الجزء الخامس
رنا
بعد ماركبت السيارة غصب عني نزلت دمعتي ..
بس على طول مسحتها .. لان مالي خلق اصيح ..
وزيادة على كذا راسي يوجعني ..
سألني فواز : هاه وش قالت ؟؟
رنا : نفس الكلام الاول ..
فواز : اجل ليش متعبتنا .. ومستشفى خاص وهم نفس الكلام ؟؟..
رديت وانا ضايقه فيني الوسيعه : بس حبيت اتأكد ..
فواز : والحين خلاص ارتحتي ؟؟..
هزيت له راسي يعني أيه .. ماكان يدري ان هاذي نهاية راحتي وبداية عذابي وآلآلآمي ..
احمد
نمت نوم مو طبيعي ..
توي صاحي من النوم ..
قمت وتسبحت وصليت المغرب والعشاء..
ولبست قميصي ونزلت ..
وكالعادة رنا مو موجوده ..
هاذي لو انها مو بالعده .. وش تبي تسوي ؟؟
اكيد ماراح تقعد في البيت ابد ..
شفت سدومه جالسة تلعب بألعابها في الصالة ..
شلتها وقعدت العب انا وياها واضحكها ..
احمد : يمه ابي قهوة ..
امي : قومي مرام جيبيها لاخوك ..
قامت مرام وقبل لاتطلع من المطبخ ..
دخلت ست الحسن والدلال ( رنا ) للصالة ..
ولما شافتني على طول رقت فوق حتى من دون ماتسلم ..
ازين لاني مابي اسمع صوتها ..
شلت سدومه وقمت بروح للملحق : مرام جيبي القهوة للملحق ..
رنا
ياربي فوق اللي فيني ..
يجيني هاذا هو ووجهه وينكد علي زياده ..
ودي بس اعرف وش يبي بالضبط ؟؟
تكفون اللي يعرف يقولي ؟؟
رقيت فوق لغرفتي ..
ماعندي الا غرفتي اجلس فيها ..
ياربي ابنتحر من هالحاله ..
مليـــــــــــــــــــــــــــــــــــــــــــت مليــــــــــــــــــــــــــــــــــت ..
يارب ساعدني يارب ..
دقيت على امي ابي اوسع صدري شوي ..
رنا : هلا يمه ..
امي : هلا والله .. هاه بشري وشلونك وشلون اللي ببطنك ؟؟
اللي ببطني !!
اللي ببطني يمه يقولون ميت وانتي تقولين وشلونه ؟؟ ..
رنا : بخير الحمد لله .. كل شي زين ..
امي وكأنها حاسه اني اكذب : اكيد يابنيتي كل شي زين ؟؟
رنا : ايه يايمه .. تتوقعين لو فيني شي بيخلوني اطلع من المستشفى ..
امي : والله لو أنك عندي كان مهيب هاذي حالتك .. بس وش اقول ؟؟ مااقول غير الله يصبرني ..
رنا : ميخالف يمه مابقى شي .. يعني صبرت كل هالشهور مانتي صابرة هالشهرين الباقيات ..
امي : الحين انتي بأي شهر ؟؟
رنا : دخلت السابع ..
امي : اجل هانت .. الله ياربي يسهل لك ولادتك وتقومين لنا بالسلامه ..
رنا : الله يسلمك .. ويعظم اجرك ويجزاك الجنه ..
قعدت ادردش مع امي حوالي النص ساعه .. وسالفة تروح وسالفه تجي .. عن اخواني عن خوالي عن عماني .. تكلمنا عن أشياء كثيييييييييييرة ..
احمد
فيه اشياء بالدنيا ماتستاهل تضيق صدرك عشانها ..
والله اني ارتحت لما صرت ماافكر برنا .. او بالاصح ارتحت لما صرت اتجاهلها ..
اليوم خميس .. لازم انبسط فيه ..
بعد ماتغديت .. ريحت شوي بالملحق ..
وكان فيه بندر .. لعبت انا وياه كورة بالسوني ..
جتني مرام ..
مرام : احمد ؟؟!
رديت عليها وانا متحمس مع اللعب : خير ؟؟
مرام : خل عنك اللعب والتفت علي .. ابي اقولك شي ؟؟
يووووووووه من هالبنات يعني لازم اناظرها عشان اعرف وش تبي : تراي اسمع قولي وش تبين ؟؟
مرام : وشلون تسمع وانت قاعد تلعب ؟؟!
وقفت اللعب والتفت عليها : يالله قولي .. صح انا اسمع بوجهي مو بأذني ؟؟
مرام : بسم الله وش فيك عصبت ؟؟
احمد : الحين انا معصب .. يالله قولي ؟؟!!
مرام : نبي نطلع ..
غمضت عيوني وتنهدت : انا احين احسب عندك سالفة .. يالله بس توكلي على الله ..
ولفيت على بندر وانا اقول : يالله كمل لعب ..
