قصة عجوز العن من ابليس


في عجوز قاعده بروحها و فجئة طلع لها إبليس ,

قال لها إبليس : إنتِ يا عجوز تعتبرين نفسك داهية ؟
العجوز : إيه داهية , و النساء كيدهن عظيم
إبليس: أنا اتحداك , و بنشوف مين كيده أعظم المرأة و إلا إبليس
العجوز : خلاص أنا بسوي مشكله و أنت راح تحلها و إذا ما قدرت أنا أحلها و أفوز
إبليس : خلاص موافق
راحت العجوز حق الاولاد اللي ما عندهم شغل و ياكثرهم في الشوارع

و قالت أنا بشغلك عندي فترة معينة بس , إذا تبي فلوس لا تتدخل و لا تتكلم
وافق الشاب لأنه طفش من البطالة و يبي فلوس

راحت العجوز و معاها الشاب لمحل قماش و قالت له انتظرني عند باب المحل و خذت قماش غالي ور احت تكاسر تاجر القماش
العجوز : رخص يابن الحلال
التاجر: إذا انتِ ما عندك فلوس اخذي شيء ارخص
العجوز: ما اقدر لازم انا ابي ذا القماااش و إلا يصير شي ماصار
التاجر: ليش ؟ الى هالدرجه ؟ ايش السالفه ؟
العجوز : شفت الولد اللي واقف عند باب المحل هذا ولدي يحب له وحده متزوجه و هي تحبه و لما تتطلق من زوجها

ولدي بيتزوجها وانا ماعندي فلوس والى اشتريلة ذا القماش وهو قال لي ان عارضتي الزواج بطردك من البيت وأ مرني اني اشتري له قماش غالي

عشان يعطيها حبيبته و لا راح يطردني من البيت مع ان البيت في الاساس بيتي و لكني غلطت و كتبته باسمه (العجوز تبكي)
التاجر: خلاص هونيها و تهون والله كسرتي خاطري خلاص انا باعطيك القماش ببلاش و عسى ربي يأجرني فيك

العجوز طلعت مستانسه و قالت للشاب روح البيت
بعدها راحت العجوز الى بيت زوجة التاجر و طقت الباب و طلعت الزوجة
العجوز : آآآه يا بنيتي أنا تعبت بالطريق و ما أقدر أكمل ممكن أقعد عندك أرتاح خمس دقايق
رحبت الزوجة و دخلتها و أكرمتها و جابت لها شاي
العجوز : مشكورة ما تقصرين إن شاء الله اردها لك (تعمدت تنسى القماش و طلعت)
الزوجة : حرام نست قطعة القماش أكيد بترجع بعد شوي و تاخذها بروح أحطها بالدولاب
تاجر القماش رد لبيته و تغدى ذاك الغدا السنع ونام شوي

قام العصر و فتح الدولاب يغير ملابسه عشان يروح محله

تفاجئ بقطعة القماش الى العجوز اخذتها من عنده و عرف ان المرأة اللي يبيها ولد العجوز هي زوجته

يعني تخونه قام عليها و طقها و طردها بالشارع بالهدوم اللي عليها
العجوز كانت تنتظر بآخر الشارع فراحت لها تركض
العجوز : وش فيك يا بنيتي ليش تبكين ؟ >>
الزوجة : زوجي طردني و ما عطاني فرصة أتكلم
العجوز : خلاص أنا بوديك بيتي و بروح أحل المشكلة

راحت العجوز لبيتها و دخلت الزوجه في غرفه و الشاب في غرفة ثانيه و قالت له مايطلع منها
راحت العجوز تبكي عند الشرطة و تقول: كنت قاعده في بيتي

و فجئة دخل علي رجال سكران و معه امرأة و قعدوا في بيتي حاولت أطلعهم ما قدرت
راحت الشرطة و مسكت الشاب و الزوجه و قطوهم بالسجن
العجوز: ها ايش رايك يا إبليس دورك الحين حل المشكلة
إبليس: لا لا ما اقدر أحلها السالفة تشربكت مرة
العجوز : انا راح احلها و كأن شيئاً لم يكن
راحت العجوز تزور الزوجة بالسجن

و قالت لها : انت ساعدتيني مره و انا الحين راح اساعدك

يالله البسي عبايتي و غطي نفسك و اطلعي من السجن كأنك انا و انا بقعد مكانك
الزوجة : مشكورة لكن انتي ؟
العجوز : مالك شغل مثل ما طلعتك بطلع نفسي
تمت عملية الهروب بنجاح
نادا الحاكم الحارس وقال له يجيب المسجونين عشان يحكم عليهم
حضرت العجوز و الشاب و قال لهم الحاكم : ليش ماسكينكم وش مسوين ؟
ردت العجوز : نحن ما سوينا شي كنا قاعدين ببيتنا انا و ولدي و إلا الشرطة طابه علينا و ماخذينا الى السجن
زعل الحاكم و هزأ الشرطة و ما عطاهم فرصة يتكلمون
طلعت العجوز من عند الحاكم مستانسة و عطت الشاب فلوس و انتهت خدمته من عندها
راحت العجوز الى تاجر القماش و قالت له إنها تعبت بالطريق و ان زوجته أصيله و أكرمتها و هي من كثر التعب نسيت قطعة القماش عندها و ان زوجته بريئة و قالت خذ قماشك لأن ولدي سافر هو وزوجته الجديدة
رجع التاجر زوجته و تأسف منها و أرضاها
وقالت العجوز: وش رايك يا إبليس أنا فككت السالفة وكسبت الرهان
قال ابليس : اعوذ بالله ان كيدهن عظيم تحياتي ولا تنسون ردوووودكم