اتقلبت على الجهة الثانية و أنا أستغفر..يا رب تسامحني..أخذت ذنب بنت الناس و أنا أفكر فيها بذي الطريقة..ايش ذنبها و هيا في بيت أهلها ما تدري عن شي...؟!
استغفرت..لكن المرة دي بقوة..لإني حسيت كيف إني حولت الموضوع لشي شخصي..خليت تركيزي على أحلام مو على الفكرة..أنا ليه كده ساير سخيف و سطحي..التافهين هما إلي يغفلوا عن الفكرة و يهتموا بالأشخاص...!
فكرة..ليه مين قال إني حفكر..ما حفكر.. ولا حتى ححاول ..!
*********************************
سعود،،،
صحيت و أول ما قمت..و بشكل مفاجئ..جا اسم أحلام على بالي...
ضربت وجهي بيديني و شديت على شعري و أنا أزمجر !!!
قمت و سحبت فرشتي و اتوجهت للحمام بعصبية..أمس ما نمت الليل و اليوم أول ما أقوم تجي على بالي !!!
خرجت من الحمام و أنا أذكر ربي..أوكي..هذا الشيطان..هوا إلي قاعد يقلقني..أنا المفروض ما أستسلم...!
قعدت أطالع في غرفة جود قبل ما أرجع لغرفتي..كلو منها..من ذاك اليوم..من يوم ما رمت اسم أحلام و أنا مني قادر أوقف تفكير..صح مو مرة لكن كنت أفكر و بين فترة و الثانية ينقز اسمها فجأة ليا..سرت أحس إنو اسم أحلام مشهور..ما أقولكم إني اتعلقت أو حسيت إنها ليا..لا..بس سارت أحلام "أخت أحمد" شخص في بالي..أول ما كانت تعنيني..ذحين أحس بوجودها..زمان كانت زيها زي أي وحدة في الشارع..ذحين سرت أحسها قريبتي...!
حسبي الله و نعم الوكيل...!
خرجت للصالة و لقيت أمي و جود..قاعدين ياكلوا كيوي...!
سلمت على راس أمي:صباح الخير...!
أمي:صباح النور...!
جلست قدام التلفزيون و أنا أسمع جود تقول:عمو أقطعلك كيوي...؟!
قلبت للجزيرة الوثائقية و أنا أقول:لأ...
و بعد ثواني لقيتها قدامي مبتسمة بقطعة كيوي..طالعت فيها:مابغا...
-بس أنا أبغاك تاكلها...
-ايوة بس أنا مابغا آكلها...
-حتردني يعني...؟!
سحبتها منها و رميتها في فمي فضحكت...!
جلست جمبي و قالت و هيا ترجع شعري ورا أذني:استخار عمو حبيبي...؟!
قلت بانفعال من ورا أسناني:لايش؟!
ابتسمت بحلاوة:لحياتو...
طالعت في التلفزيون و هيا تقول:طبعاً لأ..بس والله عاذرتك..أعرفها دي الحالة..لمن نكون عارفين إنو ربنا رح يهدينا عشان نسوي الشي إلي ما نبغاه لو استخرنا..قاعدين نعاند الصح و نعاند نفسنا..تمر عليا دي الحالة كتير بس في حياتي ما استسلمت لنفسي أكتر من يومين تلاتة..أضغط على نفسي و أستخير...
و قامت رجعت لأمي و فتحت معاها موضوع مادري ايش هوا...!
بعد مدة قالت أمي:جود..قومي منورة..خليها تسويلنا فطور...!
جود:أنا بسوي يا جدة..خليها ترتاح...
أمي بنرفزة:خليها تقوم..ليش ترتاح..البيت خلاص قام...!
جود:حرام يا جدة مسكينة..طول الليل معاكي..خليها ترتاح دحين..حرام..أنا بسويلكم فطور..ايش تبغوا...؟!
قلت و أنا أقوم:سوي لأمي..أنا مابغا...!
و رحت لغرفتي..و أول ما دخلت طاحت عيني على السجادة..استغفر الله العظيييييييم..ساير زي الإمعة كلمة توديني و كلمة تجيبني..كل شي ينقال أفكر فيه..كل شي ينقال يأثر فيا..أفففففففف...!
رميت نفسي على السرير..في الفترة الأخيرة ساير كاره نفسي..و متضايق من تصرفاتي و ردود أفعالي تجاه كل شي و كمان ساير مضطرب..فقدت الهدوء و الثقة و فقدت قدرتي على التفكير بعقلي و...
و خلال ثواني غرقت في التفكير في الشخصية مو في الفكرة..من جديد !!
*********************************
جود،،،
قلت لعلي إلي سأل:الحمدلله..أحسها فكت شوية...!
علي و هوا يلف بالسيارة:يمكن اتعودت و اتأقلمت مع الوضع...!
وقف عند بوابة العمارة و نزلنا..قال و هوا يشيل مني شنطتي الكبيرة:طيب و عمك...؟!
و كملنا نقاش لين وصلنا الشقة...
