منتديات قصايد ليل - عرض مشاركة واحدة - لحظات غريبة بين اثنين ...خلقت الحب في قلبين "

11-07-2016

عبير ــ راحت دون ما تسلم علي الخايسه أراويها ..
خالد ــ من..... دانه؟؟
عبير ــ اييه اليوم آخر امتحان عندها ..وجوالها صاكته ...ماتبي تفتحه الحماره ..
ماعلق خالد ..كان يبي يرجع لها الملف ..بس الظاهر انها راحت ..ارتاح نفسيا انها راحت ..كان يحس بضيق لما يشوفها ...ويتشاءم منها ..
عبير ــ وين سرحان؟؟ قوولي لي ..متى بتخطبها؟
خالد ــ أخطب مين؟
عبير ــ دانه ...
خالد ــ لا ..أنا ما أبي دانه .أني أبي بنت اخوها ..أعجبتني وايد ..
عبير مدت بوز ــ قمور؟؟ صدقني ماتستاهل ..دلوعه وايد ..
خالد ــ يعني دانه خاليه من الدلع ؟؟
عبير ــ دانه احلى من قمر ..
خالد ــ الحين الدانه احلى من قمر؟؟
عبير ــ قمر الزمان هذا اسمها ...دانه عيونها احلى ..سود ..ما شفت عيون بهالسواد من قبل ...وشعرها اغمج من عيونها ..وحرير ..مثل ظلمه الليل ..وبياضها ياي العكس تماما من لون عيونها وشعرها ..تحس انه كاسر لون شعرها ..ومابتكلم عن الخشم ..أنت شفته ...قد مره شفت خشم بهالحلاة؟؟ ..
خالد ـ لا توصفينها لي .أنا ما أبيها ..أبي قمر ..
عبير ــ ايش شايف بقمر علشان تتعلق فيها جي ؟؟ ملامحها عادية ..ودلوعه ..ولاعندها اي طموح..دخلت علمي بس علشان تغيض اختها بدور ..
خالد ـ بدور ؟
عبير ــ بدر البدور ..النسخه من قمر..بس متغطرسه وشايفه عمرها ..من اتذكرها انغث ... كانت تبي قمر تدخل ادبي علشان يسوون كبل..بس قمر عناد فيها دخلت علمي ...دلوعات بشكل كبير ... لكن دانه عاقل وحبوبه ..وروحها طيبه ..وعاجبه امي ..هذا هو المهم ..
********************
سعود ــ ها شقلتي؟؟
دانه ــ ليش أنا في مزاد؟؟؟ شلون تبوني أختار؟؟
ثامر ـ ليش مصعبتها وايد ؟؟ اختاري من تبين ؟؟ خالد ولا عامر ولا ضاحي ؟؟
دانه ــ الحين بس هذي خياراتي؟؟ من اختار؟؟ أنا ما أبي أتزوج ..افهموا ..
ثامر ــ دانه ..بلا تدلع ..ترا محد رايق لج ..
نايف ما علق ..تقريبا الحنون بين اخوانها هو نايف ...بالاحرى اللي شخصيته ضعيفه ..
ناصر ــ أنا من راي اخوانج ..تتزوجين احسن ..
دانه ــ ليش تبون تحذفوني على الناس...عامر مايبي يتزوج عقب اختي نوير الله يرحمها.. وضاحي سمعت انه مايبي يتزوجني ..وخالد في باله وحده ثانية مايبي يتزوجني ..غصب تطيحوني في جبود الناس؟؟
ناصر ــ هالموضوع مو صحيح ..
دانه ــ ليش مو طايقيني يا اخواني؟؟ ثامر يوم زوجتك مريم دخلت المستشفى ..من اللي بقت قرب عيالك لين قامت بالسلامه؟؟ سعود..لما سافرت انت وزوجتك لبنان ..من اللي حذفتوها مع اليهال رغم ان اليهال صغار؟؟ و ماتطلعون لبلد ثاني اكون عند الطلب..ناصر..بناتك من دايما تكون معاهم لما تطلع انت وزوجتك ؟؟ من اتللي تاخذهم السوق وتتشرى لهم؟؟ نايف..بناتك أنا اللي كنت دايما معاهم ..وهم في عز حاجتهم لكم ..كنتوا تتجاهلونهم ..انا الللي كنت اقول لهم شالصح وشالغلط..وانت ومنيرة ماكلفتوا عمركم تسألونهم عن دراستهم ...ودايما انا موجوده ..من بيت لبيت ..دايما عند الطلب ..مستعده اظل على هالحال وأنا في قمه سعادتي بس لاتدفنوني مع ناس ما ابيهم..ماكان لازم تبيعون بيت امي ..ماكان لازم اخليكم دام بيوتكم ضاقت علي وحريمكم تتشكى مني ..
ناصر ــ بلا كلام ماله داعي .. كل اللي سويتيه كان واجبج كعمه ,,,وهالكلام لا تمين تمنين علينا فيه ..
دانه ــ ناصر ..ما ابي اتزوج ..ما ابي ..ارحمني ..
ناصر ــ دانه ..أنا وأخوانج نشوف ان الزواج افضل الطرق انج تكملين حياتج ..
