منتديات قصايد ليل - عرض مشاركة واحدة

06-11-2011

(6)
بندر و سعود و هشام كانوا جالسين في الاستراحه ، بندر منسدح في الكنب و طلع السيجارة وبدا يدخن ، سعود كان يناظر فيلم (كازينو رويال)... اما هشام كعادته قاعد يصرح يقول : زواج اختي بعد اسبوعين شفت وشذا الزنقه يعني مااقدر اطلع اغير جو..!
بندر باإبتسامه : غريبه توقعتك تروح مايهمك لان اعرفك ألزم ماعليك الا اللي خبري خبرك... وبعدين عادي انت دلخ مايهمك بس قل انك حاسب حساب ابوك وعماني الشياب ( و يغمز له )
سعود التفت وقال : هاه انت واياه أنا اتركوني خارج القائمه السوداء..!
هشوم باستعباط : اي خابرين انت حاطينك سبير..
بندر : هههه
بندر : انت ياسعود تكملة عدد..
سعود : يا درج انت واياه يا قواطي اقصد إذا راحت امي تخطب لي مايقولون ولدك عنده شيء كل شوي منطنط ينقل راسه هنا وهناك زي بعض الناس يوم خطبوا له قالوا اهل البنت كذىىى.
هشوم: ***ركر ماتضحك يامصلك بسس.. (هنا دق جوال هشام ناظر مين المتصل ابتسم وقال عن اذنكم.. )
سعود : يلا اشتغلت الحركات النص كم... عيب كبرتوا على هالحركات ايه اكيد تأخرت عليها ..
هشام وده يذبح سعود وكان يشر له اني بقص رقبتك ... وكان المتصل كأنه يسأل عن فوضى سعود..
( بندر كان يدخن ويبتسم بصمت )
هشام : ابد عيوني بس عندي شايب مخرف يبي قهوة و غثني بصوته العالي خبرك الشياب امرهم امر..!
سعود ناظر بندر وقال : إما هشام عنده موهبه تمثيل مو صاحية تبرق و ترعد...
بندر ماقدر يمسك نفسه : ههههههاي حلوه تبرق وترعد
بندر : لا يغرك تراه ماحولك احد دجه بس صوت على الفاضي...
(هشوم انزعج من قلة ذوق عيال عمه على قولة اللي يحاكيه )
هشام طلع يكمل كلامه بالساحه...
بندر : إلا ياسعود كيف بدر مبسوط انه بيعرس؟ يااخي مدري وش مشقيه ؟
سعود يناظر الفيلم بجو لأن اللقطه كانت لحظه رومانسية ماتفوت..،
بندر رفع صوته : سعود وصمخ.. اسألك انا.؟وش اخبار بدر ؟
سعود: هااه ايه مبسوط.. الرجال بيتزوج مسفهل مره..مابقى إلا انا وانت ندربي رووسنا كأنا قواطي ..
بندر : هههههه مين ماسكك ...( بندر ناظر في اعلى السقف )
وواصل كلامه : ياشيخ طير بس اطلع من مخي.. اللي ابيها تقرقع في بالي ولا لقيتها ابيها في طيبة أمي وحنانها بالعربي ابيها نسخة مكررة من أمي . ( لاحظوا ذي امنية أي شاب سعودي ^_^ )
سعود : ايه بس زانت علومك اذا تبي زي امك عسى الله مانتب لاقي .. عندك اربع عمان وكل واحد ما شالله معه درزن اقل شيء يعني بنتين اختار لك وحده تجوز لك ( ويغمز سعود لبندر)
بندر: إذا حجت البقر على قرونها ذيك الساعه افكر بالزواج من العائله..!
سعود ينفض ثويه : يارب اني برئ منه وأنه مجنون ومضيع لا تواخذه..
بندر : هههههه
وبعدين بندر قام وطلع لأن عنده استلام بدري ركب سيارته البي ام دبليو ، وحرك..ضغط المسجل وذا ابو نوره " الاماكن اللي مريت انت فيها..عايشه بروحي وابيها بس لكن مالقيتك"
(آه بس) طلعت من قلبه واهو مار ناظر بهايبر بنده وغني بإحساس : الاماكن كلها مشتاقه لك ماهو بس انا حبيبي..
في هذه الاثناء كانت زينة متحطمه كليا واهي تقول دايم حظي ناقص ياسبحان الله..فكرت زينة كثير لين صدعت تعبت وضاقت... آه بس عجزت عن قلبي آه من قلبي نصحته بس عيا ينتصح نبضه يبيه...! فكرت تشغل نفسها عن التفكير حتى تنساه يتهنى في حبه... آه بس ياليتي ما شفته..! حاولت تنساه حتى انها كتبت خاطره ترثي نفسها ذاك الليله...
