***

عند الرجال ..

لابس البشت الاسود والغترة البيضا وكأنه من الشخصيات الهامه ..

كل شي فيه يوحي بالفخامه والرقي ..

اسلوبه وتعامله مع الناس والضيوف راقي ويحسس الناس بهيبته وقوة شخصيته ...

شكله انيق لأبعد الحدود ،

شنبه الكثيف شوي واللي مرتبه بعناية ..

عيونه الواسعه وحواجبه المرسومه وهي طويله تدل على ان صاحبها قوي باس وحجته قوية وواثق من نفسه مثل مايقولون علماء الفراسة وعلم النفس ...

طوله وجسمه المتناسق معطيه طله غير عن كل الحاضرين ..

وعريس وكل العيون عليه ..

كان جالس بصدر المجلس وحوله اصحابه وبعض التجار اللي جو من جده ومكة والطايف مخصوص عشانه ..

باركوا له بعد العشا وطلعوا وكلاً سرى لبيته ..

بعد ماودع ضيوفه رجع لمكان الرجال من اهل الحي والديرة ..

وسلم عليهم ورحب فيهم وقال للطباخين يحطون العشا ..

توافدوا عليه الناس يباركون له وهنوه بالليلة السعيدة وتمنوا ان زواجه مبارك وان ربي يرزقه بالذرية الصالحه ..

جلس نص ساعه ثم قام وقف واعتذر من الحضور ومشى على الساعه 11 تقريباً ..

ركب مع نايف اللي اصر انه يوصله بنفسه لبيته اللي مايبعد عن مكان الحفل الا ثلاث دقايق او اربع بالكثير ..

وقبل ماينزل من السيارة استوقفه نايف : اقول ياابو مشعل .

: سم .

: سم الله عدوك .. بغيت اقول لك شادن امانتك لاتجرحها تراها حساسه .. ولاتقهرها ولاتخليها تطول عن امي . اختي من النوع اللي يكبت ولا يبوح باللي في قلبه . .

: افا عليك ياابو خالد اختك تراها بنت خالي ولاتوصيني وانا اخوك ما راح يجيها غير اللي يسرها ويسرك .

: هذا العشم وانا اخوك بس هي كلمتين وحبيتها اقولها لك .

: الله يسلمك يانايف وتأكد ان اختك في الحفظ والصون .

: اجل الف مبروك وبالرفاة والبنين .

ابتسم عماد لنايف وتمتم بالله يبارك فيك وعقبالك .. ونزل ..

مهمة اثقلت كاهله من شهر ومن يوم الملكه تحديداً ..

اخيراً راح ينجزها على خير مايرام ويدخل الفرح لقلب الغالية ويسعدها .. ولو لمجرد فترة معينه ..

***

الحريم في بيت عبدالعزيز لأن الحوش حق بيته كبير ..

حطوا فيه مخيم كبير وفرش وسماعات كبيرة للطقاقات اللي حجزتهن ام فهد زوجة ناصر وجابتهن من الطايف كهدية من عندها في زواج عماد ..

اما القهوجيات اللي يضيفون الضيوف جابتهن فوزية وتكفلت بالضيافه كلها من قهوة وشاهي وبيتفور ومعجنات للمويه والعصير والملبس ..

دق عبدالله ولد نورة الباب ونادى خالته فوزية اللي جاته بسرعه ..

قال : عماد يقول خلوا جدتي تجي ماني داخل الا وهي معي .

رجعت فوزية بسرعه قالت لامها في اذنها : عماد يقول تجي ماني داخل الا وهي معي .

فزت ام ناصر وهي تحاول تقوم وساعدتها بنتها لحد ماوقفت

قالت بهمه : لبسيني عباتي وعطيني عصاي .

: لاتروحين مشي اصبري ارسل لفواز يوصلتس .

: مانيب منتظرةٍ فواز خليني امشي .

جات نورة اللي عرفت السالفه وسمعت كلام امها قالت : يمه الله يهديك عماد للحين ماوصل اصبري لين ازهم فواز ولا عبدالعزيز يجي يوديك ..

نادى عبدالله امه قال : بندرعند الباب يبي جدتي تمشي معه .

مشت ام ناصر والتفتت على بناتها قالت : امشوا معي .

