منتديات قصايد ليل - عرض مشاركة واحدة

11-17-2011

الحلقه الخامسه عشر ..

يودتهم وقلت : بلاااكم شو صايـــــــر ..؟
علاوي يضحك ويأشر برا : هذا عموري فاتح ماي الزراعه ويرش علينا ..

قلت : ترييو أنا براويه ..
طلعت ويمبي جواهر وعدول وعلاوي .. يضحكون بصوت عالي ومتمسكين بـ جواهر ..

طالعت صوب عموري كان قاعد .. فجأأأأأأأأأأأأأه لف بسرعه .. وارتفع البيب والماي كله طش علي .. وجاااااان >< أخييييس عدل

طالعته فالبدايه بس كنت بنازعه بس الحين شكلي بضربه بعد هب بنازعه..
جواهر تبااااااغم : يالحيوااااااااااان خيستنا غربلاتك ..

عموري تم يضحك وميود بطنه استوا طماااااااط ,,
رحت صوبه على حرارة الجو الا اني أحس بالبروده لأني مبلله وخرسانه ماي ..
رحت صوبه عموري ركض بعيد وابتعد عنيه شوي

قلت له : وين بـتروح عني يالشيطون ..
عموري يضحك : هههههه نورو شكلج طررر وانتي خرسانه ماي ..
طالعته : انززين تنكت علي أنا .. هاااه براويك يالعصوص ياللي بعدك ما فقصت من البيضه

رحت صوب بيب الماي وجواهر يمبي .. جان أيود البيب والف عسب ارش الماي صوبه
يودت البيب باصابعي عسب تزداد قوة الماي ,,,

رشيت عليه .....وقلت : يؤيؤيؤيؤيؤ تستاهل ولا تحط دوبك بدوب نواري مره ثانيه فاهم
جواهر تصفق : عاشت حرمة أخويه عاشت ..

جان الف بالبيب وارشها ماي : ان سمعتج تقولين حرمة أخويه بدخلج في هالبيب فاهمه ..
جواهر : ههههه خلااااص فهمت

عدول يطالع علاوي : قلت لك أنا أختي قويه ..
علاوي : هي وايد قويه أقوى عن يسوف بعد

أنا وجوااهر نقعنا من الضحك شوي وبمووت من الضحك ..
جواهر ميوده روحها : هههههه نورو طلعتي أقوى عن يسوف عند اليهال هههه
قلت لها : ولا عدول أونه أختي قويه جني سوبر سستر هههه

عدول : اذا الاولاد سوو لنا شي نقول لهم عندنا أخت اسمها نواري تفلع
عاد اهني أنا وجواهر ما قدرنا قعدنا ع الأرض وتمينا نضحك ,,, شوي وننسدح اهني خلاااص هههه

فجأأأأة سمعنا صوت واحد وقف الدم بـ عروقي من الزيغه ..
......... : شو مستوي ..؟؟

صخينا ووقفنا وعدلت شيلتي .. طالعنا بعض كلنا ,,
علاوي : لا تصارخ يسوف نواري أقوى عنك ..

حسيت روحي بنقع من الضحك خلاااااااص شوي وبموت .. يودت روحي غصب ..
يوسف : محد يرمس .. سألتكن شو مستوي .. ضحكونا وياكن ..
جواهر بتردد: آآآآآ ........

يوسف معصب: ارمسي جييييه الحوي خرسان ماي ..
جواهر : رشينا ع بعض ماي ,,

يوسف : ما تعرفون ها تبذير حرااااااااام
جواهر بهمس : بدا شريف مكه ,,
كنت بنقع خلااااص ,,, من الضحك ,,
جواهر : بس كنا نلعب ,,

يوسف بتهديد: صخي انتي وياها ودرو سوالف اليهال مالكم .. و دشو داخل ,,
تونا بنتحرك عسب ندش ,,

سمعنا صوت سويج السياره والسياره صوتت دليل انها مفتوحه الحين ..
جان أصد وراي .. وشفت شي ما تتوقعونه ,,

السياره خرسانه مااااااي عموري يوم رشيته كان واقف يدامها ,,
على طووول أبا أركض عن أكل هزبه ,,

يوسف صارخ حسيت أذوني بتنطر ,,
يوسف : منووووووه راش ماي عالموتر ..؟
صدينا سمعت عدول يقول : نوااااري ,,,,,,

بغيت اروح افلعه اذبحه اسوي به شي وقته هااا عسب يفضحني ,,
يوسف طالع صوبي ,, ياه تقدم منا أنا وجواهر ,,

حسيت لـ لحظه انّه ياي يفلعني لأنه موتره غالي وايـــــــــــد وهو يحب سيارته نظيفه وشكله مستعيل يبا يطلع ,,

نزلت راسي ..

دموووووعي على طووول نزلت خانتني العبره ,,
زين بس جواهر يمبي واليهال بعاد يلعبون فالحوي ,,

يوسف تقرب ابتسم : بلااااج تصيحين ,,...؟؟؟
للأسف عبراتي خانتني و قلت له : والله هب قصدي .. بس كنت أبا أخيس عموري لأنه خيسني والله مب قصدي ,, ( وبديت أكح ع الخفيف )

يوسف ابتسم : عادي صار خير .. تراني كنت ياي بقول لج .. ادواج عندي عقب .. لا أكثر
نزلت راسي ودموعي بعدها تنزل .. وقلت : آسفه والله مب قصدي والله العظيم ( وازدادت الكحه ) حسيت روحي بختنق لو يمبي طماط ما بيفرقون بينا باللون ..

يوسف : مصدقنج حياتي ... دشي داخل عن تمرضين .. يلا ..
ورووح صوب سيارته ,,

طالعت جواهر ،،البنيه فاتحه ثمها ,, جنها أول مره تشوف موقف جذا ,,
دخلت داخل بسرعه ورحت الحجره عسب اتسبح لأني خست ,,

يوسف قال لي حياتي .. أول مره يقولها .. يوسف قال حياتي .. آآآآآآآآآآآآآآآآ خاطري أصارخ من اليوم الين باجر .. يوسف ما تدري اش كثر أحبك أحبك ,,, فرحتني واااااااااااايــد ..
ههههه ولا أنا الغبيه صحت .. بس يلا زين صحت .. يومياً بصيح عسب يقول حياتي ..

تسبحت وغيرت .. وصليت المغرب ورحت صوب جواهر ..
جواهر تطالعني مستغربه : نواري ... يسوف رومنسي ..
قلت لها بسخريه : وايد .. لو اني هب صايحه جااان فلّعني بنعاله هههه

جواهر : لا لا أول مره أخوي يرمس بـ هــالأسلوب ,, عبالي ما يعرف
قلت لها : انسي اللي صار خلاااص بعدج بيبي ههههه
جواهر : حظج نواري بـ يسوف وايد لايقين ع بعض ..

