في بيت ابو طارق
ام طارق : بعد ما اتصلت فيني ام فهد على اساس انهم اليوم بيجون من دبي عشان يكونوا هنا يحضرون عرس ثريا خبرتهم ان زواجه ثريا تكنسلت
ام فهد : خير عسى ما شر؟؟
ام طارق : شو اقولج يا ام فهد بروحي مب مستوعبة اللي يصير لكن اقول قدر ربج والحمد لله على كل حال
ام فهد : ما حبيت اضغط عليها وقلت لها يالله ربج يقدم اللي فيه الخير وبصراحة حسيت بغميضة على ثريا حليلها اللي ما كان باقي على عرسها غير ثلاث ايام
في دبي
حور : طبعا عرفت خبر تكنسلة زواجه ثريا من عمتي وطلعت وخبرت بدرية اللي كانت راقده
بدرية : رغم اني كنت في حلاة نومي إلا ان الخبر ازعجني لدرجة ا ني نشيت مفزوعة
حور : انا بروحي ضايق خاطري على ثريا حليلها المهم بدرية انا بنزل ايلس مع عمتي حليلها تحاتي ثريا
بدرية : نزين الغالية
اتصل مايد في ها الحزة ردت عليه بدرية
مايد : فديت اللي صاحين من الرقاد
بدرية : هلا مايد
مايد : لا والله هلا مايداسمعيني انا ما احب ها البرود احب بدرية المينونه بعواطفها بس مب بشئ ثاني ما فينا على الينون تره هههههههه
بدرية : صج انك فاضي
مايد : لا والله مشغول اليوم يايبن يركبون المطبخ في البيت ومشغول معاهم بس قلت اخبرج .
بدرية : نزين
مايد : بلاج شو فيج ماده البوز؟؟
بدرية : زواجه ثريا ومازن تكنسلت
مايد : شووووووو؟؟
بدرية : تكنسلت خلاص اماية توها رمست خالتي وقالت لها انهم كنسلوها
مايد : شو اقولج يا بدرية صج الموضوع يضايق لكن هذا امر ربج والانسان ما يقدر يعترض على قضائه
عوض : هلا بو الشباب او ركبوا المطبخ بصراحة كشخة
مايد : لحظة بدرية هلا عوض
عوض : او خلاص ما باقي شئ على البيت بصراحة بيتك كشخة مايد
مايد : مشكور المهم طالع انت بقية البيت وانا برمس بدرية وبيك
بدرية : منو هذا عوض؟؟
مايد : هيه
بدرية : نزين برايك سير شوفه وانا بسير اشوف اماية وبحاول اتصل بثريا واشوف علومها اكيد انها محتاجة لي الحين
مايد : نزين الغالية وطمنيني
بدرية : ان شاء الله ونزلت بعد ما صليت العصر وسلمت على اماية ويلست عندها وعند ابوي
عزه : يا ربي شو هاه ليش مخططي فشل الحين كيف بشوف طارق ؟( صج كلا يغني على ليلاه )
في بيت مايد اليديد
عوض : بصراحة البيت كشخة وتراه طقم ميلس الريايل هدية مني لك
مايد : ما تقصر فيك الخير
عوض : لا حول ولا قوة إلا بالله ليش متي صار ها الشئ كان طيب بس الله يرحمة اذكر ربك يا خوي شو فيك ؟؟
مايد : ثريا فسخت خطبتها اليوم
عوض : ما اقول لكم شو الاحساس اللي حسيته نشيت من على الكرسي اللي كنت يالس عليه واحلى بوسة على خد مايد وما ادري شو كيف اتصرف احس اني بتخبل عقب انتبهت قلت له شو قلت ثريا فجت خطبتها؟؟
مايد : ايه ايه انت بلاك شو عندك محتشر ؟؟
عوض : اول قولي اللى قلته صح؟؟
مايد : هيه صج لكن انت اش لك دخل شو سالفتك ؟؟
عوض : آه يا قلبي شو اقولج يا ميود اقولك انا بسير عنك يالله من رخصتك
مايد : لا والله تسير عني اقول بلاك انت شو سالفتك؟؟
عوض : كملت مشئ لباب الصالة عشان اظهر ووقفت على باب الصالة وقلت له (( أحب))
مايد : بلاه هذا اونه احب وطلع والحين فهمت السالفة طلعت وراه لقيته مشغل سيارته وظاهر من باب الحوي هيه يعني هذاك الخبال لانه يحب نزين ليش انا ما كنت خبل شراته ههههههه اوني ما كنت خبل إلا خبل ونص واتصلت عليه
عوض : شو فهمت الحين؟؟
مايد : وله طبيت يا حبيبي وما حد سمى عليك
عوض : بصراحة من أول يوم شفت فيه ثريا حسيت انها خذت قلبي صرت ما اشوف غيرها ولا اتخيل غيرها
مايد : لا انت حالتك صعبة ما شئ حل غير اني اخبر بدرية الحين
عوض : بذبحك
مايد : واي يمه خفت اقولك اقلب ويهك خلي التصرف لي انا وله تبي البنت تضيع من ايدك؟
عوض : لا الشيمة كله ولا تضيع من ايدي
مايد : عيل خليني اشوف بدرية وعقب برد عليك
عوض : الوقت مب مناسب خليها ليوم ثاني
مايد : نزين بلاك انا ما قلت لك بقول للبنت بس بشوف بدرية شو رايها
عوض : يوم تخلص طمني
مايد : تم يالله اقلب ويهك وفعلا بعد ما قلب عوض ويه اتصلت على بدرية بس الدبه ما ترد وتذكرت انها قالت لي انها بتسير تيلس مع امها عشان جي اتصلت علي بيتهم ورد علي قمر بيتهم ميود الصغير طبعا الوقت مب مناسب لسوالف يهالوه ههههه لكن من يقول لازم احشر ميود الصغير واطفره عقب قلت له عطيني عمتك بدرية
مايد ولد فهد : عمووووه عمي مايد يباج على التلفون
بدرية : أي تلفون حبيبي؟؟
مايد : تلفون البيت
بدرية : نزين يب التلفون وعطاني مايد التلفون هلا والله بميود هاه ؟؟
مايد : شو ميود هاي بعد اقولج انتي الحين يالسة مع اهلج عيب عليج قولي مايد عشان عقب تخيلى عموه وله عمي يقولون لي ميود ههههههه (يالله اني ما اروم شوي ارمس بجد كله لازم الضحك يخرب علي)
بدرية : نزين مايد خير شو عندك
مايد : بسم الله ينيه كيف عرفتي اني اباج في موضوع
بدرية : لاني اعرفك ما بتحتشر وتدق على البيت إلا عندك شئ
مايد : نزين قومي نشئ طلعي الغرفة رمسيني ما ينفع ترمسين قدامهم
بدرية : نزين عطني خمس دقايق وانا بتصل عليك
مايد : وفرتي هههههههه انزين انزين بس لو تأخرتي اكثر من خمس دقايق بتصل
بدرية : الله يعين العيال كيف بيظهرون دام ابوهم جي
مايد : بيطلعوا دمهم خفيف بس من خفة دمهم بتشوفيهم طايرين ههههه بس زخيهم من السماء ههههههه
بدرية : صج ما كان لي بارض اضحك بس ها الريال حد يروم يرمسة وما يضحك المهم طلعت غرفتي واتصلت عليه هاه استاذ مايد اشعندك؟؟
مايد : اتصلتي بثريا ؟
بدرية : هيه اتصلت ونفسيتها الحمد لله اوكى
مايد : احم عيل بقولج الموضوع
بدرية : قول يا مايد تراك عورت لي قلبي
مايد : الله يسلمج ويطول بعمرج عوض متولع بثريا من هذاك اليوم اللي شافها في المستشفي وانا اشوف اخوي متخبل اثاري الحب لاعب فيه لعبة ويوم عرف انها فسخت خطبتها قام يناجز وحتى انه باسني وترسني تفال هههه المهم في الحلقة الاخيرة طلع الحبيب يحبها ويبيها على سنه الله ورسوله
بدرية : تفاجأت باللي يقوله وقلت له عوض؟؟ بصراحة ما كنت متخيله ان عوض يعرس لاني اللي اعرفه انه شايل ها الفكره من راسة وان عموه عيزت تقنعة لكن اثاري ثريا تأثيرها كبير سبحان الله وفرحتي كانت كبيرة بس بعد ما يصير اني ارمسها في الموضوع الحين وهي توها فاسخة خطبتها
مايد : المهم هذا اللي صار وانتي شوفي متي الوقت المناسب ورمسيها
بدرية : هي بتسافر ها الايام لحد ما يهدا الوضع شوي ويخلص فيصل معرس وعقب ما ترجع برمسها
مايد : ما ادري عنج لو اني انا اشوف انج تخبريها الحين قبل لا تسافر وفي فترة بعدها تفكر في موضوع عوض وعقب قلت لبدرية هذا عوض يدق ههههههه حليله متخبل
بدرية : حليله خلاص بشوف ثريا انا وبرد عليك بس طبعا مب اليوم
مايد : خلاص الدبه بخليج الحين وبرمس عوض ادري فيه بيتخبل
في العين
في بيت ابو حسين
فيصل : خبرت عمتي وعمي بأن زواجه مازن وثريا تكنسلت وان العرس بيكون بس عرسي انا وخلود
خلود : انا ما نزلت ايلس مع فيصل اللي كان يالس مع اهلى في الميلس احس اني ما اقدر اطالع في عيونه ولا اشوفه وبصراحة تراه فيصل خبرني الموضوع البارحة بالتلفون.