رنا
مسكينه مرام طفشانه هي وسارة ويبون يطلعون ..
كنا جالسين في الصالة نشرب شاهي بعد الغدا ..
خرمت معنا على هالشاهي ..
تجرأت مرام وراحت تقول لأحمد يطلعها ..
مرام وهي تطلع مع باب المغاسل الفاصل بين الصاله : بروح اقوله واللي يصير يصير .. خلاص مليت من البيت ..
سارة وهي متحطمه : اتحداك يوافق .. لا تتعبين نفسك ياحلوة ..
تركتها مرام وراحت ..
سارة وهي توجهه الكلام لي : وانتي مامليتي ؟؟!!
ضحكت باقوى ماعندي : هههههههههههههههههههههههه .. حلوة كثري لي منها ..
سارة وهي تناظرني بأستغراب : وراك متي من الضحك .. مااتوقع فيه شي يضحك ؟؟
رنا : سؤالك بحد ذاته نكته ..
سارة وهي تتنظز : هه هه هه ماتضحكين ..
رنا : الحين انتي طفشانه وتحطينها فيني ..
سارة : وش اسوي طيب .. ابي اطلع خلاااااااااااااااااااص .. مليت ..
رنا : اوكي اذا ماوافق احمد روحوا مع بندر ..
سارة : ياشيخه روقينا .. الحين لو يطيع احمد معجزة فما بالك ببندر .. اكيد الكون بيصير فيه شي ؟؟؟
قبل لا انطق بكلمه ..
دخلت مرام وباين عليها الزعل ..
رنا : هاه بشري ؟؟
مرام : وش ابشر فيه ؟؟.. بشارة زي وجهي ..
حبيت امزح معها : والله انك صادقه بشارة زي وجهك .. مو حلوة ..
مرام : انا من يومي ووجهي نحس ..
رنا : ميخالف هونيها وتهون يابنت الحلال ..
دق جوالي ..
لما شفت الاسم .. على طول قمت ..
سارة : وين ياحلوة ؟؟
مشيت وخليتها ورقيت فوق ..
سمعتها تقول : احلى يالحركات بدينا بالمغازل من هالحين ..
دخلت غرفتي وقفلت الباب قفلتين كأني بسوي جريمه ..
طبعا انقطع الخط .. لاني مالحقت ارد عليها ..
دق مرة ثانيه .. وكنت متحمسه لهالمكالمه ..
رنا : هلا ..
ريم : هلا والله .. وشلونك وش اخبارك ؟؟ بشرينا عنك ..؟؟!
رنا : الحمد لله بخير الله يسلمك .. انتي وش اخبارك ؟؟ وش اخبار بزارينك ...؟؟
ريم : الله يسلمك كلنا بخير ..
رنا : هاه جبتي لي اللي وصيتك عليه ..؟؟؟
ريم : افا عليك .. اجبيه وانا ريم بنت محمد .. اكتبي عندك ..
اخذت قلم وورقه وكتبت الرقم ..
رنا : وش اسمه هو ؟؟
ريم : اسمه الشيخ ( .............)
رنا : اوكي حبيبتي الله يعطيك الف عافيه .. والله انك افرجتي لي هم على قلبي ..
ريم : الله لايجيب الهموم ..
رنا : آمين ..
ريم : يالله اجل انا بروح اشوف شغلي مع هالبزارين .. امانه اذا تبين أي شي .. لايردك الا جوالك ..
رنا : الله يجزاك الف خير .. عزيزة وغاليه .. مع السلامه ..
ريم : الله يسلمك ..
سكرت السماعه وانا قلبي يرجف بقوة ..
احس اني خايفه من اللي بسويه ..
الله يستر علي .. ويتتم علي كل اللي ابي اسويه ..
احمد
وكالعاده هزمني بندر ..
قمت بروح لخواتي بشوف وش يبن ؟؟
تنحنحت قبل لا ادخل ..
سارة : ادخل مافيه احد ..
دخلت وجلست : وين امي ؟؟
سارة من دون نفس : نايمه ..
احمد : وانتي وش فيها اخلاقك مزفته ؟؟..
سارة وهي تبتسم ابتسامة استهزاء : ابي اطلع يعني وش فيني ؟؟
احمد : وين تبين تروحين ؟؟
سارة : لجنهم الحمرا .. بس هماي اطلع ..
احمد : هههههههه اف .. لجنهم الحمرا .. خلاص بوديك لجهنمك .. بس مو تقولين حر وتقعدين تتأفيين لي ..
قامت وهي معصبه : تنكت حضرتك .. ترى دمك مرة ثقيييييييييييل ..
وطلعت من الصاله .. ورقت لفوق ..
التفت على مرام اللي من دخلت وهي ساكته : وش عندها سندريلا ساكته ؟؟
ناظرتني نظرات زعل وقامت ولحقت سارة ..