قلت : جوجو ان ما صخيتي ترا بيييج هاك السطار اللي يأدبج فاهمه ..
جواهر تحط ايدها ع حلجها : هه سكتت خلاااص

فجأأه تذكرت يوسف يوم قال ياي أقول لج دواج عندي لا أكثر .. شو قصده .. كيف بيداويني يعني ..؟ وشو اللي بيسويه .. ؟؟ ..اممم يا ربيييه والله احترت معاااك يا يوسف ..

بس أنا هـ الجمله ما همتني كثر ما همتني كلمة حياتي مو بس همتني الا هيمتني والهمتني به أكثر وأكثر .. كلماله حبي لك يا يوسف يزيد ويزيد ..
مر الوقت ونحن نطالع برامج في التلفزيون الين حزة العشا ,,

جواهر : تعالي نروح نطلع عشا ,,
قلت : أوكي .. يلا شباب نروح نتعشا ,,
عموري : مابا ..

قلت له : عموري بلا سخافه ولا تراني بخلي عمي ياخذ عنك هالبي اس بي ..
عموري يتأفف : انزيـــــــــــن ..
قلت : يهالوووه آخر زمن ..
رحنا المطبخ .. تمينا انا وجواهر نطلع الأكل ,, ونرتبه ,,

جواهر : ماما تأخرت ,,
قلت لها : لازم ,, الحين عموتي مره وحده ولدها وبنتها تزوجو أكيييد بتتعب ,,
جواهر : الله يعينها .. صعب فراق العيال ..

قلت لها وأنا اتنهد : بس هذا مجرد فراق أيام وبيرجعون .. هب فراق يدوم طول العمر ..
جواهر تغير السالفه : يا ريت اليوم رحنا بيت عمو
قلت لها : هي اليوم مسوين عزيمه عوده بيت عمو ..

جواهر : ميثاني بتحتشر ليش ما ييتو ..
قلت لها : هاي لما تشوف بنات عمها تنسانا ,,
جواهر : هههه صدقج ,, مصلحجيه ميثاني ,,

طلعنا العشا تعشينا ,, وكل واحد راح حجرته يرقد بس أنا وجواهر تمينا سهرانين ..
صيفيه شو ورانا .,. عقب جامعه وبننسى أيامنا الحلوه هاي هههه

جواهر : نواري بقول لج شي بس لا تزعلين ..
قلت لها : قولي ,,

جواهر : خوالج يو هاك الأسبوع ,,
قلت لها بتعجب : شي طيب ,,
جواهر : يوم درو يوسف خاطبنج احتشرو .. بس بابا قال انه هو ولي أمرج الحين لأنه عمج هب هم وعلى كيفه يسوي اللي يسويه .. وانتي راضيه ,,

قلت لها : برايهم .. زين سوّا عمي ,,
جواهر : الله يعينج في حياتج
قلت لها : أمين ,, شو دراج انهم يو ..

جواهر : سمعت صوت يوسف وبابا يرمسون ..
تميت ساكته وأقول في خاطري .. أكيد بيخبون علي أشيا أكثر وأكثر .. دوم يخبون عني معنه هـ الأشيا تخصني ولازم أعرف عنها ..

جواهر : قمنا نرقد شكلهم بيتأخرون ..
قلت لها : هي بعده فيني تعب من كعب أمس هههه
جواهر : وأنا بعد ..

...........................

رقدنا واليوم الثاني نشينا على صــــــوت اليهال يصارخون ومستانسين ..
قمت بكسل .. رحت تسبحت وتلبست ..

جواهر توها طالعه من الحمام : ترييني بنزل وياج ..
قلت : انتي شعرج هااا روحه يباله ساعه الين تسحينه ..

جواهر : نورو ترييني بالمره نتفق مع بابا ..
قلت لها : أوكي ,,
جواهر وهي تمشط شعرها : خخخخ تخيلي يسوف تحت كيف بتحطين عينج بـ عينه .
.
قلت لها : هب وقته تذكريني به .. خليني مستانسه .. قال ادواج عندي ,,
جواهر .. : تخيلي يعني شو بيسوي ..؟؟
قلت لها مب مهتمه : بــــــرايه يسوي اللي يسويه ..

جواهر : لو بيطلعج ويــــــاه حرام طلعوني وياكم ..
قلت لها : يلا مناك رزة الفيس من طبايع التيس ..
جواهر تترجاني : حرام حرااااام نواري ..

قلت لها : راقده انتي .. شو نطلع ويا بعض رواحنا .. شكلج تخبلتي .. الا هو خاطبني ..
جواهر : صدق عاد .. يلا طوفي جدامي ,,
قلت لها : صدق مصلحجيه .. جوجو

نزلنا شفنا عدول وعلاوي قاعدين يلعبون بــ سيارات ريموت ..
علاوي : تعالو تعالو شوفو بابا شو اشترا لنا ..
جواهر : الحين كل ها حشره حق سيارة الريموت ..

قلت : والله لو ندري جان ما نشينا من الرقاد بعد ..
جواهر : أنا قلت مستوي شي شي .. ما أقول الا مالت ,, ...

جواهر أشرت على عادل وعلي وقالت : انت وياه والله ان صارختو مره ثانيه وأنا راقده بعلقكم ع المروحه سمعتو ..

علاوي : نوار نوار شوفي جواهر تنازعنا ..
طالعت جواهر وضحكت : ههههه ذكروني بـ سالفة أمس ..
جواهر : هههه ع بالهم صدق قويه لو شافوج تصيحين جان يقولون صدق نورو اخرطي ,,

قلت لها : عاد هب لـ هالدرجه يلا مناك يلا مناك ,, يالردييه ,,
جواهر : عصافير بطني قاعده تصوت .. قمنا نروح نتريق ..

قلت لها : سيري روحج هب مشتهيه ,, بقعد ويا اليهال ..
جواهر : صدق ياهل .. يلا نشّي ولا تراني بخبر أبوي عليج وأقول له بنت أخوك تبا يرد لها فقر الدم ,,
قلت لها : والله مب مشتهيه .. مالي خاااطر أكل ..

جواهر يت صوبي وسحبتني ,, : طوفي يلا .. بلا دلع ..

تريقنا وعقب الريوق رحنا حدرنا الايميل اشوي .. طبعا ايميل جواهر لأنه يوم اللاب وياها لا يمكن أشوف شكله بعد هع ,, ورمست ربيعاتها .. وهكذا ..

..................

سمعنا صوت باب الحجره يندق ..
جواهر : امنووو ..؟

........: أمج أنا ..
جواهر : دشي ماما دشي ..
مرت عمي فتحت الباب ودشت : هااا اشحالكن اليوم ..
قلنا : بخير ...

