الجزء الثالث ..
احمد
تراكضت انا وبندر ..
ولحقنا سعود معه سديم ..
لحقنا نوره لوين مادخلت ..
وسمعنا كل شي صار ..
قربت بأدخل للغرفه بأسكت نوره واطلعها ..
بس مسكني سعود ..
سعود : خلها .. خلها تقول اللي عندها ..
عصبت من سعود : وشلون اخليها .. ماسمعت وش قالت ؟؟ تقول ضفي وجهك .. خلني ادخل وأوقف هالمهزلة ..
سعود : مستحيل ماترد عليها رنا .. بنشوف رنا وش تقول ؟؟
بعدين اوقفهم كلهم عند حدهم ..
انصدم سعود من رد رنا يوم قالت (الفرق بين الانسان والحيوان هو العقل .. وانا الحمد لله عندي عقل .. مو حيوان زي ماتقولين .. )
التفت على سعود : شفت وش قالت ؟؟ شفت وش ردت عليها ؟؟.. خلني ادخل واطلع هالمجنونه من داخل ..
سعود : قلت لك خلهم لين مايخلصون كلامهم ..
شوي وهدا الجو ..
بعدين طلعت نوره .. وهي يدينها على وجهها وهي تشاهق وتصييييح ..
كلنا طيرنا عيوننا ..
انا اناظر بسعود وسعود يناظر ببندر وبندر يناظر فيني ..
وش السالفه ياناس ؟؟ وش القصه محد يدري ؟؟
طلعت رنا وهي متغطيه بجلالها ..
مرت من عندنا تبي ترقى الدرج ..
وقفها سعود : رنا .. وقفي ابيك اتكلم معك ..
رنا بصوت يالله ينسمع : مابيني وبين احد كلام ..
وعطتنا ظهرها ورقت الدرج ..
لكن سعود وقفها مرة ثانية : رنا .. تعوذي من ابليس وانزلي وخلينا نتكلم ..
رنا
لما ناداني المرة الثانية ماحبيت اطولها وهي قصيرة ..
نزلت اشوف وش يبي ؟؟
سعود وهو ينادي نوف من الغرفه : نوف ..
نوف وصوتها طالع من الغرفه : سم ..
سعود : تغطي واطلعي من الغرفه ..
اما انا وقفت قبال الاخوان الثلاثه بأشوف وش آخرتها ؟؟؟
طلعت نوف ..
دخل سعود للغرفه وهو يقول : ادخلي بتكلم معك شوي ..
لحقه احمد ودخل اما بندر جلس بالصاله ..
يالقافته هالاحمد .. لازم يدخل عصه بشي مايخصه ..
قبل لا ادخل طلعت خالتي من الغرفه ..
استغربت من خالتي انها طالعه .. لايكون بيكلموني لحالي ..
فسألت خالتي : ليش طلعتي خاله .. سعود يبي يكلمني اقعدي معي ..
خالتي وباين عليها التعب كثثثثثثثثير : يابنتي انا موب حول مشاكل .. ادخلي وشوفي وش يبون ؟؟
وابعدت وخلتني ..
قويت قلبي ودخلت ..
خليت الباب مفتوح و جلست على اقرب كنبه ..
وعطيتهم جنبي ..
سعود : انا ادري ان اللي سوته نوره غلط .. وادري انها غلطت عليك .. وسمعت انتي وش رديتي عليها .. وكنتي ماشاء الله اعقل منها ..
اوهههوووووووووووو علينا .. طولها وهي قصيره .. خلصني قل اللي عندك وفكني من دون مقدمات ..
احمد
توقعت سعود يطردني من الجلسه هاذي ..
بس الحمد لله مافشلني ..
بصراحه كبرت في عيني عقب الرد اللي سمعته منها وهي ترد على نوره اللي ماخلت كلمه شينه الا قالتها لها ..
اسمع سعود يقرقر عليها والله ماادري وش قال ؟؟
ياكثر فلسفته هالسعود ..
اما انا رحت بافكاري بعيد بعيـــــــــــــــد ابعد مما تتخليون ..
اخاف اقولكم تزعلون مني ماراح اقول ؟؟
وانا بين هواجيسي وافكاري ..
طيرت عيوني على اللي واقف عند الباب ..
سعود استغرب شكلي والتفت بيشوف من قاعد اناظر انا ..
