ˆ~*¤®§(*§ للدار عز وعزته بالرياجيل §*)§®¤*~ˆ°
للدار عـز.... وعزتـه بالرياجيـل ^^ وللمجد شخصية .. وللحكم... هيبـه
وللسيـف دور وللسياسـه مكايـيـل ^^ وللعقل حكمه في الظـروف العصيبـه
وللشرع عن غيره مكانـه وتفضيـل ^^ من لااتخذ غيـره ذريعـه.. رضيبـه
هذا هو الموجز... واجيب التفاصيـل ^^ في كل شطـر ابـداه.. ولا انتهيبـه
هذي صفات اهل الصفـه والمفاعيـل ^^ وارض حوت بيتيـن مكـه وطيبـه
ارضٍ حموها بالسيوف.. المصاقيـل ^^ اخـوان نـوره.. فالليـال الصعيبـه
امثبتين الملك.... جيلٍ بعـد... جيـل ^^ وتاريخهم جيـلٍ.. لجيـل... يحكيبـه
سلايل اللي يتعـب الجيـش والخيـل ^^ عبدالعزيـز ابـن الاصـول العريبـه
ياقف له التاريخ... قـدرا.. وتبجيـل ^^ واليا انتهى بـه ماقـفٍ... يبتديبـه
واجبال نجد الراسيـة... والغراميـل ^^ وارض وطـاه وكـل عيطـا رقيبـه
والسيف ابو حدين والخيـل والليـل ^^ والسرج والصهـوة وكـور النجيبـه
تشهد وتشهد لـه ريـاض ومداهيـل ^^ ويوم عبـوس وليـل... ماينسريبـه
اقبـل معـزي.... والمنايـا مقابيـل ^^ على عدوا جاه... واشيب.... شيبـه
حاضر بحاضر ماحصل فيـه تاجيـل ^^ الفعـل حاسـم والمضـارب عطيبـه
برق المصقل فـي رعـود المقاتيـل ^^ رد البـرى بيـن الحريـب وحريبـه
ونادى المنادي وانصتوا له مذاهيـل ^^ الحكـم لله ثــم لـلـي حضيـبـه
وردوا بتكبـيـرن وردوا بتهلـيـل ^^ وسمعا وطاعـه والمشاعـر رهيبـه
وزال العسـام وهـل وبـل هماليـل ^^ يسقـي الديـار الممحلـه والعشيبـه
رحمة من الرحمن سيـل بعـد سيـل ^^ مافـيـه دارٍ مايسـيـل شعـيـبـه
والناس عقب المـر شربـوا تهاليـل ^^ وكـل يـنـام ومـرقـده يهتنيـبـه
يامنـزل القـرآن وكتـاب الانجيـل ^^ ياسامـع الـداعـي ويامستجيـبـه
تجعل لبـو تركـي مقـام ومنازيـل ^^ فـي جنـة الفـردوس يالله تثيـبـه
وتحفظ لنا اللي عدلهم يعـدل الميـل ^^ اعيالـه اللـي طيبهـم زاد طيـبـه
فـي راي ابوفيصـل ولافيـه تبديـل ^^ تخضـع عدانـا بالرضـا والغصيبـه
الحاكـم اللـي ماتحـلـه حلاحـيـل ^^ مـن هيبتـه كـل الحلاحيـل اديبـه
تخضع له العالم وترسـى الاساطيـل ^^ وعلـى العـدا يـوم اللقـا يندعيبـه
للضـد ضـد ويثنـي المـد والكيـل ^^ ولا احـدٍ يضـده ضـد مايلتجيـبـه
محـدٍ علـى رايـه لقالـه مداخيـل ^^ الـراي رايـه والعـرب تقتديـبـه
هذا وابا استشهد بكلمه مـن القيـل ^^ كلـمـة زعـيـم كلـنـا نعتزيـبـه
شرب المصايب مثل شرب الفناجيـل ^^ كفـو يبـو فيصـل ولاهـي غريبـه
قول وفعل ماهيـب خدعـة وتمثيـل ^^ نـدري ولابـه عـالـمٍ مادريـبـه
يابو الوطن واهله وغيـث المقاليـل ^^ حفظك مـن لاتعلـم النـاس غيبـه
واطـال عمـرك يابعيـد المنـاويـل ^^ انته محـب الشعـب وانتـه حبيبـه
وولـي عهـدك للصعيبـات حلحيـل ^^ بلسـم دوا جـرح الحيـاه وطبيبـه
شر علـى سـود القلـوب المعاليـل ^^ وخيرٍ على شعـب البـلاد الرحيبـه
وافــي ولله الـوفـا والتكـامـيـل ^^ نعـم العضيـد النايـب اللـي تنيبـه
وشعبك شرب حبك ولو يشرب النيـل ^^ حبك يذيـب المـا ولا المـا يذيبـه
