" في الصـاله "
سهـر: شصــاير شصـاير
" فجأه لقوا نجود طايحه عند المغسله وبكامل زينتها وتـرجع ... على طول نادوا وامهـا وبعدهـا امها على طول عرفت انها حـامل ... نجود لاحظت على نفسها انها مو طايقه شي هاليومين حتى فواز ... الظاهر صدق انها حـامل ... الكل حاول يفرح بهالخبر المبدئي ... بس ماكانت نجود تبي تفرح الاقبل ماتتأكد بس الحريم كانوا واثقين من هذا الشي والكل بارك لهـا كبدايــه ... فواز عرف بكل شي والاهل طلبوا منها تروح فوق وترتـاح ...."
" في هذا الوقت طلب نايف من بدر انه يرجع اهله مع ام يـاسر ... لان نايف رجع البيت ومافيه حيل يرجع من جديد ... وبالفعل راح بدر وركبت بسمه وامها مع ام ياسر "
ام نايف: السلام عليكم
بدر: هلا خالتي وعليكم السلام .. مبارك عليكم
ام نايف: الله يبارك فيـك .. عقبـالك
بدر ضحك : الله يسمع منك
ام ياسر : وليه تضحك .. والله ماني مخليتك ترجع الا وحرمتك عندك
بدر يضحك : وانا ماقلت شي ليه معصبه.. المهم كيف الملكه
ام ياسر: انبسطنا والله ماقصروا عسى الله يهنيهم
ام نايف: كل شي بيرفكت مااشاء الله صحيح مختصر بس مرتب
بدر يضحك: ياويلي على بيرفكت
" بسمه ضحكت عليــه "
ام نايف تضحك : تطنز بنشوف بكرا في ملكتك
بدر: لا ابشري بسعدك في ملكتي وماحد يرتبهـا غيرك
ام ياسر : اي وش فيها ام نايف كل الذوق عندهـا
بدر يصلح المرايه وشاف بسمه لافه على الشارع بس ماعرف ليش كاتمه وجهها كتم مع انها ماتغطي : اي والله
ام نايف: الله يقدم اللي فيه الخير
بدر: الخير عندك ياخاله
ام ياسر: وش تلمح لـه
بدر: ماودكم تخلصون علـي كل العيال خلصوا الا انا
ام ياسر: كان زين والله وافتك من محاتيك
بدر ضحك : يلا ورينـا همتـك
ام ياسر: والله تبي تعرس هذي البنت جاهـزه
ام نايف: ايييه الاخ حاجزهـا وش عليه
ام ياسر: وهـ صدق بدر وانا ماعندي خبـر
بدر شاف هذا الوقت المنـاسب : لا افا مايصير افكر بشي قبل لاخذ رايك
ام ياسر: اي بعد على بالي البنت هذي هي قدامك ولاتفكر بوحده غيرهـا
بدر لف على امـه : مين هذي
ام ياسر: بسمـه في غيـرهـا
بدر يصفق : واااااي فديت اللي فهمني ياناااس
" بسمه انقلب وجهها وش يقولون ذولا وانا جنبهم "
" بدر انقهر يبي يشوف وجهها وردة فعلها .. بس شاف انها لفت على امهـا "
ام نايف تضحك : الله يهديك يا ام ياسر يمكن الولد خاطره بوحده
بدر : احم لا ياخاله شكلك ماتبين تعطينا بنتك ...