مادرينا انا وسعود الا ببندر وارها وحاول يمسك يدها لكن كانت نوره اسرع من بندر وضربت رنا على وجهها ضربة قوية خلت رنا تصرخ ..
تقامزت انا وسعود ومسكنا نوره اللي مدت يدها مرة ثانيه بتضرب لكننا منعناها ..
نورة وهي تفك يدي من يدها وتصارخ : فكني عليها اعلمها وشو قدرها وشو قيمتها ؟؟؟..
سعود بصوته الخشن المرتفع : ولا كلمه لااعطيت كف على وجهك ..
نوره وهي تصارخ وتصيح : أيــــــه .. بتضربني عشانها هاه ..بتضرب اختك عشان وحده ماتسوى .. انا ماادري وش مسويه فيكم ؟؟.. ساحرتكم عشان تحبونها كلكم ؟؟؟!..
لفيتها بطراق ضيعت ملامحها من قوت الطراق اللي جاها ..
الحين جاء دوري انا ياسعود ..
صرخت بوجهها : والله اما بلعتي لسانك لا أتطوى ببطنك الحين قدام اخواني ولاهمني احد .. تفهمين والا افهمك ..
حطت يدها على خدها من قوه الضربه ..
من جد كان الطراق قوي .. ولو عندي اقوى منه كان ماقصرت فيها ..
هي صدق اختي الكبيرة بس في ساعه الحق .. مااعرف لا اخت ولا اخ ..
هي غلطت كثييييييييييييييير .. بس انها تمد يدها .. لا ... حدها ..
لهنا وبس ..
سعود مسك نوره وطلعها من الغرفه .. وبقيت انا وبندر نناظر في بعض ..
تكلم بندر : احمد ليش ضربتها ؟؟
احمد : لانها تستاهل .. هي اللي بدت ...
رنا
تخيلوا كل هذا يصير لي ؟؟؟!
اتهزئ وانضرب وانهان قدام الاخوان الثلاثه ..
ولا واحد بردت حرتي منها .. الا احمد .. يوم ضربها كف..
بس ماتمنيت هالشي يصير لها ..
ولا من زين وجه بندر يقول : ليش تضربها ؟؟؟
خوش والله ..
يقتل القتيل ويمشي بجنازته ..
وقفت بأروح لغرفتي ..
خلاااااااااااااااص احس مافيني اعصاب ..
اعصابي تلفت .. ولا عاد فيني قدره على التحمل ..
اول ماشافني احمد واقفه .. فتح المجال لي علشان اطلع اما بندر طلع من الغرفه قبلي ..
طلعت من الغرفه شفت بنتي مع مرام ..
تكلمت وانا احس ان الدمعه خنقتني : مرام عطيني بنتي ..
قربت مني مرام ومدتها لي ..
نزلتها على الارض ومسكتها ورقيت فوق ..
وانا ارقى حسيت فيه احد وراي..
التفت ..
شفت سعود ..
نزل راسه وقال بسرعه : حقك علينا حنا آسفين .. أدري مفروض هالشي مايصير .. بس انتي كنتي كبيره بتصرفك .. وماولعتيها اكثر ..
والتفت بينزل ..
لكني وقفته : سعود ..
من دون مايلتفت : آمريني ..
رنا : انا ماعدت اقدر اتحمل .. وزي ماتشوف انا حامل ومهم لي الراحه النفسيه وهنا انا ماراح ارتاح .. فياليت تأذن لي اني اروح لأهلي ؟؟ ..
سعود وهو على وقفته ومعطيني ظهره : بس انا مامنعتك روحي الله يستر علينا وعليك ..
رنا : بس انت عارف وش اللي مخليني اقعد هنا ؟؟ ..
سعود : انزين وش اللي تبينه وبيصير ان شاء الله ؟؟؟
رنا : اقنع خالتي تكفر عن حلفانه عشان اقدر اروح لأهلي ..
سعود : ان شاء الله بحاول قد مااقدر .. ومالك الا طيبة الخاطر ..
رنا : الله يجزاك خير .. تأمرني بشي ثاني ..
سعود : ايه ..
رنا : ان شاء الله خير ..
سعود : ابيك تروحين المستشفى .. تشوفين وش فيك ؟؟ من بعد المغص اللي جاك ؟؟
رنا : بس انا الحين مافيني الا العافيه ..
سعود : انا دريت انك تتضاقين من ركوبك السيارة مع احمد .. اذا هالشي صحيح .. انا بالخدمه يارنا .. اوديك للي تبينه ..
