي انها معرسه من قبل.
ازفرت بضيق ما كان ودها الموضوع ينفتح دام انه شلها من راسه وقالت بقهر منه : تراك صدعة راسي
بقهر قال : ليش انزين جذبتي عليه قوليلي ليش ! عشانها شينه صح ! خايفه تواجهيني بالحقيقه!
امه اللي مسكت الكلينكس وفرته عليه وقالت بعصبيه: انته كفوو انك تكون زوج لها سمعني زين ورفعت صبعها بتهديد انته ما تناسبها وعيونك زايغه وبتفشلني ويا العرب وانا شاريه نسبهم .
ضحك بقهر وهو يقول: قولي من الأول جيه لا تفلمون عليه وتقولًون له حلوه عاد مادري منو هي عشان تحاولون تقنعونه فيها .
ابوه بنرفزه وعصبيه من شاف هزاع معصب ومكور ايده دلاله على انه يحاول يمسك اعصابه مايبا يمد يده على مكتوم وقال بعصبيه: مكتوووووم !!!!
لف على ابوه ولكنه انصدم من الگـــف اللي ياه
مكتوم بلا مبالاه: بس هذا انتوا يوم الواحد يقول الصدق زعلتوا …
هند بصدمه من اللي صار مسكت يد ابوها وهي تقول بترجي: ابويه فديتك اسمعني !! لا تحكمون على مكتوم بس جي حاولوا تفهمونه ..
مكتوم اللي طالعها بصدمه وهو ينطق: سكتتتتي لا تقولين لهم شي مابا من حد رحمه ..
قربت منه وهمست في اذنه: ليتگ ما طريتها بالشينه !
انصدم مكتوم وطالعها بعيونه وقال بهمس مماثل لهمسها: ليش!! انا ماقلت الا الصدق ..
حطت يدها على ظهر اخوها وبلعت ريقها بخوف من نظرات هزاع الناريه وبدون ادراك قالت: والله ما قلت له شي عنها ولا حتى وصفتها له والله …
مكتوم اللي حس انه عايش بدوامه مب فاهم أي شي انتبه على نظرات عوض اللي تدل على انه مكتوم غلطان حس باللي سواه وتقدم من اخوه: اسف سامحني على الكلام اللي قلته ! بسس..
رفع يده هزاع في ويه اخوه وقال: لا تكمل اعتذارك لاني ما بقبله ،، تغلط على كيفگ من دون أي ادله عندك وبعدين تعتذر راقب اقوالك انا شو سويت لك عشان تكرهني .
مكتوم بقهر جاوب: ليش الوصف قدامك حلال وقدامي حرام ليش ماسمعنا اثنينا الوصف يمكن تعيبني !
هزاع بقهر وغل من تخيل له ان ممكن مكتوم ينعجب في لطيفه جن جنونه ومسكة من ياقة ثوبه بقووو وهو يقول بعصبيه وقهررر: انتتته صاحي ولا مينون !
قرب عوض منهم بسرعه وفكگ بينهم من انتبه ان هزاع كان بيضرب مكتوم وقال مكتوم بقهر: انزين ليشششششش عطوني سبب واحد بس سبب يخليكم هالمره ما تخطبونها لي كم خطبتوا لي وايد ليش هي بالذات حولتوها على هزاع وانا محد قالي عنها ..
هزاع بقهر هجم عليه وهو محروق منه ومن كلامه عن لطيفه وكيف يبا يسمع لوصف عنها ! لكمه على ويهه ولكن سرعان ماتدخلوا نهيان وعوض وابوهم وفگوا هزاع عن مكتوم اللي قال: صدقني عافوها أهلها ولصقوها فيگ لانها مطلقه ..
عوض بعصبيه وقهر يدفر مكتوم بالقو: بسسسس عاد شفيييك انته مالك حايه باعراض الناس ودفره وهو يطلعه غرفته امششش جدااامي يلااااا .
اما تحت كان الصمت سيد الموقف ..
هزاع يحاول يهدي اعصابه وابوه قرب منه حط ايده على كتف ولده وقال بضيقه: ماعليه يا هزاع امسحها في ويهي بابويه لكن انته ادرى بمرضه الجنوني في نسوان ..
هزاع بقهر واضح: هذا وهو ماشافها يقول عنها جيه كيف لا صارت بينا شو بيقول عنها .
نهيان اللي تضايق من ضيقة اخوه: ماعليه فديتك انته تدري انه ربك بلاه بحب النسوان وهالمرض ماله علاج الا اذا لقى وحده تحرك مشاعره هي الوحيده اللي بتقدر تسيطر على افعاله وتحركاته وبيتغير وايد طبعا بعد الله سبحانه وتعالى ، بس هو اللي مزعلنها ان امايه وخواتي دوم يوم يروحون يخطبون يفكرون فيه اول واحد لكن هالمره صار العكس..
امه بضيقه : فشلني وفشل خواته كل ما نشوف وحده حلوه نقول هاي بتنفع لمكتوم ونرمس أهلها ونخطبها له وبعدين ننصدم انه فسخ الخطبه ، ماقدر صراحه اورط تفسي زود وبالنسبه للطيفه تراني من شفتها ما بغيتها الا الواحد من عيالي ومايا في بالي الا هزاع لانه ماقد تشرط عليه بمواصفات معينه في الحرمه ومن شفتها حبيتها ،، وماقدرت ارشحها لمكتوم ابداً اخافه يسوي فيها نفس ماسوى في بنات الناس نخطب ونفسخ بحجة قلبه مافز متى يفز ماندري ..
ضحك هزاع غصباً عنه على كلام امه والتمس نبره الغيره في اخوه مكتوم وطبطب عليه نهيان على كتفه يحاول يبرد على يوف اخوه ورن تلفونه ورد بهدوء : مرحبا النسيب
نايف بفرحه: في ذمتي ان فرحتي ما تسع الكون
ضحك هزاع وقام عنهم ساير فوق قال: الله يتمم ع خير فرحتنا يا الغالي
نايف: امين يارب .. بغيت اتخبرك باجر ساعه كم في المستشفى
هزاع يبطل كندورته: والله ساعه ١٠ الصبح زين …
نايف ما انتبه للطيفه اللي دخلت وقال: الله يوفقكم يا الغاليين ويسعدكم
هزاع بوناسه: أمين يارب العالمين الله يسمع منك
لف نايف وشافها وقال: يا مرحبا يا غناتي تعالي فديتج
قربت منه لطيفه وهي مستحيه حضنته بقو بادلها الحضن وهو يقول: متضايقه
لطوف بهمس: متوترة بس قلت اخذ منك شوية امان
ضحك نايف وقال: الأمان كله بتحصلينه عند ريلج عقب
ابتسمت بخجل وقال هزاع: ليش الأمان متوفر حمدلله حتى في حضنها
نايف: عاد لطوف غير من توتر ولا تتضايق افتح حضنك لها وخلها تحضنك..
ضحك هزاع اللي قال: كلي لها والله انا وحضني ..
نايف اللي ضحك ع تورد خدود لطيفه قال بهممس : افدى المستحي والله
هزاع يضحك وقال لنايف: ترا بخطفها منك وبكلمها
نايف يضحك: والله ماعندي مانع الغالي
ابتسم هزاع وتنهد وقال: يلا استودعتكم الله قبل لا اتهور ..
ضحك نايف وقال: في حفظ الله يا الغالي وسكروا الخط
..
بعد عن لطيفه وقال: كلها كم يوم ويسرقج حضن هزاع عني
ضحكت بخجل وقالت بتردد: شو صار ع موضوعك
نايف يضحك: مرتاح جي
لطوف: عايبنك انها من سارت عرس اخوها ماردت البيت ولا انته سرت لها تشوف شو في خاطرها
نايف ببتسامه: اخوج عنده حبيبه مابا اللي تتسمى بنت خالتج
لطوف بصدمه: شو حبيبه !! هي شذنبها بلي صار
نايف يعدل ريوله: ذنبها انها تعرف ولاقالت لي .. وتخاف على نفسها وهذا شي انا ما احبه ..
لطيفه تتنهد: انزين شو كان المفروض عليها تسوي
نايف: المفروض اذا مارامت ع اخوها تخبرني اضعف الايمان وتبري ذمتها وانا اتصرف وياه…
سكتت لطوف عنه وباسته ع راسه وطلعت عنه..
:
بعد مرور يومين وطلعت نتيجة الفحص اليوم هو اليوم الموعود وملجتتهم في المحكمه دخل هزاع عند القاضي وقاله موضوع دخول زوجها عليها وقال: هيه نعم اعرف يا حضرة القاضي بس لا تذكر هالموضوع امام اخوها وابوها .
هز القاضي راسه بهدوء وزقر عليهم دخلوا نايف وابوه ولطوف بعد ما املج بهم القاضي وماذكر أي شي عن اثبات دخول مجرد انها مطلقه قرب منها ابوها وباسها ع راسها وبارك لها وسار يسلم على هزاع ويبارك له ونايف تقدم لها وحضنها بحب ومسح دمعة من عينه وابتسم وهو يبارك لها وردت عليه بحب : يبارك فيك يا الغالي.
مسكها من ايدها وقرب من هزاع وحضنه وبارك له وبفرحه وهو يمسح دموعه: حطها في عينك يا هزاع ولا تزعلها
هزاع بفرحه ما تنوصف وعيووونه عليها: افا عليك يا نايف لا توصيني على قطعه من قلبي وضلعي الايسر
ابتسمت بحيا على انتقاء كلماته لها ..
طلعوا من المحكمه وعند الباب لف بو سعيد على هزاع وهو يقول: قرب والله يتغدا عندنا اليوم
ابتسم هزاع وهو يلبس النظاره وقال: سمح لي الغالي مره ثانيه … قطع كلامه مسكت ايد بوسعيد وهو يقول: والله ماتردني والله يتقرب ..
ابتسم هزاع وهو يقول: تمممم حاضرين يلا توكلنا ع الله
طالعها وهو يبتسم مشى عدال عمه ويسولف وياه اما هي كانت مستحيه من نظرته وابتسامته وصلت سياره نايف وركبت وشوي ركب نايف وهو مستانس وصلوا البيت ونزل وشوي وصل هزاع ونزل ودخلوه الميلس ودخلت عمته تسلم عليه وتبارك له وحبها ع راسها: الله يبارك لج يا عمتيه فديتج .