حسين : انا كنت في غرفتي وما ادري عن شئ إلا ان اماية بعد ما ظهر فيصل عنهم طلعت وخبرتني الموضوع واتصلت في مازن وتخبرته قالي ان الكلام اللي سمعه صح وان هذا مفروض يكون من زمان بس يمكن اللي غامضنه هي ثريا حرام ظلمها لكن الحين ينكشف الموضوع ولا عقب الزواج .
في بيت أبو مازن
بو مازن : الحين احس شوي براحة الضمير وبصراحة مازن ولدي الكبير ودائما كنت اشوف نفسي فيه بس ما يهون علي انه ينحرم من البنت اللي حبها واتمني الريم بعد تحبه مثل ما كان هو يحبها .
مزنه : انا اخر من يعلم في البيت اللي يصير وما عندي خبر بالانقلاب اللى صاير وتوني راجعة من الصالون مسوية بروفها للمكياج والتسريحة وعاد سمعت اماية وابوي وخالي يرمسون عن الموضوع
قيس : انا من يوم دريت بالموضوع اتصلت على الريم وقلت لها انا كنت عارف الموضوع من زمان وكنت احاول اساعدكم لكن الظروف هي اللي ساعدتني وسبحان الله دخلت استخدم كمبيوتر مازن وخربته وطلبت من طارق يصلح الكمبيوتر عشان يكتشف السر .
الريم : يعني الحين الكل صار يعرف الموضوع احس اني متفشلة
قيس : لا تتفشلين ولا شئ بس قولي موافقة لمه خالي يسألج عن رايج في خطبة مازن لج
الريم : شوووو؟؟ مازن خطبني؟؟
قيس : هيه البارحة ابوي خطبج لمازن
الريم : يعني ابوي بعد يعرف الموضوع؟
قيس : لا خالي ما يعرف .
الريم : ما ادري شو اقولك
قيس : انا اقولج هاي فرصتج وفرصة مازن لو كنتي تحبينه مثل ما يحبج لا تضيعة من ايدج تراه مازن ما بتحصلين مثلة
الريم : اعرف
قيس : عيل يوم تعرفين يالله نبي نسمع خبر حلو سمعتي؟؟
الريم : ان شاء الله
في بوظبي
مازن : كنت طبعا في بيت سعيد ربيعي واتصلت اماية فيني وخبرتني ان ابوي خطب لي الريم من خالي قلت لسعيد تعرف اني احس اني في حلم
سعيد : لا انت مب في حلم ربك كان عارف بنية قلبك يا الغالي وكنت مستانس لربيعي واخوي مازن
روان : باباه باباه ماما تباك
مازن : سير طالع المدام ههههه وخلي ها الشيخة عندي تعالي رونه ويلست اللعب معاها
سعيد : ما فينا على وزارة الداخلية بسير اشوفها وبرجع لك
مازن : سير ابوي ما حد زاخنك
في بيت ابو طارق
ثريا : احس بعدم اتزان واحس اني خاطري انفجر من البكاء خاصة اني اطالع الاغراض اللي اشتريتهم وان لو حد قالي ان اللي يصير معاي الحين من قبل كنت ما صدقته لكني الحين اعيشة ويالله كم هو صعب اني اتقبل ها الوضع لكن احسن اني اتقبله الحين ..
ام طارق : ادري ان اللي فيه بنتي صعب عشان جي حاولت اكون قريبة منها واقول لها حمدي ربج يا بنتي على كل حال والحمد لله لقيت ان بنتي فعلا مؤمنه بقضاء ربها وها الشئ اسعدني وايد .
طارق : انا ما اعرف احيانا احس بالذنب لاني من فجرت سالفة مازن لكن لو ما كنت فجرتها الحين كانت حياة اختي بتدمر حاولت اعتذر لثريا لكنها فاجأتني بقوتها الظاهرة لكني اعرف اختي من الداخل اكيد انها مجروحة خاصة ان الكل الحين يعرف ان مازن يحب الريم
في بيت ام علي
طبعا بو علي ما قدر يجي بيتهم لكنه اتصل في علي وخبره يخبر اخته ان مازن خطبها ويتخبرها عن رايها ويرد عليه وطبعا علي بدوره خبر الريم .
الريم : خليني افكر (ادري الموضوع مب محتاج تفكير بس على الاقل ارتب افكاري وارتب نفسي وان شاء الله ردي بيكون في الوقت المناسب وطبعا فيه اتصال لازم اجرية قبل لا اقول كلمتي)
يوم الخميس
يوم عرس فيصل وخلود
طبعا بعض المعازيم عرفوا ان زواجه مازن تكنسلت لكن بعضهم عرفوا بس يوم العرس بعد ما اعتقدوا انهم بيشوفون كوشتين إلا انهم شافوا كوشة وحده بس .
في خيمة الريايل
الكل كان مستانس وفرحان واللى يمكن تحسبون ان طارق وابوه ما راح يكونوا موجودين إلا انهم كانوا موجودين وابو فهد ومايد الصغير بعد كانوا موجودين عاد ما يال قيس صج انه تخبل وشل معاه مايد الصغير وتم يول هو وياه وحتى انهم غصبوا على بومازن انه يول
مازن : سبحان الله اليوم كان مفروض يكون عرسي عقب قلت ليش انا اقلب المواجع خليني استانس لفيصل وتميت واقف معاه احس انه مرتبك
سعيد : انا بعد يلت وكنت مستانس وايد .
