سرى بليل وبـرق وأنغـام ونجـوم .وزرى على اللي مهتني في منامـه
جاحافلً غربه مـن المـزن مـردوم وشرقه جـزر مـزنً تبـدد ركامـه
ساعـه بفخـت وساعـه اخرى بعلجـوم يقمـرّ ويـِديِجر عجيـب نظـامـه
بأرضا غطوشً سملقً مابها حـزوم جيبـوب سبروتـن منيـعن ثمامـه
فـاهـم ومتـفـاهـم ويفهم ومـفـهـوم وأن كنت منهم فأنت عنـدك فهامـه
راودني الأحساس بسلـوب مظلـوم
وتوسلتنـي عاطـفـه بأنسجـامـه
قامن يحدّنـي علـى سـر مكتـوم
أبطى وصار ابداع عقـب أنكتامـه
لامفاخرن فيهـا ولانـي بموهـوم
ركبت ركوب عقـال فـوق العمامـه
سبحان رب العرش حاكـم ومحكـوم
اللي نهـاره يسلخـه مـن ظلامـه
ربا عليه الـرزق للصقـر والبـوم
ماراح رزق غـراب يـم الحمامـه
ياشاتم إشتم مادرى عنـك مشتـوم
مايجنـي الشتـام غيـر النـدامـه
ويحـاسبه ربً قويً وقيـوم
وتـوخـذمنه حسـنات يوم القيامه
ماجاك يشكيلك من الظيـم مضيـوم
ولو جاك صعب انك تحقـق مرامـه
بعض الكلام اللـينحبكـ.ـحبك مسمـوم
ودايم يغسل المـخ سحـر النمامـه
ومقطع موسيقي لاغنيه لام كلثوم
يسوى ردياً يبلشك في خصامه
وكلش يروح وينسى بعد كـمً يـوم
وكلش يسامح غير مـس الكرامـه
واللي جرى شيء مقـدر ومقسـوم
وعلـى المقـدر ماتفيـد المـلامـه
ولاقـول لا ظالـم ولانـي بمظلـوم
وكل يبي الله يسألـه عـن كلامـه
ومثلي معه لأمثالـه أقفـاي وقـدوم
وبعض السوالف ماتثيـر اهتمامـه
ابن الردي لو قال مايصيـر زيـزوم
ومافيه أمل يمكـن تطيـر النعامـه
مالك سوى تنسـاه وتبعـد الحـوم
والمحترم حـق!! عليـك احترامـه
قليل شكله وأغلـب الظـن معـدوم
ومن الحياء يطلع ويرجـع شمامـه
هـادي طبـع مافيـه خفـه ولازوم
فـي كلمتـه وبنظرتـه وابتسامـه
من ناس تحكمهـا تقاليـد وسلـوم
عبقـا ولبقـا خندريسـا غـرامـه
عني بعيد وفيه ما أشـري ولاسـوم
أبعد من سكاكا عن اقصـى تهامـه
مثل الرضيع اللي من الصغر مفطوم
فطـم وهـو ياحول ماتـم عامـه
عليه أهوجس تالـي الليـل وأهـوم
افراقـه أثـر فـي والقلـب ظامـه
حبه شغفني شغف جـارح لعيسـوم
ساوى الدروب العـوج بالأستقامـه
من نظرته تاقف بي الأرض وتحـوم
من جرف تفكيـري يـروح لعدامـه
ان انتصر منصور وان هزم مهزوم
لاااازم تقـول النـاس هـذا علامـه
ماخلو اللـي بالخـلا نايمـن نـوم
من نومه أقعـد خيـر وألا ملامـه
ولاني بمـدح وذم هالنـاس ملـزوم
أبغى السلامه كان حصلـت سلامـه
وأن صرت لا عاقل ولا مخرم خشوم
شخصيتك يصيـر فيهـا انفصامـه
ولو قلت هذا الشرق لإنسان منجـوم
يصير عنده غـرب وقـت أنجامـه
ولا صار حقك عند غالي ومهظـوم
عليـك تصعـب فكـرة الأنتقـامـه
دنيا تناقض تمـزج أفـراح بهمـوم
يومـاً تعجعجبـه ويـوم غمـامـه
هذا من النعمـه تقـل صايبـه زوم
وهـذاك مسكينـاً يقـم القمـامـه
ومتحير بأمرً صارواضح ومحتـوم
تحيـر بأمـراً منفـلـت من ازمـامـه
وبالنـاس متعلـم ومحتـاج تعلـوم
وبالناس جاهل ينمرض من طعامـه
وش جاب ريح المسك ياناس للثـوم
والمعرفـه وش جابهـا للغشـامـه
وجنـاح لبعوضه وللفيـل خرطـوم
وش فايدتك بعرف زرقـاء اليمامـه
ومهما وصلت بحال في حال محكـوم
لو أنت في دنيـاك راعـي فخامـه
وحاول تصير بساعة العسـر زيـزوم
وليا حزمـة الشـي جـود حزامـه
وحذرك وصبرك لازمه دايـم الـدوم
تسلـم مـن التسليـم والاستلامـه
ولا تصير لا امكابر ولا تصير حيموم
في رغبتـك بالشـيء وألا ألتزامـه
والعمر لـو طالـت لياليـه ميـدوم
لابـد مايفنـى وتفـنـى عظـامـه
وماتبقي الدنيا على الأرض علقـوم
وبالشيء يبدى النقص ساعة تمامـه
ماخلدت كسرى ولا قيصـر الـروم
وملوك عاشوهـا بوقـت الزعامـه
عاشوا حقيقه وأنتهت كنهـا حلـوم
وأفنـت بعدهـم ناطحيـن الجهامـه
والله يبـدل عـج الأيـام بغـيـوم
تمطر عقب ماهي عجـاج وعسامـه
وجذبني الأبداع مصحـوب بهمـوم
وجاني عـزاء الأبـداع بالأنهزامـه
ضمير غايب عنـده أخبـار وعلـوم
ومن التجارب صار عنـده ألمامـه
ماهمه الحرمان لو عـاش محـروم
ألا ليـا ناظـر رشيـق القـوامـه
أبو عيونً سود والخصـر مهظـوم
حلو تحت خده مـن يسـار شامـه
هـواه مشقينـي ولالحقنـي اللـوم
ولازال قلبـي عهـدة بأستـلامـه
غضاً عن الهفوات مكرم ومحشـوم
يمشي وهو واثق ومرفـوع هامـه
لاتقعـد النمـات عنـده ولا تقـوم
عن قيل والا قـال صـك اللجامـه
وبالشده الأصحاب تعرف من القـوم
كلً بوقت الضيـق يعـرف حزامـه
|