قعدت عمته وقعد عدالها هزاع وهو يقول: كلمتج الوالده عشان الحفل والبوفيه
عمته: هيه نعم فديتك ياغير انا قتلها بالخميس عشان يمدينا نعزم العرب ..
هزاع : افااا يا عمتيه وانا متحمس اني بقعد وياها ..
عمته: افا عليك يا ولديه حلالك يا الغالي لو تباها شلها بثيابها اللي عليها ..
هزاع يعدل يلسته ويرتب الغتره: اكرم عليج يا عمتيه بنت حمد مالها الا الكرامه واللي يسرها ويرضيها.
ابتسمت براحه: الحمدلله ربي عوضها فيگ لطيفه تستاهل كل خير ..
ابتسم هزاع وهو يقول: ماعليج زوود يا الغاليه ،، سكت وده يقول ابااقعد وياها بس استحى ..
حست به عمته وقالت: تغد وعقب ما تغد وتخلص تراني بخليها تييك ..
انصدم والفرحه بانت على ويهه وقال بصدق: في ذمتج عمتيه..
ضحكت عمته وهي تقول: هيه والله فديتك اني صادقه.
حبها على راسها بكل ادب واحترام وقعد…
قامت على دخول نايف وابوه وسعيد وخلتهم براحتهم عشان يتغدون..
:
فوق عند لطوف دخلت تسبح وطلعت وهي لابسه روبها ووقفت ع تسريحه وتحط مرطبات على جسمها وخذت بيبي كريم وحطت على ويهها دخلت أمها عليها وقالت: لطيفه ترا بتحدرين ع ريلج بعد الغدا
لطيفه بربكه: امايه الله يهديج ما يستوي جيه انا مب مستعده
أمها وهي تشوف لطوف تحط ميگ اب خفيف : يستوي فديتج اليوم الا قعدت تعارف والخميس الحفله …
هزت راسها بربكه وحطت اشدو خفيف ومسكرا وحطت روج نود ورسمت عينها بالايلانر طلعت استشوارها ونشفته وبعد جهد جهيد نشف واستشىورته كتنعيم ونزلت قصتها على طرف ومسكت عطر شعر وعطرت المشط ومشطت به شعرها شغلت المبخره وبخرة شعرها بكسرة عود وفضلت تخليه مفتوح كامل مع نزول القصه طالعه تغرم طلعت مخوره برتقاليه وعليها شك بالابيض والبرتقال وفصوص تحديد على نقشة الكندوره وشغلت المبخر وتبخرة وبخرت شعرها ولبسها وتعطرت وطلعت شيله بيضاء شفافه وحلوه وناعمه بخرتها وعطرتها شافات شعرها اللي طالع من تحت شيله ويابته ع طرف واحد ولبست اكسسووار ناعم مع خاتم بسيط واسواره خفيفه ..
طالعت تلفونها اللي يرن وشافت رقم سلامه: هلا سلوم
سلامه بعصبيه: لطوف صدق اخو عوض خطبج
لطوف ببرود : هيه وملجنا بعد ويوم الخميس الحفله
سلامه بقهر: تستهبلين صح ؟ وحمممد اللي محارب الكل عشانج محارب حتى صحته !
لطوف: شو اسوي وزفرت بضيق الكل يعرف امج ما تباني وابويه ما بيعيد الحركة لو مهره مب حامل جان ماردها له…
سلامه هدت لكن بقهر قالت : صح كلامج وببتسامه مصطنعه مبروك
لطوف تبتسم: الله يبارك لج…
سلامه بضيق: قاعده افكر برده فعل حمد
لطوف: ليش !! ماعنده خبر !!
سلامه: محد قاله بيرد اليوم الفليل
لطوف: يوصل بسلامه
سلامه تتنهد: امين بس عارفه نتيجه بتكون رده فعله صعبه جدا …
لطوف تنهدت وهي تقول: الله كريم ويلطف بحاله ..
سلامه بضيقه: امين
سكرت لطوف وهي متجاهلها كلام سلامه لان الكل يدري كيف امهم ويا لطيفه الله عوضها ..
:
في بيت بو مايد
عهود يالسه عند ابوها وتسولف وياه: وبس يابويه هذي كل سالفه
تنهد ابوها بضيقه ع دخلة مايد وحرمته قعد ع الكرسي وابوها طلع تلفونه واتصل بنايف : مرحبا يا عمي
بو مايد بضيق: افا والله يا نايف ماهقيتها منك
نايف تنهد: ولا انا هقيتها من بنتكم ما تقول الحقيقه رغم انها تعرف وساكته عن الحق .
بومايد وعيونه ع مايد بضيق وقهر: هيه يابويه صح كلامك بس هي ما تبا تتاثر علاقتكم بالموضوع
نايف ابتسم: خلاص يا عمي المثل يقول عليك بالاوليه لو فيها نتف اللحى
بومايد: انزين مالها ذنب عهود بلي صار
نايف بنغزه: ولطيفه مالها ذنب بلي صار بين ولدك وسعيد عشان تكون ضحيه ولا عندك راي ثاني يا عمي
سكت بو مايد مب عارف شو يقول بعدها نطق: مابتي نتفاهم.
نايف اللي ابتسم: لا الغالي سمحلي مشغول بملجة لطيفه
انصدم بومايد وبلع ريقه وقال: ملجة لطيفه
انصدم مايد ولتفت لبوه يبا يعرف الأكيد سمع ابوه يقول: يعله مبروك والله يسعدهم
نايف من كل قلبه قال: امين يارب العالمين
مايد انجلط وهو يطالع ابوه يبارك لهم ،، طلع برى وهو مقهور ضرب ايده بطاوله بقهر وهو يقول: مينونننه هاي والله مينونه مسك تلفونه بيتصل له التفت ع صوتها : متححسسف
لف يطالعها وشاف دموع اخته وهي تقول بقهر: ضيعتنا كلنا يا مايد
مايد بصدمه : انتي شفيج سكتي ماتدرين عن شي لطوف ماباها تأخذ غيري فهمتي لطوف كاسرتني وانا متحسسف ع كل شي سويته لها .
عهود بخنقه: انته ما تستاهلها الله بيعوضها باخير عنگ ..
مايد يضرب الطاوله بيده بقهر ويخلل صبوعه بشعره دخل على قائمة الأسماء دور على رقمها وضغط اتصال تفاجأ بانها عاطتنه بلوك انقهر وهو يقول: يا ويل قلبك يا مايد صارت لغيرك نويت تحرق قلبها واحرقت قلبك .
يلس بقهر وهو معصب وهو مقهور من افعاله وسواته سمع صوت ابوه بحده يقول: ان فكرت تسوي شي ما تلوم الا نفسك ..
زفررر بضيق شوي ويت بنت عمه عنده: حبيبي شفيك
طالعها بقهر وسكت يحاول يضبط انفعالاته وتصرفاته ..
دخل الواتس وطرش لها شلي البلوك اباج في موضوع ضروري تفاجآ انها عاطتنه بلوك في الواتس اب انقهررر اففف مينونه والله مينونه
رجع البيت وخذ تلفون امه اللي كان ع طاوله واتصل بها بس مالقى رد زفررر بضيق ماعليه يا لطفين بينا الأيام وطلع من البيت بقهر وضيق وركب سيارته..
:
في بيت بو سعيد ..
لطيفه قاعده في صاله طالع تلفزيون وتلعب بالتلفون دخلت رقم سلامه وكتبت: سلامي
ردت عليها: هلا
لطوف: انتي زعلانه!
سلامي بضيق: صراحه هيه ما اقدر اجاملج اكثر من قالي عوض انج ملجتي صراحه حمد ما يستاهل اللي تسوينه فيه..
لطوف بقهر:انا شو سويت طول عمري اسمع نغزات امج عني وساكته ومتحمله كلامها ورفضها لي انا ما انلام ما بفرض نفسي على حد ..
سلامه بعصبيه: انزين مثل ما حارب امه عشانج ورافض كل شي لجل عيونج تين بارده مبرده توافقين على هزاع اخو عواضي.
لطوف بقهر: سلامه شفيج استهدي بالله ترا اكثر انسانه تعرف بمعاناتي ويا امج انتي ليش تلوميني ؟!
سلامه بنرفزه وبتسرع: لانج انانيه وما تستاهلين حمد ولا تستاهلين حبه لج صدقيني لو صار شي له والله يا لطوف مايدور بيني وبينج كلام.
لطوف تكلمها فويس وتقول بعصبيه ونرفزه: هبله يا هبله بنعيش في بيت واحد وماخذين خوان وقبل كل شي نحن بنات عم يا هبله لا تستعبطين وتشبكين الأمور وتدخلين الحابل بالنابل فهمتي فكري بعقلج.
سلامه بنرفزه وقهر مكتوم: اصصصص اصصص ولا كلمه انتي في درب وانا في درب وحتى لو جمعنا بيت واحد لسانج مايطيح لساني وطلعت من الواتس انقهرت لطوف وقالت بقهروالله مينونه وهبله…
دخل نايف وقال ببتسامه جميله: يلا ريلج يترياج في الميلس
لطوف تبتسم غصب: والله صراحه مالي مزاج متنرفزه ومب حلوه من اول لقى يأخذ مني موقف .
نايف يقعد عدالها : افا متنرفزه من شو فديتج
لطوف بقهر: من بنت عمك العبيطه
نايف باستغراب :بنت عمي؟ ليش شو استوى!! ومنو منهن ؟
لطوف: سلامه الهبله
نايف حط ايده ع كتوفها وقال: برايها تولي ولا تحطين في بالج والحين يلا عند ريلج
لطوف: نايف أخاف اتنرفز بروحي مغلوله من …
حط ايده ع شفايفها وقال بحده: خليها اخر اهتماماتج وانتي ضبطي نفسج لا تخلين حد يلعب بعصابج وبعدين هي مقهوره منج وحطت موضوع حمد حجة عشان تفج حرتها فيج..