في خيمة الحريم
مزنه والريم وحرمة سعيد واقفات يستقبلن الحريم وام مازن وام علي حليلهن بعد مرتبشات يطالعن كل الطاولات نزلوا فيهن العشى ويتأكدن من كل شئ ..
ام حسين : كانت يالسة على طاولة وتحاتي حسين اللي في البيت ما قدر انه يحضر عرس اخته وما قدرت تمنع دموعها انها تنزل .
ام طارق وام فهد وحور وام مازن استانست يوم شافتهن لانها كانت خايفة انها ما تي ام طارق هي تدري ان الموقف صعب لكن هذا قدر رب العالمين عشان جي كانت ام مازن بين فترة وفترة تي تيلس معاهن عشان الناس بعد ما يحسون باي شئ
بعد العشى بندوا الليتات وحطوا موسيقي كلاسك دخلت عليها خلود اللي ما كانت قمر اكثر من القمر ما شاء الله عليها مكياجها وتسريحتها وفستانها بس اللي مب كان حلو ان الانسة خلود ما رضت تبتسم كانت ملامح ويها جامدة لكن من يقول ان مزنوه تخليها سارت لها وقالت لها ابتسمي عن بوه ما يايبينج نقتلج ههههههههه
خلود : كانت ترمس مزنه بشوي شوي قالت لها احس اني بطيح
مزنه : الشيمة خلج شوي قوية هذاك الثاني يقول اونه يستحي يدخل ..
خلود : احسن
مزنه : انجبي انتي قال شو احسن لو ما ادري انج تحبينه بقول عن الدلع نزين خلي الترتيب عندي
وبعد ما لفت خلود في الكوشة اللي مسوينها وتصورت وخلصت كانت مزنه تقنع فيصل عشان يدخل وهو يقولها ما بدخل استحي واخيرا قالت له لو ما دخلت بتم خلود هنا ما شئ زفة سمعت ؟؟ ههههههه اسلوب تهديد
فيصل : نزين امري لله بدخل
مزنه : سرت وخبرت الحريم ان فيصل بيدخل وخبرت الريم وحرمة سعيد اللي كانن واقفات على باب الخيمة وتمن يتراكضن يلبسن عباياتهن وشيلهن هههههههه
وصل فيصل واستقبلته انا ودخلت معاه لين الكوشة لكن شفت ان فيصل يمشى بسرعة مسكته من ايده قلت له امشى شوي شوي عشان بيصوروك بلاك تقول داخل سباق ههههههه
فيصل : مزنوه لا تمي تسوي لي سوالف خليني اوصل الكوشة وايلس احس ريولي مب شالتني
مزنه : خيبة لها الدرجة نزين شو رايك في فستاني وتسريحتي متعمدة ارفع ضغطة ههههه
فيصل : ما فيه احلى من حرمتي اليوم وانا بعد تعمدت اغيضها وله وقته تتخبرني عن فستانها وتسريحتها
مزنه : وصل فيصل على الكوشة ومن يقول انه يبوس خلود على راسها قدام الناس ما فيه مجال للنقاش يا دوب بارك لها ورفع الطرحة من علي راسها بعد بمساعدتي ويلس (يالله مشوا حالكم )
ام حسين : باركت لفيصل وخلود ومسكت مزنه من ايدها قلت لها عقبالج انتي وحسين ان شاء الله
مزنه : ان شاء الله (ويلى على الجراة لكن ليش اخبي اللي في قلبي) اللي ما تعرفوه على رغم انشغالي بالناس وكل شئ إلا اني كنت مراسل جيد لحسين كنت ارسل له مسجات بكل تفاصيل العرس وقلت لقيس يصور حفلة الريايل بمبايله عشان اطرشه له الليلة ما فيه يصبر لحد ما يمنتجون افلام الفيديو .
انتهت حفلة العرس بزفة فيصل وخلود لقسمهم في البيت عندنا وكل الناس ساروا بيتهم واعتقد ان السعادة انحصرت عند خلود وفيصل في قسمهم بتتويج حبهم بزواج رسمي قدام العالم كله ..
قيس : انا سرت بيت عمتي ام حسين وعطيت حسين مبايلى طبعا بطلب من مزنه (احم تراني صرت احل مشاكل عاطفية اللي عنده مشكلة يتصل علي على 999بس اخاف اني احب وما احصل حد يحل لي مشكلتي ههههه امزح بلاكم بحلقتوا عيونكم جي)
في بيت ابو طارق
بدرية : انا قلت لثريا موضوع عوض بس قلت لها لا تتخذي قرار وانتي زعلانه وله شئ فكري زين وطبعا يلست اخبرها سوالف عوض واخبرها عن شخصيته وقلت لها كلمة اخيره عوض تراه فرصة لاي بنت
ثريا : ابتسمت لها لاني اعرف ان بدرية حابة تخفف علي فديتها ها البنت صج حبوبة ويا حظ مايد فيها
حور : يت ايلس معاهم لا تقولون اني رزه بس ما فيني ايلس تحت واتلاقي مع طارق ونرجع لطير يلى وعرفت موضوع عوض وثريا وطبعا ابديت راي انا بعد وقلت لها ما بتلقين مثل عوض
بدرية رن مبايلى ومت من الضحك قلت لهم ولد الحلال على طاريه هذا عوض داق رديت وقلت له نعم خير شو عندك اشوفك صرت تتصل علي
عوض : يا المذله ههههههه بس حبيت اطمن على الحبايب اشحالهم (لاني اعرف ان اليوم مفروض يكون زواجها من مازن اكيد هي تعبانه نفسيا )
بدرية : ويل حالي انا لها الدرجة وخليت التلفون سماعة خارجية وتعمدت اسوي جي
عوض : احبها يا بدرية والله يعيني لين تقولي لها وما اعرف شو بيكون ردها
بدرية : رجعت التلفون صوت داخلي وقلت له عسى ربك يقدم اللي فيه الخير وافاتحها في يوم ويكون ردها خير طبعا ما قلت له اني اصلا قلت لثريا لاني حسيت ان ثريا ما راح توافق عليه ما ادري ليش ياني ها الاحساس
ثريا : نشيت ودخلت الحمام وبجيت من خاطر سبحان الله ناس نحبهم وهم ما نعني لهم شئ وناس ما نعرفهم ويحبونا بدرجة كبيرة .
حور : بدروه قومي نشئ شوفي ميود وين وهاتيه عشان ارقده
بدرية : سيري بروحج لازم اسير انا؟؟
حور : طالعتها واعرف انها راح تفهم
بدرية : ههههههههه ما كنت استغبي والله العظيم بس كنت هلكانه وعيوني بروحها بتقفل لكن امري لله بنش اشوف وين ميود هذا وعقب طلعت وقلت لها ان ميود عند عزه راقد طبعا عزه كانت موجودة بس مسوية معسكر تحت في الصالة
حور : عيل بنزل هناك واخليكن تاخذن راحتكن في الرمسة
ثريا : لا تنزلين خلج باتي معانا السرير واسع
بدرية : ايوا عشان يوم اصبح الصبح احصل نفسي في الارض هههه لا امزح حور فديتج يالله تعالي رقدي معانا
حور : لا بنزل ارقد تحت عند ولدي ما اروم ارقد بعيد عنه يالله نشوفكم باجر الصبح وانا نازله تلاقيت مع طارق على الدري وهذا اللي ما كنت حابة يصير من يوم يت وانا اتجنب اني اشوفه
طارق : كملت طريقي وانا عارف ان اللي نازله هي حور وحاولت ما ارفع راسي اشوفها .
