الجزء السادس عشر
الفصل الاول
" الســاعه 4:30 "
" سهــر توها تصحى بعد مااخذت لها دش نزلــت وعند اخر عتبــه درج سمعت ابوهـا ينادي "
بو محمد : ســهر
سهر لفت عليه : سم يبه
بو محمد : نادي اخوك سلطان وخليه يجيني المكتب
"سهر خفق قلبها وش فيه توها قايمه"
سهر: ان شاء الله يبه
" وتوجهت للصاله وماكان فيه غير سلطان ومحمد "
سلطان وجهه منصفق وسهر جت بتتكلم
سلطان: سمعت سمعت " واخذ نفس وزفره "
محمد بنظره تحذير : اياني واياك تستفز ابوي ياسلطان اللي يقوله لك تقول ان شاء الله
"سلطان سمع وسكت "
" ام محمد كمان سمعت بو محمد يناديه وطلعت تبي تشوف وش يبغى بسلطان "
" سلطان اول ماطلع مر من غرفة امه وابوه وشاف امه طالعه عوره قلبه على امه ماقدر يناظرها وهي تناظره بنظرات الحسره وكمل طريقه لمكتب ابوه ... طق الباب ودخل "
سلطــان والكلام يالله يطلع منه : ســم يبه ناديتني
بو محمد كان منزل راسه على المكتب : اي ادخـل
" سلطان راح وقعد على الكرسي مقابل ابوه "
" سلطان ساكت يفرك يدينه"
"بو محمد القى نظره عليه وبعدين رجع عينـه "
بو محمد : سلطـان ممكن افهم ليـش سـويت كذا .؟
"سلطان هبط قلبه كان يبغى يقول انه حبها وهذي القصه كلها لكن لسانه خانه هالمره "
بو محمد ماسمع رد : هل هو عنـاد لـنا ولا مثل مايقولون طيش منـك ؟؟
سلطان يتلعثم : يبـه انـا ... انـا
بو محمد رفع عينه : انت وشو ياسلطـان الحين .. لاتفكر انك انت سلطان الاولي اللي بنظري .. ممكن اعرف وش استفدت بعد ما عصيت كلمتي و نزلت راسي بلارض قدام الناس واهلك مافكرت لحطتها الناس وش بتقول عليـك .. كنت اسمع عن اللي يتزوجون بالسر عن اهلهم وكنت اول الشامتين عليهـم والحين بلحظه طيش منك تخلي الناس تتشمت علي
سلطان : بس يبه هذي ماكانت لحظه طيـش
بو محمد بقوه : اجل السالفه عنـاد ..
سلطان : لا وربي ولا حتى عنـاد
بو محمد : سلطـان انت حتى مافكرت تفاتحنا بالموضوع ... ولا حتى بينت شلون كنت تبيني اتقبل موضوع مثل كذا
سلطان بسرعه: يبه امي وسهر يعرفون البنت تعرفوا عليها وعجبتهم وانا كنت عارف انكم ماراح تسمحون لي اخذ وحده من برا العيله
بو محمد : وقلت مافيه الا احطهم قدام الامر الواقع
سلطان نزل راسه : هذا الحل اللي كان موجود وقتها
بو محمد: اذا كنت اني راح ارضى بلامر الواقع فاشيل الفكره من بالك
سلطان فتح عينـه : يعني شلـون يبه هي صارت زوجتي
بو محمد لف الكرسي: وزواج بالشكل هذا مايمشي بعيله "...."
سلطان : اووه عيله وعيله يبه انتم بس تفكرون بالصوره الخارجيه للعيله مايهمكم اللي داخلها
بو محمد بقوه : سلطــان ... انا طول عمري محافظ على الصوره الداخليه والخارجيه للعيله والكل راضي فيـه وماشفت حد متأذي منه غيرك وبعدين مو انت اللي تجيني على اخر عمري وتعلمني كيف احافظ على العايله وسمعتها
سلطان : اسف يبه ماكان هذا قصدي .. بس انا اشوف الزواج من خارج العيله مو عيب ولا حرام
بو محمد بقوه : صحيح مو عيب ولا حرام بس انت شفت شلون تزوجت " وبشمئزاز " استح على وجهك وانت تقول للناس هذي اللي تزوجتها من ورا اهلي
سلطان :.......