رنا : مشكور ماتقصر .. بس انا مافيني الا العافيه اذا حسيت بشي راح اروح .. ومافيه فرق بينك وبين احمد وبندر كلكم مثل حسبة اخواني ..
سعود : على خير اجل .. انتبهي لسديم ..
ونزل ..
خلاني مصدومه .. اول مرة يكلمني سعود .. من جد كان لطييييييف بكلامه وحسيت بالطيبه وبالحنان وهو يتكلم معي ..
والله انه نساني كل المشاكل اللي صارت قبل شوي ..
الله يوسع صدره مثل ماوسع صدري ونساني همي ..
احمد
جلست في الصاله ..
وامي وخواتي موجودات الا نورة ..
قاعده في المقلط تصيح .. ومعها نوف مرة سعود ..
ماتوقع ان نوف قاعده تهديها .. لان نورة راح حط حرتها في نوف لو حاولت تسوي شي ..
اتوقع انها جالسه في المقلط لانه مافي مكان تجلس فيه ..
ادري ان هذا كلام ماله داعي ..
بس احاول اسلي نفسي لين ينزل سعود من فوق ..
اكيد قاعد يتكلم مع رنا !!..
تتوقعون وش يقولها ؟؟!!
اكيد بيعتذر منها ؟؟!
صح ؟؟!!
الا صح ..
اجل وش يبي فيها ؟؟!
أيــــــــــــــــــــه نسيت !!
اكيد يبي يقولها لازم تروح المستشفى ..
الا اكيد هذا اللي قالها ..
ياربــــــــــي .. وانا وش اللي مشغل بالي ..
قالها والا ماقالها ..
يالله عليك يا أحمد ماتترك عنك التدخل في حياتها ..
وانا بين هوجاس وهوجاس ..
نزل سعود ..
سعود : وين نوره ؟؟!!
امي : بالمقلط ..
التفت علي : ليش ضربتها ؟؟
رديت عليه بكل برود : لانها تستاهل ..
سعود : بس الضرب مو حل يا أحمد .. انت عقدت السالفه ..
بندر يدخل عرض وهو معصب : اوكي هي تستاهل بس ماتضربها .. ماعندنا رجال يضرب خواته ..
احمد : اقول انت اسكت لا اقوم ألفك بطراق ..
بندر : هاذي المرجله عندك تضرب اختك ..
احمد : انا وش اقول ؟؟ مااقولك اسكت !! ..
بندر : ماني ساكت .. وش تبي تسوي يعني ؟؟
سعود بكل عصبيه : بس انت وياه .. خلاص السالفه وانتهت ..
عصبت من سعود .. كذا يمرر السالفه زي السلام عليكم : لا ما انتهت .. ولازم كلن ياخذ حقه ..
سعود : احمد قلت خلاص انتهت السالفه .. تكلمت مع رنا .. وحليت معها السالفه ..
احمد : يعني وشلون ؟؟!
سعود : يعني .. انسوا كلكم اللي صار .. وكأنه ماصار شي ..
جلست على الكنبه .. وانا مو معجبني الكلام اللي قاله سعود ..
اما سعود دخل المقلط ..
شوي وطلع معه نوره ..
وقفها قبالي ..
سعود : يالله اعتذر منها وحب راسها ..
ماودي اسوي اللي قاله .. بس مهما كان هاذي اختي الكبيره ..
قمت وحبيت راسها : آسف يانورة .. والله ماكان قصدي اني اضربك ..او اضرب حنين .. بس من جد طلعتيني من طوري ..
نوره من بين دموعها : انا اصلا مستحيل ازعل منك ..
وضمتني ..
ادري وش قاعده تحس فيه ؟؟!
تحس بفقدان الحنان ..
من جد احسها ضايعه ..
كم مره تشكي من زوجها ..
كم مره تمدح اخوي مشعل الله يرحمه وتتمنى ان الله رزقها واحد زيه ..
كم مره تترحم على ابوي الله يرحمه وتتمنى لو انه عايش عشان تشكي له ..
بصراحه رحمتها .. بس رغم كل هذا مالها حق تطلع حرتها بهالمسكينه رناوبسديم .. هم وش سووا لها ؟؟
ابعدت عنها .. لاني خفت اصيح من كثر ماتأثرت بصياحها ..
طلعت من البيت ركبت سيارتي ..
لوين ؟؟!!
مدري ؟؟!!