زفرت بضيق وردت شعرها كامل ورى حطت شيله على راسها وتنفست بعمق وهي مغمضه عيونها وعدت لين العشره وزفرة بقووه وفتحت عيونها وقفت عند مراية المدخل وطبطبت ع ويهها ومسكها نايف وفتح باب الميلس ودخلوا مع بعض قرب من هزاع وهو يمسك يده ويشبكها بيد لطيفه وببتسامه جانبيه قال: امانتگ وسلمناگ إياها شي تامر علينا طويل العمر
ضحك هزاع بحب وبهدوء وهو يرص بيده عليها : ابداً سلامتك يطول بعمرك الغالي
طالعهم ببتسامه وطلع عنهم .. لف صوبها بتوتر بلع ريقه بربكة بعد شيلتها عنها وهو يلاحظ خجلها اللي بدا يبتدي بتوريدد وجنتيها مسك شعرها الطويل ويابه قدامه ضحك بحب وقال: احب الشعر الطويل وربي ميزج مب بس بشعر حتى بالجمال.
:
تسارعت أنفاسها وزادت دقات قلبها من بدا يتاملها بحب وحط ايده على خدها يمرر أصابعه الطويله عليها حست بالنفس انكتم عنها من قرب وباس طرف شفتها توترت زود وهي تبعد بدون شعور ضحك وقال: سمحيلي ما استوعبت الا متأخر ياخي انتي تجبرين قلب تايب يميل غصبا عنه حط ايده على خصرها وقربها منه زود باس خدها وتنشق ريحة شعرها رجع خصل شعرها ورى اذنها قعدوا على الكراسي عدال بعض وطالعها حط ايده على ذقنها ورفع راسها وبضياع قال: حطي عينج في عيني لا تكسرين عينج أبا عيوني تشبع من شوف عيونج وابا لا ذكرتج طيف عيونج يغزي على فكري وتستحله نزلت عيونها بخجل وبدت تشبك ايديها مع بعض بتوتر
حب يغايضها وصدمها بحركته الجريئه شلها بخفه وحطها في حضنه وسط شهقتها وصوت ضحكته العاليه حاوطها بكل يديه وخده ملامس خدها اللي حطت كفوفها عليه منعاً للاحراج حرر ايديها من وييهها ومسكهن بيديه ولصق خده بخدها ومرر خده عليه تحت نبضات قلبها المتسارعه وصوت أنفاسها المتسارعه باس عنقها وهو مغمض عيونه بعد عنها من خوفه لا يتهور وبرتباگ گبير قال وهي لازالت في حجره ويمسح على شعرها طويييل بحب : انا ماظني بكون عاقل طول الوقت وانتي جدامي بكل هالخجل والدلع تراج تفتنين قلبي من دون شعور .
حّمرت من الخجل اكثر وارتفعت حرارة وجهها من الخجل بسبة كلامه وقربه نست انها قاعده في حجره واستوعبت من قرب وحاوطها بيديه وده يدخلها بين ضلوع قلبه وبهمس قشعر بدنها واربكها من مرر لحيته على خدها وباسها ببطء على خدها لف ويهها اللي محمّر من أسلوبه وجراءته وعيونها اللي معانقه الأرض ورافضه ترفعهن من الخجل رفع ذقنها له وبهالحظه عيونهم عانقت بعض بلع ريقه من رمشت بدلع من دون قصد منها وغمض عيونه وهو يدفن ويهه في شعرها الطويل وسط ارتباكها من هالمعمعه والاضطراب مب قادره تسيطر على عمرها وعلى دقات قلبها المتمرده بعدت منه من دون شعور وهي تقول: احم اااا وارتبكت زود من حست بيديه على خصرها النحيل وقال من دون لا يطالع في عيونها بعد ما بعدها عنه ويلسها على الكرسي وهو مازال متوتر ويحاول يضبط اعصابه وتوتره الواضح : قتلج العقل نعمه لكني في قربج افقد عقلي واطلع عن سيطره ابتسم وهو يبلل شفايفه وكمل كلامه : انا ماجذبت يوم قلت لج انج تجبرين قلب التايب يميل ترا حلاة شيء ندرة وجوده وانتي نادره في هالزمن أتمنى اعوضج عن كل شيء
ابتسمت وهي تبلع ريقها بخوف وتوتر وهمست بهدوء وبصوتها المبحوح اللي يميزها: ان شاء الله ،، اني اقدر اسعدگ واكون لك مثل ما تبا .
ارتبك من بحتها وقال: بعد الصوت طلع فيه بحه عيل عليك العوض يا قلبي لا تلومينه يوم يغار عليج تراني غيار وبتوتر كمل بس غيرتي مفرطه وتحولني لشخص ثاني وتصاحبها عصبيه مفرطه
ضحكت بخجل وهي تقول: الحين انته مضايقتنگ هالصفة توك تقول حلاة شيء ندرة وجوده
هزاع اللي ابتسم على كلامها وقال بهمس قشعر بدنها: يعني بتّحملين غيرتي! ترا غصباً عني والله ماقدر اتحكم بانفعالاتي ! قبلج خواتي عانوا مني لين الله يسر لهن وعرسن! تنهد وهو يكمل كلامه كانوا يقولون لي الله يعينها اللي بتاخذك ماياها خير.
ضحكت على كلامه وقالت: لا بالعكس والله الغيره امر طبيعي وفطره للعبد من ربه حست بعيونه عليها رفعت راسها وشافته كيف متنح واربكتها نظراته ومسكت خصله من شعرها ورجعتها ورى اذنها وهي تبلع ريقها بصمت .
اما هزاع اللي كان يتأملها طول ماهي تتكلم عيونه على شفايفها ونطقها للكلام رفع عيونه وزع نظراته على عيونها ورموشها الكثيفه وشعرها وخصلها المتمرده نزل عيونه على ايديها اللي شابكتهن مع بعض كان بيقرب بس لف على فتحة الباب حمد ربه ان نايف دخل ولا كان فقد السيطره على نفسه وابتسم وهو يقول: من وين كل هالجمال والرحامه اللي في اختگ ..
نايف اللي من اول مادخل وشاف تتنيحته وخجل لطيفه عرف ان الريال مب في حاله ضحك عليه وقال: ههههههه احرجت اختي يا ريال والله ، شفيگ الله يهديگ
هزاع اللي قال من دون شعور: ياخي اختك تنوكل والله وبينه وبين نفسه قال مال عظ واللهً فديت هالخدود ..
ضحكت بخجل على كلامه ونايف قال: بسم الله على اختي منك يا المتوحش وكمل ضحك هههههههه لطوف استغلت انشغالهم مع بعض وطلعت بسرعه من الميلس وراحت فوق وهي ميته خجل من كلامهم ..
اما نايف وهزاع ضحكوا عليها وطلعوا من الميلس ..
هزاع وهو يركب السياره لف على نايف وقال: اختك نادره والله ،، والحمدلله اني حظيت بها ..
ابتسم نايف وهو يقول بفرحه: ماعليك زود يا الغالي ، والله نحن اللي حظينا بمعرفتك وتشرفنا بنسبگ .
ابتسم هزاع بإحراج وقال: ماعليگ زود يا ولد حمد ،، انا اترخص الحين واسمحولي باذن الله نلتقي بالخميس ..
نايف بفرحه: ان شاء الله يارب …
:
أكتبك وغيرك يقرا مشاعر هالقصيد
أقصدك وأنت عن مقصدي ساهي ♥️
:
ركب هزاع سيارته وقبل لا يحرك قال في خاطره بالله منو يشوف هالزين ويعرض عن جماله محد عرف قدرها مسح على ويهه وهو متوتر قسم بالله بيني وبين الجنون شعره انا وين بتحمل حد يشوفها شغل السياره وحركها على دبي وهو طول طريق يفكر كيف مثلها يتفرط فيه وصل البيت وهو مب عارف اصلاً كيف وصل حمد ربه الف مره انه وصل بسلامه عقله تم في العين دخل البيت وشافهم متجمعين تجنب النظر لمكتوم من بعد اخر موقف بينهم قال: السلام عليكم.
ردوا عليه: وعليكم السلام …
امه بفرحه : مبروك مادبرت يا الغالي فديتك
ابتسم بخفه: الله يبارگ فيج يا الغاليه ..
حمده اللي مستانسه قربت من وحضنته: فديتگ يا عين اختگ الف مبروك ونشل عيالكم.
ابتسم بحب: الله يبارك فيج ، وامين يارب العالمين، الله يسمعها منج ، وحوطها بيديه ثنتين وقال بهمس: سلبت عقلي والله هذي كيف بتحمل حد يشوفها أخاف اجرم فيها
ضحكت حمده بهمس وهي تقول: حلالگ يا خويه شو ماتسوي فيها ما دام انها عيبتگ..
ابتسم هزاع وقال قبل لا يبعد عنها: وربي يا حمده اني ماسگ نفسي عنها بالغصب يا بنت الحلال كلها على بعضها جذابه من ساسها لين راسها وبعد عنها ..
وامه تطالعهم بفرحه وهي مب مصدقه انه هزاع بيعرس وقالت: حمدلله يارب عوض والحين بيعرس وبنشطب عليه ، انته ملجت وبنشطب عليك وقالت بغصه الله يبلغني في مكتوم ونهيان.
هزاع بتنهيده: امين يارب العالمين بتفرحين فيهم ان شاء الله .
مكتوم اللي كان ملتزم الصمت نطق وقال: تكلم عن نفسك ما يخصك فينا.
طنشه هزاع وخصوصا انه مروق اليوم وقال عوض ببتسامه: مبروك الغالي فديتك
هزاع ببتسامه: الله يبارك فيك يا خوي ..
نزلت من فوق وهي مستانسه بالقو وحضنته بفرحه: مبروگ يا الغالي مادبرت والله اني استانست وااااايد والله فرحة لگ والله يشهد اني فرحة لگ فرح وبتعب قالت ياخي ماعرفت أوصل لك مدى فرحتيه خاني التعبير وبوزة بقهر ضحك عليها هزاع وهو يحضنها ويمسح على شعرها الله يبارك فيج يا الغاليه وعقبالج يارب ..
