منتديات قصايد ليل - عرض مشاركة واحدة

11-07-2016

الجزء التآسع

دخلت وعد البيت واهي ساندة أمها بإيدها وشهد من وراهم شايلة أغراضهم لين دخلو البيت ودتها لغرفتها وسدحتها على السرير وام وعد تقول : ثانكيو بيبي ..
عاونتها وعد وهي تمد رجولها وبعدها أخذت الأغراض من شهد وشكرتها وفتحت كيس الأدوية الي صرفه لهم من المستشفى وطلّعت علبة الدوا وشافت فيها حبات قليلة تكفي لاسبوع واحد بس !! وبعدها لازم يكون الدوا متواجد !! لازم تدبر طريقة تحصل فيها عليه وقبل الطريقة لازم تدبر المبلغ !!
وعد أخفت الموضوع عن شهد لأنها تدري ان شهد لو درت بتقول لأمها .. وأمها بتدفع من عندها المبلغ الكبير وشهد وأمها ناس على قد حالهم وثروة أبوهم بعد مامات يالله تكفيهم يعيشون فيها باقي العمر الا من راتب شهد البسيط الي تستلمه من الوظيفة !!

عطت أمها الدوا وغطتها وطلعت إهي وشهد برا الغرفة وقعدوا بالصالة ..
شهد والحماس بعيونها : يالله حكيني ياوعد كل ما أسألك تقولي بعدين بعدين خلاص ماعاد فيا صبر !
وعد : اش تبغيني أقولك ياشهد صراحة الانسان هدا غريب ومو قادرة أفهمه !
شهد : ليه اش سوا ؟؟
وعد : هو ماسوا شي .. يتصرف عادي بس مادري ليه يربكني ويخليني أستجيب للي بغاه كني مسحورة !
شهد بانبهار : ايوا إدا كان أنا الي مره وحده شفته خقيت كيف انتي ؟؟؟
وعد : أنا لازم أحاول أبعد عنه مو بصالحي الي يصير !
شهد : ياعبيطة !! أحد يضيّع من إيده واحد زي دا ؟؟ إلا إدا كان تتنازلي لي فيه مومشكلة !
وعد بحمق : شهد !!!!
شهد :هههههههههههههههههه بدينا نغار ؟؟؟
وعد : لاياعمري مو أغار .. بس مابغاك تحسبيني أستغل وضعي وحاجتي باني أتمسك فيه!!
شهد : مو استغلال ياوعد !! سعود باين ان هو متمسك فيك كمان !!
وعد : ولو ياشهد الرجال جاي شغل فترة وحيمشي أتعلّق فيه ليش ؟؟
شهد : طيب يعني اش حاتسوي كيف حتبعدي عنه ؟؟؟
وعد : أسوي الي أسويه بس السؤال لو أنا بعدت هل سعود حيخليني بحالي ويبعد عني؟؟
شهد : انا من راي مح يسيبك بسهولة
وعد : والله ماقول غير يارب اذا رجعت أداوم ألاقيه ترك الفندق وتركني بحالي

(( إتمني لين تشبعين ياوعد .. لأنك ماتدرين ان سعود هالحظة يفكر شلون يقرب منك أكثر!! ))

*****
في بيت أبو تركي وتحديدا في غرفة تركي
تركي متمد على السرير بتعب وعيونه شبه مسكرة وائل قاعد جمبه على السرير يحكيه عن المباراة بكل حماس : ياتركي أنا يوم أشوف كابتن ماجد شلون يشوت الكورة قدامه ويركض وراها وهي ماتروح عنه كنت أحسب هذا كله خرابيط بس بأفلام الكارتون !! بس يوم شفت ميلاني يسويها طارت عيوني !! والله ياتركي يشوتها قدامه ويركض وراها وهي قدامه ماتميل لايمين ولا يسار !! آخ بس لو اني مسجلها عشان أوريك
تركي يجاريه : آخ بس ..
وائل : والا يوم جا يسجل الهدف طار هو والكورة من الملعب !!! وأنا أطالع كل الاعبين بالملعب الا هو طاير لحاله وشاتها بقوة وسجل هدف ماشفت أحلى منه ! آخ بس لو اني مسجلها عشان تشوف
تركي غمض عيونه خلاص : آخ بس ..

