" في بيت بو فواز "
منار : واااااااااااه واخيرا وصلتوا
لميس ضحكت وهي تضمها : واي واي اسكتي كنت بموووت يوم قالوا مافي لك روحه
"منار ضحكت وضربتها على ظهرها وبعدها راحت وسلمت على ميساء وبعدين راحوا وجلسوا في الصاله "
منار: تدرين كنت بموت من الطفش محد عندي لو ماجيتي كان ذبحتك
لميس تضحك : اسكتي انا اكثر الرياض تجيب المرض مالك خلق حتى تطلعين
منار: من جد بس سخافه ليه ماجا خالي وخالتي
لميس : بابا عنده شغل وامي بتقعد مع اخواني
منار شهقت : اووه اخوك برا ولا
لميس: لا اتصل على فواز والظاهر بيروح معه
منار ابتسمت : اووكي
" وبعد شوي ضيفتهم وقعدوا يسولفون على رواق وميساء طول الوقت ساكته "
منار : ميوس شعندك ساكته؟
ميساء ابتسمت بهدوء : لا ابد مافيني شي
لميس: تستحي بالموت شحبتها وجبتها
منار فتحت عينها وعضت على شفايفها : صدق وش دعوى ماعندنا عيال خذي راحتــك
ميساء بسرعه : لالا ماعليك منها
منار ضحكت: عاد جنو اول ماعرفت انكم بتجون قالت اول مايوصلون دقي علي عشان اجيكم
لميس ضحكت : ياحليلها كلميها تجي
منار: شوي وبتصل عليها .. " ولفت على ميساء " ماعندك رقمها؟
ميساء: الا عندي رقمها بس كل مادق عليها ماترد
منار تضحك : اي ماترد على ارقام غريبه... كان ارسلتيلها مسج
ميساء ابتسمت : مادري نسيت ولا خطرت في بالي بدق عليها الحين واذا ماردت برسل لها
لميس : وخواتها بعد
ميساء خزتها : استحي
لميس ضحكت : منار خذي كلميهم هذي غبيه تستحي
منار تضحك : اوكي عطيني موبايلك مافيني اطلع اجيب موبايلي
.
.
.
" في بيت بو فيصل "
" كانوا وقتها قاعدين بالصاله يتقهوون "
وصايف: ليش ماتردين؟
جنى : اوووه هذا رقم صار له فتره يدق علي
اديم : كان رديتي يمكن حد يبيك
مشاري عقد حواجبه : لا لاترد على ارقام غريبه اذا حد يبيها ضروري بيرسل لها مسج
اديم : طيب عطي مشاري يرد
وصايف: اي صدق
جنى قامت واعطته مشاري
مشاري رد بدون مايشوف الرقم : الوووو
الخط الثاني على طول قفل
0
مشاري رفع حاجبه : قفل بوجهي انا اوريه .. عطيني الرقم وانا اتصرف ولاتردين عليه سامعه
جنى : طيب ماقلت شي انا عشان تقعد تصارخ
وصايف بسرعه: مشاري مشاري دق عليه من جوالك
اديم: اي صح يمكن يرد
مشاري هز راسه
" مشاري اخذ الرقم وقبل لايضغط الزر طلع برا واتصل على الرقم وشوي يطلع له ان الاسم مسجل عنده واول ماقرا الاسم ارتجف وسكر الخط بسرعه "
" مشاري سند راسه على الجدار اللي جنب الدرج حق بيتهم وقعد يتنفس بسرعه ولف وجهه على الباب خاف احد كان يراقبه "
مشاري وهو يرجف : معقوله معقوله هذي ميساء اللي انا اعرفها نفسها اللي تعرفها جنى ..لالا اكيد يتهيأ لي
" ورفع جواله من جديد وتأكد من الاسم "
" مشاري نزل من درجات بيتهم وراح وركب سيارته بعيد عن انظار الناس يبي يصدق اللي صار معه "
" على طول رفع جواله من جديد وقعد يتأمل فيه وبعدها نزل راسه على الدركسون "
مشاري : معقوله هي قريبه مني وانا مو حاس فيها .. اي طيب ليش ماترد علي اكيد رقمي مسيف عندها معقوله تكون مسحته.. يمكن انها ندمت يوم انها تعرفت علي اكيد ندمت بس هي ليش مو راضيه تصدق اني بجد ابيها ااااااااااخ بس
" مشاري حس انه مايقدر يصبر لازم يشوفها يعني لازم يشوفها ..صحيح كان مشتاق انه يشوفها او حتى يكلمها ولكن الحين زاد شوقه وماهو قادر يصبر حتى ... حس انه قاعد يحلم لدرجه انك شك انه غلط بنقل الرقم على جهازه.... نزل من السياره ويحس انه رجع يتوه .. الحين صارت قريبه منه ومستحيل يخليها تفلت هالمره.. خطرت في باله فكره على الطاير وركض نزل "
" اول مادخل "
جنى : رد عليك
مشاري تنهد : لا
" شوي ودق جوال جنى رقع قلب مشاري "
جنى ابتسمت : هذي منور
جنى : الووو .. هلا فيك .. الحمدالله انتي شخبارك .. ياعسى دوم ... هههههههه هذاك جوال ميساء .. وانا شدراني خفت .. هي الغبيه ليش ما ارسلت لي مسج ... هههههههه طيب وينهم وصلوا .. الحمدالله على سلامتهم ... اي اي اكيد بجي افا عليك ... هممم وقفي اسألهم
جنى تكلم خواتها : بتروحون لمنار
اديم : فشله اهلها توهم اليوم وصلوا خليها بكرا
جنى رجعت تكلم منار : سمعتيها ماهي راضيه .. هههههه طيب
جنى : سمعتيها ماهي راضيه .. ههههه طيب
جنى رجعت تكلمهم : تقول لو ماتجون بتزعل عليكم وعن السخافه ولاتصيرون سخيفات ومالكم داعي
وصايف فتحت عينها وجنى تضحك
جنى لمنار: ههههه كييفي ذولا يالله يجي معهم كذا
اديم تضحك : تنصب النصابه
جنى: اي خلاص بنجي تجهزوا لنا خخخخ.. ههههه يلاباي
جنى : خلاص خلاص مشاري هذي ميساء بنت خالهم اكيد اخترعت يوم رديت عليها مسكينه
مشاري هز راسه : اجل بتطلعون؟
وصايف: لا وش فيك انتي غثه تو اهلها واصلين اليوم
جنى : عادي الناس اجازه مو مدارس بعد
ام فيصل: روحوا غيروا جو
اديم لوصايف : وش قلتي
وصايف: مدري عنكم
جنى بحماس : خل نروح نغير جو
وصايف: مدري ودي اطلع ..!!
جنى : بنطلع نتجمع هناك وبعدين نقرر وين بنطلع وبنطلع
اديم : خلاص خلاص بنروح
" وبعد ماوافقوا انهم يروحون... طول الجلسه ومشاري يستمع لهم .. ويشوفهم على ايش يخططون وبعد ماعرف الزبده طلع فوق غرفته وراح يلبس على اساس انه بيطلع ... اتصل على صديقه مشعل وتواعد معه "
.
.
.
" الساعه 5:00 العصر "
" في بيت بو نايف "
" بعد ماخلض نايف حواره مع فواز طلع هو وبسمه ... راحوا لنجود وصار لهم ساعه يكلمونها ويقنعونها وهي تعطيهم الاذن الصمخه "
نجود : نايف انسى انا اصلا ملييييييييت
نايف ياخذ انفاسه : نجود لو سمحتي افهمي .. فكري بعقلك لو مره .. نجود لاتصغرين عقلك وتخلين غرورك يغلب عليك .. نجود انتي تحبين زوجك وهو يحبك لاتكابرين .. روحي طالعي وجهك وشوفيه من فراقه وش سوى فيك
نجود بسرعه : لا اصلا كل اللي فيني من هم عشته معه ومشاكل ماتخلص
نايف: لو صحيح كلامك كان شفناه من قبل نجود انتي كل شي يبين بوجهك لاتحاولين تخبين وانا اعرفك ان مستحيل تسكتين على شي اذا كان صحيح هو زاعجك ولا متمشكل معك .. شلون تفكرين بقرار مثل كذا وانتم توكم سنه ماكملتوا حتى توكم ماتعرفتوا على بعض زين .. لازم بتاخذون وقت على ماتتفاهمون .. والله لو فواز مو شاريك ماكان جيت وكلمتك
نود نزلت راسها: غيرت رايك يانايف امس تقول انك ماراح تغصبني واليوم جاي تلح علي ارجع
بسه هنا تكلمت : لو مو خايفين عليك يانجود ماكنا غصبناك .. صحيح هذي الاشياء مو بالغصب بس انتي لازم تفهمين اللي تسوينه غلط في غلط
نجود : اصلا لو امي ولا ابوي يعرفون باللي صاير ماكان سكتوا له .. وانتم جاين تغصبوني ارجع له .. ماني راجعه انســــــــــوا
" نايف تنهد ولف على بسمه وبسمه بنظراتها قالت له لاتستسلم "
نايف يتنهد : طيب شوفي حنا بنعطيك وقت تفكرين فيه وتراجعين نفسك .. بس فواز بيجي اليوم وبيتفاهم مع ابوي .. وبنخليه يختلق له عذر غير اللي صار
نجود شهقت : نعم نعم نعم ... تخطون عليــه
بسمه : حنا مانغطي عليه بس حنا ماودنا بالمشاكل ودنا الامور تنحل بسهوله
نجود قامت وهي تتأفف : انا اللي عندي قلته لكم اذا جا اليوم بنزل وبقول حق ابوي كل شي
نايف طلع من طوره ساعه يكلمها ويترجاها وهي ماهي راضيه تستجيب لكلامهم ولا رجاهم