دخلنا و بدأت أنا أروق البيت و أرحمو من بعض آثار تدمير علي و سعود من غيري..طبعاً سعود صغير..على حسب إلي معاه..لو أنا يكون منظم..لو أبوه يبدأ يتمرد من ناحية الترتيب...!
و انشغلت عاد ببيتي و أسرتي...!
عالساعة عشرة خلصت شغلي..أحمد الله بس إنو السبت ما عندي دوام..أصلاً أنا غبية..يوم الربوع ما سويت شي قلك بروح لجدة من بدري و جا علي و خبص كمان يوم الخميس..هوا قلي إنو رجع يبغى يتروش و هناك ما يرتاح لإنو مافي كل أشياءو...!
قعدت على الكنبة في الصالة جمب علي و أنا أتنهد...!
طالع فيا بعدين رجع يطالع في التلفزيون..قال:نومت سعود...
-طيب...
-قولي شكراً...
-شكراً...
حسيت بنظرات علي إلي استمرت مدة مو قصيرة فالتفتلو:ايشبك...؟!
-إنتي ايشبك...؟!
-ما بيا شي..ايشبك تطالع من أول...؟!
-حتعيدي نفس موال أول زواجنا...؟!
ابتسمت بحواجب مقطبة:ايش فكرك...؟!
-فكرني إن..معد فيه شي جديد أتذكره...!
طالعت في علي مستغربة:علي..ايشبك..ضايقتك بشي...؟!
-لا..بس أحس ليا مدة عنك..من زمان ما قعدنا مع بعض..أحس إني فقدتك رغم إنك كل يوم في وجهي...!
-فقدتني؟!،كيف يعني..حاس إني مقصرة معاك في شي...؟
-لاء جود لأ..بس أحس..مادري..أحسك بعدتي عني..بشكل ما يريح...!
سكت و ما عرفت ايش أقول..أوكي يمكن لنا مدة من آخر سهرة حلوة بس هوا عارف..مو بيدي..حملي و تخرجي و تعب جدة...!
ناداني لمن ما لقى رد..طالعت فيه فقال:عارف و مقدر إنك مشغولة بأشياء كثير لكن أنا كمان لي حق عليكي...!
نزلت راسي:أوكي..أنا آسفة لو كنت انشغلت عنك أكتر من اللازم..أوعدك ححاول أرتب نفسي و أنظم وقتي...!
قرب مني و لف يدو على أكتافي:ما أقولك كذة عشان أحسسك بالذنب..أنا بس أبغى أوصلك إنك واحشتني..جود ما قد حسيت إني فاقدك زي ماني قاعد أحس ذحين...!
طالعت فيه و قلت و عيني في عينو:طب قولي مشتاقلك لا تقولي كده...!
سكتنا مدة و احنا نتبادل النظرات..اتنهد علي بعدها و قال:تعرفيني ما أعرف أعبر..أنا اتنرفزت و حسيتك منشغلة بغيري.."ابتسم"..ايش تتوقعي من واحد بدوي زيي...؟!
أخفضت بصري لإني حسيت إني ممكن في أي لحظة أبكي ..نفسي أبكي و أشكيلو بس مني لاقية سبب مقنع و مني عارفة بايش رح أشكي..أنا أحس نفسي مدووشة..أحس فوق راسي أشياء كتير..هم حملي..هم عمو..هم جدة..انتباهي لسعود..و دحين علي و إهمالي الغير مقصود لو...!
حطيت راسي على صدر علي فحضني و هوا يهمس باسمي...!
قلت:ما فيا شي...
-طيب...؟!
غمضت عيني و أنا ألف يدّيني حولين علي:خليني كمان شوية...!
-أوكي..إنتي حرة...
*********************************
جود،،،
صحيت الصباح و لقيت علي مو موجود..اتنرفزت..أكره لمن علي يسوي كده..ليش ما يقومني أساعدو و هوا عارف نفسو يحوس الدنيا و يتأخر لو ما قمت معاه...؟!
يمكن متأثر من حركتي أمس..أو تلاقوه حاسس بالذنب عشانو حسسني بالذنب..حبيبي هوا..حساس و رومنسي..أبغى أفهم أنا ايش يبغوا البنات بالرومانسيين بالكلام..ايش أحلى من إنك تقومي و تلاقي زوجك خارج لشغلو من غير ما تحسي و لا تنزعجي..هدي قمة الرومانسية و الرقة بالنسبة ليا...!
خرجت من الغرفة بعد ما اتشطفت و اتغسلت..سعود كان مشغل التلفزيون و قاعد يتفرج على (بوب ذا بلدير)..هوا كده اسمو صح...؟!
جلست و أنا أقول:صباح الخير...
قال من غير ما يطالع فيا:صباح النور مامي...
-وي..صباح النور من غير بوسة ولا حضن...؟!
قام و جا لين عندي..حضني و جلس جمبي..قلت:من متى حبيبي صاحي...؟!
-مادري..من أول...!
ابتسمت:طب فطرت...؟!
-مممممم..سويت كورن فليكس...!
مسحت على شعرو:بالعافية حبيبي...