ام نايف ضحكت: والله هذي الساعه المباركه
ام ياسر: ها يابسمه وش قلتي
" بسمه انصدمت وش يقولون ذولا صاحيين "
بدر: شقلتي يابسمه
" بسمه طاح قلبهـا "
" ام نايف ماصدقت اللي يقولونه "
ام نايف: البنت بنتكم ووقت ماتبونها خذوها باللي عليها
" بسمه صارت ترتجف "
ام ياسر: ها يابسمه شقلتي اي ولالا
" بدر كان ينتظرها ترد "
ام ياسر: مافي مجال تفرين مني اليوم ... والله لو تشوفها يابدر لابسه ذاك النيلي اللي يطير العقـل .. ماقدرت اغض البصر عنها ماشاء الله تبارك الله
بدر ضحك : ياويييلي
ام نايف تضحك : استح بنتي تستحي
بدر: اشوفها مانطقت بكلمه من ركبت على الاقل الناس تسلم
" بسمه تحس انها تحترق بثيابهـا .. لكن ارتاحت يوم شافتهم وصلـوا "
" بدر يوم حس انها تناظر بيتهم سوا نفسه بيوقف بعدين فحط"
ام نايف: وه بدر ذا بيتنـا
بدر يضحك : واللي يقولك ماني منزلكم قبل لاترد بنتك الموافقه عشان يصير حلال اشوف النيلي
" بسمه شهقت .. وطلعت شهقتها وسكرت فمها بسرعه .. على طول خففت غطاها خافت تختنق "
ام نايف ضحكت وام ياسر
ام ياسر: الله يخسك
ام نايف: ولدكم ذا مجنون مانبيه
نايف ضحك : يلا فيكم خير انزلوا
ام نايف: يابسمه قولي تبينه ولالا ذا ماهو بصاحي ولدهم
" بسمه ماتوقعته يناظر او اصلا يقدر يناظر .. رفعت غطاها وكلمت امها بعيونهـا .."
بسمه بهمس : من جـدك
" بدر بالفعل ماكان يناظرها لكن يوم سألتها على طول رفع راسه على المرايه وشافهـا فتحت وجههـا .. خق عليهـا ... وصلح المرايه وجلسته على طول "
بدر " انا ويني عنهـا ذي "
ام نايف: انا ادري عنه قولي تبينه ولالا
ام ياسر: يابنتي اخلصي
" وبعدها شافوا بدر ملزم ماراح ينزلهم الا اذا ردت "
" بسمه حست قلبها بيطير مو مصدقه هالمجنون وش يسوي "
بسمه تحنحنت : اللي تشوفوونه
ام ياسر: كولولولوووش
ام نايف ضحكت : يلا خلاص نزلنـا هذي البنت وافقت
بدر: ماقالت ايه قالت اللي تشوفونه ماتنفع معي هذي
بسمه لاشعوري: بـــــدر
" بدر انصدم يوم سمع صوتها اول مره يسمع صوتهـا "
بدر ابتسم : خلاص خلاص يوم تكلمت حرمي بنزلكم
" بسمه حست قلبها بيطير ماكانت تدرري ان بدر يفكر فيها بيوم ... بدر حس لازم يعيش حياته وينسى سهر ... كم بيزعل كم بيتعب وهي مبسوطه .."
" ام ياسر ونايف ضحكوا عليه وبدر مجنون من يومه والكل يدري ... بعدها نزلهم بدر وبسمه نزلت تركض .. بدر فتح شباك امه ونقزل على الدركسون "
" نزلت ام نايف وودعتهم وعرفت ان بدر يكلمها من جد "
بدر : شوي شوي لاتطييحين وراك عرس " وضحك "
ام ياسر تضحك : انت تبيها من جد
بدر: عندك غيرها لي
ام ياسر: ياعسااي ماخلا منك
" بدر ارتاح يوم ضمن بسمه ... شاف انها الوحيده اللي ممكن تناسبه ... وليش مايكون سعيد معهـا وهو مايسمع عنها الا الزين "
.
.
.
" في نفس الوقت "
" في بيت بو فـواز "
اديم : يمه مطـولين
جنى: لاخلاص يلا سبقينـا
اديم بتعب : يلا لاتتأخرون
" اديم تعبت على اخر السهره وقررت ترجع ... اول ماطلعت انتهبت لسيارتهم موقفه .. راحت وركبت بالسيت اللي ورا .. وسندت راسهـا عشان تسترخي ... ماكانت تحس بنفسها تحس جسمهـا كله منمـل "
" فجــأه ... حست السياره تمشي فيهـا "
اديم بخرعه : محيي الدين استنى مدام فيجي
" اديم شافته مسرع ومو معطيها وجهه .. طاح قلبها عرفت انه بيسرقهـا "
" اديم شالت الغطا بسرعه بخرعه وشافت طرف وجه السايق "
اديم انصــدمت : سلطــــــــــــان
" سلطـان مالقى الا هذي الطريقه .. قرر يسرقها واللي فيهـا فيهـا "
" سلطان كان يسوق بسرعة مجنونه ... اديم اخترعت .. قعدت تبكي ..."