زينة تفكر وتقول بنفسها : ضروري انام بكره عندي محاضرة اولي يارب تستر ولا انام عنها بس... هنا دق جوالها.
.المتصله اميرة : هلا زيون عسى ماصحيتك بس؟ زينة: لا وش دعوى مابعد نمت
اميرة : طيب بليز مريني بكره بروح معك الجامعه لأن محاضراتي بدري ان شالله
زينة: طيب يا سكره ..
اميرة: طيب بون وي... زينة: بون وي..
"
"
"
(7)
زينة صحت للصلاه ولا نامت بعدها جلست روقت بقهوة ، وراحت وقفت عند خزانة ملابسها قررت تلبس بلوزه قطنية فوشي من برمود على تنورة سوداء من شانيل طبعا شانيل أكيد قصيرة، بعدين فتحت شعرها الطويل وسووته (وفيي ) تمويجات حلوة.. اخذت معها شنطتها من قوتشي فتحت الشنطه لقت عطرها من فرساتشي... اعاد فيها ذكريات ذاك اليوم الممطور... بس طنشت لأنها سمعت اميره تقول انه يحب..
زينة طلعت بعد مافطرت...قالت للسايق يمر اميرة... اميرة كانت جاهزة بسرعه ركبت...
اميرة: صباحك سكر زيون..
زينة : صباحك ياسمين..
لبست زينة نظاراتها من بولغاري و سندت راسها على المرتبه ،
اميرة بحيوية: يختي متى تتوقعين زحمة الرياض تخف..؟ قرف غصب الواحد يفقد اعصابه..
زينة باإبتسامه: فديت الرياض وزحمتها..
اميرة: لااااااااااااااااه صدق والله.. الدنيا اذواق ، الله يخلف عليك يالمعفنة..،
زينة: اقول انزلي بس ولا يكثر ، قبل لا البوابه تصير زحمه ونروح فيها عاد لا انا ولا انت كلنا عصاقيل... اميرة : كم محاضرة عندك ؟
زينة : اربع ، وأنت ؟
اميرة : خمس بس قولي آمين أن الدكتورة نادية تغيب جعلها ان شالله... ....
زينة : يالله صباحك الطيب وفرجك القريب..خير روقي يختي..،
طول الطريق واميرة تدعي انها تحصل اوف عشان تأخذ تور على الكلية..
0
0
0 0
في وقت البريك ، زينة كانت تشرب عصير وبطرف عينها شافت اميرة تهجول مع صاحباتها وتأكدت ان الدكتورة نادية غايبه...
وقت آخر الدوام ركبوا البنات بالسيارة..
زينة : الله يكفيني شرك دعوتك استجيبت وغابت الدكتورة نادية..
اميرة : اي غابت جعلها ما تعود...
زينة : اعوذ بالله من الشيطان..
زينة : تصدقين ناقص علي كتاب ولا حصلته ، مع ان شكسبير مؤلفاته مطلوبه بس ما حصلت هالمسرحية..! اميرة : وشي اهي كانها از يو لايك ات عندي تعالي البيت واخذيها،
زينة: مقدر عندي مواعيد ضرورية بس تدرين الحين وأنت نازله هاتيها ؟
اميرة : زين يلا ذا احنا وصلنا البيت انزلي معي اخذيه..
زينة : مستحيه الظهر وبعز القايله بعد
اميرة : اقول تلايطي بيت عمك عادي بعدين مافي احد كل بدوامه..
(نزلت اميره و وراها زينة دخلوا البيت بعدين مباشرة لغرفة اميرة.. وأخذت زينة المسرحية وطلعت لأنها خايفه تتأخر..واهي نازله مع السلم كانت شنطتها بيدها والكتاب ومعها مجلتين سيدتي اخذتهم من اميرة بيدها الثانية..دق السايق يستعجلها راحت تركض واهي بالسلم رافعه النظارة فوق الطرحه..وهي نازله..)
صار حـــــــــــــــــــــــ ــــــــــــــــــــــــ ــ ـــــــــادث
اصطـــــــــــــــــــــ ـــــــــــــــــ دام محــــــــــــــــــــــ ــــــــــــــــــرج
وعنيف بنفس الوقت
صدمت بندر واهو طالع غرفته بالدرج ... كان توه طالع من الدوام ومعصب ، كان يشتغل بأوراق بيده
،الصدمه كانت قوية جدا لدرجه ان الكتاب طاح والنظارة انكسرت وشنطتها طاحت عند رجل بندر..