مادري ليه حسيت بالخوف..إني أقوم و ألاقي سعود مشغل التلفزيون و ماكل فطورو..بالعادة كان يجي و يصحيني...!
قلت:طب مامي لمن تفطر ما رح تفطر معاها...؟!
ابتسم:أنا سويت شويييييييييييية كورن فليكس عشان لمن تقومي آكل معاكي...!
ابتسمت بسعادة:يسعد قلبك يا قلبي..ايش تبغى تفطر...؟!
طالع فيا:لا أمامي مو دحين..شوية خلي الكورن فليكس يروح من بطني و بعدين آكل معاكي...!
ابتسمت:حبيبي أنا مني جيعانة..متى ما إنتا جعت كلمني...!
حضني و حط راسو بالخفيف على بطني:ماما إنتي حلوة...!
قلت و أنا أمسح على جسمو:عارف إنك زمان كنت تقولي إنتي حولة...؟!
شهق بصدمة طفولية:من جد...؟!
هزيت راسي:آها...
-وي..ما كنت أعرف أقول حلوة...؟!
ابتسمت و هزيت راسي:ما كنت تعرف تقول..
-يا الله كنت نونو زي النونو إلي هنا...
قالها و هوا يأشر على بطني...!
قلت و أنا أمسك يدو:ايوة زي النونو إلي جوتي..حط يدك و حس...!
و قعدت أحرك يدو و هوا يقول:ماما متى يجي النونو...؟!
-مممممم..بعد شهرين إن شاء الله...!
باقيلي أعتقد شهرين إلا..بس ما فيا أشرح الـ "إلا" لسعود...!
-طب ايش اسمها...؟!
-مادري..إلي ييسرو ربك حلو...!
-أنا أبغى اسم حلو...!
ابتسمت:أكيد حلو..أخت سعود لازم يكون اسمها حلو...!
-ينفع لورا...؟!
-ايش لورا دي...؟!
-ماما..همتارو !!
-آآآآه..البنت إلي عندها همتارو..لورا..ايوة عرفتها..لا ما ينفع.أبغى أسماء عربية قوية...!
سعود قعد يتكلم و يقترح من إلي يعرفو و أنا سرحت أفكر في اسم..طالعت في سعود بعد ما جاتني فكرة شريرة..همست في أدنو بشي فبعد عني بحماس و قال:الله..حلو !!
-بس هدا سر بيني و بينك..لا تقول لأحد...!
حط يدينو على فمو:ما أقول ولا لأحد...!
^^^^^^^^^^^^^^^^^^^^^^^^^^^^^^
سعود،،،
قلت و أنا أضحك:بشويش عالبنت...
كنت قاعد أكلم أحمد و دوبي سمعتو يخاصم بنتو و يقولها تروح..الظاهر مضايقتو...!
أحمد:ياخي مني..يا بابا بس خلاص...ها..بعدين..بعديييييييييييين..قاعد أقول بعدين...
قلت:أحمد ابعد الجوال و بعدين خاصمها..أنا ايش دخلني أتهزأ معاها...؟!
أحمد:أعرف طفشتك بس معليش...!
و ما سمعت صوت بعدها غير بكا بنتو..يوه..ايش بكاها..لا زود خصام و لا سمعت صوت ضرب و أصلاً أحمد ما يضرب...!
قلت:بسم الله ايش فيه...؟!
أحمد:ولا شي..حدجتها بنظرة بس..ههههه..
-يا مجرم..نظرة الآباء الحمراء...
-اييييييييوة..بس شوف البراءة..قاعدة تبكي مني في حضني..ها..لا حبيبي مو عنك..والله مو عنك..هذا عمو سعود..قاعدة تسأل عنك تبغى تعرف تستحي ولا لأ..هههه...
-ليه ما تستحي مني يعني...؟!
-لا يعني تتفشل إنك سمعت الخصام و لا لأ..بس عادي ما تتفشل منك...!
-هيا ايش تبغى...؟!
سكت ثواني بعدين قال بهدوء:تبغى تنام...!
ابتسمت:جود كانت كذة...!
-مو لو ما اتعاملت مع جود زمان كان والله ما عرفت أمشي حالي معاها...!
قلت بعفوية:ليه وين أمها...؟!
-ها..تعبانة شوية فـ..أنا مضطر أعتني بطفلتنا...!
-ما تشوف شر..اسمع..عندك أي شي جديد فلة...؟!
-ايش تبغى...؟!
-فلم..مسلسل..طفشااااان مرة و ما عندي أي شي أسويه...!
-عندك فلوس...؟!
قلت بسرعة:محتاج شي...؟!
-لا بس لو عندك فلوس و فاضي ما عندك أفكار أو مشاريع روح اتزوج...!
-أحمد فكنيييي...
-أستهبييييييييييييييل....!
-لااا تستهبل..أعرفها حركات نص كم دي..ترموا الكلمة قلك تبغوني أنشغل و أفكر...!
-ترموا؟!،إنتا الظاهر أحد مطفشك قريب...!
-طبيعي..طول عمرهم و هما يطفشوني...!
-ايوةعارف و أنا معاهم..بس الظاهر المدة ذي مكثف التطفيش...!
