" في امريكــا "
" في هذا الوقت كانت الساعه حول 11 عندهم .. بدر صحى بدري ووليد لسا ماصحى .. قام بدر واخذ له دش وبعدها راح يضبط له كوفي .. طلع على البلكونه وكان وقتها قاعد بس بالشورت حقه .. وقف على البلكونه وسحب هوا وحس انه شبعان نوم .."
بدر : ااخ لو الجو بالسعوديه كذا كان حنا بخير
" الحلو بشقة بدر انه تطل على البحر من اليمين وبحيرات ومزارع من اليسار وفي الوسط العماير .. من جد موقع استراتيجي .. ولكن بدر على كل اللي يشوفه الا انه غير هوا السعوديه مايشبعه .. يحس انه قاعد ومغصوب .. بعكس وليد اخوه اللي بغاها من الله ... بدر لاعت كبده من الاجانب بس مضطر يستحمل"
بدر: عاد الحين بدا الصيف .. الحين الناس تسافر .. على الاقل الواحد يشم ريحه هله مو يقابل اربع وعشرين ساعه هالملونين .. افففف
" فكر بدر للحظه يكلم سهر"
بدر: مدري اكلمها .. بس لا الحين عندهم الساعه 6 اكيد قاعده مع اهلها لا بنتظر باليل يجي عندهم وبتصل عليها .. ياربي الحين هي وش تسوي .. مبسوطه تعبانه .. ياربي الواحد يعيش هنا كأنه بمحجر مايدري عن اللي حوله .. صحيح اني بالسعوديه ماشوفها بس على الاقل تدري باخبارها من هنا ولا هناك .. هنا بالمره لا حس ولا خبر
وليد : مين اللي لا له حس ولاخبر
بدر طاح قلبه ليكون سمعه : صحيت
وليد : ايه سمعتك تتحلطم وقمت
بدر توهق : ومن قال اني قاعد اتحلطم
وليد : تقول مالهم حس ولا خبر
بدر يبي يتأكد اذا سمع شي ثاني : بس عشان قلت كذا قلت اتحلطم
وليد : اي قلت مدري عنك
بدر: اهاا انا اقصد منصور مدري شخباره من راح ماله حس ولا خبر
وليد بأستهزاء : اووه تلقاه نايم بالعسسل
بدر بصوت واطي : ماظنيته
وليد: وشوو
بدر: ولا شي قوم افطر
وليد : لا انا بفطر بالجامعه
بدر: ااه ايييه
وليد : يلا عن اذنك
بدر: اذنك معك
" طلع وليد من عند بدر ... بدر تشقق على النصبه اللي نصب فيها على وليد لانه تذكر منصور من زمان عنه صار له فتره لايكلمه ولايدري عنه .. وشاف الوقت مناسب واتصل عليه .."
" بعد ثواني "
منصور: اهليييييييييييييين
بدر : هلالا والله وغلااااا
منصور: هلا فيييييييييك وين الناااس
بدر: ابد والله انت اللي وينك
منصور: اااااااخ لاتسالني لاني مادري
بدر ضحك : نصووور قولي شلاخبار عندك
منصور: لك عليه الله وكيلك
بدر ضحك : لااااه
منصور: اي والله
بدر: لا بكرا تتعودون
منصور: قل امييين .. انت بشرني عن دراستك
بدر: ماعليها هذي هي الدراسه وحده
منصور ضحك
بدر: ماعلينا شخبار الزواج
منصور: تقصد الزوجه ولا الزواج
بدر ضحك : لا خبري عن زوجتك اقصد الزواج
منصور ضحك : لااه هذا اوكيييييييه
بدر ضحك : يالملعوون
منصور: يلا تحرك قبل لايروحون عليك
بدر: ااخ لاتعور قلبي
منصور شهق
بدر نقز : خرعتني ووجع
منصور: تعال يالملعون من وراي
بدر استوعب وضحك : لااااا من جدك
منصور: احللللللف
بدر يضحك كأن حد يدغدغه : شفيك انت معقوله يصير شي ولا اقولك
منصور: مردي قلت يمكن
بدر يضحك : لا افا عليك
منصور: اييه اياني واياك
بدر غير الموضوع : شخبار الاهل تكلمهم
منصور: اي من فتره لفتره
بدر بصوت واطي : الا غزل درت ؟
منصور: بأيش
بدر: بمشروعك الفاشل
منصور ضحك : لااا للحين
بدر : الله يعييييييينك
منصور: وهـ اسكت واللي يرحم والديك مالي ملة مهايطها
بدر: احسسن ولا تقول لي بسرعه لايروحون وين لي انا بالهم
منصور ضحك
" وبدر قعد يسولف مع منصور حتى روقوا ثنينهم صح "
.
