الجزء الحادي عشر

نزلت مرام من الجهة الثانية وراها نهى الي قارص قلبها الخوف !! هم يمكن يقدرون يخبون بس هي ماتقدر تخبي عن منال وماتدري وش ردة فعل اختها لو درت .. يمكن تسكت .. يمكن تعلم أبوها !! ومن طرا على بالها أبوها طاح قلبها من الخوف !!

مشوا متجهين للخيام وقبل لايدخلون سمعوا صوت من وراهم يصرخ : نهى !
والتفتوا وشافوا أبو تركي وراهم !

مرام تمسكت باب الخيمة بقوة ودخلت .. ونهى قالت والخوف ذابحها : ياويلي ابوي ! فتون تعالي معاي !
فتون : طيب بجي بس انتي ليش خايفة ؟؟
نهى وهي شوي وتبكي : يعني ماتعرفين ابوي أكيد سأل عني ومالقاني وشافني اتأخرت وبيوريني شغلي
فتون وهي تمشي معها : انتي خليك ساكته وانا بحاول ارد على أسئلته
نهى : ياويلي شوفي شلون يطالعنا

وصلوا لعنده وفتون الي بدت بابتسامة وترحيب : هلا والله عمي (( وسلمت عليه وعمها يقول : هلا يبه شلونك ؟؟
فتون : بخير الحمدلله انت شلونك ؟؟؟؟
ابو تركي : نحمده ونشكره (( والتفت لنهى وقال بصرامة : وين كنتي ؟؟
بلعت نهى ريقها واهي تطالع فتون الا فتون قالت وهي تفتعل الضحك : تصدّق ياعمي مادرينا ان الخيام مركبين فيها حتى الحمامات !! وساره بنت خالتي صاحت علينا تبي الحمام ورحت انا ونهى ندورلها مكان ساعه مالقينا الا دقت علي امي وقالتلنا الخيام بها حمامات ورجعنا !
العم مشت عليه لأن فتون أتقنت التمثيل واهي تحكي بصدق وقال : يبه هالخيام كل الي تبون موجود فيها كنكم بيتكم ! مايحتاج تبعدون بالله وتشغلونا عليكم ترا المنطقة مو أمان !
فتون : صادق عمي بس حنا نسينا نسأل قبل مانروح هههههه
ابو تركي : خلاص انتبهوا على أنفسكم
فتون : ابشر
ابو تركي يطالع نهى : حطي عينك على اخوك
نهى بخوف : ابشر يبه ابشر

ومشى ابو تركي عنهم ونهى قالت : تسلمين يا أحلى بنت عم والله لو كنت لحالي كان بكيت عنده وماعرفت وش اقول
فتون : خبلة انتي على قد ما أربي فيك ماتعلمتي كل رجتك وهبالك ماتفيدك لحظة الضعف بشي !
نهى باستياء : اي والله يافتون انا بسرعه أضعف ويبان على وجهي وأنفضح !
فتون : ههههههههه خبله .. امشي نرجع بموت من الحر

ومشوا راجعين الا طلعت عليهم مصيبة ثانية !! طلعت من الخيمة منال والشرار يتطاير من عينها هي بعد !
ونفس السؤال لكن بصراخ : وين كنتي ؟؟؟؟
نهى بغباء : أكلم أبوي !
منال : قبل أبوي ؟؟؟ وين رحتي وأبعدتي !

فتون : منال بشويش ليه تصارخين؟؟

منال : مو شغلك الظاهر انا قاعدة أتكلم مع اختي !
فتون : حتى ولو مايسوى على اختك كل هالصراخ
منال طنشتها وعادت تسأل نهى : وين رحتي يانهى ؟؟؟
نهى والعبرة خانقتها : رحنا نتمشى يامنال !!
منال : ولوين وصلتوا ؟ وليه العيال لحقوكم !
نهى : شدراك ؟
منال : تدرين اختك مايخفى عليها شي !