بو محمد : بنت مين هي
سلطان : هي كويتيه
بو محمد فتح عيونه : حسبنا الله ونعم الوكيل .. شكلك راح تجيب اخرتي ياسلطان
سلطان نزل راسه
بو محمد بعصبيه وبقوه : ماعلينـا .. مثل مااخذتها ترجعهـا
سلطان شهق : نعــم
بو محمد بصوت عالي : اللي سمعته
سلطان بسرعه: يبه هذي نجلا بنت عمي اخذت واحد من العيله وهي بنت ولا احد تكلم والحين بتقومون علي لاني اخذت اللي حسيتها الوحيده اللي تناسبني
بو محمد : نجلا وضعها كان غير وبعدين زوجها من قبيله معروفه ... وبعدين بنات عمك وش كثرهم مالقيت فيهم حده تناسبك .. لو وحده او ثنتين يمكن بس كل واحد ماشاء الله فينا عنده ثلاث اربع وبعدين يكون بعلمك مو ولدي اللي ياخذ وحده غصب عني ولاا ماتداخلنا بعد
سلطـان : يبه اسف طلاق ماقدر اطلق
بو محمد ضرب بيده على الطاوله : شوف ياسلطان .. ياتطلقها يا لاتخليني اشوف وجهك بعد هذي اللحظه
سلطان : بس يبه هي حامل والحامل مايطلقونها
بو محمد فتح عيــنه : سود الله وجهك ياسلطان
سلطان قام وراح لعند ابوه : يبه ابوس راسك ... قول اللي تقوله بس تكفى لاتطلب مني المستحيل
بو محمد لف راسه : وخر عنـي .. لا انت ولدي ولا هو حفيدي
سلطان : يبه واللي يرحم والديك يبه تكفى افهمني لو مره
بو محمد لف وجهه عليه بالقوه : طول عمري فاهمك ياسلطان .. سويت لك كل اللي تبي وعمري مارفضت لك طلب بس انك تطعني بظهري لا
سلطان فكر لحظه : الله يطول بعمرك يبه والله يخليك لنا بس يبه اسمعني انت قول لعماني وكلمهم وشوف وش يقولون واللي راح تتفقون عليه بسويه
بو محمد : سلـطان كلامي واضح .. تولد من هنا وتطلقها من هنا ولا لا انت ولدي ولا اعرفك والحين تقدر تروح " واشر بيده للباب "
" سلطان شاف ان مافي مجال يقنع ابوه وقرر يخليه يهدا وطلع عنه "
.
.
.
" في بيت بو نــايف "
" في غرفة نجـود "
نجود : غريبه راجعين بدري؟
نايف: لابس عمي تعبان قعدنا شوي وكلن قام لبيته
نجود : اهاا وش فيه عمي ؟؟
نايف: مدري والله بس اظن انه مانام امس بالليل
نجود : اهاا
نايف: على العموم انا نازل بس حبيت اقولك ان فواز بيجي الحين وبينهي الموضوع
نجود رقع قلبها : واخيرا
نايف ناظرها وبنظره بسيطه قال : نجود فكري بحل غير الطلاق لان طلاق انسي تطلقين " ومشى عنها "
" نجود وقفت مكانها معصبه .. "
نجود " مو على كيفهم كل شي يبونه يسوونه انا لو اقعد معلقه ولا ارجع معه وخل يسوي اللي يبي "
" قعــدت نجود تفكر من جديد بموضوع فواز وهي مصره انها تغلبه وتسوي اللي براسها "
" اما في الطـابق السفلي "
" نزل نايف وقعد مع امه وابوه ونجلا وزوجها "
نايف: حيالله باللي ماتتنزل وتكلم
نجلا ضحكت ووقفت سلمت عليــه : هلا والله هلا بدكتورنا
نايف ابتسم : هلا فيك
" سلم عليها وراح لزوجها وسلم عليه "
نايف: هاه شخبارك وين الناس ؟
نجلا تضحك بخجل : اعذرني ساخوس بس والله دايم مشغوله مع فصوولي
نايف: ماشاء الله واحد وشاغلك شلون لو تجيبين ثنين عز الله انك مو معترفه فينا
فهد يضحك : حشاك والله بس شسوي فيها اختك القاطعه عجزت وانا اقنعها نرجع الخبر ماهي راضيه
نجلا فتحت عينها : انا الحين
فهد ضحك : اي لاتسوين بريئه قدام اهلك
نايف ضحك : المهم كيف جده عسى مبسوطين
نجلا بحماس: مرررره مرره
نايف متعمد: من عذرك اجل
نجلا ضحكت : لا بس جد لاقالو جده غير في كل شي
نايف يضحك: اجل الله يعينك يابو فيصل
فهد يضحك : اووه وبس خلها على الله
نجلا تناظره وتتوعد له
نجلا : اجل وين خواتي
نايف: تلقينهم فوق
نجلا : اجل بقوم معهم
فهد : نجلا بتروحين معي بيت اهلي
ام نايف: والله تقعدون تتغدون لعنبوو طايرين
فهد يبتسم : ماعليش ياعمتي حقك علي والله بس امي ملزمه ان حنا نروح
ابو نايف: افا بس اقعدوا تغدوا معنا بما انكم واصلين