عمى يعمي ابليس .. وش فيهن ذولي ؟؟
وش انا مسوي لهن ؟؟
ليكون انا اللي مضيق صدرهن وانا مدري ؟؟
بروح اراضيهن واوديهن للي يبن ..
رقيت فوق لغرفتهن ..
اللي جالسه على السرير واللي منبطحه عليه ..
بصراحه حالتهن تصعب على الكافر ..
احمد : عندي لكم مفاجأة ..
سارة وهي تعدل جلستها : قل ولا تكثر ..
جلست على السرير وانا مبوز ( يعني ماد شفتي زعلان ) : افا هذا وانا جاي براضيكن وبقولكن يالله قولن أي مكان وراح اوديكم له ..
نقزت مرام قصدي السندريلا .. تو كانت طرما بس يوم سمعت ريحة طلعه طلع لسانها : واللـــــــــــــــــه بتطلعنا احمد ..
احمد : ايه بطلعك وراك تشققتي ..
مرام وهي ترجع تنبطح على السرير : تشققت من الوناسه واخيرا حن قلبك علينا ..
رديت عليها وانا اتثيقل بالكلام : شفتي عااااد .. واخيرا حن قلبي عليكم ..
سارة : وين بتودينا ؟؟ لايكون بتاخذنا تقضي اشغالك وحنا بالسيارة بس ننتظرك ..
حبيت العب باعصابهم : افكر .. لان عندي مشوار مهم جدا لازم اخلصه اليوم وباخذكم معي منها تتمشون ومنها اقضي شغلي ..
مرام وهي معصبه : مالت عليك وعلى طلعتك .. ورنا عرض اكتافك واطلع برى ..
احمد : امزح والله امزح .. شوفوا تبون من بعد العصر الى المغرب .. والا من صلاة العشاء الى 12 ..
سارة : لا نبي بالليل ازين عشان نتعشى من المطعم ..
قمت وانا اقول : خلاص بعد صلاة العشاء تكونون جاهزين ..
وطلعت ..
رنا
ياربي احس اني خايفه ..
ادق والا ما ادق ..
طيب وش ابي اقوله ؟؟
ياربيه قد ايش انا غبيه ..
اكيد بيقولي نزلي الولد .. مافيها كلام هاذي ..
اجل ليش انا اتعب نفسي وادق ..
لا ..
ابدق وبشوف وش يقول ؟؟
يمكن يكون كلامه غير ..
يمكن الشرع له حكم ثاني غير حكم الدكاترة
توكلت على الله ودقيت وانا ارجف من الخوف ..
رن ورن ورن ورن ..
واخيرا رد .. ليته مارد لاني ميته خوووووووووووف ..
رنا : الو
..........: نعم ؟؟
رنا : السلام عليكم ..
.........: وعليكم السلام ..
رنا : انت الشيخ (..............)
الشيخ : ايه نعم ..
رنا : ياشيخ انا عندي مشكله وابي استشيرك فيها ؟؟ ممكن ؟؟
الشيخ : تفضلي يابنتي قولي مشكلتك ..
رنا : انا ارمله وحامل والحين بالشهر السابع .. تجيني آلآلآم قويه من دخلت الشهر الخامس .. بس احس آلآلآم تموتني .. قبل اسبوع رحت وسويت اشعه لاني خفت يكون الجنين فيه شي .. طلع الولد اللي ببطني ميت .. بس انا ياشيخ احس بحركته ببطني .. لان عندي بنت .. ونفس الحركه اللي كنت احسها ببنتي الحين احسها بولدي .. فما ادري وش اسوي ؟؟ لان الدكتورة قالت لي لازم تنزلينه وانا رفضت لاني احس بحركته يعني ولدي حي .. الله يوفقك ياشيخ وش اسوي ؟؟ انا مالي الا الله ثم انت ..
الشيخ : بسألك اسئلة ومن خلال هالاسئلة راح اقولك ..
رنا : تفضل ياشيخ اسأل ؟؟
الشيخ : اول شي انتي سويتي اشعه مرة ثانيه ؟؟
رنا : ايه وقالوا لي نفس الكلام ..
الشيخ : طيب كم عمر بنتك ..
رنا : عمرة سنتين وشوي ..
الشيخ : انتي متأكده انه يتحرك ..
رنا : ايه متأكده ..
الشيخ : انزين متى بدت مع الآلآم ؟؟
رنا : تقريبا شهرين ..
الشيخ : طيب تحسين بضيقه صدر دايما وانك مخنوقه وودك تطلعين ..
رنا : دائما ..
الشيخ : قبل لاتجي الآلآم او بعد ؟؟ ..
رنا : لا من زماااااااان ..
الشيخ : فيه احد تكرهينه مرة مرة مرة ؟؟؟
وش ذا السؤال ؟؟
ياربي وش ابقوله ؟؟؟
اقوله اني اكره احمد ؟؟
لا لا مستحيل ..
وهل فعلا انا اكرهه والا بس عشان لقافته معي سميت هالمشاعر كره ..