انفتح الباب هالحظة ودخلت نهى وشافت وائل وقالت : الأخ هنا ماشاء الله وأنا قاعد أدورك؟؟
تركي : عز الله كملت !! يالله ياوائل انت ونهى على برا خلوني أنام !!
نهى وهي تمشي لهم: اصبر ياتركي لاتنام بقولك شي
تركي : هاه شتبين ؟؟
قعدت نهى بالجهة الثانية وهي تقول : أبي أروح المكتبة محتاجة كراسة رسم ضروري وأطلس وهندسة وتو يوم جيت أقول لابوي لقيته معصب وخفت وطلعت !
تركي : والمطلوب !
نهى : كنت أبي وائل يقوله انه هو محتاج المكتبة وانا اروح معاه .. بس دامك صاحي خلاص اعفينا من هالمهمة الصعبة وانت ودني
وائل : ومن قال اني بقوله اذا انتي تخافين منه أنا بعد أخاف منه ومن السعلوة الي معاه
تركي : حتى انت ياوائل اتعلمت هالحكي ؟؟
وائل : أكيد باتعلم دام كلكم ماتسمونها الا كذا
نهى : اسكت طيب لا تفضحنا (( والتفت لتركي وهي تقول : هاه تركي شقلت ؟؟
تركي : نهى تراك قلق انتي أمس واليوم وكل يوم مبلشتني معاك ! من أمس ترا مانمت ولا ساعه على بعضها !!
نهى : ليه وش الي مسهرك ؟؟
تركي بخاطره " ومن غيرها بنت العم الي ماخلّت فيني شي صاحي " : سهرني الي سهرني شدخلك انتي .. يالله اطلعوا خلوني انام بدون ازعاج واذا صحيت ولقيت نفسي طيب وديتك
وائل : وانا بروح معاكم !
نهى : لا والله ماتروح مدامك عيت تقول لابوي !
وائل : بروح غصب عليك تركي الي بيودينا وهو الي يتحكم مب انتي يالبزر
نهى بسخرية : تكفى يالرجال !! العمر يكبر والعقل يصغر
وائل : والله أزين منك انتي يالي الطول طول نخلة والعقل عقل صخلة

تركي بصراخ : انقلعوا كملوا هواشكم برا !!!!!

نطت نهى بخرعة من صوت تركي وائل ضحك على شكلها وقام .. وعند باب الغرفة دفته ليش يضحك عليها قام دفها وقفوا عند الباب ساعه يتطاقون لين قام عليهم تركي وأول ماشافوه قام من سريره هجوا ..

سكر تركي الباب من وراهم بقوة ورمى نفسه على السرير على بطنه وهو ميت من التعب .. وأول ماجا يغفي دق جواله !!
مسك الجوال بعصبية يبي يسكر بوجه المتصل ويقفل الجوال مره وحده .. لكن شاف خالد المتصل وشوفته لرقم خالد ذكره بصورة عبير الي فيها شبه كبير من خالد !
اتنهد ودار وتمد على ظهره ورد : هلا والله
خالد : تركي وينك ؟؟
تركي : قصدك السلام عليكم
خالد بنبرة ضيق : تركي وينك بالله خلصني !!
لاحظ تركي الضيق بصوت خالد وقال : أنا بالبيت شفيك انت ؟؟
خالد : زين أبي أشوفك اليلة !
تركي : أوكي بس شفيك ياخالد !!
خالد : اذا شفتك بقولك بس قولي متى نتقابل !
تركي : والله انا كنت بنام الحين وعلى المغرب بودي نهى المكتبة .. بس دامك تبينا نتقابل شكلي بقوم أوديها الحين وأجيك على المغرب
خالد : حلو .. خلاص استناك
تركي : أوكي حبيبي سلام
خالد : سلام .. ((وسكر

قام تركي وهو يفرك وجهه بتعب لاقدر ينام ولا يرتاح واهو طبعه طيب وحنون ولايحب يكسر خاطر أحد محتاجه ويبيه ..
قام وأخذله دش سريع وطلع بعدها لبس ثوبه واكتفى بالثوب لاكلّف عمره يلبس لاطاقية ولاشماغ .. تعطر وطلع ..
نزل الدرج وهو ينزل سمع صوت نوال عالي من تحت
نوال : يالله ياكسلان قوم .. اكتب القاعدة هذي 20 مره وهاتها أسمعها لك .. غبي انت ماتفهم الا بهالشكل
نهى : شلون بيفهم وانتي تعصبين عليه
نوال بصراخ : انطمي انتي ولا كلمة !!! والله عيال اخواني من الأوائل يطلعون وانتو أكسل منكم ماشفت .. ايه مالومكم ياعيال امكم !

" أمنا أشرف منك ومن أمثالك ياراس الحية.. وتكرم الحية !! "

التفتوا كلهم للدرج وشافوا تركي نازل والشر يتطاير من عيونه !! هذا الي نقص بعد لا أهل البيت سلم من لسانها ولاحتى أمهم المرحومة !! كان دومه يسمعها تصارخ وتشتم ويتصرف معها بكل روية أو يتجاهلها وهالشي يموتها قهر " الحقران يقطع المصران "
لكن يوم سمع طاري أمه على لسانها فار دمه واتمنى يسمعها كلام ماعمرها سمعته ويكرها عيشتها .. بس أول شي سواه بعد كلمته ..
نزل لنص الصالة وعيونه ثابته عليها وهي رفعت حاجبها وطالعت فيه بكل وقاحة كنها تنتظر فعله !
تركي بحزم : وائل اترك الكتاب وقم البس جزمتك واركب سيارتي .. وانتي يانهى وش ذا الي معك ؟؟؟
نهى كانت معها مجموعة ظروف ورقة كبيرة مكتوب فيها أسامي وقالت : نوال تبيني أكتب أسامي المدعوين لزواج اختها على الظروف !!
تركي : أها ماشاء الله !! زين حبيبتي اتركي الي بايدك وقومي البسي عباتك وعلى سيارتي ..
وائل نط وقام .. ونهى تركت الي بايدها بدون ماتحط عينها بعين نوال وانسحبت والخوف قارصها وطلعت الدرج ..
مشى تركي لين الظروف وشالها وشق ها واهو يقول : أول شي اختي مهي عبدة عندك تستغلينها بالي تبين .. وقبل ماتكلمين الحين وتقولين اسطوانتك المعتادة انا بحسبة أمها .. خليك بحسبة امها فعلا حتى بالزين والطيبة !! مو بس بالأوامر والاستعباد !!!
ورمى قصاصات الظروف على الطاولة واهو يقول بنظرة صارمة : ثاني شي لو سمحتي اخوي انتي مو مسؤولة عنه !! عنده اختبار يروح لمنال ولا لنهى ولا لي أنا بعد .. عساه لايطلع على واحد من عيال اخوانك السرابيت !

نوال كانت أعصابها ثايرة على الآخر لكن ماقدرت ترد لأنها لو ردت كل شي بينقلب عليها عاد إلا تركي مستحيل بتطلعه كذاب قدام أبوه لأن أبوه مايشوف منه أي غلط ولا له مصلحة أساسا انه يتلابش معها !! فطالعت فيه بنظرة مقيته تحمل كل الغضب الي بداخلها ونزلت نهى هالوقت ومشت اهي وتركي تاركين نوال يغلي دمها !!

::

دارت نهى بين الرفوف تدور الأغراض الي تبيها وائل ماقصر بعد تنقى أشياء عجبته ..
تركي : نهى مطولة ؟؟؟
نهى : شوي ياتركي قاعدة أدور هندسة زينة ..
تركي : اوكي انا بروح أشوف قسم الكتب وانتي خلي عينك على وائل
نهى : أوكي

ومشى تركي لقسم الكتب واتجه ناحية كتب التكنلوجيا وجلس يطالعها وسحب أحد الكتب يشوفه .. وهو مندمج بالتصفح ماسمع الا صوت من وراه :
حيا الله أبو فهد !!
التفت تركي ولقى صديقه ناصر وراه ..
تركي صك الكتاب وهو يقول بابتسامة :هلا ناصر حياك .. شلونك ؟ (( وسلم عليه ..
ناصر : بخير الحمدلله انت شخبارك وين الدنيابك ؟
تركي : عايشين اللهم لك الحمد .. انت الي وينك من فترة لاعاد تطلع معنا ولانشوفك
ناصر : والله الايام الي فات منشغل مع الاهل سافر السواق وبلشت فيهم.. ودنا جيبلنا حطلنا
تركي : مشي حالك هذاني أمس واليوم ماغير أودي واجيب باخواني

أقبل عليهم هالحظة شخص من شافه ناصر قال : تعال يابدر أعرفك على رفيق البحر والصيد
ابتسم تركي وبدر بادله الابتسامة وتصافحوا وبدريقول : هلا اخوي كيف الحال
تركي : بخير نحمد الله انت شلونك ؟
بدر : الحمدلله ..
ناصر : هذا بدر زميلي ياتركي الي اقولك من ايام الجامعة واهو لازق فيني ..
تركي : هههههههه لازق فيك انت عاد ؟ .. مشكلة الحلى !
بدر : خله يولّي زين .. ماتعرفنا عليك
تركي بابتسامة : تركي الغفيل
انصدم بدر من القب لكن ماظهرت معالم الصدمة عليه أبد وقال بثقة : والنعم
تركي : ماعليك زود ..
ودارت بينهم أسئلة متعارفة عن الشغل وهالأمور لين جا وائل يقول لتركي خلصوا .. واستأذن منهم تركي وراح يشوف اخوانه