جواهر : شو ماما بغيتي تباتين بيت قوم عموووه أمسات ..
مرت عمي : ههههه الله يهديج ,, بيت عمتج كل شوي ناس يايين وطالعين ويباركون لهم تعرفين عاد معارف عمتج وايد ..

قلت : عموووه عادي برايج سوي اللي تبين تسوينه .. خلّج من هاي اللي ما تنفع .. ( أشرت على جواهر )
مرت عمي : فديتج أنا هههه ... يلا انزلن عسب نتغدا ..
جواهر : شبعانه مابا ..
مرت عمي طالعتني وأشرت على جواهر : بلاها هاي مبوزه ..؟؟

رفعت جتفي وقلت : مدري عنها تصنيفات هـ البنيه ..
مرت عمي : بلاااج جواهر ..

جواهر بندت اللاب بقوه .. حسيت انه للحظه بينكسر خلاااااص من ايد جواهر ..
قلت : شوي شوي ع اللاب عن يتكسر ..
جواهر : كلّه تتفدين حرمة ولدج .. أما أنا بنيتج صفر ع الشمال ..
مرت عمي : جواهر شو هـ الرمسه ..

طالعت جواهر وسويت لها طاف معني تضايقت .. وكلامها حز بخاطري.. وقمت عسب أطلع ..
توني وصلت صوب الباب ..

حسيت بايد على جتفي زختني بقوه .. وتمسك بي ..
لفيت جفت جواهر ..

جواهر : أيــــــــــه ليكون زعلتي أتمصخر أنا .. تعرفين مصخرتي .. عاد تسم البدن
مرت عمي : الله يهديج جواهر ,, ( وأشرت على جواهر ) نواري خليها هاي ما بتعقل .. انزلي فديتج نتغدا ..

طالعت مرت عمي وقلت : انشالله ..
طلعت مرت عمي ونحن واقفين عند الباب ..,

بغيت أطلع جواهر يودتني : نورو زعلتي ..
قلت لها : زين انج تعرفين مصخرتج تسم البدن ..

جواهر لوت علي من ورا .. وتمسكت بي وقالت : حياتي انتي لا تزعلين ... يلا عاد ..
ابتسمت لها وقلت : صدق خبله ..

جواهر شدت خدودي : فديتها حرمة أخوي ..
طالعتها وقلت : مالت عليج وعلى أخـــــوج .. مدري عنه بعده ما سوّا شي ..

جواهر تقلده : ادوااااااااج عندي ..... هع ضحكني والله ..
لفينا عسب نبند باب الحجره ونطلع ,,,,, كنّا واقفين عند العتبه ..

رفع راسي انصدمت ,,,,,, اااااااااا موقف يفشّل .. يوسف طول الوقت كان واقف وسمع كلامنا .... آآآآآآآآآآآآآع ع ع وين أودي ويهي الحين ..

جواهر طالعته : مالي خص حرمتك انت وياها تنيازون ..
يودت ايدها وهمست : جب يالحيوانه شو حرمتك بعد ..

جواهر ودرت ايدي وقالت : مالي خص .. انتي اللي بديتي ..
وراحت صوب الدري تربع .. يوسف قال : وانتي بعد ادواج عندي فاهمه ..
جواهر تربع : مالي خــص ..

طول عمرج يا جواهر تسوين البلا وتعقينه ع غيرج هههه بس والله براويج
أنا رحت صوب الدري عسب الحقها .. بس صوت يوسف .. وقّف الدم بـ عروقي ..

يوسف : عيدي اللي قلتيه .. لو سمحتي ..
وقفت بدون ما أطالع صوبه .. ونزلت راسي ..
يوسف : عيدي اللي قلتيه ..

قلت له : ما قلت شي ..
يوسف : عاد اللي سمعته منو قاله ..
قلت له : امممم قلت،،، بعدك ما سويت شي ،،، ..

يوسف : لأأأأ اللي قبله ,,
قلت بتردد : مالت عليج وعلى أخوج ..
يوسف : ومنو أخوها ,,
قلت بتردد : كنت أمزح ,, والله

يوسف قال : الحين شكلي بستعيل .. يوم اراويج .. ،،،وراح صوب حجرته

تركني روحي بين الشكوك والأوهام والخيال الواسع .. شو بيسوي .. شاللي ممكن يسويه يا ترى يضرني .. لا لا لا لا لا نوووووووي أنا بنت عمه وخطيبته ,,
عاد شو بيسوي ..

أحسن لي أنزل وأتغدا ,, براويج يا جواهر ان ما أدبتج ما يكون اسمي نوره ..
ونحن قاعدين نتغدا ,, كل شوي اطالع جواهر وجواهر تطالعني .. هي مبين شوي وتنقع من الضحك ,, وأنا شوي وبنفجر من البركان اللي قاعد يغلي بداخلي ..

عقب الغدا رحنا نغسل ايدينا ,,
جواهر بهمس : خبريني شو استوا ..
قلت لها : حرّه فيج ما بخبرج ,,

جواهر : حراااااام يلا نورو ..
قلت لها : منو قال لج ودريني روحي ها يزاج تستاهلين ,.,
جواهر : انزين قال لج شي شرات أمس جي ولا جي

لفيت عسب أطلع : مالج خص فاهمه ,, لو انج تامه وتاكلين الهزبه وياي جان سمعتي روحج
جواهر تضرب الأرض بريولها وتقول بغيض : أنا غبيه منو قال لي أودرج مالت علي ..

طلعت وأنا أضحك على جواهر الهبله هههه .. وتاركه وراي قنبله شوي وتنفجر ..
صعدت فوق شوي شوي عسب ما أطالع يوسف .. هع ولا هالمره صدق بروح فيها ..
والله من بعدج يـ الجوهره قامت تنحذف علي المشاكل حذف .. كلّه من جوجو هـ الهبله ..

رحت صوب السرير فريت روحي عليه ,,,
ابتسمت ,, أنا مستانسه وايد لأني معاك يا يوسف ,, ما تدري بغلاتك بـ قلبي ,, وايد أحبـــك أحبــــــك احبك عدد ما قالوا العشاق احبك..احبك عدد ما سطرت الاوراق كلمه احبك .. أحبـــــكـ يا يـــــــــوســــــــــــف .. محد ملك قلبي في هالعالم غيرك ..

شفت اللاب تقدمت منّه .. الا هالشي ما بقول لك اياه يا يوسف .. ومستحيل أقول لك حاليا يمكن بعد مرور سنوات بـ تدري .. بس الحين حتى ظلي اللي هو ظلي نو وي يدري ..