حور : ما انكر اني استغربت موقف طارق ونزلت سألت عزه عن ميود قالت لي دخلته داخل في الغرفة اللي بيرقدون فيها دخلت الغرفة وحصلت عمتي راقده وميود في حضنها بدلت ملابسي ورقدت بس تصرف طارق تم في بالي ما توقعت انه ما يرمس ولا يقول ولا كلمة حتى السلام .
عزه : بعد ما اتطمنت ان طارق طلع غرفته خلاص بيرقد دخلت ارقد وطبعا انا من النوع اللي يحط راسة ويرقد بسرعة ما فيه عندي تفكير ولا غيره بس من يوم حبيت طارق ما ادري صرت لازم قبل لا ارقد افكر فيه .
في صباح اليوم الثاني
في بيت ابو مازن
ام مازن : نشت من وقت وجهزت الفوالة وريوق العرسان ودخنت البيت بعود وطبعا ما نسيت دخنت ملابس ابو مازن واخوي بو علي عشان صلاة اليمعة .
بومازن : كل هذا للعرسان وقلت لها تجهز لي ريوق انا بعد محترم ههههههههه
ام مازن : فديتك يا بومازن بدون ما تطلب انا مجهزه ريوقك وريوق اخوي بوعلي وسرنا الميلس لان اخوي متعود من ينش يسير ييلس في الميلس سرنا صوبة .
ابو علي : هلا الغالية دومي احس ان اختي ام مازن كأنها امي لانها هي اللى ربتني عقب وفاة اماية وقلبها وايد كبير وحنونه
ام مازن : هلا غناتي
ابو مازن : اليوم اختك مدلعتنا بالريوق
ابو علي : تلاقية للعرسان مب لنا
ابو مازن : سويت حركة لابو علي لاني اعرف الحين ام مازن بتهب في ويهنا وبعدني ما لحقت اكمل ..
ام مازن : يعني انا ما ادلعكم كل يوم
ابو مازن : لا حول ولا قوة إلا بالله حد قالك تضيع علينا الحين بتحرمنا من الريوق الغاوي هذا
وشوي كنا نسولف ودخل علينا فيصل وحرمته
خلود : كنت لابسة ثوب وكندورة لونه ازرق لان فيصل يموت في الازرق وكنت لابسة ذهب كامل
ام مازن : ويه فديت انا الزين ويببت من الفرح يوم شفت العرسان داخلين علي
فيصل : حبيت اماية وابوي وخالي على روسهم
خلود : انا حبيت عموه بس على راسها والباقين سلمت عليهم بأيدي وكنت حدي مستحية بس فيصل هو اللي قالي عشان نسلم على اهله .
ام مازن : يالله فديت الزين انا وحبيت ولدي فيصل على خدة فرحانه فيه ما شاء الله عليه فيصل دومة مرضيني ومرضي وابوه كلهم عيالي جي عشان ما اظلمهم ونشيت عشان اجهز ريوق العرسان واخلي الخدامات يودنه قسمهم
فيصل : لا اماية لا تنشى بنيلس معاكم
خلود : انصدمت من رمسة فيصل لاني ما اعرف ايلس وسطهم بعدني ما تعودت احس اني ميته من الخجل .
ام مازن : انا حاسة في خلود عشان جي قلت لها واي فديتك يا ولدي لكن عشان حرمتك سيروا تريقوا وعقب رجعوا
فيصل : فهمت اماية عشان جي نشيت وقلت لها ان شاء الله اماية
خلود : تقدمت فيصل الغرفة وطبعا قلت له ليش قلت بنيلس معاهم لانك عارف اني بعدني ما تعودت على اليلسة معاهم
فيصل : انا بغيتج تتعودين عليهم
خلود : نزين مب من اول يوم
فيصل : اقولج شئ بدل ها الهواشة قومي نشئ خلينا نتريق تراني حدي ميت يوع
خلود : ما اجذب عليكم انا بعد يوعانة بس بعدني استحي من فيصل عشان جي ما كلت شئ رغم ان فيصل يالس يعازمني بس من يقول اني اكل قدامة والله اني استحي
فيصل : حسيت ان خلود ميته من الخجل عشان جي كلت وقلت لها انا بسير عندهم وانتي برايج تمي هنا عشان ترتاحي
خلود : خيبة يا الجفطة ادري انه حاس اني مستحية منه المهم ما علينا طبعا من ظهر قفلت الباب وكلت على راحتي لا احس حد يراقبني وانا اكل ولا شئ وعقب شليت الصحون المطبخ وفعلا احس اني تعبانه عشان جي يلست على الشبرية ومددت ريولي وشوي ووصل فيصل يلس عندي سولفنا شوي عقب نش يسبح عشان صلاة اليمعة وهو سار يصلي اليمعة وانا اتصلت في اماية .
مزنه : انا نشيت متأخرة صج البارحة تعبت في العرس ومن نشيت سرت قسم فيصل خاصة لمه عرفت ان فيصل ساير يصلى ما ابي اضيع عليهم من اول يوم ههههههه ويوم شفت خلود فديتها اشحلاتها وووووووووووووواو فديت انا اللي لابس ازرق ومتكشخ صج ما توقعت اني اشوفج جي حرمة محترمة ههههههه(دفشة في الرمسة لا امزح معاها طبعا)
خلود : هلا والله ونشيت سلمت عليها ويلست يمها
مزنه : هاه العروس تنصحيني اعرس وله اتم جي انسة؟؟
خلود : عرسي وعرسي وعرسي بعد دام المعرس شرات فصول فديته والله ونسيت عمري وتميت اتغزل في فيصل
فيصل : توني راجع من الصلاة ولكني وقفت على الباب يوم سمعت رمسة خلود هههه فديتها تراها تستحي وايد مني وعمرها ما قالت لي ها الرمسة ما قصدي اتنسط عليها بس اعرفها بتنحرج لو دخلت جي وعرفت اني سمعتها
مزنه : بسج بسج خلاص دوري لي معرس وبتزوج ههههههه
فيصل : احم السلام عليكم
مزنه : واي فديت المعرس انا ونشيت اوايه اخوي وباركت له ورديت ايلس على الشبرية يم خلود
فيصل : دخلت ويلست يمهم بعد
مزنه : اشوفهم كلهم ساكتين وعقب اكتشفت ان وضعي غلط هنا ونجعت ضحك قلت لهم بلاكم سولفوا (اغلس معليه)
خلود : طالعتني وابتسمت
فيصل : سولفي انتي
مزنه : ويلى من عيونكم انتو الاثنين ادري تبوني اظهر نزين بظهر بس
فيصل : الحمد لله فهمتيها بروحج بدل ما اتصل على قيس يجي يظهرج ههههه
مزنه : يالله نزين تامرون علي شئ؟؟
فيصل : خذي الباب وراج بس
مزنه : نزين وطبعا ما سلمت من لسان اماية ليش انتي هناك خلي اخوج وحرمته ومن ها الرمسة
بعد اسبوع من كل ها الاحداث وخلاص تقرر سفر حسين والكل وقف في المطار يودعة وفيصل وخلود سافروا معاهم .
مزنه : وصيت خلود على حسين وقلت لها بتصل عليج كل يوم اطمن عليه وعطيتها مصحف يحطة معاه في الغرفة .
خلود : خلاص الغالية ان شاء الله خير وعسى ربي يرجعة لج بالسلامة
حسين : اليوم شفت مزنوه بس ما كان خاطري اشوف دموعها لكن غصبا عنها دمعت عينها يوم يات عيني في عينها ودعتها بدون ما اقول ولا كلمة لكن ادري هي فهمت كل كلمة قالها قلبي وصيتها على نفسها وقلت لها احبج وقلت لها ادعي لي ...
