الامل اللي ممكن يشع من حبي له مستحيل يتم ،،،، صلاح حتى لو كان اخر انسان في العالم ابد ماراح يكون اكثر من علاقة حب مالها اي مصير وانا ماعندي نية اني اكرر الغلط مرات ومرات ...
.... دق الجوال وكان صلاح ... رديت : ..............
صلاح : لينا .... لينا .... بس ابي اعرف اذا انتي لينا ...
........ : نعم ياصلاح ...
صلاح : لينا ليش ماتبين تعطيني فرصة لينا انتي تحبين احد ثاني ..
..... : لا ثاني ولا ثالث مافي احد ولا راح يكون ..
صلاح : ليش متشائمة كذا ليش يالينا تبين تفهميني انك مو حاسة فيني ...
........ : ليش تركتني ذاك اليوم ياصلاح ؟؟!!
صلاح : يعني انتي زعلانة مني علشان تركتك ذاك اليوم...؟
....... : لا .... بس سؤال حبيت اعرف اجابته ...
صلاح : كنت اشوفك يوم قلتي انك بتفسخين العباية كنتي مرة متضايقة مين اللي جبرك يالينا ليش كنتي مستسلمة لطلب محمد ... اكيد هو اللي طلب منك ...
صلاح حط يده على الجرح اللي فيني ... وجلس كلامه يتردد صدى في داخلي ... وسالت انا نفسي كثير ليش انا كذا مستسلمة للي يحط يده علي وكنو ماعندي اي كيان ليش ....ورجعت للواقع على صوته وهو يقول : عورني قلبي يالينا حسيت اني مقصر معك حسيت ماودي اخليك وفي نفس الوقت لا تفكرين اني رحت انا ظليت اراقبك من بعيد شفتك وشلون محمد معك ...... وعرفت وين كنتي ساكنة فاي فندق جيت كثير تحت على امل اني التقي صدفة بك بس ربي ماكتب ... حسيت انو محمد ماله حق فيك ابد .. كان ودي اجي اخذك منه هو مايستاهلك
وطلع صوتي اخيرا : وانت انت ياصلاح الي تستاهليني ..
صلاح : لينا ... وقاطعته : تقدر تقول لي ياصلاح وين كنت انت من عشرين سنة ياولد عمتي ...وسكرت الخط ...
اااه ياصلاح انت بعد ماراح تكون في حياتي الا شخص تحط يدك علي ...
على قدر ماكنت خيال حلو في حياتي حسيت لمن عرفت من انت برعب حقيقي من كون انك ولد عمتي مدري ليش ...... مدري علشان ماما كانت تخوفني منكم دايم ... جاني شعور مرعب وعشت ايام كنت خايفة .... من مجرد التفكير وصلاح مابطل ظل يدق مرة ومرتين ومرات ...
جاء يوم الخميس بعد اسبوعين من المكالمات اللي ماكنت ارد عليها .... صحيت من النوم ورحت لامي هيا حبيت راسها ....وجلست معها ... كنت صاحية متاخرعلشان كنت افز طول الليل باين على وجهي اني مانمت مرتاحة ..
امي هيا : لينا وجهك مخطوف في شي ....!!
......... : لا يمه بس امس تعبت وانا اتقلب
امي هيا : ليش ... عسى ماشر ....؟
..... : لا ابد بس شكلي بزكم ... الحين اخذ بندول وارتاح ...بعدين جانا جرس الباب واللي على الباب حرق الجرس ... انفزعنا منه كنت ببيجامة النوم رحت بسرعة علشان بس اعرف من على الباب مو متعودين على احد في هالوقت وخاصة اليوم ...: مين ؟؟!!
وجاني الصوت عالي وفيه نبرة عنف وغضب : انا افتحي الباب يالينا ..
لفيت على امي هيا وانا مستغربة : ماما ... فتحت الباب.. وجاتني ضربة على كتفي من ماما قوية خلعت لي كتفي سحبتني بعدها لجوه ودخل بعدها مشاري على كثر مافاجاتني حركة ماما كنت اطالع عمري ادور نظرة مشاري طاحت وين .... لميت عمر ي وانا في يد ماما وتكورت ...
ماما عمرها ماضربتني بس كانت دايم تخوفني لحد الرعب من صراخها بس ... ارتعبت وصحى فيني الرعب اللي كنت منحاشة منها علشانه .... ماما هي اللي خلتني كذا ياصلاح خلتني مستسلمة ... ماما هي اللي صنعت شخصيتي ....
كنت ارتجف وهي تصرخ علي : يازبالة كنت عارفة انك دايم بتخلين وجهي بالتراب بس انتي خلاص عديتي اللا معقول ...انتي حقيرة .... ماتستاهلي تعيشي بالدنيا ............... كانت تهز فيني وانا اروح واجي بين يدها .. جاني مشاري مسرع وسحبني من يدها وامي هيا كانت تصرخ : وش فيه ... وش فيه ...خلي البنت ذبحتيها ..
ماما : تستاهل الموت .......... تستاهل الموت
خذني مشاري وراح فيني للباب ...والتفت على ماما : يلا مافي داعي اللي انتي تسوينه ..
وانا كنت خايفة اطيح في يد ماما مرة ثانية بس اللي كان مخوفني اكثر هو مشاري اللي كان محاوطني بيدينه علشان ماطيح .... وجات ماما وامي هيا تلاحقها رمت علي العباية : البسي ياملعونة ...ولفت على امي هيا : خلاص يمه اقول لك بعدين مافيني صوت الحين احكي ..
حطني وراء ... وركب واستنى ماما تجي وحرك السيارة ... طول الطريق وماما تسب وتلعن فيني ... وانا تكورت في مكاني وبلعت لساني ....وصلنا ... نزلني وجت ماما مسرعة تبي تلقطني بس هو منعها ... وقال لها خلاص انا ادخلها البيت روحي ..وبعدين عن يدها راحت وخلتني معه وانا كنت مرعوبة منه لحد الموت بس هو مسكني غصب وهمس في اذني ......: حياك ياقمر ....