.
.
" في بيت بو فواز "
" البنات وقتها كانوا مجتمعين عند منار ولاهم داريين عن شي ... اديم وجنى ووصايف راحوا لمنار وكانوا حدهم مبسوطين سوالف واكل ولعب .. حتى ميساء كانت مبسوطه "
لميس من قلــب : اااخ وتبوني اقعد بالرياض
جنى تضحك : ليه في حد كان ماسكك
لميس : لا بس مافي حد يحمسك كل ماقلت لحد قال لا مابي حتى ميسوه ذي لاتغركم كانت معنده
جنى تناظر ميساء : خل الرياض تنفعها الحين
وصايف تضحك : اي من جد الرياض تنرفز
اديم : لا عاد مو لهذي الدرجه
لميس: بلام ماعشتي الزهق اللي عشته واي واي ازمه نفسيه صراحه
اديم تضحك : يمكن حنا لسا مابعد نحس بالزهق
وصايف :كلن يتكلم عن نفسه انا من ثاني يوم بديت اطفش
لميٍس: انتي عاد حاله خاصه ماورا سنه قاعده في البيت
وصايف: اف لاتسألين
اديم : ميساء وانتي ايش صار عليك ؟
ميساء مافهمت : من اي ناحيه ؟
اديم : درستي شي ولا بتدرسين
ميساء استحت : لا بس جتني مدرسه لمده اسبوعين عطتني اشياء اساسيه وبعدها ماجت
اديم بحزن: ليش؟
ميساء: صار عندها ظروف واضطرت تروح مصر
اديم : اهاا طيب الحين اجازه دوري لك على وحده ثانيه " ولفت على لميس " ولا لميس تساعدك وش عندها
جنى : وه وش لها بالهم خلها تعيش حياتها بس
ميساء بنظره مكسوره : بلاك ماعرفتي قيمه الدراسه يا جنى
جنى : انا وحده ماطلعت بشي منها ولا احس بطلع بشي .. الي تحفظينه حدك تسمعينه مره وبعدين تنسينه
ميساء سكتت
" وصايف كانت طول الوقت تناظر وساكته .. صدق الكلام اللي تقوله لانها قعدة سنه في البيت وعرفة قيمه الدراسه .. فما بالك لو عشت طول حياتك ماتعرف شي بدون دراسه ولا معرفه "
لميس: يالله تنحل
منار: المهم يلا قوموا نتعشى
البنات : يلا
" وبعدها قاموا يتعشون "
.
.
.
" بيت بو محمد "
" في نفس الوقت "
محمد : انا ماقدر بدخل اشوف ابوي صار له قريب الساعه وهو لاطلع ولا له بينه " وقام "
" سلطان كان قاعد واول ماقام محمد سكر عيونه .. قاعد يجهز نفسه لان قلبه حاس ان فيه مصيبه داخل غرفة ابوه.. قعد ينتظر محمد يناديه ولا يسمع هواش او اي شي "
سهر: هههههههه سلطان شعندك منكمش على بعضك
سلطان تخدر جسمه ورفع راسه : هاه مافيني شي
سهر: علينا هههههه قوم شوف شكلكـ ...........