ابتسمت بحب وهي تقول: صدق يعني خلاص اصدق انها بتدخل بيتنا …
ضحك بخفوت وهو يبعدها عنه وقال: ان شاء الله ..
مريوم اللي دخلت وياها صباح ويزغرطن : كلووووووووووش الف وصلاة وسلام عليك يا حبيب الله محمد كلووووووووووولووووش …
ضحك هزاع عليهن وتقدمن منه وحضننه بقوو وهو لف ايديه عليهن وقال: الله يبارك لكن ويفرحكن في عيالكن يارب العالمين ..
قعدن عداله ومريوم قالت : ليش اجلتوا الحفله.
هزاع ياشر على امه قال: هذا شور امايه وعمتيه هن اللي قالن يبن يعزمن الحريم ولا انا كنت مخلص وحاجز ودافع عربون بعد بس كلمت منسقين الحفل وقلت لهم تاجل لين الخميس
صباح بحب : زين زين اهم شي نشوف عروسگ ونستانس ونفرح بكم ..
ضحك وهو يشل بنت مريوم ويبوسها : ان شاء الله بتشوفونها ،، وايييه فديت الخدووود وباسسسها بعمق وقعدها في حضنه وخذتهم السوالف لين فليل ..
:
وبعد الساعه عشر كان في صاله يحوس يدور تلفونه وين سمع صوت عوض ولف عليه ،، عوض كان توه داخل ويرمس سلامه وشاف هزاع وقال لسلامه: برايج سلامه بتصل بعدين وسكر بسرعه ولف على هزاع وقاله: شبلاك !! شو دور .!
هزاع بتعب: ادور تلفوني ماعرف وين عقيته .
عوض: دورته في السياره..
هزاع وهو يحط ايده على راسه: اووف راسي عورني مالقيته !
شوي ونزلت صباح وهي تقول: هزاع شفيك!
هزاع يضيق عيونه وقال: ماشفتي تلفوني !
صباح بتعقيده حواجب: لا والله الغالي دوره زين .
عوض يتصل عليه : صبر انا اتصل عليه ..
عم الهدوء في المكان يحاولون يسمعون صوت التلفون وهو يرن بس مالقوه .
هزاع : بسم الله وين سار !
عوض يتنهد وهو يشوف رسالة سلامه: ( احسگ متغير عليه يارب يطلع احساسي غلط) . تجاهل الرساله ولف على هزاع اللي قال: منو اخر واحد كان قاعد في صاله .
مكتوم وهو ينزل من دري: انا !!
لف هزاع وبهدوء قال: شفت تلفوني .
مكتوم : لا
سكت هزاع عنه وقال لعوض: رد اتصل عليه يمكن يكون طايح بين الكراسي ..
:
:
في بيت بو نايف ،،
بعد ما تعشوا تجمعوا كلهم في الميلس الا لطيفه ..
راشد قال: حمد بيوصل بعد شوي من المانيا .
مبارك بهدوء وهو يتجاهل وجود مهره بعد ما كسرت قلبه قال: هيه ادري ! بسير له بعد شوي !
نايف ماسك تلفونه ويطرش مسجات لحمد: طرت ولا بعدگ .
حمد اللي راكب الطياره: الحين راكبين الطياره .
نايف : توصل بسلامه .
حمد بشوق: شحال القلب!
نايف اللي بردت اطرافه وانشلن صبوعه عن الكتابه شو يقول له الحين ازفر بضيق وبتوتر كتب : الحمدلله وطلع من المحادثه ..
الريم دخلت وهي تسلم عليهم توجهت لعمها خبره على راسها ومن ثم عمتها ومن ثم البنات مهره وشما وقالت: وين لطيفه عيل ..
مهره: فوق في غرفتها.
الريم قالت : صدق عمي لطوف ملجت ولا بتملج!؟
انصدمموا راشد ومبارك وشما ومهره قاموا يطالعون بعض بصدمه كانه صاعقه حلت على روسهم اللي انقذ الموقف رنين تلفون وقام كل واحد يطالع تلفونه ويتبعون الصوت لين لقاه بو سعيد بين الكراسي مكتوب عليه( العضيد) واشر للموجودين : تلفون منو ؟
الجميع قالوا ما نعرف ، رد بو نايف على المتصل وهو يقول: الو
عوض اللي كان حاط سبيكر وتوجهت جميع الأنظار على تلفونه تدارك الوضع وقال: الو السلام عليكم.
بو نايف : وعليكم السلام ورحمة الله وبركاته ،، مرحبا الساع ..
عوض يحاول يميز الصوت وقال: المرحب لاهان الغالي ،، شحالك عمي .
بو نايف عقد حياته وكمل: بخير يعلك الخير يا بويه يا غير منو الريال ماعرفتك ؟!
ضحك عوض اللي قال: عوض بن سعيد فديتك ان ما خاب الظن انك عمي حمد صح !
ضحك بو نايف وهو يرحب به: مرححبا الساااع والله ،، نعم وصلت الغالي ،، حي الله نسيبنا ..
عوض اللي شاف احراج هزاع يوم قال عمه: عيل هذا تلفون ولدنا هزاع نساه هنيه من شاف حرمته شكلها خذت عقله وضحگگ ههههههههـ.
انحرج هزاع وعوض توتر لانه ملاحظ اندماج مكتوم في المكالمه وقال يتدارك الوضع ويشل سبيكر ويحط تلفون علىى اذنه : نعم صحيح يا الغالي هذا اللي حصل .
ضحك بوسعيد اللي قال: زين الغالي قوله تلفونه عند حرمته يوم يوصل العين يدخل الميلس بيلقاها موجوده تترياه .
عوض ابتسم: تم يطولي بعمرك حاضرين الغالي ..وسكر تلفونه ورفع عيونه بضحكه لهزاع اللي انحرج وقال: عمك يقولك تلفونگ عند حرمتك بتلقاه يوم توصل العين دخل الميلس بتلقاها تترياك
ابتسم هزاع وهو يقول : زين يلا بسير اييب تلفوني .
ضحك عوض وقال: ما تبا خوي يخاويك في الدرب ويسليگ ..
ضحگ هزاع وهو يأشر بيده بمعنى لا وطلع ..
:
خدر العيُون وتحتها مبسم غض
ورمشً على الاوجان يغريك ظله ♥️
:
في بيت بو حمد ..
سلامه واليازيه كانن يترين حمد يوصل ولكنهم تفاجؤوا بصرخة راشد اللي قال: امااااااااااااايه
طلعوا ابوه وامه على صريخه وبخوف: شو فيك بسم الله عليك ..
راشد بعصبيه: صدق لطوف املجت ويوم الخميس حفلتها ..
امه تنهدت وهي تقول: حسبي الله على بليسك اتحسب عندك سالفه عنبو طيرت حمامة فوادي بصريخك..
اليازيه انصدمت بالقنبله اللي فرها راشد وامها قالت: هيه صدق وين المشكله افتكينا منها خازت عن درب اخوك
بوحمد يتعوذ من بليس وقال: والله محد فازع لبليس الا امك اللي تمشي وتذم لطيفه لف عليها وقال: يا حرمه ترا عندج بنات امسكي نفسج عن اعراض العرب البنت ماضرتج في شي بعدت عنكم مثل ما طلبتوا ..
راشد بقهر: ولدج ياي في الدرب أبا اعرف شو بتقولين له ؟ وكيف بتواجهينه بالحقيقه المره.
امه بقهر قالت: بيعرس وبينساها ما بيلقى احسن عن بنت اختي عايشه تحبه وتموت عليه ودور رضاه.
راشد بعصبيه: انزين بشوف انا وين بيوديج عنادج وطلع من البيت ورقع الباب بقوو …
:
اليازيه مب مستوعبه وقالت بصدمه: شووو قال راشد توه .
ابوها بضيقه وقهر قال: لطيفه بنت عمج عشيقة اخوج حمد ملجت راحت في نصيبها وصلت المعلومه ولا لا ! ويلس وهو يحاتي ردة فعل ولده سمع مرته قالت: اياني واياج تيبين طاري لحمد لين ماتذلف من بيت أهلها
اليازيه بصدمه: من متى هالكلام ومنو اللي خطبها .
طنشتها أمها وراحت داخل غرفتها.. اليازيه كانت بتروح وراها بس ابوها منعها وقعدت وهي مغتاضه وتهز ريولها بتوتر وعصبيه ..
:
اما في المطار {مطار بوظبي الدولي}
تأخرت طيارة ✈️ حمد في الًوصول الى البلاد ساعتين ووصلت الساعه ١٢:٣٠ ليلا ً ،، مبارك كان يترياه طول هالساعتين وتعب من الانتظار وقعد في غرف الانتظار لين سمع صوت نداء وصول الرحلة القادمة من المانيا ورقم البوابه راح بسرعه وهو كله شوق لخوه اللي غاب شهرين ..
حمد نزل من طياره وكله شوق لبلاده وهله ومحبوبته وصل عند بوابة القادمون ومن طلع في ويهه مبارك حضنه بقو بادله مبارك الحضن وهو يقول: الحمدلله على سلامه فديتگ ..
حمد يبعد عن اخوه: الله يسلمگ من كل شر
مبارگ يشل شنط : نورت البلاد.
حمد بضحكه: بوجودگ وطلعوا برى المطار بعد ما ختم جوازه وقال بلهفه: اخباركم واخبار قوم عمي وشو يديكم ..
مبارك اللي يحط شناط في دبه وانصدم من سوال حمد ، وحمد ربه وشكره ان حمد مب قدامه عشان ما يشوف صدمته وقال ببتسامه فيها توتر: كلهم بخير ونعمه.
حمد سدح سيت وارخى جسمه عليه وهو يقول لمبارك اللي ركب وحرك السياره الصراحه جسمي متكسر ويحتاج مساااج من الخاطر ..
ضحك مبارك بتوتر وهو يحاول انه يكون طبيعي وبتسليك قال: هيه والله اهم شي تفكك عظامگ وتسمع طرقعتهم..