نايف بصوت اعلى شوي : اوووووه نجود ماصارت حاله.. ما الومه الرجال يوم طلع عن طوره .. ماقد شفت وحده عنيده مثلك ولاتفهم
نجود ناظرت فيه وبعدين عصبت : خلاص اطلعوا مابي اشوف حد .. كلكم تبون تفتكون مني مع انكم تدرون هو وش سوا فيني .. قاعد تخبي عليه لانه ولد عمك .. ماهمك اختك اهم شي علاقتك معه " وانسدحت داخل الفراش وخبت نفسها " خلاص اطلعوا اطلعوا مابي اشوف ولا احد
" نايف تحسف انه قال ناظر ببسمه بيسأس وبسمه ماكان بيدها حيله "
" نايف راح لعندها وشال اللحاف عنها "
نايف: خلاص حبيبي انا اسف مالك الا يرضيك
" نجود غطت وجهها بيدينها "
" شوي وطلع نايف ومعه بسمه "
بسمه تتنهد : والحل
نايف: باينتها مصره
بسمه تتأفف : الله يهديها بس .. صار لنا ساعه نكلمها ومافي وقت وفواز الحين راح يجي وهي لساتها معنده ..
نايف: شسوي الحين
بسمه تنهدت : شتسوي كلم فواز وقوله .. مسكين فواز الله يعينه من اللي بيجيه من امي وابوي
" وراحت عنه "
" نايف بعد ماسمع كلام اخته شكله هون ماراح يطلع بيقعد اليوم في البيت بيشوف وش المصيبه اللي بتنزل عليهم اليوم .. حس ان اليوم ماراح يعدي على خير "
.
.
.
" في باريس "
" غزل ومنصور كل واحد فيهم قاعد يعيض يومه وينتظره يعدي على خير .. ولاهم دارين عن اللي قاعد يصير هناك .. منصور في البدايه توقع ان كل العقد اللي ممكن تواجهم انحلت .. لكن اللي قاعد يصير معه عكس اللي شافه في البدايه .. رجع منصور لاحباطه من جديد وشاف ان سفرتهم تطول احسن من انهم يتهاوشون قدام اهلهم .. او بلاحرى منصور مايبغى غزل تكون جنب اهلها.. عشان لاتكبر راسها وكل يوم شايله عبايتها وعلى بيت اهلها .. هنا يمكن يقدر يصلحون الوضع بينهم وبدون مساعده اهلهم .. منصور كان شايف الموضوع قبل لاياخذها لعب عيال وممكن ينتهي .. ولكن بعد ماتزوج حس حتى نوعيه المشاكل اللي كانت بينهم قبل الزواج تغيرت ... الحين غير ولها طعم غير حتى .. "
" اما غزل .. كانت تشوف الوضع يكون بينهم كذا احسن ..لان هي كانت تكرهه ودايم تقول انه اخر انسان تقكر تاخذه .. طول الوقت تندم على اللحظه اللي عرف منصور يغلبها فيها .. وتحترق من ادخلها .. هي تحس الحين هي ماتكرهه بس اذا تذكرت الاحداث اللي صارت بينهم تحس انها لازم تكرهه .. تفكير غزل بدائي في هذا الوقت .. وكل اللي يهمها ترضي غرورها وبس .. مع ان كان عندها احساس وقوي ان كل شي بيتغير بس اهم شي عندها انه مو الحين وانها ماتستلم مو الحين .. وبنفس الوقت تحس انها طفشانه ومتملله من الوضع مع ان هذا اللي تبيه .."
" كانوا قاعدين بالصاله ومنصور كل شوي يرفع عينه لها يبيها تسوي شي عشان يكلمها ولا تقول شي بس الظاهر مافي فايده الاخت مندمجه بالتلفزيون مع انه مافي شي يستدعي للتحميس "
منصور بجديه : احم غزل ممكن كاس شاي
" غزل اول شي رفعت عينها له تبي تشوف نوع تعبيره بس شافته جدي وقامت وهي ساكته.. راحت غزل وسوت له كاسة شاي و كان فيه اكواب كبيره .. احتارت كم ليبتون تحط وفي الاخير قالت بتحط ثنين عشان يدنق راسه *_^ وبعد ماخلصت راحت وحطته جنبه "
منصور ابتسم : شكرا
" غزل ماردت وقعدت مكانها .. ومنصور كان ينتظر الشاي على مايدفى شوي كان يطالع فيها وهي حست بنظراته وتوترت .. وقامت تناظر فوق تحت ماهي قادره تتحكم بتصرفاتها .. شوي ومد منصور يده على الكوب ورشف منه وعلى طول رفضه "
غزل لفت عليه وفتحت عينها : وش فيه
منصور حس انه قرف ورجع الكوب بالقوه وشاف فيه ثنين ليبتون واخذ كلينكس ونظف نفسه
غزل فكرت انه يبي شي عشان يتمصخر عليها فيه
منصور بعصبيه : قومي جيبي مويه
غزل عصبت من طريقته : نعم ..!!
