وسأل: شكلكم في اجتماع عائلي ..وما ناديتوني له ... اكيد تتباحثون
عن البنت اللي بتخطبونها لي ...صح ؟؟ تبغون تسونها مفاجأه ...
ناصر: احلى بنت بعد شتبي؟؟ متى نروح نخطب ..
احس محمد انه تورط فقال :منصدقك؟؟ من بنته ؟؟؟ وكم عمرها ؟؟
وتدرس والا تشتغل؟؟
ناصر: وانت كله تصدق؟؟ قولي الاول انت وينك مختفي صار لك كم
يوم؟؟ وين غاط؟؟
محمد بخيبة امل: رحت دبي مع الربع..
جاسم: وش جبت لي ؟؟؟
محمد: ماجبت شي حق حد ...شريت عود كمبودي حق ابو جاسم
وشريت حق نفسي 30 نعال.... الله يعزكم..
ناصر: خيبه ...30 ...والله فسقة ... جاسم انت كم تلبس ؟؟ عط اخوك
3... يمه تذكرين المذن من كم يوم قال انه عنده ناس محتاجين ...
تدري بخليه يكلمك...
محمد: قوللي كم رقمه عشان ما رد عليه...لا تحن ...والله رخاص
الوحده على200 وكل يوم اكشخ بوحده ...شوف هذي اللي يشوفها
يقول سيزار بشيوتي...
مد رجله لناصر ليرى نعاله ثم سأل: عووش وش عشاكم ...جنه صار
شعر ...
( وكرر ) عوش وش عشاكم ...ياسلام علي ...كل كلامي ذهب وموزون..
قامت عائشة لتحضر له عشاءه وقام هو ليجلس على طاولة الطعام
وأخذ يطرق الطاولة بأصابعه وهو ينتظرها...
نظر ناصر للعنود ولاحظ شحوبها والهالات السوداء حول عينيها
فاستغرب وسألها بأهتمام واضح :انتي ليش وجهج شاحب؟؟ انتي
مريضة؟؟ فيج شي؟؟
العنود وهي تمسح وجهها تلقائياً وهي تنفي وقالت: مافيني شي ..
ناصر: الا فيج.... اقربي وقولي لي...
ردت بتردد : مافيني شي...بس ...الدكاتره يعاملونا بظلم ويذلونا على
الدرجة..
ناصر: انتي بس والا كل الطالبات؟
العنود: اغلب البنات عدا اللي مايستحون ...اللي يقلون نفسهم على
الدكاتره ويسوون لهم حركات...
أبوجاسم: يهبون...مالهم والي هالبنات؟؟
أم جاسم: مايخافون من عذاب رب العالمين !!!!
ناصر: وشو اللي بيريحج؟؟ محد جبرج عليها انتي اللي قلتي تبغين تروحين مع ربعج...
العنود: ادري ...بس ..
ناصر: بس وشو؟؟ تبغين تنتقلين مع عويش؟؟
العنود: هناك اصعب ...
ناصر: والحل ...
العنود: بستحمل وبشوف هالكورس..
لاحظت أن الحيرة لازالت على وجهه فقالت: تبغي شيز كيك؟؟
هز رأسه بالنفي ...وظل يفكر ...
في اليوم التالي
دخل على جاسم في مكتبه وبعد لحظات صمت أقترح : شرايك؟؟
جاسم: فكرة حلوة ...بس لازم اعرفها قبل .
ناصر: العنود متضايقة..
جاسم: عادي ..حتى انا متضايق وبعدين؟؟؟
ناصر: بوديكم السينما عقب المغرب..
جاسم: بتضيق فيني زياده ... بتوديني فيلم اسمعه بدال ما اشوفه...
ناصر: انت اللي قلت انك متضايق مثلها وهي تحب السينما قلت اوديها
هي وعايشه..
جاسم: ياسلام..
ناصر: تبغي تروح حياك ...
جاسم: والشباب؟؟
ناصر : شفيهم؟
جاسم: لي شافوني داخل بيسونها مطنزه..
