:



مشيت تحت المطر مره وحزني عميق
........................الغيم يرعد بجوفي والصدى بارقه
يمرني شيّ ما يطري بذاك الطريق
.....................يسبقني الهم في دربي وانا اسابقه
وحيد والناي مالي غير عزفه صديق
....................غريب في ليل يوحش خطوتي طارقه
آخذ مع الحزن غيبوبة ثواني وافيق
..................اصحى على قيد يحرق معصمي واثقه
قيدني الحزن ماني منه لحظه طليق
......................عجزت لاخفيه! ماهو عاد ابفارقه ؟!
الله خلقني كذا مرهف وقلبي رقيق
.......................تجرحني الريح في لفحاتها الحارقه
حساس جداً وعاشق بس مالي عشيق
.....................غير الندم في خطاي ان مرني زارقه
احيان احس بذهول وطول حسره وضيق
...................لو شفت شمعه تسيح بدمعها غارقه
والدمع مرات من تحت المحاجر يويق
........................لا وادع الغصن مع ريح الشتا وارقه
حتى الحجر لا تصدَّع جيت يمّه شفيق
.............امسح على سفحه اللي يشتكي شاهقه
لو قيل هذي مشاعر تافهه ما تليق
........................أقول هذي مشاعر عشتها صادقه
البارحه في خيالي شفت لمعة بريق
.........................أتذكر اني مشيت وخطوتي واثقه
ماكنت اظن الليالي دمع جرحي تريق
.......................لين انسكب من وريدي للنقا عابقه
يا ثقل الايام ماني من ملامك عتيق
.......................طارت حمامة شعوري بالفضا زاهقه
في سكة العمر لو لي بالخلايق وفيق
.........................كان احتفل فيه في لقياه واعانقه
وحيد مالي بدربي يا زماني رفيق
...................ما اظن سكة ظلامي شمسها شارقه






مواسي.






: