الجزء الخامس عشر
الفصل الثاني
" في بيت بو ياسر "
" فيصل وعبير كانوا اليوم متغدين عند ام ياسر "
" بعد الغدا "
ياسر : اي كل ماخذتوا تعالوا تغدوا عندنا
ام ياسر : والله البيت بالمره صاك علي ياسر كله بشغله صرت استوحش البيت بدونكم
عبير ابتسمت وناظرت ياسر : خلاص ياسر اتوقع جا الوقت عشان تجيب اللي تونس امي
ياسر خزها
ام ياسر : مين بعد بيجيب؟
فيصل فتح عينه : ياسر نويت تعرس
ام ياسر :صــدق
ياسر : هاه لاا يمه ماعليك منها عبير
عبير تضحك : الا يمه ياسر خلاص قرر يعرس وانتي مو داريه وابشرك اختار البنت
ياسر : عبييير
عبير طنشته
ام ياسر: هذي الساعه المباركه .. ومن هذي بعد
عبير تناظره : اقووول خلاص يا ياسر خل نقول ونخلص
ياسر: عبير بذبحك
فيصل يضحك : اشوف ماهنا حد
ياسر ضحك : اجل سكتها وربط لسانها
فيصل : ليش وهي صادقه كم بقى من العمر ياياسر
عبير: من جد فيصل لو متأخر علي سنه ما اخذته
"ياسر ضحك وفيصل لف عليها وفقعت بوجهه"
ام ياسر ضحكت : عبير الله عليك تقولين من يبغى ولدي
ياسر : يمه ماعليك منها بنتك تخربط
عبير: قول انت اجل
فيصل : من جد ياسر يلا خل نفرح فيك شوف امك مسكينه الكل راح عنها على الاقل تونسها بتقعد العطله كلها لحالها
عبير: من جد واخواني احتما مايجون نفس الشي بداية العطله ولا نهايتها
ام ياسر تضحك مستانسه : يلا ياسر قول لي
" ياسر شاف مافي مجال ويحس ان من جد خلاص حان الوقت "
" سكتوا كلهم ينتظرون من بيختار عدا عبيير لانها تعرف "
ياسر اخذ نفس : يمه انا ابي بنت عمي سلمان
" فيصل انقلب وجهه ولا عرف وش يقول "
ام ياسر : زين ماخترت
ياسر : بس يمه لاتجيبين طاري الحين
عبير: واخيراااااااااا الف الف مبروك
ام ياسر بفرحه : كلولولولولوش
ياسر ضحك : يمه تو ماصار شي " ولف على فيصل وانتبه لوجهه "
ياسر: فيصل
فيصل انتبه :هلا هلا على البركه الله يسهلها لك
"ياسر ابتسم واستغرب بنفس الوقت بس مافكر يسأله ايش فيك"
عبير: واخيرااا بتتزوج يا ياسر
ياسر ابتسم : كله منك
عبير تضحك ولفت على امها : يمه متى بنكلمهم
" ياسر فتح عينه يوم شاف حماس اخته "
ام ياسر ابتسمت من قلب : اليوم ان شاء الله بعد صلاة المغرب
فيصل ابتسم : بالتوفيق يا ياسر والله فرحت لك ... عبير انتي بتقعدين هنا
عبير لفت ولف شعرها معه : ايه ليه رايح ؟
فيصل ابتسم تذوبه هذي الحركه : اي عندي مشوار اخلصه وارجع اوكي
عبير: اووكي الله معك
فيصل: عن اذنكم ياجماعه " وقام "
ام ياسر : في حفظ الله انتبه على نفسك
فيصل ابتسم : ولا يهمك
ياسر وقف وطلع معه : يعني هالشغله ماتقدر تأجلها
فيصل ابتسم : اي والله ضروريه
ياسر : يعني بتخليني لحالي معهم يتوحدون فيني
فيصل يضحك : اوه تحمل عاد عمتي تغني وعبير تصفق
ياسر ضحك : يالله الله يكون بالعون مع اني احس مو مستعد
فيصل لف عليه : من جدك يا ياسر مسكينه سهر بتتوهق بشايب
"ياسر ضحك ومايعرف ليش هذي الكلمه حمسته "
ياسر : شاب راسك قل امين
فيصل ضحك : يلا تامر على شي
ياسر : سلامتك
فيصل : اجل عن اذنك
" ومشى فيصل وترك ياسر ..."