رنا
غيرت ملابسي ..
وانسدحت على السرير .. بعد مانومت بنتي ..
آآآآآآآآآآآآآآآآآآآآآه طلعت من أقصى قلبي ..
ولاواحد فيهم يفهم ..
ولاواحد فيهم يقدر اللي انا اسويه ..
كذا يجازوني ؟؟!
كذا يعامولني ؟؟!
كذا يسوون فيني ؟؟!
هذا وانا كم شهر ورايحه عنهم ..!!
اجل وش رايح يسوون لو اقعد عندهم طول الدهر ؟؟!!
اكيد بموت من اللي راح يسوونه فيني ..!!!
احس الالم اللي ببطني رجع ..
الله يستر ..
لاني مالي خلق يصير لي مثل اللي صار ذاك اليوم ؟؟
يالله يانورة ..
ياكثر ماتحملتك ..
ياكثر ماصبرت عليك ..
ياكثر ماسكتت لك ..
وكله عشان من ؟؟!!
كله عشان حبيب قلبي وعمري وروحي ( مشعل )
بس خلاص مشعل راااااااااااااااااااااااااااااح .. راااااااااااااااااااااح يانورة ..
راااااااااااااااااح وتركني ..
اتحملك ليش ؟؟
وش اللي يجبرني ؟؟
ادري اني مااخذت حقي منها باللي سوته ..
بس بسيطه الايام بيننا ..
والله والله والله ..
من اليوم ورايح .. خلاص ودعت السكوت ..
وبتشوفين رنا على حقيقتها ..
وبنشوف انا والا انتي في هالبيت .. الين اطلع منه بالسلامه ..
والله ماظنتي اطلع بسلامه !!!
احمد
رجعت بوقت متأخر ..
دخلت للصاله ..
لقيت امي جالسه ..
شكلها تتنظرني ..
احمد : السلام عليكم ..
امي : وعليكم السلام ..
احمد: خير يايمه وش فيك صاحيه ؟؟!
امي : تعال ياوليدي اقعد باتكلم معك ..
احمد : سمي يمه .. آمريني ..
امي : سعود ..
احمد : وش فيه ؟؟!
امي : يقول لي اسمحي لرنا تروح لأهلها ..
سكتت لحظه بأستوعب اللي قالته امي ..
امي : احمد سمعت اللي قلته لك ؟؟!!
رديت وانا مو مستوعب : سمعت .. طيب وش المطلوب مني ؟؟!
امي : انا مابيها تروح هي وبنتها عني .. وفي نفس الوقت شف وش صار لهالمسكينه ؟؟
حلو يعني امي شايفه المهزله ومو راضيه عنها ..
احمد : والله يايمه .. انا من يدك هاذي الى يدك هاذي .. اللي تبينه راح يصير ..
امي : بس سعود يقول .. البنت حامل وتعبانه .. يمكن يصير لها شي اذا جلست هنا ؟؟ ..
احمد : وش ذا الكلام يمه .. حنا وحوش يعني بناكلها ؟؟ ..
امي : مدري عنه هو يقول كذا ..
احمد : انتي وش رديتي عليه ؟؟!!
امي : مدري .. بس شكلي بأخليها تروح لأهلها .. لاسمح الله لو صار لها شي .. اهلها ماراح يسكتون .. شوف وشلون امها تنتظر ولادتها .. عشان تروح لعندها ..
احمد: يعني بتخلينها تروح ..
امي : هذا احسن شي ..
لاااااااااااااااااااااااا .. لااااااااااااااااا يايمه .. لاااااااا .. تكفين لاتخلينها تروح ..
تكفين يمه غيري رايك ؟؟!!
يمه تكفين حسي فيني ؟؟
ولا تخلينها تروح ..
ليتك تسمعيني يايمه ؟؟ !!
ليتك تسمعيني وتغيرين رايك ؟؟!!
امي حست بسرحاني : خلاص يااحمد انا بقولها بكره .. انا سامحه لها انها تروح ..
غمضت عيوني .. وانا متشتت ..يعني بكره بتروحين يارنا ؟؟!!
لا يايمه لاتسوينها ؟؟
بموت لو راحت .. والله لاموت من بعدها ..
قمت من عند امي من دون ماانطق ولاكلمه ..
دخلت غرفتي ..
انبطحت على السرير ..
تخيلوا شكلي والدمعه تنزل من عيني ..
وربي انها نزلت ..