فهد يبتسم بخجل : والله اعتبره واصل بس امي تليفونات من امس
ام نايف: الله يهديك يافهد انا والوالده واحد بس انتم توكم واصلين وين فيكم تتمشورون
فهد : هي فيها فيها بنروح نسلم على الوالده وبالمره نتغدا هناك
ام نايف : شوفه يا بونايف انا ماحيله ذا الولد
نجلا ضحكت وتناظر زوجها : شفت مو بس انا
بو نايف: اتصل عليها وقولها عمتي لزمت
فهد مو عارف وش يسوي من كثر ماهو خجلان : ماعليش ياعمه العشا عندك وش تبين
ام نايف: يعنــي ملزم
فهد يبتسم : مو سالفه تلزيم بس عشان نسلم على امي وبالمره نتغدا هناك
ام نايف: خلاص اجل الله يحفظكم
نجلا: طيب انا ماشفت خواتي ولا شبعت منهم
فهد : روحي سلمي عليهم وبعد الغدا لك مني اجيبك عندهم
نجلا ميلت شفايفها بزعل : اوكي " ومشت "
نجلا وهي بطريقها تصارخ : ماما ارسلي فصول فوق
"فهد ضحك"
ابو نايف: وكيف الشغل بجده
فهد : والله الحمدالله كل شي ماشي اوكيه ياعمي
ام نايف بحسره : وبتقعدون مدى الحياه هناك
فهد ابتسم : شسوي ياعمه مجبورين
نايف: بس لاجده حلوه وقريبه كلها كم ساعه متى ماشتقتي لهم تليفون وهم عندك
ام نايف: اييه الله يعين
ابو نايف: بس مشروع ممتاز وناجح والكل يتكلم فيه
فهد: اي ماشاء الله وبسرعه صارت الناس تتفاعل معه وتقدم فيه
ابو نايف: الله يوفقكم
فهد ابتسم : الله يسمع منك
" فوق عند نجلا "
" اول ماطلعت وطلت بالصاله شافت نجلا قاعده تقرا قران ابتسمت ونطت عندها "
بسمه صرخت : نجوووووول
نجلا : بسوووم
" بسمه تبعد نجلا "
بسمه : وحشتيييييني ياتبن
نجلا: وانتي اكثر والله زمااان عنكم وعن بيتنا وحشتوني
بسمه : اي انتي مصيعه بجده ولا انتي هنا
نجلا تضحك : والله جده ماتنمل لو تروحين ماتبين ترجعين
بسمه : كلها فتره وبتملين وتقولين ودوني الخبر ابي ارجع
نجلا تضحك : لو تشوفين اسواقهم ماتشبعين منها
بسمه تضحك : المهم فصولي وينه
نجلا : خليت امي تطلعه الحين يجي الا نجود جتكم
بسمه اختفت البسمه : اي هي بغرفتها
" نجلا مالاحظت شي وقامت على طول غرفة نجود "
" وفتحت الباب بدون ماتطقه وشافت نجود منسدحه على بطنها "
نجلا: جوووووج
" نجود لفت عليها وفتحت عينها وقامت و سلمت عليها "
نجود تصرخ : ياحماره وينك
نجلا تضحك : والله هنا انتي اللي وينك
نجود تبتسم : اي بااين شخبار جده
نجلا : على كيف كيفك انتي بشريني كيف فوااز معك " وتغمز "
نجود ابتسمت مجامله : اوكي هذا حنا
نجلا : ليش تقولينها كذا مانتي مبسوطه بزواجك
نجود اخترعت: لالالا مو كذا بس ييعني وش اقول اصارخ اقولك مبسوطه
نجلا تضحك : اي مثلي شوفيني جيت الولد وانا مبسوطه بالزواج
نجود ابتسمت " اي انتي مو انا شوفي اللي عندك وشوفي اللي عندي "
نجود : الله يهنيك ويتمم عليك
" نجلا حست ان نجود نغمتها متغيره "
نجلا بنظره تشكك: انتي للحين ماحبتيه ؟
نجود : مو مره عادي
نجلا ابتسمت : بعدين تحبينه وماتقدرين تفارقينه شوفي انا اول ما اعرست كل يوم ابكي وعند اهلي نسيتي ماكنت اتخيل اني اقابله طول الوقت وشوي وشوي بديت اتعود عليه وحبيته ولاقدر افارقه لحظه يوم قال بيروح جده قلت اروح معك رجلي على رجلك اول شي ماتقبلت الفكره اني ابتعد عنكم بس يوم فكرت هذا زوجي خلاص وقدري وين مايروح بروح معه وهناك بالعكس زاد حبنا لبعض وتعلقنا في بعض اكثر بعيد عن اهلي واهله ومشاكلهم .. هناك قدرنا نتفاهم اكثر واكثر مافي حد يضغط علينا او يتحكم فينا ... نجود انا احسدك انك خذتي حد تعرفينه فواز ولد عمي اولى من الغريب عليك بيحبك وبيخاف عليك اكثر من الغريب صدقيني شوفيني اخذت واحد ما اعرفه وشلون تمشكلت معه ومع اهله والحين افتكيت وانتي توك متزوجه الحياه قدامك
نجود ابتسمت مجامله : ان شاء الله
" بسمه كانت تبي تجي تجلس معهم بس يوم قربت وسمعت كلام نجلا تركتها تكمل كلامها علو وعسى تقتنع "