" ياسر ماحس ان وده يدخل داخل فقال انه بيروح يتمشى في الحديقه .. الجو ماكان بطال يمشي الحال .. قعد ياسر يفكر ويفكر وابتسم للحظه .. تخيل لو انه متزوج .. حس انه متحمس بزياده على الزواج .. مايعرف يحس بشعور ان سهر بتوافق عليه ... يمكن لان العيال اللي تزوجوا بعايلتهم ماتعطلوا شاف كل واحد ياشر وياخذ اللي يبي .. وش معنى بتجي عليه هو .. شاف ياسر ان هذا الوقت اللي يتزوج فيه .. اخوانه مسافرين واخته متزوجته والبيت صاير فاضي يمكن اذا جت سهر تملي البيت عليهم وتغير من الاجواء الكئيبه اللي عمت على البيت في الفتره الاخيره .. كسرت خاطره امه وشاف فرحتها يوم قالت لها عبير ... صحيح كان وده يوقف عبير يوم لمحت لامه بس حس بشعور اندفع فيه وكأنه يبي يجرب حظه ... قعد يفكر ياسر لو انه اخذ سهر بيقدر يسعدها .. بتقدر هي تسعده .. بيتفاهمون واللي هو اهم شي عند ياسر .. سهر كيف بتكون علاقتها مع امه .. كل هذي الاشياء كانت شاغله تفكير ياسر .. وللحظه فكر ياسر في نفسه .. معقوله سهر بتنعجب فيه ولالا ؟؟ ضحك على هذي الفكره واستبعدها .. وحس تفكيره بيروح بعيد وقال يدخل احسن له .."
ام ياسر : حيالله فديت هالتخمه انا
"ياسر ابتسم وقعد"
عبير: اي من قده بياخذ سهر .. والله كنت بخطبها لك بدون ماتقول لي
ياسر ضحك : اجا انا ذويق
عبير ضحكت : اانا اشهد
ام ياسر : والله انها بنتتاخذ العقل.. كل ماشوفها اقول يارب تكون من نصيب وحده من عيالي
عبير ابتسمت : والله ياياسر ماتتوقع شلون طيبه وحلييييله
ياسر ضحك : قالها فيصل وحده بتغني والثانيه تصفق
"عبير ضحكت"
عبير: صدقني ماراح تندم
ياسر ابتسم : الله يسمع منك والحين انا بطلع اريح شوي
ام ياسر: الله معك
عبير: سلام
"طلع ياسر .. وهو يفكر بكلام امه ... اهله حمسووه بزياااده .. طلع وحاول ينام .. بس ماتوقع يجيه نوم"
.
.
.
" في بيت بو محمد "
" في الصاله "
سهر: بدري كان نمت لبعد صلاة العصر
سلطان : تلايطي بس
سهر ابتسمت وراحت سلمت على اخوها
سلطان : اجل وين امي وابوي
سهر: كلهم قاعدين بالصاله انا بروح اخليهم يحطون الغدا
سلطان : اها حلوو
" راحت سهر المطبخ تامر الخدم يحطون الغدا وبعدها راحت تقعد معهم بالصاله "
سلطان : لا بس حلوو في اوقسست
سهر : لا مره بعيد عسى بنقعد طول العطله هنا
سلطان ضحك : حالك من حال غيرك
سهر ضحكت : اووه صح انت ماعندك عطله ايواا احسن جاك الموت
سلطان : اااخ لاتذكريني .. بس اذا بتسافرون في اوقست برتب اجازتي معكم
بو محمد : كلها عشره ايام الله والاجازه
سلطان ضحك : نعمه يا يبه
سهر: عشرة ايام وش تسوي فيها انثبر مكانك بس
سلطان خزها : بكرا بتتوظفين وتشوفين قيمه العشره ايام
سهر ضحكت : لاشكرا انا توني مأجزه وماني مقدمه على الوظيفه الا بعد مايطيب كيفي
بو محمد ابتسم : اي لاحقه
سلطان : لاوالله مايصير وش معنى هي تخلونها على كيفها وانا خلصت دراسه من هنا وتوظفوني من هنا
سهر ترفع حواجبها : ياخي ليش مو راضي تقتنع اني انا غير
سلطان : بالله بصراحه ظلم
سهر ضحكت : مابغيت افتك من الدراسه يجيني هم دوام خلني اتمتع
سلطان حس بالقهر من جد "وش معنى "
ام محمد : اي يا يبه انت رجال عشان تكون نفسك بدل قععدة البييت
سلطان: انا ولله الحمد مكون نفسي
سهر تضحك : عاد الحين طاح الفاس بالراس خلصنا
سلطان بنظره : يامصلك
سهر : الا اقول سلطان ورا ماتغير سكسوكتك الحين طالعه موديلات جديده احلى
سلطان بضحكه : لاوالله واي موديل تفضلين اختي اسويه
سهر تضحك وتأشر بيدها : اللي يجيك كذا بعدين كذا
سلطان ضحك : خوووش .. شفتي يايمه عن بنتك
سهر ضحكت
سلطان : لا ياماما انسي انا ماتعجبني الا هذي
سهر: ياااي وع لحجي بدوي
سلطان رفع حواجبه : مووتي حره
سهر ضحكت
ام محمد : بسكمم هرج وقوموا نتغدا صار جاهز
" وبعد شوي قاموا يتغدون "
.
.
.
" في بيت بو نايف "
" حتى عايله بو نايف كانوا متجمعين على الغدا بما انه اليوم ويك اند .. كانت العايله تتغدا بهدوء .. ماكان فيه الا صوت الملاعق والسكاكين .."
" وفجأه نايف "
نايف: احم يبه اليوم بيجي فواز يبغاك بموضوع
نجود غصت
" بسمه لفت تناظر اختها وامها عطتها مويه "
نجود بعصبيه : قوله لايتعب نفسه
بو نايف: نجود عيب هذا زوجك
نجود : اووه " وقامت ولاكملت غداها "
" بسمه حست انها محتاره ويوم شافت ملامح ابوها وامها قررت تلحق اختها "
بسمه : عن اذنكم " وقامت ركض "
بو نايف : الله يهديها الرجال اكيد استلعن من عصبيتها
ام نايف: انت اهدا واليوم بنعرف وش صاير
بو نايف: هذي بنتك وهذا لسانها غشيم فيها انا
نايف " اااخ ليتكم تدروون بس "
نايف : مافي الا الخير ان شاء الله انتوا بس اهدوا
ام نايف: الله يهديهم ويصلحهم ولا وش جاهم فجأه قلب عليهم حياتهم
نايف : يمه هذي الحياه يوم لك وعشره عليك
ابو نايف: متى بيجي فواز والله اني فشلان فيه
نايف بسرعه : يمه نجود ماغلطت
ابو نايف : وانت تدري باللي بينهم
نايف توترر: لامادري بس اكيد سوء تفاهم بسيط ان شاء الله
ابو نايف: اتمنى .. سفره دايمه " وقام "
نايف حط المعلقه وهو يتأفف
ام نايف: شفيييك معصب
نايف: ماني معصب ولا شي .. الحمدالله " وقام "
ام نايف : لاحول ولاقوة الا بالله شفيهم " وقامت هي الثانيه "
"في الدور الثاني "
" بسمه بعد مالحقت نجود ودخلت معها قامت نجود تحكي لها اللي صار بدون ماتحس بس حست ان هذا الوقت لان اوردي فواز بيجي وبيحكيها لهم خلها تعرف من الحين "
" بسمه انصدمت بس هي كانت عارفه عن علاقتهم من قبل وكيف انهم مايطيقون بعض بس يوم تزوجوا حست عكس كذا وفجأه الحين تغير كل شي "
بسمه تحضنها بخفيف : طيب انتي لاتعصبين خلاص انتي قلتي حق نايف .. نايف هو بيتصرف
نجود : ابوي ماعنده هذي السوالف بيرجعني عليه غصب عني وانا ماابيه
بسمه : لا مافي شي بالغصب انتي بس اهدي لاتعصبين كفايه انه دمك براسك خلاص انا بروح اشوف نايف
نجود : انا قلت لنايف كل شي وهو بيوصل له اني انا مابيه خلاص عفته
بسمه : طيب طيب " وقامت "
" بسمه يوم شافت اصرار اختها على انها ماترجع لفواز خافت على مستقبل اختها يضيع بسبب تهور .. حست بسمه من ناحيتها ان ممكن الرجال يشك بزوجته بيوم .. بس مو لدرجه انهم يتطلقون.. وش بتكون نظرة الناس لاختها وهو توها متزوجه .. راحت تدور نايف وقالوا لها انه طلع فوق غرفته .. اول ماراحت غرفته كان توه بيطلع لابس وباين شكله بيطلع "
بسمه : بتطلع !!
نايف وهو متضايق: ايه
بسمه : طيب ممكن اكلمك شوي
نايف تنهد واخذ نفس : اوكي .. ادخلي " دخل غرفته وهي لحقته وسكرت الباب وراه "
نايف: امري وش بغيتي
بسمه : نجود
نايف لف راسه : وش فيها نجود
بسمه : صحيح بتقول لفواز يطلقها
نايف: هذي رغبتها وهي اللي طلبت هذا الشي وانتي عارفه وش بتكون ردة فعل ابوي
بسمه : وانت وش دراك يمكن تكون ردة فعل ابوي غير
نايف: وش قصدك " وشوي " يعني يشك بتربيته لبنته
بسمه : لا بس انت ماتدري ابوي شلون يفكر
نايف: وش قصدك
بسمه : نايف انا ترى ماشك بأختي بس انا خايفه ابوي يفكر ان فواز ماشك فيها الا ان شايف شي عليها وبعدين يصير يشك في بنته
نايف عصب: نعــم .. بسمه انتي تقولين كذا
بسمه خافت : لابس انت حطها كاتوقع يعني .. انت شفت ابوي شلون واثق من فواز وشلون عنده فواز بالدنيا
نايف: بس لاتنسين ان هذي بنته ولا فواز صار اولى من بنته
بسمه: نايف اسمعني وكبر عقلك
نايف لف عليها
بسمه : كلم فواز وقوله لايقول حق ابوي السبب الحقيقي وحاول تقنع نجود تغير رايها
نايف : شلون يعني اخليه يكذب
بسمه : تراها كذبه بيضاء يعني وانت قصدك تصلح بينهم مو تخرب
بسمه : اسمع ابوي وامي لازم مايدرون بهذا الشي ماحسها حلوه بحقهم ثنينهم .. وبعدين نجود لازم تكبر عقلها المفروض ماكانت عصبت من البدايه وكسرت الجوال لو انت بمكان فواز وش تسوي .. الرجال وش دراه
" نايف هنا سكت "
بسمه : اسمح لي بس نجود تصرفها كان غلط .. كان قالت له اكلم اخوي وبعدين تعصب اذا حست انك شك فيها بس مو تروح وتخليه غصب يشك فيها .. انا صحيح واثقه منها الا انت شوف تصرفها وحط مكانك مكان فواز
نايف :.........