منصور وقف : استغفر الله العظيم بنت بهالطول ماعلموها اهلها شلون تسوي كوب شاي حاطت لي ثنين ليبتون " وراح المطبخ يشرب له مويه "
غزل استغربت " وش فيه ذا فيها يعني اذا حطيت ثنين ليبتون "
" منصور طول ماهو بالمطبخ وهو يتحلطم يبي يستفزها "
" رجع منصور ورمى نفسه على الكنبه بقوه "
غزل : وانا شدراني قلت عشان يدنق مخك
منصور ضحك بداخله : محد قالك اني ابي ادنق قلت ابي اشرب شاي مثل الناس
غزل تدافع عن نفسها: مشكلتك والله انا احب الشاي كذا وانا ايش عرفني انك تحبه بليبتون واحد وكوب كبير
منصور بأستهزاء : لاتضحكين على نفسك ماقد حد سواها اذا انتي صادقه قومي اشربيه عني
غزل انتفضت " من جده هذا " : وويييع هذا اللي ناقص اشرب من بعدك
منصور استانس انها تفاعلت معه : اسم الله عليك من زين شفايفك اصلا تجيب المرض استغفر الله على ايش تخافن عليها ياحظي
غزل انقهرت ولمت شفايفها وبسرعه قالت : اصلا لو انها تجيب المرض كان........ "وشهقت وسكرت فمها "
منصور مات ضحك عليها ونقز على الكنبه وينقز عليها بس عشان يغيضها : كان ايش كان ايش
غزل ضحكت غصب عنها ورمت عليه المخده : بس بس لاتكلمني
منصور لساته يضحك ورمى نفسه بالقوه سوا نفسه ميت من الضحك : اااااه ياقلبي غزل تكفين عيديها والله عجبتني
غزل عضت على شفايفها : منصووور بس " رمت المخده جنبها وجت تبي تقوم تروح الغرفه من الحيا ماعرفت شتسوي "
" منصور قام لها ومسك يدها وسحبها لعنده "
غزل : وخر عني
منصور بأبتسامه واسعه حط وجهها بين يدينها وحس بحراره وجهها وعرف انها خجلانه : شفيك ياختي عادي انتي ماقلتي شي غلط
"غزل نزلت عينها وحست بحراره تبخ جسمها كله واكتفت انها تكتف يدها وتنزل راسها .. منصور استانس على شكلهم وهم واقفين كذا حس ماوده يخترب جوهم وبعدها نزل يده من على وجهها ومسك يدها واخذها واخذها وقعدوا على الكنبه وهي تحس من الفشله ماتدري وين تودي وجهها ومنصور حده متشقق من الوضعيه اللي هم فيها وحس ماودها تقوم عنه "
منصور ويدها لسا بيده : ياحلوك وانتي مستحيه وربي احلى من هالكشره اللي حاطتها بوجهك
" منصور هنا خرب على نفسه كل شي غزل بعدت يدها ووقفت ومنصور حس بتأنيب على الي قاله "
غزل : شقصدك يعني ماستحي
منصور رمى نفسى على ظهره بالقوه: اااااخ من قال
غزل : جــدي " وراحت بتدخل الغرفه "
منصور يبي يقهرها : انا اشهد انه صدق " ولفت عليه وطلع لسانه لها "
غزل لفت شعرها بالقوه وبدلع متعمد ودخلت الغرفه
منصور: اااااااخ " وغطى وجهه بيده " وشوي ضحك على اللي صار وعرف انه حظه كذا من عرف غزل "
.
.
.