ناصر: وانت من متى يهمك راي حد ؟؟؟ واصلاً احنا ماندش اي فيلم الا
إذا طفوا الليتات ...
جاسم: ادري..
ناصر: بخلي السواق يجيب لنا تذاكر...فيه فيلم من النوع اللي يعجبها
عقب المغرب..
جاسم: ويمكن مايعجبني ؟؟
ناصر: وانت شلك خص ؟؟؟ احنا كلنا رايحين عشانها ..يعني مهب
ضروري يعجبك ولا يعجبني ...
جاسم: بل ...ليش عاد؟؟
ناصر: افهم يا اخي هالمره الطلعه مهب عشانك...عشان العنود..والعنود
بس..
جاسم: درينا يا اخي ... درينا ...ناقص تغنيها ...الا
بسألك ...سكرتيرتك داومت والا
للحين زعلانه؟؟
ناصر: اليوم المفروض تداوم العصر..وانا منيب راجع العصر ..
جاسم: دوامك كله خرطي وابوي مايدري عنك...
ناصر وهو ينهض منصرفاً : قوم زين....دور لك حد يرجعك
بيتكم ...نحاسه فيك أنا مهب موديك معاي..
جاسم: اها عاد ....تقدر؟؟
ناصر ممسكاً الباب وقبل أن يغلقه خلفه...: قلبي طيب شسوي فيه ...
ضحك جاسم بقوة...
في طريقهم للمنزل اتصل ناصر بالعنود ورن كثيراً بدون أن تجيب فشعر
بالملل وقال : ماترد ...
قبل وصولهم رن هاتفه ورأى اسمها على الشاشة فأجاب: وينج ماتردين
يوم اتصلت..؟
العنود: كنت في المحاضره توني طالعه..
ناصر: بنروح السينما اليوم ...تروحين معانا؟؟
العنود: اكيد ..بس من انتوا؟؟
ناصر: انا وجاسم ..شريت تذاكر فيلم يمدحونه قولي حق عائشة و6
تكونون بارزين ...
العنود والفرحه في صوتها: ان شاء الله ...
ناصر: بنكون في السيارة ننطركم 6 بالضبط إذا ماجيتوا رحنا
عنكم ...انتي تعرفيني عدل...
العنود: والله ببرز بسرعه ...ليش كل مره تقولي جذيه؟؟؟
ناصر: لأني كل مره انطر ساعه لين تبرزين...
العنود: حرام عليك...اليوم بتشوف ...ببرز قبل 6
ناصر: بنشوف...
العنود: يله باي بكلم شوشو..اكيد بتستانس..
ناصر: مع السلامة..
جاسم: شكلك بتوديني بروحي لأنها كالعاده بتتأخر..
ناصر: واكسر بخاطرها؟؟؟ وازعلها؟؟؟ اصلاً هالروحه بكبرها لها...
جاسم: ادري ...والله العظيم ادري...من صغرها وهي لاعبه
عليك ...يعني وشو اللي بيتغير عقب كل هالسنين...المصيبه أن مافي
وحده بتتزوجك بتستحمل هالمعاملة..
اكيد بتغار؟؟الا بتموت من الغيرة كان انا احتر ...
ناصر: لا تستحمل كيفها...اللي ماتستحمل العنود تقبض الباب...
جاسم: فكنا زين ...ان شاء الله تبرز الساعه 7 ويروح عليها الفلم..
ناصر: انت اخو انت!!!!!!!!!! انت عدو...
وأيضاً ضحك جاسم لأنه نجح في اغاضته للمرة الثانية اليوم...
السادسة مساءً
كان ناصر في سيارته ينتظر وبجانبه جاسم يطرق بعصاه الباب بشكل
استفزازي ومسكها ناصر ليمنعه وقال: مزعج ...طول عمرك مزعج..
جاسم وهو يتحسس ساعة يده: صارت الساعة 6؟؟ نفذ تهديدك لها ..
