اي وعيونچ اشتاگيت لعيونچ
يمدري شلونها دنياي من دونچ
صح من الشبه نلگه اربعين اوجوه
ولكن اربعينچ ما يشبهونچ
كلّت خدي دمعتي وذيچ المتانات
وكلّت چفي صفنتي شلون ماعونچ
مو مثلچ بصبري متوني صارن عود
وانتي الدنيا كلها اتحط عله متونچ
اي والعافيه الراحت غفل وياچ
اي والضحكه ذيچ ولمعة سنونچ
هوه ماريد اريد شلونك تگولين
وارد اعليچ اگلچ انتيّ شلونچ
انه لوني ذبل من يوم طيفچ شال
من سبلتي اديچ وغمضت اعيونچ
يالما خنتي نسمه ابحر هذاك الصيف
وسفه والف وسفه العافيه اتخونچ