قعدت ع اللاب الين أذان العصر نشيت رحت تيددت وصليت العصر ,, وقريت قرآن ,,
تذكرت أمس هالحزه جوجو يت عندنا فديتها والله مشتاقه لها ..
شفت روحي مليت وتعبت .. جان أنزل .. شفت عمي وعموتي قاعدين يشربون جاي حمر ..
رحت بستهم ع راسهم : اشحالكم ..؟؟

عمي : بخير الغاليه ,, وينكن انتي وجواهر من عقب الغدا محد شافكن ,,
قلت له : موجودين .. بس وينها جواهر ,,..؟؟
مرت عمي : بنتي سيري ازقريها وتعالو عسب نقعد سوا ..
قلت لها : انشالله ,,
رحت صوب حجرة جواهر دقيت الباب ,, ما ردت علي ,,دقيته بعد ما ردت ,,
جان أدش .. شفتها قاعده ع اللاب

يوم طالعتني قالت : نــــــــعم ,,
قلت لها : أوب أوب كل ها شايله بـ خاطرج ..
قالت : خير شو تبين ,,

قلت لها : أعوذ بالله تبيني أقول لج شو قال لي ..
جواهر ابتسمت ونطت ,, : هي حرمة أخوي أباج جذا ,,
قلت لها : دامج قلتي حرمة أخوي خلاص ما بقول لج شو قال ..

جواهر : خلاااص خلاااص يا بنت عمي أخوي شو قال لج .,.
قلت لها : ادوانا عنده هع وبس ..
جواهر : بس بس ,,

قلت لها : هي والله قال بيستعيل ,, بعد
جواهر : أحسن عسب نعرف شو بيسوي ..
قلت لها : هي أنا اللي باكل الرمسه هب انتي ..

جواهر : المهم نعرف ,,
قلت لها : شو قاعده تسويين ,,
جواهر : ع الجات ,,

طالعتها مبطله عيوني : هـــــــااا ..؟
جواهر : بلااج ع الجات قلت لج .. مجرد لعب
قلت لها : هاااا انتي صاحيه ,, حرااام تدرين وبعدين فيه ناس يلعبون بالعقول

جواهر : عااادي انزين ,,
قلت لها : واذا يوسف درا والله بيذبحج ,,
جواهر : خلاااص خلاااص انزين ,,

قلت لها : والله ان دشيتي براويج .. تراني يمكن أخبر يوسف هاااه
جواهر : خلااااص أبوي ما بدش .. الا يوسف لو درا بيدعسني بموتره ,,

قلت لها : زين دريتي روحج .. يلا ننزل عمو تقول اقعدو ويانا ..
جوااهر : اوهو علينا سوالف الشواب تعور الراس ,,
قلت لها : حرام عليج هاييل أمج وابوج .. يلا طوفي ..

جواهر تأفف : انزيييين ..

نزلنا تحت .. أحم أحم يا ريتنا ما نزلنا .. أخ شو هالمصيبه ,, يوسف قاعد ..
جواهر تهمس لي : شو نزلنا يلا نرد ..
عمي : تعالو بنات اقعدو ويانا ..

جان نتجدم أنا وجواهر لاصقات في بعض وقعدنا في صوب ,,
عمي : بلاكن ..
جواهر : ماشي بس جنه الجو بارد ..

طالعتها وقلت بهمس : غربلاتج عن الرمسه الزايده ,,
عمي : انزين انت سير لهم وجوف شو من مناقصات يديده عندهم ..
يوسف : بشوف ... يمكن بطرش يسور ما وراه شي كلّه هايت ,,

مرت عمي : هي ما يقعد فالبيت طول الوقت برا ..
جواهر تهمس لي : يروح يغازل شو وراه بعد هـ الهيز ,,
ابتسمنا أنا وجواهر ويا بعض كان في خاطري أضحك بس الوضع ما يسمح موول

عمي : بنات ما تبون تسافرون هالسنه ,,
طالعنا بعض أنا وجواهر وابتسمنا جنه تحقق اللي في بالنا ,,
جواهر : أكيييييد أكيد ,, بس وين ..

عمي : صلاله شو رايكم ,,
جواهر : أنا أقول مركبين في هالبيت كيمرات .. ما تصدقوني ,, أمسات انا ونوره قررنا بعد

عمي : شي طيب ,,
يوسف : بس ما بنسير الحين ,,
عمي : جيه ,,

يوسف : السبوع الياي أحسن ,,
مرت عمي : لا نستعيل أحسن لأنه الجوهره يمكن ترد عقب أسبوعين ,,
يوسف : هالأسبوع عندي شغله ما أقدر ,,

عمي : خير ,,
يوسف : أبا أملـــــــــج ,,
كنت قاعده أشرب ماي جان أشرق ........ كحيييييييييييييت عدل ,,

جواهر تدقني ع ظهري : بلااااج ..؟
طالعتها : ماشي ..

يوسف جنه ضحك علي .. برايه .. فاجئني واااااااااايــــــد شو يملج هالثاني بعد ..
عمي : زين انزين ,, نواري شو رايج ,,؟؟
وقته عمي تسألني ,, ألحين يدام ولدك ,, شو تبا تفضحني ,,

مرت عمي : بس الجوهره محد حرام بتزعل لو درت ,,
يوسف : ما بسوي لا حفله ولا شي عقد قران في المحكمه وبس ,,
عمي : أحسن بعد .. مره وحده نسوي حفله حق العرس ما يباله ملجه وخطوبه ,,

ما خذيتو رايي يا جماااعه .. جني أطرش في الزفه معني أنا صاحبة الموضوع والقرار بيدي ..
عمي : ها نواري شو رايج ,,
جواهر : وافقي وافقي حرام ,,جواهر صخت يوم طالعت نظرات يوسف ..
قلت بتردد : مب جنكم استعيلتو ,, ...

عمي : بالعكس ,, لو في خاطرج تقولين شي بنتي قولي عادي ,,
قلت : مادري أحس مستعيلين ,, وبعدين الجوهره محد ..
عمي : قال لج يوسف ,, ما بنسوي لا حفله حق الملجه ولا شي بس في المحكمه ,,
قلت . . : والله مدري ,,

عمي : انزين انتي فكري ,,
طالعته وحركت راسي دليل اني أأيده ,, : انشالله ..
قمت ,, وقامت معاي جواهر ورحنا الحجره ,,

قلت لها : أخوج هاااا ما بقعد بمجلسه مرة ثانيه ..
جواهر : جيييييه انزين ..
قلت لها : أونه بملج قااال كان يتريا لما أنش مب يدامي فضيحه ,,

جواهر : عادي لاااه .. وبعدين وافقي نواري ,, حرااام
قلت لها : وااااااايد صغيره أنا ,,
جواهر : عادي .. هكو الجوهره عرّست مب بس ملجت ,,

قلت لها : والله مدري .. بفكر وبشوف ..
قعدت مع روحي شوي أفكر .. اذا ما ملجت الحين شو بيستوي واذا ملجت شو بيستوي ,, احترت معاااك يا يوسف .. أوافق ولا لأأأ

بس اذا وافقت يمكن عقب ما أحس روحي عال على بيت عمي .. لأنه وجودي بيكون افتراضي .. وبكون وحده من عايلتهم ,,
قلت أشوف باجر الصبح يصير خير ,, ...