اديم تضرب نفسها : يامجنوووووووون وش تسوي وقف السياااره
" سلطان سوا نفسه مايسمــع ... طنشهـا وكمل طريــقه .. اديم قعدت تبكي وتمسكت بنفسهــا .. فجأأه سكرت عيونها ومتمسكه من الخوف .. وبعد ماتعبت وشاافته ما يرد عليهـا ... فتحت عينها يوم شافته وقف ... وانتبهت انها كانت اشاره ..."
" ضرب سلطان الدركسون بكل عصبيه واديم شهقت بخرعه "
اديم : سلطـان ليه سويت كذا ...ليــــه وين ماخذني ويــــن
سلطان قام يصارخ بكل عصبيه : حاولت معك بكل الـطرق ... كم مره جيتك وصديتيني ... مافي اي شي نفع معــك
اديم قعدت تصارخ : وش ذنبي يوم اني عفتــك وش ذنبــي
سلطان ماتحمل يسمع زيـااااده وصرخ فيهـا: اديــــــــــم اسكتــــــــــي
" اديم اخترعت من صراخه حسته مجنون .. ماتعرف وش صار له .. ثار عليهـا بلحظه .. كان قلب اديم يرتعد .. وبس فتحت الاشاره فحط بأقوى ماعنده ... "
اديم تصرخ : خفف السرعه طيــــــب
سلطـان : ليه خايفه على نفسـك
اديم تبكي وقلبها يرتجف : سلطان انت تعرفني اخاف من السرعه
" سلطان خفف بنسبه بسيطه .. تذكر ان في بطنها روح ثـانيه ... اديم اخترعت يوم شافته اخذها على طريق العزيزيه .. "
اديم بخوف " ليكون قرر يذبحني ويفتك مني "
" قعدت تبكي "
اديم " هذا مجنوون ويسويهـا "
" اديم قررت ترقع جـوالها وتكلم اخـوها مشاري "
" سلطان رفع عينه وشافها طلعت الجـوال ..."
سلطـان : جيبي الجـوال
" طاح قلب اديم "
اديم تمسكت فيه وهي تصارخ: لا مستحيل ... بكلم مشاري بخليه يجيني وياخذني انا ما امن نفسي معك انت واحد مجنووووون
" سلطان شاف الطريق شبه خفيف لف عليها وهي اخترعت يوم شافته ناقز عليها ... وهي خافت يسوي حادث مدت الجوال له بسرعه .. سلطان قفله ورمـاه "
" ادسم ارتعد قلبهـا عرفت ان اخرتهـا قربت .. فجأه حست بألم ببطنهـا "
اديم وهي تتألم وماسكه بطنها : سلطـان خفف السرعه .. بطنـي يعورني
" سلطان ناظرها من المرايه وعوره قلبه .. خفف السرعه وصار يمشي بهدوء وكان سـاكت ... "
" اديم كانت تموت وتعرف وين ماخذهـا سلطـان "
" شوي ووقف سلطـان قدام شاليه الهوليدي ان... ودخـل واديم فتحت عينهـا من الخرعه موديها شاليه وهي بهذا الشكـل ... بمكياجها وفستـانها وزحمتهـا ... "
" سلطـان وقف السياره قدام الشياله ونزل ... وراح جهتها وفتح لها الباب .. لكنها رفضت تنزل "
سلطان بعصبيه: انــزلي ...