-جداً...
-يالله يا شيخ..ييسر الله طيب..الواحد ما يدري وين الخير....!
-من جد..دحين ما جاوبتني..عندك ولا ما عندك...؟!
-لو ما عندي يسير عندي...
-ايش عندك...؟!
-ما عندي شي جديد...
-يا شيخ أبغى حاجة ما شفتها...!
-بالله يا سعود..متأكد ثلاثة أرباع إلي عندي ما شفته....!
-طيب بعدين وصلي هيا بطريقة ما...!
-لا إنتا تعال خذها..كم لي ما شفتك...؟!
-من جد..أحس من بعد ما اتناسبنا معد سرنا نشوف بعض...!
-لإننا اطمأنينا..سرنا أهل..غصباً عنا كل فترة و الثانية بنشوف بعض في أي مناسبة...!
ضحكت بخفة:هواااا ذا..و كل واحد أخس من الثاني..ما نتصل و لا نسأل...!
-بس نحب بعض...
-نعم...؟؟؟!!!
-نعم الله عليك..حاسك تعبان و طفشان قلت أغدقك بالحنان...!
-اغدق الضعيفة إلي بكيتها..خليك بعيد عني...!
-من ايش خايف..أنا الحمدلله محصن...!
ليش كل الناس قاعدة تدقني...؟!
-و أنا عارف ربي...
بعد صمت ثواني ضحك أحمد بقوة و قال:إلي على راسه بطحة يحسس عليها..أنا دوبي شايف مسلسل و واحد من الممثلين قال ذي الجملة..ما قصدت أدقك بالكلام يعني...!
سكت فقال أحمد:تريد شيئاً...؟!
قلت بهدوء:لأ...
-أوكي..أشوفك على خير..مع السلامة...
-مع السلامة...
و فصلت...
يا الله..كنت قاعد أكلم أخو أحلام...
آآآآآآآآآه..أنا..كنت قاعد أكلم أحمد..أحمد صاحبي..صاحبي من سنين..مو أخو أحلام..أصلاً مين أحلام...؟!
ضغطت المخدة على راسي...
أبغى كل خيال سخيف فكرت فيه يطلع و كل لحظة حلوة اتخيلت حدوثها تطلع..لإنو مجرد التفكير..غباء...!
غباء؟!
الغباء هوا إني قاعد أمثل الصلابة..من يوم ما حسيت إنو فيه إمكانية وحدة توافق و أنا حالتي مشقلبة فوق تحت..كلام جود عنها و عن رأيها "العام" في موضوعي قلب لي كياني..أنام عليها و أصحى عليها..اسم أحلام يتردد عليا كل يوم أربعة و عشرين ساعة...!
و ما زلت أنا متذبذب..ما بين أستسلم و أفصح عن رغبتي بمعرفة المزيد و ما بين أكتم...!
*********************************
الجزء التاسع عشر
(ألهمني يا ربي)
كنت في الجامعة لمن رن جوالي رنة الرسالة..رفعتو و إلي ظهر لي إنو الرسالة من عمو..لحظتها..فقد قلبي دقة من دقاتو..اتفاءلت و اتشاءمت..عشان كده فضلت أروح أطمن على سعود و أقعد معاه و أفطر...!
لمن وصلت لعند سعود و شافني وقف و جا عندي..مدلي يدينو فشلتو و بستو:هلا حبيبي...
و رحت و قعدت معاه في مكان الجلسات و قعدت أفطر معاه..قال:ماما خلصتي...؟!
-لا حبيبي...بقيلي محاضرة وحدة...!
-أول جيتي و خلاص...!
-حبيبي أول كنت مصدعة و مابغا أحضر المحاضرة...!
-طب دحين إنتي مصدعة...!
-بسم الله عليا..لا مني مصدعة..قول كلام طيب !!
-ماما إنتي أكلتي اليوم بنادول...؟!
-ايشبك إنتا...؟!،تبغى تروح البيت يعني...؟!
-لأ..بس مابغا أقعد هنا تاني...!
قطبت حواجبي:ليه أحد قلك شي...؟!
-لأ..بس فيه ولد معفن...!
-ولد معفن..ليه ايش سوا...؟!
-قرفني..مو راضي يمسح خشمو..أعطيتو منديل مو راضي..مسح بيدو و قعد يلعب بالألعاب..وسخها ما قدرت ألعب...!
ابتسمت:خلاص حبيبي يمكن أمو ما علمتو..لا تقعد تتريق و تتكلم عليه...!
كمل أكل من غير ما يعلق و رفعت أنا جوالي و فتحت الرسالة و...
Omg !!
****************************************
سعود،،،
كنت مجنون..مستحيل..مستحيل كنت بكامل وعيي..ايش رسلت أنا..ايش كتبت...؟!
والله ما كان قصدي و لا كنت أعنيها..حتفهم غلط..أنا عارف جود..ما حتفهمها زي ما أنا أقصد..أصلاً ايش كنت أقصد لمن رسلت ذاك الكلام...؟!
حطيت راسي بين يدّيني منتظر الاتصال المتوقع من بعد رسالتي...!
