12-15-2014
|
#21
|
تركي وجواله يرن كل شوي وهي كانت ريما رد عليها تركي بحزن حب يخوفها
ريما وهي تشاهق من البكى :الو تركي ليش ماترد شنو صار لرانيا
تركي بحزن مصتنع :ايه ريما خلاص
ريما وترفع صوتها :تركي شنو اللي خلاص
تركي يبتسم ويسوي نفسه زعلان :ايه ريما خلاص كل شيء..............
ريما وبانهيار :لا تركي تكذب انا لازم اكلم ........
خطفت خديجه التلفون منه خافت يصير شيء لريما ... ريما كانت بتقول لتركي انها بتكلم ناصر وتقوله شنو صار لرانيا بسببه
بس الحمد لله انه ماسمعها لانه في هذا الوقت اخذت خديجه الجوال
خديجه :الو هلا يمه لاتخافين اختك بخير ماعليها شر بس نزفت دم كثير وخيطوا رجليها والحين هي بالغرفه نايمه
ريما تمسح دموعها :صدق يمه
خديجه تضحك على خوف ريما :ايه يمه مايسوى تبكين كل هالبكى كله
وبعدين انتبهي على نفسك وقفلي الباب راح نوصل البيت بعد ماتقوم اختك ونتطمن عليها
ريما :ان شالله مع السلامه وقولي لتركي الخايس والله لاوريه
خديجه ضحكت على سوالف عيالها :مع السلامه يمه ديري بالك على نفسك
ريما :مع السلامه
الصباح الساعه 9 ناصر فتح عيونه لقى نفسه في مكان ماتعود على انه يصبح عليه اويشوفه ناظر جنبه لقى مها موو موجوده في مكانها
سمع الصوت في الحمام عرف انها هي قام من مكانه وكان بيدق على الحمام (اكرمكم الله )يستعجلها بس حب يكلم تركي واخذ الجوال
ودق على تركي
تركي :هلا بالمعرس وش عنده مبكر
ناصر يضحك :هلافيك غريبه صاحي الحين اليوم خميس
تركي :اولا مبروك وثانيا غثونا هالبنات
ناصر :الله يبارك فيك .......ليش انتو طالعين برى
تركي :الا في المستشفى
ناصر مستغرب :ليش شنو صار
تركي :الست رانيا دخلنا غرفتها لقينها غرقانه بدمها
ناصر بقق عيونه :شنو تقول انت وبعدين ليش تضحك
تركي :ياخوي كاهي مثل القرد مافيها شيء نزفت رجليها كان في البيت زجاج مكسر دعست عليه
وصارت تنزف ماقدرت تساعد نفسها واغمى عليها لانها ماكلت شيء من الصبح هذا غير النزيف
ناصر وهو يفصخ ثيابه :يله انا جايكم الحين
تركي عصب :ناصر بلا حركات رانيا مافيها وكلنا جنبها وبعدين انت توك معرس عيب تترك عروستك
ناصر :ياخوك انت متاكد انها بخير
تركي :الحمد لله يله مع السلامه وصاريتكلم مصري (وصباحيه مباركه ياعريس)
ناصر وهو يفكر في رانيا ليش صارفيها كذا :مع السلامه
سكر ناصر الجوال على خروج مها من الحمام (اكرمكم الله )كانت لابسه روب لعند الفخذ ناظرها ناصر مشى جنبها من دون مايكلمها
مها باستغراب :حبيبي اشفيك ماصبحت علي
ناصر كانه صاحي من حلم :صباح الخير حبيبتي اعذريني شفت حلم مزعج
مها وهي تنشف شعرها :الله يكفينا شره الا اقول من كان يكلمك
ناصر ماحب السوال بس ماحب يحرجها :واحد من الربع
مها :لاتعصب حبيبي مايسوى عليك علشان حلم
ناصر ويقلب عيونه من الملل من اسالتها :اوكيه خليني اخذ شاور بعدين نتكلم
دخل ناصر يتروش وماخذ كلام مها في الاعتبار مها حست نفسها ودها تخنقه وهو يتصرف بهالطريقه
ماتصورت انه لهذي الدرجه بارد ولايعرف يتكلم عن الرومنسيه اللي تتمنها مها ..