نجلا : على العموم انا برجع لكم وبعرف اخباركم كلها بس الحين بروح بيت اهل زوجي عازمينا الغدا اوكي
نجود : اوووكي
نجلا: سلام
نجود وهي بمكانها : سلام
نجود " ااه ياحظك يانجلا عندك واحد يحبك .. مو انا ياحظي يبي يطلع حرته فيني .. لو بس تدرين بفواز اللي مالي عينكم اف "
" ثواني وبسمه تدخل "
بسمه : نجود نجود
نجود : هاه
بسمه : فواز وصــل
نجود اخترعت: وشو
بسمه : ايه توه واصل
نجود ترتجف: طيب واذا
بسمه : اها يعني مو نازله له
نجود : لاطبعا والحين اقلبي وجهك " وقامت وطلعت اختها وسكرت الباب عليها بقوه ولصقت اذنها بالباب يمكن تلقط شي "
" تحت بالصاله "
" نجلا وهي تلبس عبايتها وصل فواز وراحت ركبت السياره وراح زوجها يسلم عليه وبعدها مشت هي وزوجها "
" اول ماوصل فواز ورحبوا فيه قعدوا وشوي حطوا الغدا ... طبعا بسمه خلتهم ينقلون غداها فوق ونجود ماتغدت وقعدت مكانها يوم عرفت انهم قاعدين الحين يتغدون وقلبها على نار مو عارف وش قاعد يصير تحت وقفلت على نفسها عشان لاحد يغصبها تروح معه ولا يكلمها حتى سمعت بما فيه الكفايه وهي خذت قرارها .. اما بسمه مع ان الموضوع مايخصها الا انه تحس تتغدا واللقمه يالله تمر من بلعومها تحسها ثقيله وهي تمر وترتجف بنفس الوقت "
" بعـــــد الغـــــداء "
" انتقلوا من صاله الى صاله ثانيه وقعدوا فيها جوها مناسب للسوالف والقهوه... حطو القهوه وبدوا حوارهم بمواضيع خفيفه "
ابو نايف : لااا ماشفناه اليوم اجل
فواز : اي ياعمي لانه تغدا وعلى طول رجع ينام نومه متخربط خبرك
ابو نايف: ماشاء الله الحمدالله على سلامته
نايف ابتسم : ياحليله طليل والله وكبر
فواز ابتسم : شفت شلون
نايف: المهم كيفه مع الدراسه
فواز بيأس : مع الاسف يقول جامعته صعبه و لعب بعقل ابوي حتى خلاه ينقله مع بدر و وليد
نايف يضحك: طبعا مايعزي عنه
فواز ابتسم : الظاهر كذا
" ام نايف بخاطرها قول واخلص تبي تفتك "
" وبعد لحظـه "
فواز : عمــي ؟
ابو نايف: امر يافواز
" فواز ماعرف كيف يفتح موضوعه لانه نسى كل المقدمه اللي مجهزها "
ابو نايف كأنه فهمه : نجود
فواز : اي ياعمي
ابو نايف: والله يافواز اسمع وانا عمك نجود صار لها ثلاث اسابيع عندي ولا انت وهي راضين تتكلمون عن السبب اللي خلاها تقعد طول هالفتره وبنفس الوقت انت مو سائل عنها
فواز طاح وجهه : حقك علي ياعمي .. بس صدقني ان مو هذا القصد انا ماحبيت اشغلها عن اختباراتها وقلت بعد الاختبارات نتفاهم وهذا انا اليوم جيت وابغى اقولك على كل شي .. انا صبرت ياعمي صبرت كثير على نجود
" وسكت بنية انه يواصل كلامه "
" فواز كان يحس بشعور مضاد للي كان يحس فيه بدايه ما اخذ نجود وكيف كان قلبه مليان عليها بس لازم بنفس الوقت يبرر موقفه وقاعد يحاول يستجمع قواه على انه يتكلم "
" نايف وقتها يحس يبي يسكر اذونه ولا يسمع شي من اللي راح ينقال "
فواز : بس ياعمي نجود شخصياتنا متناقضه مهما حاولنا نفهم بعض .. نجود من الطبع الحار .. وهذا من الصعب اني اتحمله ... ما اقولك تغاضينا على اشياء كثيره طول هذي الفتره لكن نجود يمكن كبرتها شوي بهذي المره
ابو نايف: ماعليش نايف بقاطعك ... مهما كانت شخصايتكم متناقضه مو عذر ان البنت تهجر بيت زوجها الا و السبب مو بسيط
فواز : اي ياعمي
ابو نايف: اسمع يافواز .. انا كنت ساكت من البدايه ولاتفكر انه هاين علي وانا اشوف بنتي مرميه عندي لا ليلها ليل ولانهارها نهار .. اكيد ان السبب اكبر من ان الشخصيات متناقضه .. الكل تزوج وياما واحد خذ وحده حاره وهي بارد وتحملوا بعض ولا وصلت انه يرميها بيت اهلها ثلاث اسابيع
" فواز سحب نفس يبغى يقوله باللي صار بس ماهو قادر "
"نايف يناظره بلهفه للكلام اللي بيقوله"