فتون بقهر : يامنال انتي شفيك صايرة ألعن من عماتي ؟؟؟ اي رحنا ومشينا وأبعدنا واتسلقنا جبل وطلعلنا رجال يخرّع ودقينا على اخوي يجينا .. ويوم جا فهمه الرجال ان المنطقة خطرة وبها حيوانات وبس أخذنا بعضنا وركبنا السيارة ورجعنا !
منال بوسع عيونها : كل هذا صار واحنا تونا جاين ؟؟؟؟؟؟
فتون : ماصار شي الحمدلله شوفينا سالمين قدامك !
منال : هذا أولها بس وياعالم وش ناوية عليه انتي آخرتها !
فتون : هي انتي أصغر عيالك أنا تكلميني بهالطريقة ؟؟؟
منال : اي عشان أأدبك !!
فتون : مسكينه انتي اختك ويالله تسلم منك شعليك مني ؟؟؟
منال : لأنك جرارة !!!!
فتون بانفعال : احترمي نفسك لو سمحتي !!
منال : محترمة نفسي قبل ماشوف وجهك !
فتون : مره باين الاحترام !! والله مالوم نوالوه بالي تسويه فيك ماغير اختك المسكينة الي ظايعة بينكم
منال بصراخ : انطمي ولا كلمة!!
فتون : لا حبيبتي مو انتي الي تسكتيني ولاعاش منهو يسكتني

نهى وهي تبكي جمبها : خلاص تكفون خلاص
منال : تسوين البلاوي وتقولين خلاص

فتون : اختك ماسوت ولا شي ولا غلطت ولا بشي بس انتي الي معقدة الله يشفيك !!
ومشت عنهم لداخل الخيمة

منال بعصبية : شوفي لو شفتك قاعدة معها قسم بالله لأعلم أبوي بكل شي !!
نهى برجاء : منال احنا جاين نبسط مو نتنكد !
منال : والبسطة ماتصير الي مع هالحيوانة !!
نهى : كلهم يقعدون معها حتى بشاير وجدان وش تبيني اسوي !!
منال : ماتقعدين معها وبس !!
وراحت عنها ونهى انقهرت بشكل فظيع !! اهي جاية تستانس مو تتنكد بهالشكل !! ومنال ماتبيعها تقعد مع فتون انتقام شخصي من الي صار تو !! مشت وهي تضرب الأرض برجلها ماتدري شلون بتمر هاليومين !!

::

على الغداء
عجزت منال تبلع القمة واهي مقهورة وجهها مبين فيه القهر والي قاهرها أكثر ان فتون صوت ضحكها وهبالها راج الخيمة ماكأن صار بينهم شي .. !

تغدوا وخلصوا وبعد الغدا وقفت وجدان وقالت واهي تطالع بالسفرة : مافي بيبسي ؟؟؟
أم وجدان : الا فيه عند الرجال ؟؟
حطت وجدان إيدها على خصرها واهي تقول : وحنا مالنا رب ؟؟؟
أم وجدان : خلاص وجدان مب لازم هالبيبسي !
وجدان : الا والله عطشانة وأبي بيبسي مابي موية !
فتون واهي تاكل تفاحة : بعدين جايبين الغدا ذبايح شي يتك على المعدة لازم مهضمات !!
أم سعود : خلاص اذا تبون اطلبوا على عددكم مانبي البزران يشوفونه ويبلشونا
وجدان : أوكي مين يبي ؟؟
أصوات متفرقة " أنا .. أنا .. أنا .. أنا .. "
حسبتهم وجدان وطلعت برا الخيمة تبي ترسل أحد العيال .. لكن لمحت من بعيد تركي واهو واقف عند المطاور يزينه عشان يشتغل اذا غابت الشمس ..