حبستني ماما بغرفتي يوم كامل منعت اي احد يجي عندي ....... بس ثاني يوم انفتح الباب ودخلت منه امي هيا
قربت مني وجلست ورجلينها يادوب شايلينها ..... : منو صلاح يالينا ....؟!
رفعت راسي وانا منصدمة ...................: .........يمه
امي هيا : يعني كنتي تعرفينه .... ومن متى يالينا ....؟؟! ونزلت دمعتها : ماهقيت اني ربيتك كذا يالينا ...
كنت ابي ادافع عن نفسي بس امي هيا قامت واطلعت ناديتها : يمه الا انتي .....بس هي ماردت ....طلعت وتسكر الباب وسكرت الدنيا بوجهي معه ........... ظليت محبوسة في غرفتي يادوب اقوم للحمام اللي كان في نفس الغرفة وارجع لسريري ثانية .... كنت ادعي كثير وانا اصلي انو ربي يرجع لي امي هيا ...يمه انتي قلتي لي انو مراح يفرقنا الا الموت ..................اآآآآآآآآآآآآه يايمه ...
نمت على فراشي يومين افكر بحالي .... انفتح الباب وطل علي سعود.....: لينا انتي صاحية....
رفعت جسمي من على الفارش بس ماكان لي حيل ارد باي ..... وحطيت عيني في عينه ....جلس قبالي ...
سعود: لينا ماما قالت كل شي بس انا ............ مو مصدق ...
........ : سعود واذا طلبت منك تعلمني السالفة لاني ماني فاهمة شي ...
فتحت عيونه على الاخر : يعني انتي مانعرفين صلاح ذا .....
نزلت راسي : سعود انا ..... انا اعرفه بس ....مدري كيف اشرح لك...رفعت راسي ثانية وشفت نظرة غضب في عيونه تراجعت لوراء : لالالالالا سعود تكفى لاتصير زيهم افهم بعدين احكم
سعود : افهم وشو .....
......: انا عرفته يوم كنت مسافرة بالطيارة علشان اروح لمحمد هو اللي خلص لي اوراقي في المطار وكانت اول مرة .......................... علمت سعود عن اللي صار كله ... وقلت له صلاح من يكون
سعود : لينا صلاح كان هنا من كم يوم دخل وطلب يشوفك ... ولمن عصبت عليه ماما قال انك مو راضية تردين عليه بس هو حاب يتطمن عليك ... بس طردته بدون مايكمل كان يبي يقول شي بس احنا كلنا عمت عيوننا طريقته لمن جاء يسال عنك........
...... : مو ذنبي ياسعود .. انا ماسمحت له ابدا .... وجلست ابكي بحرقة حاول سعود يخفف عني بس صدمنا صوت جاي من بره صوت صراخ طلعنا بسرعة على الصوت علشان نعرف منو صاحبه ....
امراة غريبة جالسة تصرخ باعلى صوتها : اخذتي اخوي من قبل وعلمتي بنتك اشلون تكون زيك خطافة رجاجيل .......وقربت من ماما وهي تاشر باصبعها :خليتك من زمان تسوينها ومابيدي شي بس الحين غير ماراح اسمح لك لا انتي ولا بنتك سمعتني زين لا والف لا لو مافي في الدنيا الا بنتك ماراح تكون زوجة لصلاح ولدي زين الشباب يكون زوج بنتك اللي سمعتها على كل لسان ....وحتى لو كان ماعليها اي كلام يكفي انها بنتك .... ولفت علشان تطلع ...وشافتني وعطتني نظرة تتفحصني بكل احتقار ...: ابي افهم شلون لفيتي راسه ،،صحيح انك حية زي امك ....
وطلعت كنت مصدومة منها يعني ابي افهم معقولة هذي عمتي ... بس كان لازم تعامل اكثر مع ماما اللي جات تبي تحط حرتها فيني بس مسكها سعود ومنعها وصرخ فيني لينا روحي داخل سلمت من يدها بس لسانها ماسلمت منه وانا رايحة سمعتها تكلمني : الله ياخذك يالينا ويريحني منك شمتي العالم كلها فيني ...الله ياخذك ... وطاحت على الارض تبكي وسعود يهديها ...
رحت لغرفتي متضايقة طيب انا وش ذنبي كلا منك ياصلاح كلو منك ..............جلست بغرفتي لين الليل عقلي مو راضي يجمع احسه بينفجر ماني عارفه افكر في اي شي ... كنت مطفية الانوار بس سمعت صوت الباب ينفتح بشويش رفعت جسمي من على السرير ظنيته سعود .... دخل وسكر الباب.... قرب مني ....ريحته دخان ............ لالالالالا هذا مو سعود ....كشيت لوراء ...هذا مشاري ....: وش تبي مني ...........
مشاري : كذا تستقبليني ....تصدقي وحشتيني ..............
...... : حرام علي خلني في حالي ...قلتها وانا ارجف من الخوف ومنكمشة على روحي
مشاري : ياحياتي الحين انا مكلف على عمري جاي اسال عنك .... هذا جزاي ......... وقرب اكثر ومد يده يسحب يدي .... وانا احاول افلت منه ..... : اتركني ... اتركني في حالي الله يخليك ...
مشاري : ليش ياعمري ؟؟
بديت ابكي ...... : وشو اللي ليش حرام ................. حرام
مشاري : الحين للكل حلال ولي حرام .... وش هالكلام ....انت طاوعيني وانا اخلي امك تسامحك ... بعدين مافيها شي يعني انتي وش الي يضرك .... ...قرب اكثر وحاوطني بيدينه .............: انتي بس اسمعي الكلام والا اخلي عيشتك طين سمعتي ....
