عرض مشاركة واحدة
قديم 09-29-2011   #7


الصورة الرمزية جنــــون

 عضويتي » 752
 جيت فيذا » Feb 2010
 آخر حضور » منذ 16 دقيقة (07:52 PM)
آبدآعاتي » 3,247,044
الاعجابات المتلقاة » 7365
الاعجابات المُرسلة » 3669
 حاليآ في » » 6ـلىآ رَصيـﭮ الـجنـﯛטּ εïз ••
دولتي الحبيبه » دولتي الحبيبه Saudi Arabia
جنسي  »  Female
آلقسم آلمفضل  » الترفيهي
آلعمر  » 17سنه
الحآلة آلآجتمآعية  » مرتبط
 التقييم » جنــــون has a reputation beyond reputeجنــــون has a reputation beyond reputeجنــــون has a reputation beyond reputeجنــــون has a reputation beyond reputeجنــــون has a reputation beyond reputeجنــــون has a reputation beyond reputeجنــــون has a reputation beyond reputeجنــــون has a reputation beyond reputeجنــــون has a reputation beyond reputeجنــــون has a reputation beyond reputeجنــــون has a reputation beyond repute
نظآم آلتشغيل  » Windows 2000
مشروبك   star-box
قناتك mbc
اشجع ithad
مَزآجِي  »  رايقه

اصدار الفوتوشوب : Adobe Photoshop 7,0 My Camera: استخدم كاميرا الجوال

мч ѕмѕ ~
لا أخشى عليك

..................من نسآء الكون

بــل أخشى عليك

من #

طفلة
تشبهني

مشآكسَة ، ثرثآرة ، مجنونة ، وتحبكَ كثيراً كثيراً
мч ммѕ ~
MMS ~

افتراضي



في بيت بو مازن

الريم كنت توني ظاهره من المطبخ مخلصة متعشية لاني ما تعشيت معاهم عمي وعمتي لان مزنه مافي البيت ظاهره تزور ربيعتها في الدوام ومازن وقيس في بيت عمتهم وفيصل بعد ما في البيت حبيت اخلى الوقت لعمي وعمتي هههههههه

قيس : كنت مشتاق اسولف مع الدبه الريم عشان جي سرت معاها المطبخ ايلس لحد ما تخلص متعشية ونكدت عليها بعد ما خبرتها عن حسين (كنت متعمد يمكن) عقب قلت اغير لها الموضوع وخبرتها ان سرنا كارفور نتعشى هناك وفيه بنات حاولن يلفتن انتباه مازن بس طبعا هو ما عطاهم ويه

الريم : حسيت حرارة في جسمي وقلت له بنات حاولن يرقمنكم؟

قيس : والله العظيم بس ما عطيناهم ويه بس صراحة قهرني مازن وقلت له اكيد هذيلا شافني وحبن يرقمني وله مازن كان مبوز ويفكر شكله يفكر في شئ

الريم : في شو؟؟

قيس : ما ادري عنه بصراحة بعدهم ما خترعوا اله تخلي الانسان يدخل عقل الثاني عشان يعرف في شو يفكر

الريم : (نشيت اغسل ايدي ) وظهرنا انا وقيس مع بعض من المطبخ وحصلنا مازن في الصالة مسيت عليه بس ما رد علي او يمكن رد ما سمعته وشوي ووصله مسج وكان مازن مخلى تلفونه يم التلفزيون فقال لقيس يعطيه اياه وفعلا عطاه اياه وقاله مسج وصلك قاله من منو ؟

قيس : اشدراني؟؟

مازن : افتحة

قيس : فتحته وانا فرحان طالعت المسج وقريته له عقب قلت له ما تبي تعرف من منو

الريم : بصراحة ابتسامة قيس خلتني ابي اعرف منو عشان جي وقفت

مازن : اكيد من عند سعيد

قيس : لا وحياتك من ثريا

الريم : شو تبي هذي بعد؟؟ وطلعت غرفتي بسرعة

مازن : (ما ادري هاي بعد شو تبي مب فاضى لاي شئ) عشان جي قلت لقيس اقفل المبايل وحطه هناك

قيس : سمعت الكلام وطلعت غرفتي ارقد لاني بصراحة مب راقد بعد الظهر

مازن : حاولت انشغل بمطالعة التلفزيون وعقب وصلت مزنه وسلمت علي ويلست يمي تدلعني شوي هي متعوده جي بس ما كان لي خلق افتح لها موضوع حسين لاني اشوفها شوي مستانسة وما ابي انكد عليها وانا بعد مالي بارض اتناقش معاها ..

ضنكم اللي سواه حسين اوكى؟؟

مازن شو بيسوي عند مزنه ممكن يقنعها تترك حسين؟؟

مزنه بتترك حسين وله بتظل محافظة على حبها؟؟

طارق بسمع كلام اخته وبيفكر في الريم؟؟

واخيرا

ضنكم من اللي بيزور اهل مازن اللى تقصدهم الريم؟؟



الجزء الثاني عشر
في اليوم الثاني

الساعة 8 المساء
في بيت ابو مازن

في غرفة مازن

كنت يالس وبصراحة ما كنت حاب استقبل العرب ا للي قالت الريم انهم بيزورونا لاني خلاص ما اتحمل صج ما اتحمل لكن شو اسوى عشان اعتذر عن اليلسة معاهم ؟؟

في ها الحزه ياني ابوي قالي العرب وصلوا وكنت مجبور اني انزل ايلس معاهم بس اليوم تخيلت موقف الخروف اللي يكونوا جارينه لذبح ..

دخلت الميلس وشفت شاب مثل القمر غتره وعقال وكندوره والعطر من بداية الميلس ينشم وريحة العود بصراحة كشخة انا شاب ويوم شفته حسيت في جماله سلمت عليه وما قدرت ابتسم له ولا شئ..

في ميلس الحريم

الريم : استقبلت الحرمة ويلست معاها وتمت تتخبرني عن احوالي وكانت وايد مستانسة فيني وعمتي بعدها في غرفتها تتجهز (اللي ما تعرفونه ان عمتي ما شاء الله عليها تحب تهتم في نفسها خاصة لمه يزوروها ناس غرب ما تعرفهم )
يمكن عمتي ما تأخرت وايد لكني كنت مرتبكة ومب عارفة شو اسوي شوي ودخلت مزنه وسلمت على الحرمة وتمت تتخبرني الحرمة منو هذي قلت لها مزنه بنت عمتي وقالت ما شاء الله عليها

شوي ودخلت عمتي وهي مشغوله تعدل الشيلة ومن رفعت راسها وطالعت على الحرمة طاحت في الارض ركضت انا ومزنه صوبها وعقب ظهرت الحرمة من شنطتها عطر وشممناها اياه لحد ما نشت

ام مازن : شيخة؟؟

شيخة : هيه نعم يا ام مازن شيخة

كانت النظرات مب مفهومة بينهم وبصراحة سببت لنا ها النظرات حيرة انا ومزنه يمكن على الاقل انا فاهمة نص الحقيقة بس مزنه هي اللي مب عارفة ولا شئ ..

شيخة : يمكن اعتقدتوا اني نسيت بنتي على الرغم من اللي سويتوه لكن بنتي عمرها ما راحت من بالي وكنت اتابع اخبارها اول بأول لحد ما حسيت ان الفرصة سانحة اني احضنها بين ايادي واضمها في صدري .. واحسسها بحناني وحبي لها

ام مازن : انتي عارفة يا شيخة ان اللي صار غصبا عني وانا طول عمري اطالع على الريم والوم نفسي بس والله ما كان في ايدي أي شئ اسويه غير اني اسمع كلام اخويه واخذ الريم من ايده لمه عطاني اياها وقالي ما ابي شيخة تعرف عنها شئ ..

شيخة : اخوج؟؟ وانتي يا ام مازن ما حسيتي شو يعني ياخذ بنتي مني ويحرمني منها ما فكرتي انج ام ولو نحطيتي في ها الموقف راح تموتي ؟؟

ام مازن : والله اني كنت حاسة في النار اللي في قلبج لكن بمرور الايام تعلقت في الريم وما هانت علي انها تتربي بعيد عني وخاصة ان ابويه الله يرحمة كان رافض تماما اني اتصل عليج وله أي شئ وانا وعدته

شيخة : انا مب ياية اعاتبج الحين لانه ما يفيد العتب لاني تعذبت وايد لبعد الريم عني لكنج ما قصرتي فيها وربيتها تربية صالحة وانا بعدني اضل ممتنه لج

مزنه : الريم شو السالفة مب فاهمه شئ

الريم : كنت ابجي بحرارة فعلا ما كنت عارفة الحقيقة كاملة شكلها بدت تبان الحين وشكي ظلمت اماية شكل اماية ما كانت تبي تتخلى عني ابويه هو اللي خذاني منها وحرمها مني وحرمني منها لكن ليش يظل هذا السؤال يعذبني
خلاص مب قادرة وطلعت غرفتي خلاص ما ابي اسمع شئ ثاني قاسي لمتي بتحمل ؟؟!!

شيخة : مزنه يا بنتي لحقيها

مزنه : ان شاء الله خالوه وظهرت اشوف الريم وحصلت مازن في ويهي كان بعد هو مصدوم بالحقيقة اللي قالها الشاب لابوي وتخبرني عن الريم قلت له طلعت فوق غرفتها تبجي بصراحة الله يكون في عونها لو انا منها كان شئ صار فيني حشا هذا مب واقع هذا خيال ومستحيل الواحد يقدر يصدقة امها تظهر بعد كم سنه واماية تكون السبب في بعد الريم عن امها او بمعني اصح هي ساعدت خالي في انه بعد الريم عن امها حتى يدي الله يرحمة كان مشترك في هاي الجريمة

مازن : تعرفين منو الشاب اللي داخل ؟؟

مزنه : منو؟؟

مازن : اخو الريم وياي الحين يبون ياخذون الريم تعيش معاهم يبون الريم ترجع عند امها

مزنه : شوووووو؟؟!! لا طبعا ما نقدر بلاها خلاص انا تعودت على وجودها الريم مب بس بنت خالي هاي اختي الصغيرة

مازن : (عيل شو اقول انا يا مزنه وانا اشوفها كل يوم معاي وبعدني مشتاق لها كيف لو بعدت عني لا بيصير فيني شئ )

مزنه : بسير اشوفها مازن

مازن : طمنيني عليها

مزنه : ان شاء الله وطلعت غرفة الريم ودخلت عندها لقيتها تبجي وهي ويها مخبتنه في المخده قربت صوبها ولويت عليها وكانت تبجي وكانت تقطع قلبي وهي تبجي بس صراحة مب قادرة اقولها بس لاني انا وما تحملت وما قدرت امسك دموعي وتميت ابجي ..