" في بيت بو محمد "
" الساعه 5:30 "
" في هذا الوقت كانت ام محمد قاعده مع محمد ونجوى وسهر يسولفون شوي ودخل عليهم سلطان وكان وقتها مرتبك حده "
سلطان : يـاولد
" محمد التفت على نجوى ونجوى حطت حجابها على راسها "
محمد : تفضل
سلطان : السلام عليكم
الكل : وعليكم السلام
ام محمد : وينك ياولدي من بعد الغدا ماشفناك
سلطان ابتسم : اعذريني يمه كان عندي مشوار مهم
ام محمد : على خير طيب اجلس وش عندك واقف
سلطان برعشه في داخله : ابوي وينه
ام محمد : بغرفته
سهر : سلطان لاتنسى انك وعدتني بأنك تطلعني
سلطان ابتسم من ورا خاطره : ابشري ولايهمك.. انا استأذن بروح اشوف ابوي
ام محمد : وش عندك؟
سهر تضحك : ياشين اللقافه
محمد ابتسم : بس يابنت
سلطان وقلبه يرجف : لابس عندي موضوع ابي اكلمه فيه
ام محمد : على خير
" سلطان وهو رايح افترت عينه على المجلس بالكامل وشاف محمد .. اول ما بعد عنهم فكر في انه ليش مايقول في البدايه لمحمد وبعدين يقول لابوه .. على الاقل يساعده شوي وبعدها رجع سلطان "
سلطان : محمد
" محمد انتبه على ملامح اخوه وهو يتكلم مبين ان الموضوع حده جدي .. حس ان لون سلطان مخطوف وانه مو على بعضه "
محمد " الله يستر من ياسلطان وش مسوي بعد "
محمد : هلا
سلطان : ياليت تجي شوي
" ام محمد وسهر التفتوا على بعض الولد باينته ماهو بطبيعي "
محمد : ان شاء الله
"سلطان سسبق محمد على فوق ومحمد لحقه وعرف ان فيه شي صاير .. دخل سلطان ودخل محمد وراه وقعدوا على الاريكه اللي بغرفة سلطان "
محمد : تفضل سلطان قول وش عندك
" سلطان مارد ونزل راسه لاشعوري ارتعش قلب محمد اول مره سلطان ينزل راسه واكيد مانزل راسه الا وراه شي ماهو بهين "
محمد : والله كنت حاس وضعك اليوم مو طبيعي وفيها بعد نزله راس تكلم سلطان وش فيك ؟
سلطان : محمد لاتربكني عاد خلني اتكلم
محمد اخذ نفس: ان شاء الله
سلطان بعد لحظه : محمد انا انا
" محمد من سمع انا انا بصم ان سلطان مسوي له سالفه اول مره يكون سلطان بهذي الحاله ومتردد بهذي الطريقه ..وبعدها اخذ نفس عميق عشان يسمع الكلمه اللي وراها وغمض عينه "
سلطان : انا تزوجت
محمد شهق وزفر كل الشهيق اللي سحبه بثانيه ووقف على حيله : نعـــــــــــــــم ..." انعقدت حواجبه وعلى صوته " انت شقاعد تقول
سلطان : اللي سمعته
محمد كان يدور شي عشان يفض غضبه فيه بس مالقى : انت فاهم الكلام اللي تقوله فاهم
سلطان : فاهم خلاص خلصني واللي يرحم والديك لاتزيدها علي انت الثاني
محمد كتف يدينه ومسك اعصابه : وشو اخلصك وشو اخلصك " وسحب نفس بالقوه عشان يريح اعصابه اللي اتلفت خلاص ورفع يدينه ونزلهم مره ثانيه مو عارف وش يسوي .. عرف كل اللي بيسويه ماراح تبرد حرقته ولا راح تسوي شي "
سلطان : شوف لاتقعد تسوي افلام ترى حدي مو ناقص
محمد يأشر بيده: ياخي انت من وشو مخلوق بكل بساطه جايني انا تزوجت وتناجر بعد
سلطان : إن لله مو ناقصني الا انت
محمد: هذا بعد ما جاك شي وتقول لي انك مو ناقصني
سلطان تأفف : محمد ترى اعصابي حدها مو اوكي واخلاقي واصله معي
محمد : سلطان لاتنسى انك ملزوم تحترمني ... هئ وانت اصلا خليت فيها احترام .. بس وش اقول حسبنا الله ونعم الوكيل وهذا اللي بتقوله لابوي .. تبي تجيب اخرته على يدك .. بالله ماتقول لي من بنته هذي اللي قبلت تاخذك وانت رايح تخطبها لحالك
سلطان عصب : ميب سعوديه
" محمد فتح عينه وقعد يناظر اخوه بحمقيه يحس عادي يذبحه بس مسك اعصابه "
محمد : اجل .... بريطانيه
سلطان بعد لحظه : لا كويتيه
محمد : اهاا عشان كذا انت رايح الكويت على اساس انك بتشوف ربعك
سلطان: ايه
محمد سكر عينه ويكتم غضبه لانه عارف ردة فعله مالها اهميه بقد ما امه وابوه اهم : سلطان تدري ان ابوي بينهي عليك
سلطان على صوته : اووه ادري انا جايبك عشان تكون معي وانا اقوله اخاف يجيه شي
محمد بنظره قويه لاخوه ومع كذا كانت تلمع : ماشوفك طلبت مني اكون معك يوم جيت تاخذها ... تدري امي في اليوم كيف كانت تحسب الف حساب لزواجك وكل يوم تنقي لك وحده .. صغيرها واخر واحد بتفرح فينا وانت ولاهمك رحت وتزوجت وانبسطت .. ولاهو هامك لا ام ولا ابو ياحسافتي عليك ياخوي .. ياحسافتي عليك
سلطان يدافع عن نفسه : محمد لاتلومني سافرت وشفتها وحبيتها ... وو ماحبيت يكون بيني وبنيها شي بالحرام مالقيت الا اني اتزوجها ..