في دبي
زواجه مايد وبدرية يوم الاربعاء وبعد بدرية ومايد ما بيسافرون بيتمون في الدوله لانهم بيسافرون مره وحده قبل بدارية كورس مايد في الجامعة .
طبعا ثريا ما سافرت مثل ما كان اهلها مخططين لانها قالت لهم ما فيه داعي اللي صار صار واكيد انها قبل عرس بدرية كانت معاها قبلها باسبوع طبعا بطلب من بدرية اللي خطتت انها تلاقي ثريا وعوض وفعلا مخططها نجح وتلاقوا في سوبر ماركت بعد ما اتدعت بدرية انها نست شئ مهم وهي يايه من الصالون وقالت لثريا تنزل تيبة لها لانها ما تقدر وهي متحنية وهذا مخطط متفق عليه من قبلها هي ومايد وعوض بعد.
طارق : حاولت فعلا اشيل حور من راسي لكن بعدها ما سارت من بالي كل ما اشوفها او اشوف مايد ولدها وكنت ما ابي احضر زواج بدرية عشان ما اشوفها
حور : فعلا مستغربة موقف طارق صار يتجنبني .
عزه : انا كنت بموت من الفرح يوم شفت طارق واي فديته
في بيت ام علي
علي : نحن من عرس فيصل ما سرنا نشوف ابوي عشان جي قلت لريم واماية قوموا نسير نشوف ابوي
الريم : انا مشتاقة ابوي لكني استحي اسير هناك خاصة بعد ما خطبوني لمازن وبعدني ما رديت عليهم
علي : يالله قوموا
ام علي : لا فديتك انا ما اقدر تعبانه
الريم : وانا بعد
علي : لا الريم قومي ما اعرف اسير هناك بروحي
الريم : رحمت علي قلت له نزين يالله ترياني ببدل ملابسي وبلبس عباتي وبيك
علي : لا تتأخري لان الوقت بروحة متأخر
الريم : يمكن بعد ثلث ساعة نزلت بعد ما تجهزت وسرنا بيت عمتي وكنت حدي خايفة اشوف مازن
في الميلس
علي : دخلت وسلمت على ابوي وعمتي .
الريم : انا بعد سلمت عليهم ويلست يم ابوي
ام مازن : ليش ما يات امكم معاكم ؟؟
علي : تعبانه شوي
ام مازن : نشيت ايب فواله
علي : عموه لا تيبي شئ ترانا مب غرب
ام مازن : جي الغريب مب احسن عنكم بعدين انا مسوية هريس بيب لكم خاصة اعرف ان الريم تحب الهريس وايد
الريم : سلمتي عموه انا بسير عنج ونشيت عشان اسير انا
ام مازن : لا الغالية انا بسير خلج انتي عند ابوج
ابو علي : الريم
الريم : لبية ابوي
ابو علي : انا قلت لعلي يخبرج ان مازن خطبج وقلتي بتفكري وبتردي هاه يا بنتي فكرتي؟؟
الريم : احس مغص في بطني يالله شو ها الموقف اللى انا فيه احس متفشلة
ابو علي : قولي يا بنتي ولا تخافي لو ما تبين تراه ما حد بيجبرج
الريم : شو ما ابي لو تدري يا يبة اني اموت في مازن المهم طبعا الاتصال اللي كنت ابي اجرية كان لثريا وفعلا اجريته وقلت لها ان مهما صار تظل هي ربيعتي واختي وسألتها انها بتزعل لو عرست من مازن؟؟ وطبعا فديتها قالت لي لا ما بزعل مازن طيب ويستحق كل خير
بو علي : بلاج يا ينتي
الريم : ما شئ
بو علي : شو رايج ؟؟
الريم : طالعت عليه وعقب نزلت راسي وعقب قلت له موافقة
أبو علي : مبروك يا بنتي
ام مازن : دخلت يايبة مله هريس والخدامة معاي يايبة القهوه والفناين
ابو علي : قولي مبروك الريم تراها وافقت على مازن
ام مازن : فديتها ادري انها ما بترد عمتها ويببت
قيس : يوم سمعت اماية تيبب يت اركض هاه خير شو صاير ليكون نتايجي طلعت ونجحت هههه انكت طبعا
ام مازن : بارك لبنت خالك وافقت على مازن
قيس : مبرررررررررروك الف الف مبروك وظهرت بسرعة طلعت فوق غرفة مازن اللي كان يالس على الكمبيوتر ماله ما ادري بعد شو يسوي يمكن يكتب رسالة للريم قلت له هات الف درهم بسرعة
مازن : قيس ما فيني خلق لك اظهر واقفل الباب
قيس : نزين يعني ما تبي تعرف ان الريم وافقت على الزواج منك
مازن : نشيت بسرعة شو تقول؟؟
قيس : الريم تحت في الميلس ووافقت على الزواج منك
مازن : ظهرت بنزل نسيت اني بوزار وفانيلة
قيس : تعال شو بلاك البس كندورة ههههههههههه والف باخذه باخذه
مازن : لك الفين مب الف وما ادري كيف لبست كندورتي ونزلت دقيت باب الميلس ودخلت طبعا خليت نفسي ما اعرف شئ
الريم : من شفت مازن داخل نشيت قلت لعموه وين مزنه
ام مازن : ظاهرة سايرة تشوف ربيعتها في الدوام مربية في المستشفي
الريم : يعني لازم ارد ايلس ويل حالي
ام مازن : الف مبروك يا ولدي بنت خالك وافقت عليك
علي : نشيت وباركت لمازن .
ابو علي : انا بعد باركت لمازن والريم بعد
الريم : يا دوب كان صوتي ينسمع وانا اقول لهم الله يبارك فيكم وحاولت ابدا ما اشوف مازن
مازن : الحين عاد كيفي اشوف الريم على راحتي
قيس : دخلت ويايب عصير معاي اسف ما حصلت فيمتو ينفع تانج مشوا حالكم فيه
علي : وانت ما تيوز عن سوالفك
قيس : شو احسن منا المصاروه؟؟ شبوا شربوا وتميت اصب عصير واعطيهم
في دبي
يوم الاربعاء
في قاعة عرس الحريم كانت حور ورغد وعزه يستقبلن الضيوف من على البوابة اما ام فهد وام مايد داخل محتشرات مع الحريم
ثريا : انا كنت عند بدرية لانها حلفت علي ما اسير عنها ولا لحظة حتى يوم يا مايد يتصورون في الغرفة قبل لا تنزل القاعة تحت وبصراحة حسيت باحراج خاصة انهم هم الاثنين تمو يعلقون علي وعلى عوض
مايد : عقب ما خلصنا متصورين قالوا لي اظهر لان بدرية بتنزل القاعة صراحة ما كان ودي هههه بس حكم القوى على الضعيف
حور : اتصلت علي تلفون ثريا وقلت لها يالله نزلوا الناس يتريوكم
ثريا : جي مايد يخلي حد لاصق هنا
حور : قولي له لو ما ظهر حور بتيك ههههههههه
ثريا : خلاص خاف الحين بينزل ههههههه بس اطلعي انتي ورغد وعزه عشان تساعدوها فستانها وايد كبير انا بروحي ما اعرف .
حور : نزين يالله طالعين لكم وخبرت البنات وطلعنا .
بندت الليتات في الصالة وتوجهت الاضواء بس على مدخل الصالة اللي بتدخل منه بدرية اللي هي فعلا بدرية مثل البدر ودخلت على انغام قصيده كتبها لها مايد طبعا هاي كانت مفأجاة العرس ان مايد الف قصيدة لبدرية وسجلها في الاستوديوا بصوته مع الموسيقي وشغلتها الفرقة اول ما دخلت بدرية .
