رد ع الروايه
البارت الثاني
وقفت عليا وربعت صوب حجرتها تصيح وهى تقول انا سبب انا ليتني ما قلت له جيه
سعيد لام عمره لف على ساره وقال: اضني فهمتى كل شي بس مابا حد يدري انى احبها وتحبني وابا اكلمها سيري زقريها تراني صايم وتعبان
سالم: سعيد الحين خلنا نرتاح ونرقد وعقب الفطور والله يرتب لك يلسه محترمه لك انته وياها
حصوه كانت مب مستوعبه الموقف وما استوعبت شو يقولون مصدومه حبيبها جدامها متكسر وهى ما سوت شي قربت صوبهم بس سعيد طلع فوق وسار حجرة خالد ودخل وسلم على الموجودين وخبرهم بلي صار وشغل المكيف وتلحف ورقد
وسالم حدر حجره سهيل ورقد واللي كانوا في حجرة سهيل وخالد ظهروا وساروا صوب الميلس ..
ومر الوقت سريع وفطروا الناس وودروا الحريم وشواب عن حادث سعيد بس دامه بخير سكتوا وما قالوا شي وسعيد الحمد لله يحس ان راسه ما يعوره وان الخيوط بدت تطيح وسار صوب الدختر وقال ان الجرو ح بدت تلتئم وان ايده يقدر يشل الجبس لان خلاص تحركها وايد احسن .. ورجع البيت وهو متكشخ على الاخر وسار عند سالم وقال: وين اللي بيرتب لي يلسه وياها
سالم:يلا عقب التراويح ما بطلت الجبس
سعيد: بنشوف عقولة المثل بنحضر دبا وبنشوف مقيضها لالا بخليه اسبوع وعقب ببطله لان كسري خفيف الحمد لله على كل حال
ابتسم سالم وراحوا لصلاه ...
في البيت وفي حجرة عليوه كانت في حجرتها تصلي تراويح وعقب ما خصلت يلست تصيح وتخيلت لو لحظه بس خسرت سعيد شو بيكون شعورها تمت تصيح وهى تقول والله انى غبيه كيف رضيت اقول انى بزفه لوحده غيري كيف بس مب مني من هو كان سبب يقولى انتى شرات ختيه لين ما نحن الاثنين طحنا في هوى بعض سمعت الباب يدق عرفت انها ساروه دخلت وهي تضحك وقالت: قومي يلا كلى لج شي ترا حتى عند الفطور تعذرت لج وقلت انج البارحه سهرانه يلا نشي بتاكلين غصبن عنج
عليوه حضنت ساروه وقالت :ما اتخيل حياتى بدون اخوج هالدب اللى معذبني
ساروه مسحت على راسها وقالت: يا الله بسكم انتى تدرين لو حد درى بج انتى وسعيد تحبون بعض فيها قص رقاب والله ما يخلونج تطلعين جدام سعيد ولا بيخلونج تين بيتنا ولا بتستوى سالفه نحن في غنى عنها وانتى ما شفتي شكل حصووه هالتنكر كيف تترصد لج الله ينطبج فضحتى عمرج عندها وخليها تسوي شي تراه والله انها اشد عن المنافقين في تخريب البيوت
عليوه: انا ما يهمنى اللى يستوى اللي يهمنى اخوج وانا وثاني مره يثمن رمسته قبل كل شي مب يتم يقول اخوج واخوج وهذي اخرت الاخوه يبانى ...