بندر معصب حده.. زينة صرخت
بندر: عمى..ماتشوفين وش فيك..؟
زينة انحشرت وما تخيلت نفسها بهالموقف..
(بندر لاحظ متأخر انها مو اميرة ناظرها وانبهر بجمالها الاكثر من رائع ، وتذكر هذا الوجه الحلو وين شايفه وووووووين ياربي وين ؟؟؟؟ أي بسس ذي اللي شفتها بهايبر بنده )
فكرت تلم اغراضها بس تركتهم وغطت وجهها و هي تبكي بنفسها..
بندر ناظر يدها اليمنى كتاب آز يو لايك ات فور شكسبير و يدها اليسرى شنطة فوشية مش غريبه علية طبعا العطر طاح وانكسر وانتشرت ريحة عطر فرساتشي اللي رسخت لبندر شي في باله كل يوم يزوره..
بندر انحرج مره : سوري لا تواخذيني احسبك اختي اميرة..( على باله من صديقات اميرة)
بندر يجمع باقي اغراضها معها واهي هربت..
بندر: يو لحظه تعالي يا...! اغراضك..؟ يا بنت.. يابنت.. شنطتك..؟
وتفحصها عرف وتأكد انها اهي اللي شافها ورسخت بمخه..!
اميرة نزلت بسرعه.......
أميرة : خير بندر وشذا الصراخ.( و ناظرت) قالت : يو اغراض زينة ! ليش شنطتها كذى طايحه و ناظرت بعيد شافت نظارتها مكسورة...والعطر بعد وش اللي صار..؟
بندر : ههههههههههههه
اميرة بخوف و صدمه : وش سويت يالخبل ؟
بندر: و أنا نازل واهي طايرة صدمتها...
اميرة : يلعن شكل شيطانك يا بندر. وتضحك يالشين ..اكيد البنت فقدت عقلها صدمتها ماتشوف عساك اللي مانيب قايله ... حشى صدمت عامود كهرب مو انسان ... انت ما تشووووف ياربي يافشلتي منها الله يأخذ عدوك
بندريطبق شماغه اللي طاح ........
بندر : بالله دقي عليها شوفي وش سوت لا تكون انهبلت..! او انخرست لانها صرخت اول ماصدمنا بعض وبعدها أحاكيها ولا ترد..
اميرة : ولك عين بعدد من عذرها الله يلوم اللي يلومها انت تدري كم طولك عملاق تخرش اللي يشوفك عاد كيف يصدمك...
بندر: هههههه بالله دقي عليها..؟
اميرة دقت عليها المفاجأه ان جوال زينة دق بالصاله يعني بشنتطها اللي هربت و تركتها عندهم..
بندر: امشي اوديك لها اخذي اغراضها وتطمني عليها وامانة قولي لها اني ماشفتها واني صرخت عليها احسبها أنت..
اميرة شهقت : ياسلام عيني عينك وأنا اسمعك يابندر وبعدين من متى وانت توديني مشاوير بعز الظهر دايم ما تطق لي خبر وش معنى الحين هااااااااه
بندر: انت اختي و نمون مع بعض بس هي كسرت خاطري مسكينة تكفين اميرة اخوك طلبك تردينه..؟
اميرة : وأغراضها اللي كسرت النظاره والعطر وماإلى ذلك..!
بندر : اجيب لها غيرهم واحسن بعد بس يلا يمكن تبي اغراضها !
راحت اميرة دخلت على زينة بغرفتها اللي كانت تبكي بقوة كانت جالسه على سريرها وفاتحه شعرها وكحلها سايل من الدموع..
اميرة : زينة أنا آسفه احرجتك بس غصب تعرفين أنا ما...
زينة قاطعتها : عن جد ما قصرت وبس..
اميرة : يا بيخك زينة يعني مدبره هالحركه الله وحده اللي يعلم نيتي..
زينة: بس انت اصريت اني انزل ليش ما قلت لي ان اخوك يطلع بدري..! حرام عليك كذى يعني انا ما أستاهل منك كذى وبعدين لو تدري امي بتكسر راسي عارفه..! و استمرت تبكي...
اميرة : أنا آسفه زينة ادري الموقف صعب بس غصب وربي يعني صدفه ذاك اليوم شرف بدري..،
زينة: على حظي جا بدري لا وليته اي شي صدمني ياأميرة بقوة يعني تخيلي رفعت راسي وجهي بوجهه...والله خفت.. كنت بموت خصوصا يوم زعق علي
اميرة : هههههاي ليتني شفتكم بس
زينة: اي اضحكي جعلك تشوفين اللي شفت...