بسمه : انت معصب لانك عارف انك انت اللي كنت تكلمها ولا انا عارفه يانايف ان تفكيرك مستحيل يخليك تطلق اختك على سبب هي تسببت فيه
نايف ارتاح شوي من كلام بسمه : طيب كيف اقنعها
بسمه: انت كلم فواز بالبدايه قبل لايجي ويقول لابوي كل شي وبعدين نروح نكلم نجود
نايف: انا دايم اقول ان عقلك اكبر من عقلها صراحه غلبتينا " وابتسم "
بسمه ابتسمت
" رفع نايف السماعه على فواز ودق عليه "
" فواز استغرب من تليفونه توقع ان نايف مايكلمه "
فواز : هلا نايف
نايف ابتسم : هلا بك زود
فواز ارتاح جزئي يوم سمع صوته : شخبارك عساك بخير؟
نايف: الحمدالله مانسأل الا عنك ... وينك فيه شكلك بسياره
فواز : اي توي نزلت الوالده بيت عمي وراجع البيت
نايف: اهاا
" وسكتوا لحظه "
نايف: فواز
فواز : هلا
نايف: اعذرني ياخوك ماكان ودي اتصرف معك كذا بس اكيد انت فاهم موقفي
فواز : لالا افا عليك من حقك يانايف والله اني مو عارف كيف اجي واقول لعمي خلها على الله
نايف: طيب فواز بطلب منك طلب
فواز: سم
نايف: سم الله عدوك .. بس ياليت اللي صار بينك وبين نجود مايطلع لحد غيري هذا اذا انت ماقلت لحد غيري
فواز انصدم : كيف يعني ؟
نايف فهم عليه : اقصد ياليت اهلك مايدرون بااللي صار ولا اهلي حتى
فواز : يعني شلون نجود وافقت انها ترجع لي
نايف ضحك : مو بهذي السهوله بس انا بحاول اكلمها واقنعها ان الموضوع مايطلع لبرا .. جربت وحطيت نفسي بموقفك وعرفت ان الحق 70% معك
فواز ارتاح : اااخ ماتتوقع شلون ريحتني
نايف ابتسم : يعني حاول تطلع لك اي عذر غير اللي صار انا اشوفها احسن للكل ولا كيف
فواز ارتاح : طبعا يانايف .. صدقني اني خجلان منك يانايف .. ماتتوقع شلون حسيت اني بصغر بعيونكم .. صحيح اني اخطيت بحق اختك يا نايف الا اني مو معصوم من الخطا وياليت نجود تفهم هذا الشي والله اني ندمان ... عمري ماخطيت مثل ماخطيت بحقها ..
نايف : فواز اعتذرت بما فيه الكفايه لي .. بس بقى تعتذر لنجود
فواز ارتاح كلي الحين : طيب نايف ياليت تحاول تكلمها الحين عشان يكون في وقت الاقي حجه اواجه فيها عمي
نايف : خلاص انا بحاول مع اني ما اضمن بس الله يعين ..
فواز : ياليت تعطيني خبر قبل اجي ياخوفي اجي واتعذر تقوم نجود وتحكي قدامهم
نايف:لالا انا عموما بعطيك خبر قبل لاتجي
فواز : الله يعطيك الف عافيه يانايف والله ماني عارف
نايف: خلاص انتهينا الحين بروح لنجود .. الظاهر انا ماعندي شغله هالويك اند الا انتم
فواز ضحك : عقبال ماخدمك بفرحك قول امين
نايف ابتسم: اجل مطول
فواز ضحك : لاصدقني مانت ندمان
نايف ضحك : والله اللي يشوفكم يندم غصب ... اجل اخليك الحين
فواز يضحك : اجل الله معك
نايف: مع السلامه
" وسكروا .. بسمه طول الوقت تسمع الحوار وهي مبتسمه "
نايف لف عليها : والحين باقي نجود
بسمه تنهدت بقوه : اي مو البلا هنا
نايف ضحك : والله صراحه عندي احساس قوي ان نجود معنده واحس الموضوع منتهي عندها
بسمه : نايف نجود تحب فواز .. والله ماشفت وجهها اليوم يوم التقت معه بالمطعم
نايف ابتسم : بعــد
بسمه ضحكت : اي وقسم بالله بس نجود تحب تكابر وخبرك غرورها بيخليها تندم على اشياء كثيره
نايف: طيب يلا قومي معي
بسمه تنهدت : وهـ يلا قوم
" وبعدها راحوا عند نجود "
.