مشت وجدان كم خطوة واهي تناديه : تركي
التفت تركي للصوت وشافها وعرفها وقال : هلا جوجو !
وجدان بحيا : هلابك .. تركي حنا البنات نبي باسي !
تركي : ماعندكم ؟؟؟
وجدان : لا قالوا مايبون البزران يشوفونه ومايتغدون عشان كذا نبي بالعدد
تركي : أها كم واحد !
وجدان : بس 8
تركي وهو يضحك : بس ؟؟ ليه ماكثرتي !
وجدان : ههههه لا خلاص بس ذولا كفاية
تركي : يالله الحين أجيبها
وجدان : أستناك

تركي محتك بعمته أكثر وحد بالعايلة وأبو تركي يعز اخته ام وجدان حيل .. وبناتها وجدان وبشاير صديقات نهى بالمره .. والظريف بالموضوع ان تركي يحسبهم بنفس عمر نهى 14 سنة .. لذلك يعاملهم كنهم .. " أخواته الصغار " !

طلعت عبير تبي تغسل بعد الغدا وشافت وجدان واقفة وابتسمت لها واهي تمشي للحما وماتدري وش سبب وقوفها .. دخلت وغسلت وضبطت نفسها وعدلت طرحتها وطلعت وشافت وجدان بنفس مكانها .. نادتها عبير واضطرت وجدان تجيها وقالت : انتوا بتباتون هنا ؟؟
وجدان : والله مادري عن أبوي قال بنشوف لليل ونقر .. وانتوا ؟؟
عبير بتكشيرة : اي ياحظي .. وصراحة مادري شلون بنام !!
وجدان : لا شكل السر هنا نظيفة ومرتبه ومامنها خوف
عبير : حتى ولو ماقدر أخاف .. شكلي بنام بالسيارة
وجدان : ههههههههههههه والله فكرة

جا وائل يركض لهم وهو يقول : وجدان كلمي تركي !
عبير نغزها قلبها وانقلب وجهها !! تركي يبي وجدان ؟؟؟
وجدان : روح ياوائل جيب الباسي من عنده ..

راح وائل وبعد ثواني رجع واهو يقول : يقولك تعالي انتي خذيها
وجدان ضحكت بفرح حسبت انه كل هذا عشان يشوفها وعبير ولعت من الغيرة !!

مشت وجدان وعبير ماقدرت تقاوم ومشت وراها .. كنها تبي تاخذ شي من الخيمة الثانية .. والتفت وشافت تركي واهو مبتسم ويعطي وجدان الباسي ويقول كلام ما قدرت تسمعه!!

تركي : مالقيتي الا أخوي أعطيه والله ان يعطيكم العلب فاضية
وجدان : هههههه مشكور تركي تعبناك
تركي وهو يرجع بخطوة على ورى : العفو بس هالمرة وآخر مره .. واسمعي وجدان اسألي الأهل كلهم ان كان يبون شي يجيبه عمي صالح معاه !
وجدان : هو ماجا ؟؟؟؟؟؟
تركي : لا انشغل شوي وبيجي باليل ويسأل ان كان ناقص شي يجيبه
وجدان : خلاص باسأل الحريم وأقولك
تركي : شالي تقوليلي ؟ شوفي اذا ناقص شي دقي على خالك على طول

ضحكت وجدان بحرج .. لكن تركي ماكان يطالعها هالحظة .. كان يطالع بالي وراها وشافت وجهه متغير وشبه ابتسامة مرسومة على فمه.. التفت ومالقت أثر لأحد !!
عبير من شافته رفع عينه لها ماتحملت تشوفه واقف مع وجدان ويضحك وسحبت نفسها واهي مجروحة !

رجع تركي واهو مستغرب شفيها حتى ولا رمت سلام من بعيد !! آه ياعبير انتي أي نوع من البنات ؟؟ أحسك بعيدة وقريبة بنفس الوقت .. مرات أحسك أقربلي من أنفاسي .. ومرات أحسك بعيدة بعد القمر .. أشوفك وأشوف حلاك وأتمناك وماقدر أحصلك !