مسكني بقوة وحاولت افلت منه بس انا صار لي كم يوم مااكلت كنت ضعيفة جدا وقوتي بسرعة انهدت من يدينه القوية بس قدر علي وانا اتوسل له واصيح وهو حاط يده على فمي .... مقدر اوخره عني بس مقدر استسلم ... صرخت من جواي يارب ... يارب .... خذ عمري قبل مايمس شعرة مني مابي اعيش بالدنيا بعدها يارب ...........................بس الله ارسل لي من ينقذني منه على اخر وقت ... مع ان شعور اللي اقبل علينا كان يختلف تماما... قام مشاري ووقف قدام شخص مو باين في نور الغرفة الضعيف ابدا ...بعدين طلع بسرعة وخلا الباب مفتوح على الاخر .......... رفعت راسي : ماما
ماما : اي ماما ياست لينا ,,,, يعني انتي شو قد حقيرة ..
جاوبتها بين دموعي .....: لا ماما حرام عليك ... هو هو وانقطع صوتي ..... يعني معقولة هذا شكل وحدة كانت تبي ..: ماما ليش ...... لفت وخلتني قمت لها مسرعة وقفتها وواجهتها : ربي راح يحاسبك على ظلمك لي .... وجاني كف طيحني على الارض قالت لي وانا على الارض : ماراح اخليك هنا ولا دقيقة ....لميت عمري واللي بقى من كرامتي ورجعت لفراشي ....وظليت كم يوم فيه لا نوم ولا اكل والدنيا ضايقة بي ... حتى سعود بطل يجي عندي محد كان يطل غير الشغالة اللي ترحم حالي وتجيب لي اكل اللي ماكنت المس منه شي .......
دخل علي سعود بعد كم يوم .... بس انا خلاص مافيني حيل وجاني صوته : لينا ليش ماكلتي .... رفعت راسي وحطيت عيني في عينه ......: خير ....
سعود : ليش تكلميني كذا ......... كل اللي فيك منك .... انتي اللي سويتي في عمرك كذا
....... : والله ..............طيب وانت ليش جاي ..............
تنفس بعمق ..: ماما ماتبيك في البيت احنا بالموت قادرين نمنعها عنك ..
..... : وليش مكلفين على اعماركم خلوها تذبحني يكون احسن لي ولكم ... ........طالعته بغضب : وياترى ماما وين تبي تقلعني هالمرة ...
سعود : لينا هاذي مو طريقة ..
..... : سعود اخلص قول اللي عندك ادخل في الموضوع سيدة ماظنتي انك جاي علشان تقول لي كذا وبس
بعدها طالعني بغضب : لينا هاذي مو طريقة .... عموما في معرس جايك ولازم تاخذينه سمعتي ... وقام ..
ناديته........... : سعود اجل انت تقول اني انا اللي اسوي فيك كذا ..... هذي ماما حيرانة فيني ترميني زي الكورة بس كل مرة ارجع لها ... وضحكت من مر مافيني .........
ماما رجعت اسمي للخطابة علشان تبي تزوجني ............ ولقت لي عريس فلة ماعنده احد ابد ،، ماله في الدنيا الا اخته وبس ،، واليوم اخته جايه تشوفني ،، حالتي حالة وصحتي انعدمت بس ... قمت ولبست وتعدلت ... مو علشان احقق طلب ماما بس كنت خايفة قد الموت ماما مرخصة فيني مرة ومدري المرة الجاية بسلم من يد مشاري والا لا .... دخلت عندهم ..
ام عبد الله ( الخطابة ) اللي كانت تعرفني زين : هلا ببنتي هلا بعروستنا تعالي جنبنا هنا .. قدمت لعندها وجلست بينها وبين اخت المعرس اللي مبين على وجهها انها بتروح وماراح ترجع ابد .... جلست معهم ومو معهم
ام عبد الله : انا قلت لام العروسة انكم مستعجلين علشان تبين تروحين للرياض وانتي مطمئنة على اخوك ..
اخت المعرس ( نوال ) قالت وهي تطالعني ومترددة : اي ان شاء الله ..... الله يكتب اللي فيه الخير ...
لفت علي : وانتي اي صف ......
ماما : مخلصة ثانوي وجالسة بالبيت .....
نوال : اهاااا ................ وكم لك سنة مخلصة
ام عبد الله : توها توها .......... البنت شقردية وست بيت ماشاء الله عليها تعجبك وهي اللي ان شاء ربك تريح عبد العزيز .......
سرحت اسمه عبد العزيز ........ يارب ارحمني برحمتك .... انا ادري اني مقدر اتمنى الموت بس انا تعبت ..
اخت المعرس جالسة على اعصابها وبسرعة دقت على اخوها وراحت وانا تميت في المجلس معهم يوم راحت
ماما : انتي ماقلتي لها عن زواج وطلاق البنت .........
ام عبد الله : لا ماقلت لها انتي قلتي تبين معرس وبسرعة ...ماراح تلقين واحد يبي وحدة مطلقة مرتين ... قلت اخبي عنهم بس احسن لين يملكون ..
......... : حرام ..توني ماكملت كلمتي
ماما : لينا قومي داخل ...........قمت ورحت لغرفتي ... وقلت في خاطري اساسا شكلها ماراح ترجع يعني ليش اتعب نفسي .... وبعدين يوم يسالون عني بيعرفون .....................بس انصطدمت يوم عرفت انهم داقين يبون يحددون يوم الملكة بعد اسبوع................. وماما اللي كانت مستعجلة وجاء على هواء العريس اللي كان بعد مستعجل وماكنت اعرف ليش ،،، يعني ماما انا اعرف ليش بس المعرس مادري صراحة اكيد في سبب... الله يستر ..