.
.
ام محمد : سهر قومي جيبي لنا انا وخالتك عصير ليمون هالكوفي قام يسعر في بطونا
سهر ضحكت : انتوا من قال انكم وجه كوفي وهالخرابيط
ام نايف: اي والله قومي يمه واللي يعافيك
سهر ابتسمت : ان شاء الله
" قامت سهر وراحت تطلب عصير ليمون وكان وقتها زحمه على الكاشير وقعدت تنتظر شوي والزحمه تزيد وسهر تنرفزت نزلت راسها تنتظر وتحس ان وقفتها بين العيال غلط مع انه فيه كم بنت .. وماصدقت جا دورها دفعت وراحت الجهة الثانيه تنتظر عشان تستلم العصير .. "
......: ياليموون انتا
اخترعت سهر ولفت وراها وارتاحت ابتسمت ولفت وجهها من جديد
" كان واقف وراها حاله من حال الجماعه اللي بنتظرون "
...: مو كويس اليمون حق معدتك
سهر ابتسمت : بدر وخر عني لاتفضحنا اهلنا ورا وماني ناقصه مشاكل
بدر : والله انا انتظر طلبي حالي حال الناس
سهر ابتسمت وقدمت : اي بس شكلنا غلط والمكان مليان خليج الحين بيقولون عني اغازل
بدر يضحك : خلاص بثبت لهم انك خطيبتي لاتزعلين
" راح بدر ووقف جنبها .. سهر اخترعت ولفت الجهة الثانيه وشافت اجنبي واقف ويضحك عليهم وحست انه شك بالموقف هي ابتسمت ابتسامه مجامله ورجعت ورجهها وحطت يدها على فمها "
سهر: هذا الاجنبي ويشوفنا كذا والله لو ماتروح ,, " وسكتت ماعرفت تكمل "
بدر ضحك : اي وش بتسوين
سهر اخترعت : بدرررر " شوي ويوصل طلبها وتقدمت وهو تقدم معها "
سهر تاخذ الطلب : هع احسسسن " اخذته ومشت عنه .. بدر ضحك وماقدر يلف عشان لاحد من اهله يشوف وجهه "
" في نفس الوقت اللي كان بدر يتحرش بسهر "
فيصل : اووه هذا هو بدر شكله راح يستلم الطلب مافي مجال
" شوي وانتبه على اللي قاعد يصير ... فتح عيونه ولا صدق اللي يشوفه .. "
" في سياره فيصل "
" فيصل كان يتذكر الموقف اللي من وقتها قام يراقب حركات سهر وبدر .. هو يعرف حركات بدر وانه مايفتكر في حد .. بس مع ذلك انصدم .. ماتوقع ان في غيره يكون عشقان في العايله قبل الزواج .. فيصل ماعلق ولا عصب ولاشي بالعكس ابتسم .. في خاطره خل يعيشون حياتهم ويوم فكر فيها .. شاف ان مالهم غير بعض دامهم يبون بعض "
فيصل : لاحول ولا قوة الا بالله شسوي الحين .. اسكت ولا اتكلم .. بس ياسر يبي ياخذ وحده اخوه يبيها .. ولا يمكن بدر بس معجب فيها.. تؤ لالا باين عليه يحبها وخصوصا علاقته الزايده من منصور تبين وراها شي .. ياربي والله مدري وش اسوي .. اخاف اسكت واغلط ولا اتكلم واغلط .. لالا بس بدر لو كان يبيها كان تكلم او حتى قال لامه .. والله احترت .. ايه مافي الا طريقه وحده بكلم بدر وبقيس نبضه واشوف على الاقل ارتاح من تأنيب الضمير
" فيصل كان مراقب بدر في السفره اللي سافروها جميع .. فيصل كان عشقان مثل بدر وكان يراقب تحركاته ونظراته لسهر وكيف انه يباسم اذا جابوا اخوانها طاريها .. ولكنه سكت ولا بين شي وبدر مبسوط انه محد كاشفه ..ولكن فيصل بعد ماعرف ان ياسر بيخطب حبيبه اخوه .. ماطاوعه ضميره يسكت ولايتكلم على الاقل يقيس النبض ولا تأنيب الضمير حتى لو عرف بدر ان فيصل يدري فيه "
" رفع تليفونه ودق عليه وبدر ثواني ورد عليه مع ان فيصل فكر انه يتراجع "
