والله ماني على مدح الرياجيل بخيل خاصه لا جيت امدح في زحول الرّجال
المشكلة مدحهم حمل لا شلته ثقيل من ثقلها ما يقدر عليها كبار الجمال
حتى لو تحاملت على حملها لا بد يميل مال الجمل حيلة على حمل الاثقال
أجل وش حيله قلم بالقصايد يخيل في معانيها صدق من مزون الخيال
قصيدة ما هي غزل فالطرف الكحيل ولا هي عتاب وشكوة حال دون حال
قصيدة مدح في ذاك الشهم الأصيل ابو عبدالله اللي يشهد له فوح الدّلال
سلام يا ابو عبدالله يازحول الرياجيل سلام عد ما على الصحاري من رمال
سلام عد ماهل المطر وسال المسيل سلام عد ما أشرقت الشمس وطل الهلال
سلام ياللي له في قلبي مقر ومقيل فداك العمر لو ان العمر للفنا والزوال
قالوا عن حاتم ماله في الكرم مثيل ومن ذيك العصور تضرب به الأمثال
وانا اقول ابو عبدالله حاتم هالجيل قولوا لهتّان الكرم عندنا للكرم زلال
فديت كل حرف من اسمه به خصل نبيل ويا حيّ الحروف اللي لها فالقلب منزال
الصّاد (صدقك) فالكلام من دون تأويل ويا حيّ الرّجال اللي تثبت أقوالها بأفعال
الألف (آهاتك)عطني ياها لو توريني الويل ماهمني غير شوفة بسمتك ياطيب الفال
اللام (لومك) فالحياة على كل شخص ذليل عاش في هالدنيا وتطبع بطبع الانذال
الحاء (حبك) للمساكين وعابرين السبيل وشموخك في هالدنيا كنّه شموخ الجبال
شوف حالي مال السّعادة بحياتي دليل وفي غيبتك مال الصبر عندي أي مجال
النّهار اسود ما عاد به فرق مع الليل أسهر عيوني ودمعها على الخد همال
واتجه للقبلة واطلب من الله الجليل يالله يالله ترد من بغيابه علينا طال
تكفى تراني دخيل الله ثم عليك دخيل مال السهر والصبر عندي أي احتمال
عطنا من باقي عمرك ووقتك القليل ودي أدفى بك وأحس ان للعز ظلال
ليه لا شفتك تقتل فرحتي بالرّحيل ما مداني أقولك وشلونك وكيف الحال
طلبتك تدور لأسلوب حياتك بديل ما عاد اطيق بهالدنيا سالفه الترحال
|