اخته ماجات ليوم الملكة كنت اعرف يوم شفتها انها مو راضية .....تزينت ولبست فستاني اللي لبسته لملكتي على محمد مع انه كان مرة وسيع .......جاء خالي ابراهيم اللي ماشوفه الا يوم ملكتي ويوم طلاقي ... جاني وجاب معه الدفتر واشر لي على مكان التوقيع : وقعي هنا ... وراح بالدفتر ودخل بعده سعود ساعة : المعرس يبي يشوفك .... قمت معه للمجلس اللي فضى مافيه الا المعرس وسعود اللي وداني للمعرس .... وقال لي : لينا مدي يدك عبد العزيز يسلم عليك .... مديت يدي بس بدون مارفع راسي ...سلمت عليه وقال لي : مبروك .... بس الصوت مو غريب ....... طلعت بسرعة ورحت لداخل ....
...وجاتني ماما وانا في عرفتي في الليل : المعرس بعد اسبوع بيجي ياخذك .....بنعزمه على العشاء وبعد مايخلص ياخذك .......... انا لميت اغراضك اللي كانت في شقتك وجبتها علشان تاخذينها معك ....
...........: ماما انتي الحين مبسوطة ........... ارتحتي مني.... ابي اعرف انا بنتك ....
ماما : للاسف يالينا لا .......تمنيت تكوني لي بنت بس انتي ........ دايم تكسريني ... انا ماعرفت اربيك ...
تمنيت اني ماجبتك ابد ..............وراحت ........ياه يعني لهالدرجة انا ثقل كبير عليها اكبر من انو تتحمله ..
......................................
مر الاسبوع بسرعة وجاء اليوم اللي ياخذني فيه عبد العزيز ........... ظليت في غرفتي احتريه لين خلصوا العشاء وجاني سعود يقول لي يلا عطيته الشنط كلها ....ودخل بعده خالي فيصل : لينا ... اقعدي ابي اقول لك شي قبل ماتروحين
...........: ايوه خالي .. جلست قباله
مد لي خالي فيصل ظرف : هذي اوراقك حقت العمارة الي وكلتيني عليها التوكيل لسى انا مخليه ... علشان اجمع لك الايجار كل ست شهور وراح انزله على حسابك في البنك ... اذا حبيتي تاخذين الوكالة مني اتصلي بي وعلميني .
..... : خالي ...
خالي فيصل : اسف يالينا غير العمارة مافي بيننا كلام ... قصرتي رقبتي .... اختي خلتك عندي امانة وانتي استغفلتيني ... الله يسامحك .. وطلع وخلاني ................ ماما ماقصرت تكرهني وكرهت الناس فيني يعني حتى امي هيا وخالي فيصل قلبتهم علي .................
لبست عباتي وطلعت ....... لقيت عبد العزيز يحتريني في سيارته .. ركبت جنبه قدام وحرك السيارة ..... طول الطريق ماتكلم ابد ووجه كان معقود .... ماعرفت ليش بس يوم دخلنا في حواري قديمة ... ووقفنا عند باب بيت قديم .... نزلت .... سبقني عبد العزيز وفتح باب البيت اللي دخلت له وانا حاسة احساس غريب .... لحقني بالشنط
عبد العزيز : تفضلي ............... نسيتي ....والا لسى ذاكره هالبيت ...
لفيت عليه : انت ........
عبد العزيز: اي انا راعي اللميوزين .......... هذا انا يالينا ..
.......... : طيب ليش ......... انت شكلك مو مبسوط ليش تاخذني ..
قابلني وجها لوجه وقال : يوم وصوفو لي بيتكم وانا جاي مع اختي .... جاني شعور غريب يوم وقفت عند بابكم تذكرته عمري مانسيته .... ولا نسيت البنت اللي احترت وكان ودي اعرف قصتها ..... لما قالت لي اختي انك ماعجبتيها وانك ماتناسبيني انا اصريت .... حسيت انك مظلومة ... وقالت لي اختي اذا تبيها خذها بس لا تجبرني ارجع مرة ثانية ... رجعت وملكت عليك ... يوم شفتك تمنيت اعلمك من انا وتمنيت انك ترفعين راسك وتعرفيني .... يوم رجعت فرحان عرفت من انتي وعرفت انك مطلقة مرتين ... وعن سمعتك الحلوة ..... تذكرين وش قلتي لي يوم وصلتك الفجر "مدر ي بتصدقني والا بتغرك المظاهر بس لو انا زي ماتقول ماشفتني اخر الليل اتشحتك توديني للبيت كان لقيت لي مليون طريقة اروح بها "..يومها صدقتك ... ورفع راسي باصبعه وحط عينه في عيني وطالعني باستحقار وكمل : مادريت انك كذابة ...راح وهو طالع من الباب وقف وقال :غرفتي اللي فيها ملابسي روحي للغرفة الثانية ومابي اشوف وجهك لين اقرر وش اسوي بك ...........................
خلاني مصدومة وعاجزة عن التفكير شلت اغراضي ورحت لغرفتي اللي قال عنها لقيت فيها فراش على الارض نمت عليه بعباتي
الجزء السابع
ضعت من جديد يعني حتى المرة هذي طلعت من عند ماما بس شكلي راح ارجع لها ...... المشكلة ياماما انتي ماتبيني وانتي السبب اللي يخليني ارجع لك دايم .... انتي اللي خبيتي علي سالفة خالد وسكنته مع مرة ابوه الغير طبيعية ...وانتي اللي رميتيني لواحد مرخص بي زي محمد .... وانتي بسبب العداوة اللي بينك وبين عمتي كنتي سبب في استحالة ارتباطي بصلاح .... والحين لانك شهرتي بي عند العالم كرهتي فيني عبد العزيز وانا مابعد بديت معه حياتي ....
ماما ماكنت كذا وش السر اللي مخليها مش مستحملتني قد كذا ...
دفنت راسي بالمخدة زي قبل كنت تعبانة ... بس برد الشتاء اللي كسر عظامي ماطفى النار اللي في قلبي
... ماتغطيت كويس كنت ابيه يتخللني .... مدري ليش تصورت انو ممكن يبرد النار اللي فيني ...