بدر : اووووه اوووه وش صاير
فيصل ضحك : افااا بس
بدر: لااه اكيد مادقيت الا وفي طامه
فيصل ضحك : بديير اعقل
بدر ضحك : شخبارك؟
فيصل: والله الحمدالله انت شخبارك وشخبار وليد
بدر: والله كلنا بخير مشتاقييين ماني قادر اقعد طفشت طفشت
فيصل ابتسم : يلا هونها وتهووون كلها كم سنه
بدر يتنهد : ااااخ من عمري يافيصل وشبابي
فيصل ضحك : والله انك .هههههه قولي كيف وليد مع الدراسه
بدر: والله الحمدالله هذا هو يزحف
فيصل يضحك : اي دير بالك عليه
بدر: انا اللي يبغى لي من يدير باله علي
فيصل ضحك : بدر وش صايبك
بدر بقهر: ملييييت ملييييييت
فيصل: مانت بصاحي
بدر: ايه بلاك ماجربت
فيصل يضحك: ولا ابي
بدر: الا شخبارك مشييير لا يدق ولايٍسأل ؟
فيصل عجبه سؤال بدر لانه هذا السؤال اللي كان يبيه : والله هذا هو يبي يعرس
بدر يضحك : لااااااه ههههههه شكله شاف الكل قام يخطب ويعرس وقال يالله معهم
فيصل : اي والله
بدر: ياحليلك ومنهي بنت الحلال اللي مختارها اخونا
فيصل يضحك : تطنز
بدر يضحك : لا حشا بالله
فيصل بعد لحظه : سهر بنت عمي سلمان
" بدر شهق وكأن حد صب عليه مويه ... حس كل الملامح اللي في الكون اختفت بعينه .. شلون راح عن باله ان عنده عيال عم وش كثرهم واحتمال ياخذون سهر من بين ايديه ... فيصل يوم سمع ردة فعله وناداه ومارد عليه فهم بدر على طول وبدون مايتكلم"
فيصل : بس هو مايبيها
بدر كأنه توه يستوعب : كيف كيف
فيصل : امي اختارت له سهر بعدين طلعت سهر اكبر منه
بدر ارتاح شي بسيط وبحماس: يعني الحين شلون هو اللي يبيها ولا امه
فيصل خاف على عقله : لالالا هو مايبي احد بس امي قاعده تفكر لحالها واصلا هو شكله غير رايه
"بدر مع ان كلامه شوي طمنه الا انه هو ماتطمن من ناحيه ثانيه "
.فيصل بالعمد وفيه الضحكه : اصلا مين يبيها سهر شينه عفانا الله
بدر عصب وكان وده يهاوشه الاانه فكر وقال احسن يوم انهم غاضين البصر عنها : مدري يمكن لاني ماذكر شكلها
فيصل " اي هيــــــن "
فيصل : ماعلينا منهم المهم توصي شي
بدر: صدق انك تجيب الهم لا سلامتك
فيصل ضحك لانه فهم عليه : اجل سلم على وليد
بدر: يوصل وانت سلم على الاهل
فيصل: لاتوصي
" فيصل بعد ماسكر عرف انه بدر يبيها وان هم يحبون بعض ولا كان سهر ما اعطته وجه .. وماعرف شلون يتصرف وقتها .. كان عارف ان ياسر مايدري عن اخوه .. بس الحين حس فيصل ان حياة بدر بيدينه لانه هو الوحيد اللي يعرف عن هذا السر .. واذا ماتحرك وماسوا شي.. عمره مارراح يسامح نفسه .. وصميره ماراح يخليه يرتاح "
" اما عند بدر .. صحيح راحت الفكره عن باله .. الوضع في عايلتهم مايطمن في الفتره الاخيره كثير منهم صاروا يتزوجون .. وعرف انه مايقدر يضمن سهر وخصوصا بعد كلام فيصل .. هو مجرد انهم حطوا سهر في بالهم جننته الفكره شلون لو يخطبونها .. نجن بدر وحس انه مو على بعضه وانه مختنق ووده لو يرجع السعوديه على الاقل يخطبها ويرجع .. ولكــــــــن اللي خلاه يتهاون كلمة فيصل الاخيره يوم قال له اصلا من يبيها .. بدر اخذ راي فيصل فيها عن راي الجميع .. فكر كل احد ينظر لها بهالمنظور وهذا الشي اللي خلاه يتهاون شي بسيط "
.
.
.