لا لا بقوله مااكره احد ..
رنا : لا ما اكره احد ..
الشيخ : اكيد ؟؟!!
كأن الشيخ حاس اني اكذب فأكدت له اني مااكره احد : اكيد ياشيخ ..
الشيخ : شوفي يابنتي انا ما اعلم الغيب ولكن من كلامك هاذا انا استنتجت شي واحد بس قبل لا اقولك بتأكد منه .. دقي علي بكره في نفس الوقت ومايصير الا الخير ان شاء الله ..
رنا : ان شاء الله ..
سكرت السماعه وانا احس اني مشوشرة ماادري وش اسوي ؟؟
احس اني شوي واستخف ..
طلعت من غرفتي ورحت لغرفة البنات ..
لاني كنت بنزل بس لما سمعت اصواتهم بالغرفه ..
رجعت لغرفتهن ..
دخلت عليهن بدون مايحسن ..
واشوف الحوسه .. وانوع الترجيم من ملابس من جزمات ( وانتم بكرامه ) من شباصات ..
ياساتر هاذي غرفة والا وشو ؟؟
رنا : خيييييييييييييييير وش ذا ؟؟؟ وش عندكم حايسين الدنيا اللهم صلي على محمد ؟؟
سارة وهي طايرة من الوناسه : باركي لنا .. قرر اخونا المصون يطلعنا ..
بصراحه فرحت لهم : والله ؟؟ الف الف مبروك عقبالي ..
سارة : على ايش عقبالك ؟؟
رنا : اطلع من هالسجن .. انزين وش دخل الطلعه بهالحوسه ..
سارة : يختي من الوناسه قلنا نضف الغرفه قبل لا نطلع ..
قلت وانا اضرب كف بكف : ماشاء الله عليكم خوش ترتيب ..
احمد
صليت العشاء ورجعت للبيت لقيت سارة ومرام لابسات عبايتهم وجالسات عند الباب ..
احمد : ياسرعكم للطلعه ويابطأكم للشغل ..
مرام : تراك ذليتنا بهالطلعه بما فيه الكفايه .. حرام عليك اسكت ..
احمد : خلاص سكتنا .. يالله امشوا .. الا وين سدومه ليش ماجبتوها معكم ؟؟
مرام : اوووووووووه احمد بتقعد تبلشنا .. وحنا مو فاضين نمسك بزارين ..
احمد : مالك دخل انا اللي بمسكها بس جيبيها ..
مرام وهي تتأفف : اوووووووف لازم ينكد الطلعه ..
راحت تجيب سدومه ..
اما انا وسارة رحنا وركبنا السيارة ..
رنا
كنت جالسة في الصالة مع خالتي لما طلعوا البنات ..
رنا : خالة ورى مارحتى معهن توسعين صدرك ؟؟
خالتي : واخليك لحالك .. لا والله مانيب رايحه ..
رنا : وانا وش يبي يجيني ؟؟ بروح لغرفتي وبنام وش بقعد ازين تجلسين معي ..
قبل لا تتكلم دخلت مرام ..
رنا : خير وش جابك ؟؟
مرام وشكلها محتره من هالحر : الامير يبي سدومه ..
استغربت من كلمة الامير : ومن هو الامير ان شاء الله اللي يبي سندريلتي ؟؟
مرام : وتتوقعين من هو الامير يعني ؟؟ .. اكيد بيصير احمد !!..
رنا : روحي لقولي للأمير سدومه بتنام ..
مرام وهي مستانسه من ردي : الله يجزى والدينك بالجنه .. انا اصلا ماابي اجيبها .. بس هو اللي غصبني ..
وطلعت تركض ..
ضحكت عليها .. بعض الاحيان مرام عليها حركات تضحكني .. بس بعض المرات تقهررررررررررررررررني .. مثل سالفة الألف ..
صح ماقلت لكم وش سويت فيها ؟؟
روحوا شوفوا ردة فعل احمد لاني رفضت اعطيه رنا .. بعدين ارجعوا لي ..
احمد
طلعت مرام على طول ..
توقعتها تتأخر لان اكيد رنا ماتطلع سدومه الا ملبستها احسن لباس .. حركات حريم ..
بس قلت يمكن ان رنا قالت لمرام اطلعي وانا برسلها لكم بعد ما ألبسها ..
ركبت مرام ..
من دون ما أسئلها استنجت كل شي .. يعني مايحتاج اسأل ..
بعد مامرت دقيقة ..
مرام : الحين انت وراك ماتمشي ؟؟
عقدت حواجبي : ليش وين سدومه ؟؟
مرام : بالله عليك الحين طالعه وما معي احد ومسكره باب الشارع .. من وين تبي تجي سدومه ؟؟
احمد : وليش ماجبتيها ؟؟
مرام : امها تقول تبي تنام ..
بعد ماقالت امها تقول .. بلعت لساني وسكت ..
امها قالت يعني خلاص .. لا احد يقول شي بعد كلام امها ..