" اديم اخترعت غطت عن وجهها ونزلت وهو مشى قبلهـا .. فتح الشاليه وهي قلبها يرقع ... تحس انها بذلت اليوم مجهود كبير ... وتحس طارقتها تنهدر لحظه بلحظه ... سلطـان دخل ورمى المفاتيح على الكنبه وحط يده بجيوبه ولف عليهـا .. هي دخلـت وشالت الغطـا وقلبها يـرتعـد .. "
اديم وهي موقفه : ليه جايبني هنـا .. اهلي بيفكرون حد مختطفني على الاقل قـول لهـم
سلطـان بتحدي : خل عقلهم يطير ويدورون عليك مثل ماعقلي طـار وصرت ادورك مثل المجنـون
اديم اخترعت : سلطـان تكفى امي يمكن يصير فيها شي حرام عليـك
سلطـان لف بقوه : ما اشوف احد حن علـي يوم اخذوك منـي ... يوم كنت ادورك وكل يوم اجيك وانتي تصديني ماشوف احد حن علي ولا رحمني خل يتعذبون مثل ما انا تعذبت .. خل يتعبون وهم يدورونك مثل ما انا تعبت ...
" اديم انخطف عقلها من هذا المجنون .. اديم لصقت راسها بالجـدار وقعدت تبكـي ..."
اديم : حرام عليك سلطـان حرام " وصقعت راسها بالجـدار "
" سلطـان رق قلبـه .. حس دور الرعب انتهـى .. واديم الحين قـدامه وهذا هم لحـالهم محد يدري عنهـم .."
" سلطـان راح لهـا وقرب من عندهـا واول ما جا يلمسهـا "
اديم تبعد : وخر عنـي وخـر
سلطـان : اديـم خـــلاص ... ماتعبتي من البكـي ... ماتعبتي
" اديم بعدت عنه وجلست على الكنب ونزلت راسها على يدها وهي تبكي "
اديم : سلطان انت قاعد تعذبني ... حرام عليك حـرام
" سلطان راح وقعد تحتهـا "
سلطـان : اديم انا تعذبت اكثر من العذاب اللي انتي تعذبتيه ..
" رفع راسهـا بقوه "
سلطـان : ناظريني شوفي وجهـي اقري عيـوني شوفي العذاب بنفسـك ..
اديم : سلطان انت بس تعرف تجرح وتعذب لكن ماتتعذب
" سلطان قام بكل قوه "
سلطـان : يعني شلون سلطـان مو انسان .. مايحس ... مايتعذب .. ليه تفكرون سلطان جماد ... تراني انسان عندي احساس واتألم ... انتي المفروض اكثر وحده تعرفين كم انـا اتعذب ...
سلطان : ليه ماتعترفين انك تحبيني ليييييييه
اديم : كذااااب ماحبك
سلطـان : اذا كنت اكذب على نفسي فاحتى انتي تكذبين على نفسـك
اديم : نعــم
سلطـان : اديم ادري انك تحبيني ليه تنكرين ليــه
اديم : على اي اسـاس
سلطان دخل يده بجيبه : خذي هذا وتعرفين
" رمى عليها السلسال والربطه والاسواره اللي احتفظ فيهـم واديم اخترعت شلون صارت هذي عنده "
سلطـان : كنتي تحبيني حتى قبل لاخذك
اديم : سلطــان
سلطان سكتهـا : اديم بـــس كفايه عنـــــــاد
سلطـان لف والدمعه بعيـنه : اديــم .. " وحس هذي الكلمه ولاول مره تطلع من قلبـه مثل الجسد اللي تسلم روحها" اديم .. انــا احبــك والله احبــــك
" اديم رفعت راسهـا وناظرت بعيــنه .. بلحظه عرفت العذاب اللي يحس فيه سلطان .. عرفت هالكلمه طالعه من قلبه .. لكن ماتقدر تنسى كل شي سواه فيهـا ماتقـدر ..."
" شالت نفسهـا وطلعت بـرا .."
