تكملة الجزء العشرون ..
احمد
ودي اعرف هي تتضايق مثلي لما اسبها واجرحها..
والا مايهمها .. بصراحه عجزت افهم لها ..
ضفيت الاكياس وطلعتهن برى .. ..
غسلت يداتي وفرشت اسناني وانا ناوي اناااااااااااااام .. احس اني مصدع ..
دخلت الغرفة سكرت الأنوار ودخلت تحت الغطاء .. ونمت وانا احاول انسى انها موجوده ..
رنا
قمت على آذان الظهر ..
تمغطت بقوة وانا احس اني بتقطع ..
تسندت شوي وانا حاسه بتعب عقب هالنوم المتواصل ..
التفت جهة احمد لقيته يتحرك ..
شوي الا بسم الله يفتح عيونه ويبتسم ..
ناظرته بعين نص مفتوح هوانا اقول بقلبي .. سلامات .. مشاء الله عليه من الرواقه قايم يبتسم ..
قعدنا تبادل النظرات .. انا اناظره مستغربه من ابتسامته وهو يناظرني والى الآن مبتسم ..
تصدقون عاد زهقت من مناظره ..
ابعدت الغطاء عني وقمت ..
انفجر من الضحك اول مامشيت ..
التفت عليه وانا ودي افلقه بأي شي قريب من عندي .. نرفزني بضحكته على هالظهر والواحد ماله خلق ..
سفهته ومشيت ..
احمد وهو الى الآن يضحك : هههههه وربي انك تحفه .. حتى ماعندك وقت تغيرين ملابسك اللي عليك .. نايمه بفستانك .. اذا مالك خلق ورى ماقلتي لي ابدل لك .. ترى عادي مابيننا شي .. ( وغمز وهو يقول ) والا ..
حسيت بنفسي وانا ابتسم بخجل .. ناظرت بملابسي ..
مو قلت لكم بيعلق علي .. وهذاه علق ..
ثبت بمكاني بكل ثقة : وانت وش اللي حارق رزك ؟؟ انام زي ماابي والبس زي ما أبي ؟؟
احمد وهو يرفع يدينه لفوق وهو يتمغط : صح انا وش دخلني ؟؟ بس لو قمت الحين عليك وسدحتك على الفراش بتعرفين وش دخلني انا ؟؟
طيرت عيوني على كلامه .. وخفت .. صديت عنه ورحت لشنطتي ..
طلعت لي بنطلون جنز ماسك على الجسم .. وبلوزة قطنية طويلة الى نص الفخذ بأكمام قصيرة لونها فوشي ..اخذت لي ملابس داخلية وسحبت المنشفة وطلعت من الغرفة وانا مااشوف قدامي ..
دخلت الحمام وانا الهث .. تتوقعون يسويها ويسحبني للفراش غصب ..
هالفكرة هاذي بمجرد التفكير فيها خلتني اصيح بدون مااحس بنفسي .. بس بصمت كالعاده ..
جلست فترة وانا اصيح .. بس قطع علي صوت طرق خفيف على الباب ..
مسحت دموعي بسرعه وتكلمت بصوت عالي : خيــــــــــــــــر ؟؟
احمد : ساعه ..
سكت ولا رديت عليه ..
غسلت وجهي وتوضيت .. فكرت اني مااغير الا بالغرفة دامه بيدخل الحمام يمديني اغير ..
حطيت المنشفة على كتفي وضميت ملابسي وطلعت .. لقيته واقف عند الباب ينتظرني ..
مشيت وخليته لكنه وقفني وهو يمسك ذراعي ..
مسك وجهي ووجه لوجهه ..
نزلت عيوني مابي اناظره احسب ستفرغ لو شفت وجهه ..
أحمد وهو متضايق وبان هالشي على صوته : تصيحين ؟؟
كيف عرف .. لايكون واضح على عيوني .. اووووووووووووف ..