مسحت دموعها عليوه ونشت صوب الحمام تغسل عيونها وعقب ظهرت هي وساروه دخلت داخل المطبخ وغرفت لها شوي عيش ابيض وروب ويلست تاكل وشوي وسمعت صوت الباب يتسكر لفت وشافت سعيد عطته نظره وتمت تاكل
وسعيد مرتبك خايف حد يحدر ويفهم غلط قال بسرعه: سامحيني الغلا والله انى احبج واباج بس كنت خايف من شعورج اتجاهى وخايف من مشاعري ويوم تاكدت من مشاعريه اتجاهج صارحت سالم قالى اصارحج بس انا خفت انج ترفضين حبي لج وقلت بتريا بشوف مدى تعلقج فيني عقب ثانويه خفت يكون اعجاب فيني وبس ويوم قلتى البارحه انج بتزفيني قهرتيني طالعتج بنظره معناتها بتبطين وبس يعنى وانتى مسويه هالقصه تزعلين عليه
عليوه بعصبيه: لانك غلطان هيه نعم غلطان لا طالعنى بها نظرات غلطان يوم قلت لى انى انا شرات اختك المفروض تكون صريح ويايه عشان ما تعذبني وتعذب عمرك الحين انته شو استفدت يوم نفدت عمرك بها الحادث تخيل انى فقدتك للابد انا كيف بعيش انا كيف بصرح لك بحبي فهمنى قول انطق لا تم ساكت يا سعيد سكوتك يعذبني
سعيد بحب: فديت عيونج يا الغلا سامحينى وانا ادري انى غلطان خلاص عاد نحن فضحت مشاعرنا لبعض خلينا نكتمها لين ما يستوى شي رسمي بينا مابا رمسه عليج يا بنت عمى واتمنى تسامحيني
عليوه ابتسمت وسط دموعها وقالت: بالحل يا سعيد عمري ما زعلت منك ولا بزعل بعد
سعيد بحب: غناتى مسحى دموعج ولا تخليني اتهور اكثر من جيه يلا انا بسير فداعة الله
عليوه : الله يحفظك مسحت دموعها وظهرت خاري شبعت من شوف سعيد وتنهدت وسارت صوب الحجرة وشافت ساروه تلعب بالايباد وتتسمع تنهدت وهى تحط راسها على المخدة وتقول في خاطرها معقوله حبينا بعض معقوله اه يا زمن والله ما توقعت في حياتي كلها ايي سعيد ويقول لى احبج على كثر ما كان يعتبرني اخته الا انى انا ابادله شعور ثاني واحاسيس ثانيه احبه والله احبه ومحد يكشفني الا سالم لانه ببساطه فاهم شعور ي تجاه اخوه
وصلها مسج على فونه فتحت وشافت وسايط صورة سعيد وهو متكشخ ولابس نظاره شمسية وكاتب على الجبس اللي في ايده احبهاااااا مووووووت وعداله حاط حرفه وحرفها بالانجليزي وكان يضحك ,,,
تفدته في خاطرها وهى طرش مسج لسالم: (ههههههههههههههه ذكرى ما قبل ان يودع الجبس ايده )
رد عليها سالم مسج( ههههههههههههههه لا وانتى صادقه بيشل الجبس وياااه عقب ما يبطلونه) ..
ضحكة عليا وقالت لساروه :شو تسوين
ساره: ناثق العب في الايباد
ضحكة عليا: تلعبين لعبت الكوّر
ساره:هيه وتصدقين انقهر كل ما اوصل قيم السادس او السابع اغلط ويرد يعيدني من اول لفل اففففف كرهت هالعبه
عليا: بالعكس تعيبني احس انى اتحدى الكور هههههههههههههه عبط احس انى استانس يوم اقيم لفلااات واوصل لفل السادس احس اني وصلت قمة اليبل بس انقهر يوم يتسارعن وينزلن بسرعه ماعرف اي وحده اضرب
شما دخلت عليهن وكانت تصيح
فزت ساروه وعليا وقالن بخوف: بسم الله بلاج
شما غطت ويهها بيدها وهى تصيح
ساروه وعليا انقبضت قلوبهن وقالت ساروه وهي تلوى عليها: شموه حبيبتي شفيج
شما وهي تشاهق: دانوه ختيه اختطفوها في كندا
ساروه: ليش كله ولا دانه حرااام وين المشرفات عنها
شما: تخيلي الاختطاف استوى يوم نزلن البنات لوبي ويلسن هناك دانوه كانت فوق تخيلي اختطاف باقتحام الشقه وكسر بابها لا صدقيني سالفه ملعوبه
ساروه وهى تخفف عنها: بلغوا
شما وهى تمسح دموعها:هيه بلغ ابويه السفاره وسهيل وعمر وسالم مشتطين بيسافرون وابويه وياهم بس سعيد ما خلوه عشان الكسور اللى في ايده ..
عليا صاحت وهى تقول: حرااام دانوه فديييتها ان شاء الله انه بيلقونها
شما: ان شاء الله يارب اتمنى كانت امايه مب طايعه انها تسافر كانت خايفه عليها بس ابويه قال لا مستقبل البنت لازم تسير والحين محمد اخويه سار وحجز لهم كلهم حتى ذياب وحياب بيسيرون محد بيتم وامايه تعبانه من الخبر
ساروه: لا ان شاء الله فديتج بيحصلونها
.................. في كندا .............