قاطعته دانه ــ ناصر ...لاتأثر عليك هناء ...وانت يانايف لاتاثر عليك منيرة ..ولامريم ..أنا أختكم ..أنا اللي باقيه لكم .. ماعندي غيركم حرام عليكم ..
ناصر ــ لاتقلبينه فيلم هندي ...من تبين اختاري ..
طالعت دانه اخوها الكبير نايف ..وشافته يتهرب من نظراتها ..
دانه ــ اول ..شي ..اتصلوا في خالد ..واسألوه يبيني ولا لا ..ونفس الشي ..بضاحي وعامر ..
نايف ــ ضاحي يبيج اكييد ..وعامر حنا نبيج تربين ولده ..خالد ..لام خالي كلمني انه يبيج له ...
ناصر ــ بتصل في خالد واساله ..ما طلبتي شي ..
مسك جواله واتصل في خالد ..
***
خالد ــ زين وين ريموت التلفزيون؟؟
عبير ــ هذا..خالد ..جوالك يرن ..
خالد خذ جواله وطلع بره يكلم ناصر ..
خالد ــ ألو ...هلا ناصر بولد عمتي ..
ناصر ــ هلا ..خالد شخبارك؟؟
خالد ــ بخير الحمدالله ..وانت والعيال؟؟
ناصرــ كلنا بخير الحمدالله ...شوف خالد ...
خالد ــ لبيه ...
ناصر ــ ياني خاطب لدانه..وأنا من زمان كنت مكلم خالي وقال يبيها لك ..والريال انا شاريه اذا غيرت رايك ..بس انت اولى ..ها شقلت ؟؟
(احتار خالد ..ماعرف شيقول ..يرخصها ولا لا ؟؟ مايقدر على زعل ابوه ...وامه تبيها ..(
ناصر ــ ها خالد ؟؟؟
خالد ـ كيفك ..
ناصر ــ ترخصها؟؟
خالد ــ ما ودي بس ماعندي اي خطط زواج حاليا . شوف رايها ااذا تنطر لين ما استقر ...الامر بيدها ..
ناصر ــ زين ...ما فهمت ..تبيها ولا لا؟؟
خالد ــ كيفها ..
ناصر ـ ايش كيفها هاذي؟؟ مالها راي تبيها انت ولا لا؟
خالد ــ خلاص خلي تروح لنصيبها ..
ناصر ــ خلاص ..مع السلامه ..
**********
ناصر ــ رخصها ....يعني من اليوم دانه لضاحي وضاحي لدانه ..
دانه ــ شلون؟؟
ناصر ــ ضاحي مناسب لج ..قريب من عمرج ..عمره24سنه بس ..اما عامر .. كبير عليج ...حسبتها انسب واحد لج هو ضاحي دام رخصج خالد.
دانه ودموع عيونها غرقها ــ ما فهمت ليش ناديتوني بالاساس ..لو نايمه كان احسن لي من وجع الراس ..قررتوا وسويتوا اللي تبون ..
ناصرــ نايف دق على نسيبك ..وقوله انا وافقنا ..
نايف ما تكلم ..بس هز راسه ..ودانه ركضت لغرفتها تصيح ..
***********
خالد ــ موضوع الدانه وخلصنا منه ..
عبير ــ شلون؟؟
خالد ــ اتصل ناصر ..يقول اخطبوها ناس ..
عبير ــ لا ...من ؟؟
خالد ــ نسيت اسأل من ...مو مهم ..
عبير ــ لا يا خالد ..لا تفرط في دانه ..خالد اذا لي غلا في قلبك ..لا ياخالد ..ارجوك ..
خالد ــ ما اشوف في دانه اي شي يجذب ..وأنا أكرهها من كانت طفله ..
عبير ــ طبعا ماتشوف ..قمر مدلعه ..ولاشافت التشتت اللي شافته دانه ..فتبين لك جذابه وويهها منور ..لكن الدانه مسكينه ..ماتقدر تنام من الهم ..وتسأل نفسها بكره في اي بيت من اخوانها بتنام ..ارجوك ..خالد والله ما تستاهل ..
خالد ــ يمكن يكون ريلها احسن مني؟؟ وعلى الاقل يحبها !!؟...
عبير ــ يمكن ...بس ..
خالد ــ لا تبسبسين ...خلاص صار اللي صار ...
طلع خالد لغرفته ....كلام عبير اثر فيه شوي ...طالع ملف الدانه ..وفتحه ..وقلب في اوراقه ...

((مع نسيم الفجر..احتارت روحي.. الى اين ستطير اليوم..هل الى المحيط الهادي ام الشمالي؟؟ ام الاطلسي ..((
(يمه ...ارجوج ..غفر لي ..ادري بسبتي متي ...آسفه يمه ..والله ما كان قصدي ..انا ما كنت ابيه بس ...يمه .أكرهه لانه هو السبب في التعب اللي انتي فيه ما اقدر يمه .لليوم شايله ذنب موتج ..ليتني مارفضت ولا صار اللي صار ..(
احتار خالد ..شقصدها الدانه ؟؟ شلون هي السبب في موت عمته؟؟ يمكن هالملف فيه الاجابه !