" في سياره فواز "
" فواز بعد مكالمه نايف له حس ان الدنيا ماهو واسعته .. ماندم انه قال لنايف بلاول .. حس ان موضوع نجود يمكن يكون سهل واكيد نجود بتقتنع وبترجع له لانه كان حاس انه اكيد بترجع له واكيد انه هي اشتاقت له بعد "
فواز : ياربي معقوله كل شي صار مثل ما ابي ... الحمدالله والله ماكنت متخيل موقفي وانا موقف قدام عمي واقوله كل السالفه اني شكيت في بنتك .. ياربي انا حمار .. شلون قدرت فيها شلوون مع انها ثبتت لي انها عكس الفكره اللي اخذتها عنها .. حتى لو وصلت السالفه انها كانت تحب سلطان .. لو كان سلطان بس يفكرر فيك كان خلتك له بس سلطان مايحس بشي تجاهها وهي فاهمته غلط .. معقوله هذا الموضوع ببساطه وانا اللي شايل عنها الفين فكره .. ياربي سامحني ان اخطيت بحقها.. مستحيل اقدر اسامح نفسي بعد اللي سويته فيها .. صدق ماتحس بقيمه الشي الا اذا فقدته .. المشكله ماصرت اقدر اقعد بدونها .. تعودت عليها .. حتى لو ان حياتنا كانت مكركبه احيانا الا اني تعودت على هذا الوضع واشتقت له بعد ... اااه عمري ماتخيلت اني بيوم بحب غير دانه .. والحين حبيت اكره انسانه كنت اشوفها على وجه الارض بنظري .. يارب تعقل وتفهمني انا واثق انها تحبني واثق
" فواز حس بالحنين اتجاه زوجته .. وحس بقيمتها بعد مافقدها مع ان حياتهم احيانا كلها هواش الا انه اشتاق حتى للهواش معها .."
" قطع حبل افكاره صوت جواله .. رفع جواله وشاف سلطان داق "
فواز : هئ ليتك نجود تعرف قيمتي مثل ماصرت تعرفها
" ورد عليه "
فواز : هلا بو سلمان
سلطان بصوت هادي : هلا فواز شخبارك
فواز برسميه: الحمدالله بخير ونعمه بشرني عنك؟
سلطان افنجر: ممكن ماتكلمني بهذي الرسميه ترى الاخلاق قافله معي
فواز ضحك بداخله وغير صوته: وش قلت انا قلت الحمدالله فيها شي
سلطان يتأفف : لا بس فواز اذا كنت فاضي ابي اتكلم معك اذا ممكن
فواز قرر يقهره : ودي والله بس انا شوي مشغول
سلطان صرخ فيه : فوااااز عاد خلاص ماحنا بزران عشان تزعل وتصادد عني
فواز : والله مصيبه اقولك مشغول تقول لي اصادد عنك انا موجود طول الوقت بس انت ماعرفت تختار الوقت المناسب
سلطان : الشرهه ميب عليك الشرهه علي انا اللي داق عليك " وقفل بوجهه "
فواز ضحك : اموت واعرف هالغرور ليش مو راضي ينزل
" فجأه فواز حس بالحزن ناحية عارف انه محتاج له وانه يمر بظروف صعبه ورجع اتصل عليه وسلطان على طول رد عليه "
سلطان : نعم
فواز ابتسم : وينك فيه الحين ؟
سلطان لان خاطره شوي : في الخيمه
فواز : ثواني وانا عندك سلام " وسكر منه "
" سلطان اخذ نفس وتنفس بأرتياح "
" غير فواز واجهته لعند الخيمه اللي تعودوا يجتمعون فيها الشباب .. وعشر دقايق ربع ساعه وهو عند سلطان .. نزل فواز وتوجهه للمدخل واول مادخل شاف سلطان منسدح ومغمض عيونه .. حزن عليه وعلى وضعه .. من جد الله يعينه "
فواز تنحنح : احــــم
سلطان فتح عينه على طول وصلح جلسته
فواز : السلام عليكم
سلطان : وعليكم السلام ياهلا
" راح فواز وسلم عليه وقعد جنبه "
فواز : طاح اللي براسك استانست
سلطان ابتسم : فواز واللي يرحم والديك والله مانت حاس فيني
فواز : مدري مين اللي مو حاس في الثاني .. مدري انت غرورك وين بيوصلك
سلطان : اوووهووو على سالفه الغرور انت الثاني تراك فضحتني كلمه والثانيه غرورك غرورك
فواز بعناد : ايوه انت مغرور
سلطان ضحك : انت جاي تستفزني ولاكيف ؟
فواز : على الاقل اطلع حرتي فيك
سلطان ضحك : خلاص اعتبرها وصلت بس فكني
فواز ضحك : شخبارك
سلطان : زفت ولله الحمد
فواز : افا ليش بس .." وشوي " قلت لهم
سلطان : بقول لهم وبتشوفني قاعد في البيت
فواز : مادري قلت يمكن...!!
سلطان : اليوم بقول لهم
فواز رقع قلبه : يعني خلاص
سلطان : لافكرت فيها ليش نطولها
فواز حس كأنه هو المذنب : مدري وش اقولك .. طيب فكرت وش بتقول وشلون بتواجهم
سلطان : بكلم ابوي بلاول صراحه اخاف على امي
فواز حزن عليه وضرب ركبته : نبهتك من الاول نبهتك
سلطان لف عليه : فواز انت عارف اهلي والعاده المتخلفه اللي عندهم
فواز : بس ولو كان اهون في فرق لمن تقول بتزوجها وتزوجتها
سلطان : فواز والله يعافيك لاتزيدها خلاص اللي صار صار
فواز : مو المشكله انه اللي صار صار طيب وش بتقول له
سلطان بعبط : بقول له يبه تزوجت انا
فواز ضحك : ترى مو وقتك
سلطان : اجل ليش مكلمك انا ابيك تساعدني
فواز : خلاص انا اقوله سلطان تزوج
سلطان لف عليه بقوه فجأه ضحك
سلطان بضحكه حلوه : وش سالفتك انت اليوم متبرع بدمك
فواز ضحك : خلني صار لي فتره ماضحكت
سلطان : اووه تراضيتم ..!