لكن إلي جاني كان رسالة..محتواها ما أعطاني إحساس بأي شي غير سعادة جود...
"أشياء زي كده الجوال ما يصلحلها ^_* "
رميت الجوال بعيد عني..أنا ما قلت إني وافقت..ما قلت إني وافقت..بس قلت أبغى أعرف أكثر عنها..مجرد فضول..ما قلت إني وافقت أو حتى اقتنعت بأفكار جود الملتوية...!
وجع..وجع في كل شي !!
لا و حاطة وجه غمزة كمان..أنا هنا محروق دمي و هيا مبسوطة..ليه مبسوطة ليه؟!
أنا عارف جود ما تختار و لا تُعجب بأحد إلا و هوا يستاهل بس يا عالم فهموها..أنا لو هيا مبسوطة و مرتاحة يكفيني..أولادها أولادي و سعادتها سعادتي..ليش ما تبغى تفهم إني راضي بها جمبي و بس..مني محتاج شي ثاني...!
جود..جود..استوعبي...
يا رب..يا رب يا كريم يسر لأحلام هذي زوج يسعدها و يصونها..ذحين..ذحين يتقدملها و يوافقوا عليه..يا رب..يا رب يا كريم...!
و قعدت أدعي..بصدق و إخلاص لإنسانة..ما أعرف عنها إلا اسمها...!
****************************************
جود،،،
كنت متحمسة..بشكل مو طبيعي..لدرجة علي سأل:"من وين مشرقة الشمس اليوم؟!"
قلتلو:"من الشرق"،و قعدت أضحك و هوا يطالع فيا مصدوم..سعيدة و نشيطة بشكل..و الأهم من هدا كلو إني مرتاحة و واثقة كمان!!
آه يا ربي شكراً..موافقة عمو بس فرحتني..بغض النظر عن موافقة أحلام..لإنو لو ما وافقت معناتو دا نصيب و بعدها يحقلي أستسلم..باعتبار..إنو دي إرادة ربنا..و لو إنو عمو حيكرهني لمدة بسيطة بسبب إحساسو بالرفض بس لو وافقت و اتوفقوا رح يحبني أكتر...!
سعود و هوا يجلس جمبي:ماما..إنتي ايشبك الوم...؟!
-ايشبي...؟!
-مرة طيبة اليوم...
-وي سعود..يعني أنا دايماً شريرة...!؟
ضحك:لا يا ماما..بس مرة فرحانة ما شاء الله ما عصبتي..أبغى أعرف ايشبك...!
-ليه..هوا أنا سايرة أعصب كل يوم...؟!
قال و هوا يهز راسو:لأ بس..تشمبقي كتير...!
-أشمبق ها...
أشمبق يقصد بها سعود أشمق و معناها أعطي نظرة احتقار و أنا ألف وجهي...!
بس هل من جد أنا سايرة أشمق كتير؟!،الأغلب الإجابة حتكون ايوة بس مو على أحد غير سعود و علي..والله صابرين عليا..سعود ما يزعل و علي ما يخاصم..بس لحظة..علي غصباً عنو يتحمل مزاجي..سعود ليه يتحمل..حبيبي هوا..عاقل اسم الله عليه...!
دخل علي الشقة بعد مدة..كان راجع من صلاة العصر..طالع فيا و هوا يقفل الباب..جا و جلس على وحدة من الكنبات و هوا يقول:اليوم مني مرتاح...!
-ليه حبيبي...؟!
فز في قعدتو و قال:شفتي..شفتي..ايش إلي ليه حبيبي..إنتي الفترة الأخيرة سايرة تقولي:خير..ايش صاير؟!
اتخصرت:أقووول إنتا و ولدك..ما شاء الله كل واحد من جهة..دا دوبو يقولي تشمبقي كتير و إنتا تقول إني ما أكلمك كويس...!
قال و هوا يمد يدينو لسعود:عالعموم رجعتي للطبيعي حقك ذي الأيام..معناته مافي شي...!
-علي يعني و بعدين معاك؟!
حط سعود على فخدو و قعد يلعبو..طالع!!،ولا حتى عبرني بنظرة...!
برطمت و قلت بزعل و أنا أقوم:لا تكلموني..ما أحبكم!!
و رحت على الغرفة..أوكي..لازم جدياً أبدأ أفكر بطريقة أفتح فيها الموضوع مع أحلام..بس لا..قبل لازم أكلم عمو عنها..يا ربي..متحمسة..أبغى آخر الأسبوع يجي عشان أكلم عمو..مواضيع زي دي ما ينفع تنقال في التلفون..و بعدين أنا أبغى أخلص كل شي بسرعة عشان قبل ما أولد يكونوا مملكين..والله إني طول الوقت أدعي يتم الموضوع على خير قبل ما أولد..عندي إحساس قوي إنو لو ولدت و هما مملكين ما رح أتعب زي لو ما كانوا مملكين!!
بعد شوية دخل علي عالغرفة و فسخ توبو و علقو..جا بعدها للسرير و اتمدد..قلت باستغراب:حتنام؟!
