وقفنا هنا
عهود وساره يكبر الموقف بينهم ويوصل للطق عهود تشوش على ساره وهي تطقها تقول : انتي لو عندك كرامه مارجعتي لواحد مايبيك وعايفك وجايه بتشوهين صورتي عنده يالحقوده
ساره توجه كلامها لمنصور : والله والله يامنصور انها مرتبه لشي وتخفيه عنك ومحد يعرفه غيري شوفها شلون تهاجمني ماتبيني اتكلم واعلم عليها
منصور يفرقهم من بعض ويصرخ عليهم : بسسسسسسسس ولا كلمه والله الي بتتكلم الحين والله اني لأمحطها بالعقال
عهود تحاول بنظراتها وحركاتها تقول لساره انها ماتتكلم بس ساره تلتفت على منصور وتقول له : منصور انت شفتها وشلون تنرفزت وهبت فيني ومدت يدها هذا مايعطيك دليل انها خايفه اتكلم واعلم بكل شي تخطط له !
منصور : وش تخطط له فهميني ؟
منصور : تخطط تبي تهرب منك هي اصلا ماتبيك ولاتحبك وعندي الدليل على كلامي
منصور مستغرب من كلامها ومصدوم : تهرب مني ؟ ليه وش مسوي لها انا ؟؟ وين دليلك هاتيه ؟
بهالوقت عهود تنجن وتروح لمنصور وتحط يدينها على وجهه وتقول له : منصور حبيبي حط عينك بعيني معقوله بتصدق وحده مثل هاذي حاقده وغيرانه اكيد بتقول أي كلام بس علشان تبرد نار غيرتها
ساره : لا ماني حاقده عليك ولا غيرانه منك ورسايلك لي للحين محتفظه فيها يامنصور ترا هي الي سعت انها ترجعني لك واضغطت على امك وخضعت لها شوف هالحقيره وش قالت لأمك وخلتها ترضخ لإرادتها وكل هذا تبي تثبت لك حبها وولائها لك لين تتمكن من الي تبيه وهي قالت لي اطلب شهر عسل ومهر مبالغ فيه وتاخذ الفلوس وتسافر شهر العسل معنا وهناك تنفذ خطتها وتهرب
عهود ماتحملت كلام ساره وهاجمتها وهي تصرخ : لااااااا هاذي كذابه يامنصور لاتصدقها والله كذابه
منصور يسحب عهود من يدها ويقول لها : والله ان السالفه فيها شي مافقدتي اعصابك كذا الا انك مدبره شي تحسبيني ماعرفك امكر واخبث منك ماشفت امشي معي ياخذها للغرفه الثانيه وهو يسحبها غصب وعهود كانت تبكي وتكلمه وهو مو مصغي لها يسحبها بقوه وهي تردد منصور والله هي تكذب وتبي تفرق بينا منصور اسمعني اصبر افهمك منصور اسمعني ، يدخلها للغرفه بالقوه ويقفل عليها
منصور يرجع لساره و يجلس معها ويفهم منها الموضوع كله وياخذ جوالها يشوف الرسايل وساره تقول له : انا وافقت على الخطه لأن محد بيرجعني لك الا هي انا اعرفك يامنصور كنت انسان ثاني قبل تعرفها كنت تحبني وعايش معاي متهني يعني انت ماتكرهني هي سبب انها فرقتنا وطول ماهي جنبك مستحيل بتفكر فيني فإضطريت اوافقها بلعبتها وانا كنت ناويه اكشف لعبتها بس لقدام شوي لكن ماتحملت قدام استفزازها لي وتقدر تسأل امك وتتأكد منها وتعرف بشنو قدرت تلوي ذراع امك وتخليها تخضع لها
منصور : ااااخ والله ماني مصدق ماني مصدق وحده بكل هالشر والاصرار على فعل الي هي تبيه عندها اصرار ومثابره مابعد شفتها على كثر الي جاها وشافته وللحين تتبع حلمها وانا الي كنت احسبها تحبني صدق وانها تغيرت من كثر ماذاقت من ظلم وعذاب والله انها بذرة شيطان لاحول ولا قوه الا بالله وش اسوي فيها والله ان فيني حره عليها اخاف ادخل عليها واذبحها
ساره : لا لا ولاتدخل عليها ولا تجيها ماتسوى انك تودي نفسك بداهيه علشانها انا اقول رجعها من المكان الي جبتها منه وخل اهلها يتحملونها وانت كفايه عليك هالفتره الي لخبطت فيها حياتنا نبي نرجع نبنيها من جديد
منصور : ساره لو سمحتي ومن بعد اذنك ابي اجلس بروحي شوي ابي افكر بدون أي تأثير ممكن
ساره : ايه خذ راحتك ،
ساره تطلع من منصور وتخليه جالس ومعه جوالها ومستسلم لأفكاره
وبعد فتره من التفكير دق على امه وسألها وش قالت لها عهود وبشنو ابتزتها