مامسحتها ..
خليتها توصل الى النهايه ..
نهايتك يا أحمد اذا راحت رنا ..!!
رنا
نزلت الساعه 11 الصبح ..
دخلت الصاله
مافيه الا خالتي جالسه تتقهوى ..
رنا : صبحك الله بالخير ..
خالتي : صبحك الله بالنور ..
قعدت اتقهوى وانا ساكته .. لانه باختصار ماعندي شي اقوله ؟؟!!!
خالتي : رنا ..
رنا : سمي خاله ؟؟!
خالة : سعود قالي انك ودك تروحين لأهلك ..
تكلمت بكل صراحه .. لاني تعبت وانا اجامل ..
رنا : ايه ..
خاله : ادري يابنتي انك مو مرتاحه .. بس خلاص مابقى لك الا كم شهر وتولدين .. يعني مستكثره علينا هالكم شهر؟؟ ..
اووووووووووووف وش ذا الحاله .. يعني لازم تجيني مع اليد اللي تعورني ..
رنا : لا ياخاله انا مااستكثرت عليكم .. بس هذاك تشوفين بعينك ياخاله .. الحال ماتستحمل القعده اكثر ..
خالتي : طيب واذا وعدتك انه ماراح اخلي احد يمسك بكلمه وحده او يقول لك شي ؟؟ ..
رنا : مو قصه احد يتكلم علي او يقول لي شي .. انا ياخاله نفسيا مو مرتاحه هنا ..
خالتي : قولي وش تبين وانا اسويه لك .؟؟؟!
رنا : مشكورة ياخاله مابي أي شي تسوينه .. بس ابيك تسمحين لي اروح لاهلي .. بس هذا اللي ابيه ..
خالتي : يعني حنا مو اهلك ؟؟ ..
وش ذا الوهقه ؟؟..
رنا : ياخاله انتم اكثر من اهلي .. بس انا ابي امي تكون قريبه مني .. ابي اخواني .. ابي آخذ راحتي في البيت .. انزل وارقى على كيفي .. مو علي جلالي ..
خالتي : على هواك يابنيتي .. انا سامحه لك تروحين.. بسسسس ..
واااااااااااااااو .. ياسلااااااااااااااااام .. واخيرا وافقت .. الله يجزاك الف خير ياسعود .. انقذتني من ازمه ..
بس خالتي قالت بسسسسسسس .. والا انا اتوهم ..
سألتها بشوف وش ذي بس : بس ايش ياخاله ؟؟!!
خالتي : بس سديم تكون عندنا ..
هههههههههه ضحكت من داخلي بقوة ..
حلوة هاذي ياخاله ..
انا اروح لأهلي وبنتي تكون عندكم ؟؟
ماطبنا ولاراح الشر ..
يعني اقعد مع بنتي ازين لك ..
يافرحه ماتمت .. جاها الغراب وطار ..
رنا : وشلون ياخاله .. انا هناك وبنتي هنا ؟؟!!
خالتي : يعني سديم تكون عندنا ..
رنا : لا ياخالة رجلي على رجل بنتي ..
خالتي : بس ..
قاطعتها وانا ماحبيت اقاطعها بس انجبرت : ياخاله هاذي بنتي وشلون اروح واخليها .. ترضين وحده بناتك تروح تسكن عند جدتهم ..
خالتي : لا !!
رنا : حتى انا ابي بنتي ..
سكتت خالتي .. وشكل صدرها ضاااااااااق .. هي تبيني اجلس عندهم وماهي عارفه تقولها بوجهي .. فجابتها على بنتي ..
ماحبيت اكسر بخاطرها ..
خلاص يارنا ضحيتي بكل شي .. منتي قادرة تضحين آخر تضحيه لخالتك ..
خلاص يارنا لاتكسرين بخاطر عجوز كبر امك ..
خلاص اصبري وتحملي هالكم شهر ماراح يضرك شي ان شاء الله ..
رنا : خلاص خاله انا ماراح اطلع عشانك ..
خالتي والفرحه واضحه من عيونها : يعني بتقعدين ؟؟!!
هزيت راسي يعني أيه ..
خالتي : الله يجبر بخاطرك مثل ماجبرتي بخاطري .. الله يرزقك الولد اللي يسندك ويعوضك عن كل االلي شفتيه ..
وصارت تصيح ماقدرت تكمل دعاها ..
قمت وحبيت راسها .. ورقيت لغرفتي ..