قيس : طبعا كنت في الميلس مع الريايل بس بعد ما قدرت اتحمل اللي اسمعة اللي يمي هذا اخو الريم واللي داخل عند الحريم ام الريم لا وبعد يبون ياخذونها تعيش معاهم يعني اصبح الصبح ما احصل الريم في بيتنا ظهرت لاني حسيت في ها الحزه خاطري اشوف الريم حسيت اشكثر الريم غالية علينا حتى على ابويه اللي كان باين عليه التأثر لان ابويه بعد ما كان يعرف السالفة واماية جذبت عليه وقالت ان شيخة هي اللي فرت بنتها وسارت بيت اهلها ..

فيصل : انا كل خوفي من المواجهه اللي بتصير الحين بين اماية وابوي اكيد ان بيتنا يمر ببركان كبير على الكل واكيد ان الريم كاسرة خاطري وايد .. وبصراحة اول ما قال علي(اخو الريم) كلامة هذا اول شخص طالعت عليه هو مازن ..

مازن : ما قدرت ادخل مره ثانية الميلس وتميت يالس في الصالة وتذكرت المبايل والسيارة اللي وصلت الريم يعني كان اخوها بس الريم ما قالت وخلتني اشك فيها ياه يا الريم احس اني الحين مب بس احبج إلا اموووووووت فيج ..

في دبي ..

ام فهد : في غرفتها ما ظهرت منها حتى ان حور حاولت تكلمها بس هي قالت لحور انها تبي تيلس بروحها مع نفسها حتى بوفهد ما قدر يرمسها خاصة ان حور خبرته ليش هي دخلت غرفتها وقالت له ان بدرية اللي طلبته مب حرام وهي بصراحة صبرت وايد وفعلا لازم تعرس وتسافر مع ريلها بدل هاي البهدله

ابو فهد : انا معاج يا بنتي بس شو تقولين في عمتج بعد وفاه فهد صارت وايد تحاتي عيالها وتخاف يبعدون عنها

حور : لا تقول شئ يا عمي ادري كل شئ وعمتي يمكن تتصرف جي من حبها لعيالها بس

ام فهد : بس شو يا حور؟؟ (انا سمعت كل كلامها مع عمها بوفهد)

انا لو كنت رافضة زواجهم وسفرها معاه لاني ما ابي عيالي يبعدون عني لو تعرفون شكثر يعور بعد الولد عن والديه انت بعد يا بوفهد جربت شو يعني انت عايش وولدك تحت الارض شو يعني تكون مشتاق له ومب قادر تحضنه بين اياديك

ابو فهد : استغفر الله ذكري ربج يا حرمة

ام فهد : لا إله إلا الله محمد رسول الله انا ذاكره ربي ومؤمنه باللي صار ويمكن انا كنت غلطانه في تفكيري يمكن كنت شوي انانية لكن الحين اقول فعلا بدرية وايد تحملت بعيده عن مايد وبصراحة مايد ريال والنعم فيه عشان جي خلاص انا موافقة يعرسون وتسافر بدرية معاه

بدرية : اول ما قالت لي حور الخبر حسيت اني بتخبل لا انا خلاص تخبلت من الفرحة وتميت ارقص مستانسة واتصلت على مايد وخبرته بس حصلته مكتأب وحالته حاله وقلت له بلاك اماية وافقت ان نعرس ونسافر مع بعض وانا ما ابي اجهز ولا شئ كل شئ بحاول اخلصة في اسبوع عشان ما تتأخر على الكورس

مايد : انا الحين مسافر يا بدرية

بدرية : شو؟؟

مايد : واحد من ربعنا من الامارات بعد سوا حادث وحالته خطيره ..

بدرية : ما ادري احس بحزن عشان ربيعة وانا اعرف شو يعني ها الشخص لمايد وله احس بحزن عشان لمه اماية وافقت صار ها الموضوع وبظل بعدني اتريا لحد ما يرجع مايد في الصيف؟؟ وله شو بيصير وتحولت الفرحة والابتسامة لدموع لوداع مايد اللي حتى ما قدرت اشوفه قبل لا يسافر (اول مره ها الشئ يصير من ارتبط في مايد)

نزلت عندهم وانا ابجي وخبرتهم السالفة وخذتني اماية في حضنها وقالت يالله يا بنتي ان شاء الله بيرجع في الصيف وبتعرسون

حور : ما ادري ليش حسيت بخوف ها المره حسيت ان شئ بيصير .. (اعوذ بالله من الشيطان الرجيم بلاني يالسة افاول بالشر؟)
ابتسمت وقربت صوب بدرية وقلت لها وعسى ان تكرهوا شئ وهو خير لكم

في بيت بو حسين

خلود : كنت يالسة في غرفتي وياني اتصال فيصل اللي صعقني باللى قالي اياه معقوله اللي اسمعة لا اكيد هذا خيال لكن مب معقوله فيصل يألف علي بعدها سالته والريم شو موقفها ؟؟

فيصل : والله شو اقولج هي في غرفتها تبجي ومزنه معاها وامها واخوها ساروا واماية بعد في غرفتها تبجي والبيت مخبوص عندنا حاولت اني اكلم مازن بعد هو متضايق وقافل على عمره باب غرفته مب متخيل ان الريم ممكن تترك البيت وتسير تعيش مع امها

خلود : الله يعينه والله ويعين الريم بصراحة لو انا منها بيصير فيني شئ

فيصل : يالله عسى تهدا الامور وانا بسير الحين احاول ارمس ابويه ما يلوم اماية لان اللي فيها بروحه يكفي

خلود : اوكى غناتي طمني على عموه (اول مره اقوله ها الكلمة حسيتها ظهرت عفوية)

فيصل : (يمكن مب مجال للحب الحين بس صج حسيت شو قالت خلود وحسيت كلمتها بدت تسري في جسمي كله وحسيت بالراحة)

في بيت ابومازن

فيصل : في الليل كانت الساعة 9 وطبعا الكل في غرفته ظهرت اماية من غرفتها وطلبت منا كلنا نتجمع في الصالة وكلنا حضرنا حتى الريم ومزنه ومازن وقيس وانا وابويه طبعا

ام مازن : انا جمعتكم اليوم عشان ارمس معاكم واقول كل اللي في خاطري اولا حابة اعتذر منكم كلكم وخاصة ابومازن لاني اطريت اني اجذب عليه وما اقوله الحقيقة وان اخوي هو اللي خذ الريم من امها وعطاني اياها وانا يمكن ساعدته ولكن طول عمري بالي ما كان مرتاح ويمكن الله يوم خذ مني ولدي هاني كان حاب يراويني شو يعني احرم ام من ضناها (طبعا تقول ها الكلام وهي تبجي) وانتي يا بنتي يا الريم اعتذر منج لاني حرمتج من امج وحضنها الدافي بس غصبا عني تعلقت فيج بعد فتره وكنت احسج مثل مزنه وتمنيت انج تزجريني اماية لكن بعد يمكن ربي يعاقبني بانج تناديني عمتي وحابة اعتذر منكم يا عيالي لاني طول عمري اعلمكم على الصدق والاخلاق الاسلامية وانا اول من خالفها وربي يسامحني على سويته

الريم : على الرغم اني حاسة بان اللي سوته عمتي شئ كبير إلا انها ما تهون علي هي طول عمرها فعلا تعاملني مثل مزنه واكثر واليوم بس اكتشفت شو سر نظراتها الغربية لي واحيانا كنت اعتقدها انها انجبرت على تربيتي اثريها كانت حاسة باللوم عشان جي ركضت صوبها ولويت عليها وقلت لها مسامحتج يا عمتي وما ابي اشوف الدموع في عيونج مره ثانية

مازن ومزنه وفيصل وقيس وابو مازن كلهم ما قدروا يخبوا دموعهم بعد المشهد اللى فعلا يخلى الصخر يبجي عليه مب قلوب صافية مثل قلوبهم بس

ام مازن : ما تخيلت في يوم انج تتركي البيت غير لمه تسيري بيت ريلج مب قبله

الريم : هنا كان خاطري اقولها ما بخلى البيت بس قلت لها اسفة عمتي ها الشئ ما اقدر اقولج اني بتم هنا بعد ما ظهرت اماية اللي انحرمت منها انا لو سمحتوا لي بسير اعيش مع اماية

مازن : لااااااااااااااااااا

فيصل ومزنه وقيس وام مازن وابو مازن والريم كلهم طالعوا عليه

مازن : ظهرت وانا معصب وركبت سيارتي وطلعت كل شئ ممكن اتحمله إلا انها تظهر من البيت إلا اني ما اشوف ويها اول الصبح واخر الليل قبل لا ارقد ما اتحمل وبدت دموعي تنزل بغزارة وتذكرت اني مالج على ثريا وان عرسي قريب يعني انا كنت اناني احس اني بتخبل وما فيه مكان الحين ممكن الجأ له غير المسيد صليت ركعتين ودعيت ربي من كل قلبي

فيصل : انا طلعت اتصل على مازن واطمن عليه بس ما يرد علي وحسيت بالخوف عليه صراحة رغم اني اعرف ان اخوي مب متهور لكني اعرف شو تعني له الريم

الريم : يلست مع عموه وعمي بو مازن ومزنه وقيس وحاولت انسى عمتي كل اللى صار اليوم وتميت امزح مع قيس

(ام مازن : فديتج يا الريم وفديت قلبج الصافي على الرغم من اللي سويته فيج إلا ان قلبج ما شل علي ولا بعد تحاولين تنسيني اللي سويته)

مزنه : (ادري ان الموقف مب متحمل الحين لكن غصبا عني خطر في بالي حسين احس اني مشتاقة له وقررت اني اتصل على خلود اول ما اطلع غرفتي واطمن عليه لكني بعد قررت اني الليلة ابات في غرفة الريم يمها على السرير شرات ايام زمان)

الريم : لاحظت سرحان مزنه عشان جي قلت لها اللي ماخذ عقلج يتهنى فيه ان شاء الله ههههههه

مزنه : قربت صوبها وقلت لها يا ريت هههههه

الريم : شكلي فهمت الموضوع عشان جي قلت لها داعية لج من القلب

قيس : شوفوا في اليلسة مع بعض ممنوع التساسر ههههههههه اللي يبي يرمس يتكلم بصوت عالي عشان الكل يسمع

الريم : وانت عمرك ما بتتعدل طول عمرك بتم رزه؟؟ هههههه

قيس : طالع على بنت خالي هههههههه

الريم : ويا ويهك

قيس : قمر فديته ويهي عقب قال على طاري الويه بصراحة اخوج علي كشخة جمال عجيب ليش انتي ما طلعتي عليه ههههههههه

يمكن انتو تتحسبون ان اماية عرست واحد ثاني غير ابويه لكن اللي ما تعرفوه ان علي اخويه من اب وام وابويه يوم طرد اماية وكان سكران كان علي ناش من الرقاد على صوت هواشتهم واماية ما خلته وشردت به بيت اهلها لكن انا كنت في الغرفة راقده وكان عمري بعده شهرين وابويه ما خلى اماية تشلني وبقية السالفة تعرفوها صح بعد نسيت اقول لكم ان اماية طلبت الطلاق من ابويه وطلقوها غيابيا في المحكمة بعد مرور كم سنه خاصة ان ابويه عليه قضية وشارد برع الدوله وعرست ريال غني وايد وطبعا بعد هو ربه خذاه وما يابت منه عيال لانه ريال كبير وايد في السن وورثت منه كل ها الاموال اللي تملكها وله قبل اماية بنت ناس على قد حالهم بس الحين بعد ما مات ريلها اول شئ سوته انها قررت انها تعوضني عن كل الايام اللي قضيتها بعيد عنها وعن اخويه علي فديته فعلا جمال ما شاء الله عليه ..