محمد يصارخ : سلطااااااااااااان
سلطان على طول نقز : لااااااااا
" سلطان طار قال اكيد ابوه مات ولا صار فيه شي "
"سهر وقفت مذهوله وش صاير"
" صرخت محمد هزت البيت ام محمد اللي كانت تحت سمعتها وطلعت فوق ركض وسهر كانت لسا واقفه مكانها "
" سلطان راح ركض ودخل غرفة ابوه وشاف محمد ماسك يد ابوه "
" سلطان اول ماوصل غرفة المكتب خفف خطواته مايبي يتلقى الخبر مره وحده .. ولكن هدت اعصابه يوم سمع محمد يكلم ابوه وبعدين دخل "
محمد : يبه تكفى قم معي خلني اوديك المستشفى
" بومحمد كان منسدح على كنبة الغرفه "
بو محمد بصوت واطي : محمد لاتخاف مافيني شي
محمد: شلون مافيك شي وانت حتى موقادر تتكلم يبه واللي يرحم اولديك
بومحمد عصب رغم التعب اللي يحس فيه : قلت لك خلاااص
" محمد التفت يوم حس بسلطان "
محمد : سلطان تعال ساعدني خل ناخذه المستشفى
بو محمد يوم عرف ان سلطان موجود لف عليه بعصبيه : طلعوووه برااا
" وقتها وصلت ام محمد وشهقت يوم شافت زوجها ..."
ام محمد اخترعت : محمد وش فيه ابوك
" وراحت له "
محمد : لا يمه لاتخافين مافيه شي
ام محمد اول ماشافت بومحمد عرفت ان الضغط مرتفع عليه : شلون مافيه شي وضغطه مرتفع اكيد ما اخذ دواه
" وراحت تجيب دواه ركض "
" ام محمد مادرت عن سلطان اللي من قال ابوه طلعوه برا وهو طالع ركض ... سهر انصدمت يوم شافت سلطان طالع يركض حست في حركه في الغرفه وراحت ركض لغرفة ابوها واول ماشافته نزلت دمعتها اول مره تشوف ابوها وهو بهالمنظر طايح على الكنبه ومايحس باللي حوله رغم ان مفتح عينه "
سهر: بااااااباااااا
محمد : لاحول ولاقوة الا بالله .. سهر شفيك ؟
سهر: شفيه ابووي
محمد : مافيه الا العافيه بس نسى ياخذ دواه
ابو محمد حن على بنته : يبه مافيني شي سمعتي كلام اخوك
سهر راحت لعنده وقعدت تحته : اكيييد
محمد: سهر ترى مو وقتك
سهر لفت عليه : مالك دخل من حقي اتطمن على ابوي
" وصلت ام محمد واعطت بو محمد دواه .. بعد فتره كلهم كانوا قاعدين عند ابوهم .. بس الحين ام محمد اكتشفت ان سلطان مو موجود "
ام محمد: سلطان وينه؟
محمد سكت
ابو محمد : لاتجيبون طاريه قدامي تسمــع
سهر اخترعت " اكييد سلطان مسوي له مشكله "
ام محمد تضرب على قلبها: وهـ ليه يابومحمد وش فيه سلطان ؟
محمد: يمه مافيه شي " ويناظر ابوه "
سهر : شلون مافيه شي وهو طالع من هنا يركض
محمد: لاحول انتي ورا ماتسكتين ؟
ام محمد: سلطان مسوي شي يابو محمد عشان تشيل عليه ؟
ابو محمد سكت ووقف : خلوني لحالي
" صاروا يناظرون في بعض "
ابو محمد: كلامي واضح خلوني فحالي ..!!
محمد : ابشر طال عمرك
" اشر لهم محمد بعيونه بأنهم يقومون مع ان ام محمد اصرت انها تقعد الا محمد اقنعها تقوم .. سهر كانت مثل الاطرش بالزفه مو فاهمه شي من اللي قاعد يصير .. طلعوا عنه وقعدوا بالصاله الفوقانيه "
محمد : يمه يعني ماتشوفين حالته ماتسمح وقاعده تنازعين قدامه
ام محمد : محمد قول لي سلطان وش فيه .؟؟
" محمد صار يقلب وجهه يمين ويسار يبي يلقى مفر من امه ماعرف كيف "
محمد " وينك ياسلطان وهقتني .. سويت فعلتك وهجيت ."