والله حاله .. ماخذه راحتها على الاخير هالرنا ..
حاولت انسى الموضوع وسألت خواتي : وين تبون تروحون ؟؟
مرام : اول شي نبي سوق (................) ..
احمد : ياحبكم لهالسوق .. وش تبي تشترون .. يكفي ملابس .. انتم ماتشبعون ..
سارة : ياربيـــــــــــــــــــــــــــه منك يا أحمد مستحيل نقول لك شي الا تعلق .. ياخي لو مرة بحياتك اسكت ..
مايكفي اني بالع لساني عن رنا .. تبيني بعد ابلع لساني عنكم .. مستحيييييييييييييييييييل ..
احمد : خلاص سكتنا .. اعوذ بالله من هالحريم ياكلونك بلسانهم ..
رنا
لما جت الساعه عشر ..
وبعد ماتعشينا انا وخالتي ..
دخلت خالتي تنام ..اما انا جلست في الصالة لان بنتي عيت ترقى فوق تبي تكمل لعب ..
نزلت من على الكرسي ومددت رجليني .. وانا اهوجس وافكر باللي راح يقوله لي الشيخ ..
شوي واسمع صوت واحد يتنحنح ..
زينت جلستي وتغطيت وانا اقول : ادخل ادخل ..
دخل وعلى طول شال سدومه وطلع ..
هذا بندر ..
ما أدري ليش يعجبني هالآدمي ؟؟!!..
على انه عسر ومايطيع احد الا اني استانس عليه ..!!!
يمكن لانه اصغر مني ..
لاني انا بعض الاحيان استصيغ اللي اصغر مني ..
مرت ربع ساعه ..
بعدين سمعت صوت سدومه عند الباب ...
تغطيت : ادخل
دخل وحط سدومه بمكانها ..
بندر : وين امي ؟؟
رنا : دخلت تنام ..
بندر :من زمان والا توها داخله ؟؟ ..
رنا : لا من شوي.. بس الاكيد انها نايمه ..
بندر : اهاااااااا انزين وين خواتي ؟؟
ضحكت عليه اصلا مايدري وش يصير في البيت ؟؟؟ عشان كذا يسأل ..
رنا : خواتك طلعوا مع احمد ..
بندر وهو يمووووووووون بقوة : وين راحوا ؟؟
رنا : والله يابندر انا مدري ..اذا صرت معهم ذيك الساعه بقولك وين راحوا ؟؟
طبعا كل هالاسئلة وهو واقف ..
بندر وشكله مستحي : طيب ممكن اجلس ؟؟
ضحكت عليه .. شكله شارب له شي : ههههههه اجلس .. اصلا انا كنت برقى قبل لاتجي تاخذ سدومه ..
بندر : لااااااا .. انا قصدي اجلس معك بالصاله ..
طيرت عيوني ( طبعا مايشوفها ) : خيييييييييييير تجلس معي .. وين عايشين حنا ؟
بندر وهو يتريق علي : ليش ماتعرفين وين حنا عايشين؟؟ .. اعلمك حنا عايشين بالسعودية ..
رنا : والله .. احلف بس ؟؟
بندر : والله العظيم ..
وجلس على اقرب كرسي عنده ..
بندر : رنا وش اللي ببطنك ؟؟
قايله لكم اكيد شارب له شي : هههههه وانت وش دخلك وش اللي ببطني ؟؟
بندر : افااااااااااا .. ترى انا عمه او عمها ..
رنا : بندر .. تراك زودتها ..
بندر وهو يتكلم من جد : سألتك بالله وش اللي ببطنك ؟؟
ابتسمت : بندر من جدك قاعد تسأل ؟؟
بندر : ايه والله تكفين رنا قولي لي ؟؟
رنا : وماتعلم احد ..
بندر : وعد ..
رنا : وان قلت لاحد ؟؟ وش راح اسوي لك ؟؟
بندر : ان قلت لاحد .. اممممم امممممم سوي لي اللي تبين ؟؟
رنا : بس انا مابي اسوي لك شي ..
بندر : تكفين رنا تكفين ~.. ودي اعرف ؟؟
رنا : ولد ..
بندر وهو متشقق من الوناسه تقل هالحين هالولد ولده : احلفي انه ولد ؟؟
بعد بعد شين وقوي عين .. يقولي احلفي والله مهزله : والله ولد ..
بندر والى الان الابتسامه شاقه الحلق : وش بتسمينه ؟؟
قعدت استهبل عليه شوي : بسميه على اسمك .. عشان يطلع حبوب وطيب ومطيع ..
بندر : شفتي وش راح يصير ولدك اذا سميتيه على اسمي .. راح يطلع قمة في الاخلاق ..
رنا : واااااااااااااضح .. الله لايضرك .. انت قمه في الاخلاق ..
قمت وشلت بنتي ..
بندر : وين رايحه .. خليك مستانسين ؟؟..