حسيت اليوم ممل .. معنه ملئ بالأحداث والمغامرات نوعاً ما ..
مر اليوم وأنا أفكر في كلام يوسف قال يبا يملج ,,, يعني انتقامه هو انّه يملج علي ..
والله يا يوسف لو هذا انتقامك عاااد هذا أحلى انتقاااام وأحلى دوااا ذقته بـ حياتي ,,

.....................

صحيت الصبح على صوت جواهر محتشره ..
طالعتها وقلت : بلاااااااااااج من صباح الله خير تباغمين ,,؟؟؟
جواهر : أوووف بدلتي الحمره مب اهني ..

قلت لها : أوووووف محد يرتاح وهو راقد وياج .. من باجر برقد روحي أحسن لي ,,
جواهر : سيري تلبسي أحسن لج ,,
قلت لها : جيييه انشالله ,,

جواهر : بنروح السوق نتشرّا أغراض وملابس حق صلاله.,
قلت لها : انزين ,,
رحت تسبحت وتلبست ,, نزلت عسب أتريق شفت عمي قاعد يقرا الجريده ,,

رحت صوبه بسته على راسه : صبااااح الخير ,,
عمي : صباح النور والنوير .. بأحلى نوير ..
قلت له : ههههه فديت منطوقك والله
عمي : هاااا رقدتي عدل ,,

قلت له : في حد يرقد مع جواهر عدل .. تذبح الواحد ,,
عمي : ههههه والله هالبنيه حاله ..

بغيت أقوم عسب أروح المطبخ .. بس عمي رمسني ..
عمي : نوار فكرتي في سالفة أمس ,,
قلت له : والله مدري يا عمي ,,

عمي : يعني ,,..؟؟
قلت له : محتاره .. انت شو تشوف ..
عمي : هذي حياتج وانتي حرّه ,,
قلت له : مادري أحس روحي مب مستعده ,,

عمي : انتي توكلي على ربج ويحلها انشالله ..
قلت له : ها شورك ..
عمي : هي أنا من رايي نستعيل أحسن ..
قلت له : برايك ,, سو اللي يعيبك ,,

عمي : هب أنا اللي مستعيل .. ها يسوف ,,
استحيت طالعته وقلت : بس المهم عقب أسبوع نروح صلاله ,,

عمي : انزين ,, من عيون والله
قلت له وأنا مبتسمه : تسلم والله
،، رحت عسب اتريق عقب الريوق رحت صوب جواهر قعدت وياها شوي ,,

دشّت عموتي ومعاها ميثاني ومرت عمي بعد ,,
عموتي تمّت تيبب ,,
طالعتها ’, ، جان تقول لي ..: مبرووووووك حبيبتي ,,
قلت : هههه مسرع ما انتشر الخبر ..

مرت عمي يت حضنتني وتمت تصيح ,, دمعت عيوني وياها فديتها ..
عموتي : هب وقته الحين تصيحون استانسو ..

جواهر : هي يلا ميثاني نرقص ,,
عمتي : وين شو ترقصن بعد .. هههه
مرت عمي تمسح دموعها وتطالعني : الله يوفقج ,,
طالعتها ابتسمت لها مستحيه ..

ميثاني : يا حيها والله أم المعرس ولدها البجر بيعرّس كلللللللوش ..
جواهر : صرعتينا شو هاليباب بعد هااا ههههه
ميثاني : من الفرحه هع ..

عموتي : ها سمعت بو يوسف يقول يوم الخميس ..؟
قلت لها : وأنا شو دراني ,,..
مرت عمي : هي يوم الخميس انشالله ..

عموتي : ماشي وقت متى بتتجهزين نورو ..
قلت لها : يوسف قال ماشي حفله وخرابيط ..
عموتي : شووه .. ؟؟ حتى ولو نحن ما بنتجهز بس انتي لازم تتجهزين لأنج العروس ,,

قلت لها : جيه لازم أنا أتجهز لو مافي حفله ..
عموتي : عاد منو بيقعد ويا يوسف أنا ..
طالعتها : هي صدق ههههه شقايل راحت عن بالي هاي بعد ..

عموتي : ها مزنه متى بتسووون فحص الدم ..
مرت عمي ,, : يباله ثلاث أيام على ما يطلع ,,
عموتي : عاد اليوم ودوهم مركز الطب الوقائي ,,

قلت : جيه أنا خدامه عسب تودوني هناااك يايه من بلاد برا ,,
عموتي : لا ها فحص قبل الزواج
حركت راسي : هيييييييه

ميثاني : صدق ميييح ما تعرف شي ..
عموتي طالعت ميثاني نظره خلّت ميثااااااني تصخ ... وقالت : هب شراتج مشفوحه ع كل شي ..

عموتي : لازم اليوم تودوهم عسب فحص الدم ,,
مرت عمي : بتصل بـ يوسف الحين ..
قلت : والله حاله .. لازم ها الفحص بعد ..

عموتي : مزنه انتي بتسيرين وياها ولا أنا
جواهر : لأأأأأ أنا بسير ,,
ميثاني : لأأأأ أنا ..

عموتي : صخي انتي وياها .. ها شو قلتي مزنه ..؟
مرت عمي : انتي سيري .. أانا بتم وياالعيال .. وبعدين ما أعرف وايد في هالسوالف
عموتي : انزين اتصلي بولدج .. خل ايي قبل ما يسكرون ..

مرت عمي : هي قاعده أتصل به ..
عموتي سحبتني .. : يلا البسي عباتج ..
قلت : جذا بس ..

عموتي : هي ماشي وقت اهناك بس بيفحصون دمج ..
رحت لبست عباتي وشيلتي ..
عموتي : ها مزنه وينه يوسف ..؟
مرت عمي : تحت واقف يترياكم ,,

جواهر تهمس لي . . : جافج عقب ما وافقتي ..؟؟
طالعتها بغيت أفلعها هاااك البوكس بس ما رمت ,,
عمتي : يلا نواري ..
رديت ورا صوب الستاره : مابا ..

عمتي : نواري بلاها سوالف اليهال تعالي ..
جواهر : جنها عنزه بيودونها القصاب ,, أمي الا هو فحص دم وبعد يومين ثلاث ملجه
قلت : نشوف يومج شو بتسوين ..

جواهر : أنا اللي بوديه وياي هع
مرت عمي طالعت جواهر جان تصخ قلت : مابا .. حرااام
عمتي يودت ايدي .. : يلا بلاه هذا منكر البنات وايد أحسن لج ..