رغد : انا كنت اعرف ان مايد بيسوي جي لانها احم الفكرة اصلا فكرتي وطبعا اخوي خبل صدق ونفذها ههه
حور : فعلا كل البنات في الصالة تخبلن يوم سمعن القصيدة خاصة بنات خالاته وعمتاته اللي كانن متخبلات عليه يبن يرتبطن فيه لكن القلب وما يريد .
وصلت بدرية الكوشة اللي كانت مثل القمر وكانت تبتسم ما شاء الله عليها يات امها وقفت يمها وسلمت عليها وقرت عليها المعوذات عن عيون الناس ويلست بدرية ويلست ثريا يمها اللي كانت حاكمةعليها بدرية انها تتم يمها ههههه
رغد : ما اقول لكم رقصت إلا احتشرت ههههههه وتمت ترقص مع مايد ولد فهد ونششت امها لكن امها ردت تيلس
عزه : انا ما اعرف ارقص لكني حاولت عشان خاطر اختي فديتها
ثريا : انا عاد صج ما اعرف ارقص وحاولت رغد تقومني ارقص لكن محاولاتها بائت بالفشل
بعد نص ساعة دخل مايد وتصورا وقصوا الكيكة وطلعوا على فندق برج العرب اللي كان ابو طارق هو اللي هادنهم اقامة ثلاث ليالي في فندق برج العرب .
ثريا : بعد ما ظهرت بدرية مع ريلها اتصلت على طارق عشان يجي يأخذني بعد ما قرر ابوي وامي ورجعوا العين وانا بعد برجع العين ما اعرف ابات في بيت خالتي فوزية وبدرية مب فيه لبست عباتي الثانية الثقيلة وحطيت غشواتي بظهر لان خاري وايد ريايل ياين ياخذون اهلهم المهم سلمت على خالتي فوزية وحور وخالتي ام مايد وعزه وسألت عن رغد قالت لي حور ياها تلفون وسارت المهم قلت لها سلموا عليها وظهرت
عزه : يوم سلمت علينا ثريا عشان ترجع العين عرفت ان طارق بيجي ياخذها لان امها وأبوها رجعوا خلاص وعشان جي ظهرت وياها بحجة اني اوصلها
ثريا : ونحن طالعين عند البوابة وباقي شوي بركب السيارة سمعت حد يزجرني يت اطالع اشوفها الانسة رغد
رغد : عطيتها باقة ورد جوري وظرف صغير ما ادري شو محتواه لكن اتوقع رسالة لان ريحة العطر اللي فيه فواحة (ما قلت لكم اخوي يحب هيه والحين عرفت منو يحب)
عزه : عصبت صراحة بلاها هاي رزه ما ادري ليش ها الرغد ما نزلت لي من زور ما احبها احسها خجاجة وتحاول تخلي دمها خفيف وهي دمها ثقيل .
ثريا : شو هاه كله ؟؟
رغد : احم تراني احبج شو اسوي (طبعا ما اقدر اقول لها ان هاي ا لاشياء من عوض قدام عزه اولا وثانيا اعرفها ما راح تاخذهم)
ثريا : الورد اوكى اتقبله لكن الظرف خلاني اشك ان الورد مب من رغد بس بعد ما قدرت اقول ولا كلمة قدام عزه.
رغد : مسكت مبايلى وقلت لها عطيني رقمج ثريا برمسج عقب عشان طبعا افهمها من وين الورد والظرف
ثريا : عطيتها رقمي وقلت لها يالله اخوي بيشوتني لو ما سرت الحين ههههه
رغد : خلاص فديتج يالله ديروا بالكم في الطريق وقولي لاخوج الدب ما يسرع (والله مب قصدي شئ بس جي احب اسوي سوالف)
ثريا : ان شاء الله وسلمت عليها وعلى عزه وركبت السيارة وادري اني بحصل طارق معصب لاني لطعته اكثر من ثلث ساعة بس الغريب لقيته ميت ضحك بلاك تضحك بسم الله عليك؟؟
طارق : منو هاي الخبلة؟؟
ثريا : عرفت انه يقصد رغد خاصة انها ما كانت متغشية وهي يوم تسولف تسوي حركات بايدها وقلت له هاي رغد اخت مايد ريل بدرية وتقولك اوين لا تسرع ههههههههه
طارق : ان شاء الله عمتي يالله نسير وله تبينا نمر بيت خالوه تاخذين اغراضج من هناك؟
ثريا : لا خلاص قلت لماية تيبهم عندها
طارق : احسن (طبعا قلت جي لاني ما ابي اشوف حور خاصة اليوم اكيد انها كاشخة في العرس )
ثريا : وبدل ما اسولف مع طارق طول الطريق كنت افكر في الورد والظرف وكان احساسي يقولي ان ها الاغراض من عوض وتميت اتذكر اليوم اللي شفته في السوبر ماركت وكيف كان مستحي مني ههههه بصراحة شخصية عوض حلوه وما ادري ليش يوم افكر فيه احس بالامان صوت رنه مبايلي خلاني اظهر من الجو اللي كنت فيه طالعت حصلت اللي متصل الريم
ثريا : هلا الريم
الريم : هلا ثريا اسفة دقيت لج في ها الحزه بس ما ادري حسيت اني محتاجة ارمسج
ثريا : فديتج خير شو عندج
الريم : ما ادري ثريا احس اني محتاجة لج وحسيت اني خاطري ابجي وبجيت من خاطر
ثريا : اشفيج بسم الله عليج حبيبتي لا تعورين قلبي
الريم : ما ادري احس اني ظلمتج
ثريا : فديتج في شو؟؟
الريم : بخصوص مازن تراه مازن خطبني وانا وافقت
ثريا : لا الغالية ما فيها شئ ولا تمي تفكري في الموضوع والله العظيم انا شليته من بالي وبعدين فيه خبر بقولج عليه بس يوم اوصل البيت طبعا ما اقدر ارمس قدام طارق .
الريم : خير شو ؟؟
ثريا : بقولج عقب بلاج لا تكوني جي لحوحة وعقب قلت لها الدبه عندي خط بشوفه وبرمسج اول ما اوصل البيت
الريم : اوكى يالله في حفظ الله
ثريا : رديت على الخط الثاني وكانت هاي المره رغد قلت لها نعم انسة خير ؟؟
رغد : وصلتوا؟؟؟
ثريا : لا بعدنا
رغد : عاد قلنا لج قولي لاخوج ما يسرع بس ما قلنا له يمشى على بيض الله يكون في عونج لو انا بكون حشرته عشان يسرع
ثريا : اقولج انتي تبين تخبليني مره تقولي لي ما يسرع والحين تقولي بخبله عشان يسرع اقولج حددي موقفج هههههه
رغد : خير الامور الوسط
ثريا : نزين خلاص بقوله
طارق : انا ميت ضحك صج ها البنت شخصيتها غريبة
ثريا : تامرين شئ ثاني الشيخة؟؟
رغد : عصير كوكتيل بس مب وايد ههههههه
ثريا : نزين وسكت عنها
رغد : يالله برايج ادري اني رزه بس بقولج تراه الورد والظرف من اخوي الهايم عشان ما تفكري وايد وادري فضولج بيقتلج لين توصلي البيت عشان تعرفين شو في الظرف .
ثريا : اها طبعا مب قادرة اقول شئ ثاني قدام طارق قلت لها نزين.