-لا..بس..أوفففف..أحس نفسي مكسر..لأسباب مجهولة...!
-أمس نمت كويس؟!
-ايوة بس مادري ايش فيني...!
-يمكن من كتر النوم..أمس تراك نمت مرة بدري و كمان اليوم الظهر تعتبر رجعت بدري و نمت لين العصر اسم الله عليك...!
-تعويض الأسبوع إلي فات..كنت ما أنام كويس...!
-لاحظتك..ليه؟!
-طفشاااااااااان..و قرفان من كل شي..أحس روتين قاتل..أبغاكي تولدين بسرعة..ذحين...!
ابتسمت و أنا أحط يدي على بطني:خلاص معد بقي شي...!
طالع فيا:تتحرك؟!
ابتسمت و أنا أطالع في بطني:حالياً لأ...
قرب مني و حط أدنو على بطني و قال:لا تتحرك...
-قبل شوية ما اتحركت...
-بس ذحين تتحرك..جربي حطي أذنك..ولا ما تقدري..حطي يدك حتحسي؟!
طالعت فيه و قلت بابتسامة و أنا مقطبة حواجبي:علي..تراها جوتي!!
ضحك بخفة و هوا يرفع راسو:نسيت!!
اندق الباب و كان سعود إلي دخل و هوا ماسك بيد وحدة الجيم بوي..دخل و قفل الباب..جا و جلس فوق السرير عندنا..قال:طفشان!!
قلت و أنا أرجع شعرو ورا أدنو:ليه حبيبي..ليه طفشان؟!
بوز شفايفو و ما رد فقال علي:ايش فيك...؟!
-أبغى..
و رجع سكت..قلت:ايش تبغى حبيبي...؟!
قال بحيرة:مادري..
-ايشبك..تبغى تخرج..تروح محل معين؟!
-لأ..
-أجل ايشبك...؟!
رفعو علي و حطو على فخدو:عادي..طفشان زي ما أبوه طفشان..صح سعود...؟!
-إنتا طفشان يا بابا...؟!
-ايوة طفشان مررررة..أبغى يصير شي حماس..دوبي قاعد أقول لأمك تولد بسرعة...!
-هيا ماما لمن تولد يسير حماس...؟!
-ايوة زي لمن جيت...!
-أنا سويت حماس...؟!
قلت:طبعاً حبيبي..مرة فرحنا لمن جيت..كان أحلى يوم في الدنيا...!
ابتسم:من جد...؟!
قلت:علي وين الصور حقت سعود...؟!
-كلها في ميموري الكاميرا حقتك...!
قلت:سعود قوم جيب الكاميرا حقتي من الدولاب و علي جيب اللاب توب حقي...!
طالع علي فيا:وإنتي يا برنسيسة...؟!
ابتسمت:أدعيلكم بالتوفيق...!
قال سعود و هوا يتوجه لنا بالكاميرا:بابا..الرسول كان يساعد في البيت حقو..لا تستحي..قوم...!
قام علي:من مين أستحي..من زوجتي و ولدي..بس أنا مالي مزاج أقوم بس حقوم عشان ذكرك للرسول صلى الله عليه و سلم و لا ما كان قمت..أصلاً قمت عشان بس لا أكسر مبدأ من المبادئ إلي تحشرها هاذي المثالية في راسك...!
قال آخر كلمة و هوا يحط اللابتوب قدامي..ابتسمت و أنا أرفع شاشتو:شكراً..مالو داعي تبرر الخير إلي تسويه...!
خرجت الميموري من الكاميرا و دخلتها في اللاب توب..فتحتها و بدأت أدور على جهة صور سعود و هوا بيبي...!
قال علي:خلينا نتفرج عالصور من البداية...!
قلت و أنا أرجع للبداية:أوكي...
و لمن فتحت أول صورة قال علي:يييييييييه..بزرة..
-لو سمحتوا من غير تعليقات..بعدين البزرة دي هيا بغيت تموت عليها...!
قال سعود:ماما أول وريتيني صورتك..إنتي حلوة حتى زمان...!
بستو:حبيب مامي إنتا..مو أحلى منك...!
قلت:الصور الجاية كلها بايخة..خليني أشغل الفيديوات...!
شغلت فيديو الحفلة إلي جبلي فيها عمو الكاميرا و قعدنا نتفرج و نضحك على هبلي و هبل عمو وقتها..قلت:والله لو يدري إنك شفتو...!
-بس والله مرة كان غير..حتى وجهه..أحس ذحين صاير نكدي...!
-حبيبي هوا من الوحدة...
قال علي بنرفزة:هوا إلي عاجبه الوضع..لو يبغى بيلاقي...
قلت في محاولة لإغلاق الموضوع:الله يرزقو بنت الحلال!
و بدأت أقلب في الصور..علي لمن ينفتح دا الموضوع يتنررررررررررفز..يقول إنو عمو هوا الغلطان و أياً كانت أسبابو رح يلاقي لو يبغى...!
و في كلام علي..شي من الصحة...!
سعود:ماما..أنا..ويني...؟!
خرجت من الصورة إلي كنا فيها و قلت و أنا أدور على فيديو معين:علي فاكر لمن كان يبربر...؟!