ناصر: بننطر شوي ...ماورانا شي...
ابتسم جاسم وقال: هذي كيف بتتزوج ؟؟؟ منهو اللي بيقدر يستحمل
دلعها..وأصلاً منهو هالرجال اللي بيرضى انك تدلع مرته ؟؟
ناصر بغضب: شفيك صاير مثل الحريم تحن؟؟؟ ممكن تسكت شوي؟؟؟
فُتح باب السيارة ودخلت العنود ومن وراها عايشة وهي تلهث وتسأل:
ليش مستعجلين ؟؟ باقي ساعة على الفلم؟؟
تحرك ناصر وهو يقول: ماتحسبين الطريق؟؟ يعني السينما ورا البيت؟؟
العنود: شفتني برزت من وهل مثل ماقلتلك؟؟
جاسم: ايه ..من وهل ...ساعتج مأخره ...صار لنا 10 دقايق ننطر يا
الشيخة..مافيه فايده اصلاً من الكلام معاكم ...
عائشة: الحين انتو تعزمونا وتذلونا !!! مايسوا علينا ...مره ثانية
بنروح بروحنا.. صح عندوه..
جاسم: معليه ...كان اسمي سوسو روحوا بروحكم...وكلمه زيادة
بتنزلون..
العنود ببراءة: وانا شلي خص ؟؟ انا ساكته ...ناصر شوفه...
ناصر: جاسم...اسكت عنهم...
ادار لهم فيروز
وقفوا في مواقف مجمع رويال بلازا التي تقع تحت الارض واستقلوا
المصعد للدور الثالث ثم توجهوا لليمين ودخلوا للسينما فسألهم ناصر: حد يبغي ياكل والا يشرب شي؟؟
طلب جاسم قنينة ماء ووقفوا ينتظرون ناصر ليحضرها ثم دخلوا معه للصالة كانت
مقاعدهم في وسط قسم العائلات فأجلس جاسم اولاً على الطرف ثم
جعلهم يجلسون بجانبه وجلس هو في الطرف الاخر بجانب العنود …
سألته بصوت منخفض: وش اسم الفلم؟
اعطاها قصاصة التذكرة وقرأت Bright Star
وسألته ثانيه وهي تميل اليه قليلاً: وش نوعه؟؟
ناصر: من النوع اللي تحبينه ...
تبين له لاحقاً ومن احداث الفيلم أن قصة الحب تقع بين بطل حالم
وبطلة واقعية بعكسه هو والعنود.. هي الحالمة بينما هو الواقعي...كان
يسترق النظرات ويرى وجهها القريب منه وهي مندمجة مع
الاحداث ..لم يكن يصدق مدى قربها منه ...
كانت على بعد سنتيمترات قليلة فقط...وعند نهاية الفيلم وقبل أن
يشغلوا الاضاءه كان ناصر واقفاً عند اعلى الدرجات ممسكاً به جاسم
والفتيات خلفهما ...وغادرا المجمع ...وفي السيارة قال لهم ناصر:
بوديكم مطعم مارحتوه من قبل...
عائشة:أي واحد..
ناصر: مطعم خزانه الهندي..
جاسم: وين ذيه؟؟
ناصر: في سوق واقف...
جاسم: بللللل...هناك؟؟؟؟
ناصر: في ظهره ...وعند وزارة الخارجية ..ماعنده زحمه ..لأنه
غالي ...
جاسم: هالايام مافيه شي غالي على هالناس..ما شاء الله العالم
مستبطره..
ناصر: انضلهم ...افقرهم...خلهم يخسرون حلهم وحلالهم..وانت
بتتبعهم لأنهم عقب مهب بانين لهم شي...
خافت عائشه فقالت: الله يزيدهم..
جاسم وهو يضحك عليها : مهب لله هالدعاء..