والاخلاق عندي خايسه ..
موصله معي ..
اوووووووووووف وش ذا القرف اللي لازم اتحمله ..
احمد
رجعت من الدوام وانا مالي خلق احد ..
اليوم وبتروح رنا .. وش باقي لي عشان اوسع صدري ..
ابدا مو باقي لي شي ؟؟!!
دخلت البيت .. وعلى طول على غرفتي ..
مابي غدى .. اصلا مابي اشوف احد ..
حتى سدومه مابي اشوفها ؟؟
لاني لو شفتها ماراح اخليها تطلع من البيت ..
غيرت ملابسي .. وانسدحت على السرير ..
افكر وافكر .. بأشياء يمكن تنظنونها تافه .. لكنها عندي اشياء كبيره ..
اندق الباب ..
احمد : من ؟؟!
انفتح الباب ..
احمد : خير وش تبي ؟؟!
بندر : امي تقولك انزل تغدى ..
احمد : اقلب وجهك .. مابي غدى ..
بندر بكل برود : امي تقولك انزل ابي اكلمك بعد الغدى ..
احمد : اقلب وجهك .. مابي اكلم احد ..
بندر : لا حول ولا قوة الا بالله .. ياخي غير كلامك .. كل سؤال اسئله لك ترد على بنفس الاجابه ..
احمد : بندر .. شوف اما طلعت ياويلك مني ..
صرخت باعلى ماعندي : بررررررررررررررررررى ..
طلع بندر وسكر الباب وراه وهو يقول : عمرك مانزلت !!!
تغطيت بالبطانيه ونمت .. وانا في قلبي هم يصعب علي انساه ..
رنا
بعد يومين من هاللي صار كله ..
طول هاليومين اللي فاتوا ..
احس بطني يتقطع من داخل ..
احس شي مو طبيعي يصير داخل بطني ..
خفت يصير علي مثل اللي صار قبل ..
فقررت اروح للمستشفى اشوف وش فيني ؟؟
مستحيل اصبر الين يجي الموعد ؟؟
احس اني بموت من الالم ..
دقيت على سارة ..
رنا : هلا سارة ..
سارة : اهلين ..
رنا : تعالي لمي بسرعه ..
سارة : اوكي ..
بعد دقيقتين ..
سارة : هلا رنا وش فيه ؟؟
رنا : بطني يعورني ..
سارة : وش فيه ؟؟!!.. لايكون رجع لك اللي صار لك ذاك اليوم ؟؟!
رنا : الظاهر انه كذا ..
سارة : اجل يالله قومي ..
رنا : وين ؟؟!!
سارة : نروح المستشفى ..
رنا : مع من ؟؟
ابتسمت سارة وكأنها حست باللي ابغى اقوله : لاتخافين فيه بندر تحت .. يالله البسي عباتك .. على مااقوله ..
ابتسمت لها : ثواني واكون جاهزة ..
نزلت سارة ..
وبعد خمس دقايق لحقتها ..
احمد
قمت من النوم على آذان المغرب ..
لكني احس راسي بينفجر ..
توضيت وصليت العصر ..
لبست ثوبي ونزلت ..
تنحنحت لاني خفت رنا تكون موجوده بالصاله ..
امي : ادخل مافيه احد ؟؟!
احمد : السلام عليكم ..
امي : وعليكم السلام ..
احمد : يمه فيه قهوة احس راسي مصدع .. بآخذ لي فنجال قبل لااروح اصلي ..
امي : والله ياوليدي مازينت .. مرام نايمه .. وسارة راحت مع رنا ..
عقدت حواجبي : وين راحوا ؟؟
امي : رنا تقول ان اللي جاها ذاك اليوم رجع لها .. وراحت تشوف وش فيه ؟؟
احمد : ومن اللي وداها ؟؟
امي : بندر ..
قمت وانا ضايق صدري : يعني مافيه قهوة ؟؟
امي : رح صل وتلقى القهوة جاهزة ..
هزيت راسي وطلعت ..
طول ماانا ماامشي رايح للمسجد افكر برنا ..
صدق اني فرحت كثير انها ماراحت .. بسسس ..
بس احس فيه فجوه بيني وبينها ..
مع بندر عادي تتكلم معه وكأنه اخوها حتى بعض الاحيان تمزح معه ..
اما انا .. لا ..
حاطه لها خطوط حمراء معي ماتتعداها ..
