منتديات قصايد ليل - عرض مشاركة واحدة

10-17-2012

تمرنا ايام الزمان وتعدي .. كل شي يروح ويتنهي به زمانه

الا انت

حبك

ثابتٍ دوم عندي

حشى ما غير وبدل مكانه

الجزء الثاني

خلال السنوات اللي مرت كان سيف ما يروح بيت خاله لان مرة خاله صارت تتغطى عنه لأنه كبر وصار رجال وهو بعد صار يستحي يروح بيت خاله إلا إذا كانت العزيمة كبيره خاصة إن خاله ما عنده أولاد بس نوره وهذا من الأشياء اللي خلته يخف الروحة بيت خاله مع انه يموت على نوره كانت صغيرونه وكأنها لعبه بس ما كان ينظر لها أكثر من إنها بنت خاله الصغيرة اللي بحسبت أخته

كبر سيف وصار في الثانويه ونوره صار عمرها 7 سنوات يعني توها طفله مازال يشوفها اخته الصغيره الحلوه والدلوعه بما انها وحيدة خالها وهي كانت تحب سيف واجد لانه يجيب لها حلويات و العاب يعني بالعربي الفصيح اخوها الكبير.

يوم خلص الثانوية سووا له أهله عزيمة كبيره لأنه طلع من الأوائل وفي هذاك اليوم الكل كان حاضر أعمامه و خاله و أهله كلهم طبعاً بما أن أبو محمد متوفى كانت علاقتهم بخالهم الوحيد هي الأقوى في العيله .

وهم قاعدين بمجلس الرجال دخلت نوره حق أبوها عشان تقول له ان أمها تقول بيتأخرون شوي في بيت عمتها ..كان ولد عم سيف فهد عمره 15 سنه موجود قال: يا حليلها هذي بنت خالك الوحيده اللي تقول عنها امي والله هذي اذا كبرت بتطلع قطعه شوف عيونها شكبرها

هنا سيف اول مره يحس بنار الغيره مع انه ما يشوفها اكثر من طفله بس ما حب ان ولد عمه يطالعها بهالطريقه
قال: نوره روحي داخل
قالت وبكل براءه : انا ابي ابوي امي قالـ...... ما امداها تقول شي لانه عطاها ذيك الصرخه: نوررررررررره اقول روحي داخل بسرعه ولا عاد تيجين مجلس الرجال.
هي من الصدمه مسكينه انتفضت وركضت داخل وقامت تصيح وهذا كان السبب الرئيسي للي راح يصير بعدين؟؟؟

محمد انتبه على خاله وشلون تغير وجهه من حركة سيف ففتن عيونه على أخوه انه عيب عليك

عاد الخال ما حب إن سيف يصرخ على بنته بس ما علق لأنه يعرف ولد أخته عصبي في هالسوالف الي تخص الغيره على بنات عيلته حتى لو كانوا صغار والدليل اخته هيا اللي لبسها العبايه وهي أم 9 سنين وغطاها

سيف ما قدر يحط عينه بعين خاله طول العزيمه خاف انه يشوف نظرة التشره

دخلت نوره وهي ميته من الصياح على الحريم ورمت روحها على أمها : يماااااااااااه
أمها خافت عليها : شفيج امي نوره ليش تصيحين حبيبتي
ماردت عليها بس تمت تصيح وتشاهق سمت عليها عمتها أم محمد وعطتها ماي تشربه والبنت مو راضيه تسكت

إلى أن قال أبو نوره : انعم الله عليكم يا أم محمد إن شاء الله نفرح في عرس محمد وهيا وسيف انا بمشي الحين خلي ام نوره تطلع لي بره الله يعافيج
ردت عليه اخته : الله يحيك يا اخوي بس تو الناس ما شبعنا منكم
ابو نوره قال : مره ثانيه يا أم محمد ان شاء الله نسهر بعد مو بس نتغدى بس شكل نوره تعبت ولازم تروح البيت

طبعا هيا ما تمر عليها هالشغلات بدون تحليل على طول من طلعوا الضيوف طيران على سيف تعرف منه الأخبار بس هو ما عطاها وجه وصك الباب في وجهها لأنه حيل متضايق إن خاله طلع من بيتهم وهو ماخذ على خاطره وقعد يفكر شلون يراضي خاله كل هالحزن اللي حس فيه سيف ما كان لنوره نصيب فيه لانه يشوف أنها تستاهل وهو ما غلط عليها وهي بزر بعد هذا اللي ناقص يعتذر منها بعد