ماما طول عمرها صارمة معي بس كانت دايم مو واثقة فيني .. كانت دايم تحذرني وتقول لي : مابي احد يكسر نفسي ويقول اني ماعرفت اربي ... بس والله انا قد ثقتها بس هي ماعطتني مجال زي العالم والناس ...
غيبت عن الدنيا في كوابيس واحلام مزعجة مدري كم صار لي نايمة بس كنت كل مارفع راسي ابي اصحصح ..الاقي نفسي مافيني حيل ابدا ... وارجع اسند راسي على المخدة من جديد ...وفي ظلام غرفتي طل على نور مع صوت الباب اللي انفتح مدري هي من احلامي والا جد كانت حقيقة .... مافتحت عيني ... بس في حد قرب مني : لينا .................... لينا ..... بس مارديت مو لاني مابي ارد ..... بس دورت صوتي ومالقيته ....وبعدين ليش ارد .... رفعني بين يدينه : لينا ................ لينا ................. ردي من من متى مااكلت ......؟ ........... من متى ماطلعتي اساسا من الغرفة ..... ماكان فيني حيل بس بصعوبة خلصت نفسي من يده ورجعت بسرعة تكورت بالفراش وغطيت عمري ورديت بصوت يادوب طلع : بردانه .......
حسيت بالدفىء ........ ماودي افتح عيني ..... كنت في امان وانا مسكرة عيني ونايمة ....
سمعت صوت : الحرارة نزلت الحين ....بس عندها ضعف عام ولا تنسى انو خمس وتسعين كثير جدااا على جسمها محتاج فترة علشان تتخلص من التعب واحنا عطيناها ابرة تكافح الالتهاب الرئوي اللي احنا لحقناه الحمد لله ..
عبد العزيز: الحمد لله بس يادكتور صار لها يومين نايمة ....
الدكتور : هي تمام الحين بس لاتنسى انو جسمها ضعيف يمكن هذا سبب خمولها .......بس عندي سؤال
عبد العزيز : تفضل
الدكتور : جسمها مليان كدمات وبقع .... كنت ابي اعرف وبكل صراحة سببها
عبد العزيز: والله يادكتور انها كانت حابسة نفسها بالغرفة يومين ..... وعلى فراشها ماتحركت منه وانا بعد مادري وش سبب هالكدمات .... يعني تتوقع انها اثار ضرب..
الدكتور : هي ممكن يكون لها سبب اخر بس لازم اسالك اول
عبد العزيز: بصراحة يادكتور انا وهي تونا متزوجين تقريبا من اربعة ايام يعني انا اذا كان في شي انا لسى ماعرفه ...بس يعني اذا ماكان ضرب ايش ممكن يصير سببه
الدكتور : هو في سبب بس خلنا الو نسوي لها تحاليل بعدين نتكلم ..... راح اخلي الممرضة تجي تاخذ لها تحاليل وتحط لها مغذي جديد ...
عبد العزيز : شكرا يادكتور .....
الدكتور : في حاجه بعد .... احنا مخططين لها انو نعالج حاليا الضعف بالمغذي اللي فيه كل ماتحتاج له حاليا ... وبعد كذا راح تجي مسؤولة التغذية علشان تقرر الاكل اللي بتاكله بما انو معدتها صار لها فترة فاضية ... مانبي نسوي لها مشاكل بالمعدة علشان كذا لا تفكر انو تجيب لها اي مأكولات من بره المستشفى ..
عبد العزيز : ان شاء الله يادكتور زي ماتبي ..
الدكتور : الله يقومها بالسلامة
عبد العزيز : شكرا
طلع الدكتور ............. وبعد عشر دقايق مع اني مافتحت عيني ...قرب مني عبد العزيز : لينا ادري انك صايحة فتحي عينك ........ فتحت عيني بصعوبة بس ازعجني النور ورجعت سكرتهم .....وجاني صوته من جديد : لينا ... انتي تسمعين ........ ياربي صوته هالمرة غير مرة حنون ...... حطيت يدي على عيني وفتحتها شوي شوي لين ماخذت على النور بعدين وخرت يدي عن عيني ........ لقيته قدامي مو زي ماشفته اخر مرة شكله تعبان ومو محلق ........: لينا انتي بخير تحسين نفسك احسن ..........هزيت راسي كنت دايخة لسى احس التعب بجسمي ..... جت الممرضة ..... ممرضة لبنانية ....... : كيف احوالك هلا ان شاء الله تمام ....... بدك ارفع لك راسك ........... هزيت بايوه .....حركت بزر طرف السرير اللي تحت راسي بعدين عدلت لي المخدة ... وغطتني كويس وطلعت يدي بس .......... وعبد العزيز يراقبها ... تعبت وهي تدور عرق ....: شو هيدا عروقك مرة صغيرة ...... الظاهر انو علشان صار لك كم يوم ماكلتي شي ...... ......
عبد العزيز : ليش ماتاخذين من المكان اللي عند المغذي ...
الممرضة : مابدي اتعبها وبعدين خلاص لقيتو .................... دخلت الابرة وعورتني عقدت حجاتي بس طولت وهي تسحب .... سحبت دم كثير ..
عبد العزيز : بس هي لسى تعبانة ..... اخذتو منها دم كثير ...
الممرضة : معليش مشان التحاليل مابدنا نعذبها كل شوي ... بعدين التحاليل اللي بدنا نعملها الها بدها دم كثير مشان هيك اخذنا كثير.... يلا معافايه .... خلي ايدك هيك ................. طلعت وخلتنا .. كنت لسى راسي مرفوع شوي .... بس رجعت وسندت راسي على وراء .... قرب مني ومسك يدي يتفحصها ...مرة مكدمة مدري من وشو ..... وغمضت عيني .... وجاني صوته قريب : تعبانه انادي الدكتور ..... هزيت بلا .... ظليت على هالحالة .... يوم شافني مو معه .....