وصلوا للموقف الرملي الخاص بالمطعم وصعدوا الدرج لحديقة صغيرة
وزعت طاولات فيها ووسطها كان جسر خشبي مشوا عليه ومروا على
بركة ماء صغيرة بها اسماك زينة وبجانبها قفص به ارانب وحوله
اطفال يعطونهم اوراق الخس ابتسمت العنود وهي ترى الاطفال
فرحين ...وفي نهايته درجات قليلة للمبنى ولشرفة كبيرة بها بعض
الطاولات المستطيلة جلس على احداها شابين قطرين
وعلى اخرى عائلة اجنبية فأختار ناصر الاخيرة ووضع يد جاسم على
احد المقاعد واشار للفتاتين أماكن جلوسهم وجلس بجانب جاسم
وجاءهم المترودوتيل ووزع عليهم قائمة الطعام..
طلبت عائشة وجاسم برياني دجاج وطلبت العنود كاري دجاج وناصر
طلب ربيان بالكريمة...
عائشة: الجو يهبل ..رومانسي..
سرحت العنود عندها ونظرت الى الشارع البعيد الذي يؤدي للكورنيش
ولاحظ ناصر ذلك...فسأل عائشة: شخبار الكلية؟؟
تنهدت عائشة بقوة وردت : شقول وشخلي ...
جاسم: لهدرجة...
عائشة: اول شي عندنا مناظرة سياسية بيسونها في الجامعة وعزموا
كولن باول اللي كان وزير خارجية امريكا ويبغيني اكون في الفريق اللي
يرتب الموضوع كله..
جاسم: So….
عائشة: حاط معانا واحد ممل وسخيف ...
جاسم: شسمه ؟؟
عائشة: فهد بن سمعان..
ناصر: ولد سمعان ماغيره..؟
جاسم: اكيد هو لأنه مافي الا سمعان واحد فالدوحة..هو سوالج شي؟؟؟
عائشة: لا...لا...يخسي ...مايقدر...تدري فيني كيف اتعامل مع
هالنوعية..بس..
جاسم: بس..ايش؟؟
عائشة:اقولك ممل ...شايف عمره ...هو سنة تخرج..ويحسب نفسه ولد
الامير..
ناصر: لا تعطينه وجه ...
عائشة: من اللي قالك اني اعطيه ويه اصلاً ..بس بعد ما ادانيه...
جاسم: محد قالج دانيه...خله يولي ..
عائشة: والعميد..
ناصر: شفيه ؟؟بعد ماتدانينه ؟؟؟
عائشة: لا...فهد يقول ان إذا ما اشتغلنا معاه بنخسر الكردت اللي
بيعطينا اياه.. وهم اصلاً مايعطون كردت ...يمكن يقص علينا ..
جاسم: قحط...كل الجامعات الامريكية تعطي كردت حق هالاشيا..
ناصر: انا رايي انج تشتغلين معاهم بتكسبين خبره...حتى لو بدون
كردت..دايما حاولي تستفيدين من دراستج في الجامعة بكل الفرص
المتاحه لج...
جاسم: اي والله بتنفعج في شغلج عقب ...
عائشة : قولكم؟؟؟
ناصر مبتسماً لكلمتها: قولنا ..
قبل أن ينتهي العشاء وضع ناصر الشوكة في صحنه ونظر للعنود
وسألها: شفيج؟؟ المطعم مهب عاجبج؟؟
تفاجأت من سؤاله فردت : مافيني شي....المطعم حلو ..بس الكاري حار
وايد...
ناصر: اطلبي شي ثاني خل الكاري يولي..
العنود: لا ..خلاص ما ابغي..
رفع ناصر صحنه ووضع قطع الربيان الباقية كلها في صحنها وقال:
اكلي هذيه...لذيذ..ومهب حار..
دُهشت العنود من تصرفه وفتحت فمها تلقائياً ..
ناصر ساخراً : مادام فاتحته حطي فيه نتفة ربيان...
قطعت منه بتلقائية وأكلته فأبتسم ناصر..
في السيارة في طريق العوده..
عائشة: شرايكم نسويها طلعه اسبوعيه..؟
ناصر: أن شاءالله عمتي...اليوم طلعتنا كلها كانت عشان العنود ...