هيا يوم فشلها سيف راحت لمحمد .. ماتتعب هالمحقق كونان : اخوي الشيخ محمد شخبارك؟؟ عساك بخير؟؟
يعرف اخته اكيد وراها تحقيق : نعم؟ خير؟ شلي تبين تعرفينه؟ من غير لف ودوران

يوم شافته مو معصب مثل سيف نطت على السرير حقه وهي شاقه الحلج : أنا أقول اخوي ذكي من زمان بس محد مصدقني
جا بيروح وهو يطالعها بنص عين : الحين بتقولين والا اروح انا مو فاضي للتصبغ
سحبته تقعده جنبها : لا بقول يمه منكم كباريت انت واخوك .. الحين شسالفة خالي ليش طلع بدري من العزيمه مع انه دائما اخر من يطلع من بيتنا؟؟ وليش نوره دخلت من عندكم ميته من الصياح وتشاهق ولا راضيه تتكلم؟؟؟

قعد محمد وهو متملل منها ومن تحقيقها : لان اخوج المحترم صرخ على نوره صرخه خلتها تنصرع وهذا كله بسبب ان ولد عمج يوم شافها قال هذي اذا كبرت بتصير قطعه
هيا فتحت فمها مستغربه بعدين : هههههههههههههههههههه والله اخوك فيلم ههههههههه واذا قال شبيصير يعني؟؟؟
هذا سيف ماتعرفينه يعني؟؟ قالها محمد وهو طالع من الغرفه

اليوم الثاني راح سيف لخاله يتعذر منه ويوضح له السبب اللي خلاه يصرخ على نوره
عاد الخال ما قدر يزعل على ولد اخته مع انه مع ام نوره تضايقوا واجد من حركته بس لما جاهم يعتذر قال الخال : هذي بنت خالك وبحسبة اختك ما اقدر الومك اذا غرت عليها بس هي توها صغيره ما تعرف ان هذا عيب.. بس لا تشيل هم امها علمتها ان انت خايف عليها وانك ما تقصد تخوفها

حب خشم خاله وهو مبسوط ان خاله مو زعلان عليه واستاذن وطلع وهو في باله ان المشكله خلصت على كذا ما درى ايش مخبي له المستقبل

قدم سيف على بعثه الى لندن علشان يكمل دراسته الجامعيه هناك خاصه ان اخوه محمد لسه يدرس هناك فحب ان يكون اخوه معاه في بداية دخوله الحياه الجامعيه

محمد صار الحين في السنه الاخيره له في الجامعه يعني اخوه بس بيلحق عليه سنه وحده بس
خلال دراسة سيف هناك صار البيت اكثر هدوء وتتوقعون من اكثر واحد افتقد هالحس؟؟؟؟؟؟؟؟

اخته هيا !!!!!!!!!!! لانها هي اللي كانت تعاني من تحجيره لها.. بس بعد فقدت حسه من اول اسبوع مع انها قالت احسن خله يروح يفكنا شوي من حنته.. بس بعد هو اخوها ومهما يكون هو اللي كان مونس وحدتها لانها ما عندها خوات وهو اللي يلبي طلباتها وما يقصر عنها اذا طلبت شي

مرة السنوات وكبر سيف وتغير شكله هناك صار رزه ونضج اكثر
كان همه دراسته وبس ما يفكر باي شي ثاني لازواج ولا حب ولا أي شي من هذي الاشياء

يوم خلص دراسته صار عمره 23 سنه ورجع البلاد وهناك اشتغل في شركة عمه ابو فهد
وطبعا نوره لما درت انه رجع صارت ما تروح بيت عمتها لانها تخاف منه صورته وهو يصرخ عليها ما فارقت بالها طبعا بهذيك الفتره كانت نوره مخلصه الابتدائي وبتروح متوسط يعني وجودها من عدمه في حياته ما كانت مشكله أي تأثير عليه يعني ما همته بالعربي الفصيح

في بيت اهله كانت الاستعدادات على قدم وساق الكل يراكض والكل مشغول والكل مرتبش كلهم في حالة استنفار لان اليوم عرس هيا حتى نوره اللي ما تحب تروح بيت عمتها راحت عشان تساعد عمتها مع أمها
دخلت نوره على هيا وهي موديه لها سندوتش وعصير تأكله لأنها ما كلت شي من الصبح والحين ظهر