الكل محتشر والمشرفات معصبات على طالبات كيف خلنها بروحها
وحده من البنات: والله الغلط مب منا الغلط منكن يايات ويانا واخر شي تخلونا رواحنا في فندق انتن شو من البشر اي مسؤولية تتحملنها من دون ادراك لعواقب الامور
اما في جهة الثانيه من منطقة كندا
كانت تحس بثجل في عيونها فتحت عيونها ببطء وهى تقول بسم الله انا وين لفت يمين شمال وشافت حجره كبيره والوانها غريبه ازرق نيلي استغربت لفت وشافت زجاج كبير مطل على البحر نشت وشافت عباتها وشيلتها على التواليت وتذكرت كيف كسروا الباب واستوى هجوم شقه غمضت عيونها وسدت اذنيها كانها تبى تجذب اللي صار بس فجأه انفج الباب رفعت راسها وشافته انصدمت مب معقوله حلم اكيد حلم كيف ومتى استوى ها شي
قال بهدوء: اسف على طريقه اللي يبتج فيها لكن غصبن عنى ما عطيتيني فرصه
قالت بهدوء: ممكن لوسمحت تطلع وقبل ما تدخل دق الباب لانى ابا اغطي شعري
عطاها ظهره وقال :يلا تلبسي بسرعه
لفت صوب تواليت وسحبة شيلتها وتحجبت لف صوبها وقال: دانه
قاطعته وهى تقول: شو شعورك وانته مسوي هالحركة
رد بهدوء: غصبن عنى دانه انتى ما تعطيني فرصه ابين لج اللي فقلبي ما لقيت غير هالفرصه الا انى اخطفج
دانه بعصبية: وما حسيت بشعور هليه يوم بيدرون ما فكرت في امايه في ابويه في اخوانى
..: محد يهمنى الا انتى
دانه رفعت حياتها وقالت: اذا ما هموك كيفك بس انا يهمونى
.....: دانه الله يخليج انا يبتج هنيه عشان نتفاهم وعقب اوعدج اردج من وين ما يبتج
دانه: تبا دمر مستقبليه انته تدري لو هليه درووا انى مخطوفه بيحرمونى من دراسه مستقبليه
......: دانه انا مستعد اخليج تكملين مستقبلج بس توافقين على اللي اباه
دانه بعصبيه: لا بتبطي الشيخ وبعدين يا عبد الله اعتقد انا نحن زملاء دراسه وبس عمري ما تعرضت لك عمري ما يلست وياك او ضريتك بشي
عبد الله: انتى ما ضريتيني صح بس انا حبيتج والكل يعرف من شباب والبنات اللى في الجامعه وانا بصراحه ماباهم يقولون انى مارمت عليج
دانه رفعت حياتها وقاالت: يا ولد الناس هالسواف خلهن حق البنات اللي بايعات عمارهن ويدورن على الشباب اما انا عندى ولد عمى ومالى عييني ومابا عقبه حد
عصب عبد الله وقال: شوووو؟؟؟ يهبي ولد عمج ياااخذج انا اباج، واباج تعرفين شي عبد الله اذا حط شي في باله اييبه
دانه باحتقار: وانا اقول لك بتبطي تعرف شو يعني بتبطي جان لحقت تمسك سما بيدك ذيج ساعه يستوى خير
عبد الله: دام نفس طيبه خليني ساكت لا تخليني اسوي شي نندم عليه نحن الاثنين
دانه وبدى الخوف يتسرب فيها: ما تسويها عبد الله صح
عبد الله بحب: دانوه انا احبج اعشقج اتنفس هواااج لا تخليني اضرج بشي انا مابا اضرج والله مابا لانج قلبي بس عطيني فرصه ابين لج حبي
دانه: عبد الله الله يخليكــ بعد عنى هالفتره انا مب يايه ادور شباب وقصص حب انا ابا ادرس واحقق مستقبليه
عبد الله: دانوه والله ما قدر الله عزيز ما قدر انا اتوتر يوم اشوف شباب يطالعونج في الجامعة احس انى ودي اخبق عيونهم لا تمين عوفه فيني حسي
دانه : اف استغفر الله العلى العظيم انا شو يابني ادرس هنيه
عبد الله: لا تقولين جيه انتى لو ما ييتي منوه بحب ومنوه اللى يخليني اداوم الجامعه
دانوه انا والله مستوى اداوم في الجامعه عشانج بس والله لان كلاساتنا نفس شي استويت بس ايي عشانج ولا والله ما همتني الدراسه
دانه: عيل ليش متعنى وياي وهلك يتريونك ترد وشهادتك في ايدك
عبد الله: دانه انا مستعد اتغير عشانج بس لا تحرميني منج ابا على الاقل اشوفج كل ما اشتاق لج ايلس وياج
دانه: اعتقد انك ضيعت المذهب عبد الله انا لو ختك بترضاها عليه
سكت عبد الله منصدم منها
دانه بقهر: رد ولا انا برد عنك ادريبك مستحيل توافق لانها بكل بساطه اختك وعرضها عرضك لكن بنات الناس عادي صح