سكت .. اصلا وش بقول لو تكلمت ؟؟
احمد بحنان وهو يمسح على خدي : رنو اذا تتوقعين اني بجبرك على شي انتي ماتبينه فأنتي غلطانه .. انا مستحيل اسوي شي الا برضاك .. ( وضغط على راسي وهو يقول ) حطي هالشي براسك مستحيل ..
قرص خدي بيده وحب يده ..
مشى ودخل الحمام وسكر الباب ..
اول ماسمعت صوت الباب رحت اركض للغرفة وقفلت الباب مرتين من الخوف ..
وبحركه سريعه غيرت ملابسي وجلست اعدل شكلي بسرعه قبل لايطلع ويدق علي الباب ..
مشطت شعري وربطته فوق على شكل حصان .. كحلت عيوني كحل خفيف بدون ماسكرا وروج وردي خفيف .. تعطرت بعطر خفيف ..
وفتحت قفل الباب وليس الباب ...
جلست اصلي واسمع يدق الباب .. بغيت اضحك بالصلاة استغفر الله .. بس مسكت نفسي ..
شوي بعدين انفتح الباب ..
دخل .. اما انا كملت صلاتي ..
دخلت للغرفة بعد مامليت وانا ادق الباب ..
اثاري الأخت مسكرته على فاضي ..
بدلت بملابسي بسرعه ولبست ثوبي ورتبت شعري وتعطرت على بال ماتخلص صلاة ..
جيت من وراها ووقفت انتظرها تسلم ..
سلمت ووقفت عشان تبعد شرشف الصلاة عنها .. الا تلقاني بوجهها ..
رنا وهي تحط يدها على قلبها : بسم الله روعتني ..
أحمد : بسم الله عليك ليش تتروعين ؟؟
رنا وهي تميل فمها : واقف وراي وتقول ليش تتروعين ؟؟
ابعدتها بيدي وانا اقول : يالله عاد لاتسويها سالفة .. ماصار الا خير ...
صفيت وصليت ..
وبعد ماخلصت ..
التفت عليها لقيتها جالسه على السرير .. وسرحانه ..
قربت لمها وجلست جنبها : اللي مآخذ عقلك ؟؟
التفت علي وهي الى الآن سرحانه : من غيرها ؟؟ اكيد بنتي .. مشتاقه لها ..
وبحماس اكثر وهي شوي وتدخل في وجهي : تكفى احمد ودني لها .. الله يخليك والله مشتاقه لها ..
رفعت حواجبي مستغرب حماسي : الحين ..
وبحركه عفوية منها : ايه الحين الله يخليك .. احب يدك ..
وبدون شعور مني سحبت يدي وحبتها ..
ابتسمت على حركتها .. كأنها بزرة وهي تطلب منك شي ..
بس استانست لما حبت يدي .. بس تضايقت لما شفت يدي ومطبوع على روج ..
ضحكت : ههههههه .. هاذي بوسه من شفايفك والا من روجك ..
حسيتها انحرجت وحمر وجهها .. قامت بتبعد عني لكني مسكتها بقوة ..
جلستها في حضني وضميتها بقوووووووووووووووووووووووة وانا اصارخ بأذنها واقول : أمووووووووووووووووووت فيك .. اموووووووووووووووووت فيك ليش ماتفهمين علي ليش ؟؟
جلست تقاومني عشان تبعد بس ماقدرت ..
كنت متمسك فيها بقوة ومابي ابعد عنها ..
رنا
كأني بزرة انا وطلباتي ..
بس انا معذورة .. كنت قبل لما اطلب شي من مشعل الله يرحمه ويقعد يتغلى كنت احب يده عشان يوافق ..
فشي طبيعي بسوي في احمد اللي احسه مايستاهل حبة اليد ..
ولا بعد يتشرط يقول مو من شفايفك ..؟؟ يحمد ربه بعد غلطت وسويت هالحركه والا والله مايشوف مني ريق حلو لو يموت ..