" لفت يمين ويسار وشافت فيه ناس بس قليله .. حطت الحجاب على راسهـا وراحت مقابله البحر .. كان الجو بارد ويهبهب بالحجاب ... لمت نفسها ببعض تدفي نفسهـا "
" سلطـان تبعهـا ووقف لحظه قبل لايوصل لهـا .. تأملهـا .... حس براحه في صـدره وكأنه قلبه ينتظر هالكلمه تطلع عشان يـرتــاح "
" سلطـان مشى كم خطـوه حتى صـار وراهـا وعلى يمينها وقريب من اذنهـا "
سلطــان بصوت فيه تنهيـده وكـلام طالع من اعمـاق قلبـه :
غرامك صار عنواني وأنا قبلك بلا عنوان
أحبك كثر مالدنيا تجور وفرقت خلان
أحبك كثر ماالقمري يحن ويلحق اسرابه
أحبك كثر مامالت على متون الهوا أغصان
أحبك كثر ماطفل منامه داعب اهدابه
أحبك كثر مااخطيت واقول آسف أنا الغلطان
وادور لك عذر يوفي قبل ماتبديبه ابدابه
أحبك كثر ماغبت ... كثر مابالحشا نيران
كثر ماالهم في صدري يهيم ونوخ اركابه
أنا صحرا بلا حبك يموت بها الشجر عطشان
أنا لو ما قصيدي فيك اقول ناري اولابه
إذا كلمة (حبيبي) لك تهز لهيبتي اركان
اقول اليوم ياعونك وعزي كامل انصابه
أحبك حب ماحبه على مر الزمن إنسان
أحبك لو على موت... " وبتنهيده " هلا بالموت واسبابه
(غرامك صار عنواني واناقبلك بلا عنوان )
مثل من ضيع اوطانه وضاع وضيع احبابه
" اديم سـالت دمـوعهـا بعد ماحست الكلام نابع من قلـب سلطـان ولاول مـره خصعت لسلطـان بكل مافيهـا "
" اديم لفــت عليــه وصـارت مقابلـته .. شافت دمعــته كانت تهدد بالنزول .. اديم طاحت بالقوه بحضن سلطـان وسلطـان تنهد بـراحه من قلــب وحضــــنهـا بكل قـــوته ... "
سلطـان : خلينـا نعيش انا وانتي بعيـد عن هالعـالم اللي ماعرف غير يعذبنـا ويجرحنــا ... خلاص يكفي احــزان .. تعالي نغيب عن عيـون الناس .. نسكن عـالم مابه غير انا وانتي ...
اديـم : خــذني معــك وين ماتبغى وديــني بس طلبــتك لاتبكيــني
سلطـان بأديم : عــهدن علي ماتنزل دمـوعك كثر مـانزلت ... الموت ارحم لي من اني اسمح لنفسي اشوف دمعه من دمعـاتك بعد هاليوم تنــزل
اديــم تحضنه بقوه : سلطـان اوعـــــدني
سلطــان يصارخ وهو يتنهـد : وعــــــــــــــــــد
" تمـــــــــــــــــــــــت "
" مـــــــابعـــــــد النهـــــايه "
" سلطــان واديــم "
" سلطـان وعـد نفسه مايزعل اديم .. وانه ياخذهـا لعالم مايسكنه غيـرهم ... سلطـان قرر يسافر في اديم ويعوضهـا عن شهر عسلهـا اللي فقـدته ... واديم استسلمت لسلطـان ... بعد ماحسته صار مجنون بسببهـا .. وبالفعل سلطـان اثبت لها وقـدام الكــل .. اعتذر لهـا قدام الكـل على كل اللي سـواه .. وقرروا يربون ولدهم وهم مع بعض ويكبر الولد في بطن اديم وسلطـان بقربهـا .. سلطان صار اقرب لاديم من انفـاسها يحس فيها وهي تحس فيــه ... سلطـان انكسر غروره قـدام انوثه اديــم .. هزت كيـانه وزلزلت عنــاده .. مشـاري ماكان بيده يسـوي شي اكثر من مـاسواه وهذي هي اخته راحت لزوجهـا وكملت حياتها معـه وبرضـاهـا "
" عبيــر وفيصــل "