حمد استرخى بهدوء وقال لمبارك بحالميه: رب عمي تغير وتغيرت أفكاره وراجع نفسه في هالمده ..
مبارك اللي انصدم من السؤال وقال: حمد شكل الطياره مأثره فيك شو رايك ترقد لين نوصل العين وايد احسن..
ضحك حمد وهو يغمض عيوونه ومبتسم على امل انه أحلامه تحقق لف على مبارك وقال: راشد وين !
مبارك بهدوء: عند حرمته!
حمد يتصل على راشد اللي رد من اول رنه : مرحبا والله ملاييين ولايسدن والحمدلله على السلامه..
أبتسم حمد ورد بسعة خاطر: مرحبتين ماعليك زود يا الغالي والله يسلمك ويسلم غاليك من الشر..
راشد اللي شاف مهره تقرب منه وتحاوط خصره بيديها اثنتين قال: شحالك ربك بخير..
حمد يبتسم: بخير ولله الحمد وابشرك المعنويه عندي عاليه ولله الحمد
راشد في خاطره الله يستر منك يوم بتعرف المستخبي وقال: الحمدلله ان شاء الله دوم فديتك معنوياتك عاليه ..
حمد قال لراشد: بترقد!
راشد بتتسرع: لااااا وين ماظنيت ارقد …
حمد : انته الحين وين ساكن في بيتنا ولا في بيت عمي ..
راشد يضحك: اكيد في بيت العم عند الحب .
حمد بتنهيدة محب ولهان قال: فديت الحب انا ،والله اني ولهان عليها متخشع اخوگ يا راشد وتنهد بضيقه وكمل كلامه المهم سمعني بلف عليك الحين ..
راشد: تمام من توصلون دقوا لي ..
حمد ينهي المكالمه بالتمام وسكر الخط وغمض عيونه لين مايوصلون العين ..
:
عند نايف اللي كان في غرفة لطيفه وهو يقول: لطوف فديتج ريلج بيي الحين بيشل تلفونه ترييه في الميلس
لطوف بهدوء: انزين ما بتيلس عندنا انته..
نايف: لا والله فيني رقاد وباجر ورايه دوام مافيني عالسهر الحين الساعه وحده وشي ..
لطوف قامت من على الشبريه ومشطت شعرها ونايف قال: يا بخته هزاع والله فيج
ابتسمت لطوف باحراج وقالت: انزين ببدل وبنزل للميلس..
هز راسه نايف وهو يطلع من غرفة لطيفه على قسمه على طول..
:
عند لطيفه ماعرفت شو تلبس الوقت وايد ممتاخر واستحت تنزل ببجامتها لبست جلابيه خفيفه تنفع لليل لونها ازرق ومن عند صدر حركة v وخلت شعرها مفتوح وماحطت شي على ويهها ابدا بما انه ليل وحطت شيلتها الخفيفه على راسها وتعطرت ونزلت وهي شاله تلفونه وتلفونها وتوجهت للميلس انسدحت على الكرسي ومددت ريولها وهي تلعب بتلفونها …
:
في الطرف الاخر من البيت … في قسم مهره وراشد ..
مهره حاضنه راشد وبهمس: لا توتر قدامه تراه بيشگ خلگ طبيعي.
راشد محاوط ايديها بيديه رد بتوتر: والله اني احاتيه ماقدر أتوقع ردة فعله لو درى ..
مهره تحسس على خده: ما بيصير شي فديتك استهدى بالله ..
راشد بضيق يطالعها وقال وهو يسحب دوخته وينفثها في الهوى : اخاااف ينجلط ولا يموت ولا يستوي به شي ..
مهره بعدت عن حضنه بس تفاجأت براشد يسحبها لحضنه وارتطم صصدرها بصدره وطوقها بيديه: تعبااااااان أبا حضنج يخفف عني..
ابتسمت بحب وهي تبادله الحضن وسكتت …
:
عند هزاع اللي كان مدوخ وخصوصاً انه قام الفير ما صدق انه يوصل العين ومسگ خط لبيت عمه ( أبو حرمته) حرك عيونه على الساعه وهو يشوف عقارب الساعه تشير الى الثانية ووربع صباحا ، حس انه بينام وهو يسوق حاول انه يصحصح وقف عند كوفي وطلب كوفي يتسلى فيه لين يوصل بيت حرمته .
اما الوضع عند راشد كان حاس بتوتر وخوف على اخوه انتبه على تلفونه اللي يرن ورد بسرعه : هلا حمد..
حمد اللي كان صوته امبين انه في نوم: همممم بعدگ واعي
راشد بهدوء: هيه ،، حمد شرايك ترد البيت والصبح نتلاقى شكل فيك رقاد ..
حمد صحصح غصباً عنه وهو يقول: لا لا ، بي اسلم عليك يمكن اشوف محبوبة قلبي ��وتسارعت دقات قلبه
راشد يسوي حركات بيده لمهره بمعنى سمعي شو يقول سلك له: زين زين يلا بترياكم تحت ،، ولف على مهره وقال: تين ويايه ..
هزت راسها بحب وهي تقول: همم
قرب منها وهو يشوف عيونها وقال: احبج والله بس والله متوتر وخايف على حمد انا متاكد ردة فعله مب طبيعيه حمد بيننهار يا مهره والله بينهار .
مهره سكتت وهي تحاول تخفف عليه من خلال مسكت يده نطق راشد والغصه ماليه قلبه :بصراحه محد يشگ في حب حمد للطيفه كلنا نعرف ان لطيفه في كفه واهلي والناس في كفه ثانيه ما كان يساوي حد بالطيفه ابداً الله يصبر قلبك يا حمد ويخفف على قلبگ الصدمه كمل كلامه وهو يقول: ليش احس ان في حد ميت واخافه يدري بموته .
نطقت بغصه وهي تشوف دموع ريلها متحجره في عيونه: زين انته ماجذبت حمد مات حبه في قلب لطيفه وبيعرف انها صارت لغيره .
تتغصص راشد من كلام مهره بس هذا صدق لطيفه لازم تشوف حياتها لين متى بتتحمل كلام ام حمد اللي ماخلت كلمه شينه الا عقتها في لطيفه ..
نزلوا من دري راشد ومهره وطلعوا ويلسوا على الدجة( بمعنى الدري اللي يكون قبل باب البيت ويكون مكون من ثلاث درجات او اربع على حسب ارتفاع الدري عن أرضية الحوش) ؛ المهم نرجع لموضوع حديثنا..
التوتر لاعب في راشد لعبه مهره تكلمت وهي تمسگ ايده: سمعني بقولك شي المفروض نحن الحين نكون عاديين مانحسسه بأي شي .
هز راسه بصمت وهو يدعي انه يخف عنه التوتر..
:
في سيارة مبارگ وصل بيت عمه ودخّل السياره داخل في الحوش وشاف مهره وراشد قاعدين عدال بعض وقف سياره قريب منهم ونزل حمد من السياره وهو يشوف لهفة راشد وحضنه القوي له وبصوت مخنوق وهو يضمه اكثر خايف عليه من الألم والوجع والضيق قال: حمدلله على سلامتك الغالي
حمد يبتسم وهو يبادله الحضن : الله يسلمك الغالي …
راشد بعد عنه واستغل انشغال حمد بسلام على مهره مسح دموعه بسرعه وخذ شهيييق عميق وابتسم على كلمة مهره: الله يا حمد راد لنا الحمدلله بنفسيه طيبه جعلها دوووم يارب .
حمد بفرحه: امين يارب ،، وين لطوف عيل !
انصدمت مهره من سوال وقالت بمداعبه: الحين نحن واقفين ومستقبلينك واخر شي تسال عن لطوف.
حط ايده على قلبه وقال: والله ان قلبي يفز لطاريها ودقات قلبي هب عاديه يوم تطرونها وضحگ بفرحه .
تأملته مهره وهي تدعي من قلبها الله يصبره وقالت: شو هالزين كاشخ جنز وتيشرت حركاات .
ضحك حمد وقال: ما لاحظتي شي على تيشيرت .
مهروه تحاول تدقق قالت: لا شي مثل شو ؟ قصدج ماركة التيشيرت!
طالعها بقهر وقال : غبيه انتي ماتشوفين واشر على التيشيرت وقال هذا شو حرف شو !! وضحكگ وههو يقول ادري بتقولون مينون عشان حاط حرفها على التيشيرت بس بصراحه احسها ويايه وين ماروح وهالشيء مخلني احس بالأمان اكثر وخصوصا اني نويت اكلم عمي بنفسي وهالمره ما بسكت عنه ..
كان الكل مصدوم حمد وصل مرحلة الجنون بالفعل الكلام اللي يقوله خطير جدا يحط حرف اسمها على التيشيرت ويحسها قربه وانها موجوده كان الصمت والتوتر سيد الموقف والكل خايف من حمد اللي فعلاً بدت تظهر عليه اعراض الجنون بس الله يسلمه ما يفقد عقله ولا في واحد عاقل يحط حرف حبيبته على التيشيرت عشان يحس بقربها والمصيبه انه يقول يحس بوجودها حوله يعني مب بعيده انه يتخيل طيفها ويكلمها بعد الله يستر،، قطع عليهم أفكارهم دخول سياره غريبه بالنسبة لهم عقدوا حواجبهم بس شافوها مروحه صوب الميالس فتوقعوا ان ممكن سعيد او نايف يايين مع ربعهم ،، تكلم حمد وقال: انزين وينها !
مهره اللي استوعبت قالت بتصريفه: اكيد نايمه شوف ساعه كم ..
حمد بلا مبالاه قال: ويعني ! ماتعرف اني انا راد البلاد!
مهره اللي ماعرفت شو تقول بس التزموا الصمت من سمعوا صوت باب صاله ينفتح وكلهم لفوا تفاجؤوا بوجود بو سعيد اللي كان قايم يصلي قيام الليل ووقف عند الدريشه وشاف ان هزاع وصل بس ما نزل من سياره فقرر انه ينزل له وتفاجأ بوجود حمد والعيال قرب منهم وهو يقول: حمدلله على سلامتك يا حمد
حمد ببتسامه يبوس راسه: الله يسلم غاليك ياعمي وبتنهيده قال شحالك
ابتسم وهز راسه: ليش واقفين حدروا صاله
ابتسم حمد ودخل اول واحد وقلبه يرفرف من الفرح ، اما بوسعيد اللي وصل لسيارة هزاع وشافه نايم على السيت دق الجامع بخفيف فتح هزاع الدريشه وهو يضحك: صبحك الله بالخير يا عمي
ضحك عمه وهو يقول: انزل بس انزل حرمتك ترياك ..
