قصيدة المدلهمة ::.::
المدلهمـة والهـمـوم وحنيـنـي
والوجد الاشهب والضلوع الهميـدة
كـل المناظـر لا طريتـي تجينـي
يا دار عزي يـا ضواحـي بريـدة
والحاقديـن الحسـد والعاذليـنـي
وديـار نقصـى والرجـال البليـدة
كل عجـز يحتـال بينـك وبينـي
عتقتـي الحيـلات وانتـي جديـدة
طرت عليّـه فـي ديـار الخمينـي
والنفس شفقى والمسـاري بعيـدة
ضاقت علي وهلـت الدمـع عينـي
وعرفت وش معنى الضروف العنيدة
تسبـل دموعـي ويتبيـح كنينـي
كنـي وحيـدٍ فاقـدٍ لـه وحـيـدة
حنا وراء كاشـان نفـرق يمينـي
وانتي بنجد ودون حايـل وضيـدة
نفحت هواك اللـي تمـر البطينـي
هبت وتلت مـن خفوقـي وريـده
يا دار يا اللي كل مـا قلـت وينـي
جتنـي مثـل أم تباكـت ولـيـده
فيك الرجال اللـي تبـرك سمينـي
أهل الفعول اللـي خطاهـم سديـدة
يوم انها مبطـي وهـي بالثنينـي
بالسيف والعقل الحكيـم ورصيـده
وهم رجالـك كـل حـزه وحينـي
فوق الأصايـل والبكـار الفريـدة
الله يرحـم ماضيـات السنيـنـي
من قبل لا تنشـف مـوارد زبيـدة
وانتي رجالـك بالمواقـف تبينـي
مـع الإمـام يثبـتـون العقـيـدة
أنـا بَقـول الحـق والله يعيـنـي
وليا احتمت نـاري بَـدق الحديـدة
إليا سجدت وحـب رملـك جبينـي
ذكرت قـول اللـي أسمـى حفيـده
يومه يقول اسمع وانا ابوك زينـي
وعينه شرار ويمسك الرمـل بيـده
يقول لا تغفـل جـزاء الوالدينـي
وربك خلقك وصر من احسن عبيده
وأن خيروك تعيش بـس سنتينـي
عش بالقصيـم ولا تعـدى بريـدة
كلـه طرالـي وقـت ذاك الحنينـي
ويا ليتهـا رحلـة عديـم وسنيـده
أن كان انا ما جيت عنـد اللعينـي
راع البقالـة واشتريـت الجريـدة
وقعـدت ادور صـورة معزبيـنـي
فيصل ولد بندر وصـورة عضيـده
وازريت ادور صـورة الياسمينـي
اللي تفرعن في شعيـب السويـدة
واثري بعيد ووين انا عنك وينـي
والنودلـي مـا يصلـون لبريـده
وكل الجرايـد والصـور للخمينـي
ولخامنيـه اللـي يلقـب طـريـده
وضاقت على ديار فـارس بحينـي
وسبـوق طيـري كنهـن بوريـده
ولديت في ربعي وهـم مستحينـي
وحاولت اجمّع بس جملـة مفيـدة
قلت انتم اصلاً ما عرفتـوا حنينـي
ويحول يا اللي ما سكن في بريـدة
|