هيه اكيد بعد بتسألون نفسكم ليش اماية ما رجعت تاخذني رغم انها اكيد كان عقلها دلها ان ابويه بيوديني لبيت عمتي هذا السؤال بتخبر اماية عنه وبجاوبكم عليه مثل ما انا ابي اعرف جوابة..

في قمه يبل حفيت

مازن : ها المكان اللي احب اوقف فيه لمه احس اني متضايق احب اطالع مدينة العين من فوق واعرف ان الشئ دائما من فوق يبان صغير على كبر مدينه العين جي هي مشكلتي اللي انا يمكن السبب فيها مع الريم وحبي لها وخطبتي لثريا عشان اهرب من التفكير في الريم بصراحة شكلي وهجت نفسي وهجت البنت معاي وانا فعلا مب قادر انسى الريم شو اسوي يا ربي؟؟

عقب ياني اتصال فيصل ورديت عليه لاني اعرف اكيد انه يحاتيني وخبرته اني فوق يبل حفيت قالي لا تتحرك انا بيك الحين ..

فيصل : اتصلت على خلود وخبرتها بكل اللي صار وخبرتها اني الحين ساير لمازن في يبل حفيت وطلبت مني بعد اطمنها اول ما ارجع البيت ..

في بيت ابو حسين

حسين : كنت في الغرفة افكر اللي انا سويته صح وله غلط لكن اكيد انه صح كان لازم ما اخلى مزنه تتعلق فيني لاني فعلا ما اصلح لها لو ظلت معاي بدمر حياتها بتظل طول عمرها بدون زواج وراح يتقدم فيها العمر بدون ما تحس عقب انا ما بقدر انفعها وانا بها الحالة

خلود : دخلت على اخوية الغرفة بعد ما قالت لي اماية اخبره ان قوم خالوه ياين يزوره وحاولت ارتب الغرفة شوي ولاحظت ان حسين فيه شئ مب طبيعي مب على عوايده هو صح اللي فيه يمكن يخليه حزين وضايق بس حتى ولو حسين كان يمزح معاي ويضحك وكأن ما صار فيه شئ عشان جي قربت صوبه وقلت له بلاك ؟؟

حسين : حسيت اني محتاج اقول لخلود السالفة رغم ان الوقت ضيق لان قوم خالوه الحين بيطلعون عندي الغرفة

خلود : كل السالفة يمكن كنت فاهمتنها بدون ما يقولها حسين لكن سالفة انه عطى مازن الرسالة اللي من عند مزنه هاي اللي ما قدرت استوعها وحاولت الوم اخويه عليها

حسين : توني بشرح لخلود وجه نظري بس دخلت خالوه وريلها ويات صوبي وسلمت علي هي وريلها وظهرت خلود ..


في بيت ابو طارق

ثريا : حسيت اني مشتاقة لمازن وايد عشان جي دقيت عليه بس ما رد علي وحسيت اني خاطري ابجي مازن وايد مهملني ومطنشني ارسل له مسجات اتصل عليه وما يرد علي وبالاسم مالجين شو ها السالفة صج تعبت

طارق : في غرفته حور ابدا ما رضت توخر عن بالي عشان جي قررت اني اسافر كم يوم ارتاح فيهم وافكر على راحتي وبعد افكر في كلام اختي ثريا اللي احسه منطقي وبصراحة انا شفت الريم وهي ما شاء الله عليها حتى اللي اذكره انها كانت مميزه من ضمن البنات اللي شفتهم لان جمالها شوي مختلف عن الثانيات

في بيت ابو مازن

فيصل : رجعنا انا ومازن البيت كل واحد في سيارته مازن تقدمني ونزل اما انا يلست في السيارة اتصلت على خلود اطمنها علي وعقب قلت لها تصبحي على خير بسير ارقد صراحة الاحداث اليوم اللي مريت فيها خياليه ومحتاجة اني ارتاح

مزنه : كنت في الحمام اتسبح بعد حاسة ان فيه حمل على ظهري عقب كل اللي صار وقلت يمكن عقب السبوح اتنشط شوي

الريم : كنت واقفة على الشباك وشفت مازن وفيصل لمه دخلوا عشان جي ظهرت من الغرفة بسرعة لاني خاطري اشوف مازن لاني خلاص باجر بجهز كل اغراضى وبسير بيت اماية وبعيش معاها ومع اخوي ..

مازن : ما توقعت ان الريم تكون واقفة على الدرج وعشان جي انصدمت بوجودها ولكن ها المره بدون ولا كلمه وقفت وغاصت عيوني في عيونها وهاي المره دموعي ودموعها نزلت مع بعض ....


احم

نبدا في الاسئلة

اولا ضنكم بدرية ومايد بيكونون لبعض؟؟ وله احساس حور بيكون في محله؟؟

ومزنه بعد ما تعرف ان حسين عطي مازن رسالتها شو بيكون موقفها؟

ومازن ممكن يعترف لريم قبل لا تسير بيت امها بحبه لها؟؟

والريم معقوله تقدر تسير بيت امها وتخلى عمتها وعيال عمتها اللي تربت معاهم؟؟

وطارق ممكن فعلا يبتدى يفكر في الريم؟؟

وثريا ممكن تكون لها خطوه مع مازن وتواجهه وله بتظل ساكته على ها الوضع؟؟


الجزء الثاني عشر
في غرفة مازن

دائما الظروف تساعدني اني اقول لها لكن عقده لساني عمرها ما راح تنفك انا فعلا ما استحق الريم .. الريم اللي كانت تنتظر مني كلمة كل هاه قريته في عيونها الريم حياتي وعمري وقلبي ليش مب قادر اقول لها كلمة وحده ليش ؟؟

يمكن هذا ذنب ثريا اللي ربطها فيني في لحظة طيش ما فكرت فيها زين ربي الحين يعاقبني اني ما اقدر اوضح لريم حبي لها يا ربي ساعدني واستر على ها الحب اللى شكلة راح يظل حبيس قلبي .. وعمري ما راح اتخلص من عقده لساني اللي راح تخليني اخسر الريم للابد انا حتى سيرتها بيت اهلها ما قدرت اقول لها لا تسيري وتخليني

في غرفة الريم

اكيد تعتقدون اني ابجي بعدني عقب ما تلاقيت مع مازن على الدرج لا خلاص مسحت دموعي ويلست على شبريتي وحضنت اللعبة اللي يابها لي مازن من زمان لا تستغربون ليش لاني قريت في كل دمعة من دموع مازن اليوم حب كبير لي ..

لا تطالعوني جي ايه انا احب مازن وهذي حقيقة ما اكتشفتها غير لمه خطب ثريا حسيت انه شئ ملكي وراح مني يمكن فعلا دائما ما نحس بقيمة الشئ اللي يكون في ايدنا غير لمه نخسرة في البداية كنت احسب اللي انا فيه بس حب لان مازن يهتم فيني لكن اكتشفت اليوم ان اللي انا كنت فيه حب حقيقي لمازن .. بس ليش مازن ما يتجرأ ويصارحني يمكن لانه خطب ثريا؟؟ وله يمكن انا فاهمة الموضوع غلط؟؟ كل شئ ممكن لكن انا مرتاحة اني احبه وانه يحبني وما راح افكر في اللي عقب ..

في دبي

بدرية : مر اسبوع بعد سفر مايد وما يرمسني غير دقيقتين او خمس لو كثر كل وقته كان مع ربيعة في المستشفي رغم اني عارفة ها الحقيقة ورغم ان ها الشئ رفع مكانه مايد عندي لكنه ضايقني لاني ما ابيه ما يهتم فيني انا ابي ارمس وياه والله اشتقت له ما ادري انا شو فيني عشان جي طرشت لمايد مسج (لو عندك لي عشر دقايق ممكن نرمس) واليوم طبعا قررت اني ما اداوم احس جسمي كله متكسر ومب عارفة ليش احس بخمول مايد فديته من قرأ مسجي اتصل علي بعد ما حس بالخوف ..

مايد : فديتج مب عشر دقايق وبس خذي عمري كله

بدرية : انفجرت من البجي الحين وتميت ابجي ومايد يسكتني

مايد : بدور حياتي بلاج شو فيج شو مضايقنج ليش تبجين؟؟

بدرية : رغم اني خايفة اصارح مايد باللى داخلى لكني حاسة مخنوقة وقلت له مايد ما ادري ليش حاسة قلبي مقبوض ما ادري حاسة انك بعيد عني خايفة مايد وكملت بجي

مايد : اول مره بدرية تكون بها الحالة وما اجذب عليكم اني انا بعد حسيت بخوف كبير يمكن من القدر ويمكن على بدرية اللي طول عمرها كانت مصدر التفائل في حياتي اليوم تشائمها خوفني وايد .. عقب استغفرت ربي وقلت لها نشى صلى ركعتين ودعي ربج وقرى قرآن وانا بعد بنش اصلى ركعتين وبدعي ها الضيق يسير عنج عقب برمسج غناتي

بدرية : ان شاء الله واول مره اقفل عن مايد بدون ما اقوله احبك ولا أي شئ نشيت وصليت ركعتين وقريت قرآن وشكلي كنت مرهقة وايد ويمكن فعلا عقب ما تقرأ قرآن تحس بطمأنينة رقدت بدون ما احس

مايد : انا صليت ودعيت ان الله يفرج كربة وضيق بدور غناتي ورديت اتصل عليها عشان اطمن عليها لكن يوم ما ردت علي خفت ورديت اتصل واتصل لكن بدون فايده بدور ما ترد علي

في بيت ابو طارق

طارق : ودعت اهلى بعد ما قلت لهم اني بسافر كم يوم احس بضيق واهلى طبعا كانوا بعدهم ما شبعوا مني على قولتهم لكني فعلا محتاج اني ايلس مع نفسي كم يوم احس حب حور لخبط كياني وخلاني مب طبيعي

ثريا : انا قررت اني اتصل على مازن واعرف منه ليش يتعامل معي جي رغم ان ما باقي شئ على زواجنا لكن فعلا مب قادرة اتحمل اكثر من جي خلاص فاض فيني ولو ما يبيني خلاص يطلقني وكل واحد يسير في حال سبيلة احسن الحين ولا عقب ما اتوهج ويصير بينا عيال وغيره وفعلا اتصلت لكن منو يرد علي ما حد..