هزاع تمغط وحاول انه يصحصح ونزل من سياره وقال: والله يا الغالي ان ورايه دوام وانا ناش خمس الفير ومارقدت اضطريت ايي اشل تلفوني جان اخذ غفوه شويه !
عمه يبتسم ويحط ايده ورى ظهره قال: هزاع البيت بيتك والحرمه حرمتك لا تستحي انك تدخل وتقعد عندها وبعدين في موضوع ثاني أبا اقولك إياه وزين ان نحن رواحنا ..
هزاع ابتسم وقال: امرني ..
عمه ابتسم وقال: لطيفه لها ولد عم يسمونه حمد اخو سلامه حرمة اخوك عوض ، كان يبا بنتي لطيفه بس انا ماوافقت لاسباب وايد ومن ضمن اللاسباب اني مابا من القرايب عقب اللي صار لمهره بنتي من راشد ريلها واللي صار للطيفه من ولد خالتها لذلك انا قلت لو بيموت قدامي مايوزته لطيفه وهو كان مسافر مايدري انها ملجة وحاليا هو موجود في البيت توه وصل ازفر بضيق واسترسل بكلامه ادري ان الكلام ثقيل عليك وما تقدر تتحمله لكني خايف على لطيفه من حمد لو انه ولد اخوي لكني ماضمنه حمد تراه يحب لطيفه بشكل ما تتخيله حتى انا عمه مب متوقع رده فعله يوم يدري شو بيسوي بس رفع عينه وحطها في عين هزاع وقال بضيق : ادري صعب تسمع مني هالكلام وتتقبله وادري ان في قلبگ نار الغيره تشتعل حاس فيگ من نظرة عيونگ المصدومه ولكني امنتگ إياها من بعد الله انگ تحميها من حمد وغيره وتراها كانت وايد متردده وهي تتخذ رايها بهالزواج لين الله شرح صدرها ويسر لها امورها يا هزاع لا تفرط في لطيفه تراها بنتي عمرها ماقربت الحرام ولا … قطع عليه هزاع وهو يقول: افا يا عمي والله ماهقيتها منگ هالرمسه اللي يشوف لطيفه يعرف انها اصفى من الماي الطاهر اللي نشربه وبعدين يا عمي ازهل موضوعها ولطوف في قلبي قبل عيوني وباس راسه وهو يقول مالك الا طيبه الخاطر لو اني مب مستوعب انه في حد يشاركني في حبها لكني مابخليها باذن الله
عمه يمسك كتفه وقال: اكيييد يا هزاااع ارتاح يعني !
هزاع يبتسم رغم الغيره اللي اشتعلت بقلبه : افا عليگ ، في ويهي مره .
تنهد براحه وهو يقول: ما خاب الظن فيگ يا ولد سعيد في ذمتي انگ قدها وأتمنى انگ تستعيل في موضوع العرس عشان انا ارتاح صدق يا هزاع ..
هزاع يبتسم: عمي انته خايف من شي !
عمه بضيق: والله ان كنت تبا صدق ما قمت اثق في حد ابدا وخايف عليها من حمد واايد .
هزاع يربت على كتف عمه : افا عليك يا عمي انا لها سند وعون..
عمه بضيق: اذا انت كنت قربها دوم ما بخاف عليها لكن ما دام انته بصوب وهي بصوب اكيد اني بخاف عليها انا اباك تشوف ردة فعله. بعينك عشان تفهم قصدي وتعرف كيف تحميها منه..
هزاع يطمنه ونار الغيره مستمره تشتعل فيه ويحاول يتحكم باعصابه : عمي هذا انا ماشفته وانا ودي ادفنه وين لو اشوفه.
عمه يمسك يد هزاع: هزاع انته لازم تشوووف ردة فعله بعيونك عشان تقدر تتصرف معاه عقب ومع غيره ، هزاع يابويه انا فاقد الثقه في الكل حتى في نفسي واخوانها ماظنيت نقدر نوفر لها الحمايه الدايمه لها وكل واحد مشغول بنفسه .
هز راسه بتفهم وعرف شو قصده وابتسم يطمنه ،طلعت لطوف من الميلس وهي تبتسم وتقول: انتوا تسولفون هنيه وانا شوي وبرقد على نفسي من تعب .
لف ابوها صوبها وهي تقدمت بخجل وباست راسه ولفت على هزاع اللي يطالعها بتتنيحه وقالت بهمس: شحالك هزاع
عيونه ما فارقت عيونها وبهمس محب تصاحبه غيره قال: بخير يا قلب هزاع بشوفة ويهج الحلو .
استحت لطيفه لان ابوها ضحك على تتنيحته وقالت لطيفه وهي ترفع تلفونه: أمانتگ ما تباها.
هزاع حاوط خصرها بيده وقربها منه وقال: يفداج هو وراعيه.
استحت بخجل وهي ترفع عيونها تطالعه: ييت من دبي لين العين عشانه والحين تقولي يفداج ورمشت بدلع غير مقصود وهي تضحكگ ..
شد على حضنها اكثر وده يدخلها في قلبه ولا يشوفها حمد ولا غيره ..
بو سعيد اللي ضحگ عليهم وقال: سيروا داخل ان بغيتوا الميلس ولا صاله .
هزاع بتعب: لا والله يا عميييي سمح لي فديتك برد دبي عندي دوام ..
عمه يمسكه من ايده ويدخله الميلس وقال للطيفه : حمد ولد عمج في صاله لا تظهرين خليج انتي وريلج هنيه ولف على هزاع والله ماتروح وانته تعبان ارقد وعين من الله خير وعقب توكل على الله ..
هزاع اللي صدق ينعس لف على لطيفه وقال: لا توترين قالي عمي عن حمد لا تخافين ما يقدر يقرب منج .
ابتسمت بتوتر وقعدت على الكرسي وانسدح على الكرسي حط راسه على ريلها ومدد ريوله على الكرسي وسمع عمه يقول: بييبون لك الحين فراش ولحاف ورقد وعين من الله خير ومن اصبح افلح، وطالع لطيفه وهو يقول خليج ويا ريلج وشوفي شو في خاطره .
لطيفه تبتسم وتحط يدها على راسه اللي على ريله وبخجل قالت: من عيوني ..
بند الليت ابوها وطلع لصاله وقعد معاهم ، اما لطيفه حست بيده اللي حطها فوق يدها وقربها من شفايفه وباس باطن كفها واصبوعها ،استرخى على ريولها ومن تعب نام وهو ماسك ايدها اليمين ولا حس بعمره ولطيفه كانت تلعب بشعره بيدها اليسار وحست انها بتنام سندت ظهرها على مسند الكرسي اللي وراها وسندت راسها عليه وماهي الا ثواني ونامت وكانت ايدها اليمين ما تزال في احضانه وبين ايديه..
:
في الصاله مهره ومبارك وراشد وحمد يالسين يسولفون لف عليهم بوسعيد اللي قال: لا تدخلون الميلس عندي ضيف عزيز وغالي نايم فيه وتوه ياي تعبان .
مهره بفضول: اللي دخل من شوي تقصد ووقف عند الميالس..
ابوها بتاكيد: هيه نعم يلا روحوا رقدوا ومثل ما قلت لكم لا تعتبون الميلس ..
هزوا روسهم بطواعيه وحمد قام واقف وقال: بسير البيت بتسبح وبنام وبعدين بييكم مصحصح ..
ضحكوا عليه ومبارك تمدد على كرسي صاله ونام ..
مهره بتانيب ضمير : قوم نام في غرفة سعيد القبليه
مبارك بحقاره وجفاف: لمي حلجج مابا لسانج يخاطب لساني وقومي اتبعي ريلج اللي راح فوق .
مهره طالعته وبغصه قالت: انا..
مبارك : ان ما ذلفتي براويج شو اقدر اسوي بخليج تبكين ندم انج فكرتي تتكلمين معايه !
تنهدت بضيق وطلعت عند ريلها اللي من شافته حضنته بحب وطوقت رقبته بيديها …
:
:
اما ام سعيد يابت الفراش واللحاف لقتهم رقود لحفت هزاع وطلعت عنهم وسارت صوب مبارك ولحفته باللحاف اللي كان عندها وراحت غرفتها سمعت صوت اذان الفجر توصت وصلت ونامت ..
:
:
:
اما في بيت حمد دخل وسلم على اهله سريع ودخل تسبح ونام …
:
:
:
مر الوقت سريعاً ،،وصار وقت الظهر في بيت بو سعيد ،، الجميع يالس في صاله بعد مارجعوا من المسيد
:
اما في الميلس هزاع كان ناش من ساعه ١١ دخل الحمام وشاف حاطين له أغراض معجون وفرشاه وشامبو وصابون وفوطه وكندوره ووزار وفانيله من عند نايف تقريبا نفس طول وعرض الكتوف ابتسم على اهتمامهم ودخل الحمام تغسل وتسبح ونشف جسمه وطلع بعد ما تلبس صلى الصبح وطلع للحوش وشاف عمه حبه على راسه وقال عمه: عسى ارتحت في الرقاد
ضحك هزاع وقال: دام قربي المعزبه اكيد .