محمد باستهزاء : سافرت برا تغربت .. كلنا سافرنا وكلنا تغربنا وتحملنا البلا اللي هناك محد فينا سواها وتزوج بدون شور اهله ... ومتى تزوجتها
سلطان : من 3 شهور
محمد ضحك ضحكة استهزاء : ماشاء الله ماحسيت انك تبي تتزوجها الا قبل لاترجع بثلاث شهور توك حسيت انك ماتبي شي بينكم بالحرام ,, تضحك علي مين يا سلطان
سلطان يتأفف من اعماقه
محمد : اذا كنت مفكر اني بكون معك وانت تذبح ابوي ... اجل انسى ياسلطان انسى
سلطان: وش دعوى لاني اول واحد ولا اخر واحد
محمد: خلاص روح وقوله يبه انا تزوج وترى ماني اول واد ولا اخر واحد برد على قلبك انت بس
سلطان تنرفز : محمد ارجوك والله لو يصير شي لابوي بسببي بذبح نفسي
محمد: وش تنتظر من ابوي وانت تقوله هذا الكلام وبعدين حنا من متى اخذنا من برا العايله
سلطان : ابوي اول واحد اخذ من برا مافيها شي .. وبعدين الله واكبر على بنات العيله اللي فاضحني عليها
محمد : احترم نفسك على الاقل اشرف من البنت اللي انت ماخذها
سلطان : محمد لو سمحت عن الغلط على الاقل خل الاحترام موجود بينا
محمد بأستهزاء : وانت خليت فيها ذره احترام
سلطان : اوووهوو شكرا مابيك تسوي لي ولا شي خلاص انا بروح اقول لابوي واللي فيها فيها
" وطلـــــــع "
" محمد قعد على الكنبه ماهو عارف كيف يتصرف .. سلطان خطى خطوه خطيره .. حس بحرقه في داخله تاكله على اخوه .. كان عارف ان اللي سواه خطأ بس اللي يعرفه اكثر ردة فعل ابوه يمكن ابوه يذبحه قدامهم عادي .. محمد كان عارف بكلام الناس اللي راح يطلع على سلطان وعلى ابوه وتربيته وابوه مستحيل يرضى بهذا الشي وكان خايف بالحيل من ردة فعل ابوه وامه .."
.
.
" سلطــان"
" سلطان اول ماطلع من غرفته ترك الباب مفتوح.. كان سلطان حده متوتر اذا كانت هذي ردة فعل اخوه فكيف راح تكون ردة فعل ابوه والاهم امه .. توجه لغرفة ابوه ... وقف لحظه قدام الباب واستجمع قواه وتعوذ من الشيطان ودق الباب "
" وصله الرد بعد ثواني وكان الصوت واطي "
" دخل سلطان الغرفه ولاشاف احد فعرف انه اكيد بالمكتب .. مشى سلطان متوجه ناحية المكتب وقلبه يتراقص من الخوف .. اول ماقبل سلطان على ابوه ابتسم له وسلطان رد الابتسامه لكن ابتسامته كانت صفرا كانت ابتسامه خوف وقلق .. "
سلطان : السلام عليكم
ابو محمد نزل نظارته وسند ظهره على الكرسي : وعليكم السلام تفضل يبه
سلطان ابتسم : زاد فضلك " وجلس "
ابو محمد : هاه شخبار ولدي سلطان ؟
سلطان ابتسم : الحمدالله ماعليه
ابو محمد : الحمدالله
" سلطان سكت والابو سكت ولكنه كان يناظر ولده وكأن يقرا شي في باله "
ابو محمد عاقد حاجب : هاااه اكييد جيتك هذي وراها شي ؟
سلطان ابتسم ورفع راسه لابوه : اي والله
ابو محمد : امر.. تدلل.. قول واسمعك وانا ابوك
" سلطان خفق قلبه.. ابو محمد فكر ان سلطان راح يطلبه شي .. او يبغى شي ومتردد .. هذا الشي اللي تعوده بومحمد من ولده .. وهذا اكثر شي حارق قلب سلطان "
" سلطان توهق شلون يفاتح ابوه بالموضوع "
سلطان : يبه بقولك شي وياليتك تقدر موقفي
ابو محمد ابتسم : طيب تكلم وانا ابوك
سلطان بتردد : يبه فيهـا شي لو حبيــت
بو محمد ابتسم من كلام سلطان وبصوت فيه ضحكه : حشا بالله..." وبعد تفكير " بس وش تبي توصل له انت بالضبط