سمعت كلامها تميت ميوده ايدها الين ما نزلنا تحت ووصلنا صوب السياره .. استحيت وايد مدري ليش ..
ركبنا ..
عمتي : يوسف بس مايبنا الأوراق ..
يوسف : الأوراق جاهزه عندي ..

عمتي : وصوره شخصيه ,,
يوسف : بعد عندي .. يلا نتوكل خلاااص ولا أمايه بتيي ..
عمتي .. : لا محد بييي ..

حسيت روحي بموووت خلاااص من الحيا ,, لا وماشالله يوسف مرتب من قبل .. وصورتي الشخصيه عنده .. طلع الحبيب مرتب وأنا مدري عنه ..

وصلنا الطب الوقائي ,, وسحبو عني دم حسيت روحي بموووت خلااااص .. دخت .. بس الحمدلله الله ستر وعقب الفحوصات ردينا البيت ع الساعه هنتين ونص ..
نزلنا رحت على طول الحجره ,, صليت .. وغيرت ,,

يت جواهر : هاااا خبريني شو صار ..
قلت لها : راسي يعورني مب متفيجه ,,
ميثا دخلت : نواري عمي يقول لج تعالي تغدي ..

قلت : مابا جبدي لايعه ,,
جواهر : انزين برايج بس نشّي العصر عسب نروح السوق وتتجهزين انتي ,,
قلت لها : مابي اليوم مدوخه أحس روحي بطيح ,,

جواهر : أوكي عاد خلااااص باجر ,,
ميثا : كل شي مابا ومابا ,,حشى منكر بنات ,,
قلت : اطلعن لافلعكن بــ هــ الفروحه ...
جواهر وميثاني : هههههه

ميثا قبل ما تطلع : احلمي في الحبيب .,.,
وسكرت الباب قبل ما تيي الفروحه ع ويهها نجت حظها حلو ..

قعدت أفكر في يوسف .. لـ هالدرجه مهتم بي حتى الأوراق كان مجهزنها ,,
يا رب التحليل تطلع سليمه ,, والله مقدر أعيش بدونك يا يوسف انت حلمي اللي بنيته من صغري ,,, والله أموووت فيك ..

......................

اليوم الثاني الصبح ,, عقب الريوق ..
جواهر : نوير هااا نسير السوق اليوم ..
قلت لها : مالي بارض ..
جواهر : جييه تعبانه ,,؟؟
قلت لها : لأأأأ الحمدلله ,,,

جواهر : يلا نشّي حراااام نروح السوق ..
قلت لها : منوو بيودينا ,,
جواهر : يوسف بعد منووه ..
قلت لها : عاد مابيي ..

جواهر : حرررراااااااام والله كنت بقول حق ياسر بس ياسر محد ..
قلت لها : مابا ,,
جواهر : عاد احلمي وتمي جذا الين يوم الملجه ,,
قلت لها : احسن بعد
جواهر سحبتني : بلااا منكر البنات مالج وسيري البسي عباتج ..
رحنا الحجره ولبسنا عبينا ,, ونزلنا تحت ,,

جواهر : لحظه بتصل به ,,
قلت لها : أووووف بعد نتريا ..
جواهر : بس لو اقول له نواري ويانا بييي طرررر
قلت لها : لا لا أمي أخاف يستوي به شي ,..

جواهر : ههههه يا عيني عاللي يخافون ع رياييلهم ..
ضربتها ع الخفيف .. عسب ما اعورها .. وقلت : اتصلي يلا ..
جواهر : انزين ,,

اتصلت جواهر واتريينا دقايق .. ويوم سمعنا هرن السياره ظهرنا من البيت .. ركبنا ,,
طبعا ركبت ورا ... مب ناقصه بعد ..

تحركنا .. وطول الدرب أحس روحي متوتره أعد الثواني والدقايق متى نوصـــل .. ؟?
ويوم وصلنا نزلنا أنا وجوجو ,,, ويوم تونا بننزل ,,
يوسف : ناقصكم شي .. تبون بيزات ,,؟؟
جواهر : لا ويانا الكارد ماما عطتني اياه ..
يوسف : انزين ديرو بالكم ع روحكم ..

هـ الكلمه تعنيني كثير يا يوسف .. ولو انها من منطوقك انت تهمني أكثر وأكثر وأكثر ...
نزلنا .. ودخلنا المركز ,, وصدينا ورانا شفت يوسف توّه حرك سيارته ..

ابتسمت .. يالله يا يوسف هـ الكثر أهمك ,, والله أني أحبك كثر ما تحبني وأكثر ..

دخلنا أنا وجواهر كذا محل واخترنا اللي بنحتايه .. وشريت شوية شغلات حق صلاله .. وخذيت لي فستان خفيف أو بالأحرى دراعه خفيفه للملجه ..وبعد حواطه ..

جواهر اتصلت بـ يوسف عسب ياخذنا ,, وياه خذانا .. ردنا البيت .. ردينا ,,
وتغدينا .. عقب الغدا رحنا أنا وجواهر نقايس اللي خذيناه ..
جواهر حطت البدله عليها وقعدت ..: نواري ما بتحجزين في الصالون ..؟؟

قلت لها : والله مدري ... ما جد شفت عروس تتجهز ,, حتى جوجو كانت مع علايه ,,
جواهر : أوكي عاد بتصل بالحرمه ونأكد لج حجز حق عقب باجر أوكي ..
قلت لها : شورج وهداية الله ..

جواهر : خلاص موافقه يعني ..
هزيت راسي بمعنى هي ..
جواهر : والحنا ..

قلت لها : لا لا ما بتحنا .. بنروح صلاله والحنا بتضايجني يوم تروح لونها هب شي ..
جواهر : غبييييه انتي فيه عروس بدون حنّا هاااه ..
قلت لها : مالي خاطر للحنا .. مابا أتحنا ..

جواهر : يلا مناك ,, غصبا عنج تتحنين باجر انروح الصالون ..
قلت لها : النتيجه بعدها ما ظهرت ..
جواهر : عيني خير ,, وكل شي بيصير انشالله ..
طالعتها وقلت : هييييييه الله كريم ..

.. مر يوم .. وعقبه يوم .. وهــ الأيام تمر علي جنها سنوات من زود التفكير في حياتي اللي قاعدهـ تنتظرني ... كيف بعيش بها ,, يا ترى بـ سعادهـ ولا العكسـ .. ما يندرا والله .. !!

هاي الحياااه .. مخبيه لنا أشياااااء كثيييييييره ما نعرفها .. الحمدلله ما نعرف شو اللي تخبيه لنا .. ولا جاااااااان متنا قهر وصيااااح .. هذي نعمه من رب العالمين ...