ام منصور قالت كل شي لمنصور بكل التفاصيل وهو مصدوم وشلون وصلت فيها الوقاحه تكلم امه بهالطريقه وتهددها انجن وطار عقله وهو يسمع كلمات امه وهي مقهوره عليه قام وقامت الشياطين معه وطلع من درجه الخاص الشريط الي كان مخبيه من الاشرطه الي مسجلتها عهود وحطه بجيبه ودق على سامي
منصور : الو
سامي : منصور !! انت مره ثاني ؟
منصور : ايه انا وابيك ضروري ضروري موضوع مايحتمل اي تأجيل
سامي : منصور انا وش قلت لك حنا ماخلصنا منك ومنها وش تبي بعد ؟ انا ماقلت لك لاعاد اشوف منكم احد
منصور : ابي اعلمك اني لقيت عند عهود شريط مخبيته وناويه تساومكم عليه وانا واحد اذا قلت الكلمه التزم فيها وابي اقابلك اعطيك الشريط
سامي : لعنة الله عليها هالكلبه ماتخلي طبعها ! بس والله فيك الخير يامنصور خلاص انا جايك اخذ الشريط منك
منصور : يالله انتظرك
منصور يقفل من سامي ويروح لعهود يدخل عليها لقاها جالسه وتبكي منصور يقول لها : وتبكين بعد ماحمدتي ربك اني طلعتك من ذاك السجن الي لولا الله ثم لولاي كان انتي للحين فيه ويمكن تموتين وانتي فيه رجعتي وحنيتي لألعابك القذره وتكذبين علي وتوهميني انك تحبيني وانا الي ماصدقت وحبيتك من كل قلبي وربي اني احس بيصير فيني شي من قمة القهر والحزن الي انا فيه عيشتيني في حلم وقومتيني منه على كابوس ياحسافه والله ياعهود والله انك ذبحتيني والله
عهود وهي تبكي بحسره وقهر تحط يدينها على اذونها وتقول له : مابي اسمع شي اسكت مابي اسمع احد يتكلم كلكم كذابين وكلكم تدورون مصلحتكم ولما انا ادور مصلحتي اطلع ظالمه ومجرمه الحقيره الي برا ضمنت انها رجعت لك وقلبت علي على طول وصلتها للي تبيه واستخسرت فيني اوصل للي ابيه قتلت حلمي بيدها الله ياخذكم كلكم كلاب واحقر منكم ماشفت ، بدت تصرخ وتبكي
منصور يفقد اعصابه و يعطيها كف ويقول لها : اووص ولا كلمه لا اسمع صوتك و قومي إلبسي باخذك مشوار
عهود : ماراح ألبس ولا اتحرك من مكاني وين بتوديني وهي تصرخ تكرر مابي أطلع ولا اروح أي مشوار معاك وين بتوديني
منصور ينادي ساره وهو يصارخ : ياساره جيبي لها ملابس وعبايتها وشيلها ، ساره تركض تجيبهم وعهود كأنها بحاله هستيريه تصرخ وتبكي وهي جالسه بزاوية الغرفه ومنكمشه على نفسها
ومنصور يتعارك معها يبي يسكتها ويحط يده على فمها يكتمها لا تصارخ
ساره جابت الملابس ومنصور يقول لها : تعالي عاونيني عليها هو يمسكها من وراها ومثبت يدينها وساره تلبسها البنطلون بالغصب وعهود ترافس وتصارخ وبعد جهد لبسوها وجلس منصور عندها ماسكها وينتظر سامي وهي كانت منهكه وتعبانه وبس تبكي
وصل سامي ودق على منصور وقال له : انا برا يالله جيب الشريط
منصور يسحب عهود غصب وقبل يطلع يقول لساره : بروح اخلص موضوعها وارجع واي شي من الي صار لاحد ياخذ فيه علم فاهمه
طلع منصور ومعه عهود يسحبها غصب وركب بالسياره وجلس ورا معها
سامي بإستغراب يقول له : هييه خير وش تبي جايبها معك ؟
منصور : امش وبعدين اعلمك
سامي : ماراح مشي قلي بالأول وش تبي جايبها
منصور : ياسامي امش قبل احد يشوفنا ويشتبه فينا تبي الشريط امش بسرعه
سامي يمشي ويقول لمنصور : ممكن تفهمني وش القصه ؟
منصور : القصه اني ابي اربيها وأدبها وبرجعها للمكان الي خذيتها منه الشريط معي بس ترجعها للمستشفى اعطيك اياه
سامي : نعم نعم ! فوضى هي تحسب الموضوع بسهاله يصير مايبيله ترتيب ولا اتصالات
منصور : ماعليه رتب الموضوع واجري اتصالاتك ورجعها هناك أبيها تتأدب وتعرف قيمة النعمه الي رفستها
عهود تبكي وتترجى منصور مايرجعها للمستشفى
سامي : والله يامنصور هي رفست نعمه اكبر من نعمتك مثل هالحقيره هاذي مايملا عينها الا التراب بس بفهم الحين انت لمتى بتخليها هناك ترا دكتوره جيهان طلباتها واجد يعني ماعتقد انك بتقدر عليها
منصور : بمساعدتك لي بقدر عليها
|