رنا : عطيتك وجه زياده عن اللزوم .. ما تلاحظ ؟؟
بندر وهو يقول بكل حزن مصطنع : حرام عليك حطمتيني .. كسرتي بخاطري ..
رنا : كويس والله تعرف بالتحطيم وكسرت الخاطر ..
بندر وهو يوقف وبدى صوته يخشن : وش قالوا لك ماعندي احساس ؟؟
مشيت ابروح للدرج وانا اقول : اشك بصراحه ..
مارد علي لانه طلع من الصاله ..
اما انا رقيت فوق لغرفتي ..
وانا مستغربه وفي راسي الف علامه تعجب ..
غريب اليوم بندر وش عنده ؟؟
نادرا مااتكلم معه ..
بس هالمرة احسه زودها .. جالس معي لحالي .. ويسأل اسئله ماله شغل فيه .. وقاعد يتضحك وينكت ..
الظاهر انا كل يوم بتطلع لي سالفه جديده بهالبيت !!! ...
احمد
صدعوا راسي ..
مايتعبون من محل لمحل ..
يالله عليهم مايملون ..
حلفت عليهم هذا اخر محل يدخلونه .. طفشووووووووووووني ..
خلاص بطلع من هالسوق ..
وقفت عند باب المحل وهن داخل ..
جلست اتفرج على البترينه والملابس اللي عليها ..
عجبتني بلوزة مررررررة حلوة ..
لونها احممممممممر .. ساده بس في نفس الوقت نااااااااعمه ..
دخلت للمحل وقلت للموظف يطلعها لي ..
قعدت اتمقل واناظر فيها .. بصراحه مرة عجبتني ..
بس من اخذها له .. ناديت خواتي ..
احمد : مرام وش رايك فيها ؟؟
اخذتها مرام مني وقعدت تناظر من ورى وقدام : معجبتك ؟؟
احمد : ايه حلوة خوذيها لك ..
مرام وهي تمدها لي : لا مو حلوة مابيها .. شف سارة يمكن تعجبها ؟؟؟..
راحت وخلتني ..
ناديت سارة : سارة وش رايك فيها ؟؟
نفس الحركه اللي سوتها مرام سوتها سارة : ليش عندك هاذي حلوة ؟؟..
احمد : ايه ليش وش فيها ؟؟
بصراحه شككوني في ذوقي <<< على بالي تحطمت ..
سارة : احمد الله يعافيك بصراحه ومن دون زعل .. ذوقك زباااااااااااله ..
طيرت عيوني من هالكلمه ..
عصبت من كلمتها : وجع بلى يوجعك .. زبااااااله مرة وحده .. صدق انكم ماتستاهلون يهالحريم ..
سارة : مو قصدي شي .. بس مو زينه غصب يعني اقول حلوة ..
قلت لها وانا اصر على اسناني من العصبيه : انقعلي عن وجهي ..
راحت سارة .. اما انا التفت على الموظف ..
احمد : عطني اصغر مقاس ؟؟
طلع لي اصغر مقاس ..
احمد : كم سعرها ؟؟
الموظف وهو يناظر الكرت اللي عليها : 250 ريال ..
طيرت عيوني له : الحين هاذي 250 .. بس مافيها موديل .. ساده ..
الموظف وهو مبتسم : سعرها في قماشها .. القماش من نوعيه ممتازة .. لايشمر ولا يحبب واللون ثابت ..
جلست افكر .. من راح اعطيها اياه ..
جت في بالي رنا ..
تتوقعون لو اعطيها البلوزة راح تاخذها .. والا راح تقول نفس كلام خواتي ؟؟
امممممممم .. حتى لو ما أخذتها بخلي خواتي يعطونها مرة سعود ..
الحين انا وش عندي انا وهالبلوزة بلشت فيها ..
حطيتها في مكانها ورحت جنب خواتي ..
احمد : يالله خلصوا .. هذا والمحل صغير .. اجل لو كبير وش راح تسوون ؟؟
مرام وبيده تنورة : يالله يالله شوي بس ..
رجعت بطلع برى المحل .. احس اني انكتمت من هالحريم ..
مريت من عند البلوزة .. شفت بنتين يعني اعمارهم 15 تقريبا .. عليهن بس حجاب ..
ماسكات البلوزة الحمراء اللي كانت معي قبل شوي .. وشكلهن يتهاوشن عليها ..
قربت من عندهم وجلست اسمع وش يقولن ..
الاولى : والله بتطلع عليك روعه ..
الثانيه : ماتصلح علي لاني سمرا .. لكن انتي بيضاء اذا لبسيتها بتخليك قشطه ..
الاولى : بس انا مااحب الاحمر .. يقرفني .. احسه دم ..
الثانيه : والله انها روعه لاتفوتك .. وخلي الدلع على جنب ..
الاولى وشكلها تنرفزت : اووووووف منك خلاص قلت لك مابيها اذا تبينها انتي خوذيها ..