محمد: مافيه شي يمه الله يهديك اقعدي واذكري الله
ام محمد : محمد انا ماني بزر عندكم عشان تخبون علي قول لي وش صاير؟؟ سلطان به شي ؟
محمد تنهد : مافي الا الخير بس انتي هدي اعصابك
" سهركانت ساكته صار قلبها يدق "
محمد : اعوذ بالله من الشيطان الرجيم
ام محمد : محمد اخلص علي
محمد تنهد من قلب ولف عينه الجهة الثانيه : يمه سلطان تزوج
" ام محمد وسهر شهقوا بنفس الوقت "
سهر: نعــــــــــــــــم ..سلطــــــــان !!
ام محمد وقفت على حيلها : انت شقاعد تقول
محمد وقف لها ومسكها : يمه هدي مايسوى عليك هو تزوج وخلص
ام محمد صابتها هستيريا : شلووون وكيف ومتى ؟؟ وليه ماقااال لي ليــــــــه ؟؟
سهر حطت يدها على فمها " لالا مستحيل سلطان اخوي يسويها " وطلع الكلام من مخها : مستحيييييييييييييل
" طلع صوتها من اعماقها وقامت تبكي وراحت غرفتها "
" ام محمد اختلطت المشاعر عندها وقتها حست شبه جنون صابها صارت تبكي... حضنها محمد وقعد يهدي منها .. تحس انهم قاعدين ينصبون عليها لان مستحيل سلطان يسويها .. كانت تتشمت على اللي يسوونها من ورا اهلهم .. والحين ربي بلاها باللي يسويها فيها .. نجوى وصلت يوم سمعت هذي الاخبار وهي جايه بالطريق حست ريقها نشف .. راحت لعمتها تهديها "
محمد لنجوى : تعالي نجوى باريها
ام محمد : وينه اسود الوجه وينه؟
نجوى: عمتي هدي
محمد : طلع وبيرجع
ام محمد : قوله لايرجع واني غضبانه عليه ليوم الدين .. ياحسافة تربيتي فيك ياسلطان .. تحرمني اني افرح فيك مثل مافرحت بأخوانك .. لييه .. وش سوينا لك عشان تسوي فينا كذا ... يافشللتك ياوضحى بين النااااس وش بيقولون عني ماعرفت اربي ...
" ام محمد قعدت تبكي وتقول كلام زاد الطين بله على محمد ونجوى .. نجوى مو عارفه شلون تتصرف مع الموق وخصوصا انها قاعده تحس بشويه تعب من الحمل .. بعد ماهدت امه شوي قامت وراحت لغرفتها وسكرت الباب عليها.. ومحمد طلع "
" بعد ما محمد طلع صار البيت سكــــــون بعد الضجه اللي هلت عليــه ,,, ماكان فيه غير نجوى بالصاله قاعده وتدعي ربها يسهل عليهم .. وتفكر شلون صار كل هذا ومحد حس بسلطان .. ولا احد كان متوقع منه هذا التصرف .. كل واحد كان بغرفته سهر بغرفتها وام محمد بغرفتها ومحمد طلع ... كانت طول الوقت تقرا وتنفخ عشان تهدا شياطين البيت .. وطلعت فوق وقعدت بالصاله الوسطيه عشان تشوف اذا حد محتاجها ولالا .. وعمها وش اصر عليه داخل غرفته .. على الاقل تغطي مكان محمد بغيابه... ماكانت عارفه شلون تتصرف بالموقف غير انها تنتظر اي شي يطمنها "
.
.
.
