منتديات قصايد ليل - عرض مشاركة واحدة

01-06-2012

(( بيت ابو فيصل .. ))

( الساعة 3 العصر )

وصل فيص مستانس للبيت .. اليوم وعد نسايم وخواته يوديهم يغديهم ف مطعم .. لانه ابوه بيتغدى برى البيت ..

نزل من السيارة ودخل البيت ..... وقام يتشمى فيه ..

فيصل يصارخ : ياهوووووو ... يا اهل البيت .. ما جعتوا..؟؟؟ تراني ميت جووووووع ..

نزلت نسايم بعبايتها شايلة امل الصغيرة : هههههه يللا هذانا جينا ..

ووراها كانت شوق .... وكانت لابسة تنورة ححمرا وبلوزة بيضا ...

شالها فيصل : ياقلبي الاحمر انا .... كيفك حبيبتي.....؟؟؟؟
شوق تضحك : طييييبة ... بنروح...؟؟
فيصل : هههه أي الحين بنروح

نسايم : وين بنروح ...؟؟
فيصل ابتسم : مفاجأة .....

طلع هو ونسايم وخواته من البيت ووداهم لفرايديز ف الخبر ... وهناك .. قضوا وقت حلو واستانسوا .......

___________________________________

(( بيت ابو سعود .. ))

( الساعة 6 المغرب )

رجع سعود فهالوقت البيت لانه يدري انه امه الحين بتكون نايمة .. والكل بيكون نايم ..

دخل شوي شوي .. وتوجه للدرج .. طلع للدور اللي فوق ..

مشى ف الممر شوي شوي بدون ما يطلع ولا صوت ..

ولما وصل لغرفته .. تلفت حوله .. ولمح نور غرفة دلع المفتوح والباب بعد ..

سعود " غريبة تفتح الباب ... "

بغى يروح لها بس فكر انه لو راح لها الحين بيبدا معاها مشكلة وهو مو ناقصه مشاكل .. هذا اضافة الى خوفه من انه امه تطب عليه ف أي لحظة .....

عشان كذا .. قرر يروح ينام ويفك عمره من صدعة الراس ...

( ف غرفة دلع )

لينا تغط الازرار ف اللابتوب : دلع .. وش فيه النت ما يشتغل عندك.......؟؟؟
دلع بدون ما تلتف : خربان مدري وش فيه ...
لينا : طيب بخلي سالم يروح يصلح لك اياه .. حرام كذا تعيشين من دون نت .. مدري شلون متحملة ...
دلع : شكرا ما ابغى اصلحه .......
لينا : ليش...؟؟
دلع انفعلت : لينا الله يخليك والله مالي خلق سوالفك .. ممكن تروحين ابغى انام ..؟؟
لينا مستغربة : دلع وش فيك متغيرة ..؟؟
دلع سكرت عيونها عشان ما تصيح : مافيني شي .. الله يخليك بلا اسئة وخليني انام..

لينا قامت ......
لينا : طيب خلاص بقوم .. بس تعرفين انه اذا بغيتي شي .. تراني موجودة ..
دلع ابتسمت غصب: طيب .. ما تقصرين ..

طلعت لينا وسكرت النور وخلت دلع تنام زي ما تعتقد ... بس دلع ما نامت .. سكرت النور وقعدت ع الارض متسندة على السرير .. وتفكر .. تفكر في طريقة عشان تهرب من هالجحيم اللي هي فيه .. تهرب من هالبيت اللي ما ذاقت فيه الراحة ابد ..

تذكرت يوم تهاوش سعود مع امه .. تذكرت شلون خافت مرة .. ما كانت تبغى أي احد يصير له مشاكل بسببها .. حست بالذنب لانه ام سعود هاوشت ولدها .. ما تدري ليش.. بس حست انه بسببها .. سعود وامه الحين متهاوشين .. هذي هي دلع .. انسانة طيبة وحساسة مهما سوو فيها ...

تذكرت ولدها .. ولدها اللي مات في بطنها .. اللي حتى ما شافت وجهه .. وبدون ما تحس نزلت دموعها وملت خدينها .. وسال كحل المرارة والقهر من عيونها ..

............. شوي الا تدخل ام سعود الغرفة وهي تفتح الباب بقوة ... وترجع تسكره بعد بقوة ..

خافت دلع ومسحت دموعها وقالت : شصاير..........؟؟
ام سعود : قومي .. قومي اشوف ..
دلع قامت بسرعة على رجولها : شفيييييييه ...؟؟
ام سعود مسكتها من يدها بقوة .. وقالت : شوفي .. انا خلاص وصلت معاي .. يا تقولين لي من هالحيوان اللي كنتي معاه وجبتي منه الولد والا والله لا ادفنك بيديني الثنتين هنا ف الغرفة
دلع تترجاها : خالتي الله يخليك صدقيني .. والله قلت لك الصدق ..
ام سعود معصبة وتهزها بقوة : أي صدق انت ووجهك .. بتقنعيني انه ولدي متورط فهالسالفة .. لا حبيبتي .. ولدي يمكن لعاب وصايع .. بس ما يوصل لدرجة يكون فيها زي اولاد الشوارع ............ فاهمة ..؟؟ فاتكلمي احسنلك ..