ليش ؟؟
وش انا مسوي ؟؟
رنا
دخلت على الدكتورة بعد ماسويت الاشعه ..
رنا : هاه دكتورة وش فيه الجنين ؟؟؟!
الدكتورة : بصراحه انا ماني عارفه وش اقولك ؟؟ بسسس
من جد خفت كلام الدكتورة يخوف : قولي دكتورة لاتلعبين بأعصابي ؟؟
الدكتورة : انتي متى حسيتي بالالم ؟؟
رنا : تقريبا لي ثلاثه او اربعه أسابيع بس يروح ويجي مو دايم ..
الدكتورة : وليش ماجيتي اول ماحسيتي بالالم ؟؟
رنا : ماتوقعت انه شي مهم ..
الدكتورة : من اللي جاي معك ؟؟ زوجك ؟؟
صنمت مكاني .. ماتوقعت احد يسألني هالسؤال ..
بس حاولت ابلع ريقي وانا اقول : زوجي متوفي ..
الدكتورة : الله يرحمه .. سوري ماكنت ادري ..
رديت عليها وانا احاول اقاوم دموعي : ماصار شي .. بس يادكتورة قولي لي وش فيه ؟؟
الدكتورة : عندك عيال ؟؟
رنا : ايه عندي بنت ..
الدكتورة : الله يخليها لك ان شاء الله ..
رنا : مشكورة .. بس دكتورة خوفيتني .. قولي وش فيني ؟؟
الدكتورة : الحمد لله انتي مافيك شي .. بس الجنين هو اللي فيه ؟؟
حطيت يدي على قلبي .. لا يادكتورة تكفين لا تقولين ان ولدي فيه شي ..
ترى هالولد معلقه عليه آمالي واحلامي كلها ..
هذا اللي راح يشيل اسم ابوه ..
ويخلي اسم ابوه عايش ..
بلعت ريقي الناشف مرة ومرتين وثلاث وانا خايفه من الجواب : دكتورة قولي ..
الدكتورة وهي حاسه بخوفي : الولد اللي ببطنك ميت له شهرين !! ..
شهقت وبغت تطلع روحي : ميت !!! كيف وشلون ؟؟!! دكتورة فهميني .. وشلون وانا احس في كل حركه من حركاته .. دكتورة يمكن الاشعه مو لي يمكن لاحد ثاني وانتم لخبطتوا ..
ماقدرت اكمل .. وجلست اصيح ..
الدكتورة وهي تهديني : اذكري الله الله بيعوضك خير .. بس انتي لا تضايقين نفسك ..
جلست اصيح ماقدرت امسك نفسي ..
الدكتورة : رنا .. اسمعيني لازم نطلع الجنين من بطنك .. لان وجوده ببطنك راح يسبب لك تسمم .. والآلآم هاذي اللي تحسينها لانه ميت ..
رنا : لا يادكتورة انا ماراح انزله الا لين اتأكد ..
الدكتورة : تتأكدين من أيش يارنا ؟؟ خلاص كل شي واضح .. انا راح احدد لك يوم عشان ننزل الجنين ..
وجلست تكتب على الملف ..
اما انا رحت بعالم ثااااااااااااااااااااااني .. عالم ضعت فيه ..
عالم تنميت اني ماعشت فيه .. بس وش الفايده الحين ..
كل شي ضاع ..
كل شي راح بغمضه عين ..
ولدي اللي ببطني ميت وله شهرين !!!!
كيف تصير هاذي ؟؟
الظاهر ان هالدكتورة مخرفه ..
الا اكيد مخرفه ..
انا احس فيه .. احس بتحركاته ..
وشلون تقول ميت وهو يتحرك ..
اكيد هاذي ماتفهم شي ..
مستحيل انز ل الجنين الا لين اتأكد ..
مدت لي الورقه وهي تقول : يوم الأثنين راح ننزله .. ضروري تحضرين ..
اخذت الورقه منها وطلعت ..
وانا اقول في نفسي ( هين بس ان جيت لك بس مرة ثانيه )
اول ماركبت السيارة ..
نزلت دموعي وقعدت اصيح بصمت ..
لا بندر ولاحتى سارة سألوني وش فيني ؟؟
لانهم لو سألوني ماراح اقول لهم شي ..
ومستحيل اقول لاي احد مهما كان ومهما صار ..
وبروح لمستشفى ثاني عشان اتأكد ..
نهاية الجزء الثالث ..
|