" فيصـل جاب ولــد وسمــاه مســاعد .. كـان يبغـاه يطلع رجــال بمعنى الكلمه مثل مســاعد .. مساعد انبسط وتمنى علاقتهم ماتنقطع للأبـد لانه ماراح يلاقي حد يفهمه مثل فيصل ... ومساعد وعد فيصل لو جـاب ولـد راح يسميــه فيصــل .. عبير انبسطت على فيصل يوم سمى ولده ولا عارضت ابد .. لانها ماتنسى فضل مساعد عليهـا .... فيصل وعبير عاشوا حياتهم بســلام مع ولدهم مســاعد اللي بدا يكبر قــدام عيــونهــم "
" سهـــــر ويـــــاسر "
" ياسر بنفسه نسى سهر حبهـا القديم ... واختار عنوانه وسهر عرفت انها قبل ياسر ماكان لهـا عنوان .. وعرفت غير ياسر مستحيل انسان ثاني يحبها ويدللهـا .. سهر كانت كل شي بعيون ياسر .. سهر صارت تشوف ياسر كل شي بحيــاتهـا ... بدر طلع من حيـاتها وتعودت انها تتلاقى معـه بأي وقــت .. ماكان يحس في اي شي لان الاحساس موته بنفسـه ... "
" منــار ومــازن "
" اخيرا اجتمعـوا مع بعـض وكل واحد لقى نصـفه الثــاني ... وعـااشوا فتره ملكتهم بكل لحظه ... ولا تركوا للزعل مجـال بينهم لان مازن ماكان يبي غير منار في الحيـاه وعنده بالدنيا .. ومانر تندمت بيوم انها فكرت انها تبتعد عن مازن او تبعده عنــه "
" غــزل ومنصــور "
" اتضح لهم في شهور غزل ان في بطنهـا توينز بنت وولد .. فكر منصور بلحظه انه يسميهم غزل ومنصور ويعيدون قصتـهم الخرافيـه ... ماتوقع بيوم ان الكره والحقد ينقلب لحب وموده ... وهذا غزل قدامه اكبر دليـل .. منصور وغزل ظلوا حياتهم مناقر ونفس موالهـم .. وكل واحد ماله غنـى عن الثـاني "
" بـدر وبسمــه "
" كل واحد منهم قرر يلقى عنوانه عند الثـاني .. ذولا ضاعوا في دوامه الحب ... وكان قستهم تحكي نفس المأساه وكل واحد منهم يدور الحب والحنان عند الثـاني ... بدر كان مستعد وبسمه كانت مستعـده .. وبالفعل ربي جمع مابينهـم ... وبدر قرر ينسى كل شي بمجرد مايتذكر ان دمه يجري بعروقه وقرر يحبهـا ويوفي لهـا حقـهـا .. وبسمه رجعت ترسم مشاعرها من جديد وتصورها على شكل رسـومـات ... بدر صار مجنون بعذوبه بسمـه اللي اخذته لبعــيد ... وحتى بدر اقتنع بحب المراهقه وانه كان يزول وحمد ربه ما اخذ سهر لان عارف ربي ادرى وين مصيره وان ماحب بسمه هالحب الا لانها هي الباقيه لــه "
" وصــايف وتــركي "
" تـركي انتظر وصايف تخلص هذي السنه وملك عليهـا ... تركي عجبه في وصايف قناعتها ورضاها فيه بكل شي ... وصايف كانت تبي انسـان واحد يحبها ويحس فيهـا ... ماكان يهمها ولد مين يكون ولا وش عنـده .. تركي دلـع وصـايف بطريقه جنونيه ..ووصايف كانت ذايبه فيه .. كل شي يجيبه لهـا كان عندها بالدنيـا ... كان يجيها من الرياض بين اسبوع واسبوع واحيانا يجي ياخذها من الجامعه ... ووصايف تعلقت فيه اكثر واكثر ... كان يدلعهـا وقت مايكون عندهـا اختبار ويواسيها اذا رجعت وهي مزفته ... وصايف شافت احلى شي الملكه وقت الدراسه .. حست تغير جو لوووول "
" ميــساء ومشــاري "