في بيت ابو حسين

حسين : فعلا الاب توب اللي يابة لي مازن خلاني شوي انشغل فيه وصرت اطالع المواقع الاسلامية واقرا وايد عن الدين ونفس الوقت كونت صداقات على المسنجر مع وايد ناس وكنت احرص ان صدقاتي تكون مع الريايل بس واقنعني واحد من الربع اني اسجل في منتدى هو مسجل فيه ..
في البداية ما كنت مقتنع لكن عقب ما سجلت وبديت انزل مواضيع دينية ومواضيع اجتماعية وطالع ردود القراء عليها ارتحت وصرت اشغل وقتي وايد في المنتدى لدرجة اني احس صرت مدمن عليه ونسيت للحظات اعاقتي اللي خلتني طريح الفراش ما اقدر حتى ايلس ..

شو اقول لكن بعد ايه مزنه عمرها ما غابت عن بالي وبين لحظاتي اللي اكون مشغول فيها احس انها في بالي وتفكيري اتخيل ضحكتها اتخيل زعلها مني لو درت باللي انا سويته وفكرت يا تري مازن رمسها ؟؟ كنت خايف من رده فعلها كنت خايف تفهمني غلط وكنت خايف انها تطلب مواجهتي .. ما ادري شو اقول لكن حب مزنه في قلبي مب حب عادي لكن القدر يحكم عليه انه يموت وانها تطالع حياتها يكفي اللي ضيعته من عمرها في حبي وانا كنت سلبي وفي اللحظة اللي كنت فيها ايجابي حصل اللي حصل (طبعا الحمد لله على كل حال)

خلود : فيصل قالي ان الريم ها الايام تتجهز عشان تنقل عشان تعيش مع امها واخوها وكنت افكر كيف احصل فرصة عشان ارمسها اتصلت عليها عشان اقول لها اني ابي ارمس معها لكني حسيت انها مشغوله وايد وما عندها وقت عشان جي استحيت منها وقلت لها خلاص بشوف يوم حتى لو سرتي بيت اهلج وبرمسج وهي وعدتني انها بعد ما ترجع بيت امها تستقبلني عندها الريم وايد حبوبة والغموض في نظرات عيونها يشد أي شخص انه يقرب منها .. (طبعا اللي عندهم فضول مثلى خخخخخخ)

في بيت ابو مازن

قيس : كلمة لا اللي قالها مازن في اللحظة اللي قالت الريم انها بتسير بيت اهلها حيرتني بصراحة عمري ما شكيت ان مازن يميل للريم لانه في نظري اعتبر كل اللي كان يسويه اهتمام لانه الاكبر لكن الموضوع شكلة اكبر من جي

يمكن تعتقدوا اني صغير على ها السوالف لكن انا فاهم وتأكدت لمه شفت مازن والريم واقفين قبال بعض في الدرج كنت ظاهر من غرفتي وبنزل المطبخ وشفت اللقاء وشفت الدموع

الغريبة كنت واضح لهم يعني بسهوله ممكن يطالعوني لكن سرحانهم في بعض خلاهم ما يحسون في أي شئ

صرت اربط الاحداث بعد ما دخلت غرفتي تذكرت اللحظة اللي قريت لريم مسج ثريا وكيف بانت على ويها علامات الزعل والغضب تذكرت الريم وهي خايفة على مازن وهو مريض وتذكرت مره الريم طلبت مني اساعدها اعرف ليش مازن رافض الزواج ..

بس دار في خاطري سؤال ليش مازن دامه يحب الريم جي والريم تحبة جي ما خطبها ؟؟ ليش خطب ثريا؟؟

اممممم بصراحة مب عارف شو اسوي او شو اقول احس اني انحطيت في مشكلة ولازم احلها وبصراحة شكلي بشتغل شارلك هولمز عشان احل الموضوع هذا عشان اوصل لحل لانه مازن والريم ما يهونون علي

فيصل : بعد كل الاحداث اللي صارت حاس اني مب صاحي اليوم عشان جي ما سرت الجامعة رغم انه عندي شغل وايد واكيد خطيبتي خلود عرفت ها الشئ لمه نششتني الصبح عشان الجامعة وقلت لها مب ساير .. وزيارتها فاجأتني وايد واسعدتني اكيد وايد بس مزنه اللى كانت يالسة معانا هههههه اونها محرم هههههه (امزح لا انا مرتاح جي)

في غرفة مزنه

بعد ما ظهرنا انا وخلود من غرفة فيصل وتطمنت عليه سرت انا وياها غرفتي لاني كنت حابة ارمس معاها وأتخبرها عن حسين

مزنه : احم خلود بسألج شحاله حسين كيف صحته؟

خلود : بخير الحمد لله وبصراحة الاب توب اللي يابه له مازن ساعده شوي وانشغل فيه

مزنه : فرحت له عقب قلت لها خلود انتي عطيته الرسالة؟

خلود : (حسيت ويهي صار احمر وحسيت برجفه في قلبي) وقلت لها هيه وسكت

مزنه : شو فيج بلاج صار ويهج احمر شو السالفة؟

خلود : (شو اقول لها اقول لها ان حسين عطي الرسالة لمازن؟ طبعا لا عقب قلت لها ما شئ)

مزنه : احس انج مخبية علي شئ

خلود : لا ما مخبية شئ ولا شئ ووصول السائق عشان ياخذني ودق الخدامة الباب على غرفة مزنه اسعدني لاني ما راح اطر اني اجذب عليها وشليت شنطتي ونزلت بسرعة

مزنه : ودعت خلود لكني حاسة ان فيه شئ مب طبيعي ..

الريم : كنت توني راجعة من الجامعة مع علي اخوي رجعت معاه عشان اخذ اغراضي واسير

طلعت غرفتي وقلت للخدامة تنزل شنطي وطبعا حطيت بعض الاغراض لاني قررت بيني وبين نفسي اني ايام أي ازورهم وايلس معاهم عشان ما يحسون بغيابي مثل ما انا بفتقدهم وايد

ما كنت حابة اودع احد عمتي كانت في غرفتها وهي عارفة اني بسير الحين ومزنه ظهرت عشان تساعدني وقيس بعد نزل مع الخدامة كم شنطة وعلي كان يرتب الشنط في السيارة ..

دخلت اسلم على فيصل اللي كان تعبان في غرفته واكيد انه ودعني بطريقة حلوه ودعى لي بالتوفيق وظهرت عنه لاني حسيت خلاص دموعي بتنزل اللي كنت حابستها

الحين بقي عندي وداع مزنه وقيس اعز شخصين لي واقرب شخصين لي طبعا عمتي ما رضت ابدا تظهر تودعني سلمت على مزنه ونفجرت من البجي في حضنها وسلمت على قيس اللي حاول يمزح معاي عشان يمكن بعد يمنع دموعة تنزل لكن منو يقول ان دموعة ما تنزل نزلت عشان جي ركض بسرعة غرفته

وانا نازله اطالع على غرفة مازن طبعا مازن اليوم ما رجع البيت ما يبي يودعني اكيد واخر شئ سلمت على عمي بو مازن اللى كان واقف مع علي اخوي وظهرت من البيت هذا اللي عشت فيه 18 سنه من حياتي يمكن في حياتي كلها ما توقعت ان تظهر لي ام ولا اخ لكن قدرة رب العالمين طول الطريق كنت ابجي وعلي يسكت فيني ويحاول يهديني ..

علي : بلاج لا تزعلي غناتي واي لحظة تبين تزوريهم بيبج عندهم انا عارف شعورج الحين بس لا تنسى ان اماية وانا بعد ابي احس ان اسره وعايشين مع بعض

الريم : طالعت على اخوية (ايه اخويه) وكانت نظره الحنان اللي في عيونه هادية مما حسيت انها حسستني بالهدوا انا بعد

وصلنا البيت وكانت اماية تتريانا وخذتني في حضنها وبجت هي بعد وطلبت عقب من الخدامات يطلعن شنطي غرفتي اليديده الي ما يمها غرفة مزنه ولا لو ظهرت منها بطالع مازن وله قيس وله فيصل وبجيت من خاطر وانا مب عارفة دموعي هذي ليش هل لاني ودعت اهلى وناسي وله لاني عايشة الحين مع اماية واخوي علي ..؟؟!!

في شرم الشيخ
في مصر

طارق : هذا المكان اللي اخترت اني اسير له لانه مكان هادي وفيه بحر وخضره ومكان فعلا مريح للى يبي يختلي بنفسة ويفكر ويقرر بقرار مصيري في حياته

خذت غرفة مطله على البحر وكنت اقضى وقتي لو ما على الشاطئ في البلكونه اطالع البحر وعقب ثلاث ايام من اليلسة هنا دخلت الغرفة وطلبت من الفندق يطلبون لي الامارات واتصالي ابدا ما كان لاهلى مثل ما تعتقدوا

اتصلت على بيت خالتي فوزية وحمدت ربي ان الخدامة هي اللي ردت علي وطلبت منها اني ارمس حور وفعلا رمستها

طارق : وهي تقول الو كنت اسمعها وحسيت كل الكلام اللي كنت مقرر اقوله لها طار لكن عقب قلت لها حور ؟؟

حور : هيه نعم منو معاي؟

طارق : عرفت عن نفسي وعقب طلبت منها ارمسها في موضوع وطبعا لقلبها الكبير ويمكن هي ما توقعت الرمسة اللي بقولها هذا بان لمه خلصت رمستي قلت لها اني احبها واني ابي ارتبط فيها وان ولدها مايد في عيوني قلت تقريبا كل اللي في خاطري

حور : سمعت رمسته وما انكر كنت شاكه في ها الشئ من المرتين اللى زارنا فيهم طارق كنت حاسة نظراته مب طبيعية لكن حبي لفهد اكبر من كل شئ عشان جي ما تحملت اسمع كلامت حبه لي وقفلت الخط في ويه وانا اول مره اتصرف جي ..

في دبي
في غرفة حور

بجيت من خاطر بعد رمسة طارق لاني عمري ما فكرت او تخيلت اني اسمع كلام مثل هذا غير من لسان فهد وبس حبي لفهد اكبر من اني ارتبط في شخص غيره ما اقدر مجرد تفكير اني اتخيل اني اكون لغيره مستحيل ..

نفسيتي وايد تعبت عشان جي قررت اني اسير بيت اهلى كم يوم اريح عشان جي جهزت شنطة صغيرة فيها كم بدله لي ولمايد رغم اني عارفة ان كم يوم عمتي ام فهد ما تشوف مايد بتتضايق فيهم لكن احسن من انها تتضايق من انها تعرف اللي طلبة طارق مني

بدرية : نفسيتها بعدها تعبانه وطلبت اجازه اسبوع من الدوام وتمت يالسة في البيت

عزه : خلاص البنت رسمت قصة على طارق وشكلها حبته وانتهي الموضوع .. لكن ها الحب ما اثر على دراستها بالعكس شكلها شدت حيلها اكثر عشان طارق ما شاء الله عليه متفوق واكيد هي في نظرها هو بيحبها لتفوقها ..