ضحك عمه براحه وهويقول: عسى ربي ما يفرقكم
تنهد هزاع وقال: امين يارب العالمين ،، لا تحاتي يا عمي ترا قلبي من امس يفكر ويحاتي لا تخليني اشتت عقلي
هز راسه عمه بصمت وقال: ان ما قلنا لحمد الليله بيخرب علينا الملجة
بهدوء وقهر جاوب: وهو شو يخصه
عمه يخرف الرطب من النخله وعطى هزاع وحده وحط الباقي في سله: ما يخصه لكن بتضاربون مع بعض
هزاع بقهر ياكل الرطب ورد على عمه: انزين خلنا نتضارب وبدفنه لك والله يا عمي
عمه ضحك غصباً عنه وقال: الحين في ذمتگ لطوف خذت قلبك في يومين
ضحك هزاع باحراج وهو يحك اذنه ورد عمه عليه: تراك ملجة يا المفهي في المحكمه صدق ان لطيفه لاعبه فيك حتى ناسي انك مملج عليها ، ضحك على عمه باحراج يوم فهم قصده وكمل عمه كلامه: الحين تاكدت ان بنتي في ايدينك بامان بعد الله ودليل اني قلت لك بيخرب ملجتك وانته ناسي انك مالج عليها في المحكمه واستمر عمه يضحك وهو يحس براحه انحرج هزاع زود وراحوا لين وصلوا عند باب الصاله بس هزاع استاذن وراح الميلس ما يبا ياكل بدون لطيفه رجع وانسدح على فخذها وهو يتامل ملامحها وهي نايمه اعتدل في قعدته وحس ان رقبتها بتعورها من هالكرسي حضنها بهدوء وهو يسمي عليها وحط راسها على فخذه وبدا يلعب بشعرها طويل شافها عقدت حواجبها وبدت تفتح عيونها بانزعاج باس يبهتها بحب وهدوء اعتدلت في يلستها وهي مستحيه منه وقالت بصوت هادي وخفيف: بروح اتسبح واييك لاتروح اوك
هز راسه وهو يتنهد رن تلفونه وشله ع طول وهو يشوف لطيفه تطلع وشعرها وراها تنهد تنهيده متعبه وسمع ضحكت عوض اللي قال: هاه وين مختفي ! أقول لا يكون انته عند الحب !
ضحك بهدوء وزفر بتعب: هيه عندهم
عوض بضحك: اسميها يابت راسگ بنت حمد
هزاع اللي حس بكهرباء من طاري حمد قال بهدوء: يابته نعم بنت ابوها ( تجنب ذكر حمد عشان ما يفقد اعصابه) .
عوض يتنهد: تستاهل كل خير يا خويه في ذمتي ربي يتمم لكم على خير وفرحه .
ابتسم وبغيره قال: امين ويعيني على نفسي لا اين ( اجن)
ضحك عوض وقال: افا بعيد الشر عنك من الينان..
شافها داخله عليه وهي متلبسه وكاشخه وقال لعوض: بعدين بتصل بك وسكر وهو يرحبها استحت زود وتوترت وبهدوء قالت : قوم نتغدا
هزاع اللي سحبها لحضنه بقوو وطوقها بيديه قال: شبعان من شوفج .
استحت من جراءته كانت تبا تبعد عنه لكنه قربها منه زوود وباس عنقها بعد شعرها وهو يقول حتى شعرج الواحد يغار منه ابتسمت بهدوء وهو يحضن ويهها بگفوف ايديه ويتامل عيونها وشفايفها وغمازتها رموشها الكثاف وطوال تنهد بتتعب وباس خدها وهو مغمض عيونه حس بحرارة أنفاسها وتسارع نبضات قلبها حط ايده على صدرها وهو يقول بهمس ذوب قلبها وذوبها: تعلم يفز لي قلبج ولا بعده …
ابتسمت بخجل وهي تنزل عيونها تحت كرر جملته وهو يرفع ذقنها بيده وعيونهم عانقة بعض وبهمس محب وهم مطولين النظر في بعض : تعلم يفز لي ولا بعده ..
ارمشت بعيونها على سواله كانها تجاوبه بهالطريقه ،، ابتسم وهو يقرب منها وقبل رموشها وهو يحط ايده ورى ظهرها وثانيه ورى رقبتها وقرب منها زود وباس طرف شفتها بعد عنهـا وقال بضياع: انتي تضيعين قلبي وتخبصيني عادي بس انا يوم اقرب منج اشوفج صامده
ضحكت بخجل وببحه قالت: اذا همت فيگ ترا من صعب جدا اني ابعد عنگ واخليگ وبخجل ضيع هزاع قالت مادامگ تقدرتسيطر عليه ( وتاشر على قلبها) وتربكه بحضورگ وقربگ شوف ردات فعله وبعدين حكم عليه .
قربها اكثر منه لين لصق جسمه في جسمها زود ويبهتها ملاصقه يبهته وعيونهم معانقه بعض وعيونها فيها من الخجل كثير والكثير وهو عيونه فيهن غيررره وحب وبهمس: فكرة انه حد غيري يحبج ويباج تذبحني مليون مره فما بالج ان هالفكرة حقيقه وان هالشخص موجود بينكم بعد ..
ابتسمت بخجل وهي ترجع خصل شعرها ورى وبعدت عنه وهي تيلس قربه وبتنهيده قالت: ابعد هالفكره من بالگ عشان نعيش مرتاحين ولا تلقي لها بال ! وان كنت خايف من ردة فعله ! انا ما أخاف الا منگ !
هي تتكلم وهو بس يتبعها بعيونه ويطالعها شو تقول كملت كلامها بعقلانيه ومنطقيه وهي ترجع طرف من شعرها ورى ظهرها ولاحظت ان يده ترجف مسكتها بخوف وهي تقول: ليششش !! ترجف! غيران!!
غمض عيونه يحاول يسيطر على غيرته خايف من هالحقيقه المره سمعها تقول وهي ترص على ايده المرتجفه: هذا اللي انا خايفه منه عرفت ليش قلت لك انا ما أخاف الا منگ ،، لان الحين التفكير بيلعب فيگ وممكن توصلك لشگ الوهمي لذلك انا اقولك مب مهم منو يحبني ! وكم واحد يحبني ! الممهم من هذا كله اني انا أبا منو واحب منو ؟ والاهم من هذا كله ! انا لمنوه ولقلب منو ؟! ومنو اللي حظيت فيه وحظى فيني!
ابتسم على كلامها اللي خفف غيرته شويه ولكن مب قادر يسيطر على اعصابه اللي بدت تفلت: لا تكدر خاطرك لو شو ما كان ردة فعل حمد بتحرقه هو مب انته،، انته تجنبه وتجنب انگ تشوفه بصراحه الموضوع شوي حساس لان انتوا بعد نسايب .
عظ على شفايفه بقهر وهز ريله بتوتر لفت ويهه بيدها الناعمه الصغيره وحطت عينه في عينها وارمشت بدلع وهي تقول: عشااااانييي .
ذاب من حركتها وسحبها لحضنه وهو يقول: ياررب يصبرني لين العرس لا تخليني افقد عقلي ..
ابتسمت بحب وبهدوء قامت وقومته وياها : يلا تعال نتغدا تراك ما كلت شي ، وبعدين لفت بويهه صوبها وهي تشوف فرق طول بينهم ضحكت بمستحى وباحراج قالت: عادي تتقرب شوي بقولك شي.
ضحكگ عليها يوم لاحظ انه أطول عنها بشوي بس بعد ما تطوله الا اذا انحنى لها وقرب منها وهو يقول: امرررري يا قرة عيني..
ابتسمت بخجل ووقفت على أصابع ريولها عشان تكون بمستوى طوله وطبعت بوسه على خده بهدوء بس كانت بوستها عميقه وكفيله انها تنسيييه كل الهموم والضيقه اللي فيه .لف عليها شافها كيف محمره ومنزله عيونها عنه حتى ما انتبهت لروج اللي طبع بخده بسببة بوستها ابتسم بحب وقبّل كفوف ايديها ورن تلفونها وقالت: ويي نسيتهم يتريونا على الغدا.. مسكت ايده وهي ترد على أمها وقالت: يلا يايين ..وسكرت عنها.
:
في غرفة الطعام كان الكل موجود سعيد وحرمته ونايف ومهره وراشد ومبارك وشما امهم وابوهم يتريون لطيفه وريلها ، في الحقيقه كان الكل متوتر مب عارفين كيف بتكون ردة فعلهم تجاه هالشخص هل بيكون مقبول او منبوذ بينهم وخصوصاً راشد اللي ما وقف من هز ريوله بتوتر وحس بمسكة مهره وحاول يرتخي ، اما مبارك بصراحه كان يشوف ان زواج لطيفه من برى العايله افضل حل لها لانها انسانه عانت وايد من امه وكلامها
:
:
برى قبل غرفة الطعام ، هزاع بضيق مسك يدها: مابا لطوف ادخل ..
عقدت حوايبها وقالت: افا ليش !
طالعها كيف تنغم الكلمه وطولها وقال بهيام: لا تعذبيني ترا الوقت مب لصالحنا وبجديه شوي قال مابا اشوف عيال عمج .
لطوف تقرب منه : والله يتدخل اوله واخره بيعرفون وبعدين هذا نصيب يا بن الحلال تعال بس وشبكت ايدها بيده ودخلت وهي وهزاع رباعه قالوا : السلام عليكم..
الصدمه حلت على راس مبارك وراشد انه هزاع نسيبهم اما نايف وسعيد قربوا به وسلموا عليه بحرارة وشدت عليه لطيفه بيدها عشان تحسسه انها قربه لف على ترحيب مبارك له وهو يبتسم ويقول: مرحبا الساع بالنسسسيب كيف الحال وخاشمه ..
ابتسم هزاع وضحگ: بخير ونعمه ولله الحمد ..
مبارگ: مبروگ ما دبرت ..
هزاع شد على ايد لطيفه زود وقال: الله يبارك فيگ
استوعب راشد الموضوع يوم مهره قالت: شفيك الريال ما يعرف عن حمد وحبه قوم قبل لا يشك في شي ..
نش راشد وباين عليه الارتباك وهو يقول: مرحببببا بالنسييب شو هالمفاجاه صدمتونا .
ضحك هزاع اللي حس برتياح شوي انهم متقبلين الموضوع : كل شي صار بسرعه الحمدلله
راشد يبتسم: مبروووگ ما دبرت ..
هزاع يرد له الابتسامه: الله يبارك فيكم ..
سعيد يضحك: هيه صراحه صدمه ، صدمه قويه بعد بس الحمدلله متقبلينها بكل فرح وسرور ..