قربت من عندهم واخذت البلوزة وسالت الثانيه : انا زوجتي بيضا تتوقعين راح تطلع عليها حلوة ..
الثانيه استغربت سؤالي لها وماردت علي شكلها مصدومه ..
لكن الاولى ردت : اكيد .. توكل على الله وخذها .. وترى سعرها مرة معقول .. مراح تلاقي احسن منها ..
سحبت الثانيه الاولى وطلعن من المحل ..
اما انا ضحكت عليهن .. تقولي مررررررررررره سعرها معقول .. 250 سعر معقول .. والله هالعقول ..
حاسبت على البلوزه وعلى اغراض خواتي وطلعن من السوق بكبره ..
رنا
انسدحت على السرير وقعدت اتقلب واتقلب واتقلب ..
مليييييييييييت .. والنوم موراضي يجي ..
صح قبل لاانام ..
ماقلت لكم وش سويت بمرام ؟؟
للأسف ماسويت لها ولاشي ؟
ليش مدري ؟؟
لا أحد يسألني لاني انا نفسي مادري ؟؟
حاولت انااااااااااام لكن ابدا مافيه فايده ..
الساعه وحده الا ربع ..
تتوقعون البنات جو من برى ..
بس مالهم صوت ..لو كانوا جايين كان سمعت اصواتهم ..
اووووووووووف وش ذا الطفش ..
بأصبر ربع ساعه اذا ماسمعت صوت بأطلع واروح لغرفتهم ..
احمد
خلاااااااااااااص توبه ..
حرمت اطلع بنات والا اوديهن والا اجيبهن ..
بصراحه يكرهونك عيشتك ..
المشكله كل مرة اقول نفس الكلام ..
واذا طلبوا مني طلعه نسيت المغثة اللي راح يكررونها لي ..
الحمد لله اننا وصلنا بالسلامه ..
نزلن من السيارة وكل وحده شايله اكياسها معها ..
حتى انا شايل كيسي معي ..
اول مافتحت باب الفله الداخلي ..
طيرااااااااااان على غرفتهم ..
اما انا جلست فالصاله وطلعت البلوزة وقعدت اناظرها ..
اعطيها والا مااعطيها ..
خايف تفشلني وترفضها .. عاد انا في ذيك الساعه ماراح يكون فيني عقل .. راح اترفس في بطن بطنها لين تقول آآآآآآآآآمين ..
اما اذا اخذتها واعجبت فيها ( هذا طبعا مستبعده نهائيا ) ياسلااااااااااااام .. والله لاطير من الفرحه ..
رنا
تنهدت يوم سمعت اصواتهن : واخيرا شرفن حضرتهن ..
لبست جلالي وطلعت ..
وعلى طوووووووول لغرفة البنات ..
دخلت وسكرت الباب ..
رفعت الغطاء عن وجهي : اهلين بالبنات ..
مرام : هلا .. مانمتي ؟؟
وانا اجلس على السرير : لا ماجاني النوم ..
سارة وهي تطلع من الكيس : شوفي وش شرينا ؟؟ انا بروح الحمام ..
طلعت سارة وخلت الباب مفتوح ..
اما انا جلست افتح بالاكياس واناظر ..
بصراحه شي يعجبني وشي مايعجبني .. بس مااقول شي ..
اتفرج بدون تعليق ..
انا احوس في اكياس سارة مرة ..
ومرام توريني اللي شرت مرة ..
وحنا على هالحال ..
طبعا انا جالسه على السرير ومعطيه الباب ظهري .. لكن جلالي كان على اكتافي وشعري رافعته كله لفوق .. وقبل شوي مع حوسه النوم طايح بعضه على وجهي ..
حسيت فيه احد دخل بعدين طلع على طول .. التفت بشوف من ؟؟
مالحقت الا على طرف الثوب ..
شهقت من داخلي .. بس ماحاولت ابين شي .. عشان ماتنتبه مرام ..
وانا من داخل احس بحراره فضيعه ماني قادره اتحملها كأني على ناااااااااااااااااااااااااااار ..
حاولت انسى الموضوع واتفرج على اللي شفته بس ماقدرت ..
تثاوبت بالغصب عشان اقوم : يالله مرام تصبحين على خير بروح انام ..
مرام وهي مستغربه : رنا توك جايه امداه يجيك النوم ..
رنا : مو مسأله نوم .. ودي اريح ظهري .. وبعد اخاف الحين سدومه تقوم ماتلقاني ..
مرام وهي مستسلمه : براحتك ..
قمت بأطلع ..
الا بوجهي سارة .. كنت بهاوشها ليش تخلي الباب مفتوح ..
بس بعدين فكرت خليني ساكته ازين لي لان محد درى ..
وحتى اللي دخل يحسبني مادريت ..
تغطيت وطيرااااااااااااااان على غرفتي ..
قفلت الباب مرتين للتأكيد وجلست على السرير وانا قلبي يدق بقوة ..