سلطان : حلو.. انت يبه من قبلي حبيت امي
بو محمد ضحك : سلطان قول وش تبي من الاخير بدون هذي المقدمات
سلطان ياخذ نفس : طيب خلني اتكلم
بو محمد ابتسم : تفضل اسمعك ... وهذي قعده " وصلح جلسته "
سلطان : يبه انت حبيت امي وتزوجتها صح فيها شي لو حبيت انا وحده وتزوجتها
" بومحمد ضحك .. وحسب اللي فهمه ان سلطان ناوي يخطب وماهو عاارف كيف يفاتحه بالموضوع "
بو محمد يضحك : لا من قال فيها شي .. ياولدي ياسلطان هذا الشي من حقـك.. ولافيه حد يقدر يمنعك بعد
"سلطان سكت"
بو محمد ناظره وابتسم : اهاا فهمــت .. افهم من كلامك انك نويت تخطب
سلطان سكت وبسرعه و قال: لا يبه انا خطبتها وتزوجت " ونزل عينه في الارض "
" بومحمد ما استوعب الكلام اللي انقال .. فكر ان ولده يمزح معه او يلعب عليه او يمكن من التوتر قال كذا .. ماصدق الكلام اللي قاله سلطان "
بومحمد : وش قلــت ؟
سلطان رفع راسه : يبه انا حبيت وحده وتزوجتها
بو محمد ضرب يده على المكتب ومن قوتها طارت الورقه اللي كانت بوجهه : وش قلــت ياولد
سلطان : يبه والله اني اسف والله مدري شلون كل شي صار بسرعه
بو محمد وقف وسكر عينه لحظه وكتم غضبه ماقدر يطالع بوجهه سلطان وفتحها وكانت عيونه متقلبه : سلطان اذا كانت هذي مزحه من مزحاتك والله ماتلوم الا نفسك
سلطان : يبه والله من جدي اتكلم من جيت وانا ودي افاتحك بالموضوع بس ماني عارف كيف صدقــــ .........
ابو محمد : سلطان قوم اطلع برا عن وجهي
سلطان وقف : يبه لحظه خلني اشرح لك
بو محمد بأصرار واعلى صوت شوي : قوم اطلـــع برا عن وجهي مابي اشوفك قدامي
" سلطان اول ماشاف شكل ابوه استسلم وده لو بيثور ابوه عليه ولا انه يطلع بس في الاخير قام وراسه بلارض .. طلع سلطان بسرعه من الغرفه وسكر الباب وراه وكان محمد ينتظره بالصاله اول ماطلع وقف محمد "
محمد راح لسلطان : شصار.. كلمته
سلطان نزل راسه : ايه " وتنهد " ابوي قلعني من وجهه
محمد: لاحول ولاقوة الا بالله
سلطان : ماقلت له شي بس قلت له حبيت وتزوجت حتى مانتظرني اكمل كلامي
محمد : في كلام اهم من اللي قلته .. وخر خلني ادخل لايكون صار فيه شي
سلطان : لالا اصبر شوي الحين هو ثاير خله يرتاح شوي وادخل له
" راح محمد وسلطان وقعدوا بالصاله اللي فوق .. سلطان من القلق رجوله قاعده تنفض .. كان خايف على ابوه لايصير فيه شي "
محمد: والله ياسلطان ماتلوم الا نفسك لو يصير في ابوي شي
سلطان بعصبيه: محمد بس ترى مو بس انت خايف عليه حتى انا بعد
محمد ناظره وسكت
" شوي ويدق جوال سلطان .. سلطان رفعه وشاف المتصل وقام عن محمد ودخل الغرفه ومحمد يناظره "
محمد " اي روح طمنها "
سلطان بتعب : هلا فواز
فواز حس فيه : سلطان بشر قلت له
سلطان يهز رجوله : في البدايه قلت لمحمد وعصب علي لكن ابوي قلعني من وجهه وقال مايبي يشوفني
فواز : لاحول ولاقوة الا بالله بس
سلطان : اي بس ملامح ابوي ماتطمن حسيت ملامحه تشنجت من سمع الخبر احسه يفكرني امزح ولا العب
فواز : الله يستر ياسلطان
سلطان : فواز انا خايف على ابوي
فواز : طيب روح شوفه تطمن عليه
سلطان : اخاف ان شاف وجهي تجيه جلطه
فواز : الله يهديك ياسلطان ..