لما تفشلت قمت بلقط وجهي عقب الحركه لكنه مسكني وجلسني بحضنه وضمني وجلس يصارخ احبك ومدري ايش ..؟؟
عجزت اتحمل حسيت اني بموت وانا بحضنه ..
حاولت ابعد لك ماقدرت كان اقوى مني .. يوم مالقيت لي حل .. ارخيت عظامي عشان اقدر افلت ..
ومن جد نجحت خطتي لما رخيت عظامي .. ارخى شده يدينه .. وفلت ...
طلعت اركض لبرى ..
بغيت اروح للحمام لكني تراجعت .. طلعت للصالة وجلست وانا احاول اضبط تنفسي .. احس جسمي كله احمر وشاب نااااااااااااار ..
حسبي الله على ابليسه .. كذاب ويقول مراح اسوي شي الا براضك ..
احمد
لعبت علي وهجت ..
اصلا وش بأرجي من وحده متعوده على هالحركات وعندها خبرة مو مثلي ..
بس مصيري افهم عليك يارنا واقعد العب عليك .. بس شويه صبر ..
طلعت للصالة وشفتها جالسة عل الكنب : تبين تروحين لأهلك ؟؟
قالت بدون ماترفع راسها : ايه ..
احمد : كم يبغى لك وتجهزين ؟؟
قامت بسرعه وجات لجهتي : جاهزة بس اجيب عباتي ..
احمد : يالله انتظرك ..
دخلت بسرعه وطلعت اسرع ..
لبست عباتها وطلعنا .. نزلنا تحت ..
دخلنا الصالة ..
امي ونورة جالسين ..
احمد + رنا : السلام عليكم ..
امي + نورة : وعليكم السلام .
امي : قربوا تقهووا ..
قربت انا بس رنا واقفه ..
التفت عليها : قربي ..
رنا
مابي مو غصب اجلس اتقهوى ..
بس يوم قال قربي .. مالي حيلة الا اني اقرب ..
جلس احمد على الأرض معهم .. اما انا جلست على الكنبة ..
نورة اول ماجلست : لايكون تبينا نقرب لك القهوة عندك آنسة رنا ..؟؟
شفت احمد يضحك .. مدري يضحك على هبال اخته .. والا على عشان مايتوتر الموضوع ..
قلت لها وانا مافكيت النقاب عن وجهي : لا مايحتاج تتعبين نفسك .. مابي قهوة ..
نورة الا تحارشني : يعني خلاص ماتبين قهوة .. ماتفتشين تقل جالسة مع غرب ..
رنا : والله يانورة ماعرفنا لك .. اذا فتشنا مو معجبك شكلنا وبتنقدين .. واذا تغطينا قلتي ورى ماتفتشين كأننا غرب ..
احمد وهو يضحك : هههههه اذكروا الله..
قلت بنفسي انت تنطم وتسكت وتبعد بعيد .. وتخليني اتفاهم معها ..
نورة وهي تضحك مع اخوها : هههههههه عادي نسولف مع بعض ..
مسكينه تحسب اني ميته على سواليفها والا ابيها تسولف معي ..
سكت وانتظرته يخلص قهوته ..
بس انقهرت لما شفته مرووووووووووق على الآخير وقاعد يشرب واحد ورى الثاني وهو يسولف مع امه واخته المصون ..
نورة وحست اني متضايقة لاني كل شوي اقول اووووووووف .. والله بصوت واطي كيف سمعتها ما ادري ؟؟
نورة : حبيبتي انصحك تفتحين نقابك لانك بتحترين ويمكن مكياجك يخرب .. لان احمد شكله مطول ..
ناظرت احمد وانا ودي اقوم واخنقه .. تحسبون فهم علي .. لا والله الا مد الفنجال لنورة وهو يقول : صبي ..
شوي وبيغمى علي من بروده .. بس قلت بصبر شوي وبشوف نهايتها ؟؟
فتحت النقاب لاني من جد احتريت ..
نورة : مو قلت لك بتطولين .. زين ماسويتي والله ..