،،،،،،،،،،،،،،

ياااه يوم الملجه .. ورحنا أنا وجواهر وميثاني معاي ,. الصالون ..
بعد ما سوو لي الميكب والتسريحه هاااديه هب تسريحه بس فير .. حتى الميكب نعوووم وايد جني رايحه حفلة بنات هب ملجتي .. بس ها اللي طلبته أنا ,,

عقب ما سووت كل شي راعية الصالون ..
وقفت يدام المنظره ,, طالعت شكلي في المرايه ,, تفاجئت من شكلي ... بدون ما أمدح بس

بقول الحقيقه ,, جني ملااااك بالميكب الهادي .. أحلى عليه من الدفش .. تجدمت من المنظره عسب أشوف شكلي من يدام ,,

حركت ايدي ع ويهي ,, طالعه غير غير .. عيبني شكلي ,, وايد هادي ,,

عقب لفيت ... جان جواهر تقول : مبروووك يا عرووووس
ميثاني : نواري الله يحفظج ماشالله عليج ملااااك ,,
طالعتهن : صدق ولّا ,,

جواهر : والله ميكبج وايييييد هادي ونعووومي ,, لايق عليج
طالعت جواهر وميثاني وقلت : بعيش مع يوسف بحياه آمنه ولا ...

جواهر : انشالله كل أيامج أفراح في أفراح نواري ..
طالعتها : آميييين ..
رحت صوب جواهر وميثاني ولويت عليهن ... حسيت روحي بصيح خلااااص ..

ميثاني .. : حووووه عن تخربين ميكبج دافعين عليه وايد
طالعتها : طول عمرج مصلحجيه هههه
جواهر : هكو .. يسوف قاعد يتصل بي ..

قلبي فز ,,, يوم سمعت اسمك يا يوسف .. مدري رعب منك ,, ولا لـ مكانتك الكبيره اللي في قلبي ... أعشقـــــــــــــــــكـ يا يوسف ...

،،،

طلعت النتايج .. ورحنا المحكمه ,,, وعقدو القران ... ارتبكت واااااااااايد يوم سألني الشيخ ,, غير انّه يوسف واقف ..

وسمعت صوته وهو يردد ورا المليج يوم يقول له الجمله .. عسب نملج ,,
عقب ما ظهرنا من المحكمه

.. ركبت السياره مع عمّي ,, كنت متغشيه لأني متمكيجه ,, طول الوقت كنت ميوده ايد عمي عن أطيح هههه وتخترب كشختي ,,

ردينا البيت ,,, أول ما دخلت الصاله كانت جواهر معاي وميثاني دخلت قبل ,,,
سمعت صوت يباب ,, ابتسمت لمرت عمي وعموتي ,,
يو صوبي .. وسلمن عليه وباركن لي ,, حسيت بالفرح .. بس ناقصني يابوي .. ناقصني ,,
طالعت صوب عمي ,,.

أشر لي أروح له .. تجدمت منّه .. بست راسه ,,
جان يمط خدودي ,, ويقول : مبرووووك غديتي عروس خلااااص ..
طالعته ابتسمت له ,, وقلت : الله يبارج في حياتك ..

حطيت عيني بـ عينه ,, حسيت بشوق لأبوي .. جان ارمي روحي عليه .. ولويت عليه ..
خلااااص عبراتي بغت تخونني وتنزل ,,

ما حسيت الا بأحد يسحبني ,, ويقول : الا ميكبج نورو عن تخربينه ..
طالعت جواهر وقلت : هههه لا تخافين ما بيخترب ,,
ميثاني قالت وهي معاها الكيمره : غربلاتج خربتي اللحظه الرومنسيه كنت بصورها ,,
جواهر : راحت عليوووه ويت لنا أختها هههه

ابتسمت لهن ,, طالعت صوبي اليمين ,, شفت يوسف واقف في صوب يراقبني ,,
تذكرت هاللحظه خلااااص أنا هب ملك نفسي .. صرت من ممتلكات يوسف ,, أنا لـ يوسف ..
استحيت ,, وطالعت صوب البنات ..

يوسف ياه صوب عمي ,, وباسه على راسه ,,
عمي : مبروووك تستاهل ولدي .. الله يوفقك ,,واالله خذيت شيخة الزينات ’’
حسيت روحي بالفعل أميره ملكه شي جذا ,, فرحت لأن عمي وصفني هالوصف ..

عمتي ومرت عمي يو صوب يوسف ,, وسلمو عليه ,,
مرت عمي لوت على يوسف ,, وبدت تدعي له بالخير ,, .. حسيت بـ قرب يوسف لأمه ,, وايد يعزها ويبرها ,,

عموري وعدول وعلاوي يو صوبي .. عموري مبين عليه حزين ,, عباله بتركه .. بس والله ياعمور بتم وياااك طوووول عمري ,, ومستحيل أبادلك بالجفا والحرمان اللي ذقته وأنا صغيره ...

عموري ياه صوبي لوا عليه وبدا يصيح ,, حسيت روحي بصيح .. بس جواهر تيي تخرب اللحظات الرومنسيه ,,
عموري مسح دموعه : نواري أحبج ,,

طالعته وقلت له : وأنا بعد حبيبي .. امسح دموعك الرياييل ما يصحون فديتك ,,
عموري طالعني وقال : انزلي ,,
نزلت شوي .. معنه يقد يطولني ,, لأنه بيروح سادس ,,
عموري قرب روحه من اذوني وقال ,, : مبروك يا أحلى أخت فالدنيا ,,

وباسني ع خدي ’’
دموعي تكونت بـ عيوني ,, حسيت بقرب عموري لي ,., حسيت بمعنى الأخوه ,, حضنته ,,
حسيت يوسف يراقبني حركه حركه ويسمعني حرف حرف ,,

عدول ياه صوبي .. وقال : مبروووك نواري ..
طالعته مطيت خدوده وقلت : الله يبارك فيك حبيبي ,,
علاوي : الحين انتي خلااص بتروحين شرات جوهره ,,
قلت له : لأاأأ أنا بتم عندكم ما بروح ,,

علاوي وعدول تمو يصفقون ويتراقصون ,, مدري ليش ,,
بس شعور حلو الواحد يحس عنده أهل حوله .. يحبونه ويخافون عليه ,, من نسمة الهوا ..

يوسف قال ,,, : يلا عاد أنا بترخص وباخذ حرمتيه ويايه ,,

طالعت صوب عمي .. ترييت يقول لأأأأ مابا أطلع وياك يوسف روحنا ,,
عمي .. : خذها وياك .. ودير بالك عليها ,, ما وصيك ,,
يوسف : لا توصي حريص ,,
يوسف طالعني ,, وقال : يلا نوره ,,

ما قدرت أقول لأأ .. لحقته ,, يوم وصلنا صوب باب الصاله ,, تقدم ما ترياني .. ولا مسك ايدي لييييييييش يا يوسف لييييش ..