رغد : يالله المهم ديروا بالكم بسير ارقد انا صج احس نفسي هلكانه
ثريا : نوم العوافي الغالية
في العين في بيت ابو مازن
مزنه : من يوم سافر حسين عشان العلاج وانا كل يوم اتصل في خلود عشان اطمن عليه وما قدرت ارمسه لان فيصل وامه وابوه معاه طول الوقت .
اليوم موعد عمليته ومن يوم داخل العملية وانا ما قمت من سيادة الصلاة ادعي له ربي يوفقة ويشافيه وما نزلت ايلس مع اهلى لان اعصابي مرتبكة ولو حد رمسني اكيد بهب في ويه حتى اني ما سرت الدوام .
في حجرة مازن
مازن : كنت افكر في الريم فديتها كيف كانت مستحية يوم الكل يبارك لها خاطري اتصل فيها بس لا خليني اثقل شوي وبعدها نشيت وكتبت لها رسالة في الملف الخاص فيها في كمبيوتري وقلت بعد زواجنا بخليها تقرأ كل ها الرسايل لها (طبعا مازن ما يدري ان الريم تعرف كل شئ)
في حجرة قيس
احس براحة ضمير الحين الكل مرتاح من خواني باقي مزنه وانا بعد ادعي ان حسين ولد عمتي يرجع بالسلامة وتعرس وما يبقي قدام اهلى غير عشان يزوجوني ههههههههه(لا حول امزح بلاكم جي تطالعون مره عاد انتو تستانسوا تبججون عيونكم بعدني اول ثانوي بعدين انا ما بسوي شرات خواني اللي احبها سيده بعترف لها بدل ما نسوي افلام وقصص وروايات )
في حجرة مزنه
انا اتصل كل ساعة في خلود وهي بعدها تقولي انه في العمليات ما ظهر وقالت لي هي بتتصل فيني يوم يظهر قلت لها اوكى اترياج .
في بيت ابو طارق
ثريا : وصلت البيت وبدلت ملابسي وحطيت الورد في مزهرية ويوم حسيت نفسي مرتاحة فتحت الابجورة اللي يمي وقريت الرسالة اللي من عند عوض ابتسمت اونه على كل اللي سواه بعده ما يعرف يعبر هههه صج ها العوض تحفة المهم اتصلت بالريم وقلت لها سالفة عوض عشان ما تحس بالذنب ولاني فعلا خلاص قررت اني اوافق على عوض ما اعتقد اني لو لفيت الكون احصل شخص يحبني بها الشكل بس طبعا انتظر بدرية تخلص شهر عسلها وبرد عليها .
في بيت ابو مازن
في حجرة مزنه
اتصل على خلود ما ترد علي قلت يمكن بعده ما ظهروه من العمليات وتميت ادعي له شوي وسمعت تلفون البيت يرن ظهرت مفزوعة وكان كل اللي في البيت نش نزلت حصلت ابوي رد على التلفون
مازن : خير ان شاء الله منو متصل الحين
مزنه : ما ادري
ام مازن : منو يا بو مازن غلطان في الرقم اونه
مزنه : يالله يا قلبي خفت على حسين ما ادري ليش
ابو مازن : هايلا ما يفكرون يوم يدقون
مازن : حتى انا تخرعت خاصة ان اليوم عملية حسين
ابو مازن : رجعوا رقدوا لكن رن التلفون مره ثانية
مازن : شكلنا اليوم ما بنخلص
ابو مازن : رديت بس الصوت كان بعيد تميت اقول الو الو
فيصل : هلا يبة شحالكم وشحال اماية وخواني
ابو مازن : فديتك كلنا بخير انتو شحالكم هاه بشر شو ولد عمتك؟؟
مزنه : تميت واقفة واطالع ملامح ابوي
مازن : نزلت عشان ايلس على الكرسي
ابو مازن : لا حول ولا قوة إلا بالله إن لله وإن إليه راجعون
ام مازن : شو ؟؟
ابو مازن : خلاص ولدي بنرتب نحن كل شئ كون مع عمتك وحرمتك
ام مازن : شو صاير ؟؟
ابو مازن : حسين عطاكم عمره
مزنه : صرختي كانت كبيرة بكبر يمكن الحسرة في قلبي
قيس : كنت في حلاه رقدتي ونشيت على صوت صرخة اختي
مازن : بسرعة طلعت ومسكت مزنه
ام مازن : ريولي مب شالتني يالله يا حالج يا ام حسين يالله نحن من خلافج وتعابنين الله يعينج يا ام حسين نفس الجمرة انكويت بها انا وبجيت على حالها وعلى حالنا .
بو علي : خير شو صاير؟؟
ابو مازن : حسين عطاك عمره
بو علي : لاحول ولا قوة إلا بالله العلى العظيم إن لله وإن إليه راجعون
مازن : متى بيبونه
بو مازن : مفروض اليوم لكن ام حسين تعبت عليهم عشان جي باجر بيون
مازن : اتصلت بعلي وخبرته .
علي : خبرت اهلى ووينا انا وماية والريم .
الريم : يالله اكيد مزنوه تعبانه وكنت طول الطريق احاتيها لاني اعرف شو حسين بالنسبة لها وفعلا من وصلت ما سلمت على حد سرت غرفة مزنه اللي كانت تعبانة وتبجي
مزنه : حضنت مزنه وقلت لها خلاص حسين راح وخلاني واي ما اقدر اعيش بلاه بموت الريم
الريم : ذكري ربج الغالية هذا امر ربج وادعي له
مزنه : داعية له من قلبي بس ما ابي اعيش بلاه ما ابي
الريم : مب زين جي مزنه انتي انسانه مؤمنة كنت اصبرها وبروحي يالسة ابجي لا حول ولا قوة إلا بالله العلى العظيم
طبعا البيت انترس بالناس اللي نعرفهم واللي ما نعرفهم بس العزاء بعدهم ما قاموه يتريون الجثة وعقب ما يدفنوها بيقيمون العزاء .
في المطار
طبعا ام حسين كانت وايد تعبانة حتى انها يايبينها على كرسي وخلود تعبانة لكنها تحاول تتماسك عشان امها وابو حسين حليله تعبان لكن لا حول ولا قوة له الله يعينهم
سعيد ومازن : كنا ننتظرهم وكملنا نحن الاجراءات وفيصل خذ حرمته وامها العين
في بيت ابو حسين
كل خواته كانوا هناك ومن شافتهم امهم
ام حسين : سرت وياه وهو حي ورجعت بدونه
خلود : يالله يا اماية مب زين اللي تسوينه
ام حسين : يالله يا جمرة فوادي يا الله يا ولدي وينك عني اليوم
خلود : يمه مب زين جي بروحي حالتي تعبانة مب قادرة احس خلاص بطيح عشان جي ظهرت عن اماية وسرت غرفتي
فيصل : اتصلت في خلود لاني ادري فيها تعبانة .
خلود : يالله يا فيصل مب قادرة خلاص مب قادرة اماية تعور القلب
فيصل : حاولي تكوني معاها
خلود : مب قادرة تعبانة
فيصل : الحين اماية وخالتي يايات .
خلود : ومزنوه انا ما رمستها من يوم اللى صار
فيصل : عندها الريم في البيت وهي بروحها تعبانة
خلود : اه احس اني تعبانة
فيصل : خلج قوية بلاج هذا امر ربج
خلود : ما رديت عليه وقفلت التلفون
وصلت ام مازن وام علي ودخلن عند ام حسين وطبعا ما اخبركم كيف تجمعوا يبجون وبعد شوي وصلت ام طارق اللي خبرها بو طارق .