اميرة: لا تكفين ادعي اني ارسب ولا يصير كذى، المهم اسمعي بندر يقول انه يعتذر لك ومتأسف كثير...وحتى هو منحرج منك..
زينة: اخوك ذا مايستحي بجد ياختي خلاص ماصار إلا خير بس تكفين قولي له زينة عندها طلب انك ماتقول هالسالفه لاي احد..؟
اميرة : وصل وبصفقه لك حتى يتأدب.( .<-- آخذه مقلب بنفسها اخخ )
زينة: يختي أنا اللي بليته جايه في بيتكم...
اميرة : لا يكثر بسس..........
دق جوال اميره هذا بندر..
اميرة: اكيد حصل بوتيك بولغاري وخذا لك النظارة..؟
زينة: يؤيؤيؤ يافشلتي لا يااميره امانتك دقي عليه قولي خلاص ماله داعي ..
اميرة : لا وبعد بيجيب لك بدل عطرك..،
زينة : امانة دقي عليه قولي خلاص لايجيب شي او بزعل...
اميرة : ذا بندر مابعد عرفتيه لاقال كلمه ماتصير ثنتين...،
(بندر دق للمره الثالثه على جوال اميره ردت .)
بندر: انزلي بسرعه ...
اميرة: يلا بنزل لبندر ،
زينة: مثل ماوصيتك امانة لا يكلف على نفسه ترى عندي بدل النظاره ثلاث وعطوراتي شوفة عينك.. امانه هاه..،
طلعت اميرة وبعد دقيقه رجعت طقت الباب لقت زينة جالسه بالصاله ..
اميرة : انا مالي شغل لقيت الرجال شاريهم ومنتهي...وذي شنطتك وكتابي انتبهي له لا يتقطع"ههههه
ههههاي ياويلك هاه "..يلا سي يو..
زينة: ههههههاي شوفوا الغبية ماعطتني فرصة اسالها حكت بسرعه وراحت.." زينة تضحك من قلب "
فتحت الشنطه لقت نظارة جديدة من دولتشي آند قابانا ومكتوب على علبتها بخط حلو " آسف جدا ماحصلت بولغاري " وابتسمت من قلب وانحرجت بشدة لحظة ما ذكرت وجهه الحلو... وناظرت في العطر مكتوب عليه" ذوقك حلو..وبالمناسبه أنا بعد اخذت لي نفس عطرك" اخيرا لقت كتاب المسرحية مكتوب علية بخط كبير " عفوا محجوز لي من فترة " و انبسطت حيل وطارت فرحه والارض ما تسعها لانه تأكد انها اللي في باله من شهور..
زينة: ياربي وش اللي صار..
معقوله الدنيا تخبي صدف روعه زي كذى..! طول الوقت واهي هيمانة فيه وتسترجع ذكريات الصدمة وتضحك من قلب. (( أي يازينة بس لا تنسين انه يحب غيرك ))
..من الطرف الآخر..
بندر: هاه اميره بشري وش صار؟
اميره : زعلانة وتقول انك وقح وماعندك دم وإمعه... و...... و
بندر: افا لا عاد.. ذا وانا اللي بحياتي مارحت المجمعات رحت عشانها وبعز الظهر بعد
اميرة : ههههههههه امزح طخختها لك كانت متضايقه لانها انحرجت بس وحتى طلبت مني ااطلبك طلب ؟
بندر واهو يحرك الدرقسون وناظر في اميرة
بندر : وشو..؟
اميره : حزر فزر..
بندر : بسرعه لا يجيك كف يعدل خشتك.. ترى مالي خلقك زود على هالزحمة .
اميرة : افا طااايب مو بعيده عليك، تقول الموقف اللي صار امانة لاحد يعرفه..؟
بندر :بسس تأمر امر تبشر بالسعد ان شالله..هي بس مو زعلانة..!
اميرة : إلا تقول ماله داعي تشتري الاغراض...
بندر : اذا كان ذاالي مزعلها ا عادي يابطة ....
أميرة : أنا بطة ياحو ول
بندر : ههه ههه هه الحمدلله اللي عدت على خير..
بندر طول الطريق يفكر سبحان الله كيف بس تكون بنت عمه واهو مايدري..! يقول لنفسه كيف زينة عايشه معي سبع شهور مافارقتني.. آه ياجمالها فديتها هي وشعرها وكل مافيها..! كيف بس هالجوهرة قدامي ولا حسيت آه يازمن بس..! بدأ قلبه يدق ( تك تك تك تك ) نبضات إعجاب