ولـو الليالـي بالمشاكـل محامـيـل ^^ الشعـب وافـي والروابـط صليبـه
واللي يخون العهد من غيـر تاويـل ^^ ماهـوب زايـد صفنـا وش نبيبـه
اكبـر عـدو كنـا نعـده اسرائيـل ^^ وجتنـا سرائـيـلٍ هنـيـا قريـبـه
شرذمـةٍ تسعـى بفتنـة وتضلـيـل ^^ وتدفع على الفتنـه جثثهـا ضريبـه
ياقاتـلٍ نفسـك نهايتـك فـي ويـل ^^ مافـي هـذا شكـه ولا فيـه ريبـه
ان كنـت لاتعلـم مصيبتـك بالحيـل ^^ وان كنـت تعلمهـا فتلـك المصيبـه
والله عجايـب هالزمـان وتهـاويـل ^^ وش رايكـم ياهـل العقـول اللبيبـه
مايصلـح العقـال غيـر الجهاهيـل ^^ اجـل علـى الدنيـا نحـط النصيبـه
يامـدع الاصـلاح وتحـط وتشيـل ^^ وانته من الراعه ضلوعـك حطيبـه
لامصلحٍ نفسـك ولا مـن محاصيـل ^^ خايب وظنك خـاب والـراي خيبـه
لاجـي منافـق تدعـي بالاباطـيـل ^^ وتـشـوه الاســلام يامفتـريـبـه
لعـل مالـك مـن مراحـك تساهيـل ^^ ياللي لجيت مـع الوجيـه الغضيبـه
جعله مراح الفيل واللي علـى الفيـل ^^ لا ردك الله مـن هـذيـك المغيـبـه
خـادم يهـود وتشتغـل بالمراسيـل ^^ حـمـال للاسـفـار وده وجيـبـه
ماتعلـم انـك فـي مهونـة وتذليـل ^^ ايّـات ديـن ومـذهـبٍ تدعيـبـه
الدين واضـح مثـل نـور القناديـل ^^ ولاانتـه بمفتلّـه ولا انتـه خطيبـه
اتكـفـر العـالـم بلـيـا دوالـيـل ^^ وتسعـى لقتـل المسلـم وتستنيبـه
وتضحك على بعض الضعوف المهابيل ^^ وتزجهم مثـل الحطـب فـي لهيبـه
واصحابـك اللـي ينقلـون الزنابيـل ^^ راحـو سريبـه كلهـم فـي زريبـه
ذاقوا من اسبابك عـذاب وغرابيـل ^^ وفالاخـره كــلٍ إلـهـه حسيـبـه
واضرب مثل واصدق مثـل للتماثيـل ^^ من لايحس العيـب ماشـاف عيبـه
هذي هي اللي مالهـا ايـات تحليـل ^^ ان يفعـل الانـسـان مايستعيـبـه
ياللـي تبلبـل كلهـا ايـام وتـزيـل ^^ الــذل مـالـه سـلـمٍ تعتلـيـبـه
تايه مابين الشرق والجـدي وسهيـل ^^ واللـي تقـدا فيـك ينشـق جيـبـه
لابـد ماتقضـي عليـه المحابـيـل ^^ ومهمـا بلغـت نهايتـك فالحقيـبـه
وتندم ندم قابيـل مـن قتـل هابيـل ^^ من طال بـه سقمـه تـراه يغديبـه
شانـك قليـل وكـل يـومٍ بتقلـيـل ^^ ياللـي وطنـك مـع العـدا تعتديبـه
للشـر نـاس وللشكالـه مشاكـيـل ^^ ومـن لا يحسـب شرنـا يبتليـبـه
حنا رجال الامـن واهـل المواصيـل ^^ اللـي عليـك ومـن يطيعـك تعيبـه
وحنا على الخايـن عقوبـة وتنكيـل ^^ وامن الوطن واهل الوطـن نعتنيبـه
وحنـا بهدفـات الكراسـي نواجيـل ^^ لو الضريبـه سلـك فبـره نصيبـه
مـن غلنـا علـى الكبـود المغاليـل ^^ نحطهـا بيـن النـحـر والتريـبـه
نكسب رهان اللـي يحـط المعاديـل ^^ والغلـب مـنـا ماعليـنـا غليـبـه
يادارنـا يـام الرمـوش المضاليـل ^^ انتـي حبيبتنـا ونـعـم الحبيـبـه
يفـداك منـا الحـي واللـي مقاتيـل ^^ فـي واجبـك نمشـي كتيبـه كتيبـه
بارواحنـا ثـم بالدعـا والتباهـيـل ^^ للـي صغـار النمـل يسمـع دبيبـه
نحمـي وطنـا ونتـقـدم زرافـيـل ^^ علـى العـدا والمـوت نـارد قليبـه
والعـز بالله ثـم حـدب المصاقيـل ^^ والـذل نقمـه والتهـاون مصيـبـه
|