..(الفصل الثامن )..
قامت من النوم وجسمها متكسر ..وتحس حريق في ايدينها ..طالعت ايدينها بعيون فيها مثل الغيم ..كانت تلاحظ الجروح السطحيه ..
ولمستها..وحست بألم خفيف ..قعدت وطالعت شيخه متكوره جنبها نايمه ..شهد مارقدت اليوم معاهم رقدت مع ابوها ..
قامت من سريرها دخلت الحمام (وانتوابكرامه) غسلت ويهها ..وصلت صلاة الضحى ...ولبست جلالها ..ونزلت تحت ...
كان الهدوء يلف البيت ..مافيه اي حركه ..
قعدت على الكنب بتعب ..ومددت ايدينها وهي تتثاوب..بصوت من وراها :سكري حلجج لايدخل فيه طياره..
نور وهي تلتفت وظهرها يعورها : وجعع
شيخه وهي تضحك : وين افراد القبيله ...؟
نور : مادري يمكن هاجروا ..
قعدت جنب نور : اي والله ياريت اول وحده نوري وحصيص ..
نور وهي تتذكر اللي صار لها امس ..: بكيت وجهها ..خلي تقوم الدب..اذا مالعنت خيرها ..جوفي ايديني ..تشمخت..
شيخه وهي تضحك على منظر ايدينها ..: ياحضج ..مب انا ..طحت تحت ظروس اخوج ..
نور وهي تضحك : هههههه تستاهلين ...عشان ماتحبين واحد من ال........
شيخه وهي تحط يدها على حلج نور : وجعععععععع كذا على بلاطه يالدب ..قصري الصوت لحد يسمع ..
نور وهي ادز شيخه : وخري كتمتي نفسي ..واللي يرحم والديج كلهم خايسين رقاد اليوم سبت ..لو يصير هجوم محد قام ..
شيخه : وامي ويدتي بعد !
نور : لا...امج ويدوه راحوا لسوق واقف ..
شيخه : اها...زين قومي جيبي لنا ريوق ونسكافيه ..
نور : ليه انتي تعطيني معاش اخر اشهر ..؟
شيخه : ايه ..
نور وهي تكفخها على راسها ..: تخسين ..تبين روحي قولي للخدامات ..
شيخه : بكيت ذا الخشه ..هاذا وانا ضيفه عندج ..
نور : معليه عشان يكون عندج خبره في بيتج المستقبلي ..
شيخه : وجع ..
نور : شيوخ مايلبق لج السحى ..
شيخه : ليه ويههي مغسول بمرق ..
نور : ايه ..
شيخه : نور تلايطي ..ذليتي اخلاق على كم خبزه وقلاص نسكافيه..
وقامت تروح المطبخ ..استوقفتها نور : شيوخ خلي السكر زياده في النسكافيه ..
شيخه : اقلبي ويهج ..وراحت للمطبخ
..
--------------------------
---
كانت قاعده في غرفة الريم تتنظرها ..من طلعت منها من شوي ..مسكت لها قصه اظاهر ريم كانت تقراها ..طالعت ساعتها ..اكيد
البنات قد قاموا ..غلا عدلت قعدتها ..وحطت ريل على ريل ...وين راحت هالريم ..نزلت القصه ومسكت طرف شيلتها وقعدت تلعب
فيها .
انفتح الباب بقوه ..ونقزت من الخرعه ..: ريم خر.....ووقفت الكلمه في حلجها ...وقف شخص مب غريبه ملامحه في ايطار الباب
وكان ماليه بطوله ..كان بيقول شي بس الكلام وقف في حلجه بعد ماشدته العيون السود الملاينه حيره ..اشتبكت نظراتهم ..حمد حس
ان قلبه صعد لبلعومه من جافها وقلبه ينبض بقوه ...غلا كان تحس برجفه في اوصالها وقلبها ينبض بشده ..وشدت اصابعها على
طرف الشيله لين لبيضت اصابعها ..ونزلت عيونها ..من الاحراج ...
حمد وهو يبلع ريقه ..: انتي من بنات خالي عبدالله ؟
غلا رفعت عينها في عينه تحاول تتعرف على مقصده ...بس الاجابه الي صدرت منها هزت راسها ...موافقه .
حمد كان عارف انها غلا من بعد ماعرف من سعد : انا حمد ولد عمتكم عفرا.
غلا بطلت عيونها بتساع ..تذكرت منظر ابوها ..اشتعلت عيونها بنيران حقد متقد ..:زين اخ حمد ...ماتظن ان المكان غلط الي واقف
فيه وتعرفني على نفسك ...وبعدين شلون تدخل غرفة البنت هالشكل وافرض اني مب بنت خالك ..عادي عندك جذي تدخل ..
حمد رفع خشمه بكبرياء وبرود ..: اولا شكرا على حسن ترحيب بنت الخال ثانيا هاي غرفة اختي رضيعتي ماكنت ادري ان فيها حد
لاني جفت الريم نازله وثالثا مب ضروري اشرح شقاعد اسوي في بيتنا لج ..
غلا : لامب ظروري بعد وقفتك هني..... ماحب حد ييب لي الحجي ...
حمد بغضب بارد : الحمد الله الكل يشهد بأخلاقي ..الدور والباقي ..
غلا بعصبيه : قلها عشان اقص لسانك ..الحمد الله بنات عبدالله عمرنا ماركبتنا العيبه تيي انت اخر شي ..وهي تأشر بأصبعه
بستخفاف ..
حمد : والله وماعرفكم ..والباقي اظن مثلي ...فابلا هالمثاليات المفرغه ..
غلا انجرحت ...معقوله يفكرون فيهم جذي ...انترست عيونها دموع بس مانزلت حفاضا على باقي كرامتها اللي اهدرتها ..طالعته
بكره عميق ..وصدت بويهها الصوب الثاني وعدلت جلالها ومشت من جدامه ..وهي رافعه راسه ولا التفت له ..وانصرفت لبيتهم من
غير لاتنتظر الريم وتاخذ الكتاب ..
حمد دخل الغرفه وقف عند الدريشه وحط يبهته على الدريشه وطالعها وهي تمشي بخطوات بطيئه ومنزله راسها بعد ماكانت رافعته
.. انا شسويت ..مادري ليش رديت عليها هالشكل ..استفزتني ..بس ماكان ودي اجرحها ..كان شعور الندم مقطع يوفه خصوصا بعد
منظر الدموع العنيده في عيونها
...
|