نوره : هيا يالهيكل العظمي أمي و أمج مرسليني انقذج من المجاعة اللي صايبتج ويقولون لج غصب طيب بتبلعين هالسندوتش و تلطين هالعصير والا بيجتاحون عليج الغرفه وبيركبون هوز في حلجج ويأكلونج بالغصب
اضحكت هيا وهي تسمع كلام بنت خالها ام 12 سنه : هههههههههههههه والله اجتياح بعد؟؟ لا يبه عطيني أكل بنفسي
نوره تقلب في اغرض هيا وتسألها: هيا متى بتسافرون ؟؟
هيا واللقمه في حلجها ومتضايقه شوي حطت اللي في يدها وتمت تطالع يدها وهي تفر الدبله : بعد بكره
فتحت نوره عيونها الكبيره على حدها وهي متفاجأه : بعد بكره بعد بكره؟؟ على طول؟؟
ضحكت هيا من غير نفس : هههههه لا على عرض
قعدت نوره على السرير و سرحت شوي : ....... كم سنه بتقعدين ؟؟؟؟؟؟؟؟
هيا ودموعها في عيونها : 5 سنين ...... بس بنجي في الاجازات

نوره ظمتها من قلبها : هيونه قولي لي اذا سافرتي شسوي؟؟ انا ما عندي صديقات ولا خوات غيرج
هيا تظم نوره اكثر وهي تصيح : يا بعد قلبي يا نوره والله انا اللي ما ادري شلون بعيش بعيده عنكم؟؟

سمعوا طق على الباب : هيا فتحي الباب انا سيف... فتحي خذي مسكة الورد
نوره ضربها زلزال من الخوف وانتبهت عليها هيا وماتت من الضحك عليها لأنها تدري بسالفتها مع أخوها
: ههههههههههههههه زين استنى شوي
إلا نوره تحرك يدها بمعنى لا وبهمس : لا الله يخليج لا تفتحين الباب
هيا وهي تسحبها : تعالي دخلي الحمام على ما يحط المسكه ويطلع
فتحت الباب وهي ترحب : يا حيا الله الحامل والمحمول
حط المسكه على السرير وهو يضحك : ههههههههههه إلا ودج تقولين المحمول بس لزقتيني مع التراحيب
هيا تحب راس اخوها : افا يا بو راشد والله انك عزيز وغالي شدعوه تفداك المسكه وراعيتها
حب سيف راس اخته : ما ادري ايش راح اسوي اذا سافرتي يا هيووه؟؟ يمكن اهيم على وجهي في الشوارع

هيا طالعت الحمام وهي تتكلم بصوت عالي : شسالفه هالحب اللي نزل عليكم فجأه؟؟ الكل اليوم بيفقدني انت من صوب وناس غيرك من صوب شكلي بهون عن الزواج ههههههههههههه
نوره تقول في قلبها : حسبي الله عليج يا الهبله يعني تقصديني هين بس يطلع حفار القبور سيفوه انا اللي بسفرج على اول طياره .. قال افقدها قال مالت عليج

سيف ما فهم عليها بس رد ببرائه : فديت اللي يفقدون أختي من اللي بيفقدج سارة وإلا عليا؟؟؟؟
ضحكت هيا من قلبها : هههههههههههههه أي ساره وعليا ؟؟؟؟ اصلا ما كلموني اليوم ..وبعدين استح ليش تتفدى صديقاتي؟؟

نوره وهي ميته من القهر وفي خاطرها :يا ويلج يا هيوه ان قلتي اسمي والله ما اجي بيتكم طول عمري
سيف وهو طالع يقول لاخته : اذا قصدج البزر نوروه بنت خالج أكيد بتفقدج لانج الوحيدة اللي ماعطتها وجه في العيله ..... وصك الباب وراه

انصدمت نوره من كلامه: يعني انا محد معطيني وجه بالعيله لاني بزر !!!!!!! انزلت دمعتها الا بدخلت هيا عليها الحمام وهي تظمها : ما عليج منه ..هو مو قصده شي ..بس يمزح
نوره طالعتها وبعدين نزلت عيونها وأبتعدت عنها : أنا بروح البيت الحين ..شكلي تأخرت.. بروح أتجهز للعرس

طلعت وهالمره صج صج كرهت سيف : انا بزر محد معطيني وجه يا وجه العنز؟؟ هين يا سيفوه لو تموت عرسك ما اطبه.. ولا راح افرح لك ..ولا راح اسلم على حرمتك اللي اكيد امها ما تحبها و دعت عليها تتزوجك يالبومه

وهي في قمة تحلطمها ونازله معصبه ما انتبهت على الدرج والتوت رجلها وبغت تطيح بس مسكت الدرابزين وضلت قاعده على الدرج ماسكه رجلها من شدة الالم بس مو قادره تطلع الآه ونزلت دموعها ورى بعض كل هذا كان قدام عين واحد وهو راكب الدرج بس نوره مو منتبهه له... مين ؟؟؟؟؟

ان شاء الله يعجبكم الجزء ولا تبخلون علي بالردود
اختكم سالفتي سالفه