عبد الله: لاو الله انى ما ارضى حد يشوفج
دانه: عبد الله
عبد الله: عونج لا تغير لونج والحساد كلهم يفدونج
دانه بعبره خانقتنها: ردني الفندق
عبد الله: مب قبل ما توافقين على اللي بقوله
دانه حاولت ما تبين له ضعفها: شو عندك
عبد الله: اباج طول الوقت في الجامعه عندى ونطلع ونرد رباعه
دانه: يوم بفكر اصيع بي عندك عبد الله لا تكثر رمسه واقصر شر وردني ترانى بنت عالم وناس
عبد الله: ولا اقولج خلينا نملج
دانه نظرت حوايبها وقالـت: لا يكون مريض
عبد الله: مريض بحبج 3 شهور وانا احاول اتقرب منج وترديني 3 شهور معذبتني ما رمت لج انتى الوحيده اللي صدق حسيت انها لو يحطونها في ضو ما تخون اهلها ولا تخون ربها
دانه لا تعذبيني اكثر دانه اباج والله اباج ليش تحسين انى اجذب عليج انا لو اجذب عليج ما شفتيني لين الحين مكتف ايديني بتلقيني استغفلتج وانتى راقده لكن انا احبج ومستحيل اضرج لان عندى خوات وعندى ام اخاف عليهم الدنيا دواره يوم لك ويوم عليك
دانه وهى تسير صوب الباب: خل حراسك يبطلون الباب ابا اسير اضنى كنداــأ كلها درت بختطافى اضن حتى هليه دروا
عبد الله: بوصلج بنفسي
دانه: لا مشكور يزاك الله خير وفيت وكفيت
عبد الله : دانه لحظه شوي
دانه صدت صوبه وقالت له: نعم
عبد الله قرب منها وقال: اسف مليون مره وسامحيني اعرف ان طريقه اللي يبتج فيها غلط لكن انا اباج والله اباج ومستحيل اخلى ولد عمج ياخذج منى
دانه قالت له بصدق: على فكره انا مب محيره الا جيه قلت لك هالرمسه واذا تبا الصدق عبد الله انته مية بنت تمناك مستحيل هليه يوافقون عليك
عبد الله انصدم: ليش شو ناقصني
دانه: مب ناقصنك شي ولا هم يحزنون بس هذا طبع اهلنا ما يوزون الغريب الا اذا سالوا عنه
عبد الله: يسالون عنى وان شاء الله ما يندمون انهم يوزونى
دانه: عبد الله خلني اروح انا حركات اللي جيه ما حبها عنبوه اختطاف مره وحده قسم بالله استويت لي رعب يا عبد الله
عبد الله قرب صوبها وضحك وقال: حراام عليج والله اني انسان لطيف ما قلت لج شي بس مثل ما يقولون الحب اعمي
دانه: انزين لا تطولها وهى قصيره خل حرسك يبطلون الباب
عبد الله شخط البطاقه وفج الباب ظهرت وهو كان وراها نزل وركب سيارته وهي وياه وصلها لين الفندق وقبل لا ينزل قال لها: سامحينــــــــــــــي
دانه: الله يسامحكـــــــــــــــــــ ويسامح الجمـــــــــــــــــــــــــيع
نزلت من سياره ودخلت لووبي بس انصدمت من اللى تشوفه ابوها محمد عمر سالم خالد ذياب حياب ربعت ولوت على ابوها وصاحت شو تقول لبوها خطفها واحد من الجامعه ولا شو تقول ولا شو تخلى حضنها ابوها وواخوانها وقال ذياب بعصبيه :وينه هالجلب اللي خطفج وينه وينهـــ الله لا عاده
حضنت ذياب وقالت له: اه مادري عن شي الله يسامحه بس بقولك كل شي بس تكتم السر
ذياب: لا مب كاتمنها بسير وبدفنه مسود الويه هذا منوه
دانه: ذياب فديتك عشاني
ابوها: قولى لنا سالفه كلها يا بنتى ولا تحاولين تجذبين علينا
دانه استسلمت لهم وقالت كل شي بس مع حذف وايد اشياء
ابوها ومحمد عصبوا وذياب منقهر وحياب يالس يتسغفر يعرف انه العصبيه ما تسوي شي ولا تحل الموضوع
سهيل ياي صوبهم: ها الحمد لله انها وصلت حمد لله على سلامج
دانه: الله يسلمك
حياب: الموضوع ما ينحل بالغصب يا جماعة الخير وهذا الولد اللى خطفج من وين
تلعثمت دانه وقالت: مب هو اللى خطفنى هو اللي طلعنى من المكان لكن اللي خطفونى اجانب ما عرف شكلهم وفي داخلها تقول استغفر الله يارب سامحني
حياب: توج تقولين واحد وياج في الجامعه
دانه: ويايه في الجامعه صح بس انقذني منهم مب خطفنى بلااااك الله يهداااك
وتقول في خاطرها عذر اقبح من ذنب..