ياربي لايكون احمد هو اللي دخل والله لاموت من الفشلة ..
احمد
دخلت البلوزة في الكيس ..
ورقيت فوق بروح لغرفة خواتي بعطيهن الكيس ..
اذا قاموا بكره يعطونه رنا ..
اذا مابغتها يعطونها مرة سعود ..
لكن اللي ناويها لها هي رنا .. وان شاء الله .. ان شاء الله تاخذها ..
دخلت الغرفه لكن انصدمت وضاع وجهي لما شفت رنا جالسه على السرير ومعطتني ظهرها .. وشعرها محيوووووووووس بقوة .. ومنزله راسها ومدخلته في الكيس تطلع اللي فيه ..
شكلها مرة مثل البزارين ..
على طول من دون مايحسون طلعت من الغرفه بهدوء مثل مادخلتها ..
واااااااااااااي شكلها مرة حلو وهي كذا ..
تنهدت بقووووووووة ومن قلب بعد .. وانا اتذكر شكلها ..
اول مرة اشوفها ..
ليتني مطلع خواتي من زمان عشان اشوفها ..
صدق اني ماشفت وجهها .. بس بصراحه اللي شفته كفاني وزياده ..
ترى الرجال أي يشوفه من الحرمه يعجبه حتى لو كان ظفرها بس بس هماه شاف شي ..
الرجال عموما مو بس انا !!! ( عشان بس ماتعصبون مني )
والله ماكان قصدي اشوفها .. الحين تقولون لي قليل ادب ..
لو صدق ابي اشوفها واتعمد اني اشوفها كان ماطلعت ..
قعدت اتمقل فيها واذا شبعت منها طلعت ..
بس مرة احس ان قلبي طاح ببطني لما شفت شعرها .. فما بالك لو بأشوف وجهها ؟؟ ..
الله يستر لا تجيني جلطه ..
رنا
ياربيه نسيت متى قالي الشيخ دقي ..
الحين الناس العصر .. هو متى قالي ؟؟
العصر والا المغرب ..
اوووووووووف وش هالذكراة الزفت ..
بدق الحين اكيد هو فاضي ماعنده شي .. اليوم جمعه والناس كلها في اجازه ..
بتوكل على الله وبأدق عليه واللي يصير يصير ..
رن ورن ورن .. والرابعه رد ..
تكلمت وانا مترددة وفي نفس الوقت مفتشله : الو ..
الشيخ : نعم ..
رنا : السلام عليكم ..
الشيخ : وعليكم السلام ..
رنا : انا ياشيخ اللي كلمتك امس وقلت لي دقي علي ..
الشيخ : ايه ايه تذكرتك .. شوفي يابنتي انا راح اعطيك رقم شيخ ثاني كلميه وهو اللي راح يقولك عن حالتك ..
رنا : طيب ممكن ياشيخ تقولي انت .. لاني تعبت وابي اعرف وش فيني ؟؟ ..
الشيخ : ميخالف يابنتي تحملي .. وكل شي بأجره .. اكتبي الرقم عندك ..
كتبت الرقم .. وسكرت السماعه من الشيخ ..
يالله وش ذا ؟؟
متى ارتاح واعرف وش فيني ؟؟
وراهم كل واحد يرميني على الثاني ومو راضين يقولون لي ؟؟
توكلت على الله ودقيت على الشيخ الثاني ..
رنا : السلام عليكم ..
الشيخ : وعليكم السلام ..
رنا : ياشيخ انا قبل شوي كلمت الشيخ (........... ) وقالي ادق عليك ..
الشيخ : عرفتك عرفتك يابنتي انتي الارمله اللي حامل بولد ميت مثل مايقولوا الدكاترة ..
رنا : ايه ..
الشيخ : شوفي يابنتي انتي مصابه بالعين .. وعلى حسب كلامك انك تحسين بالجنين لكنهم يقولون لك ميت .. فهاذي تسمى عين ..
رددت الكلمه وانا مصدومه : عين .. من اللي راح يسوي فيني كذا ؟؟..
الشيخ : يابنتي العين حق .. وانا انصحك يابنتي انك ماتنزلين اللي في بطنك الا لين تجين لعندي اقرأ عليك واتأكد من موت الجنين او حياته ..
رديت عليه وانا الى الان مصدومه : طيب ياشيخ متى اجي لعندك .. لاني مرة تعبانه من الآلآم اللي تجيني ..
الشيخ : تعالي بكره بعد صلاة العشاء .. عندك رقمي خلي رجال يكلمني واوصف له البيت ..
رنا : ان شاء الله ..
سكرت السماعه .. وانا مافيني عقل ..
عيـــــــــــــن ..
ومن مين طيب ؟؟
من اللي له مصلحه ..
طيب ليش في ولدي ؟؟
يحط عينه في اللي يبي بس ولدي لا !!
استغفر الله استغفر الله ..
اللهم لا اعتراض .. اللهم لا أعتراض ..
يتبع
|