" في بيت بو ياسر "
" في هذا الوقت عبير وياسر وام ياسر قاعدين بالصاله ينتظرون صلاة المغرب تطلع وبعد ماخلصت الصلاه الحت عبير انهم يتصلون الحين .. راحت ام ياسر تبي تتصل على ام محمد وعبير وياسر كانوا قاعدين جنبها يبون يسمعون الحوار .. ياسر وقتها كان قلبه يطق طبول .. حس كأنه بزر في هذي اللحظه ماكان عارف انه ممكن يتحمس زياده عن اللزوم في هذا الموضوع "
ام ياسر: مايردون
عبير : استني شوي يمكن فوق وبتنزل او يمكن تصلي
ياسر ابتسم
ام ياسر : طيب طيب
نجوى : الووو
ام ياسر ابتسمت : هلا والله هلا نجوى شخبارك يمه؟
نجوى بصوت واطي : هلا هلا عمتي انا الحمدالله طمنيني عنك؟
ام ياسر: الحمدالله ماعلي زوود كيف محمد ولولي
نجوى : بخير ياخاله
ام ياسر: نجوى شفي صوتــك ؟
" عبير وياسر ناظروا في بعض "
نجوى اخترعت : هاه مافيني شي ابد سلامتك بس شوي تعب مع الحمل
ام ياسر انتبهت لهم وطمنتهم : ايي يايمه الله يعينك وتولدين ونفرح فيك
نجوى بأبتسامه تعب : الله يسمع منك
ام ياسر: اجل خالتك ام محمد فيـه ؟
نجوى تلعثمت : اي خالتي بغرفتها راحت تريح شوي
ام ياسر: اييي .. طيب ماقدر اكلمها الحين ...
نجوى : عفوا خالتي بس بغيتي اقولها شي
ام ياسر ابتسمت : بغيتها بموضوع خاص يابنتي
نجوى : اهاا فهمت بس والله مدري شقولك ياخاله....
" نجوى نجوى وين محمد "
ام ياسر اخترعت من الصوت ونجوى سدت السماعه بيدها
نجوى : سهر حبيبتي هدي محمد طلع وشوي بيرجع
" سهر طلعت فوق من جديد"
ام ياسر حسها قلبها فيه شي : نجوى يمه وش صاير عندكم وليش سهر تبكي ؟
نجوى اخترعت : لالا ماتبكي بس
ام ياسر قطعتها : تغبين علي وانا سامعتها بذوني
"نجوى توهقت تقول ولالا لكن عرفت انهم راح يعرفون الحين ولا بعدين.. وياسر وعبير ناظروا في بعض يعني اكيد في شي صاير لهم "
نجوى : ياخاله ... الوضع شوي متوتر في البيت بس يهدا انا برجع اتصل فيك
ام ياسر: ماني مقفله الا واعرف وش صاير فيكم .. انا كنت حاسه من صوتك
نجوى تنهدت : ياخاله " وسكتت مو عارفه شلون تقول لها وتفتك منها اخذت نفس وقالت " البيت متوتر " وبخوف " لان سلطان متزوج
ام ياسر شهقت : وشوووووو
نجوى بسرعه : اللي سمعتيه ياخاله وانا الحين لازم اقفل الله لايهينك
" نجوى سكرت وام ياسر علقت السماعه بيدها مذهوله "
ياسر اشر لعبير
عبير: يمه وش صاير ؟؟؟
"ام ياسر ماردت "
عبير: يمه وش صااااااير فيهم شي بيت عمي
ام ياسر لفت عليها وقالت : سلطان تزوج
" عبير وياسر شهقوا "
ياسر : سلطـــــــان
عبير كانت حاطه يدها على فمها
ام ياسر : لاحول ولاقوة الا بالله مدري شخبارها وضحى الحين ولا بومحمد
ياسر : معقوله سلطان يسوي كذا
عبير: ماصدق ماصدق
ام ياسر: هذا اخر الدلع والدلال
ياسر: يمه وش هالكلام
ام ياسر : اللي صار صار
ياسر: طيب عمي شخباره
ام ياسر: مدري اتصل على محمد يا ياسر الوضع بالمره مايطمن
ياسر يفكر : ودي اتصل بس هم مابعد يقولون لحد وين اروح اتصل عليه
ام ياسر : تطمن على عمك
عبير: انا بدق على سهر
ام ياسر : سهر حالتها لله قاعده تصارخ وتبكي انا والله كان قلبي ناغزني من سمعت صوتها
" الكل سكت والكل سرح بتفكيره "
عبير" معقوله ولد عمي يسوي كذا .. ومن اخذ .. وشلووون خطى هذي الخطوه .. ياربي الله يستر "
" حست عبير ان في مصيبه كبير بتحل فوق راسهم "
ياسر " افا ياسلطان .. ماهقيتها منك انت بالذات .. وش ذنبه عمي تسوي فيه كذا وهو كل همه يجمع شمل العايله وانت راحت وعصيته .. الله يعينك على مابلاك ياسلطان "