" مشاري اخذ ميسـاء ... مشاري كان كل شي بحياة ميساء .. بالفعل عوضها عن كل شي فقدته .. صار لها ام وابو واخو وزوج وصديق ومدرس .. كان يدرسها الاشياء اللي تهمها بحياتهـا ... ميساء لقت في حضن مشاري اللي فقدته طول السنين .. قعدوا مع بعض وتذكروا ماضيهم وشلون الحياه جمعتهم من جـديد .. مشاري ماهتم انه كان يكلمهـا .. لانه ماعاد يشوف غيرها بالحيـاه ... ميساء عوضت مشاري عن العذاب اللي عاناه وهو يدور عنهـا وصار ماتفارقه ولا لحظـه "
" نجــود وفــواز "
" فـواز واخيرا طلـعت نجود حـامل .. الكل فرح لنجود اكثر من غيرهـا لانها الوحيده اللي طولت ... فواز ماكان يبي نجود تمشي على الارض لو بهواه يحطها فوق ظهره ويمشي فيهـا ... ام فواز تابت عن نجود وصارت تدللهـا وتعاملها مثل بنتهـا .. نجود عرفت معنى الحياه من اخذت فواز .. فواز علمهـا وفتحهـا على اشياء كثيره كانت غافله عنهـا .. نجود كانت تشوف فواز اعظم انسان على وجه الارض "
" جنــى وليــد وطــلال "
" وليد ارتاح يوم شاف ياسر ماتغير عليه وانه زاد اهتمامه فيه .. وحب سهر اكثر لانها ماغيرته عليهــم ... وليد وطلال رجعوا من جديد يكملون دراستهـم ... طلال ووليد اجلوا مواضيع الزواج والخطبه لبعـدين .. ماكان همهم غير يعيشون حياتهم الحين وبـس ولاحقين على ذاك الهـم ..
جنى تحس بتصير وحيده بعد وصايف لكن انبسطت يوم انهم قرروا يمددون لزواجهم .."
" نــايف "
" نايف نفس الشي لقى عنوانه مع ريم ... بالفعل ذولا الاثنين كانت لهم حياتهم الخاصه وعالمهم الخـاص .. عالمهم مهما كان كبير ... كانوا حاصرينه بينهم بين بعض .. نايف كان انسان متفهم .. وريم كانت له الزوجه السنعه *_^ ... ريم كانت بالفعل حرمه ... كل الحريم كانوا يمدحونها ويمدحون سنعهـا ... البنات صارت تغار منهـا لكن بعدين كل وحده ولها حياتهـا .. وريم تعودت على هذا الشي ... ونايف كان فخور فيهـا وحتى ابو نايف والكل ماندم يوم قربهـا "
" مسـاعد ولميــس "
" مساعد اخذت له امه اللي خاطرها فيهـا ... ولميس خطبها ولد صديق ابوهـا ... وكلن مبسوط في حيـاته .. اديم كانت حياتها مختلفه عن باقي الابطـال ... في كـل شي ... حتى مساعد ... وفي الاخير كلن لقـى عنــوانه "
.
.
.
اعضـــــائــي ... احبـــــائي
اشرقت شمس غرامك صار عنواني بين ايديكم
فغمرتوها بدفئكم
واصبحت تنمو وتزدهر بين قلوبكم
ولكن
بدون سابق انذار
اعلنت غرامك صار عنواني الانتهاء
ايام جميله قضيتها معكم
تخللها الحب
فأحببت تواجدكم الدائم معي
فقد كنتوا نبراس ل:
غرامك صار عنواني
التي لاتزداد جمالا الا بحضوركم
فلا انسى وكيف انسى على مر الايام عطركم
اتمنى ان تبقى غرامك صار عنواني ذكرى لاتزول
كالختم الذي لايزول
وسيبقى الحنين والاشواق الجارفه لتواجدكم
لانه بحضوركم يكون لـ غرامك صار عنواني رونق خاص
فأنتم من جعل براعم غرامك صار عنواني يانعه
لقد كنتم كالنسمات في الربيع لها
فانتم الشمعه التي يفوح عطرها على ارجاء
غرامك صار عنواني
فأنعم بنوركم الذ ي يضئ بداياتي
وستبقى ذكرى انفسكم الرائعه محفوره في مخيلتي
28/12/2008
مـــــع خـــــالص ودي ..،،
نبضــــــة دلـــــــع
|