في امريكا

مايد : حاله بدرية ها الايام ما عايبتني والكورس خلاص ابتدى ولازم انتبه لدراستي لكن كيف وبدور حبي بها الحالة انا لازم اتصرف لكن كيف؟؟ ما اقدر ارجع الامارات واخلى دراستي واخسر كورس كامل وترجع تتعقد الامور مره ثانية وبدل ما تبقي لي سنه يبقي لي سنه ونص ..

لكن بعد بداية الكورس الثاني وانا حالتي ما تسر عدو ولا صديق قررت وخلاص ما اقدر اصبر اكثر من جي وقراري راح تعرفونه عقب ..

في بيت ابو طارق

ثريا اتصلت ها المره في مزنه وشكيت لها الحال طبعا بعد ما اتصلت بمازن ولا عبرني ولا رد على اتصالي قلت لها تيلس معاه تفهم منه السالفة بلاه يعاملني جي وبصراحة زاد قلقي انه ما باقي على زواجنا غير شهر ومب عارفة احس ان فرحة زواجي مب هي فرحة زواج أي بنت احس شئ ناقصني اكيد اللي ناقصني اني احس بفرحة مازن .. وها الشئ متعبني وايد وكل يوم ايلس اطالع الاغراض اللى اشتريتهم يا تري بيشوفهم مازن علي وله ؟؟ وموضوع الفستان اتصلت علي بدرية عشان تخبرني انها تعرف مكان ممكن تاخذ منه فستانها وقلت لها تأجل الموضوع كم يوم ..

في بيت بو مازن

مزنه : بيتنا بعد ما سارت الريم احسه غريب وكئيب يمكن ما كنا نيلس انا وياها مع بعض لكن على الاقل يوم كنت احتاج لها اسير غرفتها الحين لازم اتصالات ومواعيد وبصراحة بعد اتصال ثريا ضايقني اكيد كلنا ملاحظ ان مازن ما مهتم في خطيبته وايد لكن طبعا احنا طبعنا ان ما نتدخل في حياة بعضنا بعض ومازن كبير وفاهم الحياة زين لكن الحين عقب ما رمستني ثريا اكيد اني لازم ارمس معاه وافهم بلاه على الاقل انا اخته والبنت لجأت لي وانا مقدرة مشاعرها اكيد لاني بنت وافهم عليها ..

ام مازن : ظليت في غرفتي ما ظهرت منها فراق الريم صعب علي ما توقعت يجي يوم تخلى الريم فيه البيت حتى بعد زواجها لاني كنت مفكرة اني ازوجها هاني لكن هاني راح واليوم خسرت الريم وسارت بيت امها واخوها .. (استغفر الله ربي يسعدها في حياتها امين يا رب) قالتها ام مازن وهي رافعة ايدها لسماء ودموعها على خدها

بو مازن : اكيد حاله ام مازن ما عيبتني حاولت اسولف معاها واقنعها انها تغير جو وغصبا عنها خذيتها وطلعت معاها عشان شوي توخر الضيقة عنها زرنا اختي ام حسين وعقب سرنا تمشينا في السوق وعقب لفينا شوي بالسيارة .. واحس ان نفسيتها شوي تغيرت بعد ما رجعنا البيت

قيس : انا بعدني افكر في مازن والريم وانا خاطري الريم ترجع تعيش معانا في البيت لكن كيف ما فيه حل غير انها تكون زوجه اخوي وهذا اللي انا اخطط له

مزنه : سرت غرفة مازن ودقيت الباب ودخلت بدون ما اترياه يقولي دخلي بعد ما طالت وقفتي حصلت مازن راقد وشكل مازن وهو راقد غريب حاط ايده على ويهه ومنكمش بطريقة غريبة رغم ان الجو مب بارد عشان جي يوم شفته راقد ظهرت وقلت عقب برمسة بخصوص موضوع ثريا..

لكن احس بملل وضيقة غريبة عشان جي سرت غرفتي ويبت رقم بيت اهل الريم واتصلت وطبعا ردت علي الخدامة وقلت لها اني ابي ارمس الريم واحسبها بتزجرها لكنها حولت لها الخط بصراحة الريم عايشة في قصر يعني شو تزجرها بعد هاي هههههه المهم رمست الريم وقلت لها تعالي عندي لكنها قالت لي لا تعالي انتي وهاتي قيس وعمتي معاج عشان تشوفين بيتنا..

مزنه : اوكى الفكره صراحة حلوه خلاص بشوف ابوي وله فيصل وله مازن

الريم : من طرت سيره مازن فز قلبي وقلت لها اوكى تعالوا كلكم والله تولهت عليكم كلكم

مزنه : بشوفهم وبرد اتصل عليج

الريم : اترياج

مزنه : نزلت عند اماية واقنعتها بزيارتنا لريم وعقب قلت لقيس اللي كان يبي سبب وعقب قالت لي اماية اتصل بابوية عشان يودينا لكن كان عنده شغل يعني ما فيه حل غير فيصل وله مازن وطبعا مازن راقد يعني ما فيه غير اجردن فيصل وها المره مب بروحي قيس كمل معي مهمه تجردين فيصل ههههه .. ولو اجتمعنا انا وقيس في عمل اكيد انه بيتم

قيس : انا اللي اتصلت على الريم وقلت لها ان انا واماية ومزنه ياين .. وسكت (خبث خخخخ)

الريم : منو بيبكم؟؟ (قلتها بعفوية)

قيس : اممممم كان مفروض مازن بس هو راقد فما فيه حل غير فيصل هههههه

الريم : زعلت وستانست لكن يالله اهم شئ اني اشوف عمتي ومزنه وقيس بصراحة اشتقت لهم
قيس : يالله بسير اتكشخ عشان عقب ما تغيرين رايج فيني تراه استعدي بعد اول ثانوي بخطبج

الريم : نزين يالله ..

قيس : اقولج

الريم : لبية

قيس : هالله هالله بالفواله هههههه

الريم : ما شئ غير قهوة وتمر

قيس : فديتج كل شئ من ايدج حلو

الريم : قفلت عنه ودخلت المطبخ كنت ابي اسوي كم صنف حلويات خاصة اني اعرف ان قيس يحب الحلويات لكن فديت علي بعد ما سمعني ارمس في التلفون وقالوا انهم ياين

علي : سرت المطبخ وقلت بسير المخبربيب حلويات وطلبت من الريم تطلع تتجهز وتخبر اماية

بعد صلاة المغرب

الريم : وصلوا قوم عمتي وطلعت طبعا استقبلهم ورتميت في حضن عمتيه يمكن ربع ساعة عقب سلمت على فيصل ومزنه ومشيت مع قيس لين داخل عشان اكيد انكم عارفين قيس وسوالفه ..

قيس : ما شاء الله شو ها القصر اقول غيرت راي ما بنتظر لين اخلص اول ثانوي انا بقول لماية تخطبج لي الحين (طبعا قلت ها الكلام بمزح)

الريم : موافقة يالله قولها هههههه

ام علي : هلا اختي ام مازن ومرحبا فيج وتمت تتخبرها عن علومها وعاد تعرفون سوالف الحريم الكبار

مزنه يلست يم الريم وتمينا نسولف بصوت واطي ..

قيس : يوم شفت ان ما حد عاطني ويه قلت لهم بسير الميلس مع فيصل وعلي وطبعا ما ظهرت لين ما نكت مع خالتي ام علي ..

في دبي

بدرية : بعدها اجازتي باقي فيها اربع ايام وانا بصراحة احس نفسيتي تعبانه مثل ما قلت لكم عشان جي قررت اني اسير العين ازور قوم ثريا محتاجة ارمس مع شخص وثريا فديتها اقرب شخص لي عشان جي قلت لماية وطبعا اماية قالت فكره حلوه خاصة ان حور مب في البيت بيت اهلها ..
عزه : زعلت يوم عرفت انهم بيسيرون العين من دوني لانهم بيسيرون في وقت المدارس يعني ما اقدر اسير معاهم وبتم هنا في البيت مع ابويه.. حاولت اقنعهم يأجلون سيرتهم لين نهاية الاسبوع لكن بدرية ما رضت وقالت تبي ترجع يوم الخميس عشان ترتاح يوم الجمعة عشان دوامها بالسبت

ام فهد : اتصلت بام طارق وقلت لها ان بنزورهم لو هم في البيت ومب سايرين مكان وفديتها ام طارق رحبت بزيارتنا وقلت لها باجر ان شاء الرحمن بنكون عندهم العصر ..

في بيت ابو حسين

في الصالة

ام حسين : يالسة مع بناتها اللي يايات يزورها ويزورن اخوهم حسين واكيد ان ام حسين تغيرت نهائي بعد اللي صار لحسين كانت كله تهزب وتشتم لكن الحين صارت هادية وتفكر في ولدها حسين واللي صار عنده واحيانا فجئة تحصل عيونها بدت تدمع ..

خلود : انا مشغوله في الدراسة وفيصل صرت ها الايام مب وايد اشوفه من اخر مره زرتهم في البيت يوم كان تعبان وهو يشجعني على الدراسة وبصراحة ما حابة ازعله مني عشان جي شاده حيلى وايد في الدراسة رغم اني مشغوله بعد بتجهيز نفسي لزواج لكن مزنه فديتها تساعدني احيانا في بعض الامور خاصة انه ما باقي شئ على العرس غير شهر وكم يوم

في غرفة حسين

حياتي كلها على ها السرير ما راح تتغير ما اقدر انش ولا اسير ولا ارد بصراحة حاس بالملل والضيق يمكن الايام اللي طافت حاولت اني اتغلب على ها المشكلة بس الحين احس اني مخنوق مب قادر وبصراحة فكره سامر حلوه (سامر هذا شخص تعرف عليه حسين في الانترنت عن طريق المنتدى ) ونصحة انه يسافر أي دوله اجنبية للعلاج وحاول يرجع له الامل يمكن حسين في البداية كان رافض لكن اليوم شكله يحاول يقتنع في السالفة.. ولازم يفاتح اهله في الموضوع بس لازم يقنعهم لكنه قرر انه ما يفتح الموضوع لحد ما يخلص عرس اخته خلود عقب يخبرهم لانه ما يبي يضيع عليهم فرحتهم وبعد هو قال لسامر يشوف له الموضوع يعني المستشفي والاطباء المختصين في ها الموضوع وكم نسبة نجاح العلاج وغيرها من ها السوالف ..