فواز شبك يدينه : عفوا عمي بس اللي صار ان نجـود " وحارت عيونه "
" وش فيها نجــود "
" دخلت نجود عليهم وكانت الدمعه واقفه بيعنها نايف وقف منصدم ماتوقعها تنزل له وابو نايف طول الوقت يسمع فواز ولا اخذ من شي وام نايف استغربت بنفس الوقت "
" اما فواز فتح عيونه بعد ماشاف نجود والحاله اللي وصلت لها "
نجود : نجود عصبيه محد يستحملها الواحد مايقدر يتكلم معها مو هذا اللي تبي تقوله وعشان كذا ماعرفت اتصرف معها
ابو نايف: نجود اسكتي شوي خلي الرجال يتكلم
نجود : يبه ماله داعي كل المقدمه اللي بيقولها .. يبه السبب كان تافه ولا يستدعي اني ازعل عليه كل هذي المده وفواز حاول كم مره يكلمني وكلم اخوي عشان يقنعني اني ارجع له وانا مارضيت ... و مثل ماقال لك فواز انا واياه ماقدرنا نتفاهم ماقدرنا وانا تطاولت عليه وجيت بيت اهلي لاني توقعت حياتي مع فواز مامنها رجا ومستحيل انها تستمر
" فـــواز انصدم من كلام نجــود معقوله هي تقول هذا الكلام عنــه "
" نــايف حس انه بغيبوبه من اللي يسمعه من اخته ما كأنها ذيك اللي قبل ساعه لف على امه وابوه وتدارك الموقف بسرعه "
نايف: اي يبه هذا كل اللي صار
"فواز ماعرف وش يقول ونزل راسه "
ابو نايف عصب : انا كنت عارف ان السبب منك انتي .. بسبب عنادك ودلعك ... لكن الغلط مني زوجتك صغيره وماتفتهمين " وتركهم ومشى عنهم "
" نجود وقفت مكانها ومنزله راسها "
ام نايف: زين كذا يانجود زعلتي ابوك و زوجك وانتي بس قاعده تدلعين
نايف يهدي الوضع : افا عليك يايمه ابوي من خوفه عليها فكر اللي صار شي كايد وانحرق قلبه يوم عرفت سخافه الموقف
" فـــــواز كان ســاكت مو عارف وش يقول نجود صدمته "
ام نايف لنجود : يلا قدامي شيلي اغراضك وروحي مع زوجك ماقول غير الله يفشلك يوم انك فشلتينا بزوجك واهله وش بيقول عني بس لكن انا الخبله اللي تركتك على راحتك
" نجود ماطالعت بفواز ولكن جت امها وسحبتها معها وراحت نجود تحط اغراضها وام نايف راحت لابو نايف الي على طول راح الغرفه "
نايف راح وجلس جنب فواز وهو ياخذ نفس : صدمه صح
فواز هز راسه
نايف: والغريب اني توي نازل من عندها وهي معنده ماتبي تنزل لك وتبيك تقول لابوي كل شي
فواز : نايف كلام عمي صحيح
نايف: ياخي ماعليك من ابوي الحين بيعصب وبعدين بيرضى
فواز بغرابه : ماعرفت وش اسوي وش اقول اصلا ريقي نشف
نايف ضحك : لا الحين نجود ثبتت لي انها تحبك وماتقدر فيك ولا نجود ماكانت ترضى حد يهاوشها ولا يزفها لو ابوي يصرخ عليها شوف وش تسوي فيه والحين ولا كأن قال لها شي
فواز ابتسم : يمكن ربي هداها وحست فيني .. بس ماتدري شلون كأن وشي ثقيل طاح من على ظهري
نايف ابتسم : يلا بس هااه مو كل مره تسلم الجره
فواز يضحك : لاخلاص توبه
نايف بجديه : فواز ماعليش تحمل نجود والله نجود بس تبي اللي يكسر عينها وبعدين بتشوفها ماشيه مستقيم بس الحين تعرف توها متزوجه وتبي تدلع وتفرض شخصيتها ومن هالكلام بس بعد فتره تنكسر عينها وتصير منصاعه لك
فواز : ولايهمك
" فوق عند نجود "
بسمه بفرح : نجود بتروحين
نجود تحط اغراضها : ايه
بسمه : قولي لي وش اللي غير رايك
نجود وقفت عن اللي كانت تسويه : كلام نجلا اثر فيني حسيتها مبسوطه بيت زوجها مع ان شوفي كيف كانت حياتها اول اعسر مني واكثر والحين اللي يشوفها يقول ماخذها عن حب
بسمه ابتسمت : لو ندري كان خليتها من زمان تجي
نجود تضحك : شوفي ترى اهون
بسمه : اقوول اخلصي بس
نجود كشرت : وابوي ؟؟
بسمه : ولايهمك ابوي انا بفهمه وبكلمه هو بس لان خاف عليك ويوم عرف ان السبب سخيف عصب بس مشكلته مايعرف يعبر عن شعوره
نجود ابتسمت : اي والله الحين بروح له كملي هذا الشي وبعدين خليهم ينزلونه
بسمه بفرحه : طااايب
نجود وهي ماشيه : اي تبي الفكه
بسمه تضحك : افااا