عبد العزيز : انا بروح البيت اغير وارجع ................. مارديت عليه .. طلع........ وانا نمت
جاء ثاني يوم ... حسيت نفسي احسن ....الممرضة بعد كم مغذي حطوه لي ،، جات تشيل المغذي اللي حطته اخر مرة علشانه خلص .....والقسطرة اللي كانوا مركبينها لي شالوها .... وتوها الممرضة جايه توصلني للحمام دخل عبد العزيز .... كنت مرة مستحية منه قرب وقال للممرضة خلاص انا اوديها بس استحيت اكثر يعني وين بيوديني ...بس الممرضة اسمعت كلامه مسكني .... ووصلني للحمام .......: عبد العزيز مافي لزوم ... بلاش اتعبك ...
عبد العزيز: لا متعود كنت اودي امي الله يرحمها ........... وتغير وجهه كثير ... حطني على كرسي الحمام ( الله يكرم اللي يقرون ) وقال لي : انا بخليك اذا احتجتي مساعدة ناديني ............. انا بستنى برى الباب ...طلع وسكر الباب وراه ..... خلصت اللي عندي وجيت على عمري ابي اقوم لوحدي استحيت اناديه بس هو سمع الكركبة وفتح الباب سيدة وشافني وانا ابي اقوم لوحدي ... وجاء امسك يدي : الله يهديك وش خلاك تقومين لوحدك توك لسى التعب فيك .... يعني انتي ماتسمعين الكلام ... امسكني وهو معصب ووصلني للسرير وساعدني علشان انسدح وغطاني ........... كنت مرة مبسوطة كان يغطيني .......... ياربي في هالانسان فيه حنان مو طبيعي ... يارب لا تبعده عني يارب ..... طالعته .... كان لسى تعبان بس حبيت اشكره : عبد العزيز شكرا .... بس هو مارد لف راسه وسالني : ماجاء الدكتور .....
......... : لا .... ظلينا ساكتين ربع ساعة لين قطع صمتنا الممرضة اللي دخلت تسال اذا جاهزين لانو الاطباء بيدخلون ................... قام عبد العزيز لي وعطاني غطاي : لفي راسك ... لفيت راسي ودخلت شعري كله
ودخل ثلاثة دكاترة واحد سعودي واثنين مصريين ....
الدكتور السعودي : السلام عليكم ....
الدكتور المصري خالد :السلام عليكم............. بس الدكتور الثالث ماسلم
رد عبد العزيز السلام وانا رديت بسري .................
الدكتور السعودي : ها اخت لينا كيفك اليوم ............. اشرت براسي .....
الدكتور السعودي : معليش لسى اثار التعب فيك ..... بعدين توجه بالكلام لعبد العزيز : طلعت نتيجة التحاليل
عبد العزيز: هابشر يادكتور ...........
الدكتور السعودي : والله مادري وش اقول بس انا اخلي دكتور محمود هو يشرح لك لانو هذي الشي اختصاصه
الدكتور محمود : اهلين ....... ومد يده لعبد العزيز : انا دكتور محمود اختصاصي امراض الدم ....بصراحة نتيجة التحاليل اللي عند الاخت لينا بينت انو عندها انخفاض شديد في نسبة الصفائح الدموية ..
عبد العزيز اللي تخرع بس من اختصاص الدكتور : وشو يعني ؟؟!!
الدكتور محمود : بصراحة يعني انو الاخت لينا معرضة انو يجيها نزيف في اي حتة في الجسم ودا مش كويس وخصوصي لو حصل في المخ ... ودا سبب الكدمات اللي في جسمها .... اصلو الجسم بيكون حساس لاي حاجة علشان كدا لمن تجيها ضربة لو حتى خفيفة بيحصل نزيف على طول في الحتة دي ..
عبد العزيز فز من محله : والحل يادكتور مافي شي يمنع ...
الدكتور : اولا احنا نعمل ايه نديها صفائح ترفع النسبة شوية بعد كدا لازم بى ايه .........نعمل لها سونار لاعضاء الجسم الداخلية علشان نشوف اذا فيه نزيف داخلي هو اللي عمل النقص ... بعد مانعمله نشوف يحصل ايه ...
عبد العزيز : خلاص اللي تشوفه دكتور ...
الدكتور محمود : بس لازم ننقلها للعناية المركزة علشان هي لازم نعاملها بطريقة خاصة مش عاوزين اي مضاعفات قبل مانعرف ايه السبب ...
عبد العزيز : خلاص
الدكاترة : سلامات
عبد العزيز: شكرا
الدكتور السعودي : ياخ عبد العزيز لازم تروح تخلص اوراق الاخت لينا علشان التنويم تعرف لازم توقيعك علشان التامين ...
عبد العزيز وهو ماشي : خلاص دكتور انا رايح ..
طلع وخلاني مصدومة من الكلام اللي انا سامعته .... رجع لي بعد ساعة مع الممرضة اللي بدت تسكر السرير وتفتح العجلات علشان تمشي السرير .... ومشى معي ... لين وصلنا للعناية .....ودخلتني في وحدة ...جاء وراها الدكتور محمود : ها ان شاء الله مرتاحة دلوقتي حتجيب لك كيس الدم علشان نحطو بعد ماتخلص الجرعة اللي محددينها حنعمل ليك تحليل اذا اوكي نروح نعملك سونار بس اذا لا نديك تاني ... خلاص .. بالشفاء ان شاء الله
راح وعبد العزيز طلع يكلمه وجات الممرضة تحط لي الدم بس كان بارد مرة وضايقني كثير ماني قادرة عيله
الدكتور رجع لي بعد ماطلعت الممرضة مع عبد العزيز: شكلك متضايقة في حاجة
...........: بارد
الدكتور : معليش علشان هو لسى جابينو من الثلاجة ياشيخة احمد ربك انو لقينا ...وطلع وخلانا ..