" ياسر كان عارف ان عمه اكثر انسان متشدد على نظام العايله وتقاليدها .. فشلون ولده الحين يجي ويعصيه وينزل راسه قدام عمانه واهله "
ام ياسر " هذا مايجي الا ورا السفر والدلع والدلال .. انا اشهد انك ربيتي محمد ومنصور ياوضحى ونسيتي سلطان .. دلعتيه وهذي اخرته .. ايييه الله يعينك بس "
ام ياسر فجأه : ياسر
ياسر : سمي يمه ؟
ام ياسر : اخوانك لازم يرجعون
ياسر : نعـــــم
ام ياسر: اي يا ياسر مابي واحد فيهم بكرا يغلط غلط سلطان ويخزيني
ياسر: يمه لالا وش هالكلام اصابعك ماهي سوا ... واذا عن وليد وبدر لاتشيلين همهم.. انا واثق فيهم مستحيل يسوون كذا
ام ياسر: اجل مين يصدق بعيال سلمان
ياسر: يمه انتي ارتاحي الحين ولاتاخذك الشياطين وتجيبك
ام ياسر: يا ياسر قلقلي عليهم كل يوم يزيد
ياسر: يمه عيالك رجال ولاتخافين انا موصي عليهم.. انتي بس هدي اعصابك
ام ياسر سكتت وشوي : وين اهدا وانا مدري وش صاير عندهم ...
ياسر: ماعليش يمه بنعرف بعدين
ام ياسر: ياولدي يا ياسر خل موضوع البنت بعد ماتهدا الاوضاع
ياسر : اي اكييد يمه
" ام ياسر بدا قلبها ياكلها ... وصارت تحاتي "
" عبير لساتها تبي تستوعب الصدمه بس ماهي قادره "
" وياسر يفكر شلون راح يحل عمه هالمشكله وبنفس الوقت مو عارف ليش حظه كذا مع البنت "
.
.
.
" في سياره محمد "
" محمد طلع ولا يدري ليش هو طلع .. بس كان مفكر يلحق سلطان وكان عارف انه ماراح يلحق عليه .. بس كان محتاج انه يطلع ويجدد الاكسجين في جسمه لان يحس ان اكسجين البيت خلص .. ماهو قادر يتنفس .. كان يحس قلبه متحسر على اللي سواه اخوه ... قعد يفكر ليش سواها وشلون قدر يسوي هذا الشي ومن دون علمهم ... كان حاسس بشعور الفشيله من اهله بكرا اذا عرفوا .. كان يحاتي الكلام اللي بيطلع على ابوه واللي ابوه ماراح يتحمله واحتمال يسوي اي شي بسلطان .. ماكان وده يسمع اي شخص يتشمت على اهله واللي سواه فيهم سلطان ... عارف كلام عمامه عن ابوه .. هذا الشي حرق قلب محمد "
محمد : وين راح اموت واعرف وين راح؟
" قام واتصل عليه ... سلطان اول ماشاف الرقم خاف ان شي صار في البيت ورد بسرعه ومحمد حس هذا الشي بصوته "
محمد : خايف .. ماشاء الله توني ادري انك تخاف من شي
" سلطان تنهد اول ماسمع صوت محمد "
سلطان : محمد واللي يرحم والديك حدي مالي خلق
محمد: وينك فيه؟
سلطان : طلعت ؟
محمد: احسدك على برود اعصابك
سلطان بعصبيه: تبيني اقعد في البيت ليش مانت سمعت ابوي وهو يطردني
محمد بأستهزاء : هذا انت بس سمعته يقولك وخر عن وجهي وماصدقت خبر شلون لو يقول اطلع برا بيتي
" سلطان حس ان محمد يبي يحسسه بتأنيب الضمير زياده عن اللزوم وانه مو عارف شلون يعبر عن غضبه وقرر سلطان يهدا "
سلطان ياخذ نفس : محمد وش تبغى مني بالضبط
محمد : ابيك تروح تاخذ بخاطر امي ... تشوف وش صار عليها .. تطمن ياخي هي بخير فيها شي مافيها .. طلعت وخليت كل شي ورا ظهرك ولاكأن شي صار
سلطان عض على شفايفه : امي درت ؟
محمد : وش رايك كل هذي الزوبعه وماراح تدري
سلطان بخوف : وش سوت ؟
محمد: ماسوت شي انبسطت لان هذا اخر تربيتها
سلطان بعصبيه : محمد وبعدين معك ؟
"محمد ارتاح يوم شاف ان ضغط سلطان ارتفع على الاقل لسا يحس"
محمد سكت
سلطان : محمد بتقول ولا شلون ؟
محمد : والله لو تبي تعرف روح البيت وشوفها
سلطان سكت
محمد : يلا سلام
سلطان : محمد لحظه ؟
محمد : نعم..!!