دلع تحلف : والله والله والله بالثلاثة انه هذا الصدق .. والله العظيم
ام سعود تهزها اقوى : لاتحلفين .. بسك حلف على كذب .. بس.....!!!! الحين بتقولين لي....

ومسكتها من رقبتها على الجدار مسوية بتخنقها : قسما بالله يا تتكلمين وتقولين لي اسم اللي سوى كذا والا والله لا اذبحك الحين بيديني ..

من قوة الضغط والامل ما قدرت دلع حتى تاخذ نفس ... فقامت تاشر بصعوبة لام سعود عشان تفكها ..

ويوم شافت ام سعود كذا خففت شوي وقالت وهي تسكر على اسنانها : قولي اسمه ... انطقي ... انطقي اشوووووووووف ......!!!!

دلع بصعوبة وهي تاخذ نفس : س ... سعود .. ...!!
ام سعود جنت : اقوووك قولي الحقيقة .. لا تكذبين .. قوووووولي ...
دلع تصيح : و .. والله .. والله .. و ..

قاطعتها ام سعود يوم سحبتها من يدها بقوة برى الغرفة ومشت فيها لغرفة سعود .. وهناك .. دخلت بسرعة ام سعود على سعود يوم كان نايم ..

ام سعود تصارخ : سعووود .. سعود قم جعلك ما تفيق انشالله ..

قام سعود متخرع .. وفتح الابجورة اللي جنبه وبدى يستوعب اللي يشوفه ..

سعود : شفيكم ..؟؟؟ شصااار .......؟؟!؟!
ام سعود قوووم اشوف ووقف على حيلك وصحصح معااااااي ..

فتح سعود عيونه ع الاخير يوم شاف امه ماسكة دلع من شعرها ونازلة فيها ضرب ..

سعود يصارخ : يماا اتركي البنت .. خلاص ذبحتيها ......!!!

بس ام سعود ولا كانه احد يكلمها .. بس تضرب بهالبنت ودلع المسكينة ما غير تتوجع وتصارخ وتصيح .. وماهي قادرة تتحمل ... لين ما قام سعود وسحب دلع بالقوة من امه وحضنها يهديها ...

ام سعود فتحت عيونها ع الاخير : سعوود!!!! يعني صدق اللي قالته ... يعني انت ابو ذاك الكلب .. انت ابوووووووه ..؟!؟!!؟!؟!؟

سعود من الخوف والرعب سكت .. ما عرف ينطق .. ما غير يسمع شهقات دلع ف حضنه .. والخوف اللي مسيطر عليه من امه اللي واقفة قدامه ..

سعود منفعل : يما خلاص .. والله حرام عليك .. البنت مسكينة .. قلنا ادبيها .. بس مو لهالدرجة .. البنت شوي وتموووت تحت يدينك ........!!!!!

ام سعود تحاول تسحبها بس سعود حاضنها بقوة وحاط راسها على صدره : لا يما .. خلاص وخري عنهااا .. خلاااااااااص ....

ام سعود ماسكتها من ظهرها بقوة : مافي .. والله لا اءدها هللي ما تربت .. انا لا اعيد تبيتها من جديد .... الكلبة قليلة الحيااا .. انا اوريها ...

سعود يصارخ وهو يبعد امه بيده : خلااااااااص ... يكفي ... أي انا ... انا الابوووووووو ... انا ....

كل من ف الغرفة سكت .. حتى سعود نفسه .. وام سعود طالعت ولدها باستغراب واستفهام .. ماهي فاهمة وش يقول .. او بالاحرى ما توقعت هالرد منه ...

اما دلع بكانت ماهي متوقعة هالحركة منه ابد .. بس كل اللي تفكر فيها الحين هو ايش بيصير فيها وف سعود الحين .. اكيد بتنطرد من البيت .. وسعود بعد ..

سعود قطع هالسكوت : ارتحتي ..؟؟ هذا اللي كنتي تبغيه ..؟؟ انا ابو اللي موتتيه .. انا ابوووه .. هدى بالك...؟؟ فشيتي خلقك...؟؟

ام سعود ماهي مصدقة : ك .. كذاااااااب ... انت تبغى تدافع عنها بس لانها كاسرة خاطرك .. كذاااب .. انت ولدي .. انا ربيتك .. ما تسوي كا
سعود بقرف : انتي ..؟؟ من قال انك ربيتيني..؟؟ انتي خليتيني لتربية الشغالات والخدم اللي تدفعيلهم فلوس ...... مو تربيتك .. اصلا انتي المفروض تستحين لما نناديك يما .. لانك ما تستحقين هالتسمية ابد .. !!!!!!!!!!!!!!!!!

ام سعود : ا .. انا .. انا يا سعوود امك تقولي كذا .....؟!؟!؟ انا اللي حملت فيك وولدتك .. انا...؟؟

سكت سعود ووخر يدينه عن دلع عشان تتحرر من حضنه .. بس اللي كان مفاجأة لهم اثنينهم انه اول ما فتح سعود يدينه طاحت دلع ع الارض قدامه مغمى عليها ...

سعود استخف : !!!!!!!!!! دلع ... يما دلع مدري وش فيها .... الحقي عليها ..
ام سعود خافت : لا يكون ماتت ..؟!؟!؟

وعلى طول لبست عبايتها وسعود شال دلع وودوها للمستشفى ....

نهايه الجزء السابع