عبد العزيز قرب الكرسي : معليش تحملي ..... وجلس يطالعني بس ماجتني الجراة علشان اطالع فيه خليت راسي نازل .....
خلص الكيس وسوو لي تحليل طلع مانفع وحطو لي غيره ..... وظلوا كذا يحطوا غيره لين وصلوا اربع اكياس ..تعبت ظليت يومين على هالحال مارتاح منه الا ربع ساعة لانو بارد مرة ويزعجني ..... عبد العزيز ماكان يظل عندي كثير علشان كنت في العناية .....بعد رابع كيس سوو لي التحليل وصار اوكي ... ونزلوني تحت يسوون لي سونار .... وطلعت النتيجة اللي راحت للدكتور وقال انو الحمد لله مافيني اي نزيف .... وطلعوني من العناية لغرفتي مرة ثانية ....وبعدها بيوم جاني عبد العزيز دخل وجهه اليوم كنو احسن بس لسى حجاته معقودة سلم علي وباسني على راسي : كنت ابي اعلم اهلك بس قلت لين تقومين بالسلامة على الاقل ...... ماظنتي انهم يهتمون اصلا بك .... حتى سؤال من طلعتي ماسالوا عنك ...
نزلت راسي مو متضايقة ..... بس لاني ادري انو كلامه صحيح طاحت دمعتي ...دخلت الممرضة تعلمنا انو الاطباء بره .... مديت يدي للغطاء قبل مايقولها لي عبد العزيز ....وجاء هو وقرب هو مني ومسح دمعتي بيده قبل مايدخلون ....
سلموا ماعدا الدكتور محمود ورد عليهم عبد العزيز السلام .....
الدكتور محمود : هاي كيف الحال النهارده .....
عبد العزيز : تمام يادكتور
الدكتور : عموما النتيجة لحد دلوقتي كويسة بس حنا حابين نعرف ليه التقص موجود علشان كده في حاجة لازم نعملها ....... هو ااذ كان فيه نقص زي كدا يكون لو واحد من اثنين يامه هو سبب من نخاع العظم ودا مش حلو شوي صعب لانو محتاج نسفر الاخت لينا برى علشان تتعالج منو .....او يكون سبب عرضي بسبب الحمى الشديدة اللي صابتها
عبد العزيز : طيب اشلون نتاكد ...
الدكتور : لازم ناخذ خزعة من نخاع العظم ونعمل لها تحليل علشان نعرف .... متخافش ياخ عبد العزيز ان شاء الله يكون تمام ..
عبد العزيز : دكتور طيب كيف هذي تسوننها ..
الدكتور : هي مش محتاجة تدخل غرفة العمليات علشان نعملها بس لازم تاخذ مواقفة علشان الخزعة اذا عملناها لازم نبعت الخزعة لمستشفى متعاقدين معه في المانيا .... على اساس النتيجة نعرف نعمل ايه
عبد العزيز : طيب دكتور متى تسويها
الدكتور : ماينفعش ياخ عبد العزيز ... لازم اولا تبعت اوراق الاخت لينا للتامين علشان نعرف اذا التامين هو اللي يغطي التكاليف والا على حسابك الشخصي ....يلا سلامات ياخت لينا ..
وطلع ولحقه عبد العزيز .... ياربي فشلة ... ضاق صدري مو من الكلام اللي قاله بس منين هو راح يجيب الفلوس استنيت لمن جاء ... وتكلمت معه : عبد العزيز ...... قرب مني وجلس : مافي داعي تكلف على عمرك انا اعطيك فلوس علشان العلاج ...
وقف وهو متنرفز : خلصتي .... شكرا ياخت لينا اذا اشتكيت لك ساعتها تكلمي وخزرني بنظرة وطلع .... ضاق صدري وش قصده ياربي ....رجعت راسي على وراء
تعبت من كثر التحاليل ............. بس كنت مبسوطة من قرب عبد العزيز مني .....
واقفوا على العملية على حساب الشركة اللي اكتشفت انو عبد العزيز صار يشتغل فيها .. مدريت فكرته لحد الحين يشتغل على الليموزين بس شكل ربي فتح عليه ...وعلى طول جاني الدكتور يبي يسوي لي الخزعة عبد العزيز مو موجود ولاادري كيف اعلمه ... بس الدكتور عيء يستناه علشان لازم يسوونها بسرعة ... دخل هو مع دكتور ثاني ومع ممرضة اللي امسكتني واخذوا من العظمة اللي في نص صدري .... جابو ابرة طويلة ودخلوها بعد ماعقموا المكان ..... الدكتور : معليش انيت راح تتالمي بس لمن نحاول نوصل للنخاع بس لمن نجي نسحب مش حتحسي بشي ....حاولي ماتتحركيش مانقدرش نعمل لك تخدير الموضوع مش مستاهل ..
ودخلها ابرة كبيرة يالله حسيت اني بموت المها فظيع ونزلت دموعي ماقدرت اصبر حسيت انو روحي بتطلع مكان مادخلوا الابرة ............مسكت يد الممرضة اللي كانت بتذوب بيدي من كثر ماضغطت عليها .... بالموت خلصت بس الدكتور قال مراح اتالم بس هي تالم بشدة .. اخذها وطلع .... الممرضة حطت لزقة مكانها وطلبت مني ماافتحها ابدا لين تجي تشيلها هي .. رجعت راسي اللي شديته بقوة من الالم علشان ارخيه وجاتني مسحة من يد ... بس انا عرفت من هو بدون مافتح هذي ريحته .... ياربي لا تحرمني منه فتحت عيني وطالعته .... : عزيز تالم ............ بكيت ... قرب وجلس عندي ومسح دموعي ................ وكان وجهه معقود مدري زعلان علي والا مني ...دخلت راسي في حضنه بس بسرعة رجعه وقام ..... وطلع برى .......... آآآآآآآآآآآه منك ياعزيز
...................