ثريا : انا سرت بيت قوم مازن وتميت عند الريم ومزنه اللي من يوم اللى صار وهي مب راضية تاكل ولا تشرب وبصراحة حالتها تصعب على الكافر ولو استمرت جي بتلحق حسين عشان جي حاولت اقنعها انها تاكل لكن منو يقول انها بتسمع الكلام .
الريم : الشيمة ثريا شوفيها تراها لو استمرت جي بتموت
مزنه : ليتني اموت والحقك يا حسين ما لي حياة بلاك
ثريا والريم بدل ما يسكتنها تمن يبجن معاها .
وبعد ما يابوا جثة حسين وغسلوه ودوه عشان امه وخواته يشوفنه ما اخبركم عاد شو صار هناك من صريخ وصياح حتى ان خلود طاحت عليهم وما قدرت تشل عمرها .
شلوها داخل واتصلت ام مازن بفيصل عشان يجي ياخذ حرمته البيت ترتاح هناك عن جو البجي هنا وفعلا فيصل يا وخذتها لو ان خلود قالت انها ما بتسير معاه وانها تبي تتم عند امها.
خلود : من دخلت البيت وحسيت اني تعبانة اكثر ما اقدر اشوف مزنه ودخلت بسرعة قسمي وفيصل يلس شوي يمي وعقب قال انه بيسير عند الريايل .
مر اسبوع على كل ها الاحداث ومزنه مب راضية تاكل إلا بالغصب شوي شوي وخلود بعد تعبانة وام حسين يوم في البيت ويوم في المستشفي .
يمكن الاحداث اللي صارت خلت كل واحد ينسى اللي كان يفكر فيه ونحصر تفكيرهم في موت حسين والحالة اللي هم فيها كل ما يضهرون من مصيبة تيهم اكبر منها لكن ايمانهم بالله تعالي خلاهم لحد الحين يعيشون وفعلا الانسان ما يموت من الهم وإلا وياما ناس ماتوا وراء اللي يحبوهم لكن العمر ينتهي في اليوم اللي رب العالمين محدد انه ينتهي .
سبحان الله رحمة رب العالمين كانت واسعة يخذ حد ويعطيهم شئ خبر حمل خلود شوي ادخل الفرح للكل في البيت وام حسين تمت في بيتها ما توخر المصحف من ايدها بس تدعي وتذكر ربها لان اكيد ما فيه شئ بيفيد ولدها غير الدعاء له وفرحت لحمل بنتها خلود اللي اتصلت وخبرتها الخبر .
قيس : عاد انا بتخبل من الفرح مب بس فرحان اخيرا بيتنا بيكون فيه ياهل صغير اللعب معاه .
فيصل : بعدني يمكن ما صرت اب لكن احس باحساس الابوه من الحين مع البيبي اللي تحملة خلود في حشاها .
مازن : اكيد ان موضوع زواجي الحين ما راح نفتحة ويتأجل لين الله يريد
ام مازن : وفاة حسين اشغلتني عن اخوي بو علي اللي مريض بعد لكن يالله الحين بتفرغ له وعور لي قلبي يوم قالي انا بعد احس ان يومي قريب .
في دبي
بدرية : بعد مرور شهر بالضبط من زواجي اللي مر كأنه يوم طبعا ايام السعادة تمر بسرعة وكل يوم يديد احس اني استانس لوجودي مع مايد اللي ما يرضي علي ولا يرضى يزعلني ولا يضايقني .
مايد : انا احس الحمد لله بالرضي والسعادة وكل ثانية اشكر ربي انه عطاني زوجه مثالية مثل بدرية واكيد الحرمة يوم تعطي ريلها الحب والاهتمام والتقدير هو بعد يعطيها نفس الشئ .
عوض : خلاص كنت بتخبل اكثر من جي مصختها ثريا ما ردت علي عشان جي اتصلت على مايد وقلت له يخبر بدرية عشان تتصل في ثريا وتقول لها هاه شو رايها ؟؟
مايد : بصراحة الله يعينك لو انا مكانك كنت من زمان رايح اسكن العين ههههههههه
عوض : تقول فيها انا كل اسبوع اسير العين بس اتنفس نفس الهواء اللي هي تتنفسة
مايد : عاشوووو المهم بشوف بدرية وبرد عليك
بدرية : بعد ما خبرني مايد اتصلت على ثريا وتخبرتها عن رايها وطبعا اسعدتني موافقتها يا سلام عمري ما تخيلت ان ثريا تصير حرمة اخو ريلى يعني ما راح نفترق طول العمر واي فديتها وبشرت مايد عشان يبشر عوض حرام كاسر خاطري ها الريال
في بيت ابو مازن
مزنه : احس ان الايام ما لها أي معني احس بمرارة كبيرة وكان تتخيلوا اني اتجنب اشوف خلود لانها تذكرني بالغالي وعمتي ما شفتها من اخر مره مودعتنها يوم كانت في المطار يوم مسافرين .
خلود : انا بعد اتجنب مزنه لاني اعرف شو حسين بالنسبة لها بس غصبا عني في يوم سرت لها غرفتها وقلت لها الوصية اللي قالها لي حسين اقولها لها قبل لا يدخل العمليات .
مزنه : بجيت من خاطر حتى قبل لا يدخل العمليات يحاتيني ؟؟
خلود : عطاني المصحف اللي عطيتيني اياه وقالي لو صار لي شئ رجعية على مزنه وخلي لها تقرأ على روحي كأنه كان حاس انه ما بيظهر من العمليات حي وقالي هو متأكد انج مسامحته على اللي صار زمان بس لا تجرحي عيونج بالبجى وكل وقت تذكريه فيها ادعي له .
مزنه : شو ما ابجي وانا خسرته يالله يا خلود لو تعرفين بالنار اللي في قلبي على فرقاه
خلود : اعرف لكن الانسان ما يقدر يسوي شئ هذا قدر رب العالمين ونحن بشر ما نقدر نعترض .
مزنه : لويت على خلود هاي من ريحة الغالي .
خلود : خليت مزنه تبجي عشان ترتاح وبجيت معاها
فيصل : طلعت غرفة مزنه بعد ما خبرتني اماية ان خلود هناك خاصة ان الطبيب قايل لها لا تتحركي وايد لان وضع الجنين وايد ضعيف وخلود بتخبلني ما تسمع الكلام ويوم دخلت وحصلتها تبجي هي ومزنه قلت لها ايوا كملي على الجنين بعد مرض وتعب وبجي .
قيس : انا بعد دخلت الغرفة قلت له باسلوب تنكيت تراه ها العائلة تموت في الدموع سبحان الله
فيصل : طالعت عليه عشان يسكت مب وقت تنكيته
قيس : اسفين يالله من رخصتكم صج تيبون الهم والضيق ونزلت قلت لماية بسير البقالة
في بيت ابو مايد
عوض : حشرت اماية يوم عرفت ان ثريا وافقت علي عشان يسيرون العين يخطبوها لي
رغد : ساعدت اخوي على رايه لاني بعد حبيت ثريا بصراحة حبوبة
ام مايد : بلاكم انتو حشرتوني بخطب لك انا بروحي احمد ربي انك وافقت اخيرا
عوض : عيل اتصلي الحين بخالتي وحددي معاها وقت عشان تزوريهم
ام مايد : ان شاء الله تامر شئ ثاني ؟؟
عوض : حبيت اماية على راسها وظهرت من البيت سرت السوق واشتريت هدية لحرمة اخوي بدرية على البشارة الحلوه خذيت لها اسواره يد تستاهل بدرية وسرت بيتهم
|