عائشة: وأنا الشيخة عائشة...وبتطلعني الاسبوع الجاي...هذا إذا انا
فاضيه..تدري يمكن انشغل مع العله العميد والعلل اللي معاه...
ضحكوا جميعاً فقال جاسم: طالعه علي...مايملى عينها حد ..
في صباح اليوم التالي
دخل مبنى الشركة رجل في الاربعينات من عمره يرتدي ثوب مفتوحة
ازراره ويرتدي طاقية مصفره كانت بيضاء عند بيعها وغترة مماثله
يمسكها بيده ..وسأل موظف الاستعلامات عن ناصر فأخبره بأنه لم
يحضر بعد وسأله عن اسمه وعما اذا كان لديه موعد معه..
فقال: لا..بمر عليه مره ثانية..
الموظف: بس ماقلتي شسمك؟؟
رد عليه الرجل: انت قولي متى بيجي؟؟؟
الموظف: يمكن 9 ونص..بس انا قلتلك..لازم موعد..
أعطاه ظهره ثم خرج من الباب الذي دخل منه..
بعد ربع ساعة وعندما حضر ناصر للشركة أخبره عصام عن ما قاله
موظف الاستقبال ..استغرب ناصر وقال : يمكن طرار...بس الطرار
شيعرفه بأسمي..!!
اسمع قوله إذا رجع يعلمك ...وانت علمني..
فيما بعد وقبل نهاية الدوام بدقائق دخل عليه عصام يخبره بعودة ذلك
الرجل فأمره بإحضاره اليه في مكتبه وتركه معه ففعل...
أدخل عصام الرجل عليه واغلق الباب خلفه فرفع ناصر رأسه ونظر
للرجل وتوقف الوقت في تلك اللحظه وأحس برأسه يدور في
مكانه ...وتصبب العرق من جبهته مع ابتسامة الرجل له قبل أن يقول :
نصور ...والله وصرت نظيف ...مثل الشيوخ اللي كنا نشوفهم من
بعيد ...
ناصر وهو والدوار يتحول الى صداع ..: نعم ؟؟؟
الرجل: ماعرفتني؟؟؟ أنا ماجد ...للهدرجة أنا شكلي متغير؟؟؟
ناصر: لا ..ماعرفتك .. شتبغي تسأل عني؟؟
الرجل وهو يضحك ساخراً: ماعليه ...نسيتني !!! والله انا ابغي شوي
من النعيم اللي انت عايش فيه ...
ضغط ناصر على جرس ودخل عصام بسرعه فأمره: هالرجال طلعه
برع ولا عاد اشوفه في الشركة مره ثانية وأذا حاول يدخل نادوا له
الشرطة ...
الرجل: تطردني ...أنا !!!...معليه ...أنا اراويك ...
دفعه عصام بقوة لخارج المكتب وهو لازاله يصرخ ...: براويك
يانصور...والله لا اراويك يانصور..
ارجع ناصر مقعده للخلف واخفض رأسه وامسكة بقوة عل الصداع يخف
وأخذ يضغط عليه بقوة .. ولكن بلا فائده ..فتح الدرج العلوي وبحث
عن حبوب الباندول أخذ حبتين وشرب القليل من الماء وارجع رأسه
للخلف وانتظر لبعض الوقت ثم غادر الشركة...وتوجه بسيارته الى
المزرعة وأتصل بالحارس ليجهز البيت له..وبعد ساعة كان عند الباب
الحديدي للمزرعه عبره خلال الاشجار المزروعة
على جانب الطريق الرملي والذي ينتهي عند مجلس الرجال والذي بنيت
امامه خيمة شعر كبيرة انتظاراً للشتاء القادم على الابواب ....شاهد بيت
ابو جاسم ثم الحديقة الكبيرة ولف حولها حتى وصل لبيته الصغير
والذي بناه في طرف المزرعة على مسافه ليست بعيده من اسطبل
|