ذياب: يلا قومي لفي قشج بتردين ويانا
انصدمت دانه وقالت: لا ذياب دخيلك ما بقى عير شهر واسبوع فديتك خلنى اكملها
ذياب: اوكيه ما عندى مانع بس انا وانتى في شقه وحده
حياب: هذا راي العدل كملى بس ذياب عندج حتى يوم بتسيرين الجامعه عندج يكون
عمر :هيه حتى انا بيلس عندها
دانه انقهرت منه في خاطرها انته شو يخصك انا وخويه نتافهم انته شله ياي في نص
عمر حس من نظراتها انها ما تباه بس قال بعناد: مهما كان انتى حرمتيه في المستقبل ولازم اطمن عليج
انقهرت وقالت: نجوم السما اقرب لك ابويه شوف عمر
ابوها: شو قال ثره ولد عمج واولى من الغريب
دانه: لالا انا الحين ترانى مب متفيجه ولي يباني يترياني لين ما اخلص واحصل على دكتوراه انا ماروم من الحين التزم
عمر بغياض: انزين اللي يباج يترياج وانا بتريااااج يلا انقفضي بس خلصي بسرعه
وطلع لسانه يغايضها
انقهرت منه وقالت لذياب: يعنى انته بتم ويايه
ذياب: هيه مب مستعد بعد اخسرج
ضحكة على اخوها وقال حياب: يلا نحن برد عيل بس ذياب حواطه وهوامه هنيه ماشي خلك عند اختك
ذياب: ما عليك حتى دوامها انا بشلها يلا برايكم انتوا الله يحفظكم
سالم كان ياي وفي ايده قشار دانوه لانهم بيحولون شقتها : يلا ها اي فندق بتسيرون
دانه ضحكة على سالم: مهاجر اخونا في الله
سالم ضحك وقال وهو يغمز لها: ما خليتي فيني عقل
استحت دانه وقالت: اتغلى
سالم: المره الثانيه والله ما يسلم منى اللى بيقرب منج والله لو ما عندى داوم جان يلست
حياب يغايضه: خذ اجازه
سالم: هيه والله صدقك وايه قبل العيد برد لكم ان شاء الله
دانه: لا تاخذ اجازه ولا عندك خبر سير برايك رد انا وذياب بس يكفي تمزرون الشقه انتوا ما باخذ راحتيه
سالم: سود الله شاربج يا الهرمه لا بيلس عنادا فيج انتى خطيبتيه ورفع حياته
حياب: ما شاء الله خطابج وايد اليوم
ضحك ابوه وقال: هيه والله
عمر انقهر وقال: بس ولد عمها اولى
ضحك سالم وقال: بلاكم صدقتوا اسولف انا وطالع عمر يا بويه لا ثور علينا ترانا ما نباها حرمتك حاط عيني على وحده والله .. ههههههههههههه
الكل ضحك عليه الا دانه اللي انقهرت من عمر تكرهه ما تباه الله ينطبك يا عمر
وعقب سوالف ودعوا بعض وروحوا وعمر وذياب يلسوا عندها في شقه وشلوا قشارها وانتقلوا لشقه ثانيه عمر كان طول الوقت يطالعها ومنقهر من تصرفها وقال في خاطره والله يا ربيج يا بنت العم وخليج تشهقين با سمي شهاااق ما عليه الايام بينا
ذياب كان وايد خايف عليها وقال لها من تطلع تقول له وهي هزت راسها بهيه ودخلت الحجره وعقت عمرها على شبريه تنهدت وهى تقول الله يصبرني على مغثة ولد العم عني بلاه وراح فكرها صوب عبد الله بعد انته ثاني فلم رعب سويت لي انا مادري بلاهم الناس تخبلوا ونسوا ربهم الحمد لله انهم لانوا وخلونى اكمل دراستيه فديت ذياب والله لولاه ما عرف شو بسوي رقدت وما حست بعمرها عمر كان يالس في الصالة وذياب عنده ويرمسه ويعتذر له من تصرفات دانه وعمر يطالعه ويرد يتنهد وهو يقول في خاطره والله يادبها بس ما عليه انا تلكمني بها طريقه والله يا تشوف ...