ناصر وهو تحت الدوش كان يفكر شلون يروح المستشفى عند رانيا من غير ماتعرف مها وخطرت في باله فكره ..
طلع من الحمام مبسوط وصار ينشف شعره وجسمه وطلب من مها تجيب ملابسه واخذها وهو يغني ويناظر مها (الحب خالد وحبي خالد وباقي للي احبه ........................)
مها فرحت لما شافت مزاجه تغير بعد الشور وراح للتلفون وطلب فطور وجلس جنبها وصاريلعب فيي خدودها وشعرها
ناصر :حبيبتي رحلتنا اليوم الساعه 9 باليل تجهزي
مها :على امرك
ناصر :شرايك اوصلك المشغل يسولك مكياج وضبطونك كهديه اول يوم زواج
مها :ماراح تزعل اذا رفضتها
ناصر وحس انه بيعطيها كف :والله ازعل اذا تبيين شيء غيره قولي ؟؟؟؟؟؟؟
مها حست انها حطمته :اوكيه حبيبي الحين نروح
ناصر حس بهالحظه انه بكسر كل شيء قدامه مسك مها من رقبتها وصاريبوس فيها لحد ماحس ان انفاسهم بتنقطع ....
دق الجرس قام ناصر وفتح الباب واخذ الفطور ودخل شقته................
رانيا في المستشفى صحت حست بثقل في رجليها لفت يمين لقت امها نايمه وشافت تركي برى مع الممرضات يسولف معهم
وهم معطينه وجهه لانه وسيم ولفت الناحيه الثانيه لقت ريما تقراء قران طالعت رانيا نفسها شافت الشاش ملتف على رجولها
حست كانها رجول وحش لانهاا صارت كبيره من الضمادات عليها ..
انتبهت نوره لتحركات رانيا فزت من مكانها
نوره بصوت خفيف :الحمد الله على السلامه ليش تسوين بنفسك كذا
رانيا بتعب :الله يسلمك
صحت خديجه ونادت تركي علشان يشوف اخته دخل تركي
خديجه :يابنيتي ليش تسوين بنفسك كذا
تركي :هلا والله تصدقين ورجولك معلقه كانك موكلي
الكل :هههههههههههههههههههههههههه
رانيا :ابي اطلع
تركي :مطوله ياحياتي
رانيا :طيب مقالكم الدكتور متى اطلع
نوره :على شنو مستعجله
دخل الدكتور وطلب منهم يخلونها ترتاح ومافيه داعي انهم يظلون عندها ..
راحوا اهل رانيا يرتاحون بعد سهره يوم كامل من التعب من الزواج الي المستشفى ..
طلبت رانيا من الدكتور ينزل رجلينها على السرير تأثرت بكلام تركي وقعدت وصارت تتسلى بقراءه مطويات وهي تسال نفسها ليش تتعذب
ناصر :يله حبيبتي لما تخلصي دقي علي وانااكون عندك
مها وهي تسكر الباب :اوكيه
حرك ناصر السياره وصار مسرع لدرجه انه يقطع اشارات المرور ومايحترم قوانين المرور
وسمع في الراديو اغنيه عبد المجيد عبدالله واستانس وصار يعلي الصوت وهويغنيها معاه
ياما حاولت الفراق وماقويت كنت ابي انساها لكن مانسيت
ماعصاني قلبي بعمره ولكن الاكيد اللي انا ماشتهيت
دخل ناصرالمستشفى وهو حامل ورد احمر وعلبه جالكسي النوع اللي تحبه رانيا وراح للاستقبال وسال عن غرفتها
رفضوا انهم يخلونه لانهم مو وقت زياره بس كان ناصر يعرف مسؤول في المستشفى قدر انه يساعده ويسمحله .....
