.
.


قفلّت بابك يالمجامل ... وعزمت
ولاخير في شخص ٍ يرد بكلامه
على كثر ماكنت وافي / وقدمت
قامو يحطوبي / عيوب وملامه
بموت ما والله لطيبي / تندمت
نادم على المعروف بأهل الرخامه
وميت من الخذلان باللي تعشمت
ومستغرب لطعنة خوي واتهامه
ياما انظلمت ولابيومٍ .. تظلمت
العمر يمضي وآخر العمر خامه
الحين انا من كل موقف / تعلمت
ولا زادت النكبات / زدت بفهامه
عرفت بأني لو نجحت وتقدمت
لابد من شخصٍ يصوب سهامه
وعرفت وين الفرق كاني تحيزمت
رفيق عز .. ولا رفيق الندامه
وعرفت كيف الصبر يومي تألمت
وكيف اني اهزم ضيقتي فابتسامه
ماقمت افكر بالبشر واعمل بصمت
ولا اشوف عدوان اشوف الزعامه
عاهدت نفسي ما اتراجع و حرمت
مألتفت صوب الردي و الهلامه
وابشرك ياللي تبي طيحتي قمت
والله لاموت ولا تموت الكرامه
تركت لك كل الحكي / ماتكلمت
صمتي / يبي يهزمك شر انهزامه
ببقى انا مثلي انا / ماتحطمت
بعامل الصادق .. بصدق وشهامه
والوافي لامنّه طلب شي / تممت
لو احذف عقالي واحذف العمامه
أحقر رفيق اللي معه لو تخاصمت
يبوح بأسرارك / ويعلن خصامه
وأوفى رفيق اللي ليا شافك اقدمت
يقدم .. ومتساوي مقامك مقامه
الغالي لاسلّم من القلب.. سلمت
ومن باعني برخيص / مع السلامه

الشاعر مبارك الحجيلان