احمد
ليتها مافكت نقابها ..
انا ادري مافكته الا انها ناوية شر ..
انا ماطولت في القهوة بس من جد كنت محتاج شي يروق لي مزاجي ..
كنت اذا بغيت اقولها يالله شفت امي تفتح لي سالفة وماحبيت اكسر خاطرها ولا اسولف معها ..
وعلى المنوال ..
رنا وهي تميل فمها وتتصنع الابتسامة غصب .. اصلا مو لايقة عليها : شكرا نورة على حرصك فيني ..
نورة : وش دعوى ؟؟ انت الغالية مرة الغالي احمد ..
رنا : كلام ينقط زي العسل .. جعله دوووووووووم ..
نورة : آمين ..
شفت رنا تناظرني وكأنها تستعجلني ..
لاحظت علينا نورة ..: عادي وانا اخوك .. قوم انت وزوجتك روحوا لمشوراكم شكل زوجتي ماتقدر تتحمل تجلس معنا ولا دقيقة ..
احمد : من قال هالكلام ؟؟ هذاها جالسه ولا قالت شي ..
نورة : مايحتاج تقول .. يكفي عيونها اللي بتطلع من مكانها وهي تناظرك ..
رنا كانت متابعه الحوار بيني وبين رنا وشكلها معصب ..
احمد : لاتسويها سالفة يانورة .. رنا ماقالت شي ..
سمعت صرخه من رنا وهي توقف ..
رنا بعصبية وشرار يطلع من عيونها : كفاية انت واختك .. من جد مصخرة .. وانا اخوك وانا اختك .. تتكلمون عني وكأني صنم عندكم مافيه مراعاة لمشاعري ..
قامت نورة وهي معصبة : والله مالمصخرة الا انتي ووجهك ..
رنا وهي تأشر بأصبعها على نورة : انتي تنطمين مابي اسمع صوتك .. فهمتي والا لا ؟؟
نورة وعصبت زيادة : انطم ؟؟! الظاهر انتي اخذتي اكبر من حجمك .. ربي لاتسلط علينا ألد أعدائنا ...
بغيت اضحك على دعاء نورة .. الخبلة تقول ألد أعدائنا .. لهدرجه هي كارهه رنا ..
ضحكت بداخلي وانا متوهق برنا .. والله ان تشرشحني بالسيارة .. الله يعيني عليها ..
ناظرتني رنا وهي تحاول تهدي : أحمد انا بطلع برى انتظرك .. مااتحمل اشوف اشكال زي هالأشكال ( وهي تأشر بأصبعها على نورة من فوق لتحت )
طلعت رنا ..اما نورة الى الآن منقهرة من حركة رنا .. وانها طلعت وسفهتها ..
نورة وهي تجلس وتآخذ نفس : هين وين بتروحين مني ؟؟ مصيرنا نتواجه ..
حبيت راس امي وطلعت وانا اضحك على نورة وكرشتها وهي تهدد ..
يالله حسن الخاتمه بس ..
طلعت لقيتها واقفه عند الباب ولابسه نقابها ..
طلعت للشارع ولحقتني لكنه سكرت الباب بأقوى ماعندها ..
ركبنا السيارة وانا بفمي ضحكة ودي اطلعها بس مقدر .. اخاف تطيش علي زي البيبسى وتمليني.. خلني ساكت ابرك لي ..
طول الطريق وهي ساكته وماتكلمت .. اشوى ..
توقعت اول ماتركب بتنفجر بالهواش والصراخ .. بس الحمد لله خاب ظني ..
وجعله دايم يخيب فهالمواقف ..
وقفت عند باب بيت اهلها ونزلت .. وقبل لا تنزل قلت لها : بمرك بعد صلاة المغرب اوكي ..
صفعت بالباب بأقوى ماعندها .. مشت وخلتني من دون أي كلمة ..
غمضت عيوني من قوة الصفعه وانا احس ان قلبي هو اللي انكسر مو الباب..
نهاية الجزء
|