" راحت نجود عند ابوها طقت الباب ودخلت "
نجود تطل بوجهها : ادخل
" ام نجود شافتها ولفت على بو نايف "
ام نايف راحت لها : ترى ابوك زعلان منك " وطلعت "
" نجود راحت عند ابوها "
نجود: بابا
ابو نايف : نجود ابغى اريح بغيتي شي
نجود تبتسم : بابا اانا اسفه
ابو نايف لف عليها : على ايش يانجود ووش يفيد اسفك باللي صار كله وش بيقولون عني بنتهم تاركه زوجها ورايحه عند بيت اهلها بس تدلع
نجود نزلت راسها : يبه صدقني انه غصب عني " وسكتت " وبعدين هذي مشكلتكم تزوجون الواحد الثانيه ولا تهتمون يصلحون مع بعض ولا لالا من جد يبه ماكنت محتمله حياتي مع فواز احسه مو فاهمني وبس همه يمشي كلامه علي وبعدين هذا شي طبيعي انا بعد ماقدر بيوم ليله اتعود على واحد عيشني حياه مختلفه عن الحياه اللي عشتها بيت اهلي
" ابو نايف يناظرها "
ابو نايف: نجود يا يبه هذي المره بعديها لان على قولتك توك متزوجه وتدلعين.. بس مابيها تتكرر مره ثانيه تسوى فشيلتي قدام عمانك مدلع بناته مدلع بناته ... بس يا يبه ابيك تفهمين زوجك وتخلينه يفهمك مو تفرضين عليه شخصيتك ترى الرجال مايرضى اي بنت تفرض شخصيتها عليه وخصوصا توكم متزوجين .. لاتفكرينه قاعد يمرر وبس اكيد هو ناوي خير وقاعد يحاول يفهمك وهذا فواز وانا ادري فيه ونجود يا يبه خففي من عصبيتك اللي مالها معنى
نجود ابتسمت : ان شاء الله يا احلى ابو في الدنيا
" وباست راسه "
ابو نايف: وعلى قولتك السبب تافه ممكن اعرفه
نجود توهقت وضحكت: بابا بس ادلع
" ابو نايف قرص خدها وبعدين ودعته وطلعت منه "
.
.
.
" في بيت بو ياسر "
" ياسر كان توه بينزل بيت بو محمد الا وقالوا له عن بو محمد وعلى طول شغل سيارته وراح لبيتهم ..كان طول الوقت تفكيره مشغول "
" اول ماوصل "
ام ياسر استغربت : ياسر
ياسر : سمي
ام ياسر : شفيك مارحت بيت عمك
ياسر : عمي اعتذر اليوم يقولون انه نايم
ام ياسر: نــايم وش هذا العذر
ياسر : اي يمه اكيد نفسه ضايقه على اللي سواه سلطان
ام ياسر تذكرت : ايييييه خانت حيلي هد ظهره هالولد
ياسر : الله يعينه ودي لو قعدت هناك وعرفت وش صار على عمي بس ماقدر وهم مابينوا شي لذا الحين
ام ياسر: على خير اجل بخليها تحط الغدا
ياسر : خليها
" راحت ام ياسر وكمل ياسر طريقه وقعد على الكنبه وباله مشغوول .. يحس اليوم يمر بطيئ بس والاجواء ميب طبيعيه "
ياسر " الله يصلحك ياسلطان وش اللي سويته .. الله يعينك ياعمي بتلاقيها من عماني ولا من ولدك .. الله يعينك .. ياذا وجه محمد مقلوب فوق تحت ... وسهر .. ااخ شتسوي الحين اكيد قافله على نفسها بعد مايصير هذا توامها واقرب واحد لهاا ...الله يعينك ... اااخ والله مايستاهل عمي اللي جاه من ولده "
ام ياسر : يلا يايبه
ياسر: وعبير ماهي جايه
ام ياسر : لا بتتغدا بيت اهل زوجها
ياسر: على خير
" قام على امه واخلاقه قافله من جد البيت صار ميت ماله خلق حتى يتغدا بس عشان خاطر امه المكسور ويوم فكر يحي البيت كل شي تقفل بوجهه .. بس وش يسوي مضطر يتحمل عشان امه "
ياسر: يمه ليش ماتطلعين كله حابسه نفسك
ام ياسر: وين اروح ياولدي
ياسر: بيت عماني ماكثر الله منهم
ام ياسر: لاا ماودي اضيق عليهم وبيني وبيينك انا كلمت خواتي يجونا
ياسر استانس: صدق
ام ياسر: ايه اجازه واجزوا خلهم يجون يقعدون جنبي شوي
ياسر: لااا حلووو والله .. بس خلاتي من جد من زمان عنهم مالهم بينه
ام ياسر: اي وانا ولهت عليهم بعد بس لاهين بأشغالهم
ياسر: زين مافكرتي
ام ياسر ابتسمت
ياسر: ومتى بيجون ؟
ام ياسر: اخر الاسبوع الجاي الاربعاء
ياسر: على خير ان شاء الله
" استانس ياسر ان في حد بيجي عندهم وهذا الموضوع انقضى عنده يعني يقدر الحين يأجل خطبه سهر.. بس باقي يعرف اخر تفاصيل موضوع سلطان "
.