ضحكوا جميعا وقال بو سعيد: قربوا عالغدا ..
قعدوا يتغدوا هزاع كان قاعد عدال لطيفه اللي طول القعده ماسگ ايدها من تحت الطاوله وهي تبتسم بتوتر ووتحاول انها تلهى في الاكل رفعت عينها على ابوها اللي طالعهم وهو مبتسم وحاس بإحراج بنته وزادت احمرار اكثر من نظرات ابوها ومهره وشما المصدومات من روج المطبوع على خده وهو شكله مب حاس ،، ضحكة مهره غصباً عنها ونايف اللي حاول يتدارك الوضع مسگ بوكس تيشو المبلل( المناديل المبلله ،،، الوايبس) اللي حاطينه وسط طاولة الاكل شل حبه وبعد ماتغدوا وقام هزاع يغسل ايده قام نايف وراه وبعد ما غسلوا أيديهم نايف باحراج قال وهو يمد تيشو: مسح اللي ع خدك وضحك غصباً عنه.
عقد حوايبه وقال: شو فيه خدي ولف على المرايه وانصدم بالروج المطبوع مسحه بتيشو وهو يقول لنايف بغيظ : يا بن الحلال كان نبهتني من قبل باشاره او نظره ياخي ماحب حد يلمح شي من اثارها عليه وثاني مره نبهني فشلتني قدامهم وانحرج وهو يشوف نايف وقال بغيره: ماحب حد يشوف أي شي يخصها حتى لو كان كحل سايح على كندورتي مابغي حد يشوفه وين روج وقدام الملأ لف على دخلة مبارك وراشد بيغسلون أيديهم وطلع هو ونايف من المغاسل وساروا الصاله ويالسين يشربون جاي احمر وصل الجميع وقعدوا مع بعض ..
:
:
اما في بيت بو ححمد ..
:
نش من رقاد وهو يشوف ساعه ٤ ونص نش بسرعه ودخل الحمام وتسبح ونشف جسمه وتلبس كندوره عربيه ومتعصم بالغتره الحمرا رش عطرررر واندق الباب لف ببتسامه وهو يقرل: مرحبا باليازي ..
اليازي تضحك وتقرب منه وتحضنه: المرحب لاهان الغالي شحالك فديتگ كيف نومه
حمد يضحك: نفسيه حلوه ونومه احلى
اليازيه: اشوفگ مستانس ومتكشخ على وين ان شاء الله بوشهاب ..
حمد يضحك وتنهد: ساير صوب اللي معذبه قلبي ولهان عليها موووت..
اليازيه دق قلببببها بقووو وتنفسها تسارع وقالت بمحاولة ابتسااامه: هممم ايلس عندنا يا حمد عنبوه وصلت الصبح سلمنا عليك ورحت تنام نشيت الحين بتسير بيت عمي انته مافيگ شوق لنا.
حمد بتعب وعذاب: وربج المعبود ان غلاها فاق الخيال ماتخيلين كيف شوقي لها يزيد …
توترت اليازيه ودها تبكي وفي نفسها تسب لطيفه اللي باعت حب حمد برخص التراب شافته متجهه للباب وقالت وهي تطلع وراه حمددد شفيگ انته سافهه االكل عشانها خلها تولي .
بعصببه لف عليها وهو يمسكها من زندها بقووووو وتنفسه يتسارع قال : شو قلتييي !!
اليازيه بقهر وكره: قلت خلها تولي .
حمد رص على زندها بقوو وعيونه تشوووف الألم في عيونها وقال : محد يوليييي غيييرج اسفهج انتي ولا اسفهها شو من قلب عليكم تكرهونها ماسوت فيكم شي ..وجي تجازونها..
اليازيه بقهر : انزين روح لها ونحن لا تقعد عندنا بتلقاها ولهانه على شوفتك تترياك وراحت عنه وهي متغصصه تدري ان لطيفه موافقه برضاها واللي سمعته من مبارك اليوم عقب الغدا اكد لها هاشيء ان لطيفه متقبلتنه وانه ميت عليها وطاير فيها..
راح حمد عنها وهو يزفر بغيض خربت موده حاول يتجاهلها عشان بنت عمه ..
:
:
:
برى البيت واقفين راشد ومبارك ونايف وسعيد وهزاع يسولفون من لمح مبارك حمد قبض راسه وخصوصاً ان هزاع الحين بيروح البيت لكن ان شاء الله ما يستغرب وجوده وصل حمد الي سلم عليهم وهزاع كان سلامه جداً بارد وهو ماسك نفسه ..
حمد مروح داخل البيت سمع نايف اللي قال: ابويه وامايه روحوا العزبه محدد..
دق قلبه هزاع في هالحظه بسرعه من تذكر كلام عمه وسمع نايف يقول : يلا عيل السموحه منكم بسير ورن تلفونه في هالوقت وروح ركب سيارته وسعيد اللي شل عمره وحرمته وساروا دبي ، انصدم هزاع شو هالتشتت وانا بعدني ما سرت كل واحد فل من البيت ومبارك انسحب وراح بيتهم يكمل نومته لان نومة الكرسي عورة ظهره وراشد راح ويا مهره العزبه تغيير جو ..
:
هزاع ماعجبه الوضع وحس بغيره وخصوصا ان حمد يبين انه مب ياي لهم تنهد بضيق وهو يقول بدخل داخل وايد ابرك لي حرمتيه وما أّأمن في حد ..
:
:
عند لطيفه بعد ما تسبحت ونشفت شعرها استشورته وحطت ميگ اب خفيف ولبست لبس جلابيه خفيفه مخصره وحطت بخور وتبخرت وبخرت شعرها اللي ابتسمت وهي تشوفه واصل لين الأرض وتذكرت هزاع يوم قال حتى شعرج اغار منه ابتسمت بخفيف وحب ،،كثفت الماسكارا على رموشها وحطت روج نود على شفايفها المليانه التوتيه ..وتعطرت بعد ما تبخرت وحطت دهن العود تحت اذنها .. لفت على صوت المسج( مرحبا لطيفه انا هزاع خذيت رقمج من نايف خلصي وتعالي انا موجود في الميلس لان حمد ولد عمج موجود في الصاله اللي تحت وانتي بروحج في البيت ، عمي واخوانج ككل واحد راح بصوب وانا صراحه مالوم عمي يوم وصاني عليج..) ،،ارتجفت ايديها من عرفت ان حمد هنيه بس قالت في خاطرها بخلي نفسي عاديه وبسلم عليه وبروح الميلس عند هزاع وتنهدت بصيق وهي تقول انا ماوعدته بشيء عشان أخاف لبست شيلتها وطلعت وهي تنزل من دري بسرعه وشوي ودعمته
:طططررررووواااخخخخ
لفت على الصوت وهي تقول برجفه: اسفه والله اسفه
حمد اللي طاحت منه صينيه الحلاوه قال : تفداج ياًبنت العم كنت بسير لج فوق ماسلمت عليج
ابتسمت بتوتر وهي تشوف نظراته التفحصيه واللي فاضحه شوقه قالت بتوتر من شافته يقرب منها: حمدلله على سلامتگ .
حمد يتاملها وهو يقرب منها يبا يحضنها وبشوق وهيام ونظراته تتفحصها وهي ترجع ورى من الخوف وهو يقرب اكثر لها لين صارت قريبه منه حييييييل وانفاسه تلفح عليها وقال: تعالي قربي مني خليني اروي قلبي قبل عيني
رجعت ورى بخوف وهي تقول : تكفى حمد ابعد عني الله يخليگ
قرب اكثر وهو يقول بتفحص وحب: شو سويتي فيني اعترفي ليش انا بالذات اللي مب مسيطر على قلبي ودقاته يوم يشوفج شهقت بخوف من حست انه سحبها وطاحت في حضنه وهي تصرخ بكلمة حمددددددد ابعددددددد تكفى لكنه تجاهل صراخها وخوفه منه وطوقها بيديه وبعشق فاضح ودايخ من قربها وريحة عطرها وشعرها قال بهيام خالطه ضياع وحنين وهو ينحني عليها وباسها على خدها اسمحيلي بس ما قدرت اسيطر على نفسي وبهدوء قال لا تقاوميني بها طريقه اهدئي تراني حمد مب مايد .
غمضت عيونها بقهر وهي تحاول تبعده عنها وهو يشوفها بس كيف تقاومه وماتروم حتى تبعده طبعاً اختلاف البنية يلعب دور شو ياب بُنية رجل عند بُنية انثى ، ابتسم وقال : مايضر لو تميتي في حضني شوي على ما يقولون نبرد لوعة المشتاق .
دفرته عنها وهي خايفه من قربه وصرخة بصوت عالي لما شافته عصب من بعدته عنها وحاوطها من خصرها وبأسها بعشوائية بكل مكان وهي تصارخ وحمد قال بهيام وهو ذايب فيها : وين اقدر اسيطر على قلبي وهو في حبج تعدى المستحيل انتي أولا وأخيرا ل….… وبتر جملته يوم حسسس انه طايح في الأرض بقو لطوف حطت ايدها على شفاتها بخوف وهي تشوف حمد اللي طاح وقربت من هزاع وهي توقف وراه مسح دموعها بخوف وحب عليها وهو يحاول يطمنها ، لف حمد عليهم ورافع حاجبه بعصبيه وحاجب نازل قام واقف وهو يقول للطيفه: سيري فوووق وطالع هزاع بعصبيه وقال: انته قدها هالحركه ؟
هزاع بعصبيه وغيره معميه عيونه وهو يشوف لطيفه كيف كانت خايفه وترجف وصرختها وصلت له لين الميلس ويوم دخل و شاف اللي شافه ركض له بجنون ودفره على الأرض وهومازال يشوف الخوف بعيونها تهجم على حمد بكل غل وحقد وقال بقهر: قدها وقدووود وانا ولد ابويه عشان تعرف كيف وحط ريله عند رقبة حمد تتعدى على حرم غيرگ ..
حمد اللي لازال يجهل معرفته بهزاع بعّده عنه وضربه بوكس على خشمه ولكن هزاع استدار ويت ضربه في كتفه
|