ضحك علي:ما قد وريتيه...؟!
-مادري واله ..ما أعتقد..كم لي ما فتحت الكاميرا...؟!
لقيتو..و شغلتو..كان فيديو لسعود قاعد يبربر فيه..كان نونو مرة ما كمل كم شهر...!
سعود بدهشة:هدا أنا...؟!
-ايوة حبيي...
كان سعود يطالع بحماس و خدودو محمرة أما علي فكان يضحك و مبسوط و يعلق كل ما اتذكر حاجة...
اتذكرت أنا كمان شي..داك اليوم كان حلو..لأسباب كتيرة..كنت فيه أحاول أرضي علي..لإني زعلتو..من غير ما أحس..اتكلمت و قلت شي من غير ما أدري إنو كان قاعد يسمع..هوا ما عرف إني عرفت لكني عرفت..و كنت أحاول أرضيه بشتى الطرق..حسيت بالذنب قوي يومها!!
اتنهدت و أنا أنفض كل ديك الذكريات من راسي..الحمدلله..أنا لحياتي معنى دحين..دحين قاعدة أعطي مو آخد..أحب و أنحب..أقلق و يقلقوا أحبابي عليا..الحمدلله..يا ربي لا تغير عليا بعد ما أنعمت..يا رب...!
سعود:ماما!!،إنتي صغيرة..
طالعت في الصورة إلي فاتحينها و ابتسمت:ما قد وريتك؟!
-ماما إنتي ما توريني كل شي..بس هديكا إلي في الأول...
ابتسمت:طب كيف حلوة الصورة...؟!
--ماما إنتي في كل الأيامات حلوة...!
ابتسمت فقال علي:والله جود..طالعي..مو حلوة..كان عندك حب شباب...
طالعت في الصورة إلي كانت وحدة من أحلى صوري و أنا صغيرة..كان شكلي فيها حلو و نفس الصورة متقنة و ثابتة..قلت:وين حب الشباب..أصلاً الحمدلله ما كان عندي..إنتا إلي كان عندك مو أنا...!
-متى شفتيه....؟!
-مادري ما شفتو..بس أحس وجهك يركب عليه يكون فيه حبوب زمان...!
-مالت عليكي..والله إني وسيم...!
- أنا قلت غير كده..بعدين الأولاد كلهم تطلعلهم حبوب أول ما يبلغوا مو زي البنات ممكن تجي في ظهورهم أو صدورهم...!
-وااااه..تجي في أجسامكم...؟!
-يب..أحياناً كمان يطلع الدهن في الشعر..هيا أصلاً الحبوب كلها دهون لازم تطلع..و عاد على حظ الوحدة في أي مكان يطلعلها..بس ترى كمان الاهتمام لو أثر..يعني الدهون تتركز في محل واحد بس تطلع في الباقي و لو بنسبة بسيطة..بنات يعرفوا يتعاملو معاها و بنات لأ...!
-إنتي تعرفي...؟!
قلت بغرور:ايوة الحمدلله..أعرف...
-يااااا رب سترك..محد يقولك شي..
-والله كنت أعرف...
-طيب خلاص...
و قعدنا نحاول أنا و علي نلهي سعود و نخرجوا من موود الطفش..و على كل حال..أنا و علي اتفقنا نسوي تجديدات في حياتنا بعد ما أولد..حنضيف أشياء في البيت تعمل تغيير بس ما تكلف كتير لإنها مي شقتنا ولا بيتنا الدائم..كمان أنا لازم أغير من شكلي..كمان لازم...
لازم؟!،اللازم دحين إني أخلص موضوع عمو و أنهيه..قبل ما أولد!!
****************************************
كنا في بيت أهل علي..قاعدين قعدتنا المعتادة و كنت من غير ما أحس أراقب أحلام..و فجأة..حسيتها شريرة..مو شريرة..بس حسيت إنو شكلي حيطلع سخيف لو كلمتها..يا ربي..مادري..أنا استخرت و قلبي يقولي بقوة إني ما أخرج من هنا إلا و أنا مكلمتها..بس كيف..و متى؟!
فجأة أُلهمت بشي..أحلام تنام بدري..و نادراً ما تكمل معانا السهرة..يا دوبك تتعشى و أحياناً ما تتعشى لو اتأخر العشا!!
خلاص..لمن تطلع أنا حلحقها بعد مدة و أكلمها..بس ايش حيكون عذري لو سألتني عمتي وين رايحة..آه..ايوة..حقولها أبغى أسألها عن فلم..لالا ايش السخافة..حتقولي صفاء عندك تعرف كل شي عند أختها..طب..آه..حقولها وحدة في الجامعة كلمتني عنها و طلبتني رقمها..و إنو أنا ما أعطيتها خفت تكون كدابة فبسألها عنها و..
آآآآآه..ليش فجأة أحس كل أفكاري و خططي سخيفة؟!
يا ربي..ألهمني بشي ما يشكك أحد..مابغا أحد يعرف أو يحس بإني داسة شي..كفاياني علي إلي عينو تقولي كل يوم:"ايش وراكي؟!"