سلطان : سهر وش سوت يوم درت ؟
محمد بحسره : من قلت لهم الخبر امي قعدت تصيح وسهر مادري شصار عليها راحت غرفتها وقفلت الباب عليها
" سلطان عوره قلبه "
سلطان : محمد روح البيت شوفهم اذا يبون شي او اذا شي صار عليهم ؟
محمد : انا ان قعدت في البيت ساعه وحده يمكن انجلط ... عن اذنك
" وسكر "
سلطان " ياعمري عليك ياسهر سامحيني والله مافكرت فيك .. ياحياتي يا امي بكيتك.. شسويت ياسلطان شسوووويت "
.
.
.
" في بيت بو نايف "
" كان البيت هادي بسمه نزلت تحت المرسم ونايف قعد طول الوقت ساكت وكان متحرقص يبي يعرف وش قاعد يصير في البيت الثاني .. فواز ما اعطاه الا الخبر ويحس يبي يعرف وش قاعد يصير هناك ..وامه قاعده وتفكر في فواز ونجود .. "
نايف " الله يعينك يافواز بتشيل هم مين ولا مين الحين صديقك متورك وزوجتك مورطتك .. الله يعينك على مابلاك "
نايف : مسكين فواز وجه اسود
ام نايف: من فعايله
نايف استغرب: يمه
ام نايف: لو معه حق ليش مااجا اليوم الا كل يوم يلاقي له عذر .. وبنتي هناك قلبها منكسر
نايف" بلاك ماتدرين " : يمه قلت لك صديقه بيج من المطار اليوم ومافي حد يستقبله
ام نايف: من اهم زوجته ولا صديقه .. صديقه ياكثر التكاسي
نايف : بس يايمه نجود صار لها اكثر من اسبوعين هنا بتفرق على يوم واحد
ام نايف : وش يفيد الكلام لو احكي من اليوم لبكرا خلني ساكته احسن ... انا الي ابي اعرفه شلون نجود ساكته للحين ومو راضيه تتكلم الا انها ماسكه عليه شي قوي
نايف: يمه حرام تظلمينهم .. وبصراحه انتي ادرى في بنتك
ام نايف: ادري انها عصبيه واذا عصبت ماتتنحاكى بس مو العصبيه اللي تخليهم مفترقين اسبوعين ولا واحد فيهم متحرك
نايف عوره قلبه من كثر مايحكي مع امه : يمه انتي ادرى بالظروف ماكان يبي يزعجها وهي عليها اختبارات
ام نايف : خلاص خلاص ماعاد ينفع
نايف تنهد : طيب انتي ريحي اعصابك وين بسمه
ام نايف: تحت
" نايف جا بيقوم "
ام نايف: كالعاده بتروح وبتخلوني بروحي وانا اللي ماصدق تجي عطلة الاسبوع وحد يفضى اقعد معه .