.
.
" في سياره فواز "
" بعد ماطلعت نجود من بيتهم ماكان عندها الا اشياء بسيطه اللي اشترتهم مؤخرا .. بعد ماحط فواز اغراضها بالشنطه وراح ركب ولقاها جنبها ... حس بشعور غريب يجتاحه يحس بشي كبير قاعد جنبه رغم ان نجود حجمها وسط وخفيفه .. عرف ان نجود تسوى عنده الكثير مو بس وحده اخذها عن كره وتحول لحب بدون مايحس .. وبنفس الوقت يحس ان الجو في السياره معطر رغم انه ماعطرها قبل لا ينزل من كثر ماكان متوتر وناسي نفسه .. نجود حست ان قلبها رجع ينبض واحاسييس متخالطه بداخلها ... مو عارفه وش بتقول كأنها بأيام الخطوبه مع انها ماعاشت خطوبتها مثل الناس ... فواز رغم كل هذي الاحاسيس الا انه للحين مصدوم من تصرف نجود الغريب واللي كان متوقعه اخر شي ممكن تسويه نجود بذاتها ... فواز ماعرف هو الثاني وش يقول او كيف يتكلم وبنفس الوقت ماحب يروح البيت الحين ووضعهم متوتر كذا قرر يغير اتجاهه ونجود لاحظت هذا الشي وكانت متوقعته ... بس اللي كانت متوقعته ياخذها مطعم ولكن هذا طريق الهاف موون استغربت من جده بيوديها البحر "
نجود " كل ماقلت بيتعدل يرجع مايتوب "
نجود مشبكه يدينها وتلعب فيهم وبصوت هادي نادر يطلع منها : وين بنروح ؟
"فواز ابتسم يوم سمع صوتها ولف عليها ورماها بنظره"
نجود " يالله وش هذا السؤال الغبي يعني وين بنروح مثلا المول وهذا طريق البحر "
نجود : اقصد ليه بنروح البحر ؟
فواز لف عليها وسبل عيونه فيها وبصوت دافي قال لها : ماودك نقعد مع بعض ولحالنا ونسولف
نجود توترت : بس الجو مو جو بحر
فواز ابتسم : شوفي انا اليوم كل شي عندي غير الحر يصير برد والغبره تصير ثلج و
نجود ضحكت
فواز انبسط ولف عليها وبعيون تلمع : نجود فــديتك والله
نجود استحت وحست عيونها من الحراره بتدمع وبعد لحظه : طيب خلنا نمشي في السياره مانبي ننزل
فواز : بالعكس بنقعد شوي نسولف وبعدين نكمل في السياره
نجود نزلت راسها : مدري براحتـك
فواز ابتسم ورفع حاجب " الظاهر عقلوها او هي عقلت "
" بعد ربع ساعه في الطريق قضوها وهم شوي يتكلم فواز وشوي يسكت فواز تحمل حتى وصلوا البحر هناك يمكن يكون الجو اهدا لانهم كانوا فاتحين الشباك اللي فوق وكان مسويه ضجه يعني غير الجو عليهم واصلا فواز مو عارف يتكلم وهم بالسياره بس قعد يسولف اشياء بسيطه وبعد ماوصلوا وقف فواز السياره عند اخر المواقف وكانت الساعه على حدود الخمسه يعني الشمس قريب تغيب اي الجو كان اوكيه نزل فواز ونزلت نجود وراه انتظرها عند مقدمه السياره واول ماوصلت عنده مسك يدها ومشى معها .. ارتعشت نجود من حركته ومشت معه حتى وصلوا عند مقدمه البحر "
نجود : غريبه في هوا هنا
فواز : اي الجو هنا دايم غير ..