قالت عمة إنوا العشا جاهز و قاموا البنات بالتالي يغرفوا و يساعدوا أمهم أما أنا فكنت أرتب السفرة بما إنو عمتي أصدرت قرار بإنو ما أتحرك..مادري ليه بس تقول إنو شكلي تعبان و عمة لمن تقول شي لازم يتنفذ ولا حتستخدم أسلوب السطلة الأموية..عاد اتخيلوا كيف !!
جلست أحلام آخر وحدة عالسفرة و هيا تقول:أبغى..أناااام..
علي:أصلاً متى ما كنتي تبغي تنامي...؟!
عمي:سمي عالبنت..صاحية من الفجر...!
علي:كمان إنتي مع نفسك..خير صاحية من الفجر..ايش عندك...؟!
طالعت أحلام فيا:سكتيه..ما فيا حيل أرد...!
طالعت في علي:علي..
-مابغا..ما بطالع...
ضحكت فقالت عمتي:اهجد عن بنتي و زوجتك...
علي:بنتك و فهمنا..زوجتي ليش..ايش سويت لها...؟!
عمتي:ولا شي..بس ناوي...
علي بفجعة:بسم الله أمي..كيف تعرفي...؟!
-من عيونك أعرف...!
عمي:أمكم رومانسية و حساسة...!
عمي كان يتريق و أنا بصراحة ما أرضى على عمة..قلت بقهر:طبعاً لازم تكون حساسة لعيونكم..مو ما شاء الله النظرة ذي متوارثة..منك يا عمو لأولادك إلي هما أ ولادها..إلي هما أزواجي...!
حسيت بنظرة غريبة..التفت و كان علي يطالع فيا بنظرة مرعبة..قلت:ايش فيه...؟!
صفاء:قلتي أزواجي...
انتبهت و قلت:وي..قصدي..أزواجي أنا و زوجة أحمد..قصدي عمو أحمد..لا تسويلي سيرة...
علي:هيا ايش سويت ذحين...؟!
عمة:أقلقتها..خليها تتعشى...
علي بطفش:طيب...
ابتسمت و أنا أشوف سعود يكلم لينا و يقطع لها من اللحم إلي في صحنو...!
قامت أحلام:الحمدلله..تصبحوا على خير...
قلت:حتنامي...؟!
-ايوة..
-آه..طيب..تصبحي على خير...
-ايه..كنتي تبغي شي...؟!
-ها..لالا..بس كنت أبغى أسألك عن رواية..لو حلوة ولا لأ...
-ايش اسمها...؟!
-مادري..بس حلاقيه لو دورت عليه أون لاين..بس بما إنك تبغي تنامي...
-عادي..ما حنام دحين..حقرأ أول..تعالي...
علي:ايش هوا الكتاب...؟!
التفت لعلي:مادري..مني فاكرة اسمو ولا اسم إلي كتبو أو إلي كتبتو..أنا فاكرة إنو لفت نظري اسمو بس مادري ايش هوا...
جات عندي أحلام و مسكت يدي:طب تعالي..ما حنام علطول..تعالي عادي...
قمت و رحت مع أحلام و أنا أسمعهم يكملوا كلام..طلعت الدرج و قلبي يدق بقوة..مادري ايش حقول..مادري كيف حبدأ..لكن لازم أتكلم..لازم ما أطلع من هنا إلا و أنا مكلمتها..وافقت ما وافقت..مو قضيتي..المهم أقولها!!
دخلنا لغرفتها و اتوجهت هيا علطول للابتوبها..فتحتو و قالت:تعالي..ايشبك؟!
حكيت راسي و قلت بتردد:أحلام..أنا..مابغا أسألك عن كتاب...
طالعت فيا باستغراب:ها...
-أنا أبغا أكلمك في موضوع..هوا..هوا ما ينفع بالجوال و ما ينفع قدام أحد و...
قاطعتني بتوجس:ايش فيه جود..علي فيه شي..إنتي فيكي شي...؟!
-لالا...
-سعود فيـ...
قاطعتها و أنا أتقدم منها و أجلس عالسرير:لا أحلام..ما فينا شي...
-أجل ايشبك...؟!
-أنا أبغى آخد رأيك في شي يخصك...
-خير...
لمن حسيت بتوترها و استغرابها هديت..كأنو ثقتها و هدوءها انتقلوا ليا و أديتها أنا توتري و ترددي!!
-خير إن شاء الله..بس قبل..أبغاكي توعديني ما يطلع الموضوع لأحد..عشان لو سار شي لا سمح الله..محد يعرف إلا أنا و إنتي..و أنا ما اخترتك أكلمك في دا الموضوع إلا و أنا واثقة منك...
-جود..من جد خلعتيلي قلبي..ايش فيه...؟!
-أحلام...
سحبت نفس و طلعتو:أحلام أنا أبغى أخطب لعمو و...
وقفت كلام لمن شفت أحلام تقطب حواجبها..قلت بسرعة:أحلام لا تهتمي بإنو عمي..أنا...
قاطعتني بهدوء و صوت عميق:كملي..
|