نايف قام وراح لامه وحضنها : يمه فديتك انتي شفييك صايره زعوله " ويبوسها على راسها" انتي بس هونيها ..وش رايك نقوم نطلع
ام نايف: مالي نفس حتى على الطلعه
نايف: بس نتقهوى ونرجع
ام نايف: يالعيار ابوك فوق ولساته ماتعشى
نايف يغمز: طيب قومي واقعدي معه استغلي عطلة الاسبوع على قولتك
ام نايف ضحكت وقرصته : قوم ذله عند اختك
نايف ضحك وقام يبيها من الله " انا لغير بسمه ما ارتاح .. ياحلو السوالف معها "
" نزل نايف لبسمه وشافها ترسم وهي منسدحه على الارض .. استغرب اول مره يشوفها ترسم وهي منسدحه بالعاده ياواقفه ياقاعده على كرسي بس ماقد شافها ترسم على الارض "
نايف : بسووم
بسمه اخترعت ولفت عليه وقعدت على حيلها : يمه
نايف: ياي خرعتك
بسمه ابتسمت : شعندك جاي
نايف: قعدت فوق تضيق الخلق بيتنا صاير كئييب
بسمه : لابس انت خبرك كلها كم يوم وكل شي يرجع مثل ماكان
نايف: مو متعود لقعد الويك اند في البيت
بسمه تبتسم : عشان تعرف شعورنا وحنا منلطعين في البيت
نايف: والله محد ماسكم السواق وعندكم ولا بعد تبين اوديكم واجيبكم
بسمه : بس انت خبرك مانرح مع السواق الا السوق وهالخرابيط
نايف: شوفي شوفي لاتحاولين تقنعيني
بسمه تضحك: نجود لسا بغرفتها
نايف جا وقعد جنبها : اي والله ماعرف شلون ما ملت منها مع ان مو بعادتها تقعد بالغرفه هالكثر بدون ماتطلع
بسمه رفعت حاجب : كل شي صار غصب عنها
نايف: الله يصلح مابينهم
بسمه: اميين
نايف يناظر الرسمه : وانتي بي قاعده وتشخبطين الوضع متوتر داخل وانتي تشخبطين
بسمه بنظره : ماكنت تشوفها اول شخابيط
نايف لم رجوله لعنده : والله احيانا تحس انك طفشان من كل شي ولا لك خلق شي وكل شي حلو بعينك وقتها يصير قمه السخافه
بسمه رفعت حاجب : الحين الرسم صار قمة السخافه
نايف ابتسم وقرص خشمها : امزح معك مو قصدي الرسم بس الاشياء الثانيه
بسمه : من جد حتى انا احيانا ماطيق ارسم بالمره واستخسف نفسي بس احيانا احس من جد محتاجه ارسم وكأنه ادمان عندي
نايف: طيب سؤال وش تحسين وانتي ترسمين
بسمه ابتسمت ورفعت حاجب : افهم انك تسوي معي مقابله صحفيه
نايف ضحك : من زينك
بسمه ضحكت : لا شوف مو كل واحد يقدر يعبر عن مشاعره بالكلام لو جاب حروف الدنيا .. انا تقدر تقول اعبر عن مشاعري بالرسم
نايف يصفر : اووه ماشاء الله بس المفروض كل لوحه تكتبين هذي يعني انا زعلانه هذي انا فرحانه عشان لاتنسين
بسمه ضحكت : مالك شغل هذا الكلام ماتفهمه اشكالك
نايف يضحك : طااايب اشكالي اجل
بسمه ضحكت : امززح شفيك
" نايف ابتسم وبعدها سكت "
بسمه تناظره وميلت رقبتها : شفيك
نايف كان سرحان وجا بيقوم : لابس اكتشتف ان صدق هذا الكلام ماتفهمه اشكالي
بسمه ضحكت
نايف وقف وبنظره : ولاهو من برستيجي اصلا
بسمه ضحكت : طايب طايب
نايف ابتسم : يلا بخليك انا
بسمه : لا اقعد نسولف
نايف: خلصي رسمتك اقصد كلامك بعدين تعالي لي فوق انا بالحوش
بسمه : اوكيه
" طلع نايف برا الحوش وقعد ينشي فيه ويفكر "
" فجأه تغيرت موجه نايف من مشاكل اهله الا مشاكله العاطفيه .. قعد يفكر لو انه سوا مثل ماسوا سلطان واخذ اللي يبيها من دون شور
|