اخذت كل وحده عبايتها وطلعن معاها بعد ما رجعوا ريماس وايناس مايروحون معاهم ..

دقيقه وحده وهم في بيتهم لأن المسافه بين بيت فوزية وبيت عماد قصيرة جداً ..

زغردن نورة وفوزية اول ماشافن ولد اختهن واقف بالبشت وسلمن عليه وهو يقول : قصرن اصواتكن وشوله كل هذا .

قالت نورة وهي تسلم عليه : خلنا نفرح بك ياقلبي .

: افرحن ماقلت شي بس من دون هالصوت اللي وصل للرجال .

سلم على جدته اللي توها وصلت وهي ترد العبرة وتحاول تضحك ..

قالت : ياالله لك الحمد ولك الشكر انك مديت بعمري وشفته معرس .. نزلت من عيونها دمعتين غصب ماقدرت تردها وتمنعها ..

حط يده على اكتافها وسحبها لصدره قال : الله يخليتس لي هذا بدل ماتفرحين لي وترقصين تقومين تصيحين .

: لو في شدة وانا امك رقصت بس العَجَز شين .

: الله يطول بعمرتس منتيب عجوز .. العجايز شوفيهن وراتس اللي كل وحدة خابصتن وجهها بالاحمر والاخضر .

خبطته نورة قالت : بتغير رايك اذا شفت شادن ومكياجها .

طالعها من دون مايتكلم وسوى بشته زين .. وبقلبه " متى بتخلص هالتمثيليه وارتاح "

ضحكت ام ناصر قالت : يالله ياوليدي ادخل على مرتك الله يوفقك ..

:عطيني يدتس نبي نطلع بالمصعد اريح لتس .

مشت معاه ودخلت المصعد اللي مايفتحه الا في حال رغبة جدته في الطلوع فوق .. وهي تهلل وتكبر ..

وبناتها معاها يضحكن من عماد اللي حتى ليلة زواجه مايعرف يضحك اوحتى يبتسم..

فتح المصعد وام ناصر لازالت تهلل وتكبر وتستغفر ..

زغردن نورة وفوزية وعماد ماسك يد جدته ..

وقف ونادى فوزية قال : فوزية خذي جدتي خليها تسلم على شادن قبل ادخل . .

دخلت ام ناصر مع فوزية ووقفت نورة مع عماد وهو بان عليه الارتباك ...

طالع بنورة قال : خالتي الدور اللي فوق لاحد يقربه و.....

قاطعته خالته : افا عليك ياعماد خذ راحتك بس ومحد مقرب منكم تطمن ياحبيب خالته .

: الله مير يسلمتس ويخليتس لي .

***

طلعت امها من عندها لمن عرفت انهم وصلوا ونزلت مع الدرج ..

حتى تخليهم على راحتهم مع بنتهم ..

وبنفس الوقت استحت من عماد اللي للحين ماعرفته ولاكلمته ..

دخلت عليها جدتها ..

وفزت شادن من مكانها وسلمت عليها وباست راسها ويدها وهي مستحيه وراسها بالارض ..

انهالت جدتها بالمديح بعد ماباركت لها وهنتها وتمنت لها السعاده والذريه الصالحه ..

قالت فوزية : الحين وش رايك بمكياج شادن .

قالت الجده وهي تحاول ترفع من معنويات شادن المستحيه : ابد هذا المكياج السنع وهذا الزين اللي مسويه ربي ماشاء الله تبارك الرحمن .

ضحكت فوزية من جدتها قالت : ههههههههههههههه من يشهد للعروس .؟

طالعتها امها بنظره امر يعني يالله واشرت لها ..

اخذت يد امها اللي قد جلست بجنب شادن ووقفتها وطلعت ..

قالت ام ناصر لعماد اللي يناظر بساعته

: ادخل على مرتك وانا امك الله يجمع بينكم في خير ويكتب لكم التوفيق من عنده ويرزقكم الذرية الصالحة .

التفتت لبناتها بلهجة آمرة : يالله يابنات مشينا لضيوفنا .

نزلوا مع المصعد وراحوا مع بندر ولد ناصر اللي جابهم وينتظرهم برا عشان يرجعهم ...

للحكاية بقية ...

اتمنى لكم متابعة بدون ملل ..