الدكتور الملعون اللي عرفت انه مسيحي علشان كذا ماكان يسلم .... واللي كرهته موت بعد كذا هو اللي مسك علاجي ... يوم جت النتيجة من المانيا طلعت سلبية .... وعلشان كذا بدء يعطيني دواء ماجاء ابد على بالي اسال عنه ...... عالجني بالكورتيوزل ..... دواء على قولته هو دواي الوحيد بس هو عطاني اياه بكميات كبيرة ... وكل يوم يزيد كانت تطلع عندي اعراض ... تساقط شعر على فقدان التذوق على زيادة الوزن على سكر مؤقت على ضغط ........بس الشي الوحيد اللي خلاني اتدهور وانا مادري كان هشاشة العظام وهو اشد تاثير علي ...
طلعت من المستشفى بس مابطلت مراجعة،،، ومعاملة عزيز معي كانت متركزة اكثر شي على متابعته صحتي وبس ...... بس انا حبيت قربه حتى لو هو معناها اني اكون مريضة.....
وفي يوم ......جاء على بالي اكنس الحوش اليوم جمعة وعزيز راح يصلي وانا خلصت طباخ .....كنست وباقي اغسله وتوني فتحت الموية وجلست اشطف بس انا ماحسيت بعمري زلقت وطحت على ظهري ..... وماقدرت اقوم الالم شديد وشلني عن الحركة بس صرخت صرخة وحدة وبعدها انحبس لساني داخل فمي وصرت اشوف الدنيا كلها بيضاء والنفس يضيق شوي شوي ....... وماحسيت الا بواحد مقبل علي : لينا .............. لينا ... وانا صرت زي قطعة القماشة زي مايجبني اروح .... وماني قادرة اتكلم احرك لساني بس مافي صوت ... شالني بسرعة وركض بي لين الطواري وهناك عطوني مغذي ومسكن ........سوو لي اشعة وطلع مافي شي .... وجاء الدكتور المنواب علشان يتكلم عن حالتي ويسال اذا في اي شي عندي علشان يقدرون يوصفون الدواء تمام ... علمه عزيز عن اللي صار معي ...وعن دواي .... الدكتور انعفس وجه ( المستشفى غير اللي كنت اروح له ) وراح وسحب عزيز معه...... طلع الدكتور محمود مسوي فيني حقل تجارب والجرعة اللي كان معطيني اياها قوية المفروض ماخذ قد كذا جاء الدكتور المختص في الدم التابع للمستشفى اللي رحت لها .... الدكتور هشام ( سوداني ) وفهم عزيز انو لازم يسووون لي فحص لكثافة العظام لانو الجرعة اللي كنت اخذها شديدة بس هم يحبون يتاكدون ... سووها وطلع عندي هشاشة عظام من الجرعة اللي كنت اخذها وصار لازم يوقفوون الجرعة او يقللونها علشان حرام اخذ مية مللي غرام لمدة ثمان شهور بس لازم تتم بالتدريج لانو في خطر على صحتي لو وقفت الجرعة مرة وحدة ..والدكتور اكد لعزيز انو الاشعة اللي سوووها لي عادية وانهم محتاجين يسوون لي اشعة مغناطيسية علشان يكشف ادق التفاصيل في العظم ... وفعلا سوووها لي اسوء تجربة سويتها حسيت نفسي اني ادخل القبر ....( يالله ارحمنا من عذاب القبر ) تعذبت وعذبت اللي معي لاني لازم اظل نص ساعة بدون حركة داخل الجهاز وانا كنت اكره الامكان الضيقة ....بس انا كل شوي اصرخ وابيهم يطلعوني من الصندوق ... لين سميت بالرحمان وتعوذت من ابليس ودخلت صرت طول الوقت ادعي وانا مغمضة عيوني .....لين كملت النص ساعة وانا داخل وقدروا يحصلون على التصوير اللي يبونه للعمود الفقري ..
طلعت النتيجة انو عندي شروخ في بعض فقرات العمود الفقري ...الدكتور طلب من عزيز يرجعني اذا بطلت الكوتيزول وو قال له اذا بطلت راح تعرف ليش اطلب منك ترجعها ......
ولمن بطلت دواء الكورتيزول اللي كان في نفس الوقت مسكن ..... بدت تطلع لي الالام الشروخ اللي كانت لاتتحتمل ... تعذبت وعذبت معي عزيز لاني كنت زي المشلولة ماعرف امشي ولااعرف حتى ارفع يديني ولا اعرف اتقلب كنت على طول نايمة بس النومة تتعبني والمشي يتعبني ...المشكلة انهم مايقدرون يسوون لي شي في المستشفى.... بس عزيز قام بي وعمره ماقال اووف وتحمل مرضي ... رفض انو يقول لاي احد وفضل انو يقوم بواجبي ... حتى لمن افكر اقضي حاجتي هو يوديني ..لاني مقدر امشي لوحدي .... شهر وانا روحة وجية على المستشفى .... وعايشة على المسكنات ... وعزيز اخذ اجازة ومقابلني ... كبر عزيز في عيني بس انا كنت كل يوم ابكي صحيح هو يسوي لي كل شي بس يسويه وهو ساكت ... عزيز وشو اللي مسكتك ....
.................................
الله رحمني من العذاب ورحلتي مع العذاب الحمد لله وصلت لنهايتها بطلت الادوية ماعدا نوع واحد من المسكن علشان اكد لي الدكتور انو الالم راح يظل معي طول العمر .... بس انا لازم انتبه على نفسي من الاشياء الثقيلة ومن الحمل الزايد والحركة الغلط......
........................
فكرت باهلي كثير بس انشغالي طول الفترة اللي راحت لاهني عنهم ونساني اي احد في الدنيا الا عزيز اللي كل يوم احبه اكثر واحس نفسي اني مقدر استغني عنه ابدا
|