قال الودع !! وقلت صبرك دقيقه
ودي ابين حزن قلبي بقرطاس
ماتدري ان البعد أصعب حقيقه
لاصار قلبي بين هم ووسواس
اسمع ونين القلب ياللي تعيقه
وصدق المشاعر تشتكي حر الأنفاس
لامايعوضني جمال الخليقه
لاياعديل الروح مامثلك اجناس
في غيبتك كثر الصبر مااطيقه
والفرحه ابقربك ابدمالها قياس
كنت افتكر بان العلاقه وثيقه
وادور الاعذار واقول لا باس !!
لكن خلاص اليوم بالقلب ضيقه
ومات الامل يوم ضوت نظرة اليأس
تاه الفكر وسط البحور العميقه
ويغرق بها البحار لو كان غطاس
سيف الهجر من أمس واضح بريقه
يومك قطعت الوصل واستقيني كاس
كاس مليته من أنامل رقيقه
في داخله سم وفي ظاهره ماس
في ضامري شبيت اكبر حريقه
وهدمت حب كان مبني على ساس
هذا جوابي والحبر نشف ريقه
وماعاد فيك من الغلا شيء واحساس
روح وانا بروح كل بطريقه
باصبر على فرقاك لو كنت محتاس