ضنكم بدرية شو مكدر مزاجها؟؟

ومايد شو هو القرار اللي اتخذه؟؟

في نظركم طارق اللي سواه اوكى وله مفروض كان يكتم ها الحب في قلبه؟

ثريا يا تري بتوصل لحل ما مازن؟؟

حسين ومزنه شو بيصير في علاقتهم؟؟

وقيس ممكن يسوى شئ ويساعد مازن والريم؟؟

واخيرا حسين بيسافر فعلا للعلاج؟؟


الجزء الثالث عشر
في بيت ابو مازن
في حجرة مازن

نشيت من الرقاد وكان الوقت مغرب هذا عرفته من الظلام ا للى كان يغطي الغرفة رغم ان الستارة مفتوحة نشيت وكنت ضايق لان صلاة العصر فاتتني وعشان ما افوت بعد صلاة المغرب نشيت وصليت في الغرفة بعد ما طالعت الساعة وعرفت انهم مصلين في المسيد خلاص عقب نزلت اكل شئ لاني حاس يوعان لكن استغربت البيت فاضى متعود ها الحزه الاستاذ قيس يكون مع اماية في الصالة ومزنه احيانا تكون معاهم بس ما فيه حد تخبرت الخدامة وقالت لي انهم ظاهرين كلهم ..

صراحة حسيت بقلق اتصلت على مبايل اماية ..
مازن : اماية وينكم؟

ام مازن : موجودين فديتك بلاك؟

مازن : ما شئ تخرعت يوم نشيت وما حصلتكم كلكم ظاهرين خاصة ان الخدامة قالت انكم طلعتوا مع فيصل ليكون حسين ولد عمتي فيه شئ؟

ام مازن : لا فديتك حسين ما فيه شئ واحنا في بيت خالتك ام علي

مازن : سكت فتره عقب قلت لها اوكى برايكم

ام مازن : يالله تامر علي شئ انزين؟

وتوها بتقفل عنه إلا وام علي تقولها هذا مازن؟

ام مازن : هيه نعم تخرع علينا يوم ما حصلنا في البيت

ام علي : عطيني التلفون وخذت التلفون من ايد ام مازن بعد ما قالت ام مازن لمازن ان خالته ام علي بترمسة

مازن : هلا خالتي مساء الخير

ام علي : هلا ولدي شحالك ؟

مازن : يسرج الحال ..

ام علي : لو ما عندك شغل مازن تعال هنا البيت عندنا تعشى لان ا هلك ما بيظهرون إلا متعشين وانا بصراحة حابة انك تيانا

مازن : لا خالتي مره ثانية انا الحين بظهر عند واحد من الربع

ام علي : تردني يا مازن؟؟

مازن : بصراحة انحرجت منها وقلت لها لا افا عليج ما عاش اللي يردج بيكم بس انا ما اعرف البيت

ام علي : بخلى علي يتصل عليك ويوصفك البيت يالله نترياك لا تتأخر..

مازن : ان شاء الله خالتي

الريم : (ما ادري شو اقول احس ان تعابير ويهي فاضحتني واحس ان قلبي ما صار يدق بشكل عادي احس طبول احس ان الكل صار حاس بدقات قلبي )

ام مازن : ليش جي يا ام علي ما فيه داعي لكل هذا ترانا مب غرب

ام علي : انا حابة نيلس كلنا مع بعض ونتعشى ونسولف .. وله يا الريم؟؟

الريم : اكيد هيه نعم

ام علي : وبعد بو مازن بخلى علي يتصل عليه ويعزمة لو انه مثل ما قلتي البيت بيتكم ولا محتاجين عزومة

ام مازن : بو مازن اليوم ساير دبي وبيبات هناك ها الشغل ما يخلصة

ام علي : يالله عسى خير .. ونشيت عشان اقول لعلي عشان يتصل بمازن ويوصفة البيت وطبعا بعد ما ظهرت سرت بعد المطبخ اشوف الخدم شو مسوين واطمن على العشى

في بيت ابو حسين

حسين : خلاص اليوم مب قادر احس اني مشتاق لمزنه موت عشان جي دقيت على مازن اتخبره ان كان قال لها شئ وله لا ..

مازن : كنت توني نازل بسير بيت اهل الريم واتصل حسين وتميت ارمسة وطبعا قلت له اني بعدني ما رمست مزنه في شئ

حسين : مازن بقولك شئ

مازن : قول يا ولد عمتي

حسين : فيه شخص قالي انه ممكن اتعالج وهو بيشوف لي موضوع العلاج والمستشفي وبيرتب الموضوع وعقب زواجكم بسافر

مازن : فرحت وتضايقت (فرحت لان الخبر اللي قاله حسين بخصوص امكانية علاجة وتضايقت لانه ذكرني ان زواجي من ثريا ما باقي له شئ )

حسين : بلاك سكت لا تفهمني غلط (اتحسبت مازن فهمني اني ما ابيه يقول لمزنه شئ وهذا يمكن خطر في بالي بس تضايقت لمه مازن سكت)

مازن : لا ماشئ الغالي المهم بخليك انا الحين لاني ساير بيت اهل الريم عقب برد اكلمك اوكى؟

حسين : ان شاء الله بس ما فيه داعي يا مازن تيب سالفة علاجي

مازن : افا عليك خلاص ان شاء الله وقفلت عن حسين وظهرت من البيت بعد ما حسيت اني تسبحت من العطر ههههه والدخون وقبل لا اوصل منطقتهم سرت اطايب ويبت لهم صحن حلاوة كبير وشكله حلو وكنت حاب ايب للريم ورد لاني اعرفها تحب الورد لكن عقب قلت بلاني احسن اركد شوي خخخخخخخ اتصلت على علي يوم قربت من البيت عشان اتأكد لكن شو بيت فعلا قصر دخلت وانا حاس بخوف مب عارف ليش خايف عيوني تي في عيون الريم لكن هذا لا بد منه اكيد انها بتسلم على واكيد اني ما راح اقدر امنع عيوني من انها تطالع عليها

مازن : سلمت على علي وخاشمته عقب دخلني الميلس شو اوصف لكم الميلس يمكن ميلسهم كبر بيتنا كله ههههه بصراحة فخامة بالقو يلست يم فيصل اخوي.. ويلست اتخبر علي عن علومة واخبارة

علي : بخير وسهالة ما نشكو باس

مازن : عسى دوم

علي : وياك الغالي

مازن : الحين ارتحت من جهه علي لاني قبل كارهنه لاني احسبة بياخذ الريم مني لكن الحين دامة اخوها ما فيه داعي للحقد وتميت اسولف معاه ونضحك ونسولف خاصة ان الاستاذ قيس ما شاء الله عليه تم بعد يسولف وينكت ويمكن انا ارتحت لاني ما شفت الريم رغم ان في داخلى ابي اشوفها لاني توووولهت عليها ..

في ميلس الحريم

ام مازن ومزنه والريم نشن يصلن وام علي دخلت المطبخ عشان تطمن على العشى واتصلت على علي وقالت له هاه يا ولدي مازن وصل عشان نحط لكم العشى؟

علي : مازن من ساعة هنا

ام علي : افا ولا دخل يسلم علينا ؟؟

علي : ما لي دعوه منج له

ام علي : خليه يدخل يسلم علينا ما فيه حد غريب انا وبنت خاله وله يستحي من امه واخته؟

علي : خلاص بقوله الحين وطالعت على مازن وضحكت

مازن : بلاك ؟

علي :هاي اماية تحسبك ما ياي ويوم قلت لها انك ياي قالت ليش ما دخل يسلم علينا ما فيه داخل غير اماية والريم وامك واختك وله تستحي منهم؟

مازن : خيبة قفطة وقلت له خلاص نزين الحين بدخل اسلم عليهم خبرهم

علي : ما فيه داعي تفضل تفضل وسرت وياه لين داخل ورجعت عنه عقب ايلس مع قيس وفيصل

مازن : حبيت خالتي ام علي على راسها بعد ما عاتبتني طبعا لاني ما دخلت اسلم عليها وعقب اكيد كانت عيوني تدور على كائن صغير بينهم خخخخخ ومن شفتها توها ناشة من سيادة الصلاة يبست في مكاني الحين بتسلم علي وبتي ايدي في ايدها؟

الريم : مشيت بخطوات تجاه مازن وحاولت اوخر القلق اللي باين على وسلمت عليه وحسيت بايدي اللي كانت متجمده قبل لا تسلم عليه صارت مثل النار وقلبي اكيد مثل النار بعد

مازن : ما كنت اسلم على الريم بايدي غير في الاعياد وصار اليوم بعد عيد عندي ..

ام علي : هاه يا ولدي علومك اخبارك؟

مازن : ما شئ والله

ام علي : ايلس نزين بلاك واقف

ومسكته عاد خالته ام علي وامه والريم ومزنه يضحكن علي معليهن عقب ترخصت عنهم وسرت الميلس

في بيت ابو طارق

ثريا : كنت اجهز مع الخدامة غرفة الضيوف حج خالتي فوزية اما بدرية اكيد بتبات في غرفتي ومعي بصراحة وقت زيارتهم وايد مناسبة انا محتاجة لبدرية وايد

ام طارق : انا مستانسة على زيارة فوزية بصراحة حاسة انه فيه عندي اهل يسألون عني صح ما قلت لكم اني ما عندي خوان ولا خوات وامي وابوي متوفين من زمان ورباني عمي وزوجني ولده راشد وسافرت معاه من زمان ما لي في الامارات غير اهل راشد ريلى وفوزية بنت خالتي

في شرم الشيخ

طارق : بدل ما ارتحت نفسيا من ها السفرة تعبت نفسيا وحسيت انها بلا فايده شئ احس اني خسرت حور لنهاية شكلي فعلا لازم اخليها لانها تحب فهد وانا ما لي غير اني انساها عشان جي قررت اني ارجع الامارات واكون مع اهلى واشغل وقتي بالشغل وربي كريم يخليني انساها

حجزت على اليوم اللي عقبة ورجعت على الامارات وطبعا اهلى ما يعرفون بموعد رجعتي خاصة اني قلت لهم بطول لكني ما قدرت السبب اللي سرت له فشلت فيه

في بيت ابو طارق

وصلوا قوم فوزية وبدرية وطبعا الترحيب والمهلى فيهم كان بدرجة كبيرة ومن بعد صلن بدرية وثريا المغرب طلعن غرفة ثريا وكل وحده فتحت قلبها لثانية تشكي لها همها

ام طارق وام فوزية وابو طارق يالسين في الصالة ويوم انفتح الباب ودخل طارق نشت ام طارق ولوت على ولدها وعقب سلم على ابوه وخالته فوزية وبصراحة ما توقع انه يحصل حد عندهم في البيت رغم انه شاف السيارة خارج في الحوي بس تحسب حد من ربع ابوه اثاريها سيارة بدرية ..