وبعد مرور الوقت طلع الصبح عليهم ونشت دانوه وتلبست ولبست عباتها وشيلتها وجحلت عيونها وظهرت صوب حجره ذياب ودقت الباب لفت صوب الصاله وشافت عمر ظاهر من المطبخ وفي ايده كوب نسكافيه
دانه شهقت وقالت: رمضان يا الغبي
عمر نسى ورد المطبخ وجبه وتمضمض وقال : انتى خليتي فيني عقل
دانه: انا شو سويت لك
عمر: انتى ادرى وبعدين هب اصغر عيالج تكلميني بها طريقة
دانه: ان شاء الله اسفه
عمر: اخوج واعى من صبح يالس على البلكونه
سارت دانه صوب البلكونه ومالقته سمعت الباب يتسكر وقالت : سخيف بطله
عمر: مابا وذياب راقد
دانه: انزين والمطلوب
عمر: يا تحسنين الفاظج ويايه يا والله انا اربيج بطريقتيه تعرفين
دانه: انا اكرهكـــ ما حبكـــ ما ادانيك كل معنى لها الكلمة بكل لغات العالم اقولها لك
عمر من دون شعور عطاها طراق: كم مره قتلج حسنى الفاظج انا هب اصغر عيالج تستاهلين اللى ياج واكثر بعد
دانه ودموعها في عيونها: وايد عليك تمد ايدك عليه
عمر: انتى اصلن الموت ابرك لج خاطفينج والله يعلم استوى فيج شي ولا لا لو انا من عمي ما خليج دقيقه هنيه تهيتين على كيفج
دانه ودموعها نزلن قالت: انا اشرف منك انزين والحمد لله عارفه عمري زين ومستححيل حد يضرني بشي وانا يطولي بعمرك عن 100 ريال جان ما تدري واكبر دليل يكفي انى خايفه ربي وعارفه مصيري خلاف قبل ما خاف من البشر اوكيه
بطلت الباب وسارت توعى ذياب اما عمر كان متلوم فيها كيف قدر يمد ايده عليها هو يحبها ويباها ويخاف عليها لكن انها تتطاول عليه هذا اللي ما قدر عليه يبا يعرف كرها له ليش وشو سبب هالكره والحقد اللى في قلبها عليه ...
طلع ذياب من الحجره متلبس ومتكشخ وسار صوب عمر: ما بتسير ويانا صوب الجامعه
عمر: لا برقد انا لين الحين ما رقدت
ذياب: انزين عيل يلا برايك شي في خاطرك
عمر: لا سلامتك
ظهروا دانه وذياب وراحوا صوب الجامعه
ذياب ماسك ايدها ويقول: متى كلاساتج تبدا
دانه : اممم بعد ساعه
ذياب: وليش ظهرنا من وقت
دانه: لان الجامعه بعيده لين ما نوصل لها يبانا ثلث ساعه
ذياب ركب سيارته وقال: نجرب نسير مشي
دانه: ما فينا صيام والله تعب
ذياب: يلا انزين ركبي
ركبت دانه سياره وهى تفكيرها في طراق اللى عطاها عمر حست انها وايد بالغت وياه وتمادت وياه خلاص انا من اليوم ورايح بطنشه ما فيني يحط دوبه من دوبي ولا مب بعيده على عمر يسويها ولد العم ....
انتبهت على ايد ذياب وهو يهزها من جتفها: بلاااج حوووو وين وصلتى ؟؟!!
دانه: وياك فديتك
ذياب:ما ضني ويايه يلا وصلنا جامعج
نزلوا دانه وذياب عند البوابه كالعاده دانه شافت شله عبد الله واقفين يتريون عبد الله اللى نزل من سيارته وتوجه لهم ...
انتهى البارت
|