فواز : مابعد على وشك ان شاء الله
سلطان ابتسم : الله يجمع مابينكم
فواز : المهم خلك مني فكرت وش بتقول له
سلطان : بقول له كل شي بس خايف على ابوي يصير فيه شي
فواز بنظره بعيده : مو بس ابوك العايله كلها بتقوم عليك
سلطان : ماهموني اهم شي عندي ابوي يوفق ولا هم ماعلي منهم
فواز : مافكرت بزوجتك وكيف بتكون منبوذه بينهم
سلطان : ماعلي منهم اصلا ماراح اخليها تختلط فيهم
فواز : طيب لنفترض عمي ماوافق عليها وانك لازم تطلقها
سلطان : مستحيل زوجتي حامل
فواز حس المصيبه مصيبتين : لاحول ولاقوة الا بالله طيب الحين خلينا من حامل ولالا انت كلمهم عن زواجك وبعدين عن الحمل لان خالتي لو تدري والله مدري وش بيصير فيها
" سلطان سكت وقعد يفكر بهذي النقطه اللي كان حاطها عذر انه مايقدر يطلقها "
فواز: لاتجيب لهم ذا الطاري بالمره
سلطان تنهد : ليش ماتجي معي ونقوله مع بعض
فواز : ماشوفك خذتني معك يوم جيت تخطبها
سلطان ناظره بنظره : افففف انت ماتعرف الاتجرح
فواز : انا ولا انت .. شوف نفسك ياسلطان كم شخص بتجرحه امك ولا ابوك ولا اختك اللي بيموتون ويحظرون زواجك وكل واحد يتحلم وشلون بيكون زواج صغيرهم .. انت جرحتهم ولا انت حاس
سلطان حس بتأنيب الضمير وعرف انه مستحيل يسامح نفسه
سلطان : فواز اليوم موتي تدري موووتي
فواز : شوف لاتستغرب اي ردة فعل ... يصرخ بوجهك يضربك او حتى يطردك من البيت .. تحمل كل شي يجيك ياسلطان وغرورك هذا قلعه يولي مو تقول ابوي طردني شلون ارجع ومادري وشو .. تحمل اي شي يجيك واكيد انت حاط هذي الاحتمالات ولا ..؟؟
سلطان : يهاوشني يطردني بس يضربني صاحي انت
فواز : انا قلت لك هم صحيح بيقلبون الدنيا فوق راسك بس انت لازم تصبر وتتحمل وبعدين الاوضاع بتهدا
سلطان هز راسه
فواز بعد لحظات : والله مو قصدي اجرحك ياسلطان بس انت لازم تنتبه لتصرفاتك .. ولازم تحط كل شي ضمن الواقع .. والله ودي اكون معك .. بس مابي السالفه تكبر انت فهم ابوك برواق ولاتتطاول معه حاول على قد ماتقدر تمسك اعصابك
سلطان تنهد : اف اف اول مره احسس اني غبي غبي غبي
" فواز كان وده يقول اي والله بس حس جرحه بما فيه الكفايه ولكنه اللي قطع محور حديثهم مساعد كان يبغى يسأل عن مكان فواز "
فواز : هذا مساعد توه واصل الخبر .. المهم الحين قوم وقول له والله يكون معك
سلطان تنهد ويحس ان قلبه بيطلع من صدره : فواز خلاص قررت بكرا بقوله
فواز : وش يفرق ياخوي اليوم ولا بكرا .. دامه اليوم رايق توكل وقول له .. واانا الحين بروح عنك واي شي يصير دق علي
سلطان مسك نفسه : شوف اذاا مادقيت عليك ولا كلمتك اعتبرني في المقبره
فواز ضحك : وش دعوى ياشيخ ليتك خفت يوم تهورت مو الحين
سلطان صربه على كتفه : قم قم اصلا وجودك من اصله قلق
فواز بجديه : لامن جد ياسلطان والله مو داعيني قلبي اخليك بروحك بس ماقدر اتدخل بموضوع فيه عمي .. بكرا يحط اللوم علي وعليك .. وبس الله يكون معك
" فواز وقف ووقف معه سلطان "
سلطان : على خير والله يستر
" بعد كذا ودع سلطان فواز وترك سلطان يصف الكلام ويوزنه بعقله ويحط الف حساب حق اي ردة فعل "
.
.
.
|