ام طارق : قلت للخدامة تخبر ثريا بان اخوها رجع

ثريا : يوم قالت لي الخدامة ما صدقت ونزلنا انا وبدرية وفعلا حصلنا الدكتور طارق يالس مع اماية وابوي وخالتي فوزية سلمنا عليه ويلسنا معاهم نسولف

في بيت ام علي

الريم : كنت يالسة ادرس عشان باجر عندي امتحان وشوي وسمعت حد يدق الباب كان اخوي علي ياي عندي

علي : هاه غناتي تدرسين؟

الريم : شوي وله ما من زود ههههه

علي : فديتج

الريم : حسيت ان علي في خاطره رمسة لا تستغربوا يمكن انا بس من فترة بسيطة تعرف على اخوي وامي لكن خلاص علي بالنسبة لي صار كتاب مفتوح سبحان الله يمكن لان خوان ما ادري وقلت له علي بلاك شو في خاطرك؟

علي : قربت صوب الريم ولويت عليها وقلت لها بصراحة كان خاطري اظهر معاج اليوم خاطري احس باحساس كل اخ وهو ياخذ اخته ويتمشى معاها بس ها الامتحان خرب علي

الريم : افا عليك بس جي وقفلت الكتاب وقلت له نص ساعة وبكون جاهزه لكن بشرط توديني العين مول ونتعشى في أي مطعم على ذوقك

علي : بس جي؟؟ فالج طيب لكن الامتحان يا فالحة شو بتسوين فيه؟

الريم : اقولك ولا تعصب؟

علي : قولي لي

الريم : الله يخلى البراشيم ههههههه (امزح) بس بدرس اول ما ارجع

علي : فديتج يالله عيل بترياج تحت لا تتأخري

الريم : لا ما راح اتأخر بس تخبر اماية كان بتسير معانا

علي : امج الغالية على وشك انها ترقد بعدين انا قلت ابي اسير مع اختي وبس

الريم : غمزت لعلي وقلت له نزين الشيخ يالله لا تأخرني وبعد ما نزل علي حسيت اني لازم البس احلى لبس وتكشخت احلى كشخه وحطيت مكياج ونزلت

علي : تميت اصفر شو ها القمر اللي نازل لا بصراحة ما اروم على هذا كله بيقولن علي يمشى مع قمر

الريم : تميت اسوي حركات واستعرض بالعباة والشيلة ونزلت من على الدرج ومسك علي ايدي كأني اميرة (يمكن في نظركم خبال بس والله احساس حلو)

ظهرنا انا وعلي وفي السيارة شغل لي شريط منوعات فيه احدث الاغاني بصراحة فيه اغنية لمحمد عبدو عيبتني وايد نسيت كلماتها بس حسيت انها مكتوبة لي وتوصف وضعي انا ومازن

دخلنا العين مول وطبعا كنت احس علي شوي هين لكن منو يقول قبل لا ننزل من السيارة تعليمات وارشادات حطي الغشواه وما ادري شو المهم بصراحة حاسة اني مستانسة بالقو لكن لمه شفت الزحمة في العين مول قلت لعلي خلاص ما ابي ظهرنا

علي : شو ظهرنا بوديج اعشيج

الريم : لا خلاص هونت وديني أي مطعم ناخذ بارسل ونتعشى في أي مكان هادي (بصراحة انا ما احب الزحمة وايد واحس اني ما اعرف اتصرف في وسط الزحمة)

علي : امرج الغالية

الريم : شوف عندك لين الساعة 12 عقب السحر بيقلب وبظهر على حقيقتي ههههه

علي : فديت اختي وطبعا لفينا شوي في العين مول بعد ما اقنعتها وخليتها تشتري ملابس بصراحة مثل ما قلت لكم خاطري احس انها اختي وانها تدلع علي وتتأمر علي (مب خبل بس يمكن لاني فقدت ها الاحساس وكنت طول عمري احلم فيه ويمكن بعد كان خاطري اعوض الريم عن غيابي انا وامي عنها)

الريم : عقب ما ظهرنا من العين مول وداني علي شارع خليفة وطلب لي عشى من مطعم هو اختارة وخذينا العشى بارسل وسرنا يلسنا في مكان في حديقة ما فيها حد وطبعا يلسنا نسولف ونضحك مع بعض حاولت خلالها اتعرف على اخوي علي اكثر وبصراحة كان شخصية مرحة وحبوب بالقو ..

في بيت ابو مازن
في حجرة مزنه

مزنه توني راجعة من الدوام وصليت الظهر وحاسة هلكانه بس تقلبت في السرير اني ارقد ما فيه فايده ظهرت ونزلت قلت يمكن احصل حد يالس في الصالة لكن كلهم في غرفهم وفيصل اليوم سار مع خلود واختها دبي عشان موضوع الفستان ولكن الاستاذ مازن اللي مب مهتم عشان جي قررت اني اسير الحين وارمسة عن موضوع ثريا

في حجرة مازن

مازن : كنت افكر في اخر مره شفت فيها الريم وسلامي عليها ولكن الدقات اللي كانت على الباب قطعت علي ورجعتني من عالم الخيال اللي كنت فيه

مزنه : راقد؟

مازن : لا بعدني

مزنه : ممكن ارمس وياك؟

مازن : افا عليج بدون ما تستأذني قولي اللي في خاطرج الشيخة مزنه

مزنه : خطيبتك ثريا

مازن : لويت بوزي وقلت لمزنه بلاها؟

مزنه : انت مقتنع فيها لمه خطبتها؟

مازن : لا تعليق

مزنه : مازن كلنا ملاحظين انك مب مهتم فيها ومب مهتم ان عرسك ما باقي عليه شئ وانت البنت ابدا ما تتخبر عنها ولا تسأل عنها كأنها ما تعني لك شئ مب كأنها حرمتك ومب باقي شئ وتصير في بيتك

مازن : ممكن ما نرمس عن الموضوع

مزنه : اسفة ما اقدر البنت قالت لي اسألك وهي وايد متضايقة حتى انها قالت لي لو ما تبيها خلاص طلقها وطبعا اماية ما تعرف بالموضوع وما حبيت اقول لها

مازن : حسيت بثريا للحظة حرام اللي انا اسويه فيها لكن...(وبعد ما رمست باي كلمة)

مزنه : لا انت مب مازن اخوي انت فيك شئ مب طبيعي

مازن : ابي ارقد ممكن؟

مزنه : قصدك تبي تهرب اوكى انا بظهر لكن الهروب تراه عمره ما يحل أي مشكلة لو حاس انه فيه شئ احسن ترمس من الحين مب عقب وظهرت عنه وانا واصله حدي صراحة اليوم حسيت باحساس ثريا اكثر وحسيت اني فعلا معصبة على مازن وبرود اعصابة

في بيت ابو طارق

بدرية وثريا توهن ناشات لانهن اصلا راقدات الساعة 6 الصباح وطبعا البقية تغدوا عنهن وكانوا يالسين في الصالة يطالعوا الاخبار ونزلن الانسة ثريا والانسة بدرية

طارق : خيبة خلصتن الرقاد طالع عيونهن كيف منتفخات

ام طارق : جي انا لين الصبح سمعانه سوالفهن

ام فهد : برايهن خلوهن

ام طارق : غلامة(طبعا تقول لثريا) سيري حطي الغدى حقج وحق بدرية

بدرية : لا خالتي ما نبي الحين

ثريا : الحمد لله ريحتيني هههههههه

طارق : اللي يسمعها يقول صج هي بتحط الغدى مب كأنها بطرش الخدامة

شوي ورن التلفون وراح طارق يرد وكان المتصل ابوه قاله انه بيتأخر في الدوام عشان عنده عملية اليوم وقاله يخبر امه عشان ما تخاف عليه وطبعا طارق قال لامه بعد ما قفل عن ابوه

بدرية : هاه وين بتمشونا في العين نحن اعتقد ما قصرنا فيكم ومشيناكم في دبي

طارق : اول مره اشوف ضيف يتشرط اقولج في دبي عندكم عادي تتمشون لكن في العين منجووود خخخخخخخخ

بدرية : لا والله ؟؟ عيل اماية يالله سرينا دبي

ثريا : خيبة يعني انتي يايه عشان تتمشين مب عشانا؟

بدرية : قفطة خيبة شو ارد عليها هاي الحين

ام فهد وام طارق ميتات ضحك عليهم وعقب قالت ام طارق خلاص الغالية بنوديج يبل حفيت بصراحة مكان حلو

طارق : او ام طارق تبي تسير يبل حفيت من عيوني

وبعدها نشن بدرية وثريا وتغدن وام فهد دخلت تريح شوي وام طارق بعد وطارق قال لهم انا بظهر شوي وبرجع لكم عقب المغرب تكونوا جاهزين

بدرية من العصر بنكون جاهزين

طارق : لا ما ينخاف عليج لو اني شاك اني بحصلكم جاهزين اعرف سوالف البنات

ثريا : لا انا وبدرية غير

طارق : نزين غير هانم يالله من رخصتكم لكن يوم أي احصلكم جاهزين

في بيت ام علي

ام علي : امممممم فيه شئ يدور في راسي انا مب عارفة كيف اوصل له طبعا انا اعرف ان الريم بنتي تميل لمازن ولد عمتها وهذا تأكدت منه بعد ما رمست معي الريم في يوم وقلت لها انج مرتبطة في مازن وهي نفت ها الشئ لكن كل شئ يدل على انه يعني لها شئ كبير وانا ما ابي بنتي ينكسر خاطرها لكن مازن مالج ولازم اتصرف واكنسل ها الزواجه لا تعتقدوا اني شريرة لكن انا في هذاك اليوم اللي زارنا فيه مازن مع اهله تأكدت انه هو بعد يحب الريم ويمكن ظروف معينة خلته يرتبط في ثريا ..

في بيت ابو طارق
بعد المغرب

ام فهد وام طارق وثريا وبدرية جاهزات ينتظرن طارق عشان يطلعن بس طارق تأخر عليهم يتصلون عليه ما يرد وبعدها بشوي وصل ابو طارق اللي كان هلكان من يوم طالع الصبح من البيت ما رجع لانه كان عنده عملية اليوم

بو طارق : على وين اشوفكم جاهزين وبعباياتكم؟

ام طارق : بنمشى ام فهد وبدرية وطارق وعدنا ينا بعد صلاة المغرب ونتصل عليه ما يرد

بو طارق : اكيد مشغول في شئ وبيرجع بعد شوي يالله المهم انا بطلع اريح شوي

ام طارق : احط لك شئ تاكله؟

بو طارق : لا ما لي نفس في أي شئ وطلع غرفته عشان يرتاح

ام طارق : سرت المطبخ وسويت كوب عصير برتقال طازج حق ابو طارق ولحقته الغرفة وعشان بعد اطلع له ملابس من الكبت لاني اعرفة بيدخل يسبح (مثل ما قلت لكم ارتباط ام طارق في ابو طارق وايد قوى ما شاء الله عليهم)

وبعد ما تطمنت ام طارق على بوطارق نزلت وحصلتهم بعدهم يتريون قالت لهم شو بعده ما وصل طارق صراحة بديت احاتية

ام فهد : انا قلبي كان نار من المحاتاه ها الولد ارتبط فيه وايد واحسه مثل فهد ولدي ما شاء الله عليه حبوب وراضى والديه مره من اشوفه احس اني اشوف فهد ولدي

بدرية : عطوني رقمه انا بتصل عليه من رقم غريب يمكن يرد يمكن يبي يتهرب عشان يظهرنا (بصراحة حاولت الطف الجو شوي لاني بعد ما اجذب عليكم حاسة بخوف)

ثريا : ظهرت مبايلى من الشنطة وطلعت رقم طارق وعطيته بدرية عشان تدق على طارق

في الوقت اللي بدرية تدق على طارق كان طارق يفتح باب الصالة ويدخل علينا

ام طارق : اللي اشوفه صح هذا ولدي ولكن شو القطعة البيضاء على ايده ومنو الريال اللي واقف معاه هذا كأنه مازن

ام فهد : ركضت صوب طارق اللي كان مبتسم ..