ويوم طلعنا ,, راح تجدم وفتح لي الباب اللي جدام ,, ركبت وبند لي اياه ,,
حسيت روحي بالفعل أميره اليوم ,, تذكرت كلام يوسف .. يوم قال حرمتيه ,, خلااااص أنا ملكك يا يوسف ,, أحبك أحبك ,,

ركب يوسف ,, بس هالمره ما شغل المسجل مدري ليش ,,

هالمره غيييييير حسيت بشعور ثاني اتجاهه .. حسيت بقربه مني ,, مو بس قربه هو .. قرب أنفاسه بعد ,, حسيت بالدفا والحنان اللي كنت فاقدتنه ,, لكنني اليوم حصلته ,, وعند منو ..؟؟ عند يوسف .. يوسف اللي كنت أهواه من ظهرت لـ هالدنيا ,,

وأخيراااا حصلته ’’ كنت حاطه ايدي ,, على ركبي وأفركها في بعض ,, كنت متوتره واااايد ,,

حسيت بشي دافي على ايدي ,, بشي وقف الدم بـ عروقي .. حسيت بالأمان والدفا يوم ايد يوسف مسكت ايدي ,,

كان في خاطري أقول ,, بحط قلبي بين ايدينك هديه .. وأقول لك كل عام وانته حبيبي ..

وقال يوسف كلمات قليله لكن ما يدري وش غلاها بقلبي .. وش تأثيرها بـ مشاعري ,, وش تسوي بي ,, وانها عادي تذلني وأقعد يدامه وأترجاه واقول له عيد وعيد ,,

قال : مبروك حياتي ,,

هالكلمتين على سهولة نطقهم الا انهم أثرو بي .. وخاصتا منك يا يوسف .. فديت منطوقك ..

رفعت راسي وشفت يدام الشارع وقلت : الله يبارك في حياتك ,,

ثواني حسيتها ساعات وأيام ,, الا ووصلنا صوب البحر ,,
كان المكان خالي مافي أي مخلوق يدور اهنيه ,, بس ما نزلنا الجو حااااااار ..

يوسف وقّف السياره ,, وطالع صوبي ,, يوّد ويهي ورفع راسي صوبه عسب أطالعه ,,
حسيت بدفا ايده يزيد يوم انه مسك ويهي ,,

طاحت عيني بعيونه ,, .. حسيت بعيونه كلام يبي يقوله لي .. حسيته يبي يقول .. تدلل لك حياتي تدلل لك عيوني ..

والله يا يوسف لا أبي حياتك ولا أبي عيونك بس اللي أبيه شي واحد ,,, واحد وبس ,, ابي حنانك وعطفك اللي فقدته من صغري ,, وعقب فقدته في مراهقتي ,,

يوسف تم يطالعني وقال .. : نواري أنـــا أحبج من زمـــــــان ,,

حسيت روحي بطلع من السياره وبطير من الفرح ,, يوسف يحبني .. يوسف يبادلني الشعور ذاته يوسف اللي بادر .. يوسف اللي بدا وقال أحبج ,,

كل هذي الفتره يا يوسف معذبني بحبك ,, والله لو تدري اني أحبك أضعاف وأضعاف حبك لي ,, يعني تحبني من زمااان ,,
نزلت راسي بـ حيا ,,

يوسف نزل ايده عنّي ,, وقال : كنت أباج من زمان وياه اليوم اللي نجتمع فيه ,, أوعدج انّي بسعدج في حياتج وبعوضج عن أيامج اللي عشتيها قبل .. انشالله

رفعت راسي نزلت دمعه من دموعي ,,
قرّب ايده عن ويهي ومسح الدمعه اللي كانت نازله واختلط معاها شوي من الجحال ..

يوسف : شي في خاطرج ارمسي قولي بسمعج ,,
قلت لها : لأأأ بس تذكرت بابا ,,
يوسف بحزن : الله يرحمه كان يتريا هاليوم ..

طالعته باستغراب : شو يعني ..؟؟
يوسف : قصدي كان يتمنى يشوفج عروووس ..
,, مسح دموعي أول .. عقب قال : زين جيييه تخربين ميكبج .. لو جوجو اهني جان فلعتج ,,

ابتسمت له ,,
قال : افتحي الطبلون ,,
فتحته ,,وقال : عطيني هالجيس ,,
عطيته الجيس ,, طلّع منه علبه صغيره ,, فتحها كان فيها خاتم ,, سحب ايدي بهدوو وقربها منه .. ولبسني الخااتم ..

طالعت صوبه ,, بديت أصييييح أكثر وأكثر ,,
يوسف قرب ايده عني : بلااااج نواري ,,؟؟
حطيت ويهي بين ايديني وقلت : بابا قبل ما يتوفى سوّا نفس الحركه ,,
يوسف : حبيبتي .. انسي خلاااص وادعي لأبوج بالرحمه ,,

طالعته : الله يرحمه ,, يوسف انت شرات باباتيه كل شي فيك يذكرني به ..
يوسف رص ع ايدي وابتسم : وأفتخر بعد ..

طالعته يودت ايده لا ارادياً : لا تودرني يوسف ,, لا تسو شرات ما سوّا أبويه وراح ,,
يوسف : ما بودرج حياتي ,, وبعدين الأعمار بيد الله ..

طالعت صوبه ,, وقال : نواري ميكبج اخترب هههه بديت أتروع منج ..
ابتسمت طالعته ,, وقلت : أونك ..
يوسف : لو جواهر اهني جان فلعتج وفلعتني وياج ..

يوسف حرّك السياره ,, رحنا صوب مطعم ونزلنا ,, قال بيعزمني ع الغدا ,, ونحن داخلين كنت متغشيه ,, لأني متمكيجه ,,
رحنا قعدنا في كبينه ,, رحت الحمامات عدّلت شكلي لأني بالفعل بديت أروع اللي يدامي هههه

وبعد ما عدلته رديت شرات أول واحلى بعد ,,,ههههه

رحت قعدت مع يوسف .. حسيت روحي بعيش بأمان معاك يا يوسف .. بنسى همومي خلاااص ...
عقب الغدا تم يوسف يفتر بالسياره وياي ,, وتم يسولف .. وأنا نادر ما أعلق بس أبتسم ههه بعدني يديده ع السوالف ..

الين جريب المغرب ردينا ,, البيت ,,

على طول رحت الحجره ,, رحت تسبحت وتلبست ,, صليت المغرب ,,
روميت روحي ع السرير ,, أحس روحي أسعد انسانه اليوم .. يعل ربي يديم السعاده بيني وبينك يا يوسف ,,

والله يا يوسف مستانسه .. ما تدري اش كثر استانست يوم قلت لي انك تباني من زمان هالشي فرحني وايد ,, أحس روحي بعيش وياك بـ سعاده وبنسى الهموم كلهااا ..

شو بيصير بحياة نوره با ترا .. بنشوووف في البارت الياي ..