سلطان : ليته ياسلطان طاردني من البيت او حتى ضاربني ولا انه يكلمني بالطريقه اللي كلمني فيها
فواز حس انه هذا هدوء قبل العاصفه : استغفر الله العظيم .. طيب خل محمد يروح له
سلطان : بيروح له بس قلت له خل يهدا شوي
فواز يشوف عنده خط : شوف انا عندي خط الحين بس يصير شي كلمني على طول
سلطان : ان شاء الله
" سكر سلطان عن فواز وبعدها طلع برا وشاف محمد قاعد ومنزله راسه لعند يده ورجوله تهز .. حس بحسره بقلبه .. توهم العصر كانوا مبسوطين وجا هو وقلبها عليهم .. سلطان كان قاعد بالصاله الفوقيه والوقت يمضي وابوه لاحس ولاخبر لسا مابعد يطلع لهم "
.
.
.
" في غرفة نايف "
نايف: هلا فواز
فواز بصوت تعبان: هلا نايف
نايف: فواز شفيك ؟
فواز : لامافيني شي
نايف: اكييد
فواز يتنهد : اي اكييد
نايف بأسى : فواز نجود باينتها ماهي راضيه تتارجع عن قرارها
فواز : نعــم ...!
نايف: اعذرني ياخوي بس كلمناها وحاولنا فيها بس شكلها راكبه راسها
" فواز تنهد وسكت"
فواز " من قال انه لك حظ في الدنيا يافواز "
نايف : سامحني يافواز
فواز قاطعه : نايف انت مالك ذنب وبعدين انت ماقصرت معنا .. اللي عليك سويته وزياده بس انا ماقدر اجي اليوم اعتذر لي من عمي
نايف استغرب : ليــش ؟؟
" فواز ماعرف وش يقول عارف ان مشكلة سلطان بتطول واليوم الوضع اكيد متوتر مايبغى يزيده هو الثاني بيتحمل لبكرا على مايدرون الاهل بالخبر بعدين يتفرغ لنفسه "
فواز : لا بس " وسكت " مدري شقولك.. المهم بعدين انتم راح تعرفون
نايف: لحظه لحظه فواز شسالفه ؟؟؟؟؟
فواز تنهد : بقولك بس مابي يطلع الخبر منك.. الخبر بيوصل اليوم ولا بكرا بس ابيك تشوف طريقه تصرف فيها عمي لبكرا
نايف: فواز خرعتني شعندك
فواز تنهد : سلطان تزوج
نايف وقف على حيله : كيــــــف ؟؟
فواز : اللي سمعته والحين هو رايح يقول لعمي والله يستر عمي وش بيسوي معه واكيد العايله بتدري اليوم...
نايف ضاق خلقه : وش الاخبار اللي ماتسر وش صاير بالدنيا بيوم وليله تنقلب احوالنا 180 درجه
فواز : شفت شلون الله كريم المهم قول لعمي فواز انشغل اي شي ومن بكرا يحلها ربك
نايف حس بصوت فواز : خلاص فواز ابشر ولا يهمك
" نايف سكر من فواز وهو مصدوم .. شلون ولد عمه يتزوج من غير محد يدري به .. والمشكله ماحسس حد بهذا الشي ... سلطان ماخلى حد يشك فيه لحظه وحده .. اعتفس حال نايف اكثر .. "
نايف : وش صاير .. شلون كذا فجأه كل الاخبار تسوء ... الله يعينك ياعمي...
" نايف قعد يفكر وش ممكن تكون ردة فعل عمه ... تعب نايف من التفكير وضاقت الدنيا عليه اكثر .. نزل تحت وماكان فيه غير امه وابوه "
نايف: السلام
ام نايف: وعليكم السلام
ابو نايف: وينكم كل واحد منعزل بغرفته
نايف ابتسم من ورا خاطره : عندي شغل خلصته ونزلت اما البنات مدري عنهم
ام نايف: كالعاده نجود منعزله بغرفتها وبسمه اكيد نزلت المرسم
نايف : احم على طاري نجود يبه فواز اعتذر ماهو بجاي اليوم
ابو نايف: عسى المانع خير
نايف: لا بس صديقه واصل من السفر اليوم وراح يجيبه
ام نايف: وصديقه ماعنده اهل يجيبونه
نايف لف على امه : يمه شفيك على الرجال .. الولد ساكن بجده وجاي يزور فواز
ام نايف: مافيني شي .. بس السالفه طالت عن حدها
نايف: ماعليه يا يمه الرجال له ظروفه بعد ولا هو وده
ابو نايف: على خير بنشوف اخرتها مع لعب العيال " وقام "
نايف: ان لله وان اليه راجعون
" نايف شاف ابوه عصب وصكت عليه الدنيا .. حس ان الوضع بالمره مايطمن "
.
.
.
|