طارق : لا تخافوا لا تخافوا ما فيه شئ

ثريا : شو ما نخاف ايدك مجبسة طارق ونسيت اللي واقف عدال اخوي نسيت مازن

طارق نزيد ممكن نيلس بفهمكم كل اللي صار وقلت لمازن تفضل مازن

يلس طارق على كرسي كبير ويمه مازن اللي حاول يترخص بعد ما وصل طارق لكن طارق قاله تفضل

طارق : وانا ظاهر من البيت اتصلت على فيصل وقالي انه في دبي مع خطيبته وقلت بلف شوي في العين وفي اشارات دوار الساعة انا توني بظهر بعد كانت الاشارة خضراء كان واحد يكسر الاشارة بس الحمد لله ما كان مسرع وايد وايد وطبعا تداعمنا وحذتها ما اتصلت على ابوي اتصلت على مازن عشان يكون معاي وسرنا المستشفي وعقب سرنا مركز الشرطة والحين انا كاني ما فيني شئ بس كسر في الايد

ام فهد : فديتك الغالي ما تشوف شر خلاص باجر لازم نذبح على سلامتك

ام طارق : هيه نعم لازم

مازن : الحين انا بترخص يالله تامر على طارق ؟

ام طارق : وين يا ولدي ايلس بتتقهوى واشرت لثريا عشان تسير المطبخ تحط فواله لخطيبها وطبعا عرفت ام فهد على مازن قلت لها هذا مازن خطيب ثريا

ام فهد : والنعم فيه والله

مازن : والنعم بحالج خالتي المهم خالتي انا ما بتقهوى بسير البيت..

ثريا : خلوه على راحته وطلعت غرفتي (ما ادري شو من الاحاسيس اللي حسيت فيها حسيت اني فخوره فيه حسيت اني مقهوره منه حسيت بفرحة لمه شفته رغم خوفي على اخوي طارق)

بدرية : انا لحقت ثريا لمه طلعت غرفتها

مازن : انا ترخصت وسرت البيت بعد ما قلت لطارق ما فيه داعي يوصلني لين خاري وقلت له ارتاح وانا بتصل عليك عشان اطمن عليك

طبعا ام فهد وام طارق يلسن يسولفن مع طارق شوي عقب سار طارق غرفته يرتاح


--------------------------------------------------------------------------------

في حجرة ثريا

ثريا : شفتي ما يطيق يلس معانا شوي

بدرية : لا عاد هاي المره عنده حق يعني يايب اخوج مسوي حادث ما فيه مجال انه ييلس ويتقهوى قصده يسير عشان يخليكم مع طارق

ثريا : ما ادري شو اقولج

بدرية : انتي وايد حساسة لكن تعرفين شو ها القمر صراحة ما كنت اعتقد ان مازن بها الحلاة وها الشخصية رهيب صراحة

ثريا : طالعت على بدرية باستغراب

بدرية : لا بس مايد احلى منه هههههههه امزح معاج يالله اضحكي وقمي نسير نيلس معاهم ونطمن على طارق ونسوي تحقيق عن سبب الحادث ليش ما انتبه للى كاسر الاشارة

ثريا : والله ليسفرج طارق واكيد انه بيسفرني معاج لو سرنا نغلس عليه الحين

بدرية : يا سلام خلاص بقوله يسفرني عند مايد امريكا عيل ههههه يالله قمي قمي بلا نكد ما يسد انكم ضيعتوا علينا طلعة يبل حفيت وباجر برجع دبي بدون ما اكون ظهرت

ثريا : يالله يا غلسة وطلعنا وحصلنا اماية وخالتي ام فهد بروحن في الصالة وتخبرتهم عن طارق قالوا انه في غرفته

بدرية : خلاص نخليه يرتاح يالله قمي نسير نمشى شوي في حارتكم تراني ملانه بالقو

ثريا : بترخص منهم وبنسير

وتوني بقول لماية ورن التلفون رديت عليه كانت خالتي ام امازن داقة

ام مازن : هاه ثريا بنتي تستحقوا سلامت طارق توه مازن خبرني شحاله الحين؟

ثريا : الحمد لله

ام مازن : عطيني امج ارمسها

ثريا : عطيت اماية التيلفون وقلت لها خالتي ام مازن

ام مازن : سلامته طارق ان شاء الله

ام طارق : الله يسلمج الغالية يالله الحمد لله انها سدت لين هنا

ام مازن : الحمد لله انا توه مازن قالي وان شاء الله باجر بنيكم عشان نطمن عليه

ام طارق : حياكم الله البيت بيتكم

ام مازن : يالله المهم حبيت اطمن على طارق فديته

ام طارق : فيج الخير الغالية

ثريا : بعد ما خلصت اماية مرمسة خالتي ام مازن قلت لها بنسير انا وبدرية نمشى شوي في الحارة

ام طارق : برايكن

في دبي

حور : رجعت البيت خاصة بعد ما عرفت ان عمتي وبدرية ساروا العين وان عزه بروحها مع عمي .. خاصة اني مب وايد مع عزه وما راح تحس بان فيني شئ ولاني حاولت انسى كل اللي سمعته من طارق واعتبره ما كأنه صار

عزه : انا كل يوم اتصل على اماية عشان اطمن واليوم قالت لي ان طارق سوا حادث وان ايده مكسوره بصراحة قلبي عورني عليه وبعد ما قفلت عنها ظهرت وخبرت ابويه اللي كان يطالع التلفزيون وكانت حور تلاعب مايد

ابو فهد : شو حادث وعسى مب متعور وايد؟

عزه : تقول اماية ايده مكسوره

ابو فهد : عيل باجر ان شاء الله بسير العين اطمن عليه

عزه : بسير وياك ابويه .. والله اشتقت اماية

ابو فهد : وانتي يا حور بتسيرين معانا؟

حور : هاه؟؟ لا عمي ما بسير

مايد الصغير : انا بروح وياك يدي

ابو فهد : عيل دام مايد بيسير انتي بعد سيري ويانا يا حور

حور : لا لا عمي برايكم سيروا انتو ومايد براية يسير وياكم انا بسير عند اماية بعدها تعبانه

ابو فهد : على راحتج عيل عزه اتجهزي باجر بنسير من الصبح

عزه : ان شاء الله ابويه

في العين
في بيت ابو طارق

طبعا ام مازن وابو مازن ومزنه ومازن وفيصل وقيس ساروا عشان يطمنون على طارق وبعد وصلوا قوم دبي ابو فهد وعزه ومايد الصغير

في ميلس الحريم

ام طارق : عرفت ام مازن على ام فهد ويلسن يسولفن ..

ام فهد : والله اني من شفت طارق داخل علي بايده المكسوره ان قلبي عورني عليه فديته غلاته من غلاه فهد ولدي ودمعت عينها ومسكت مايد ولد فهد وحبته على راسه

ام طارق : طبعا قالت لام مازن ان فهد متوفي وان مايد ولده ..

ام مازن : هيه الله يرحمه لكن حمدي ربج انتي ولدج راح من الدنيا وخلى لج ولد يحمل اسمه انا ولدي سار بعده عمره 20 سنه وبعد هي بجت

مزنه : شو قلبتنها مناحة استهدوا بالله بلاكم

ام طارق : هيه والله صج يا بنتي وقالت لثريا تقرب الفواله وتمت تقص وتعزم عليهم

عزه : يلست يم بدرية اختي وهي تتخبرني عن حور وانا كان خاطري اعرف سبب الحادث اللي تعرض له طارق بس ما حد عاطني ويه

مزنه : يلست يم ثريا وقلت لها انا رمست مازن ولا تحاتي الغالية بس مازن شخصيته يستحي وله ما فيه شئ (قلت ها الكلام وانا بصراحة حاسة بالذنب تجاه ثريا )

ثريا : خلاص بتحمله وامري لله

مزنه : يالله الله يعينج على حيائه هههه

ثريا : هيه نعم

مزنه : تميت اسوي حركات حج مايد الصغير فديته وايد حلو وتميت ازجره عشان اسلم عليه وهو يستحي وينخش في حضن يدته

بدرية : تعال يمكن تخطبك هههههه

مزنه : هيه تعال ممكن اخطبك تراني ا شتغل ومهري جاهز ههههه

بدرية : عيل زين

مايد : رمس يدته في اذنها وقالها بسير عند يدي خلاص الولد واصل حده من الحياء ههههه

ام طارق : تعال انا بوديك وشليت مايد ووقفت عدال الباب ودقيته وظهر لي بو طارق وقلت له دخل مايد عند يده

ابو طارق : شليت مايد ودخلته وفديته ما احلاه سلم على الريايل كلهم وخاشمهم ويلس يم قيس

قيس : يلست اسولف مع مايد الصغير

طارق : انا كنت اطالع مايد وشوي وياني مايد

مايد : ليش ايدك مربوطة ؟

طارق : تعورت فيها

مايد : عشان ما سمعت كلام امك ؟؟

قيس : جاوب يا طارق وهجه هههههه

كلهم تموا يضحكوا على طارق اللي صار ويه احمر ومايد يطالع عليهم وعقب سار يلس في حجر يده على باله يضحكون عليه

في دبي
في المطار

وصل مايد وطبعا ما حد يدري عن موعد رجعته وهو ما قال لاهله عشان ما يعارضون رجعته وسار بيت اهل بدرية ودق الباب لانه حاب يسوي مفاجأة حق بدرية لكن الخدامة فتحت له الباب وقالت له انه ما فيه حد في البيت

مايد : حسيت خلاص بيغموا علي حسيت بخوف وكنت ما ابي اتصل على بدرية وبطاقتي مال الامارات في البيت لكن شو يصبرني اسير البيت واركب بطاقة الامارات اشتريت كرت شارع واتصلت على مبايلها ولكن بدرية ما ردت علي وانا عارف بدرية ما راح ترد على أي رقم غريب اف يعني ما فيه حل غير اني اسير البيت واركب بطاقتي الامارات


 توقيع : جنــــون


مواضيع : جنــــون



رد مع اقتباس