يالله يامزهوم ياقاضي النوب
تفرج لمن قلبه توالت همومه
وجور الزمان اللي على القلب مشبوب
جمره غضا ومولعاتٍ حزومه
تشب ناره من ذعاذيع وهبوب
والنود لافه في نوايف رجومه
والجو خيم غيم من هم وكروب
ليله بهيمٍ وادلهمت غيومه
في زمهريره موت والجو مقلوب
متخالطٍ برده ولفحة سمومه
كني صويبٍ بين الاضلاع مصيوب
والا العليل اللي تظيمه هدومه
بان انهزامي منه و الحال مسلوب
وموق عيني ماتهنا بنومه
شربت كأس الحب كوبٍ ورا كوب
واسقاني الصبره بنفس ظلومه
غديت له لعبوبةٍ بيد لعبوب
يلعبها مابين ليله ويومه
ولا كما اللي طب في السوق مجلوب
هذا يبايع به وهذا يسومه
لا والله إلا طحت في غي رعبوب
واصبح مسيري بين طيحه وقومه
نفيس ومثمن و غالي ومحسوب
تطمع طماميع التجر في قسومه
حماه رب الكون مافيه عذروب
الا انه زايد في حلاه النعومه
مجار مايحمل عذاريب وعيوب
سبحان ربٍ كمله في رسومه
قلبي من اسبابه جريحٍ ومتعوب
وسيف حبه بيناتٍ ثلومه
متى استريح من المعاناه واتوب
واهنأ ويسعد خاطري في قدومه