نجود: فواز عادي اشيل الغطا
فواز ابتسم ولف عليها : عادي بس اذا وصلنا عند البحر وقعدنا
نجود هزت راسها
" واول ماقعدوا كأنها ماصدقت على الله شالتها "
نجود: معقوله يوم الجمعه وزحمه
فواز : اي شي طبيعي الناس بعد الصلاه على طول تشيل غداها وعلى البحر
نجود ابتسمت
فواز يناظرها ونجود حست بنظراته ولفت وجهها
فواز : نجود حليانه
نجود لفت عليه : بدينا بالطنز
فواز ضحك: والله ما امزح
نجود: لا يتهيأ لك
فواز بنغمه : ليش يتهيألي مو كان عندك ثلاث اسابيع فاضيه وانا اللي اعرفه اسبوعيا في الصالون
"نجود فهمت قصده وناظرته بعيون تعبانه ونزلت راسها وقعدت تلعب بالرمل ولا ردت عليه"
فواز قعد يناظرها : نجود
نجود بدون ماترفع راسها : همم
فواز وبنظره : ليش سويتي كذا ؟
نجود رفعت عينها : وش قصدك ؟
فواز: ابي السبب اللي خلاك ترجعين لي مع انك كنتي مصره ماترجعين ؟
نجود فهمت قصده وابتسمت : عرفت اني ماقدر اعيش بدونك
" فواز ماصدق انه نجود اللي تتكلم قدامه وتقول كذا "
فواز رفع راسه و يصارخ: واخيراااااااا
نجود ضحكت : مجنون
فواز ضحك : فيــك
نجود تضحك
فواز : كنت عارف لاني شفت العذاب بعيونك يوم شفتك في تشيلز وكيف كنتي ذبلانه
نجود بنظره جانبيه : مو توك تقول اني حليانه
فواز ضحك : لانك بس تضحكين كل شي بعيني يصير حلو
نجود تضحك وتعبس بعينها : عياااار
فواز ضحك : افاا بس قومي نمشي
نجود : يلا
" قام فواز ومد يده لنجود ضحكت نجود وهزت راسها وحطت يدها بيده وقامت "
فواز : نجود انا اسف حياتي .. عارف اني غلطت بحقك
"نجود حست انها مبسوطه وماودها تجيب هذا الطاري الحين "
نجود تسكته : خل الاسف بعدين لاني لو فتحت الموضوع الحين بصير نجود
فواز ضحك وهي ضحكت
فواز : وانا اقول اكيد هذي مو نجود اللي اعرفها
نجود تبتسم : لا امزح بس ماودي اضيق خلقي لان حدي مبسوطه
فواز ابتسم ورص على يدها وبصوت فيه تنهيده : ياعسى دووووم قولي امين
نجود ضحكت: امين
" شوي ويدق جوال فواز ووقفوا وقابل فواز نجود "
"فواز اول ماشاف الاسم صكت الدنيا عليه شلون نسى سلطان "
نجود عقدت حواجبها
فواز : هذا سلطان.. هلا سلطان
سلطان بصوت مبحوح : فواز بمووت تعرف شلون بموووت
فواز اخترع : سلطان شصااار
سلطان وهو يرص على اسنانه: ابوي خيرني
فواز فتح عينك وصارخ : سلطان وش صوته هذا
سلطان يزمر : اوووووووووه هذا واحد ملعون كان بيدخل علي
فواز : سلطان سلطان وينك فيه ؟
سلطان وهو قرفان حياته : مادري مادري
فواز بخوف ونجود مستغربه : قولي وينك فيه
سلطان : انا توي طالع من البيت
فواز : خلك مكانك " وتأفف " كم مره قايلك اذا عصبت لاتسوق ولا كأنك تسمع
سلطان : ماني موقف احس الدنيا ضايقه علي يافواز ماتفهم انت يعني ابوي لاعب فيني وتبيني اقعد في البيت
فواز : كلمني على الاقل .. المهم ثانيتين وانا عندك لاني قريب من بيتكم " وغمز لنجود"
سلطان تأفف : شوف تعال لي القهوه
فواز : قلت لك ثانيتين ماتفهم
سلطان بصوت ضايق: يلا
" فواز سكر التليفون "
نجود : وش صاير؟
فواز : ماعليش حبيبتي بس تعالي وبالسياره اقولك كل شي
" راحت نجود مع فواز وركبت السياره وفواز حده متوتر .. ونجود ضاق خلقها لان جوها اخترب عليها وكانت عارفه ان هذي سالفه فواز حياه الناس اهم من حياته .. "
فواز : مو انا قلت لك ان سلطان تزوج
نجود عبست بعينها : اي
فواز: اي والحين عمي عرف بالموضوع وسلطان ضايق خلقه
نجود : عمي وش سوا
فواز : مادري من قاله وهو ساكت واليوم الظاهر كلمه
"نجود تنهدت .. فواز لف عليها بلمحه سريعه يشوف ردة فعلها"
نجود : مادريت ان السالفه صدق
فواز : ماعلينا .. بس نجود من جد اسف ماكان ودي يخترب الجو علينا بس
نجود: لالا عادي
" نجود ماحست الموضوع مره مهم بالنسبه لها لان سلطان ماصار يعني لها شي ولا تفرق معها وش يسوي الحين "
" فواز كان وده يعرف شعور نجود الحين وخصوصا مازالت في بقايا من ماضيها مع سلطان بس مايقدر يعرف شي الحين وهو بهالحاله "
فواز يضرب على الدركسون
نجود : وش فيييك
فواز : سلطان مجنون ممكن يسوي اي شي وعارف انه ماهو منتظرني وعادي عنده يرمي بنفسه اذا كان متضايق
نجود : طيب شوي شوي وانت تسوق سلطان يروح يعني كلنا نروح
" فواز حس ردها برد على قلبه مع ان ماكان وده تقول عنه كذا الا انه لا شعوري برد على قلبه "
" فواز سكت وقرر يودي نجود وبعدين يروح لسلطان بس قلبه قاعد ياكله على سلطان "
.
.
.
|