دخل ناصر الغرفه اللي كانت رانيا موجوده فيها بس كانت مسنده نفسها على الجنب الثاني ومعطيه الباب ظهرها
حس انها نايمه دخل بهدوء وقفل الباب سمعت رانيا الصوت بس مالتفت تحركت شوي وخاف ناصر في هذي اللحظه انها تلتفت وتسوي شيء ماكان حاسب حسابه
رانيا بتعب :ممكن تساعديني ادخل الحمام
نزعت الشيله وفكت شعرها تجمد ناصر مكانه كان وده يطلع بس ماقدر وصارت رانيا تطلب المساعده تحسب انها الممرضه
قرب ناصر مد ايده يساعدها في هذا الوقت التفت رانيا وانصدمت لما شافت اللي واقف ناصر
رانيا شهقت وحاطه يدها على فمها :نا........ص..ر
ناصر :الحمد الله على السلامه
رانيا وهي تحاول تقوم من على السرير نست ان رجليها ملفوفه بضمادات ماالها اول ولاتالي
رجعت تجلس على السرير وهي مومتقبله انه متزوج
جلست نفسها وغطت راسها ورحبت فيه ماتوقع ناصر فيها هالبرود جلس على كرسي مقابلها
ناصر وهويتنفس بصعوبه : الحمد الله على السلامه
رانيا هي تشوفه مبسوط : الله يسلمك ليش جيت وانت باقي معرس ؟؟؟؟؟؟؟؟
ناصر :ههههههههه تطرديني ........ابد قالي تركي وجيت ازورك واطمن عليك ..........
رانيا بابتسامه :لا ماطردك حياك بس مو حلوه تترك عروستك اول يوم زواج ........
ناصر :لا ماتركتها انا وصلتها للمشغل وانا مريتك
رانيا بعصبيه :ليش ماجات معك .............لاتكون ماتعرف انك عندي؟؟؟!!!
ناصر :لا ماتعرف ولابيها تعرف
رانيا :ليش ؟؟؟؟؟
ناصر :كيفي على فكره جبت لك ورد وشكولاته من اللي تحبينهم واعتبريهم مني ومن مهاوي
رانيا بافتخار تمسك نفسها :اعتبرها وصلت يامهاوي
ناصر بعصبيه على برودها :رانيا ليش تتكلمين بهالطريقه
رانيا :انت توك تتكلم عن (مهاوي )
ناصر :ايه اخليك ترتاحين .... رانيا لو سمحتي لاتقولين لاحد انا جيت هنا انا زرتك وحبيت اتطمن عليك واشوفك بعيوني
رانيا حست بشيء بمعنى الخصوصيه :مشكور وماقصرت .... ناصر لو سمحت ممكن اسئلك سوال محيرني
ناصر وحن لاسمه يسمعه منها :تفضلي
رانيا وخايفه لان الشيء اللي تبي تقوله يتنسى :منو البنت اللي كانت تكلمك لما شفتني هذاك اليوم
ناصر وخاف اكثر :انت شنو ذكرك؟؟؟؟؟ وبعدين هذي سوالف شباب
رانيا بأصرار:انا ماسألتك هذا السؤال الا من خوفي على مها وامانه عليك اتركهم انت متزوج
واذا تغليني مثل اختك اتركهم وعش حياتك ترى مها طيبه وتحبك واستغل طيبتها في خير
ناصر منصدم من الكلام اللي تقوله :رانيا انت تخافين على مها مني ؟؟
مها زوجتي وبعيوني وانتي اخر شخص توقعت يحط في باله هذي الاشياء
رانيا وهي مسويه نفسها صارمه :انا قلتلك وحذرتك وشوف الزياره بتبدى ويشوفك تركي
ناصر بعصبيه :هذا تهديد؟؟...اوكيه مع السلامه
طلع ناصر من الغرفه وهو وده يكسر أي شيء قدامه من العصبيه ودقت مها عليه في هذا الوقت مارد عليها وراح للمشغل اللي كانت فيه
من وقت ماخذها وهو ماتكلم معها بكلمه واحده .. رانيا انهارت من البكاء لما طلع كانت تدوس على قلبها وهي تكلمه بهاذي الطريقه
وتمنى انها ماتشوفه في حياتها وكانت تدعيله يوفقه مع مها ... ودخل تركي ونوره وريما وامهم وقعدوا يسولفون معها
تدري انا وياك قصتنا مثل شمس وقمر ***من اول الوقت حتى اخره مايلتقون
كلن يدور صاحبه حكم القدر *****تشرق تبيه يغرب يبيها
وفي السما يتخالفون تدري معاد اظن **** ان لي معك قسمه وياعزتي كل القدر هو نده وخصمه
قاوم هبوب العاصفه وهدته نسمه **** نسمه رقيقه ظالمه مابقلبها رحمه
|
|
|
|
|